अंधश्रद्धेच्या नावाखाली मौलानाकडून मुलीचा अमानुष छळ, मुलीचे मानसिक संतुलन बिघडले, पॉक्सो कायद्यांतर्गत गुन्हा दाखल

चतरा : झारखंडमधील चतरा जिल्ह्यातील एका गावात अंधश्रद्धेची अतिशय धक्कादायक घटना समोर आली आहे. जिथे एका मौलानाने अल्पवयीन मुलीला भूतबाधा झाल्याचे सांगत तिला बरे करण्याच्या नावाखाली क्रूरतेच्या सर्व मर्यादा ओलांडल्या. भूत काढण्याच्या नावाखाली आरोपीने तरुणीला बेदम मारहाण करून तिचा चेहरा, ओठ, हात अगरबत्तीने जाळले. या भयंकर वेदना सहन न झाल्याने या मुलीचे मानसिक संतुलन बिघडले. याप्रकरणी आरोपी मौलानावर पॉक्सो कायद्यांतर्गत गुन्हा दाखल करण्यात आला आहे.

मिळालेल्या वृत्तानुसार, मुलीची प्रकृती खालावली होती. त्यामुळे तिच्या कुटुंबीयांची तिला रुग्णालयात नेण्याची इच्छा होती. मात्र, मौलाना वाहिद याने तिला बरे करण्याचा दावा करत तिला आपल्या घरी नेले. तेथे त्याने तिच्यावर उपचार सुरू केले. मुलीच्या वडिलांनी सांगितले की, वाहिदने अल्पवयीन मुलीला सतत चार दिवस घरी ठेवले आणि भयंकर वर्तन केले. भूत काढण्याच्या नावाखाली अल्पवयीन मुलीवर अमानुष मारहाण करून जळत्या अगरबत्तीने मुलीच्या तोंडावर, ओठावर आणि दोन्ही हातावर अनेक ठिकाणी वार केले.

दरम्यान, या शारीरिक व मानसिक छळामुळे पीडितेचे मानसिक संतुलन बिघडले. तिची प्रकृती बिघडल्याने तिला सदर हॉस्पिटल चतरा येथे नेण्यात आले, तेथून तिला रांची येथील RIMS मध्ये रेफर करण्यात आले. काही दिवसांच्या उपचारानंतर पीडितेला मेंटल असायलममध्ये पाठवण्यात आले आहे. लोकांचे म्हणणे आहे की आरोपी मौलानांविरुद्ध कडक कारवाई झाली नाही तर वाहिदसारखे समाजात पसरलेले अनेक मौलाना आणि ढोंगी लोक अनेकांना आपला बळी बनवतील. या प्रकरणी एफआयआर दाखल करण्यात आली असून या प्रकरणाचा तपास सुरू आहे. पोलिसांनी मौलानाला अटक केली असून त्याच्यावर पॉक्सो कायद्यानुसार कारवाई सुरू केली आहे.