मुंबई : धुळे शहराच्या वाढत्या लोकसंख्येनुसार नागरी सुविधा आणि उद्योग विस्तारासाठी लॉजिस्टिक हब (ड्राय पोर्ट व स्टोरेजसाठी विशेष टर्मिनल) उभारणे अत्यावश्यक आहे. यासाठी तांत्रिक, आर्थिक व लॉजिस्टिक दृष्टीने व्यवहार्यता तपासावी व तज्ज्ञांच्या सल्ल्यानुसार हब उभारण्याच्या कार्यवाहीस गती द्यावी, असे निर्देश मुख्यमंत्री देवेंद्र फडणवीस यांनी दिले.

धुळे महापालिकेच्या विविध प्रकल्पांबाबत विधानभवन येथे झालेल्या बैठकीत ते बोलत होते. यावेळी महसूल मंत्री चंद्रशेखर बावनकुळे, वनमंत्री गणेश नाईक, आमदार अनुप अग्रवाल, अपर मुख्य सचिव असिम गुप्ता, नगरविकास विभागाचे प्रधान सचिव डॉ. के. एच. गोविंदराज, ऊर्जा विभागाच्या अतिरिक्त मुख्य सचिव आभा शुक्ला, महाराष्ट्र औद्योगिक विकास महामंडळाचे मुख्य कार्यकारी अधिकारी पी. वेलरासू, धुळे जिल्हाधिकारी भाग्यश्री विसपुते (दूरदृश्य प्रणालीद्वारे), महापालिका आयुक्त अमिता दगडे-पाटील आदी उपस्थित होते.

मुख्यमंत्री फडणवीस म्हणाले की, धुळे येथे उद्योगांना आवश्यक सुविधा उपलब्ध करून द्याव्यात. तसेच देवपूर, वलवाडी व सखल भागात पावसाच्या पाण्याचा निचरा करण्याची व्यवस्था करण्यासह आपत्ती व्यवस्थापन विभागाशी समन्वय साधावा. धुळे शहराचा विस्तार आणि लोकसंख्या वाढ लक्षात घेऊन डीआय पाईपलाईन टाकणे, औद्योगिक प्रकल्पांसाठी सौर प्रकल्प बॅटरी स्टोरेजसह उभारणे, भुयारी मलनिस्सारण योजनेसाठी निधी मंजूर करणे याबाबतही सूचना दिल्या. तसेच, धुळे शहरास दरवर्षी पाणी वितरण व पथदिव्यांसाठी ३२ ते ३३ कोटी रुपयांचा वीज खर्च होत असून, हा भार कमी करण्यासाठी योग्य जागेवर सौर प्रकल्प उभारावेत. शहराचा विस्तार ४६.४६ चौ.कि.मी. वरून १०१.०८ चौ.कि.मी. पर्यंत झाला आहे. त्यामुळे वाढलेल्या हद्दीतील मुलभूत सोयींसाठी नगरोत्थान योजनेतून निधी मंजूर करावा, अशीही सूचना त्यांनी दिली.

याशिवाय, चाळीसगाव रोडलगत म्हाडाच्या जागेवर शॉपिंग सेंटर उभारणे आणि मौजे धुळे येथे नोकरदार महिलांसाठी वसतिगृह बांधण्यासाठी सकारात्मक कार्यवाही करावी, असे निर्देशही मुख्यमंत्री फडणवीस यांनी यावेळी दिले.

The post धुळ्यात उद्योग विस्तारासाठी लॉजिस्टिक हब उभारणीला गती द्या – मुख्यमंत्री देवेंद्र फडणवीस appeared first on थोडक्यात घडामोडी.

धुळे : धुळे शहरातील साक्रीच्या यशवंत नगर येथे एक हृदय पिळवटून टाकणारी घटना घडली आहे. आठ वर्षांच्या डिंपल मनोहर वानखेडे हिचा फुगा फुगवताना दुर्दैवी मृत्यू झाला. फुगा फुगवताना अचानक तो फुटला आणि त्याचा तुकडा डिंपलच्या घशात अडकला. यामुळे तिला श्वास घेण्यात अडचण येवू लागली आणि यात तिने जीव गमावला.

डिंपल आपल्या कुटुंबासोबत यशवंत नगर येथे राहत होती. ती घराच्या अंगणात खेळत असताना तिने फुगा फुगवला. त्यावेळी हा रबरी फुगा अचानक फुटला आणि त्याचा तुकडा डिंपलच्या घशात अडकला. घशात अडकलेला तुकडा श्वास घेण्यात अडचण निर्माण करू लागला आणि त्यामुळे डिंपल रडू लागली. घरीच्यांच्या लक्षात येताच त्यांनी तात्काळ आपल्या खाजगी वाहनाने तिला रुग्णालयात दाखल केलं. मात्र, डॉक्टरांनी चिमुकलीला तपासून मृत घोषित केलं.

डिंपलच्या मृत्यूने तिच्या कुटुंबाला धक्का बसला असून, परिसरात शोककळा पसरली आहे. पोलीस या प्रकरणी अधिक तपास करत आहेत. या घटनेची नोंद धुळे शहर पोलीस ठाण्यात करण्यात आली आहे.

The post धुळे : फुगा फुगवताना ८ वर्षांच्या चिमुकलीचा दुर्दैवी मृत्यू appeared first on थोडक्यात घडामोडी.

धुळे : ०६ – धुळे ग्रामीण विधानसभा मतदार संघात २०२४ ची निवडणूक शांततेत पार पडली आहे. भारतीय निवडणूक आयोगाच्या निर्देशानुसार मतदान २० नोव्हेंबर २०२४ रोजी व मतमोजणीची २३ नोव्हेंबर २०२४ रोजी प्रक्रिया पार पडली. यानंतर सोशल मीडियावर धुळे ग्रामीण मतदार संघातील अवधान मतदान केंद्रातील आकडेवारीबाबत अफवा व नागरिकांची दिशाभूल करणारी माहिती पसरवली जात असल्याचे निदर्शनास येत आहे. याबाबत शहानिशा केल्यावर ती अफवा असून फेक न्यूज व्हायरल करून चुकीची माहिती समाजात पसरवली जात असल्याची माहिती ०६ – धुळे ग्रामीण विधानसभा मतदारसंघाचे निवडणूक निर्णय अधिकारी तथा उपविभागीय महसूल अधिकारी रोहन कुवर यांनी दिली आहे. नागरिकांनी अफवा, चुकीच्या व दिशाभूल करणाऱ्या फेक न्यूजवर विश्‍वास ठेऊ नये. असे आवाहन निवडणूक निर्णय अधिकारी तथा उपविभागीय महसूल अधिकारी रोहन कुवर यांनी केले आहे.

सोशल मीडियावर सोमवार, दि. २५ नोव्हेंबर २०२४ रोजी सकाळपासून धुळे ग्रामीण मतदार संघातील काँग्रेसचे उमेदवार कुणाल पाटील यांना अवधान मतदान केंद्रावर शून्य मते मिळाली असून त्या जोडीला एका फेक व्हीडीओ क्लिपचा वापर करून शून्य मते मिळाल्याने आंदोलन सुरू आहे असे भासविण्याचा प्रयत्न दिसून येत आहे. प्रशासनाकडे ही बाब आल्यावर तिची शहानिशा, खातरजमा करण्यास सुरूवात झाली.

त्यानुसार धुळे ग्रामीण विधानसभा मतदार संघात अवधान येथे २४७, २४८, २४९, २५० असे एकूण चार मतदान केंद्र होते. त्यातील मतदानाच्या आकडेवारीनुसार मतदान केंद्र क्रमांक २४७ वर काँग्रेसच्या उमेदवारास २२७, मतदान केंद्र क्रमांक २४८ वर काँग्रेसच्या उमेदवारास २३४, मतदान केंद्र क्रमांक २४९ वर काँग्रेसच्या उमेदवारास २५२ व मतदान केंद्र क्रमांक २५० वर काँग्रेसच्या उमेदवारास ३४४ मते मिळाली आहेत. अवधान येथे चार मतदान केंद्रावर तीन मते नोटासह एकूण २ हजार ८८१ मतदान झाले. त्यात काँग्रेसच्या उमेदवाराला एकूण १ हजार ५७ मते मिळाली व भाजपचे उमेदवार राघवेंद्र उर्फ रामदादा पाटील यांना एकूण १७४१ मते मिळाली आहे.

प्राप्त वस्तुस्थिती पाहता सोशल मीडियावर अवधान मतदान केंद्रावर काँग्रेसच्या उमेदवाराला शून्य मते मिळाली असा खोडसाळ, अफवा पसरविणारा, चुकीचा व दिशाभूल करणारा संदेश पसरविला जात असल्याचे दिसून येत आहे. त्यामुळे नागरिकांनी अशा फेक न्यूजला, आंदोलनाच्या फेक व्हीडीओला प्रतिसाद देऊ नये व अफवा पसरू नये. तसेच असा बोगस संदेश व्हायरल करू नये, अफवांना बळी पडू नये, असे आवाहनही धुळे ग्रामीण मतदार संघाचे निवडणूक निर्णय अधिकारी तथा उपविभागीय महसूल अधिकारी रोहन कुवर यांनी केले आहे.

The post नागरिकांनी अफवांवर विश्‍वास ठेऊ नये, अवधान गावातील मतदानाबाबत खुलासा appeared first on थोडक्यात घडामोडी.

धुळे : सुलवाडे जामफळ कनोली उपसा सिंचन योजनेच्या जामफळ धरण बंदिस्त नलिका वितरण प्रणालीच्या माध्यमातून येत्या वर्षभरात धुळे जिल्ह्याच्या शिंदखेडा तालुक्यातील सव्वा लाख एकर जमीन सिंचनाखाली येणार असून या प्रकल्पामुळे या परिसरातील शेती ही सुजलाम सुफलाम होवून येथील परिसरात हरीत क्रांती होईल. असे प्रतिपादन राज्याचे उपमुख्यमंत्री देवेंद्र फडवणीस यांनी मौजे सोंडले, ता. शिंदखेडा येथे केले. सुलवाडे जामफळ कनोली उपसा सिंचन योजनेच्या जामफळ धरण बंदिस्त नलिका वितरण प्रणालीचा भूमिपूजन समारंभ उपमुख्यमत्री फडणवीस यांच्या हस्ते पार पडला, यावेळी ते बोलत होते.

उपमुख्यमंत्री फडवणीस म्हणाले की, आजचा दिवस धुळे जिल्ह्यासाठी महत्त्वाचा दिवस आहेत. आजपासून खऱ्या अर्थाने शिंदखेडा तालुक्याची दुष्काळमुक्तीकडे वाटचाल सुरू झाली आहेत. या प्रकल्पामुळे शिंदखेडा तालुक्यातील सव्वा लाख एकर जमीन सिंचनाखाली येणार आहेत. सुलवाडे जामफळ कनोली उपसा सिंचन योजनेला सन 1999 मध्ये मंजूरी दिली. सन 1999 मध्ये प्रशासकीय मान्यता मिळाल्यापासून 18 वर्षांत 26 कोटी निधी उपलब्ध झाला. तर गेल्या सात वर्षात 2100 कोटी रुपयांचा निधी देऊन या प्रकल्पाला चालना दिली. हा प्रकल्प पुर्ण होण्यासाठी प्रधानमंत्री नरेंद्र मोदींना समक्ष भेटून पश्चिम महाराष्ट्र व उत्तर महाराष्ट्राचा दुष्काळ कायमस्वरुपी दूर करण्यासाठी बळीराजा जलसंजिवनी योजनेत समाविष्ट करुन राज्याच्या दुष्काळी भागासाठी कृषी सिंचन योजनेतून 30 हजार कोटी रुपयांच्या प्रकल्पांना त्वरीत मंजूरी दिली.

सुलवाडे जामफळ उपसा सिंचन योजनेचे काम मोठ्या गतीने सुरू असून पुर्णत्वाकडे आहे, त्यानंतर तापी नदीचे जामफळ धरणात आलेले पाणी शिंदखेडा तालुक्यातील 54 गावांना जामफळ धरणातून 728 किलोमिटर लांबीच्या भूमिगत पाईप लाईनद्वारे शेतीसाठी पाणीपुरवठा होणार आहे. यामुळे या गावातील एकूण 42 हजार 513 हेक्टर जमीन एका वर्षात सिंचनाखाली येणार आहे. या कामासाठी माजी खासदार डॉ. सुभाष भामरे व आमदार जयकुमार रावल यांनी सतत पाठपुरावा केल्याचेही त्यांनी सांगितले.

तापी नदीतील पावसाळ्यातील वाहून जाणारे महाराष्ट्राचे हक्काचे 9.24 टी.एम.सी पाणी 5 पंपगृहांमध्ये स्थापित होणाऱ्या 75 हजार 458 एचपी क्षमतेच्या 32 पंपाद्वारे उपसा करून शिंदखेड्यातील 54 गावातील 42 हजार 513 हेक्टर तर धुळे तालुक्यातील 49 गावातील 10 हजार 207 हेक्टर क्षेत्र सिंचनाखाली येणार आहे. तसेच हे पाणी पांरपरिक पद्धतीने कालवा वितरण प्रणाली ऐवजी गुरुत्वीय बंदिस्त वितरण प्रणालीद्वारे देण्यात येणार असल्याने वीजेचा खर्च कमी येणार आहे. येत्या काळात शेतकऱ्यांना सोलरमार्फत वीज पुरवठा करण्यात येऊन शेतकऱ्यांना वर्षभर दिवसा वीज देण्यात येणार असल्याचे त्यांनी सांगितले. खान्देशातील प्रकाशा बुराई सिंचन योजना, अनेर मध्यम प्रकल्प, वाडी शेवाडी मध्यम प्रकल्पांना सुधारित प्रशासकीय मान्यता दिली असल्याचे त्यांनी सांगितले. त्याचबरोबर मनमाड-धुळे-इंदौर रेल्वेमार्गामुळे भविष्यात धुळे जिल्ह्याच्या औद्योगिक विकासाला गती मिळणार असल्याचे त्यांनी सांगितले. तसेच महायुती सरकारने राज्यातील नागरिकांसाठी अनेक योजना आणल्या आहेत. मुख्यमंत्री माझी लाडकी बहीण योजना, मुलींना मोफत शिक्षण, महिलांना एस.टी बस मध्ये 50 टक्के सवलत, मुख्यमंत्री युवा प्रशिक्षण योजनेत 10 लाख युवकांना रोजागार मिळणार असल्याचे त्यांनी सांगितले. त्याचबरोबर धुळे जिल्ह्यातील सर्व प्रकल्पांना निधीची कमतरता भासू देणार नाही असेही त्यांनी सांगितले.

सुलवाडे जामफळ कनोली प्रकल्प शेतकऱ्यांना जीवनदान देणारा-गिरीश महाजन
पालकमंत्री महाजन म्हणाले की, आजचा ऐतिहासिक दिवस आहे. सुलवाडे जामफळ योजनेस 1999 ला प्रशासकीय मान्यता मिळाली त्यानंतर प्रकल्पास आवश्यक निधी उपलब्ध करून प्रकल्प जलदगतीने पूर्ण करून तसेच दुष्काळग्रस्त भागातील जनतेला लवकरात लवकर सिंचन सुविधा उपलब्ध करून देणे आवश्यक असल्याने या योजनेचा समावेश प्रधानमंत्री नरेंद्र मोदी यांच्या नेतृत्वात अवर्षणप्रवण व शेतकरी आत्महत्याग्रस्त भागातील 91 प्रकल्पांसोबत केंद्र शासनाच्या बळीराजा जल संजीवनी योजनेत समावेश करण्यात आला. प्रकल्प पूर्ण करण्याकरिता रु. ५१८ कोटी केंद्र अर्थसहाय्य, रु. १५५० कोटी नाबार्ड चे अर्थसहाय्य व रु. ३३९ कोटी राज्य सरकारचा निधी असे एकूण रु. २४०७ कोटी निधी मंजूर करून दिला आहे. तेव्हापासून योजनेचे काम गतीने सुरू असून आतापर्यंत योजनेचे ७३ टक्के काम पूर्ण झाले आहे. या योजनेस केंद्र व राज्य शासनाच्या माध्यमातून रु.२१२० कोटी एवढा निधी उपलब्ध करून देण्यात आला आहे. त्यामुळे येत्या काळात जवळपास सव्वा लाख एकर क्षेत्र सिंचनाखाली येणार आहे. हा प्रकल्प येथील शेतकऱ्यांना जीवनदान देणार ठरणार आहे. गेल्या दहा वर्षांत प्रधानमंत्री नरेंद्र मोदी यांच्या नेतृत्वाखालील सरकारने तसेच राज्यातील महायुती सरकारने अनेक विकास योजना आणल्या आहेत. रस्ते, रेल्वे, विमानसेवा, रुग्णालय, सर्व नागरिकांना 5 लाख रुपयांचा मोफत विमा योजना, अंत्योदय योजनेतंर्गत मोफत धान्य योजना, महिलासाठी मोफत सिलेंडर, शेतकऱ्यांचे वीज बील माफ, मुलींना उच्च शिक्षण मोफत अशा अनेक योजना असल्याचे त्यांनी यावेळी सांगितले.

येत्या वर्षभरात प्रत्येक शेतकऱ्यांच्या शेतापर्यंत पाणी येणार-आमदार रावल
आमदार जयकुमार रावल म्हणाले की, जामफळ धरणावरून शिंदखेडा तालुक्यातील 54 गावांना शेतीसाठी थेट पाईपलाईनद्वारे पाणी पुरवठा करणाऱ्या ‘बंदिस्त नलिका वितरण प्रणाली’ (PDN) योजनेच्या शुभारंभ आज राज्याचे उपमुख्यमंत्री फडवणीस यांच्या हस्ते पार पडला. शेतकरी शिव संवाद विकास यात्रेची सुरुवात 5 ऑगस्ट ते 8 सप्टेंबर अशी एकूण 35 दिवस 161 गावामधून करण्यात आली. या यात्रेस नागरिकांचा प्रचंड प्रतिसाद मिळाला. शिंदखेडा तालुक्यासाठी 15 हजार सिंचन विहिरी दिल्यात आहे. सुलवाडे जामफळ योजनेमुळे शिंदखेडा तालुक्यातील 54 गावांना जामफळ धरणातून 728 किलोमिटर लांबीच्या भूमिगत पाईपलाईनद्वारे शेतीसाठी पाणीपुरवठा होणार आहे. यामुळे या गावातील एकूण 42 हजार 513 हेक्टर जमीन एका वर्षात सिंचनाखाली येणार असल्याने शिंदखेडा तालुका कायमचा दुष्काळमुक्त होणार असून येत्या दीड वर्षांत प्रत्येक शेतकऱ्यांच्या शेतापर्यंत पाणी येणार असल्याचे त्यांनी यावेळी सांगितले.

माजी खासदार डॉ. भामरे म्हणाले की, सुलवाडे जामफळ ही जिल्ह्यासाठी संजिवनी ठरणारी योजना आहे. ही योजना मंजुरीसाठी केंद्र सरकारकडे सातत्याने पाठपुरावा केल्यामुळे या योजनेला 2400 कोटींचा निधी मंजूर झाला असून या योजनेचे 73 टक्के कामपूर्ण झाले आहे. 9 टीएमसी पाण्यामुळे शिंदखेडा तालुक्यातील 54 तर धुळे तालुक्यातील 49 गावांना या योजनेचा लाभ मिळणार असल्याचे त्यांनी सांगितले.

यावेळी केंद्रीय जलशक्ती मंत्री सी. आर. पाटील यांनी चित्रफितीद्वारे मार्गदर्शन केले. कार्यक्रमाच्या सुरुवातीस उपमुख्यमंत्री फडणवीस यांच्यासह मान्यवरांनी धरणाच्या साईटला भेट देऊन पाहणी केली. कार्यक्रमाचे प्रास्ताविक तापी पाटबंधारे विकास महामंडळाचे संचालक ज. द. बोरकर यांनी केले. तर उपस्थितांचे आभार अधिक्षक अभियंता खांडेकर यांनी मानले.

कार्यक्रमास पालकमंत्री गिरीश महाजन, जिल्हा परिषद अध्यक्ष धरती देवरे, खासदार डॉ. शोभा बच्छाव, आमदार अमरीश पटेल, जयकुमार रावल, काशिराम पावरा, मंजुळा गावित, जलसंपदा विभागाचे अपर मुख्य सचिव दीपक कपूर, जिल्हाधिकारी जितेंद्र पापळकर, जिल्हा परिषदेचे मुख्य कार्यकारी अधिकारी विशाल नरवाडे, जिल्हा पोलीस अधिक्षक श्रीकांत धिवरे, तापी पाटबंधारे विकास महामंडळाचे कार्यकारी संचालक ज. द बोरकर, अधिक्षक अभियंता सु. स, खांडेकर, माजी खासदार डॉ. सुभाष भामरे, माजी आमदार राजवर्धन कदमबांडे यांच्यासह मान्यवर उपस्थित होते.

The post येत्या वर्षभरात धुळे जिल्ह्यातील सव्वा लाख एकर जमीन सिंचनाखाली येणार appeared first on थोडक्यात घडामोडी.

मुंबई : धुळे जिल्ह्यातील शाळांचे स्ट्रक्चरल ऑडिट करण्यात आले आहे. ज्या शाळांचे स्ट्रक्चरल ऑडिट राहिले आहे, अशा शाळांनी लवकरच स्ट्रक्चरल ऑडिट करावे, अशा सूचना देण्यात येतील, असे शालेय शिक्षण मंत्री दीपक केसरकर यांनी विधानसभेत सांगितले.

सदस्य कुणाल पाटील यांनी धुळे जिल्ह्यातील शाळांचे स्ट्रक्चर ऑडिट करून शाळेत अग्निरोधक यंत्रणा बसविण्याबाबतचा प्रश्न उपस्थित केला होता. मंत्री श्री. केसरकर म्हणाले की, धुळे जिल्ह्यातील अनेक शाळांचे स्ट्रक्चरल ऑडिट झालेले आहे. यामध्ये जवळपास 80 टक्के शाळांमध्ये अग्निरोधक यंत्रणा कार्यान्वित करण्यात आली आहे. ज्या शाळांनी स्ट्रक्चरल ऑडिट केले नाही, अशा शाळांनी तातडीने स्ट्रक्चरल ऑडिट करून अग्निरोधक यंत्रणा बसवावेत अशा सूचना देण्यात येतील, असेही त्यांनी सांगितले.

The post धुळे जिल्ह्यातील स्ट्रक्चरल ऑडिट न झालेल्या शाळांचे ऑडिट लवकरच – मंत्री दीपक केसरकर appeared first on थोडक्यात घडामोडी.

धुळे : भारतीय सैन्य दलात सिक्कीम येथे कार्यरत लान्सनायक मनोज माळी यांना ६ जुलै, २०२३ रोजी सिक्कीम येथे उंच डोंगराळ प्रदेशात कर्तव्य बजावत असताना त्यांचा अचानक पाय घसरुन थेट ५०० ते ६०० फुट खोल दरीत कोसळून जखमी होऊन वीरमरण प्राप्त झाले. त्यांचे पार्थिव रविवारी सकाळी वाघाडी, ता. शिरपूर येथे आणण्यात आले. त्यानंतर सजविलेल्या वाहनातून त्यांची अंत्ययात्रा काढण्यात आली.

वीर जवान मनोज माळी यांचे पार्थिव अंत्यसंस्काराच्या ठिकाणी आल्यानंतर आमदार काशिराम पावरा, जिल्हाधिकारी जलज शर्मा, जिल्हा सैनिक कल्याण अधिकारी तथा मेजर डॉ. निलेश पाटील, तहसीलदार महेंद्र माळी, भूपेशभाई पटेल, जिल्हा परिषदेचे माजी अध्यक्ष डॉ तुषार रंधे, सैनिक कल्याण संघटक रामदास पाटील यांचेसह मान्यवरांनी पुष्पचक्र अर्पण करून अभिवादन केले. पोलिस दल आणि सैन्य दलाच्या तुकडीने हवेत गोळीबाराच्या तीन फैरी झाडत मानवंदना दिली. माजी सैनिकांनीही वीर जवानास अभिवादन केले.

वीर जवान माळी यांच्या भावाने मुखाग्नी दिला. आमदार पावरा व इतरांनी श्रद्धांजली वाहिली. यावेळी वीर जवान माळी यांचे कुटुंबीय, सैन्य दलाचे अधिकारी, माजी सैनिक, लोकप्रतिनिधी, पंचक्रोशीतील ग्रामस्थ, नातेवाईक, आप्तेष्ट मोठ्या संख्येने उपस्थित होते.

The post वीर जवान मनोज माळी यांच्यावर शासकीय इतमामात अंत्यसंस्कार, कर्तव्य बजावत असताना खोल दरीत कोसळून मृत्यू appeared first on थोडक्यात घडामोडी.

धुळे : धुळे जिल्ह्यातील चिपलीपाडा शिवार येथील मेणबत्ती बनवण्याच्या कारखान्याला लागलेल्या भीषण आगीत चार महिलांचा मृत्यू झाल्याची भयंकर घटना घडली आहे. या घटनेत दोन महिला गंभीररित्या भाजल्या असून त्यांना रुग्णालयात उपचारासाठी दाखल करण्यात आले आहे.

धुळे जिल्ह्यातील साक्री तालुक्यात असलेल्या निजामपूर गावाजवळ असलेल्या चिपलीपाडा शिवार येथील मेणबत्ती बनवण्याच्या कारखान्यात भीषण आग लागली. या आगीत चार महिलांचा मृत्यू झाला. मृतांमध्ये आशाबाई भैया भागवत (वय ३५ वर्ष) आणि राजश्री भैया भागवत (वय १५ वर्ष), नयना संजय माळी, सिंधुबाई धुडकू राजपूत या चौघींचा समावेश असल्याची माहिती मिळाली आहे. मृत मजूर हे जैताने येथील रहिवाशी असल्याचे समजते. जखमींना नंदुरबार येथील जिल्हा रुग्णालयात उपचारासाठी दाखल करण्यात आले आहे.

पोलीस अधीक्षक संजय बारकुंड यांनी सांगितलं की आगीच नेमकं कारण चौकशीत समोर येईल. या प्रकरणी निजामपूर पोलिसांनी एका संशयिताला ताब्यात घेतलं असल्याची माहिती मिळाली आहे.

The post मोठी बातमी : धुळ्यात मेणबत्तीच्या कारखान्यात भीषण आग, चार महिलांचा मृत्यू appeared first on थोडक्यात घडामोडी.

धुळे : धुळे शहरात रात्री एका मद्यपी टॅंकर चालकाने चांगलाच धूडगूस घातला आहे. या टँकर चालकाने शहरातील अनेक वाहनांना उडवलं. या घटनेमध्ये अनेक वाहनचालक जखमी झाले आहेत. शहरातील फाशीपूल ते संतोषी माता चौकादरम्यान ही घटना घडली. पोलिसांनी प्रसंगावधान राखत या टँकर चालकाला वेळीच थांबवल्यानं मोठा अनर्थ टळला आहे. पोलिसांनी या टँकर चालकाला ताब्यात घेतले असून, त्याचे नाव राजेंद्रसिंग सकट असल्याची माहिती समोर येत आहे.

घटनेबाबत अधिक माहिती अशी की, शनिवारी रात्री एका मद्यपी टँकर चालकाने अनेक वाहनांना उडवले. ही घटना शहरातील फाशीपूल ते संतोषी माता चौकादरम्यान घडली. राजेंद्रसिंग सकट असं या टँकरचालकाचं नाव आहे. राजेंद्रसिंग हा आपले टँकर घेऊन गुजरातकडे जात होता. मात्र तो दारूच्या नशेत असल्यानं त्याने धुळे शहरातील फाशीपूल ते संतोषी माता चौकादरम्यान अनेक वाहनांना उडवलं. या घटनेत काही वाहनचालक जखमी झाले आहेत. पोलिसांकडून या टँकरचालकाला ताब्यात घेण्यात आलं आहे.

या टँकरचालकाला वेळीच रोखण्यात पोलिसांना यश आलं. त्यामुळे मोठा अनर्थ टळला आहे. या टँकर चालकाने तोपर्यंत अनेक वाहनांना उडवले होते. या घटनेत अनेक वाहनचालक जखमी झाले आहेत. पोलिसांनी या टँकर चालकाला ताब्यात घेतले असून, चौकशी सुरू असल्याची माहिती दिली.

The post धक्कादायक घटना समोर, धुळ्यात मद्यपी टँकर चालकाचा धूडगूस; अनेक वाहनांना उडवलं, मोठं नुकसान appeared first on थोडक्यात घडामोडी.

ठाणे : ठाणे जिल्ह्यातील मुंब्रा रेल्वे स्थानकावर रेल्वेची धडक बसल्याने 22 वर्षीय तरूणाचा मृत्यू झाल्याची दुर्दैवी घटना समोर आली आहे. ही घटना रेल्वेस्थानकावरील सीसीटीव्हीत कैद झाली आहे. धुळे जिल्ह्यातील वडजाई गावचा रामेश्वर भरत देवरे (वय 22) हा तरूण सैन्य भरतीसाठी मुंबईत आला होता. या भरतीसाठी वडजाई आणि परिसरातून सुमारे 25 तरुण गेलेले आहेत.

पोलिसांनी दिलेल्या माहितीनुसार, रामेश्वर देवरे मुंब्रा येथील लष्कर भरतीसाठी गेला होता. दरम्यान, मुंब्रा रेल्वे स्थानकावर रात्री 11 वाजता ही घटना फलाट क्रमांक-3 वर घडली. मुंब्रा रेल्वे स्थानकावर उभा असताना त्याला अचानक मळमळल्यासारखे जाणवले आणि उलटी आल्यासारखे वाटले. त्यामुळे तो धावत रेल्वे रुळाच्या दिशेने गेला आणि खाली बसला. उलटी होत असल्याने त्याने कानावर हात ठेवले होते. मात्र, याचवेळी सुसाट आलेल्या रेल्वेची त्याला जोरदार धडक बसली. त्यानंतर रामेश्वर सुमारे दहा ते बारा फुटापर्यंत लांब फेकला गेला. जोरदार धडकेत त्याच्या डोक्याच्या मागील बाजूस गंभीर दुखापत झाली आणि त्याचा जागीच मृत्यू झाला.

मुंब्रा स्थानक @mumbairailusers pic.twitter.com/7qGpQT88zm

— Harshad Chambawane (@Harshchambawane) September 22, 2022

या घटनेनंतर रेल्वे पोलिस तेथे दाखल झाले. प्राथमिक तपासानंतर शवविच्छेदन करण्यात आले. त्यानंतर मध्यरात्री रुग्णवाहिका रामेश्वर याच्या गावी दाखल झाली. रामेश्वरच्या अशा अचानक मृत्यूने त्याच्या कुटुंबियांना आणि गावकऱ्यांना मोठा धक्का बसला असून गावात शोककळा पसरली आहे. रामेश्वर यांच्या पश्चात आई-वडील, मोठी बहिण व लहान भाऊ असा परिवार आहे.

The post मुंब्रा रेल्वे स्थानकावर रेल्वेची जोरदार धडक बसल्याने 22 वर्षीय तरूणाचा मृत्यू, हृदय पिळवटून टाकणारी घटना… appeared first on थोडक्यात घडामोडी.

धुळे : मुंबई-आग्रा महामार्गावर तीन वाहनांमध्ये विचित्र अपघात झाला. ट्रक, रिक्षा आणि क्रुझर या तीन वाहनांमध्ये रात्री १ वाजेच्या दरम्यान अपघात झाला, या अपघातात तीन जणांचा जागीच मृत्यू झाला तर 9 जण गंभीर जखमी झाले आहेत. धुळे शहरापासून काही किलोमीटर अंतरावर असलेल्या पुरमेपाडा याठिकाणी हा अपघात घडला. जखमींना धुळे जिल्हा शासकीय रुग्णालयात उपचारासाठी दाखल करण्यात आले आहे.

मालेगावकडून मध्यप्रदेशकडे भरधाव वेगात जाणाऱ्या कांद्याच्या ट्रकने समोर असलेल्या रिक्षाला जोरदार धडक दिली. यामुळे रिक्षाचालकाचं नियंत्रण सुटलं आणि रिक्षा समोरून विरुद्ध दिशेने येणाऱ्या क्रूजरवर जाऊन आदळली. यात रिक्षा आणि क्रूजर गाडीचा चुराडा झाला. या विचित्र अपघातात ३ जणांचा जागीच दुर्दैवी मृत्यू झाला. जखमींमधील काहींची प्रकृती चिंताजनक आहे. घटनेची माहिती मिळताच धुळे तालुका पोलीस तात्काळ घटनास्थळी दाखल झाले. पोलीस प्रशासनाकडून रात्री उशिरापर्यंत बचावकार्य सुरु होते.

या अपघातातील मृतांची नावे :

1. सरलाबाई पंडित सोनवणे (वय २९)
2. रिक्षा चालक रईस शेख
3. महेंद्र चुडामन पाटील (वय ५१)

जखमींची नावे :

1. विद्या भूषण कानडे (वय २१)
2. ताराबाई अशोक वसरे (वय ५०)
3. सुपडू बारकू वसरे (वय ५५)
4. कोयल प्रमोद सोनवणे (वय १२)
5. सुरेश नारायण सोनवणे (वय ६०)
6. प्रमोद रमेश सोनवणे (वय ४५)
7. वसंत पंडित वंजारी (वय ३३)
8. सुधीर अभिमान पाटील (वय ५४ )
9. अरुणाबाई प्रमोद पाटील (वय ४५)

The post तीन वाहनांचा विचित्र अपघात, तीन जणांचा जागीच मृत्यू तर 9 जण जखमी appeared first on थोडक्यात घडामोडी.