अहिल्यानगर : संगमनेर शहरातील अवैध कत्तलखाने व इतर गुन्हेगारी कारवायांबाबत स्थानिक पोलिस अधिकारी शासनाला खोटी माहिती देत असल्याचा गंभीर आरोप आमदार अमोल खताळ यांनी राज्य विधिमंडळात केला आहे. विधिमंडळात लक्षवेधी सूचनेद्वारे बोलताना आमदार खताळ यांनी सांगितले की, संगमनेरचे उपविभागीय पोलीस अधिकारी व शहर पोलीस निरीक्षक यांनी गोवंश हत्याबंदी कायद्यातील कारवाई बाबत चुकीची व दिशाभूल करणारी माहिती मुख्यमंत्री व गृहमंत्र्यांना दिली आहे. प्रत्यक्षात या प्रकरणात अद्याप एमपीडीए अंतर्गत एकाही कत्तलखाना चालकावर कठोर कारवाई करण्यात आलेली नाही.

याप्रकरणी त्वरित संबंधित अधिकाऱ्यांना निलंबित करण्याची तसेच जिल्हा पोलीस अधीक्षकांना खातरजमा न केल्याबद्दल ताकीद देण्याची मागणी आमदार खताळ यांनी केली.

अवैध पदार्थांची खुलेआम विक्री
शहरातील महाविद्यालये, रुग्णालये, धार्मिकस्थळे आणि झोपडपट्टी परिसरात गुटखा, मादक पदार्थ, गांजा, अफू, नशेच्या गोळ्या व सिगारेट यांची खुलेआम विक्री होत असून, अनेक तरुण व विद्यार्थ्यांचे भवितव्य धोक्यात आले आहे.

जुगार आणि दारूचे अड्डे फोफावत आहेत
संगमनेर परिसरात मटका व ऑनलाईन जुगाराचे सत्र वाढले असून, बेरोजगार तरुण मोठ्या प्रमाणावर या जाळ्यात अडकले आहेत. तसेच गावठी दारूची निर्मिती, वाहतूक व विक्रीही मोठ्या प्रमाणावर सुरू असल्याची माहिती त्यांनी सभागृहात मांडली.

पोलिसांकडून दुर्लक्ष
अवैध धंद्यांवर नियंत्रण ठेवण्यासाठी पोलिसांकडून गंभीर दुर्लक्ष होत असून, कारवाईची भाषा फक्त कागदावर मर्यादित राहिली असल्याचा आरोप आमदार खताळ यांनी केला.

याप्रकरणी दोषींवर तातडीने कठोर कारवाई करण्याची मागणी करत आमदार खताळ यांनी गृहमंत्र्यांचे लक्ष वेधले.

The post संगमनेरातील कत्तलखाने व अवैध धंद्यांकडे पोलिसांचे दुर्लक्ष – आमदार खताळ यांचा सभागृहात आरोप appeared first on थोडक्यात घडामोडी.

शिबलापूर, ता. संगमनेर, जि. अहिल्यानगर – भाग्योदय नागरी पतसंस्थेच्या संचालक मंडळाच्या नुकत्याच झालेल्या निवडणुकीत श्री. प्रमोद सतीश बोंद्रे यांची चेअरमन पदी तर श्री. सुभाष भागवत मुन्तोडे यांची व्हा. चेअरमन पदी बिनविरोध निवड करण्यात आली. नवनिर्वाचित चेअरमन आणि व्हा. चेअरमन यांनी संस्थेच्या विकासासाठी स्पष्ट दिशा ठरवली आहे. संस्थेच्या कारभारात पारदर्शकता आणि गतिमानता राखण्याची आणि सदस्यांना अधिकाधिक सुविधा व आर्थिक प्रगतीसाठी प्रयत्नशील राहण्याची ग्वाही दिली. ही निवड संस्थेच्या भविष्यातील प्रगतीसाठी महत्त्वपूर्ण ठरणार आहे, असं मानलं जात आहे. निवडणुकीनंतर संस्थेच्या सदस्यांनी नवनिर्वाचित नेतृत्वाचे स्वागत करून, त्यांच्या नेतृत्वाखाली संस्थेच्या विकासाची आशा व्यक्त केली आहे.

The post भाग्योदय नागरी पतसंस्थेच्या चेअरमन व व्हा. चेअरमन पदांची बिनविरोध निवड appeared first on थोडक्यात घडामोडी.

अहमदनगर : लग्नाला अवघे काही महिने झालेल्या नवदाम्पत्याचे मृतदेह आढळल्याची हृदयद्रावक घटना घडली आहे. या जोडप्याचे मृतदेह दोरीच्या सहाय्याने झाडाला लटकलेल्या अवस्थेत आढळून आले. या घटनेने त्यांच्या कुटुंबीयांवर दु:खाचा डोंगर कोसळला आहे. मात्र, या दोघांनी हे टोकाचं पाऊल का उचललं, याबाबत अद्याप काहीही माहिती मिळालेली नाही.

अहमदनगर जिल्ह्यातील संगमनेर तालुक्यातील साकूर येथे ही दुर्दैवी घटना घडली. रविवारी (११ ऑगस्ट) रात्रीच्या सुमारास ही घटना उघडकीस आली. वैभव दत्तात्रेय आमले (वय २२) आणि स्नेहा वैभव आमले (वय २०) या दोघांचा काही महिन्यांपूर्वीच विवाह झाला होता. लग्नाच्या काही महिन्यानंतरच नवविवाहित दाम्पत्यांने रविवारी सायंकाळी साकूर येथील मुळा नदीच्या जवळील मांगमळीत एका झाडाला दोरीच्या सहाय्याने गळफास घेत आत्महत्या केल्याची चर्चा आहे. या घटनेने परिसरात एकच खळबळ उडाली असून या नवदाम्पत्याने आत्महत्या का केली असावी याबाबत तर्कवितर्क सुरु आहेत. परंतू ही आत्महत्या आहे की घातपात याबाबत घारगाव पोलीस तपास करत आहेत.

दरम्यान, घटनेची माहिती मिळताच स्थानिक रहिवासी आणि साकूर गावचे ग्रामस्थ घटनास्थळी पोहोचले आणि त्यांनी घटनेची माहिती घारगाव पोलिसांना दिली. घारगाव पोलीस स्टेशनचे कर्मचारी घटनास्थळी दाखल झाले आणि पंचनामा केला. यामागील कारण मात्र अद्याप समजू शकलेले नाही. या नवदाम्पत्याने आत्महत्या केली की हा अन्य काही प्रकार आहे? आत्महत्या केली असेल तर त्यामागील नेमकं काय कारण? याबाबत अधिक तपास घारगाव पोलीस करीत आहे.

The post नवविवाहित दाम्पत्य मृतावस्थेत आढळल्याने खळबळ, आत्महत्या की घातपात याबाबत तपास सुरु appeared first on थोडक्यात घडामोडी.

अहमदनगर : संगमनेर तालुक्यातील हंगेवाडी येथील नेताजी सुभाषचंद्र बोस ग्रामीण बिगर शेती सहकारी पतसंस्थेला महाराष्ट्र राज्य सहकारी पतसंस्था फेडरेशनचा नाशिक विभागातून तिसऱ्या क्रमांकाचा दीपस्तंभ पुरस्कार मिळाला आहे. १९ सप्टेंबर २०२२ रोजी गणपतीपुळे येथे १२.३० वाजता उद्योग मंत्री उदय सामंत, सहकार मंत्री अतुल सावे, भारतीय रिझर्व्ह बँकेचे संचालक सतीश मराठे, सहकार भारतीचे महामंत्री उदय जोशी, महाराष्ट्र राज्य सहकारी बँकेचे अध्यक्ष विद्याधर अनास्कर यांच्या प्रमुख उपस्थितीत या पुरस्कराचे वितरण करण्यात आले आहे. काका कोयटे, अध्यक्ष महाराष्ट्र राज्य सहकारी पतसंस्था फेडरेशन मर्यादित यांच्या हस्ते पुरस्कार प्रदान करण्यात आला.

यावेळी चेअरमन शिवाजीराव भोसले, व्हाईस चेअरमन प्रतिक गणपतराव सांगळे, संचालक देवराम सदाशिव घुगे, संचालक प्रमोद सतीश बोंद्रे, संचालक सौ. शारदा अण्णासाहेब नागरे, संचालक भिमराज गंगाधर केकान, संचालक देवराम पांडुरंग गायकवाड तसेच संचालक व व्यवस्थापक सोमनाथ वाघ हे उपस्थित होते.

नेताजी सुभाष चंद्र बोस पतसंस्थेचे संस्थापक व अहमदनगर जिल्हा बँकेचे संचालक, सहकार महर्षीं भाऊसाहेब थोरात सहकारी साखर कारखान्याचे संचालक गणपतराव पुंजाजी सांगळे यांच्या नेतृत्वाखाली नेताजी सुभाषचंद्र बोस पतसंस्थेने सहकारात आदर्शवत कार्य केले आहे. अल्पवधीत सर्वसामान्यचा विश्वास संपादन केला आहे. पतसंस्थेने सभासदांकरिता आधुनिक तंत्रज्ञानाचा वापर करून सुविधा देण्यावर भर दिला आहे. तसेच सामाजिक कार्यातही पतसंस्था अग्रेसर आहे. आरोग्यशिबिर, नेत्ररोग शिबीर, रोटरी आय केअर यांच्या मार्फत मोफत आरोग्य तपासणी शिबीर, महिला स्वयंसहायता बचतगट रोजगारासाठी महिला मेळावे, महिला व्यावसायिक मार्गदर्शन शिबिराचे आयोजन करण्यात येते. १० कोटी ते २० कोटी ठेवी असलेल्या गटात नेताजी सुभाष चंद्र बोस पतसंस्थेला महाराष्ट्र राज्य सहकारी पतसंस्था फेडरेशनचा नाशिक विभागातून तिसऱ्या क्रमांकाचा दीपस्तंभ पुरस्कार मिळाला आहे.

पतसंस्थेच्या प्रगतीच्या आलेखात संस्थापक चेअरमन गणपतराव पुंजाजी सांगळे, संचालक सहकार महर्षी भाऊसाहेब संतुजी थोरात सहकारी साखर कारखाना संगमनेर, संचालक अहमदनगर जिल्हा सहकारी बँक यांच्या नेतृत्वाखाली पतसंस्थेचे विद्यमान चेअरमन शिवाजी भोसले, व्हा. चेअरमन प्रतिकराव सांगळे, संचालक व व्यवस्थापक सोमनाथ वाघ, कर्मचारी, सभासद, ठेवीदार, हितचिंतक यांचे मोलाचे योगदान राहिले आहे.

पतसंस्थेला मिळालेल्या पुरस्काराबद्दल माजी महसूलमंत्री आमदार बाळासाहेब थोरात, आमदार डॉ. सुधीर तांबे, दुर्गाताई तांबे, राजहंस दुधचे चेअरमन रणजितसिंह देशमुख, सत्यजित तांबे, इंद्रजित थोरात आदींनी अभिनंदन केले आहे.

The post दीपस्तंभ पुरस्काराचे वितरण : हंगेवाडीमधील नेताजी सुभाषचंद्र बोस ग्रामीण बिगर शेती सहकारी पतसंस्थेला राज्यस्तरीय पुरस्कार appeared first on थोडक्यात घडामोडी.

संगमनेर येथील ३० खाटांच्या ग्रामीण रुग्णालयाचे ५० खाटांच्या उपजिल्हा रुग्णालयामध्ये श्रेणीवर्धन करण्यासाठी आवश्यक असणारा प्रस्ताव सार्वजनिक आरोग्य विभागाने तातडीने तयार करावा, असे निर्देश महसूलमंत्री बाळासाहेब थोरात यांनी दिले. संगमनेर नगरपरिषदेच्या अंतर्गत येणाऱ्या कॉटेज रुग्णालयाचे रुपांतर महिला रुग्णालयात करण्याचा प्रस्ताव सार्वजनिक आरोग्य विभागास देण्यात आला आहे.

ग्रामीण रुग्णालयाचा उपजिल्हा रुग्णालय दर्जावाढ आणि कॉटेज रुग्णालयाचे महिला रुग्णालयात रुपांतर करणे याबाबतची आढावा बैठक महसूलमंत्री बाळासाहेब थोरात यांच्या अध्यक्षतेखाली मंत्रालयात आयोजित करण्यात आली होती. या बैठकीस सार्वजनिक आरोग्य मंत्री राजेश टोपे, आमदार सुधीर तांबे यांच्यासह सार्वजनिक आरोग्य विभागाचे अधिकारी उपस्थित होते.

बाळासाहेब थोरात म्हणाले की, ग्रामीण रुग्णालयात रुग्णांची होत असलेली गर्दी बघता या रुग्णालयाचे श्रेणीवर्धन तातडीने होणे आवश्यक आहे. संगमनेर तालुक्याचा होत असलेला विस्तार आणि येथील लोकसंख्या लक्षात घेता येथील नागरिकांना चांगल्या वैद्यकीय सेवा उपजिल्हा रुग्णालयात उपलब्ध होऊ शकतील. त्यामुळे उपजिल्हा रुग्णालय दर्जावाढीबाबतचा प्रस्ताव तातडीने तयार करण्यात यावा.

The post संगमनेर : ग्रामीण रुग्णालयाचे उपजिल्हा रुग्णालयामध्ये श्रेणीवर्धन करण्यासाठीचा प्रस्ताव तातडीने तयार करा, महसूलमंत्री बाळासाहेब थोरात यांचे निर्देश appeared first on थोडक्यात घडामोडी.

अहमदनगर : लिंग भेदभावाला प्रोत्साहन देणारं वादग्रस्त वक्तव्य केल्याच्या आरोपावरुन प्रसिद्ध कीर्तनकार निवृत्ती महाराज देशमुख इंदोरीकर यांच्याविरोधात संगमनेर जिल्हा सत्र न्यायालयात आज सुनावणी झाली. निवृत्ती महाराज इंदोरीकर यांच्याविरोधात पीसीपीएनडीटी कायद्यांतर्गत गुन्हा दाखल करण्यात आला आहे. त्याच प्रकरणी संगमनेर जिल्हा सत्र न्यायालयात सुनावणी सुरु आहे. या प्रकरणी पुढील सुनावणी 28 ऑक्टोबरला होणार आहे.

ऐच्छिक संतती प्राप्तीसाठी वादग्रस्त विधान केल्याच्या आरोपावरुन निवृत्ती महाराज देशमुख इंदुरीकर यांच्याविरोधात दाखल खटल्यात आपल्यालाही बाजू मांडू द्यावी यासाठी अंधश्रद्धा निर्मुलन समितीने हस्तक्षेप अर्ज दाखल केला होता. यावर आज संगमनेरच्या जिल्हा व सत्र न्यायालयात सुनावणी झाली. यावेळी बचाव पक्षाच्या वकीलांनी अंनिसच्या याचिकेला कडाडून विरोध केला, मात्र सरतेशेवटी जिल्हा व सत्र न्यायालयाचे न्यायाधिश डी.एस. घुमरे यांनी सदरची हस्तक्षेप याचिका मंजूर करतांना अ‍ॅड. रंजना गवांदे यांना अंनिसच्यावतीने लेखी स्वरुपात बाजू मांडण्याची परवानगी दिली. त्यामुळे इंदोरीकर महाराजांच्या अडचणी वाढणार आहेत. आता यापुढील सुनावणीत इंदोरीकर महाराज यांच्याविरोधात सरकारी वकिलासोबतच अंनिसचे वकिलही युक्तिवाद करणार आहेत.

The post इंदोरीकर महाराजांच्या अडचणीत वाढ, कोर्टात अंनिसचा वकीलही युक्तिवाद करणार appeared first on थोडक्यात घडामोडी.

मराठी चित्रपटांसह मालिकांमध्ये भूमिका साकारणाऱ्या नित्यश्री ज्ञानलक्ष्मी या मूळच्या संगमनेर तालुक्यातील मालुंजे गावच्या रहिवासी. कोरोनाच्या काळात मागील चार महिन्यांपासून त्या आपल्या गावी आहेत. या काळात वेळेचा सदुपयोग म्हणून त्यांनी आपल्या गावात त्यांच्या आजीच्या नावे अतिशय सुंदर बाग निर्माण केली.

नित्यश्री यांनी नुकताच आपला वाढदिवस आजीच्या नावे बाग उभारून साजरा केला. यावेळी त्यांनी आपल्या लहान भावंडांच्या मदतीने निरनिराळी फळझाडे, फुलझाडे तसेच शो ची देखील झाडे लावली. या बागेत लक्ष्यवेधक असे तुळशी वृंदावन देखील उभे केले आहे. वाढदिवशी त्यांच्या आई-वडिलांच्या हस्ते या बागेचं उदघाटन करण्यात आलं.

दरम्यान, ज्येष्ठ अभिनेते व ‘सह्याद्री देवराई’ चे प्रणेते सयाजी शिंदे यांनी मालुंजे येथे जाऊन ‘आजीची बाग’ ला भेट दिली. त्यांनी यावेळी बेल, रुद्राक्ष, आवळा, फणस, पारिजात, जांभूळ अशी अनेक रोपं आणली होती. त्यांनी ह्या रोपांचे वृक्षारोपण देखील केले. सयाजी शिंदे यांनी नागरे कुटुंबासमवेत चुलीवरील जेवणाचा आस्वाद देखील घेतला.

नित्यश्रीने याविषयी तिचे काही विचार मांडले. ती म्हणाली, मित्रांनो, आपला वाढदिवस हा आपल्या प्रत्येकासाठी खूप खास असतो आणि असायलाच हवा..त्या दिवशी आपण मोठमोठ्या पार्ट्या करतो,पैसे उधळतो..पण हे सगळं न करता आपण हा खर्च निसर्गासाठी केला तर? मी माझ्या प्रत्येक वाढदिवशी एक तरी झाड लावते आणि इतरांकडून लावून ही घेते..निसर्गाने आपल्याला खूप काही दिलं आहे त्यामुळे आपणही त्याला काही देणं लागतो..आपण लावलेलं झाड पुढील अनेक वर्षे सावली,ऑक्सिजन, फळं, फुलं देतं..झाड नसेल तर आपल्या अन्न,वस्त्र,निवारा या मूलभूत गरजा देखील पूर्ण होणार नाहीत,हा विचार केलाय तुम्ही? निसर्गाकडून आपण फक्त घेत आलोय,देण्यासाठी आपले हात कधी सरसावणार? झाडाचं आणि आपलं एक निस्वार्थी नातं आहे,तर हे नातं आपण प्रामाणिकपणे जपुया..

The post अभिनेत्री नित्यश्री ज्ञानलक्ष्मीने उभारली सुंदर बाग, सयाजी शिंदे यांनी दिली भेट appeared first on थोडक्यात घडामोडी.