मुंबई : पुणे शहरातील हडपसर आणि पिंपरी-चिंचवडमधील दापोडी-फुगेवाडी परिसरात विषारी दारू प्यायल्याने १२ नागरिकांचा मृत्यू झाल्याची घटना अत्यंत दुर्दैवी असून, या प्रकरणातील दोषींची गय केली जाणार नाही, असे उपमुख्यमंत्री सुनेत्रा अजित पवार यांनी स्पष्ट केले आहे. या प्रकरणाच्या मुळाशी जाऊन सखोल चौकशी करण्याचे आदेशही त्यांनी प्रशासनाला दिले आहेत.

या घटनेची गंभीर दखल घेत उपमुख्यमंत्री श्रीमती पवार यांनी पुणे व पिंपरी-चिंचवडचे पोलीस आयुक्त, राज्य उत्पादन शुल्क विभागाचे अधिकारी आणि स्थानिक प्रशासनाशी संपर्क साधला. या दुर्घटनेच्या मुळाशी जाऊन तपास करा आणि अशा बेकायदेशीर कृत्यांमध्ये सहभागी असलेल्या सर्वांवर कठोर कारवाई करावी, अशा स्पष्ट सूचना त्यांनी अधिकाऱ्यांना दिल्या.

आतापर्यंत या प्रकरणात ८ जणांना अटक करण्यात आली आहे. पोलीस आणि उत्पादन शुल्क विभागाकडून संयुक्तपणे तपास सुरू असून, या विषारी दारूचा पुरवठा कोठून झाला आणि यात कोणाचा सहभाग आहे, याचा शोध घेतला जात आहे, अशी माहितीही उपमुख्यमंत्री पवार यांनी दिली.

The post पुण्यात विषारी दारू प्यायल्याने १२ जणांचा मृत्यू, दोषींवर कठोर कारवाईचे आदेश appeared first on थोडक्यात घडामोडी.

पुणे : वाकड परिसरात २८ वर्षीय सॉफ्टवेअर इंजिनिअर महिलेची लग्नाच्या आमिषाने तब्बल ४२.६४ लाख रुपयांची फसवणूक करण्यात आल्याचा प्रकार समोर आला आहे. आरोपीने स्वतःची ओळख इस्रोतील शास्त्रज्ञ म्हणून करून दिली होती.

पीडित महिला हिंजवडी येथील एका नामांकित आयटी कंपनीत कार्यरत आहे. आरोपीची ओळख जयेश पाटील उर्फ आदर्श म्हात्रे अशी असून तो अलिबाग येथील रहिवासी असल्याचे पोलिस तपासात निष्पन्न झाले आहे.

मिळालेल्या माहितीनुसार, नोव्हेंबर २०२४ मध्ये या तरुणीने एका वैवाहिक वेबसाइटवर प्रोफाइल तयार केले. त्याच काळात आरोपीने तिच्याशी संपर्क साधला. संवाद वाढवत त्याने प्रत्यक्ष भेट घेतली आणि स्वतः इस्रोमध्ये कार्यरत असल्याचा दावा केला. हळूहळू त्याने विश्वास संपादन करत एकत्र राहण्याचे, मालमत्ता खरेदी करण्याचे आणि भविष्याची स्वप्ने दाखवली. नोव्हेंबर २०२४ ते जानेवारी २०२५ दरम्यान, विविध कारणे सांगत त्याने पैशांची मागणी केली. पीडितेने टप्प्याटप्प्याने एकूण ४२.६४ लाख रुपये त्याच्या खात्यात जमा केले.

दरम्यान, आरोपी इस्रोमध्ये नोकरी करत नसल्याची माहिती मिळाल्यानंतर पीडितेला संशय आला. तिने तत्काळ ऑनलाइन तक्रार नोंदवली. वाकड पोलिसांनी तातडीने तपास सुरू केला. सायबर यंत्रणांच्या मदतीने १६.६५ लाख रुपये गोठवून जप्त करण्यात आले. उर्वरित अंदाजे २७ लाख रुपयांचा शोध सुरू आहे.

प्राथमिक चौकशीत आरोपीने अशाच प्रकारे सुशिक्षित महिलांना लक्ष्य केल्याचे स्पष्ट झाले आहे. यापूर्वीही नवी मुंबई पोलिसांनी आरोपीला फसवणुकीच्या प्रकरणात अटक केली होती. तपासात आरोपीने गोव्यातील कॅसिनोसह विलासी जीवनासाठी ही रक्कम खर्च केल्याचेही समोर आले आहे.

सध्या आरोपी ४ मार्चपर्यंत नवी मुंबई पोलिसांच्या कोठडीत असून, रिमांड संपल्यानंतर वाकड पोलिस त्याला पुढील चौकशीसाठी ताब्यात घेणार आहेत.

मॅट्रिमोनियल साईट आणि सोशल मीडिया प्लॅटफॉर्मवर वाढत्या फसवणुकीच्या घटनांमुळे सायबर सुरक्षेचा प्रश्न ऐरणीवर आला आहे. तज्ज्ञांच्या मते, आर्थिक व्यवहार करण्यापूर्वी ओळख आणि नोकरीची खातरजमा करणे अत्यावश्यक आहे.

The post पुण्यात सॉफ्टवेअर इंजिनिअर महिलेला ४२.६४ लाखांचा गंडा, मॅट्रिमोनियल फ्रॉडचा धक्कादायक प्रकार appeared first on थोडक्यात घडामोडी.

पुणे : पुणे जिल्ह्यातील उरुळीकांचन जवळील सोरतापवाडी येथे सासरच्या छळामुळे एका विवाहितेने आत्महत्या केल्याची धक्कादायक घटना उघडकीस आली आहे. दीप्ती मगर चौधरी (वय अंदाजे 30) यांनी शनिवारी रात्री गळफास घेऊन आपले जीवन संपवले.

या प्रकरणी उरुळीकांचन पोलिस ठाण्यात पती रोहन चौधरी, सासू सुनिता चौधरी, सासरे कारभारी चौधरी आणि दीर रोहित चौधरी यांच्याविरोधात गंभीर स्वरूपाचा गुन्हा दाखल करण्यात आला आहे.

पोलिस तपासानुसार, दीप्ती आणि रोहन यांचा विवाह 2019 साली झाला होता. विवाहावेळी दीप्तीच्या कुटुंबीयांनी सुमारे 50 तोळे सोने दिले होते. मात्र, लग्नानंतरही सासरच्यांकडून तिच्यावर वारंवार मानसिक छळ करण्यात येत होता.

दीप्तीच्या आईने दिलेल्या तक्रारीनुसार, सासरच्या मंडळींकडून तिच्या चारित्र्यावर संशय घेतला जात होता. तसेच “दिसायला सुंदर नाही”, “घरकाम जमत नाही” अशा अपमानास्पद आरोपांद्वारे तिचा सातत्याने छळ केला जात होता.

मुलीचा संसार वाचावा म्हणून दीप्तीच्या माहेरकडून एकदा 10 लाख रुपये रोख आणि वाहनासाठी तब्बल 25 लाख रुपये देण्यात आले होते. तरीही सासरच्या त्रासात कोणतीही घट झाली नाही, असे तक्रारीत नमूद करण्यात आले आहे.

तक्रारीतील सर्वात गंभीर बाब म्हणजे, दीप्ती गर्भवती असताना तिच्या पोटातील बाळ मुलगी असल्याचे समजताच, पती व सासरच्या सदस्यांनी तिच्या इच्छेविरुद्ध जबरदस्तीने गर्भपात केल्याचा आरोप आहे. ही माहिती दीप्तीने स्वतः आपल्या आईला दिल्याचे तक्रारीत नमूद करण्यात आले आहे.

दरम्यान, आरोपी सासू सुनिता चौधरी या ऑक्टोबर 2025 मध्ये सोरतापवाडी गावाच्या सरपंचपदी निवडून आल्या होत्या, तर सासरे कारभारी चौधरी हे शिक्षक असल्याची माहिती समोर आली आहे.

उरुळीकांचन पोलीस अधिक तपास करत असून, या प्रकरणामुळे पुन्हा एकदा हुंडाबळी आणि कौटुंबिक छळाचा गंभीर प्रश्न ऐरणीवर आला आहे.

The post सासरच्या छळाला कंटाळून विवाहितेची आत्महत्या; हुंडा, चारित्र्यावर संशय, जबरदस्ती गर्भपात… appeared first on थोडक्यात घडामोडी.

पुणे : पुणे शहरातील वाघोली परिसरात एक अत्यंत हृदयद्रावक आणि संतापजनक घटना उघडकीस आली आहे. वाघोलीतील बीएआयएफ (BAIF) रोड परिसरात राहणाऱ्या एका महिलेने आपल्या 11 वर्षांच्या मुलाचा गळा चिरून निर्घृण खून केल्याची घटना समोर आली आहे. याच वेळी तिने 13 वर्षांच्या मुलीवरही जीवघेणा हल्ला केला आहे.

पोलिसांच्या प्राथमिक माहितीनुसार, आरोपी महिलेचे नाव सोनी संतोष जायभाय असे आहे. रागाच्या भरात किंवा मानसिक तणावातून सोनी हिने आपला मुलगा साईराज संतोष जायभाय (वय 11) याच्यावर धारदार शस्त्राने वार केले. या हल्ल्यात साईराजचा जागीच मृत्यू झाला.

यानंतर आरोपी महिलेने आपली मोठी मुलगी धनश्री (वय 13) हिच्यावरही प्राणघातक हल्ला चढवला. गंभीर जखमी अवस्थेत रक्ताच्या थारोळ्यात पडलेल्या धनश्रीला तातडीने रुग्णालयात दाखल करण्यात आले असून तिची प्रकृती चिंताजनक असल्याची माहिती डॉक्टरांनी दिली आहे.

जायभाय कुटुंब मूळचे नांदेड जिल्ह्यातील कंधार तालुक्यातील असून उदरनिर्वाहासाठी काही वर्षांपूर्वी पुण्याच्या वाघोली परिसरात स्थलांतरित झाले होते. घटनेची माहिती मिळताच वाघोली पोलिसांनी तात्काळ घटनास्थळी धाव घेत आरोपी सोनी जायभाय हिला ताब्यात घेतले आहे.

मात्र, एका आईने आपल्या पोटच्या लेकरांबाबत इतके टोकाचे पाऊल का उचलले, यामागचे नेमके कारण अद्याप अस्पष्ट आहे. कौटुंबिक वाद, आर्थिक अडचणी किंवा मानसिक आजार; या सर्व शक्यतांचा विचार करत पोलिसांकडून सखोल तपास सुरू आहे. या घटनेमुळे संपूर्ण पुणे शहरात खळबळ उडाली आहे.

The post पुणे हादरलं! आईकडूनच 11 वर्षीय मुलाची निर्घृण हत्या, मुलीची प्रकृती चिंताजनक appeared first on थोडक्यात घडामोडी.

पुणे : पुण्यातील विश्रांतवाडी परिसरात 17 वर्षीय अमन सिंगच्या क्रूर हत्येची घटना उघडकीस आली आहे. 29 डिसेंबर 2025 रोजी सकाळी कामासाठी बाहेर पडलेल्या अमनचा त्या दिवसानंतर काहीच मागमूस लागला नव्हता. कुटुंबीयांनी पोलिसांकडे अमन बेपत्ता असल्याची तक्रार दाखल केल्यानंतर या प्रकरणाचा तपास सुरू झाला.

तपासादरम्यान पोलिसांना खेड-शिवापूरच्या दुर्गम भागात पुरलेला एका तरुणाचा मृतदेह आढळला. वस्त्रांची जुळवाजुळव आणि ओळख पटविल्यानंतर हा मृतदेह अमन सिंगचाच असल्याचे स्पष्ट झाले.

ही हत्या एका बनावट इंस्टाग्राम अकाउंटचा वापर करून घडल्याचा धक्कादायक तपशील तपासात समोर आला आहे. आरोपींनी एका मुलीच्या नावाने फेक प्रोफाइल तयार करून अमनशी संवाद साधला. त्याला वाटले की तो एका तरुणीशी बोलत आहे. त्यानंतर त्याला कात्रज घाटात भेटण्यासाठी बोलावण्यात आले. 29 डिसेंबर रोजी सकाळी 9 वाजता अमन घाटात पोहोचला तेव्हा चार आरोपी आधीच तिथे लपून बसले होते. पोलिसांनी दिलेल्या माहितीनुसार, आरोपींनी त्याच्यावर अचानक हल्ला चढवला. मारहाणीत अमन बेशुद्ध झाल्यानंतर त्याला खेड-शिवापूरमधील एका निर्जन ठिकाणी नेण्यात आले. तिथे दगड आणि विळ्याने अमनची निर्घृण हत्या करण्यात आली आणि पुरावा नष्ट करण्यासाठी मृतदेह जमिनीत पुरण्यात आला.

या प्रकरणात बेळगावचे 19 वर्षीय प्रथमेश चिंदू अधिकारी आणि 19 वर्षीय नागेश बालाजी धाबले यांना अटक करण्यात आली आहे. याशिवाय 16 आणि 17 वर्षीय दोन अल्पवयीन मुलांना ताब्यात घेण्यात आले आहे. चौकशीत आरोपींनी ही हत्या एका जुन्या वादातून आणि सूडातून केली असल्याचे कबूल केले.

पोलिसांनी मोबाईल लोकेशन, तांत्रिक पुरावे आणि सोशल मीडिया विश्लेषणाच्या मदतीने हा गुन्हा उघड केला. पोलिस आता बनावट इंस्टाग्राम अकाउंट मागे कोणाचा मेंदू होता आणि त्याचे तांत्रिक स्त्रोत काय आहेत याचा माग काढत आहेत.

या घटनेने सोशल मीडिया प्लॅटफॉर्मवरील फेक प्रोफाइल्स आणि ऑनलाइन सापळ्यांचे गंभीर धोके पुन्हा एकदा समोर आणले आहेत. पोलिसांनी नागरिकांना सावध राहण्याचे आवाहन केले असून आरोपींवर कठोर कारवाई केली जाणार असल्याचे स्पष्ट केले आहे.

The post पुण्यात खळबळ! सोशल मीडिया ट्रॅपचा वापर करून तरुणाची निर्घृण हत्या appeared first on थोडक्यात घडामोडी.

पुणे : स्पा सेन्टरच्या नावाखाली एका महिलेला वेश्याव्यवसायास भाग पाडल्याच्या आरोपाखाली पिंपरी-चिंचवड गुन्हे शाखेच्या मानव तस्करी विरोधी पथकाने रहाटणीतील कोकणे चौक परिसरातील एका स्पा सेंटरवर छापा टाकला. या कारवाईत पीडितेची सुटका करण्यात आली असून, पुण्यातील दत्तवाडी येथील रहिवासी ओंकार विनायक जोशी (वय २६) याला अटक करण्यात आली आहे.

पोलिसांनी दिलेल्या माहितीनुसार, आरोपी स्पा सेंटर चालवत असताना महिलेला पैशाचे आमिष दाखवून वेश्याव्यवसायात ढकलत होता. याबाबत मिळालेल्या गुप्त माहितीच्या आधारे मानव तस्करी विरोधी पथकाने छापा टाकून पीडितेला सुरक्षितरीत्या बाहेर काढले.

या प्रकरणी आरोपीच्या एका साथीदाराविरुद्धही गुन्हा दाखल करण्यात आला आहे. मानव तस्करी विरोधी पथकातील पोलीस कॉन्स्टेबल नीलम बुचडे यांनी काळेवाडी पोलीस ठाण्यात तक्रार दाखल केली आहे. या प्रकरणाचा पुढील तपास पोलीस निरीक्षक सुरेंद्र धुमाळ करत आहेत.

The post पुणे : स्पा सेंटरच्या नावाखाली वेश्याव्यवसाय, एका महिलेची सुटका, आरोपीला अटक appeared first on थोडक्यात घडामोडी.

पुणे : पुणे जिल्ह्यातील मावळ तालुक्यात एक अत्यंत धक्कादायक आणि संतापजनक घटना उघडकीस आली आहे. अवघ्या पाच वर्षांच्या चिमुकलीवर बलात्कार करून तिची निर्घृण हत्या करण्यात आल्याची माहिती समोर आली असून, या घटनेमुळे संपूर्ण परिसरात तीव्र संताप व्यक्त केला जात आहे.

ही घटना शनिवारी (१३ डिसेंबर) सायंकाळी सुमारे सहा वाजण्याच्या सुमारास घडली. संबंधित चिमुकली घरातून अचानक बेपत्ता झाल्याचे निदर्शनास आले. रात्री आई कामावरून घरी परतल्यानंतर मुलगी दिसत नसल्याने तिने तातडीने परिसरात शोध घेतला. मात्र मुलगी सापडली नाही. त्यानंतर आईने पोलिस ठाण्यात धाव घेतली.

पोलिसांनी प्रकरणाचे गांभीर्य लक्षात घेऊन तातडीने तपास सुरू केला. पिंपरी–चिंचवड पोलिसांनी तातडीने शोध मोहीम सुरू केली. पोलिसांच्या प्राथमिक तपासात असे निष्पन्न झाले की, ही चिमुकली घरात अनेकदा एकटी राहायची, याच गोष्टीचा फायदा आरोपीने घेतला. शनिवारी मुलगी घरात एकटी असताना समीर कुमार मंडळ (वय ३० ते ३५, विवाहित) या आरोपीने तिला चॉकलेटचे आमिष दाखवून घराजवळच काही अंतरावर नेले. तेथे तिच्यावर अत्याचार केला आणि नंतर गळा दाबून तिची हत्या केल्याचे पोलिसांनी स्पष्ट केले.

पोलीस चौकशीत संपूर्ण घटना उघडकीस आली असून, आरोपीला पोलिसांनी अटक केली आहे. आरोपीविरोधात गंभीर कलमांखाली गुन्हा दाखल करण्यात आला असून पुढील तपास सुरू आहे. या प्रकरणातील सर्व लोक शिरगाव परंडवाडी परिसरातील एका चाळीत राहतात. आरोपी हा पीडित मुलगी आणि तिच्या कुटुंबाचा शेजारी आहे.

या अमानुष घटनेमुळे मावळ परिसरात संतापाची लाट उसळली असून, नागरिकांकडून आरोपीला कठोरात कठोर शिक्षा देण्याची मागणी केली जात आहे. पोलिस प्रशासनाने परिसरात बंदोबस्त वाढवला असून नागरिकांना शांतता राखण्याचे आवाहन करण्यात आले आहे.

The post पुणे हादरले! पाच वर्षांच्या चिमुकलीवर अत्याचार करून निर्घृण हत्या, परिसरात तीव्र संतापाची लाट appeared first on थोडक्यात घडामोडी.

पुणे : पुणे जिल्ह्यातील राजगुरुनगर येथे एका खासगी कोचिंग क्लासमध्ये घडलेल्या धक्कादायक घटनेने परिसरात खळबळ उडाली आहे. संस्कार कोचिंग क्लासेसमध्ये शिक्षण घेत असलेल्या एका विद्यार्थ्यावर त्याच वर्गातील दुसऱ्या विद्यार्थ्याने धारदार शस्त्राने हल्ला केल्याची घटना घडली आहे. या हल्ल्यात संबंधित विद्यार्थी गंभीर जखमी झाला असून त्याला तातडीने रुग्णालयात दाखल करण्यात आले आहे.

नेमके काय घडले?
प्राथमिक माहितीनुसार, वर्गात शिक्षक शिकवत असतानाच अचानक एका विद्यार्थ्याने त्याच्या क्लासमेटवर चाकूने हल्ला केला. हल्लेखोर विद्यार्थ्याने दुसऱ्या विद्यार्थ्या थेट गळ्यावर वार केले. रक्ताच्या थारोळ्यात पडलेल्या जखमी विद्यार्थ्याला तात्काळ उपचारासाठी रुग्णालयात दाखल करण्यात आले. ही मुलं १३ ते १४ वर्ष वयोगटातील असून 8 वी आणि 9 वी वर्गातील मुलांचा क्लास एकाचवेळी सुरु होता. त्यावेळी ही घटना घडली आहे.

दरम्यान, घटनेनंतर हल्ला करणारा विद्यार्थी दुचाकीवरून घटनास्थळावरून फरार झाला आहे. घटनेची माहिती मिळताच राजगुरुनगर पोलीस तातडीने घटनास्थळी दाखल झाले. पोलिसांनी घटनास्थळाची पाहणी केली असून फरार आरोपीचा शोध सुरू आहे. हल्ल्यामागील नेमके कारण अद्याप स्पष्ट झालेले नसून पोलीस विविध अंगांनी तपास करत आहेत.

या धक्कादायक घटनेमुळे खासगी कोचिंग क्लासेसमधील विद्यार्थ्यांच्या सुरक्षिततेचा प्रश्न ऐरणीवर आला आहे. शिक्षणाच्या ठिकाणी अशा प्रकारची हिंसक घटना घडल्याने पालकांमध्येही तीव्र चिंता व्यक्त केली जात आहे.

The post पुण्यात खळबळ! शिक्षकांसमोरच विद्यार्थाने चिरला दुसऱ्या विद्यार्थ्याचा गळा, खासगी कोचिंग क्लासमध्ये घडली भयंकर घटना appeared first on थोडक्यात घडामोडी.

पुणे : पिंपरी-चिंचवड पोलिसांनी पिंपळे सौदागर परिसरात स्पाच्या नावाखाली सुरु असलेल्या सेक्स रॅकेटचा पर्दाफाश केला आहे. या कारवाईत पोलिसांनी ३० वर्षीय स्पा मालकाला अटक केली असून वेश्याव्यवसायासाठी भाग पाडण्यात आलेल्या सात महिलांची सुटका करण्यात आली आहे.

संबंधित कारवाई वरिष्ठ पोलिस निरीक्षक नितीन गिते यांच्या मार्गदर्शनाखाली गुन्हे शाखेच्या मानव तस्करी विरोधी पथकाने (AHTU) केली. पिंपळे सौदागरमधील रोझ आयकॉन इमारतीत असलेल्या ‘द ऑरा थाई स्पा’ येथे हा छापा टाकण्यात आला.

पोलिसांना स्पामध्ये संशयास्पद हालचाली होत असल्याची माहिती स्थानिकांकडून मिळाली होती. माहितीची खातरजमा करण्यासाठी पोलिसांनी एका बनावट ग्राहकाला स्पामध्ये पाठवले. त्यातून मिळालेल्या पुष्टीकरणानंतर पथकाने स्पावर अचानक धाड टाकली. छाप्यामध्ये सात महिलांना जबरदस्तीने वेश्याव्यवसायास प्रवृत्त केल्याचे निष्पन्न झाले. या महिलांना देशातील विविध राज्यांमधून आणण्यात आल्याचे पोलिसांनी सांगितले.

“मिळालेल्या माहितीच्या आधारे आमच्या पथकाने सखोल तपास करून कारवाई केली. महिलांची सुरक्षितपणे सुटका करून त्यांना आश्रयगृहात हलवण्यात आले आहे,” असे वरिष्ठ निरीक्षक नितीन गिते यांनी सांगितले.

कारवाईत अटक केलेला स्पा मालक केरळमधील तिरुवनंतपुरम येथील आहे. त्याच्याविरुद्ध सांगवी पोलिस ठाण्यात मानव तस्करी, अनैतिक व्यवसाय आणि संबंधित कलमांनुसार गुन्हा दाखल करण्यात आला आहे. पुढील तपास सुरू असून या रॅकेटमागील इतर गुन्हेगारांचा शोध घेतला जात आहे.

पोलिसांच्या या कारवाईमुळे परिसरात दडलेले सेक्स रॅकेट उघडकीस आले असून स्थानिकांनी समाधान व्यक्त केले आहे.

The post पुणे : सेक्स रॅकेटचा पर्दाफाश; स्पा मालकाला अटक, सात महिलांची सुटका appeared first on थोडक्यात घडामोडी.

पुणे : पुणे शहर आणि परिसरात वाढत चाललेल्या गुन्हेगारी घटनांमध्ये आणखी एक भीषण घटना बुधवारी सायंकाळी समोर आली आहे. पिंपरीतील वडमुखवाडी परिसरात मित्रांनीच एका व्यावसायिकाची डोक्यात गोळी झाडून निर्घृण हत्या केल्याने खळबळ उडाली आहे.

ही घटना अलंकापुरम 90 फुटी रस्ता, दिघी पोलीस ठाण्याच्या हद्दीत बुधवारी सायंकाळी घडली. नितीन शंकर गिलबिले (वय 37) असे मृत व्यावसायिकाचे नाव असून, अमित जीवन पठारे आणि विक्रांत ठाकूर अशी संशयितांची नावे आहेत. पोलिसांच्या प्राथमिक तपासानुसार, जमीन व्यवहारातील वादातून हा खून झाल्याची शक्यता व्यक्त करण्यात आली आहे.

पोलिसांनी दिलेल्या माहितीनुसार, नितीन गिलबिले हे बुधवारी सायंकाळी काही मित्रांसोबत अलंकापुरम रस्त्यावरील एका शेडजवळ उभे होते. त्यावेळी त्यांचे मित्र अमित पठारे आणि विक्रांत ठाकूर हे फॉर्च्युनर कारमधून तिथे आले. त्यांनी नितीन यांना बोलावून कारमध्ये बसवले आणि हॉटेलच्या दिशेने नेले. काही वेळातच संशयितांनी नितीन यांच्या डोक्यात गोळी झाडली, ज्यात त्यांचा जागीच मृत्यू झाला. त्यानंतर आरोपी घटनास्थळावरून पसार झाले.

घटनेची माहिती मिळताच दिघी पोलीस ठाण्याचे पथक आणि गुन्हे शाखेचे अधिकारी घटनास्थळी दाखल झाले. गुन्हे शाखेचे उपायुक्त शिवाजी पवार यांनी घटनास्थळी भेट देऊन परिस्थितीचा आढावा घेतला. पोलिसांनी घटनास्थळाचा पंचनामा केला. आरोपींच्या अटकेसाठी पथके तयार करण्यात आली असून त्यांचा शोध तीव्र करण्यात आला आहे.

नितीन गिलबिले हे गेल्या काही वर्षांपासून जमिनीची प्लॉटिंग, हॉटेल व्यवसाय आणि व्यावसायिक गाळे भाड्याने देण्याच्या कामात गुंतले होते. काही महिन्यांपूर्वी त्यांनी अलंकापुरम रस्त्यावर स्वतःचे हॉटेल सुरू केले होते. त्यांच्यामागे पत्नी, दोन लहान मुले, आई-वडील आणि भाऊ असा मोठा परिवार आहे.

तपास अधिकाऱ्यांनी दिलेल्या माहितीनुसार, नितीन गिलबिले आणि आरोपी अमित पठारे तसेच विक्रांत ठाकूर हे तिघेही एकत्रितपणे जमीन व्यवहाराचा व्यवसाय करत होते. याच व्यवहारातून उद्भवलेल्या पैशाच्या वादातून ही हत्या घडल्याचा प्राथमिक अंदाज वर्तवण्यात आला आहे. मात्र, हत्येमागील हेतू अद्याप अस्पष्ट आहे. मृतदेह शवविच्छेदनासाठी पाठवला असून बीएनएस आणि शस्त्रास्त्र कायद्याच्या संबंधित कलमांखाली दिघी पोलिस ठाण्यात एफआयआर नोंदवण्यात आली आहे.

या घटनेमुळे परिसरात मोठी खळबळ उडाली असून दिघी पोलिसांकडून या प्रकरणाचा सखोल तपास सुरू आहे.

The post पुण्यात मित्रच ठरले शत्रू! व्यावसायिकाची डोक्यात गोळी झाडून निर्घृण हत्या appeared first on थोडक्यात घडामोडी.