नाशिक : शनिवारी (दि. ८) झालेल्या महासभेत स्मार्टसिटी कंपनी आणि ‘एमएनजीएल’मुळे शहरातील रस्त्यांची झालेली दुरवस्था आणि खड्ड्यांचा मुद्दा गाजल्यानंतरही रस्ते खोदण्याचे प्रकार सुरूच असल्याचे समोर आले आहे. सीबीएस ते कॅनडा कॉर्नर या मार्गावरील चार महिन्यांपूर्वी काँक्रिटीकरण करण्यात आलेला रस्ता स्मार्ट सिटी कंपनीकडून ‘ऑप्टिकल फायबर केबल’ टाकण्यासाठी पुन्हा फोडण्यात आला. कुलकर्णी गार्डन परिसरात सुरू असलेले हे काम राष्ट्रवादी काँग्रेसच्या नगरसेविका डॉ. हेमलता पाटील यांनी तत्काळ बंद पाडले. तसेच संबंधित अधिकाऱ्यांना जाब विचारला.

पावसामुळे नाशिक शहरातील रस्त्यांची मोठ्या प्रमाणात दुरवस्था झाली आहे. या पार्श्वभूमीवर शनिवारी झालेल्या महासभेत स्मार्ट सिटी कंपनी आणि ‘एमएनजीएल’ला या परिस्थितीसाठी जबाबदार धरत ठेकेदारांवर दंडात्मक कारवाई करण्याचे निर्देश महापौर हिमगौरी आहेर-आडके यांनी दिले होते. महापालिकेच्या परवानगीशिवाय रस्ते फोडू नयेत, असेही स्पष्ट निर्देश देण्यात आले होते. मात्र, महासभेला दोन दिवस उलटत नाहीत तोच चार महिन्यांपूर्वी तयार केलेला सिमेंटचा रस्ता ऑप्टिकल फायबर केबलसाठी फोडण्यात आल्याचा प्रकार समोर आला.

कुलकर्णी गार्डन येथे केबल टाकण्यासाठी सिमेंटच्या रस्त्याची तोडफोड सुरू असल्याची माहिती मिळताच डॉ. हेमलता पाटील यांनी घटनास्थळी धाव घेत काम थांबवले. विशेष म्हणजे काम सुरू असताना स्मार्ट सिटी किंवा महापालिकेचा एकही अभियंता घटनास्थळी उपस्थित नसल्याचे निदर्शनास आले. या कामासाठी कामगार धुळ्याहून आल्याची माहितीही समोर आली.

संबंधित ठेकेदार फिरोज यांच्याशी संपर्क साधला असता ते देवळाली येथे असल्याचे सांगण्यात आले. स्मार्ट सिटीच्या सीसीटीव्ही कॅमेऱ्यासाठी चेंबर करण्याचे काम सुरू असल्याची माहिती मिळाल्याचे डॉ. पाटील यांनी सांगितले.

डॉ. हेमलता पाटील यांचे प्रश्न
रस्त्याचे काँक्रिटीकरण करण्यापूर्वी सीसीटीव्ही चेंबर, केबल आणि अन्य सुविधांचे नियोजन का करण्यात आले नाही?
स्मार्ट सिटी आणि महापालिका यांच्यात समन्वयाचा अभाव आहे का?
चार महिन्यांतच नव्याने तयार केलेला रस्ता पुन्हा फोडण्याची वेळ का आली?
रस्ता पुन्हा दुरुस्त करण्याचा खर्च नागरिकांच्या खिशातूनच जाणार का?
‘विकासकामांना विरोध नाही; नियोजनशून्य कामांना विरोध’

या प्रकाराची तातडीने चौकशी करून रस्ता फोडण्यासाठी आवश्यक परवानग्या घेण्यात आल्या होत्या का, याची तपासणी करावी. लेखी परवानगीशिवाय सुरू असलेले काम तातडीने थांबवावे आणि फोडलेला काँक्रीट रस्ता दर्जेदार पद्धतीने पूर्ववत करावा, अशी मागणी डॉ. हेमलता पाटील यांनी केली.

‘विकासकामांना आमचा विरोध नाही; मात्र विकासाच्या नावाखाली नियोजनशून्य कामे करून नागरिकांच्या पैशांचा अपव्यय करण्यास नक्कीच विरोध आहे,’ असे डॉ. पाटील यांनी स्पष्ट केले.

The post चार महिन्यांपूर्वीचा नवाकोरा रस्ता ऑप्टिकल फायबरसाठी फोडला; राष्ट्रवादी काँग्रेसच्या नगरसेविका डॉ. हेमलता पाटील यांचा संताप; काम बंद पाडून अधिकाऱ्यांना जाब appeared first on थोडक्यात घडामोडी.

मुंबई : राष्ट्रवादी काँग्रेसचे ज्येष्ठ नेते आणि आमदार छगन भुजबळ यांनी आज राजभवन येथे राज्याच्या कॅबिनेट मंत्रिपदाची आणि गोपनीयतेची शपथ घेतली. महायुती सरकार स्थापन झाल्यानंतर सुरुवातीच्या मंत्रिमंडळात त्यांना डावलण्यात आले होते. मात्र, सुमारे सहा महिन्यांच्या प्रतीक्षेनंतर भुजबळ यांचे मंत्रिमंडळात पुनरागमन झाले आहे.

धनंजय मुंडे यांच्या राजीनाम्यानंतर रिक्त झालेल्या मंत्रिपदासाठी भुजबळ यांची निवड करण्यात आली आहे. बीड जिल्ह्यातील मस्साजोग गावातील सरपंच संतोष देशमुख प्रकरणात आरोपींना अटक झाल्यानंतर, तत्कालीन मंत्री धनंजय मुंडे यांच्यावर संबंधित आरोपींशी जवळीक असल्याचे आरोप झाले होते. या पार्श्वभूमीवर त्यांनी मार्चमध्ये मंत्रिपदाचा राजीनामा दिला होता.

त्यानंतर राष्ट्रवादीच्या वाट्याच्या मंत्रिपदाची जागा रिक्त होती. दुसरीकडे, मंत्रिमंडळात सहभागी न झाल्याने छगन भुजबळ यांची नाराजी शिगेला पोहोचली होती. इतकी की, ते पक्ष सोडणार असल्याच्या चर्चा देखील सुरू झाल्या होत्या. अखेर, पक्षांतर्गत समेटानंतर भुजबळ यांना मंत्रिमंडळात पुन्हा स्थान देण्यात आले आहे.

भुजबळ यांच्याकडे अन्न व नागरी पुरवठा आणि ग्राहक संरक्षण खात्याची जबाबदारी सोपवण्यात येणार असल्याची शक्यता आहे. याआधीही त्यांनी हे खाते सांभाळले असून, त्यांच्या अनुभवाचा सरकारला फायदा होईल, अशी राजकीय वर्तुळात चर्चा आहे.

The post छगन भुजबळ यांचे मंत्रिमंडळात पुनरागमन, घेतली कॅबिनेट मंत्रिपदाची शपथ appeared first on थोडक्यात घडामोडी.

मुंबई : राष्ट्रीय स्वयंसेवक संघाचे (आरएसएस) नेते भैय्याजी जोशी यांनी मुंबईच्या विविध भाषिक संस्कृतीसंबंधी एक विधान केले आहे. त्यांच्या या विधानामुळे शिवसेना आणि राष्ट्रवादी काँग्रेससारख्या प्रमुख राजकीय पक्षांमध्ये संताप व्यक्त करण्यात आले आहे. मुंबईमध्ये मराठी भाषेची महत्त्वपूर्ण ओळख आहे, आणि या विधानामुळे स्थानिक राजकारणात चांगलीच खळबळ माजली आहे.

भैय्या जोशी यांनी मुंबईतील भाषिक विविधता आणि शहराच्या सांस्कृतिक वैशिष्ट्यांबद्दल बोलताना म्हटले, “मुंबईला कोणतीही एक भाषा नाही. मुंबईच्या प्रत्येक भागाची स्वतःची एक भाषा आहे. इथे अनेक भाषा बोलल्या जातात, आणि प्रत्येक भागाची एक वेगळी ओळख आहे. उदाहरणार्थ, घाटकोपर परिसरात मुख्यतः गुजराती भाषेचा वापर होतो.” ते पुढे म्हणाले, “माझ्या मते, जर कोणाला मुंबईत राहायचं असेल किंवा इथे येण्याची इच्छा असेल, तर त्यांना मराठी शिकण्याची गरज नाही. इथे गुजराती भाषाही चालेल.”

सुरेश भैय्या जी जोशी यांच्या या विधानामुळे शिवसेना आणि राष्ट्रवादी काँग्रेसमधून तीव्र प्रतिक्रिया उमटल्या आहेत. शिवसेनेचे प्रवक्ते आणि मुंबईतील नेत्यांनी या विधानावर नाराजी व्यक्त केली आहे, तर राष्ट्रवादी काँग्रेसच्या नेत्यांनी देखील या वक्तव्याच्या पार्श्वभूमीवर टीका केली आहे.

शिवसेनेचा आरोप :
शिवसेनेच्या प्रवक्त्यांनी या विधानावर टिप्पणी करत म्हटले की, “मुंबई ही मराठी माणसाची आहे. इथे मराठी भाषेचा विशेष दर्जा आहे, आणि त्या भाषेच्या संस्कृतीसाठी कायम संघर्ष झाला आहे. आरएसएसने मुंबईतील भाषिक विविधतेकडे संपूर्णपणे दुर्लक्ष करत असे वक्तव्य केल्याने त्यांचे हे विधान खेदजनक आहे.”

राष्ट्रवादी काँग्रेसची प्रतिक्रिया:
राष्ट्रवादी काँग्रेसचे मुंबईचे नेते देखील या विधानामुळे संतापले असून त्यांनी सांगितले, “मुंबईतील लोकांना त्यांच्या मातृभाषेतून बोलण्याचा हक्क आहे. एक भाषा बोलल्यामुळे इतरांना वेगळं ठरवणं हे अत्यंत चुकीचं आहे. आरएसएस नेत्यांनी अशी मानसिकता ठेवणे अत्यंत धक्कादायक आहे.”

भैय्या जी जोशी यांचे स्पष्टीकरण:
या विधानावर भैय्या जी जोशी यांनी स्पष्टीकरण दिले आहे की, “माझ्या वक्तव्याचा हेतू मराठी भाषेला कमी लेखणे किंवा अपमान करणे हा नव्हता. मुंबईतील अनेक भाषिक समुदायांनी एकत्र येऊन या शहराला समृद्ध केले आहे. मुंबईतील विविधतेचे स्वागत करणे आवश्यक आहे, पण याचा अर्थ असा नाही की एक भाषा दुसऱ्या भाषेला कमी लेखावी.”

The post भैय्याजी जोशींच्या ‘मुंबईत मराठी नाही, गुजरातीही चालेल’ वक्तव्यावर शिवसेना आणि राष्ट्रवादीकडून संतप्त प्रतिक्रिया, जोशी यांचे स्पष्टीकरण… appeared first on थोडक्यात घडामोडी.

नागपूर : विधानसभा निवडणुकीत महायुतीला स्पष्ट बहुमत मिळाल्यानंतर ५ डिसेंबरला नव्या मंत्रिमंडळाचा शपथविधी सोहळा पार पडला होता. मात्र मंत्रिमंडळ विस्तार रखडला होता. अखेर आज मंत्रिमंडळ विस्तार पार पडला आणि नागपूरमध्ये नव्या मंत्र्यांचा शपथविधी सोहळा संपन्न झाला. यावेळी भाजपच्या १९ मंत्र्यांनी, शिवसेना शिंदे गटाच्या ११ आणि राष्ट्रवादी अजित पवार गटाच्या ९ मंत्र्यांनी शपथ घेतली.

विधानसभा निवडणुकीत भाजपने १३२ जागा जिंकून पहिलं स्थान मिळवलं. राष्ट्रवादी अजित पवार गटाला ४१ आणि शिवसेना शिंदे गटाला ५७ जागांवर विजय मिळाला. मंत्रिमंडळ विस्ताराची प्रचंड उत्सुकता होती, कारण कोणाला संधी मिळणार आणि कोणाचा पत्ता कट होणार याकडे सर्वांचं लक्ष लागलं होतं. अखेर, नव्या मंत्र्यांची यादी जाहीर झाली.

यावेळी मंत्रिमंडळात काही नव्या चेहऱ्यांना संधी मिळाली, तर काही अनुभवी नेत्यांचा पत्ता कट झाला. राष्ट्रवादीचे छगन भुजबळ आणि दिलीप वळसे पाटील यांचा समावेश नव्या मंत्रिमंडळात नाही. तसेच शिवसेना शिंदे गटाचे दीपक केसरकर यांचं नावही यादीत नाही. भाजपकडून रवींद्र चव्हाण यांना मंत्रिमंडळात स्थान नाही.

नव्या मंत्र्यांची यादी:
भाजप:
– चंद्रशेखर बावनकुळे
– राधाकृष्ण विखे पाटील
– चंद्रकांत पाटील
– गिरीश महाजन
– गणेश नाईक
– मंगलप्रभात लोढा
– जयकुमार रावल
– पंकजा मुंडे
– अतुल सावे
– अशोक उईके
– आशिष शेलार
– संजय सावकारे
– नितेश राणे
– आकाश फुंडकर
– माधुरी मिसाळ – राज्यमंत्री
– पंकज भोयर – राज्यमंत्री
– मेघना बोर्डीकर – राज्यमंत्री
– शिवेंद्रसिंहराजे भोसले

शिवसेना:
– गुलाबराव पाटील
– दादा भुसे
– संजय राठोड
– उदय सामंत
– शंभूराज देसाई
– संजय शिरसाट
– प्रताप सरनाईक
– भरत गोगावले
– प्रकाश आबिटकर
– आशीष जैस्वाल – राज्यमंत्री
– योगेश कदम – राज्यमंत्री

राष्ट्रवादी:
– हसन मुश्रीफ
– धनंजय मुंडे
– दत्तात्रय भरणे
– आदिती तटकरे
– माणिकराव कोकाटे
– नरहरी झिरवळ
– मकरंद जाधव
– बाबासाहेब पाटील
– इद्रनील नाईक

The post मंत्रिमंडळ विस्तार: नव्या मंत्र्यांचा शपथविधी, ‘या’ दिग्गज नेत्यांचा पत्ता कट appeared first on थोडक्यात घडामोडी.

मुंबई : महाराष्ट्रात प्रदीर्घ संघर्षानंतर मुख्यमंत्री शिंदे यांनी अखेर राष्ट्रवादी काँग्रेसच्या नवनियुक्त मंत्र्यांच्या खात्यांच्या विभागणीवर अंतिम शिक्कामोर्तब केले आहे. अर्थमंत्रालयासह सात महत्त्वाची मंत्रालये राष्ट्रवादीच्या कोट्यात आली असून, त्यासाठी अनेक दिवसांपासून चुरस सुरू होती. याशिवाय नियोजन, अन्न व नागरी पुरवठा, सहकारी संस्था, महिला व बालविकास, कृषी, मदत व पुनर्वसन, वैद्यकीय शिक्षण ही खाती राष्ट्रवादीला मिळणार आहेत.

अजित पवार यांनी दुजोरा दिला
पोर्टफोलिओ वितरणाची यादी लवकरच औपचारिकपणे जाहीर होण्याची अपेक्षा आहे. दरम्यान, मुख्यमंत्री कार्यालयातील अधिकारी राजभवनात पोहोचले आहेत. राज्यपालांच्या मान्यतेनंतर ही यादी मुख्य सचिवांकडे पाठवली जाईल. अजित पवार यांनी राज्यपालांना पाठवलेल्या पोर्टफोलिओ वितरणाच्या यादीला दुजोरा दिला आहे. अर्थ व सहकार मंत्रालयाबाबत राष्ट्रवादी काँग्रेस आणि शिंदे गटात खडाजंगी सुरू असल्याने विभागांचे विभाजन अद्याप होऊ शकले नसल्याचे बोलले जात होते.

राष्ट्रवादीसाठी सहकार मंत्रालय महत्त्वाचे का?
अर्थ आणि सहकार मंत्रालय राष्ट्रवादीकडे ठेवण्याबाबत अजित पवार आक्रमक होते. अजित पवार सहकार मंत्रालयाबाबत आक्रमक होते, कारण ते राष्ट्रवादीसाठी खूप महत्त्वाचे आहे. राष्ट्रवादीचे डझनहून अधिक नेते सहकारी किंवा खासगी साखर कारखाने चालवत आहेत. यासोबतच सहकारी बँकांवरही त्यांचे नियंत्रण आहे. दोन्ही भागात त्यांना मोठ्या समस्यांना सामोरे जावे लागत आहे. अशा स्थितीत आता त्यांच्याकडे सहकार मंत्रालय आल्याने त्यांचे प्रश्न लवकर सुटतील.

गेल्या वर्षी एकनाथ शिंदे आणि त्यांच्या 40 समर्थकांनी उद्धव ठाकरेंविरोधात बंड केले तेव्हा त्यांनी अजित पवार यांच्या अर्थखात्यावर जोरदार आक्षेप घेतला होता . त्यावेळी शिंदे आणि त्यांच्या छावणीतील आमदारांनी अजित पवार निधी वाटपात पक्षपात करत असल्याचा आरोप केला होता. ते शिवसेनेच्या मतदारसंघातील राष्ट्रवादीच्या नेत्यांना जास्त निधी देत ​​होते आणि असे करून शिवसेनेला कमकुवत करण्याचा त्यांचा प्रयत्न होता. यानंतर संजय शिरसाट, गुलाबराव पाटील, दीपक केसरकर, भरत गोगावले, शहाजी बापू पाटील यांच्यासह शिंदे गटातील अनेकांनी अजित पवारांवर उघड आरोप केले.

गेल्या रविवारी (२ जुलै) अजित पवार यांनी उपमुख्यमंत्रीपदाची तर छगन भुजबळ, दिलीप वळसे पाटील, हसन मुश्रीफ, धनंजय मुंडे, संजय बनसोडे, आदिती तटकरे आणि धर्मरावबाबा आत्राम यांनी मंत्रिपदाची शपथ घेतली.

The post अखेर ठरलं! राष्ट्रवादीला मिळणार ‘ही’ महत्त्वाची मंत्रिपदे appeared first on थोडक्यात घडामोडी.

मुंबई : राष्ट्रवादी काँग्रेसचे प्रदेशाध्यक्ष जयंत पाटील यांना ईडीची नोटीस आली आहे. जयंत पाटील यांना उद्या चौकशीला हजर राहण्याचे आदेश देण्यात आले आहेत. जयंत पाटील यांना आयएल आणि एफएलएस प्रकरणी उपस्थित राहण्याचे आदेश देण्यात आले आहेत. आयएल आणि एफएलएसच्या माध्यमातून अनेकांनी आर्थिक मोठा गैरव्यवहार केला असल्याचा आरोप होता. ईडीकडून या प्रकरणी जयंत पाटील यांना सोमवारी हजर राहण्याचं समन्स देण्यात आलं आहे. ईडीची नोटीस अद्याप मिळाली नसल्याचं जयंत पाटील यांच्याकडून सांगण्यात आलं आहे.

आयएलएफस आर्थिक गैरव्यवहार प्रकरणात जयंत पाटील यांना ही नोटीस पाठवण्यात आल्याची माहिती आहे. ILFS च्या माध्यमातून अनेक बड्या लोकांनी आर्थिक गैरव्यवहार केल्याचा आरोप आहे. यापूर्वी या प्रकरणात मनसेप्रमुख राज ठाकरे यांचीही ईडीने चौकशी केली होती. त्यानंतर आता जयंत पाटील यांना ईडीने चौकशीसाठी पाचारण केले आहे. ILFS प्रकरणात सर्वप्रथम दिल्लीतील आर्थिक गुन्हे शाखेने गुन्हा नोंदवला होता. त्यानंतर या आर्थिक गैरव्यवहाराची व्याप्ती पाहता हे प्रकरण सक्तवसुली संचलनालय अर्थात ईडीकडे सोपवण्यात आले होते.

जयंत पाटील यांनी आतापर्यंत ईडीची कोणतीही नोटीस मिळालेली नाही, असं सांगितलं आहे. राष्ट्रवादी काँग्रेसकडून जयंत पाटील यांना आलेल्या ईडीच्या नोटीसनंतर काय भूमिका घेतली जाते हे पाहावं लागणार आहे. राष्ट्रवादी काँग्रेसचे नेते अजित पवार, अनिल देशमुख, नवाब मलिक, हसन मुश्रीफ, छगन भुजबळ यांनी यापूर्वी केंद्रीय यंत्रणांच्या चौकशीला सामोरे गेले होते. आता जयंत पाटील हे ईडीच्या नोटीसनंतर सविस्तरपणे काय भूमिका मांडतात, हे पाहावं लागणार आहे. तर जयंत पाटील यांना आलेली ईडीची नोटीस आणि सत्तासंघर्षाचा निकाल हा योगायोग असावा, असं उदय सामंत म्हणाले.

The post मोठी बातमी,राष्ट्रवादीचे प्रदेशाध्यक्ष जयंत पाटील यांना ईडीची नोटीस, चौकशीसाठी हजर राहण्याचे आदेश appeared first on थोडक्यात घडामोडी.

ठाणे : मनसे चित्रपट सेनेचे अध्यक्ष अमेय खोपकर यांची राष्ट्रवादी काँग्रेसवर टीका करताना जीभ घसरलीय. त्यांनी राष्ट्रवादी काँग्रेस पक्षावर टीका करताना अपशब्द वापरल्याची बातमी समोर आलीय. खोपकरांनी राष्ट्रवादी काँग्रेसवर खालच्या शब्दांत टीका केलीय. “राष्ट्रवादीवाले xxची औलाद आहेत”, अशा अर्वाच्य भाषेत अमेय खोपकरांनी राष्ट्रवादी काँग्रेस पक्षावर टीका केलीय.

माजी खासदार संभाजीराजे यांनी हर हर महादेव चित्रपटावर आक्षेप घेतलाय. त्यानंतर राज्यातील सर्व मराठा संघटनांकडून या चित्रपटावर बंदी घालण्याची मागणी होऊ लागलीय. राष्ट्रवादी काँग्रेसचे आमदार जितेंद्र आव्हाड यांनी आपल्या कार्यकर्त्यांसह काल ठाण्याच्या एका मॉलमधील चित्रपटगृहात शिरुन हर हर महादेव चित्रपटाचा शो बंद केला होता. यावेळी एका प्रेक्षकाला प्रचंड मारहाण झाल्याचं देखील कॅमेऱ्यात कैद झालं होतं. पण त्या प्रेक्षकाला कार्यकर्त्यांनी मारहाण केली होती का? ते स्पष्ट होऊ शकलेलं नाही. तर दुसरीकडे जितेंद्र आव्हाडांनी बंद केलेला शो पुढच्या अर्ध्या तासात मनसे नेते अविनाश जाधव यांनी सुरु केला होता.

मनसेकडून जितेंद्र आव्हाड यांच्या शो बंद पडण्याच्या कृत्याला आव्हान देण्यासाठी आज संध्याकाळी त्याच चित्रपटगृहात हर हर महादेव चित्रपटाचा शो ठेवण्यात आला होता.

यावेळी अमेय खोपकर यांनी प्रसारमाध्यमांना प्रतिक्रिया देताना म्हटले कि, तुम्ही आमच्या एका मराठी प्रेक्षकाला त्याच्या परिवारासमोर तुम्ही दहा-पंधरा जण मारतात? राष्ट्रवादीवाले xxची औलाद आहेत. या लोकांना लाजा नाही वाटतं?”, असा घणाघात अमेय खोपकरांनी केला.

The post अमेय खोपकर यांची जीभ घसरली, राष्ट्रवादीवाले xxची औलाद, यांना लाजा नाही वाटतं? appeared first on थोडक्यात घडामोडी.

मुंबई : ज्येष्ठ नेते शरद पवार यांना मुंबईतील ब्रीच कॅंडी रुग्णालयात दाखल करण्यात आले आहे. डॉक्टरांनी त्यांना रुग्णालयात दाखल होऊन उपचार घेण्याचा सल्ला दिला आहे. पुढील तीन दिवस ते रुग्णालयात असणार आहेत, अशी माहिती राष्ट्रवादी काँग्रेसकडून देण्यात आली आहे.

या संदर्भात राष्ट्रवादीचे सरचिटणीस शिवाजीराव गर्जे यांनी एक पत्र प्रसिद्ध केले आहे. यात ‘शरद पवार यांची प्रकृती ठिक नसल्यामुळे डॉक्टरांच्या सल्ल्यानुसार त्यांना ब्रिच कँडी रुग्णालयात पुढील तीन दिवस उपचारासाठी दाखल करण्यात येणार आहे त्यांना २ नोव्हेंबर रोजी डिस्चार्ज मिळेल. व ३ नोव्हेंबर रोजी शिर्डी येथे पक्षाच्या होणाऱ्या पक्षाच्या शिबीरास उपस्थित राहून मार्गदर्शन करणार आहेत असं या पत्रात म्हटले आहे. पदाधिकाऱ्यांनी रुग्णालयाच्या आवारात गर्दी करु नये, असंही आवाहन या पत्रात केले आहे.

दरम्यान, बारामतीत दिवाळी पहाट कार्यक्रमात शरद पवार हे सर्वांना भेटले होते. मात्र, त्यानंतर दुसरा दिवशी त्यांचा सोलापूर दौरा होता. तोही रद्द करण्यात आला होता. बार्शीचे माजी नगराध्यक्ष विश्वास बारबोले यांच्या पक्षप्रवेशाच्या कार्यक्रमाला ते येणार हेाते. मात्र, पवारांचा दौरा रद्द झाल्याने बारबोलेंचा पक्षप्रवेशाचा कार्यक्रमही लांबला आहे.

राष्ट्रवादी काँग्रेस पक्षाचे राष्ट्रीय अध्यक्ष आदरणीय शरद पवार साहेब यांची प्रकृती ठीक नसल्यामुळे पुढील तीन दिवस पवार साहेबांना मुंबईतील ब्रीज कॅन्डी रुग्णालयात उपचारासाठी दाखल करण्यात येणार आहे. #NCP pic.twitter.com/YpjqjcFw1E

— NCP (@NCPspeaks) October 31, 2022

The post राष्ट्रवादीचे अध्यक्ष शरद पवार ब्रीच कँडी रुग्णालयात दाखल; पुढील तीन दिवस उपचार घेणार appeared first on थोडक्यात घडामोडी.

मुंबई: राष्ट्रवादी काँग्रेसचे नेते एकनाथ खडसे यांना सक्तवसुली संचलनालयाकडून (ED) नोटीस पाठवण्यात आली आहे. त्यांच्या जप्त केलेल्या मालमत्तांचा ताबा तातडीने सोडण्याचे आदेश देण्यात आले आहेत. येत्या १० दिवसांमध्ये या सर्व मालमत्ता शांततेत रिकाम्या करा, असे ईडीकडून (ED) बजावण्यात आले आहे. ईडीचे उपसंचालक अमित भास्कर यांनी ही नोटीस जारी केली आहे. बेहिशेबी मालमत्ता प्रतिबंधक कायद्यातंर्गत २५ ऑगस्ट २०२१ रोजी एकनाथ खडसे व मंदाकिनी खडसे, गिरीश चौधरी, इन्सिया मुर्तझा बदलावाला आणि उकानी यांच्या वैयक्तिक तसेच संयुक्त मालकीच्या ११ स्थावर मालमत्ता तात्पुरत्या स्वरुपात जप्त करण्यात आल्या होत्या.

गेल्यावर्षी ऑगस्ट महिन्यात ईडीने एकनाथ खडसे यांच्या मालमत्तांवर जप्तीची कारवाई केली होती. या मालमत्तेचे एकूण मूल्य ५ कोटी ७५ लाख इतके आहे. यामध्ये लोणावळ्यातील बंगला, जळगावमधील ३ फ्लॅट आणि ३ मोकळ्या भूखंडांचा समावेश आहे. ही मालमत्ता १० दिवसांत खाली करावी, असे ईडीच्या नोटीसमध्ये म्हटले आहे. तसे न केल्यास कायदेशीररित्या या मालमत्ता रिकाम्या केल्या जातील, असा इशाराही ईडीने दिला आहे. तसेच संबंधित मालमत्ता विक्री किंवा हस्तांतरण करण्याची परवानगी देऊ नये, असेही नोंदणी महानिरीक्षक आणि संबंधित जिल्हाधिकाऱ्यांना कळवण्यात आले आहे. या मालमत्तांचे २५ मे २०२२ रोजी ॲडज्युडिकेशन झाल्यानंतर ३० मे रोजी या मालमत्ता रिकाम्या करण्याची नोटीस ईडीने जारी केली. या नोटिशीनुसार, या जागा रिकाम्या झाल्यानंतर कारवाईची पुढील दिशा निश्चित होईपर्यंत या मालमत्ता पूर्णपणे ईडीच्या ताब्यात राहतील.

The post ईडीकडून एकनाथ खडसे यांना नोटीस; मालमत्ता १० दिवसांत रिकाम्या करा, नाहीतर… appeared first on थोडक्यात घडामोडी.

मुंबई : राष्ट्रवादी काँग्रेसचे सर्वेसर्वा शरद पवार यांना कोरोनाची लागण झाली आहे. शरद पवार यांनी स्वत: ट्विट करुन यासंदर्भात माहिती दिली. मला कोरोनाची लागण झाली असली तर काळजी करण्याचे कोणतेही कारण नाही, अशी माहिती शरद पवार यांनी आपल्या ट्विटमध्ये केली आहे.

शरद पवार यांनी ट्विट करत सांगितले कि, “माझी कोविड टेस्ट पॉझिटिव्ह आली असून डॉक्टरांच्या सल्ल्यानुसार मी उपचार घेत आहे. काळजीचे कोणतेही कारण नाही. गेल्या काही दिवसांपासून माझ्या संपर्कात आलेल्या सर्वांना विनंती की त्यांनी योग्य चाचण्या करून आवश्यक ती खबरदारी घ्यावी.”

माझी कोविड टेस्ट पॉझिटिव्ह आली असून डॉक्टरांच्या सल्ल्यानुसार मी उपचार घेत आहे. काळजीचे कोणतेही कारण नाही.
गेल्या काही दिवसांपासून माझ्या संपर्कात आलेल्या सर्वांना विनंती की त्यांनी योग्य चाचण्या करून आवश्यक ती खबरदारी घ्यावी.

— Sharad Pawar (@PawarSpeaks) January 24, 2022

शरद पवार मागील दोन दिवसांत पुणे आणि बारामतीमध्ये होते. मुंबईत आल्यानंतर त्यांची कोरोना चाचणी करण्यात आली. यावेळी त्यांचा अहवाल पॉझिटिव्ह आला. शरद पवार हे सध्या मुंबईतील सिल्व्हर ओक या निवासस्थानी विलगीकरणात असल्याची माहिती आहे. दरम्यान, मुंबईत कोरोना रुग्णांची संख्या झपाट्याने वाढत असताना शरद पवार यांनी कोरोना लसीकरणाचा वेग वाढवण्याच्या सूचना दिल्या होत्या. त्यानंतर बराच काळापासूनच सुरु असलेल्या एसटी संपावर तोडगा काढण्यासाठीही शरद पवार यांनी मध्यस्थी करण्याचा प्रयत्न केला होता. यावेळी पवार यांनी परिवहन मंत्री अनिल परब यांना सोबत घेऊन एसटी संघटनांच्या पदाधिकाऱ्यांशी चर्चाही केली होती.

The post राष्ट्रवादी काँग्रेसचे अध्यक्ष शरद पवार यांना कोरोनाची लागण appeared first on थोडक्यात घडामोडी.