मुंबई : नार्कोटिक्स कंट्रोल ब्युरो (NCB) ने सुशांत सिंग राजपूतच्या मृत्यूशी संबंधित ड्रग्ज प्रकरणी बॉलीवूड अभिनेत्री रिया चक्रवर्ती, तिचा भाऊ शोविक चक्रवर्ती आणि इतरांवर मुंबईतील विशेष न्यायालयात आरोप दाखल केले आहेत. या प्रकरणाची पुढील सुनावणी 12 जुलै रोजी होणार आहे. सध्या या प्रकरणात न्यायालयाने आरोप निश्चित केलेले नाहीत.

विशेष सरकारी वकील अतुल सरपांडे यांनी न्यायालयात दाखल केलेल्या आरोपपत्रात नमूद केलेल्या सर्व आरोपींवरील सर्व आरोप कायम ठेवण्यात आले आहेत. रिया आणि शोविक यांच्यावर अंमली पदार्थांचे सेवन आणि दिवंगत अभिनेता सुशांत सिंग राजपूतसाठी अशा पदार्थांची खरेदी आणि पैसे देण्याचे आरोप निश्चित करण्याची विनंती न्यायालयाला करण्यात आली आहे. अतुल सरपांडे पुढे म्हणाले की, न्यायालय या प्रकरणातील सर्व आरोपींवर आरोप निश्चित करेल. दोषमुक्त करण्यासाठी आलेल्या याचिकांवर निर्णय झाल्यानंतरच आरोप निश्चित केले जातील, असे न्यायालयाने म्हटले आहे.

उल्लेखनीय म्हणजे, रिया आणि तिचा भाऊ गेल्या बुधवारी कोर्टात हजर झाले होते. नार्कोटिक ड्रग्स आणि सायकोट्रॉपिक सबस्टन्स (NDPS) कायद्याशी संबंधित खटल्यांची सुनावणी करणारे विशेष न्यायाधीश व्ही.जी. रघुवंशी यांनी या प्रकरणाच्या पुढील सुनावणीसाठी 12 जुलैची तारीख निश्चित केली आहे. रियाला सप्टेंबर 2020 मध्ये या प्रकरणात अटक करण्यात आली होती. त्याचवेळी या प्रकरणात मुंबई उच्च न्यायालयाने तिला महिनाभरानंतर जामीन मंजूर केला. 14 जून 2020 रोजी सुशांत सिंग राजपूत त्याच्या मुंबईतील घरात मृतावस्थेत आढळला. यानंतर एनसीबीने या प्रकरणात ड्रग्ज कनेक्शनची चौकशी केली होती.

The post सुशांत सिंग राजपूत मृत्यूप्रकरण : रिया चक्रवर्ती आणि शोविक विरुद्ध NCB कडून आरोपपत्र दाखल appeared first on थोडक्यात घडामोडी.

मुंबई : क्रूझ ड्रग्ज प्रकरणात आर्यन खानला अटक करणारे नार्कोटिक्स कंट्रोल ब्युरोचे (NCB) अधिकारी समीर वानखेडे यांची चेन्नईला बदली करण्यात आली आहे. ऑर्डरनुसार, समीन वानखेडे यांना विश्लेषण आणि जोखीम व्यवस्थापन महासंचालनालय मुंबईहून चेन्नई डीजी, टॅक्सपेयर्स सर्व्हिस डायरेक्ट्रेट म्हणून पाठविण्यात आले आहे.

कॉर्डेलिया क्रुझवरील ड्रग्ज पार्टीप्रकरणात अभिनेता शाहरुख खानचा मुलगा आर्यन खान याच्या अटक प्रकरणात आरोपपत्र सादर करण्यासाठी न्यायालयाने वाढवून दिलेला ६० दिवसांचा अवधी संपला असून एनसीबीकडून शुक्रवारी पहिले आरोपपत्र कोर्टात सादर करण्यात आले. त्यात आर्यन खानकडे ड्रग्ज सापडले नसल्याचा दावा करण्यात आला आहे. या चार्जशीटमध्ये आर्यन खानचे नाव नाही. तसेच एनसीबीचे डीजी एस एन प्रधान यांनी समीर वानखेडे आणि त्यांच्या टीमकडून मोठी चूक झाली असल्याचे कबूल केले आहे. यानंतर, आर्यन खान ड्रग्ज प्रकरणी चुकीच्या पद्धतीने कारवाई केल्यामुळे सरकारने समीर वानखेडेंवर कारवाईचे आदेश दिलेले आहेत.

The post NCB अधिकारी समीर वानखेडे यांची चेन्नईला बदली appeared first on थोडक्यात घडामोडी.

मुंबई : नार्कोटिक्स कंट्रोल ब्युरोने आर्यन खानला हाय-प्रोफाइल मुंबई क्रूझ ड्रग्स प्रकरणात ‘क्लीन चिट’ दिली आहे. बॉलीवूडचा सुपरस्टार शाहरुख खानच्या मुलाला गेल्या वर्षी मुंबईच्या किनाऱ्यावर एका क्रूझवर छापा टाकल्यानंतर आणि ड्रग्ज सापडल्यानंतर अटक करण्यात आली होती. त्यानंतर आर्यनला जामीन देण्यात आला.

‘पुराव्याअभावी’ सहा जणांविरुद्ध तक्रार दाखल झालेली नाही, तर १४ जणांवर आरोपपत्र दाखल करण्यात आले आहे. एनसीबीने विशेष न्यायालयात आपले ‘अंतिम’ आरोपपत्र दाखल केले कारण आरोपपत्र दाखल करण्यासाठीची ६० दिवसांची मुदत 29 मे रोजी संपत आली होती. एनसीबीने दाखल केलेल्या आरोपपत्रात आर्यन खानच्या नावाचा समावेश नाही. आरोपपत्रात म्हटले आहे की आर्यनकडे कोणतेही ड्रग्स आढळले नाहीत.

बॉलीवूड सुपरस्टार शाहरुख खानचा मुलगा आर्यन खान याला ऑक्टोबरच्या सुरुवातीला मुंबई क्रूझ ड्रग्ज प्रकरणी अटक करण्यात आली होती. अनेक न्यायालयीन सुनावणी आणि 26 दिवसांच्या कोठडीनंतर, मुंबई उच्च न्यायालयाने त्याला 28 ऑक्टोबर रोजी जामीन मंजूर केला. शेवटी 30 ऑक्टोबर रोजी तो तुरुंगातून बाहेर आला होता.

एनसीबीच्या अधिकाऱ्यांनी कर्डिलिया ड्रग्ज प्रकरणी आरोपपत्र न्यायालयात आणले आहे. एनसीबी हे आरोपपत्र कोर्ट रजिस्ट्रीमध्ये सादर करणार आहे. या आरोपपत्राची रजिस्ट्रीद्वारे पडताळणी केली जाईल आणि त्यानंतर ते आरोपपत्र न्यायालयात न्यायाधीशांसमोर सादर केले जाईल.

या प्रकरणात एकूण 20 आरोपी होते, त्यापैकी 18 आरोपी जामिनावर बाहेर असून 2 आरोपी अजूनही तुरुंगात आहेत. अब्दुल शेख आणि चिनेदू इग्वे अशी कारागृहात असलेल्या दोन आरोपींची नावे आहेत. आरोपपत्राचे एकूण 10 खंड असून ते सध्या न्यायालयाच्या रजिस्ट्रीमध्ये आहे. 6000 पानांचे आरोपपत्र असल्याचे सूत्रांनी सांगितले.

The post ब्रेकिंग! आर्यन खानला क्रूझ ड्रग्ज प्रकरणात एनसीबी कडून क्लीन चिट appeared first on थोडक्यात घडामोडी.

मुंबई : आर्यन खान, अरबाज मर्चंट आणि मुनमुन धामेचा यांनी दाखल केलेल्या जामीन अर्जांवर मुंबई उच्च न्यायालयाच्या एकल न्यायाधीशांच्या खंडपीठाने पुढील सुनावणी गुरुवारी (२८ ऑक्टोबर) ठेवली आहे. उद्या दुपारी अडीचनंतर या प्रकरणाची सुनावणी होईल, असे न्यायमूर्ती सांबरे यांनी सांगितले. एनसीबीने 2 ऑक्टोबर रोजी मुंबईच्या आंतरराष्ट्रीय क्रूझ टर्मिनलवरून अटक केलेल्या आठ जणांमध्ये तिघांचा समावेश आहे.

NCB तर्फे हजर असलेले ASG अनिल सिंग यांनी न्यायालयाला सांगितले की, ते मुकुल रोहतगी, अमित देसाई आणि अली काशिफ खान देशमुख यांनी केलेल्या युक्तिवादांना गुरुवारी उत्तर देतील. तसेच “मी एका तासात माझा युक्तिवाद पूर्ण करण्याचा प्रयत्न करेन,” असे देखील एएसजी सिंग म्हणाले.

The post ब्रेकिंग! आर्यन खानला जामीन नाहीच, सुनावणी उद्यापर्यंत तहकूब appeared first on थोडक्यात घडामोडी.

मुंबई : मुंबई क्रूज ड्रग्स प्रकरणात एनसीबीच्या तपासाची व्याप्ती वाढत आहे. बॉलीवूड स्टार शाहरुख खानचा मुलगा आर्यन खान या प्रकरणात तुरुंगात आहे आणि आता अभिनेत्री अनन्या पांडेही ड्रग्ज प्रकरणात एनसीबीच्या रडारवर आली आहे. शुक्रवारी याप्रकरणी अनन्या पांडेची दुसऱ्यांदा चौकशी करण्यात आली, मात्र काल ती नियोजित वेळेऐवजी तीन तास उशिराने एनसीबी कार्यालयात पोहोचल्यामुळे अनन्याला फटकारण्यात आले.

मुंबई एनसीबीने अभिनेत्री अनन्या पांडेला दुसऱ्या दिवशी 11 वाजता चौकशीसाठी उपस्थित राहण्यास सांगितले होते, परंतु अनन्या 11 ऐवजी 2 वाजल्यानंतर एनसीबी कार्यालयात पोहोचली. एनसीबीचे झोनल डायरेक्टर समीर वानखेडे यांनी अनन्याला उशिरा आल्याबद्दल फटकारले. ते म्हणाले कि, ‘तुम्हाला 11 वाजता बोलावण्यात आलं होतं आणि तुम्ही आता येत आहात. येथे अधिकारी तुमची वाट पाहत मोकळे बसलेले नाहीत. हे तुमचे प्रॉडक्शन हाऊस नाही, हे केंद्रीय एजन्सीचे कार्यालय आहे, तुम्हाला बोलावलेल्या वेळी येत जा.

एनसीबीने शुक्रवारी अनन्या पांडेची 4 तास चौकशी केली. गुरुवारी देखील एनसीबीने या प्रकरणात अनन्याची 2 तास चौकशी केली होती. आता अनन्या पांडेला सोमवारी एनसीबीने पुन्हा चौकशीसाठी बोलावले आहे. दोन्ही दिवशी अनन्यासोबत तिचे वडील चंकी पांडे होते.

अनन्या पांडेशी संबंधित तीन चॅट सर्वात महत्वाचे आहेत. 2018 ते 2019 या काळात हे चॅट गांज्याबद्दल झाले आहेत. अनन्याचे दोन्ही फोन एनसीबीने जप्त केले आहेत. जेव्हा अनन्याला प्रश्न विचारण्यात आले, तेव्हा ती खूप गोंधळलेली दिसत होती. तिने नीट आठवत नाही असे सांगून अनेक प्रश्न टाळले. एका चॅटमध्ये आर्यन खान आणि अनन्या पांडे यांच्यात गांजाबद्दल बोलणे झाले. आर्यन विचारत होता काही जुगाड होऊ शकेल का? अनन्याने उत्तर दिले – मी व्यवस्था करीन. एनसीबीने हे चॅट अनन्याला दाखवले आणि प्रश्न विचारला, ज्यावर अनन्याने उत्तर दिले की मी फक्त विनोद करत बोलत होते.

The post …म्हणून समीर वानखेडे यांनी अनन्या पांडेला फटकारले appeared first on थोडक्यात घडामोडी.

मुंबई : मुंबईच्या अंमली पदार्थ नियंत्रण विभागाने (NCB) मुंबईहून गोव्याला निघालेल्या मोठ्या क्रूझवर कारवाई करत ड्रग पार्टी करणाऱ्यांना अटक केली आहे. एनसीबीची ही कारवाई अतिशय गुप्तपणे सुमारे ७ तास सरू होती अशी माहिती आहे. या प्रकरणी आतापर्यंत एकूण १३ जणांना ताब्यात घेतल्याचे वृत्त आहे. दरम्यान यावेळी क्रूझवर बॉलिवूड सुपरस्टार शाहरुख खानचा मुलगा आर्यन खानदेखील उपस्थित होता.

एनसीबी अधिकाऱ्यांनी आर्यन खानचा मोबाइल फोन जप्त केला असून त्यामधील चॅट्स आणि टेक्स्ट मेसेजेची तपासणी केली जात आहे. याशिवाय ताब्यात घेतलेल्या इतरांचेही मोबाइल तपासले जात आहेत. आर्यन खानने एनसीबी अधिकाऱ्यांना सांगितले की त्याला क्रूझवरील पार्टीमध्ये पाहुणा म्हणून बोलावण्यात आलं होतं.

मुंबई-गोवा क्रूझमध्ये रेव्ह पार्टी होणार असल्याची माहिती एनसीबीला मिळाली होती. त्यानंतर एनसीबीचे विभागीय संचालक समीर वानखेडे यांच्या नेतृत्वात एनसीबीचे एक पथक या क्रूझवर पोहोचले होते. ही क्रूझ समुद्राच्या मध्यमागी पोहोचल्यानंतर क्रूझवर ड्रग पार्टी सुरू झाली. त्यानंतर एनसीबीच्या पथकाने कारवाई सुरू केली. एनसीबी अधिकाऱ्यांकडून छापा टाकण्यात आला. यात मोठ्या प्रमाणात ड्रग्ज हाती लागले असल्याची माहिती आहे.

एनसीबी सूत्रांनी सांगितलं की, आर्यन खानने चौकशी दरम्यान सांगितलं की, त्याला व्हिआयपी गेस्ट म्हणून तिथं बोलवलं होतं. त्याच्याकडून क्रुझवर येण्यासाठी कुठलीही फी घेतली नव्हती. त्यानं म्हटलं आहे की, माझ्या नावाचा वापर करुन बाकीच्यांना बोलावलं गेलं. या प्रकरणी ताब्यात घेतलेल्या लोकांची आज चौकशी होणार आहे. अद्याप कुणाला अटक केलेली नसून चौकशीसाठी ताब्यात घेतल्याची माहिती समीर वानखेडे यांनी दिली आहे.

The post मुंबई- गोवा क्रूझवर एनसीबीची कारवाई, शाहरूख खानचा मुलगा आर्यन खान NCBच्या ताब्यात appeared first on थोडक्यात घडामोडी.

मुंबई : सुशांत सिंह राजपूत मृत्यूप्रकरणी तपास करत असलेल्या नार्कोटिक्स कंट्रोल ब्युरोच्या (NCB) हाती त्याच्यापर्यंत ड्रग्ज पोहोचवणारा ड्रग पेडलर लागला आहे. हरीश खान नावाच्या या ड्रग पेडलरला एनसीबीने वांद्रेमधून अटक केली आहे.

मुंबई नार्कोटिक्स कंट्रोल ब्युरोने 28 मे रोजी सुशांत सिंह राजपूतचा रूम पार्टनर आणि जवळचा मित्र सिद्धार्थ पीठानीला हैदराबादमधून अटक केली होती. एनसीबीने नीरज आणि केशव जे सुशांतचे नोकर होते त्यांची सुद्धा कसून चौकशी केली. या चौकशीनंतर हरीश खान याचं नाव समोर आलं. हरीश खान तोच ड्रग पेडलर आहे, ज्याच्याकडून सुशांत सिंहपर्यंत ड्रग्ज पोहचवले जात होते. सिद्धार्थच्या अटकेनंतर एनसीबीने नीरज आणि केशव या दोघांची चौकशी सुरू केली आणि या प्रकरणी नवे खुलासे होऊ लागले.

हरीश त्याच्या भाऊ शकीब खान सोबत वांद्रे परिसरात ड्रग्सचा व्यापार करत होता. हरीश खानला दाऊद सारखं बनायचं होतं. आपली दहशत कायम ठेवण्यासाठी हरीश खान वांद्रे परिसरातील छोट्या ड्रग पेडलरच अपहरण करायचा आणि त्यांच्याकडे असलेलं ड्रग्स जप्त करुन त्यांना आपल्या टोळीमध्ये काम करण्यास भाग पाडायचा. हरीशसोबत त्याचा भाऊ शाकिब खान याला अटक केली आहे. शाकिबवर 19 पेक्षा जास्त गुन्हे दाखल असल्यामुळे शाकीबला एनसीबीने वांद्रे पोलीसांच्या ताब्यात दिलं आहे.

The post NCB ची मोठी कारवाई, सुशांतला ड्रग्ज पोहोचवणारा ड्रग पेडलर हरीश खानला अटक appeared first on थोडक्यात घडामोडी.

मुंबई : ड्रग्स प्रकरणात नारकोटिक्स कंट्रोल ब्युरोने (NCB) मंगळवारी मुंबई विमानतळावरून ताब्यात घेतलेल्या एजाज खानला मध्यवर्ती एजन्सीने अटक केली आहे. फारुख बटाटा आणि त्याचा मुलगा शादाब बटाटा चालवित असलेल्या ड्रग सप्लाय सिंडिकेटचा तो एक भाग असल्याचा NCB ला संशय आहे. ड्रग पेडलर शादाबच्या अटकेनंतर एनसीबीच्या चौकशीत एजाजचे नाव समोर आले. त्यानंतर अभिनेत्याशी संबंधित अंधेरी आणि लोखंडवाला येथील अनेक ठिकाणी एनसीबीने छापेही मारले आहेत.

मंगळवारी आठ तासांच्या चौकशीनंतर एजाज खानला अटक केली असल्याची पुष्टी एनसीबीच्या अधिकाऱ्यांनी दिली. या अभिनेत्याला मुंबई विमानतळावरून ताब्यात घेण्यात आले होते आणि चौकशीसाठी त्याला एनसीबी कार्यालयात आणण्यात आले होते. काल याच प्रकरणात फारुख बटाटा याचीही आठ तास चौकशी करण्यात आली होती. त्यानंतर त्याला जाण्याची परवानगी देण्यात आली. त्याचा मुलगा शादाब याला गेल्या आठवड्यात एनसीबीने अटक केली होती.

ड्रगच्या प्रकरणात एजाज खानचे नाव समोर येण्याची ही पहिली वेळ नाही. 2018 मध्ये त्याच्याकडे बंदी घातलेले अमली पदार्थ सापडल्यानंतर शहरातील एका हॉटेलमधून मुंबई पोलिसांच्या अँटी-नारकोटिक्स सेलने अटक केली होती.

The post एजाज खानला NCB कडून अटक, ड्रग्ज प्रकरणात 8 तासांच्या चौकशीनंतर कारवाई appeared first on थोडक्यात घडामोडी.

मुंबई : अभिनेता सुशांतसिंह राजपूतच्या मॅनेजरला ड्रग्स प्रकरणात अटक करण्यात आली आहे. चौकशीसाठी समन्स बजावल्यापासून ऋषिकेश पवार फरार झाला होता. एनसीबी अधिकाऱ्यांनी त्याच्या घरी धाड टाकली होती. त्यावेळी त्याच्या घरातील लॅपटॉपमध्ये महत्त्वाची माहिती मिळाली होती. त्यानंतर ऋषिकेशची हार्ड डिस्क एनसीबी अधिकाऱ्यांनी जप्त केली होती.

अभिनेता सुशांतसिंह राजपूतचे अनेक ड्रीम प्रोजेक्ट होते. त्या प्रोजेक्टवर ऋषिकेश हा मॅनेजर म्हणून काम करत होता. सुशांतचा नोकर दीपेश सावंत याच्या चौकशीतही ऋषिकेश पवारचं नाव आलं होतं. ऋषिकेश पवारच्या विरोधात अनेक पुरावे एनसीबी अधिकाऱ्यांकडे उपलब्ध आहेत. अटक टाळण्यासाठी ऋषिकेशने सेशन्स कोर्टात धाव घेतली होती. मात्र कोर्टाने त्याचा जामीन अर्ज फेटाळला आहे. यानंतर त्याला चौकशीसाठी हजर राहण्याबाबत समन्स बजावलं होतं, मात्र तेव्हापासून तो फरार होता.

एनसीबी अधिकाऱ्यांना त्याला शोधण्यात यश आलं असून ड्रग्स प्रकरणात चौकशीसाठी नारकोटिक्स कंट्रोल ब्युरोने त्याला ताब्यात घेतले आहे.

The post ब्रेकिंग : अभिनेता सुशांतसिंह राजपूतच्या मॅनेजरला अटक, NCB ने घेतले ताब्यात appeared first on थोडक्यात घडामोडी.

पुणे : अभिनेता सुशांतसिंह राजपूत मृत्यू प्रकरणात अंमली पदार्थ तस्करीचे रॅकेट समोर आल्यानंतर नार्कोटिक्‍स कंट्रोल ब्यूरो (NCB) च्या पथकाने शनिवारी पुण्यातील हडपसर व खडकवासला परिसरात छापे टाकले.

सुशांतसिंहच्या मृत्यू प्रकरणाच्या तपासादरम्यान अनेक अंमली पदार्थ तस्करांची नावे समोर आली होती. त्यामध्ये बॉलिवूडमधील कलाकारांना अंमली पदार्थ पुरविणाऱ्यांबरोबच काही कलाकारांचीदेखील चौकशी करण्यात आली होती. याच प्रकरणात चिंकू पठाण व त्याचा साथीदार आरीफ भोजवाल यांची नावे समोर आली होती. ‘एनसीबी’च्या पथकाने दोघांनाही अटक केली होती.

चौकशीमध्ये राजू सोनावणे हा त्यांचा साथीदार असून त्याची अंमली पदार्थ तस्करीमध्ये महत्त्वाची भूमिका असल्याची माहिती ‘एनसीबी’ला मिळाली होती.  सोनावणे याचे खडकवासला येथील घर आणि हडपसरमधील गोडाउनवर ‘एनसीबी’ने छापे टाकले. पठाण व भोजवाल या दोघांना अटक झाल्यानंतर सोनावणे पळून गेला आहे. त्याच्या घरात महत्त्वाचे पुरावे हाती लागले आहेत. तो कर्नाटकमधून फळे, धान्याची वाहतूक करताना अंमली पदार्थांची तस्करी करीत असल्याचे चौकशीत समोर आले आहे.

The post सुशांतसिंह राजपूत मृत्यू प्रकरण : NCB पथकाचे पुण्यात छापे appeared first on थोडक्यात घडामोडी.