पुणे : पुणे जिल्ह्यातील उरुळीकांचन जवळील सोरतापवाडी येथे सासरच्या छळामुळे एका विवाहितेने आत्महत्या केल्याची धक्कादायक घटना उघडकीस आली आहे. दीप्ती मगर चौधरी (वय अंदाजे 30) यांनी शनिवारी रात्री गळफास घेऊन आपले जीवन संपवले.

या प्रकरणी उरुळीकांचन पोलिस ठाण्यात पती रोहन चौधरी, सासू सुनिता चौधरी, सासरे कारभारी चौधरी आणि दीर रोहित चौधरी यांच्याविरोधात गंभीर स्वरूपाचा गुन्हा दाखल करण्यात आला आहे.

पोलिस तपासानुसार, दीप्ती आणि रोहन यांचा विवाह 2019 साली झाला होता. विवाहावेळी दीप्तीच्या कुटुंबीयांनी सुमारे 50 तोळे सोने दिले होते. मात्र, लग्नानंतरही सासरच्यांकडून तिच्यावर वारंवार मानसिक छळ करण्यात येत होता.

दीप्तीच्या आईने दिलेल्या तक्रारीनुसार, सासरच्या मंडळींकडून तिच्या चारित्र्यावर संशय घेतला जात होता. तसेच “दिसायला सुंदर नाही”, “घरकाम जमत नाही” अशा अपमानास्पद आरोपांद्वारे तिचा सातत्याने छळ केला जात होता.

मुलीचा संसार वाचावा म्हणून दीप्तीच्या माहेरकडून एकदा 10 लाख रुपये रोख आणि वाहनासाठी तब्बल 25 लाख रुपये देण्यात आले होते. तरीही सासरच्या त्रासात कोणतीही घट झाली नाही, असे तक्रारीत नमूद करण्यात आले आहे.

तक्रारीतील सर्वात गंभीर बाब म्हणजे, दीप्ती गर्भवती असताना तिच्या पोटातील बाळ मुलगी असल्याचे समजताच, पती व सासरच्या सदस्यांनी तिच्या इच्छेविरुद्ध जबरदस्तीने गर्भपात केल्याचा आरोप आहे. ही माहिती दीप्तीने स्वतः आपल्या आईला दिल्याचे तक्रारीत नमूद करण्यात आले आहे.

दरम्यान, आरोपी सासू सुनिता चौधरी या ऑक्टोबर 2025 मध्ये सोरतापवाडी गावाच्या सरपंचपदी निवडून आल्या होत्या, तर सासरे कारभारी चौधरी हे शिक्षक असल्याची माहिती समोर आली आहे.

उरुळीकांचन पोलीस अधिक तपास करत असून, या प्रकरणामुळे पुन्हा एकदा हुंडाबळी आणि कौटुंबिक छळाचा गंभीर प्रश्न ऐरणीवर आला आहे.

The post सासरच्या छळाला कंटाळून विवाहितेची आत्महत्या; हुंडा, चारित्र्यावर संशय, जबरदस्ती गर्भपात… appeared first on थोडक्यात घडामोडी.

मुंबई : मुंबईतील विक्रोळी परिसरात प्रजासत्ताक दिनाच्या दिवशी एक अत्यंत हृदयद्रावक दुर्घटना घडली असून निष्काळजीपणामुळे एका निष्पाप चिमुरडीला जीव गमवावा लागला आहे.

ही घटना 26 जानेवारी रोजी विक्रोळी पूर्वेकडील टागोर नगरमधील आंबेडकर नगर परिसरात घडली. प्रजासत्ताक दिनाच्या कार्यक्रमासाठी रस्त्याच्या कडेला मोठा स्पीकर उभारण्यात आला होता. घटनेच्या वेळी तीन वर्षांची मुलगी खेळत असताना, अचानक तो स्पीकर तिच्या अंगावर कोसळला. या अपघातात ती गंभीर जखमी झाली.

प्रत्यक्षदर्शीच्या म्हणण्यानुसार आणि समोर आलेल्या सीसीटीव्ही फुटेजनुसार, एका चिंध्या गोळा करणाऱ्या व्यक्तीच्या डोक्यावर असलेले चिंध्यांचे गाठोडे स्पीकरच्या वायरमध्ये अडकले. त्यामुळे संतुलन बिघडून स्पीकर थेट मुलीच्या अंगावर पडल्याचा आरोप करण्यात येत आहे.

या अपघातात चिमुकलीला गंभीर दुखापत झाली. अपघातानंतर तातडीने मुलीला जवळच्या रुग्णालयात दाखल करण्यात आले. मात्र, डॉक्टरांनी तपासून तिचा मृत्यू झाल्याचे घोषित केले.

या प्रकरणी विक्रोळी पोलिस ठाण्यात गुन्हा दाखल करण्यात आला असून, संबंधित निष्काळजीपणा, परवानगी आणि सुरक्षेच्या उपाययोजनांबाबत पोलीस सखोल तपास करत आहेत. सार्वजनिक कार्यक्रमांमधील सुरक्षेवर पुन्हा एकदा गंभीर प्रश्न उपस्थित झाला आहे.

The post निष्काळजीपणाचा कळस! विक्रोळीत स्पीकर अंगावर कोसळून 3 वर्षांच्या चिमुकलीचा दुर्दैवी मृत्यू appeared first on थोडक्यात घडामोडी.

मुंबई : महाराष्ट्रातील हवामानात लक्षणीय बदल होत असून नागरिकांना थंडी, पाऊस आणि वाढत्या तापमानाचा एकाच वेळी सामना करावा लागत आहे. गेल्या काही दिवसांपासून राज्यभरात जाणवणारी तीव्र थंडी आता हळूहळू ओसरत असून, त्याचबरोबर अनेक भागांत पावसाच्या सरींनी हजेरी लावली आहे.

हवामान खात्याच्या माहितीनुसार, बंगालच्या उपसागरात तयार झालेल्या कमी दाबाच्या क्षेत्राचा परिणाम महाराष्ट्राच्या काही भागांवर होणार आहे. याच पार्श्वभूमीवर मराठवाडा आणि उत्तर महाराष्ट्रातील एकूण 6 जिल्ह्यांसाठी पावसाचा यलो अलर्ट जारी करण्यात आला आहे.

मुंबई–कोकणात ढगाळ हवामान
मुंबई, ठाणे आणि रायगड जिल्ह्यात सकाळपासून ढगाळ वातावरण असून काही ठिकाणी हलक्या पावसाच्या सरी पडल्या. रत्नागिरी आणि सिंधुदुर्ग जिल्ह्यांतही तुरळक पावसाची नोंद झाली आहे. दुपारी आकाश अंशतः ढगाळ राहण्याची शक्यता असून किनारपट्टीवर मध्यम ते जोरदार वारे वाहण्याचा अंदाज वर्तवण्यात आला आहे.
मुंबईत कमाल तापमान 28 ते 32 अंश सेल्सिअस, तर किमान तापमान 18 ते 22 अंश सेल्सिअस दरम्यान राहील.

मराठवाडा व उत्तर महाराष्ट्रावर पावसाचं सावट
मराठवाड्यातील छत्रपती संभाजीनगर, जालना, बीड, परभणी, नांदेड आणि लातूर जिल्ह्यांत ढगाळ हवामान राहणार असून 27 व 28 जानेवारी रोजी हलक्या ते मध्यम पावसाची शक्यता आहे.
उत्तर महाराष्ट्रातील नाशिक, धुळे, जळगाव आणि नंदुरबार भागातही दिवसभर ढगाळ वातावरण राहील आणि काही ठिकाणी पावसाच्या सरी कोसळू शकतात.

पश्चिम महाराष्ट्र कोरडाच, पण उष्णतेत वाढ
पुणे, सातारा, सांगली, कोल्हापूर आणि सोलापूर जिल्ह्यांत हवामान कोरडे राहण्याचा अंदाज आहे. मात्र दुपारनंतर तापमानात वाढ होऊन उष्णतेची तीव्रता जाणवण्याची शक्यता आहे. येथे कमाल तापमान 29 ते 33 अंश, तर किमान तापमान 14 ते 18 अंश सेल्सिअस दरम्यान राहील.

विदर्भातही ढगांची दाटी
नागपूर, अमरावती, अकोला, वाशिम, यवतमाळ, चंद्रपूर आणि गडचिरोली जिल्ह्यांत हवामान अंशतः ढगाळ राहणार असून काही भागांत हलक्या पावसाच्या सरी पडू शकतात.

हवामान खात्याने नागरिकांना बदलत्या हवामानामुळे आरोग्याची काळजी घेण्याचे आवाहन केले असून, शेतकऱ्यांनीही पुढील काही दिवस हवामानाचा अंदाज लक्षात घेऊन नियोजन करण्याचा सल्ला दिला आहे.

The post राज्यात अनेक ठिकाणी पावसाची हजेरी, ‘या’ 6 जिल्ह्यांना अलर्ट जारी appeared first on थोडक्यात घडामोडी.

पुणे : पुणे जिल्ह्यातील दौंड शहरात मंगळवारी एक अत्यंत हृदयद्रावक आणि धक्कादायक घटना घडली. सार्वजनिक बांधकाम विभागाच्या वतीने सुरू असलेल्या रस्त्याच्या डांबरीकरणाच्या कामादरम्यान रोड रोलरखाली सापडून चार वर्षांच्या चिमुकल्याचा जागीच मृत्यू झाला. या घटनेने दौंड शहर हादरले असून नागरिकांमध्ये तीव्र संताप व्यक्त होत आहे.

मृत मुलाचे नाव आर्यन जाधव असे असून ही घटना दौंड शहरातील जनता कॉलनी परिसरात, सेंट सेबिस्टियन हायस्कूलच्या मागील रस्त्यावर घडली. आर्यनची आई याच ठिकाणी मजूर म्हणून काम करत होती. काम सुरू असताना आर्यन रस्त्याच्या कडेला खेळत होता.

प्रत्यक्षदर्शींनी दिलेल्या माहितीनुसार, डांबरीकरण करत असलेला रोड रोलर अचानक भरधाव वेगाने मागे घेतला गेला. आवश्यक ती खबरदारी न घेता रोलर चालवण्यात आल्याने आर्यन थेट रोलरखाली सापडला. काही क्षणातच त्याचा जागीच चिरडून मृत्यू झाला. अपघातानंतर रोड रोलरचा चालक घटनास्थळावरून फरार झाल्याची माहिती आहे.

या घटनेतील सर्वात धक्कादायक बाब म्हणजे, डांबरीकरण सुरू असताना संबंधित रस्ता वाहतुकीसाठी पूर्णपणे बंद करण्यात आलेला नव्हता. काम सुरू असल्याचे कोणतेही सूचना फलक, बॅरिकेड्स किंवा सुरक्षात्मक उपाययोजना ठिकाणी नव्हत्या. तसेच सार्वजनिक बांधकाम विभागाकडून किंवा ठेकेदाराकडून कामावर कोणतीही देखरेख ठेवण्यात आली नव्हती.

अपघातानंतरही बराच वेळ संबंधित ठेकेदार, सुपरवायझर किंवा जबाबदार अधिकारी घटनास्थळी फिरकले नसल्याचा आरोप स्थानिक नागरिकांनी केला आहे. प्रशासनाच्या हलगर्जीपणामुळे आणि ठेकेदारांच्या बेजबाबदारपणामुळे एका निष्पाप चिमुकल्याचा जीव गेल्याची भावना व्यक्त होत आहे.

दरम्यान, दौंड पोलिसांनी घटनास्थळी पंचनामा करून पुढील तपास सुरू केला असून फरार रोड रोलर चालकाचा शोध घेतला जात आहे. दोषींवर सदोष मनुष्यवधाचा गुन्हा दाखल करून कठोर कारवाई करावी, तसेच पीडित कुटुंबाला तात्काळ आर्थिक मदत द्यावी, अशी जोरदार मागणी नागरिक, सामाजिक कार्यकर्ते आणि राजकीय प्रतिनिधींनी केली आहे.

The post निष्काळजीपणाचा कहर! दौंडमध्ये रोड रोलरखाली चिरडून 4 वर्षांच्या चिमुकल्याचा हृदयद्रावक मृत्यू appeared first on थोडक्यात घडामोडी.

मुंबई : हिवाळ्याचे दिवस सुरू होताच तापमानात अचानक घट होते आणि त्यामुळे सर्दी, खोकला, त्वचा कोरडी पडणे, सांधेदुखी अशा तक्रारी वाढतात. आरोग्य तज्ज्ञांच्या मते, या हंगामात योग्य आहार, योग्य कपडे आणि स्वच्छ जीवनशैली अवलंबल्यास अनेक आरोग्य समस्यांपासून बचाव होऊ शकतो.

1. कोमट पाणी नियमित प्या
हिवाळ्यात तहान कमी लागते, परंतु शरीरातील द्रवपातळी टिकवण्यासाठी कोमट पाणी वेळोवेळी पिणे आवश्यक आहे. हे डिहायड्रेशन, थकवा आणि कोरडी त्वचा यापासून संरक्षण करते.

2. रोगप्रतिकारक शक्ती वाढवणारा आहार
थंडीच्या दिवसात खालील पदार्थ विशेष फायदेशीर मानले जातात:

• हळदीचे दूध
• आवळा, लिंबू, संत्री
• हंगामी भाज्या — गाजर, बीटरूट
• बदाम, अक्रोड, खजूर

हे पदार्थ शरीराला उष्णता देतात आणि प्रतिकारशक्ती मजबूत करतात.

3. त्वचेची विशेष काळजी घ्या
कोरडी हवा त्वचेला अधिक त्रासदायक ठरते. त्वचारोग तज्ज्ञ सांगतात:

• कोमट पाण्याने कमी वेळ आंघोळ करावी
• हायड्रेटिंग मॉइश्चरायझर वापरावे
• नारळ तेल, ग्लिसरिन किंवा अलोव्हेरा जेल लावावे
• ओठांसाठी लिप बाम लावणे आवश्यक

4. व्यायाम थांबवू नका
हिवाळ्यात आळस जाणवतो, परंतु दररोज किमान 20–30 मिनिटे चालणे, योगा किंवा हलका व्यायाम केल्यास रक्ताभिसरण सुधरते आणि सांधेदुखी कमी होते.

5. योग्य कपडे परिधान करा
थंडीपासून बचाव करण्यासाठी मल्टी-लेयर कपडे उत्तम पर्याय आहेत. कान, पाय आणि हात झाकून ठेवणे विशेष महत्वाचे आहे. गरम सूप, हर्बल काढा यांसारखे पेय शरीराला उबदार ठेवतात.

6. सूर्यप्रकाशात काहीवेळ बसा
हिवाळ्यात व्हिटॅमिन D ची कमतरता भासू शकते. सकाळच्या कोवळ्या उन्हात 15–20 मिनिटे बसणे हाडांसाठी व प्रतिकारशक्तीसाठी फायदेशीर ठरते.

7. घरातील हवा स्वच्छ ठेवा
थंडीपासून वाचण्यासाठी खिडक्या बंद ठेवल्या जातात, पण त्यामुळे घरातील हवा दूषित होऊ शकते. दिवसातून काही वेळ घरात ताजी हवा खेळती ठेवावी.

हिवाळा आल्हाददायक वाटत असला तरी स्वतःची काळजी घेणे अत्यावश्यक आहे. योग्य आहार, नियमित व्यायाम, त्वचेची काळजी आणि उबदार कपडे या चार गोष्टींचे पालन केल्यास संपूर्ण हंगामभर आपण तंदुरुस्त आणि निरोगी राहू शकतो.

हिवाळ्यात वाढते सांधे आणि हाडांचे दुखणे, ‘या’ उपायांनी मिळेल आराम

गुळाचा चहा पिण्याचे हे फायदे आणि तोटे तुम्हाला माहित आहेत का? जाणून घेऊया…

The post हिवाळ्यात आरोग्याची काळजी कशी घ्यावी? तज्ज्ञांनी दिल्या महत्त्वाच्या सूचना appeared first on थोडक्यात घडामोडी.

हिंजवडी आयटी पार्क परिसरात पुन्हा एकदा बेफाम वेगाचा कहर पाहायला मिळाला. गर्दीच्या वेळी कंपनीची बस अचानक फुटपाथवर चढत दोन चिमुकल्यांचा जागीच मृत्यू झाला. या दुर्घटनेनंतर वाहतूक आणि रस्ते सुरक्षा व्यवस्थेबाबत गंभीर प्रश्न उपस्थित झाले आहेत.

हिंजवडी आयटी पार्कमधील वाढत्या अपघातांच्या मालिकेत सोमवारी आणखी एक भीषण घटना घडली. सायंकाळी साडेसहाच्या सुमारास पंचरत्न चौकाजवळ कंपनीच्या कर्मचाऱ्यांना नेणारी बस अचानक नियंत्रणाबाहेर गेली आणि ती थेट फुटपाथवर चढली. गर्दीच्या वेळी हा प्रकार घडल्याने पादचाऱ्यांना सुटण्याची संधीही मिळाली नाही.

या अपघातात अर्चना देवा प्रसाद (८) आणि तिचा भाऊ सूरज देवा प्रसाद (६) यांचा जागीच मृत्यू झाला. त्यांची बहिण प्रिया देवा प्रसाद (१८) गंभीर जखमी असून तिला उपचारासाठी रुग्णालयात दाखल करण्यात आले आहे. पादचारी अविनाश चव्हाण आणि बसमधील काही प्रवासीही जखमी झाल्याची माहिती पोलिसांनी दिली.

अपघात छत्रपती शिवाजी महाराज चौक ते वाकड या व्यस्त मार्गावर झाला. साक्षीदारांच्या मते, कंपनीची बस अतिवेगात होती आणि चालकाने ताबा गमावल्यानंतर वाहनाने थेट चालत जाणाऱ्या नागरिकांवर धडक दिली. धडक इतकी जोरदार होती की परिसरात काही क्षणांतच भीतीचे वातावरण पसरले.

घटनेची माहिती मिळताच हिंजवडी पोलीस आणि वाहतूक विभागाचे अधिकारी घटनास्थळी दाखल झाले. काही काळ तीव्र वाहतूक कोंडी निर्माण झाली होती, ती पोलिसांनी तात्काळ सुरळीत केली.

हिंजवडी परिसरातील वाढती वाहतूक कोंडी, अवजड वाहनांची गर्दी आणि वारंवार होणारे अपघात या मुद्द्यांवर नागरिक सातत्याने आवाज उठवत आहेत. या दुर्दैवी घटनेनंतर “बेफाम वेग थांबणार कधी?” असा तीव्र रोष नागरिकांनी व्यक्त केला. अधिक कडक सुरक्षा उपाय, वेगनियंत्रण व पादचारी संरक्षणाच्या मागण्या पुन्हा जोर धरू लागल्या आहेत.

सारांश : महत्त्वाच्या घडामोडी एकाच नजरेत

• हिंजवडी पंचरत्न चौकात कंपनी बसने फुटपाथवरील पादचाऱ्यांना दिली जोरदार धडक
• दोन चिमुकल्यांचा जागीच मृत्यू, एक जखमी मुलगी गंभीर
• काही पादचारी आणि बस प्रवासीही जखमी
• नागरिकांमध्ये संताप; वाहतूक व सुरक्षा व्यवस्थेवर प्रश्नचिन्ह
• पोलिसांनी वाहतूक कोंडी नियंत्रणात आणली; पुढील तपास सुरू

The post हिंजवडी आयटी पार्क हादरलं: भरधाव बस फुटपाथवर; बहीण–भावाचा जागीच मृत्यू, अनेक जखमी appeared first on थोडक्यात घडामोडी.

जालना : एका पत्नीने दिरासोबत मिळून पतीची निर्घृण हत्या केल्याचे समोर आले आहे. सुमारे एक महिन्यापासून बेपत्ता असलेल्या 30 वर्षीय परमेश्वर तायडे यांच्या मृत्यूचा उलगडा पोलिसांनी केला आहे. या प्रकरणी परमेश्वर तायडे यांचा भाऊ ध्यानेश्वर तायडे (28) आणि पत्नी मनीषा तायडे (25) आणि यांना अटक करण्यात आली आहे. जालना जिल्ह्यातील बदनापूर तालुक्यामधील सोमठाणा गावात हे धक्कादायक खून प्रकरण उघडकीस आले आहे.

परमेश्वर तायडे एक महिन्यापूर्वी रहस्यमयरीत्या बेपत्ता झाले होते. त्यांच्या पत्नीने याबाबत पोलिसांकडे तक्रार दाखल करून शोध सुरू असल्याचे भासवले. मात्र बुधवारी गावातील तलावात अज्ञात मृतदेह आढळल्यानंतर पोलिसांनी तपासाची दिशा बदलली. चौकशीदरम्यान कुटुंबीयांचे जबाब एकमेकांशी जुळत नसल्याने पोलिसांचा संशय अधिक बळावला. तपास पुढे जात असताना मनीषा आणि तिचा दिर ध्यानेश्वर यांचे अवैध संबंध असल्याचे उघडकीस आले. परमेश्वर यांनी या संबंधांना विरोध केला होता, ज्यामुळे खूनाचा कट रचल्याचे पोलिसांना आढळले.

पोलिसांनी दिलेल्या माहितीनुसार, 15 ऑक्टोबरच्या रात्री परमेश्वर तायडे झोपलेले असताना ध्यानेश्वरने परमेश्वरवर दगडाने हल्ला केला, तर मनीषाने त्याचा गळा दाबून हत्या केली. गुन्हा लपवण्यासाठी दोघांनी मृतदेह पॉलिथीनमध्ये गुंडाळला, त्याला दगड बांधले आणि जवळच्या जलाशयात फेकून दिला. महिनाभरानंतर मृतदेह पाण्यावर आल्यानंतर या भयंकर प्रकरणाचा उलगडा झाला.

शवविच्छेदनात परमेश्वर यांची हत्या झाल्याची पुष्टी झाल्यानंतर पोलिसांनी दोघांना ताब्यात घेतले. चौकशीत त्यांनी गुन्ह्याची कबुली दिल्याची माहिती मिळाली आहे. पोलिस या प्रकरणाचा सर्वंकष तपास करत असून आणखी कोणाचा यात सहभाग आहे का, याचाही शोध घेतला जात आहे.

परमेश्वर तायडे यांच्या मृत्यूनंतर त्यांच्या दोन लहान मुलांसह वडिलांवर दु:खाचा डोंगर कोसळला आहे. सोमठाणा गावात या घटनेने मोठी खळबळ उडाली असून ग्रामस्थांकडून संताप व्यक्त केला जात आहे.

The post अनैतिक संबंधातून पत्नी आणि भावाने केला तरुणाचा खून, पोलीस तपासात धक्कादायक खुलासा… appeared first on थोडक्यात घडामोडी.

अहिल्यानगर : महाराष्ट्रातील सुप्रसिद्ध कीर्तनकार इंदुरीकर महाराज यांनी कीर्तन सोडण्याचा निर्णय घेतला आहे. काही दिवसांपूर्वी त्यांच्या मुलीचा साखरपुडा मोठ्या थाटामाटात पार पडला. मात्र यावरुन सोशल मीडियातून झालेल्या व्यक्तिगत टीकांमुळे महाराज फारच व्यथित झाले आहेत. परिणामी त्यांनी थेट कीर्तन सोडण्याचा निर्णय घेतला आहे. याबाबतचा एक व्हिडिओ सोशल मीडियावर व्हायरल झाला आहे.

इंदोरीकर महाराज म्हणाले –
आमची पोरं लहान असताना आठ-आठ दिवस माझी त्यांच्याशी गाठ नव्हती. आणि आता लोक इतके खाली गेलेत, की माझ्या मुलीच्या अंगात कपडे कसे आहेत, यावरुन लोकांचे कमेंट्स आहेत. याच्यापेक्षा वाईट काय असेल? आता चार दिवसांपासून माझ्या मुलीच्या अंगातील कपड्यावर लोकांनी बातम्या तयार केल्या, पण तिच्या बापाला… तुम्ही मला घोडे लावा.. माझा पिंड गेलाय… माझ्या मुलाचा आणि मुलीचा काय दोष आहे. पण या कॅमेरावाल्यांनी आठ दिवसात माझं जगणं मुश्किल करुन टाकलंय. काय… मला एक सांगा.. मुलगी तुम्हालाही आहे. तुमच्या मुलीच्या कपड्यावर एखाद्याने कमेंट केली, तर तुम्हाला काय वाटेल? आणि मुलीच्या साखरपुड्यात कपडे नवरदेवाकडचे घेतात की मुलीकडचे घेतात? मग कपडे त्यांनी घेतले असतील की म्या घेतले असतील? एवढी तरी क्लिप टाकणाऱ्यांना लाज पाहिजे ना. माणूस नालायक असावा पण किती?

त्याच्यामुळे आता मी कंटाळलो महाराज. मी दोन-तीन दिवसात टाकणार आहे एक क्लिप. थांबून घेणार आहे आता.. बास झाली ३१ वर्ष.. लोकांच्या शिव्या खाऊन आयुष्यात सगळं चांगलंच केलं, आयुष्यात चांगलं करुन त्याचं फळ… माझ्यापर्यंत ठीक होतं, माझ्या घरादारापर्यंत जायला नको होतं. मी आजही समर्थ आहे ना उत्तर द्यायला. मला अजून दोन वर्ष आयुष्य आहे. मी अजून आहे ना.. पण कुटुंबापर्यंत गेल्यावर त्यात मजा नाही.. आणि ही अक्कल इंदुरीकरलाच आली पाहिजे. त्याने कीर्तनं बंदच केली पाहिजेत. खरंय की खोटंय? तुम्ही काहीच बोलत नाही..

हे त्याने बंद केलं पाहिजे .. त्यालाच लाज वाटली पाहिजे, की आता कमेंट करणारे लोक बोलायला लागले, आता इंदुरीकरने फेटा ठेवून द्यावा. त्याचं त्याने चांगलं जगावं. आम्ही दोन तीन दिवसापासून विचार करतोय, दोन तीन दिवसात मी घेणार आहे निर्णय. पण मजा नाही राहिली त्याच्यात आता. तुम्ही दुसऱ्याला काहीच बोलत नाही.

 

View this post on Instagram

 

A post shared by kirtan malika (@kirtan_malika)

The post आता मी कंटाळलो…! व्यथित इंदोरीकर महाराजांचा कीर्तन सोडण्याचा निर्णय appeared first on थोडक्यात घडामोडी.

पुणे : प्रसिद्ध नृत्यांगना गौतमी पाटील हिच्या वाहनाने झालेल्या अपघातानंतर आता या प्रकरणात नवा वाद उफाळला आहे. या अपघातात रिक्षाचालक मरगळे गंभीर जखमी झाले होते. त्यांच्यावर सध्या दीनानाथ मंगेशकर रुग्णालयात उपचार सुरू आहेत. ते आयसीयूतून बाहेर आले असून तब्येत स्थिर असल्याचे समजते. मात्र, या अपघातानंतर गौतमी पाटील आणि मरगळे कुटुंब यांच्यात आरोप-प्रत्यारोपांचा सिलसिला सुरू झाला आहे.

गौतमी पाटील हिने काल पत्रकार परिषद घेऊन असा दावा केला की, “मी त्या लोकांच्या डायरेक्ट कॉन्टॅक्टमध्ये नाही. मला इकडून तिकडून खबरी येत आहेत. त्यांचा आकडा काही व्यवस्थित नाही. मदतीची मागणी करण्यासाठी त्यांचा एकच आकडा नाही. मध्येच ते 19 लाखांची मागणी करतात, नंतर 20 लाख, आता 10 लाख म्हणणार, असा त्यांचा आकडा आहे. माझ्या भावांपर्यंत आकडे येत आहेत आणि ते माझ्यापर्यंत माहिती पोहोचवत आहेत. माझा मानलेला भाऊ आहे. त्याच्याकडे पैशांची मागणी मरगळे कुटुंबांनी केली.”

या वक्तव्यानंतर आता जखमी रिक्षाचालक मरगळे यांच्या कन्या अपर्णा मरगळे यांनी गौतमी पाटीलचा चांगलाच समाचार घेतला आहे. “गौतमी पाटील आमच्या गरिबीची थट्टा करत आहेत. त्यांच्या वक्तव्यांमध्ये कमालीची विसंगती आहे. गौतमी पाटील हिने आमच्या गरिबीची थट्टा उडवली आहे. गौतमी पाटील कधी म्हणतात की, आमच्याकडे पैसे मागितले आणि कधी म्हणतात की त्यांना कायद्याने जायचं होतं. त्यांच्या दोन्ही वाक्यांमध्ये कमालीची विसंगती दिसत आहे. तुम्ही एकदा ठरवा नक्की काय बोलायचं आहे आणि तुमचा हा मानलेला भाऊ नक्की कोण आहे, तुमचा कोणता भाऊ आमच्यापर्यंत आला, हे सगळ्या महाराष्ट्राला एकदा सांगून द्या. एकीकडे तुम्ही म्हणतात की मी माझ्या मानलेल्या भावाला सांगितलं होतं ते जे मागतील ते देऊन टाका आणि दुसरीकडे जर आम्ही 19 लाखांची मागणी केली होती तर मग तुम्ही का नाही ते देऊन टाकले हे सुद्धा स्पष्ट सांगा. तुम्ही दोन्ही बाजूने बोलत आहात. तुम्ही आमच्यावर खबऱ्या ठेवत आहात का?” असा सवाल अपर्णा मरगळे यांनी केला.

गौतमी पाटील यांनी पुढे असेही म्हटले होते की, “मला कितीही कामे असली तरी मी वेळ काढून गेले असते, पण समोरून अनपेक्षित उत्तरे मिळाल्याने मी जाणं टाळलं. मी सुद्धा गरिबीतून बाहेर आले आहे आणि संकटांना सामोरी गेले आहे.”

यावर प्रत्युत्तर देताना अपर्णा मरगळे म्हणाल्या,
“गौतमी पाटील यांनी ना आमच्याशी संपर्क साधला, ना माणूस म्हणून काही नैतिकता दाखवली. आता त्यांच्याकडून कोणतीही अपेक्षा नाही. मी न्यायासाठी लढत आहे आणि न्याय मिळेपर्यंत बोलत राहणार आहे.”

या परस्परविरोधी आरोपांमुळे आता गौतमी पाटील – मरगळे कुटुंबातील वाद आणखी चिघळण्याची शक्यता व्यक्त केली जात आहे.

The post ‘गौतमी पाटीलच्या वक्तव्यांमध्ये कमालीची विसंगती’, रिक्षाचालक मरगळे यांच्या मुलीने घेतला चांगलाच समाचार appeared first on थोडक्यात घडामोडी.

मुंबई : केंद्र सरकारच्या स्टँड अप इंडिया योजनेंतर्गत अनुसूचित जाती व नवबौद्ध घटकांतील नवउद्योजकांसाठी ‘मार्जिन मनी’ उपलब्ध करून देण्याची योजना सामाजिक न्याय व विशेष सहाय्य विभागामार्फत राबविण्यात येत आहे. मुंबई उपनगर जिल्ह्यातील पात्र लाभार्थ्यांनी या योजनेचा लाभ घ्यावा, असे आवाहन मुंबई उपनगरचे सहायक आयुक्त समाज कल्याण रविकिरण पाटील यांनी केले आहे.

केंद्र सरकारच्या स्टँड अप इंडिया योजनेंतर्गत राज्यातील अनुसूचित जातीच्या सवलती घेण्यास पात्र असलेले अनुसूचित जाती व नवबौद्ध समाजातील नवउद्योजक लाभार्थ्यांना प्रकल्पाच्या एकूण किंमतीच्या लाभार्थी यांच्या हिस्स्यामधील २५ टक्के मधील जास्तीत जास्त १५ टक्के पर्यंत मार्जिन मनी उपलब्ध करून देण्यात येत आहे.

यासंदर्भात विभागाच्या ८ मार्च, २०१९ रोजीच्या शासन निर्णयात योजनेच्या अटी व शर्ती, आवश्यक कागदपत्रांची माहिती व प्रस्ताव सादर करण्याची कार्यपद्धती स्पष्ट करण्यात आलेली आहे. या योजनेचा लाभ घेण्यासाठी सहायक आयुक्त, समाज कल्याण, मुंबई उपनगर, प्रशासकीय इमारत, ४ था मजला, आर. सी. मार्ग, चेंबूर (पूर्व), मुंबई – ४०००७१ या पत्त्यावर अर्ज करावा. कार्यालयाचा दूरध्वनी क्रमांक ०२२-२५२२२०२३ हा असून ई-मेल आय डी acswomumbaisub@gmail.com हा असल्याचे प्रसिद्धी पत्रकात नमूद केले आहे.

The post नवउद्योजकांनी ‘मार्जिन मनी’ योजनेचा लाभ घेण्याचे आवाहन appeared first on थोडक्यात घडामोडी.