हरियाणा : पानिपत शहरातील एका खासगी रुग्णालयाचा मोठा निष्काळजीपणा समोर आला आहे. रात्री उशिरा एका भटक्या कुत्र्याने नवजात बाळाला रुग्णालयातून नेले. दोन दिवसांपूर्वी या बाळाचा जन्म झाल्याचे सांगण्यात येत आहे. काल रात्री कुटुंबातील सदस्य बाळासोबत हॉस्पिटलच्या वॉर्डमध्ये झोपले असताना एका भटक्या कुत्र्याने बाळाला उचलून नेले.

काही वेळाने जाग आल्यावर बाळ जवळ न दिसल्याने त्यांनी बाळाचा शोध सुरू केला. बाळाचा शोध घेत असताना कुटुंबीय रुग्णालयाबाहेर पोहोचले असता त्यांना एका कुत्र्याने नवजात बाळाला तोंडात धरले असल्याचे दिसले. कुटुंबीयांनी अथक प्रयत्न करून कशीतरी कुत्र्यापासून बाळाची सुटका केली आणि त्याला तातडीने रुग्णालयात नेले. मात्र, डॉक्टरांनी बाळाला मृत घोषित केले. बाळाचा मृतदेह सध्या सिव्हिल हॉस्पिटलमध्ये ठेवण्यात आला आहे.

मिळालेल्या माहितीनुसार, सेक्टर 13-17 पोलीस स्टेशन हद्दीतील अन्सल सुशांत सिटी गेट नंबर 3 जवळ आर्ट अँड मदर केअर हॉस्पिटल आहे, जिथे आस मोहम्मदची पत्नी शबनम हिला 25 जून रोजी प्रसूतीसाठी दाखल करण्यात आले होते. त्याच रात्री 8.15 वाजता महिलेने मुलाला जन्म दिला. रुग्णालयाच्या पहिल्या मजल्यावर असलेल्या जनरल वॉर्डमधील एका खोलीत महिलेला दाखल करण्यात आले. काल रात्री खोलीत आई-बाबा, आजी आणि काकीही हजर होत्या. आई खोलीत बेडवर झोपली होती, तर वडील, आजी आणि काकी खाली जमिनीवर झोपले होते, कुटुंबीयांच्या म्हणण्यानुसार बाळाला आजी आणि काकीने शेजारी जमिनीवर झोपवले.

दरम्यान, सर्वजण झोपलेले असताना रात्री सव्वा दोनच्या सुमारास नातेवाइकांचे डोळे उघडले असता त्यांचे बाळ तेथे नसल्याचे दिसून आले. शोध घेत असतानाच नातेवाईकांनी रुग्णालयाबाहेर धाव घेतली, तेथे बाळ कुत्र्याच्या तोंडात होते आणि कुत्रा मुलाला चावत होता. कुटुंबीयांनी सीसीटीव्ही तपासले असता, 2.07 वाजता कुत्रा बाळाला हॉस्पिटलमधून बाहेर नेताना दिसला. या संपूर्ण प्रकरणात रुग्णालयाच्या भूमिकेवरही प्रश्न उपस्थित केले जात असून, भटका कुत्रा खासगी रुग्णालयात कसा घुसला, असा प्रश्न उपस्थित होत आहे.

The post हृदयद्रावक! भटक्या कुत्र्याने नवजात बाळाचे लचके तोडले, खासगी रुग्णालयातील धक्कादायक प्रकार… appeared first on थोडक्यात घडामोडी.

गुवाहाटी : गुवाहाटीच्या बाहेरील भागात मंगळवारी रात्री बलात्काराच्या गुन्ह्यातील एका आरोपीला ठार मारण्यात आले, जेव्हा त्याने गुन्ह्याच्या घटनास्थळाच्या पुनर्बांधणीसाठी त्याच्यासोबत आलेल्या पोलिस पथकावर हल्ला करून कस्टडीतून पळून जाण्याचा प्रयत्न केला. आरोपी बिकी अली (वय 20) याने पळून जाण्याचा प्रयत्न केला, तेव्हा त्याला गोळ्या घालण्यात आल्या.

गुवाहाटी मेडिकल कॉलेज हॉस्पिटलचे अधीक्षक अभिजित सरमा म्हणाले की, “या व्यक्तीला चार जखमा झाल्या आहेत, त्याच्या छातीत एक आणि तीन पाठीमागे. त्याला बुधवारी पहाटे 1 नंतर रुग्णालयात आणण्यात आले, जेथे त्याला मृत घोषित करण्यात आले. शवविच्छेदनानंतर गोळीबाराच्या जखमांचा तपशील उपलब्ध होईल. तसेच गुवाहाटी येथील पानबाजार महिला पोलीस ठाण्याच्या प्रभारी पोलीस अधिकारी ट्विंकल गोस्वामी याही या घटनेत जखमी झाल्याची माहिती सरमा यांनी दिली. त्यांच्या पायाला आणि हाताला किरकोळ दुखापत झाली असून त्यांना रुग्णालयात दाखल करण्यात आले आहे. त्यांची प्रकृती स्थिर असल्याचे सांगण्यात येत आहे.”

अली आणि इतर चार जणांवर १६ वर्षीय विद्यार्थिनीवर बलात्कार केल्याचा आरोप आहे. याप्रकरणी पोलिसात तक्रार दाखल झाल्यानंतर एका आठवड्याने मंगळवारी त्याला अटक करण्यात आली. तक्रारीत, मुलीच्या कुटुंबीयांनी सांगितले की, 16 फेब्रुवारी रोजी मुलीवर बलात्कार झाला. दोन आरोपींनी या घटनेचा व्हिडिओ शूट केला आणि तिने या प्रकरणाची तक्रार केल्यास तो व्हिडिओ ऑनलाइन पोस्ट करण्याची धमकी देखील दिली. त्यांनी कथितरित्या व्हिडिओ हटविण्याचे वचन दिले आणि 19 फेब्रुवारी रोजी मुलीला गुवाहाटी येथील हॉटेलमध्ये बोलावले, जिथे चार जणांनी तिच्यावर पुन्हा लैंगिक अत्याचार केला.

पोलिसांनी आरोपींवर भारतीय दंड संहिता, लैंगिक गुन्ह्यांपासून बालकांचे संरक्षण कायदा आणि माहिती तंत्रज्ञान कायद्यानुसार गुन्हा दाखल केला. अन्य आरोपींना पकडण्याचे प्रयत्न सुरू असल्याचे पोलिसांनी सांगितले.

The post बलात्कार प्रकरणातील आरोपी चकमकीत ठार, कस्टडीतून पळ काढण्याच्या प्रयत्नात असताना… appeared first on थोडक्यात घडामोडी.

कोल्हापूर : गव्याचा हल्ल्यात एका तरुणाचा दुर्दैवी मृत्यू झाला आहे. करवीर तालुक्यातील भुयेवाडी येथील सौरभ संभाजी खोत या २१ वर्षीय तरुणाने गव्याचा हल्ल्यात आपले प्राण गमावले. तर इतर दोघे जण गंभीर जखमी झाल्याची माहिती मिळाली आहे.

सौरभ हा ग्रामपंचायत सदस्य संभाजी खोत आणि माजी सरपंच पूजा खोत यांचा एकुलता एक मुलगा आहे. गेल्या तीन दिवसांपासून या गव्याचा वावर कोल्हापूर शहराच्या परिसरात आहे. गवा पुन्हा नैसर्गिक अधिवासात जावा यासाठी वनखात्यासह वनप्रेमी संघटनेचे सदस्य प्रयत्नशील होते. त्यानंतर गवा भुयेवाडी परिसरात असल्याची माहिती मिळाली होती.  शनिवारी सायंकाळी सातच्या सुमारास गवा भुयेवाडीत शिरला. प्रल्हाद पाटील आपल्या गुऱ्हाळाजवळ होते, यावेळी त्याठिकाणी गवा आला. पाटील यांनी गव्याला हुसकावून लावण्याचा प्रयत्न केला. यावेळी गव्याने पाटील यांना धडक मारत त्यांना जमिनीवर आदळलं. प्रल्‍हाद पाटील याच्या मांडीला शिंग लागले व खांदादेखील फ्रॅक्चर झाला.

त्यानंतर गावकऱ्यांनी चवताळलेल्या गव्याला हुसकावण्याचा प्रयत्न केल्यानंतर गवा बिथरला आणि त्याने सौरभ खोत या तरुणावर हल्ला केला. सौरभच्या डाव्या बाजूच्या बरगडीला गव्याचे शिंग लागले, यात तो गंभीर जखमी झाला. नातेवाईकांनी त्याला तातडीने रुग्णालयात दाखल केले, परंतु, उपचारापूर्वीच डॉक्टरांनी त्याला मृत घोषित केलं आहे. तर शुभम पाटील पळत असताना पडला असता त्याच्या अंगावर गव्याने पाय दिल्यामुळे तोदेखील जखमी झाला.

या भागातील ग्रामस्थांनी सतर्क राहावे, असे आवाहन करण्यात आले आहे. हा गवा भुयेवाडी गावाबाहेरून जोतिबा डोंगराच्या दिशेने गेला असून वनविभागाची रेस्क्यू टीम त्याचा पाठलाग करत आहे.

The post कोल्हापुरात गव्याचा हल्ल्यात तरुणाचा दुर्दैवी मृत्यू, अन्य दोघे गंभीर जखमी appeared first on थोडक्यात घडामोडी.

पुणे : पुण्यातील चाकण परिसरात दुहेरी हत्याकांडाने खळबळ उडाली आहे. हॉटेल आणि वीटभट्टीचा व्यवसाय करणारा व्यावसायिक बाळू मरगज याने हे हत्याकांड घडवून आणले आहे. बाळू मरगज याची मुलगी त्याच्याच विटभट्टीवर काम करणाऱ्या एका कामगारासोबत पळून गेली होती. याचाच राग मनात धरुन या व्यावसायिकाने हत्या केल्याचं बोललं जात आहे. बाळू सिताराम गावडे (वय 26), राहुल दत्तात्रय गावडे (वय 28) अशी मृतावस्थेत आढळलेल्या दोन कामगारांची नावे आहेत. वीटभट्टी मालक आणि त्याच्या पाच साथीदारांना पोलिसांनी ताब्यात घेतले आहे.

मिळालेल्या माहितीनुसार, खेड तालुक्यातल्या मौजे करंजविहीरे या गावात ही दुहेरी हत्येची घटना घडली आहे. येथे बाळू मरगज नावाच्या या व्यावसायिकाचे ‘माणुसकी’ नावाचे एक हॉटेल असून या हॉटेलच्या समोर बाळू मरगज यांची वीटभट्टीदेखील आहे. वीटभट्टीवर काम करणारा कामगार बाळू सिताराम गावडे याच्यासोबत हॉटेल मालकाच्या 21 वर्षीय मुलीचे प्रेमसंबंध प्रस्थापित झाले होते. त्यातूनच या कामगाराने मालकाच्या मुलीला पळवून नेले. यामध्ये दुसऱ्या एका कामगाराने त्यांची मदत केली होती. त्याचे नाव राहुल दत्तात्रय गावडे होते. राहुल बाळूचा मित्र होता.

बाळू आणि मालकाची मुलगी 14 तारखेला पळून गेले होते. याचा राग हॉटेल मालक आरोपी बाळू मरगज याच्या मनात होता. त्याने आपल्या सहकाऱ्यांच्या मदतीने या तिघांचा शोध घेतला आणि त्यांना हॉटेलवर घेऊन आला. त्यानंतर बाळू गावडे आणि राहुल गावडे यांना तेथे बेदम मारहाण केली. तब्बल सहा जणांनी या दोघांना काठ्या, लोखंडी रॉडने मारहाण केली. यामध्ये दोघांचाही मृत्यू झाला. दोन्ही मृत आसखेड खुर्दचे रहिवाशी आहेत.

पोलिसांनी या प्रकरणी कारवाई करत 6 आरोपींना ताब्यात घेतले आहे. अनिल संभाजी कडाळे, राजू साहेबराव गावडे, किरण बाळू मेंगाळ, चंद्र करा उर्फ मुक्ता बाळू गावडे, आनंदा सीताराम जाधव, हॉटेल मालक बाळू मरगज अशी आरोपींची नावे आहेत.

The post दुहेरी हत्याकांडाने पुण्यात खळबळ! कामगारासोबत मुलगी पळून गेल्याचा राग, व्यावसायिकाने केले भयंकर कृत्य appeared first on थोडक्यात घडामोडी.

राजस्थान : राजस्थानच्या बीकानेर जिल्ह्यात एका विक्षिप्त वडिलांनी आपल्या सात वर्षाच्या निरागस मुलाची हत्या केल्याची खळबळजनक घटना घडली आहे. आरोपी मुलारामने आपल्या मुलाला उचलून पाण्याच्या टाकीत फेकले, त्यानंतर दगड मारून त्याला जखमी केले. या मुलाने टाकीबाहेर येण्याचा प्रयत्न केला, तेव्हा वडिलांनी टाकीचे झाकण बंद करून टाकले. त्यामुळे या मुलाचा पाण्यात बुडून मृत्यू झाला.

स्थानिकांनी दिलेल्या माहितीनुसार, मुलाराम याला मानसिक आजार आहे. त्याला दोन मुले आहेत. दोन वर्षापूर्वी मुलारामने त्याच्या पत्नीचा पाय तोडला होता, त्यानंतर त्याच्या पत्नीने त्याला घटस्फोट दिला. घटस्फोट झाल्यानंतर ती एका मुलाला घेऊन निघून गेली. दुसरा मुलगा मुलारामकडे सोपवण्यात आला होता. आरोपी कोणताही कामधंदा करत नव्हता. यापूर्वी त्याने आत्महत्या करण्याचा देखील प्रयत्न केला होता.

जन्मदात्या वडिलांनी केला ९ वर्षाच्या चिमुकलीवर बलात्कार

पोलिसांनी दिलेल्या माहितीनुसार, टाकीमध्ये जवळपास 6 ते 7 फूट पाणी होते. मुलाचा मृतदेह ताब्यात घेण्यात आला असून पोस्टमॉर्टमसाठी पाठविला आहे. आरोपी मुलारामला अटक करण्यात आली आहे. या घटनेनंतर परिसरात खळबळ उडाली आहे. आरोपी पोलिसांच्या ताब्यात असून त्याच्या मानसिक स्थितीचा अंदाज घेण्यात येत आहे. शवविच्छेदन अहवाल आल्यानंतर पुढील कारवाई केली जाईल.

भयंकर कृत्य! महिलेने तीन किलो साखर घालून उकळलेले पाणी नवऱ्याच्या अंगावर फेकले, आणि…

The post वडिलांनी केली सात वर्षाच्या मुलाची हत्या, अगोदर पाण्याच्या टाकीत फेकलं, दगड मारले आणि… appeared first on थोडक्यात घडामोडी.

पुणे : एका तडीपार गुंडानं फरासखाना पोलीस ठाण्यातील सहाय्यक फौजदाराचा खून केल्याची धक्कादायक घटना घडली आहे. बुधवार पेठेतील श्रीकृष्ण टॉकीजजवळ आज रात्री दीड वाजण्याच्या सुमारास ही घटना घडली. या प्रकरणी गुंड प्रवीण महाजन याला अटक करण्यात आली आहे.

आरोपी प्रवीण महाजन याला एका वर्षापूर्वी तडीपार केले होते. सहाय्यक फौजदार समीर सय्यद (वय ४८) हे काम संपवून खडक पोलीस लाइनमधील राहत्या घरी जात असताना महाजन याने शहराच्या मध्यवस्तीमध्ये येत श्रीकृष्ण टॉकीज जवळ त्यांच्यावर हल्ला केला. त्यात त्यांचा मृत्यू झाला. या खूनामागील कारण अद्याप स्पष्ट झालेले नाही. महाजन हा पोलिस रेकाॅर्डवरील सराईत गुन्हेगार असून, त्याच्यावर २० पेक्षा अधिक गंभीर गुन्ह्याची नोंद आहे. त्यामुळे पोलिसांनी आतापर्यंत त्याला दोनदा तडीपार केले आहे.

घटनेची माहिती मिळताच वरिष्ठ अधिकाऱ्यांनी घटनास्थळी धाव घेतली. पोलिसांनी तातडीनं कारवाई करत महाजन याला ताब्यात घेतले. दरम्यान, या घटनेची माहिती घेत असतानाच बुधवार पेठेत एका महिलेचा खून झाल्याचे समोर आले आहे. या प्रकरणी फरासखाना पोलिस ठाण्यात गुन्हा दाखल करण्यात आला आहे. मात्र, पुण्यात काही तासांच्या अंतरानं दोन खुनाच्या घटना समोर आल्यामुळं प्रचंड खळबळ उडाली आहे.

The post धक्कादायक : पुण्यात काही तासांत दोन हत्या, तडीपार गुंडानं केला सहाय्यक फौजदाराचा खून appeared first on थोडक्यात घडामोडी.

दौंड : प्रेयसी आणि अन्य एका महिलेच्या मदतीने पत्नी व मुलाचा खून करून आत्महत्येचा बनाव रचणाऱ्या पतीसह तिघा जणांवर गुन्हा दाखल करण्यात आला आहे. या प्रकरणी भाऊसाहेब मारुती शेलार (वय ३४, रा. केडगाव, ता. दौंड) यांनी यवत पोलिस ठाण्यात फिर्याद दिली होती. आरोपींना अटक करण्यात आली आहे.

पोलिसांनी दिलेल्या माहितीनुसार, पाटस येथील महिला लीना सचिन सोनवणे (वय ३५) आणि तिचा सात वर्षांचा मुलगा ओम सोनवणे यांचा मृतदेह पंख्याला लटकलेल्या स्थितीत आढळला होता. ही घटना मंगळवारी पहाटे समोर आली. मात्र, ही आत्महत्या नसल्याचा संशय आल्याने यवत पोलिसांनी तपासाला वेग देऊन अवघ्या पाच तासांत खुनाचा छडा लावला. मृत लीना यांचा पती सचिन दिलीप सोनवणे (वय ३७, रा. सध्या रा. मांजरी, ता. हवेली, मूळ पाटस) याने प्रेयसी रेणुका उर्फ प्रणाली भारत तळेकर आणि अन्य एका महिलेच्या मदतीने हे हत्याकांड केल्याचे पोलिस तपासात समोर आले आहे. पाटस येथील स्वराज व्हॅली अपार्टमेंट येथे लीना सोनवणे या चार वर्षांपासून पतीपासून विभक्त राहत होत्या. त्यांच्याबरोबर मुलगी वैष्णवी आणि मुलगा ओम देखील राहत होते.

दरम्यान, सचिन सोनवणे याला त्याच्या पत्नीचे अनैतिक संबंध असल्याचा संशय होता. सचिन त्याची प्रेयसी आणि एका महिलेसह मंगळवारी पहाटेच्या सुमारास पाटस येथे आला. तिघांनी लीना आणि मुलगा ओम याला मारहाण केली. यावेळी मुलगी वैष्णवी घरातच होती. वैष्णवी झोपी गेल्यानंतर आरोपींनी लीना आणि ओम यांचा गळा दाबून खून केला. त्यानंतर दोघांचे मृतदेह पंख्याला लटकावले. वैष्णवीला सकाळी जाग आल्यानंतर आईचा मृतदेह स्वयंपाक घरातील पंख्याला आणि ओमचा मृतदेह बेडरूममधील पंख्याला लटकलेला पाहिला. घाबरलेल्या वैष्णवीने फोन करून नातेवाइकांना माहिती दिली. नातेवाइक आल्यानंतर त्यांनी तात्काळ पोलिसांना कळवले.

पोलिसांनी हत्येच्या कोनातून तपास केला आणि आरोपींचा छडा लावला. पोलिसांनी वैष्णवीला विश्‍वासात घेऊन माहिती विचारली असता मारहाणीची सर्व घटना तिने सांगितली. खून केल्यानंतर आरोपी सचिन सोनवणे पुण्याला निघून गेला होता. सचिन सोनवणे पुण्यावरून पाटस येथे दाखल झाल्यानंतर त्याच्यावरच लक्ष केंद्रित केले. चौकशीदरम्यान त्याने दोघांच्या खुनाची कबुली दिली. आरोपींना न्यायालयासमोर हजर केले असता त्यांना पाच दिवसांची पोलिस कोठडी सुनावण्यात आली.

The post अनैतिक संबंधाच्या संशयावरून पत्नी व मुलाची हत्या; पतीने प्रेयसीच्या मदतीने केले भयंकर कृत्य appeared first on थोडक्यात घडामोडी.

उत्तर प्रदेशमधील कानपूरमध्ये अतिशय धक्कादायक बातमी समोर आली आहे. एका वडिलांनी आपल्या तीन वर्षाच्या मुलाला निर्दयपणे मारहाण करून ठार मारले. मुलाचा दोष हा होता की त्याने वडिलांच्या अंथरुणात लघवी केली होती. घटनेनंतर आरोपीने पत्नी आणि आपल्या दोन मुलींना धमकावले की ही गोष्ट कोणाला सांगितली तर संपूर्ण कुटुंबाला ठार मारेल.

हमीरपूर जिल्ह्यातील छनी खुर्द येथे राहणारा संतराम प्रजापती मजूर आहे. त्याचा परिवार पत्नी अनिता, दोन मुली अंजना आणि खुशी आणि एकुलता एक मुलगा रवींद्र (3 वर्षे) असा आहे. घाटमपूरमधील हातरूआ गावाजवळ असलेल्या वीटभट्टीत काम करण्यासाठी संतराम काही दिवसांपूर्वी आला होता. तो कुटुंबासमवेत भट्टीवर असलेल्या एका कच्च्या घरात राहत होता.

आरोपीची पत्नी अनिताने दिलेल्या माहितीनुसार, मंगळवारी सकाळी मुलगा रवींद्रने वडिलांच्या पलंगावर लघवी केली तेव्हा संतरामची झोप मोडली. तो इतका संतापला की त्याने रंगाच्या भरात मुलाला बेदम मारहाण करण्यास सुरवात केली. रडण्याचा आवाज ऐकून जवळच झोपलेल्या मुलीही उठल्या. त्या दोघींनी आपल्या भावाला वाचविण्यासाठी वडिलांसमोर हात जोडले. अनितानेही मुलाला वाचविण्याचा प्रयत्न केला. पण संतरामने त्यांनादेखील मारहाण केली. त्यानंतर संतरामने मुलाला जमिनीवर आपटले आणि मरेपर्यंत मारहाण केली.

मुलाच्या मृत्यूनंतर संतराम पिशवीत मुलाचा मृतदेह घेऊन संपूर्ण कुटुंबाला घेऊन छानी खुर्द गावी गेला. मुलाच्या हत्येची बाब घराबाहेर गेली तर कुटुंबीयांना जिवे मारण्याची धमकी दिली. संधी मिळताच पत्नी अनिताने आपला भाऊ अजय याला फोनवर सर्व काही सांगितले. यानंतर भाऊ अजयसह कुटुंबातील इतर सदस्य गावी पोहोचले. आरोपी संतरामला पकडून मारहाण केली आणि या घटनेची माहिती हमीरपूर पोलिसांना दिली. हमीरपूर पोलिसांनी मृतदेह ताब्यात घेऊन संतरामला अटक केली व घाटमपूर पोलिसांच्या स्वाधीन केले. संतरामने आपला गुन्हा कबूल केला आहे. त्याच्यावर खुनाचा गुन्हा दाखल करून पुढील कारवाई केली जात आहे.

The post धक्कादायक : अंथरुणात लघवी केली म्हणून वडिलांनी मुलाला जमिनीवर आपटून ठार मारले appeared first on थोडक्यात घडामोडी.

उत्तर प्रदेशातील कानपूर मध्ये दारूच्या नशेत असलेल्या मुलाने आपल्या वडिलांची गोळ्या घालून हत्या केली. घरातील टीव्ही बंद करण्यावरून त्यांच्यात वाद झाला होता. त्यानंतर मुलाने वडिलांना गोळ्या घातल्या. आवाज ऐकून कुटुंबातील इतर जण बाहेर आले, तेव्हा वयोवृद्ध वडील जमिनीवर कोसळलेले होते. त्यांना तात्काळ रुग्णालयात नेण्यात आले. पण उपचार सुरू असताना त्यांचा मृत्यू झाला. पोलिसांनी हत्येचा गुन्हा दाखल करून आरोपीला अटक केली आहे.

सिकंदरा पोलीस ठाण्याच्या हद्दीतील नसीरपूरमध्ये ही घटना घडली. लालाराम कटिहार (वय ८०) हे लष्करातून निवृत्त झालेल्या अशोक कटिहार या आपल्या मुलासह राहत होते. बुधवारी संध्याकाळी लालाराम कटिहार त्यांचा नातू ऋषभ याच्यासोबत टीव्ही पाहत होते. त्याचवेळी नशेत धुंद असलेला अशोक घरी आला आणि टीव्ही बंद करण्यास सांगू लागला. थोड्या वेळाने टीव्ही बंद करतो असे लालाराम यांनी सांगितले तर त्याने त्यांच्याशी वाद घातला. ऋषभला मारहाण करण्यास सुरुवात केली. त्याचा वाचवण्यासाठी लालाराम पुढे आले. त्यावर राग अनावर झालेल्या अशोकने घरातील बंदूक आणली आणि वडिलांवर गोळ्या झाडल्या.

कानपूर देहातचे वरिष्ठ पोलीस अधीक्षक (ASP) अनुप कुमार यांनी सांगितले की, टीव्ही बंद करण्यावरून लालाराम आणि त्यांचा मुलगा यांच्यात वाद झाला. त्यानंतर अशोकने वडिलांना गोळ्या घालून ठार केले. घटनास्थळावरून बंदूक मिळाली आहे. आरोपीला अटक करून त्याच्याविरोधात पुढील कारवाई करण्यात येत आहे.

The post किरकोळ कारणावरून वाद; मुलाने वडिलांची केली गोळ्या घालून हत्या appeared first on थोडक्यात घडामोडी.

काँग्रेसचे माजी नगरसेवक देवा ऊसरे यांची आज सकाळी दोन अज्ञात तरुणांनी कुऱ्हाडीचे वार करून हत्या केली. ऊसरे यांची दिवसाढवळ्या हत्या करण्यात आल्याने नागपूर हादरून गेले आहे.

देवा ऊसरे हे नागपूर येथील गड्डीगोदाम येथे राहतात. ते आज सकाळी नेहमीप्रमाणे बाहेर चहाच्या टपरीवर आले होते. यावेळी त्यांनी टपरी शेजारच्या रुग्णालयाजवळ दुचाकी लावली आणि मागे वळत नाही तोच दोन अज्ञात तरुणांनी त्यांच्यावर कुऱ्हाडीने सपासप वार केले. कुऱ्हाडीचे जोरदार घाव बसल्याने ते जागीच रक्ताच्या थारोळ्यात पडले. त्यानंतर हल्लेखोरांनी घटनास्थळावरून पलायन केलं. या घटनेची माहिती मिळताच पोलिसांनी घटनास्थळी धाव घेतली. ऊसरे यांना रुग्णालयात दाखल करण्यात आले असता त्यांना मृत घोषित करण्यात आल्याचं सूत्रांनी सांगितलं. त्यांच्या मागे पत्नी, दोन मुले, दोन भाऊ असा बराच मोठा परिवार आहे.

The post कुऱ्हाडीचे वार करून काँग्रेसचे माजी नगरसेवक देवा ऊसरे यांची हत्या appeared first on थोडक्यात घडामोडी.