गुजरात : गुजरातच्या राजकारणात आज मोठ्या घडामोडी पाहायला मिळाल्या. मुख्यमंत्री भूपेंद्र पटेल यांच्या नेतृत्त्वाखालील सध्याच्या मंत्रिमंडळाने अचानक सर्व सदस्यांचे राजीनामे सादर केले. हे राजीनामे केंद्रीय नेतृत्वाच्या आदेशानंतर घेण्यात आले असल्याची माहिती आहे.

मुख्यमंत्र्यांच्या निवासस्थानी झालेल्या बैठकदरम्यान वरिष्ठ नेत्यांनी मंत्र्यांना हा निर्णय समजावून सांगितला. यानंतर सर्व मंत्र्यांनी आपापले राजीनामे मुख्यमंत्री भूपेंद्र पटेल यांच्याकडे सुपूर्द केले. सुरुवातीला अंदाज व्यक्त केला जात होता की, १२ मंत्री राजीनामा देतील, मात्र मुख्यमंत्री वगळता सर्व मंत्र्यांचे राजीनामे घेण्यात आले आहेत.

राज्यातील राजकीय विश्लेषकांच्या मते, या सर्व राजीनाम्यांचा उद्देश कॅबिनेट विस्तार करण्याशी संबंधित आहे. सूत्रांच्या माहितीनुसार, मुख्यमंत्री भूपेंद्र पटेल आज रात्री राज्यपालांची भेट घेऊन मंत्र्यांचे राजीनामे त्यांच्या हाती सुपूर्द करतील.

अद्याप भाजप किंवा मुख्यमंत्री कार्यालयाकडून अधिकृत घोषणा झालेली नाही. मात्र, राजकीय वर्तुळात सांगण्यात येत आहे की, नव्या मंत्रिमंडळाचा शपथविधी उद्या, शुक्रवारी सकाळी साडे ११ वाजता, गांधीनगर येथील महात्मा मंदिर येथे पार पडेल. या कार्यक्रमाला केंद्रीय मंत्री अमित शहा आणि भाजपचे राष्ट्रीय अध्यक्ष जे. पी. नड्डा उपस्थित राहणार आहेत.

विशेष म्हणजे, या शपथविधीनंतर मुख्यमंत्री भूपेंद्र पटेल नवीन मंत्रिमंडळाचा आकार निश्चित करतील आणि आगामी काळात गुजरातमध्ये राजकारणाची दिशा ठरवली जाईल. राजकीय वर्तुळात यासंदर्भात वेगवेगळ्या चर्चा रंगल्या आहेत, मात्र केंद्रीय नेतृत्वाच्या आदेशानुसार हा निर्णय घेण्यात आलेला आहे, असा अंदाज व्यक्त केला जात आहे.

गुजरातमध्ये सध्याच्या मंत्रिमंडळातील सर्व मंत्र्यांचे राजीनामे घेणे ही खूप मोठी आणि ऐतिहासिक घडामोड मानली जात आहे. आता पुढील काही दिवसात नव्या मंत्रिमंडळाच्या सदस्यांची नावे जाहीर होण्याची शक्यता आहे आणि आगामी कॅबिनेट विस्तारावर सर्वांचे लक्ष लागले आहे.

The post गुजरातच्या राजकारणात मोठी घडामोड, मुख्यमंत्री वगळता सर्व मंत्र्यांचे राजीनामे appeared first on थोडक्यात घडामोडी.

गुजरातमधील मेहसाना जिल्ह्यात एक धक्कादायक घटना घडली आहे. आरोग्य विभागाच्या कर्मचार्‍यांनी नसबंदीचे टार्गेट पूर्ण करण्यासाठी एका अविवाहित तरुणाला दारू पाजली आणि त्याची नसबंदी केली. या प्रकाराने एकच खळबळ उडाली आहे.

गोविंद दंतानी नामक 30 वर्षीय तरुणाने आपबिती सांगितली. तो शेतात काम करत असताना एक आरोग्य कर्मचारी त्याच्याकडे आला. त्याने गोविंदला लिंबू आणि पेरू तोडण्यासाठी रोजंदारीवर बोलावले आणि 500 रुपये रोज देण्याचं आश्वासन दिलं. गोविंद त्यासाठी तयार झाला. त्याला लगेच कारमध्ये बसवून, आरोग्य कर्मचाऱ्याने त्याला 100 रुपयांची दारू पाजली. दारूच्या नशेत असताना, त्याला सरकारी रुग्णवाहिकेतून गांधीनगरजवळ असलेल्या अदलज येथील रुग्णालयात नेलं आणि त्याच्यावर नसबंदीची शस्त्रक्रिया केली. शुद्धीवर आल्यावर गोविंदला या प्रकाराची माहिती मिळाली.

त्याच्या पोटात वेदना होऊ लागल्यावर, गोविंद डॉक्टरकडे गेला आणि तिथे त्याला कळलं की त्याची नसबंदी झाली आहे. या घटनेमुळे गोविंदच्या लग्नाची तयारी धुडकली, कारण त्याची लग्नासाठीचे नातेवाईक वधू पक्षाशी संबंध तोडले.

हा प्रकार, कुटुंब नियोजन पंधरवाडा साजरा असताना, टार्गेट पूर्ण करण्याच्या उद्देशाने आरोग्य कर्मचार्‍यांनी केला असल्याचा आरोप आहे. मेहसाना जिल्ह्यात 175 नसबंदी ऑपरेशन करण्याचं टार्गेट ठरवण्यात आलं होतं. या प्रकरणावर जिल्हा आरोग्य अधिकारी आरोप फेटाळत असले तरी, टार्गेट पूर्ण करण्यासाठी अशी कार्यवाही करणं हे गंभीर प्रश्न उपस्थित करत आहे.

The post नसबंदीचे टार्गेट पूर्ण करण्यासाठी आरोग्य कर्मचार्‍यांचा धक्कादायक प्रकार: अविवाहित तरुणाला दारू पाजून शस्त्रक्रिया appeared first on थोडक्यात घडामोडी.

अहमदाबाद : जोस बटलरने या सामन्यातही तुफानी खेळी साकारत शतक झळकावले आणि राजस्थानच्या विजयात मोलाचा वाटा उचलला. बटलरचे हे या हंगामातील चौथे शतक ठरले आहे. त्याचबरोबर सर्वाधिक धावाही त्याच्याच नावावर आहेत. तसेच एका हंगामात सर्वाधिक शतके झळकावणारा तो पहिलाच परदेशी खेळाडू ठरला आहे. आतापर्यंत आयपीएलमध्ये कोणत्याही परदेशी खेळाडूला आयपीएलमध्ये चार शतके झळकावता आली नव्हती. तर जोस बटलरच्या खेळीच्या जोरावर राजस्थान रॉयल्सने रॉयल चॅलेंजर्स बंगळुरूचा 7 गडी राखून पराभव करून आयपीएल 2022 च्या फायनलमध्ये प्रवेश केला. फायनलमध्ये त्यांचा सामना गुजरात टायटन्सशी होणार आहे.

IPL 2022 च्या क्वालिफायर 2 मध्ये जॉस बटलरच्या शतकच्या जोरावर राजस्थान रॉयल्सने आरसीबीचा 7 विकेटने पराभव करत आयपीएलची फायनल गाठली आहे. जॉस बटलरचं या आयपीएलमधलं हे चौथं शतक आहे. आरसीबीने दिलेलं 159 रनचं आव्हान राजस्थानने 18.1 ओव्हरमध्ये 3 विकेट गमावून पूर्ण केलं. बटलरने 60 बॉलमध्ये नाबाद 106 रन केले, यामध्ये 10 फोर आणि 6 सिक्सचा समावेश होता. आरसीबीकडून जॉश हेजलवूडला 2 आणि वानिंदु हसरंगाला 1 विकेट मिळाली.

या सामन्यात राजस्थानचा कर्णधार संजू सॅमसनने टॉस जिंकून पहिले बॉलिंगचा निर्णय घेतला आणि आरसीबीला 20 ओव्हरमध्ये ८ गाडी बाद करत 157 धावांवर रोखलं. आरसीबीकडून रजत पाटीदारने सर्वाधिक 58 धाव केल्या. फाफ डुप्लेसिस (25) आणि ग्लेन मॅक्सवेल (24) यांना चांगली सुरूवात मिळूनही मोठा स्कोअर करता आला नाही. राजस्थानकडून प्रसिद्ध कृष्णाने 4 ओव्हरमध्ये 22 रन देऊन 3 विकेट घेतल्या, तर मकॉयने 4 ओव्हरमध्ये 23 रन देऊन 3 विकेट मिळवल्या. याशिवाय बोल्ट आणि अश्विन यांना 1-1 विकेट घेण्यात यश मिळालं.

फायनल मॅच गुजरात-राजस्थानमध्ये
रविवार 29 मे रोजी आयपीएल 2022 ची फायनल गुजरात टायटन्स आणि राजस्थान रॉयल्स यांच्यात होणार आहे. राजस्थान रॉयल्सने शेन वॉर्नच्या नेतृत्वात 2008 साली झालेली पहिली फायनल जिंकली होती, तर गुजरात टायटन्सचा आयपीएलचा हा पहिलाच मोसम असून त्यांनी पहिलीच मोसमात अंतिम फेरी गाठली आहे.

WHAT. A. WIN for @rajasthanroyals! ? ?

Clinical performance by @IamSanjuSamson & Co. as they beat #RCB by 7⃣ wickets & march into the #TATAIPL 2022 Final. ? ? #RRvRCB

Scorecard https://t.co/orwLrIaXo3 pic.twitter.com/Sca47pbmPX

— IndianPremierLeague (@IPL) May 27, 2022

बटलरची विक्रम : 
बटलरने या सामन्यात ६० चेंडूंत १०६ धावांची खेळी साकारली. राजस्थानकडून या हंगामात खेळताना ८१७ धावा केल्या आहेत आणि या हंगामातील सर्वाधिक धावा त्याच्या नावावर आहेत. त्यामुळे त्याच्या नावावरच यावेळी ऑरेंज कॅप असेल, यात शंका नाही. बटलरने या सामन्यात षटकारासह आपल्या ८०० धावा पूर्ण केल्या आहेत. आतापर्यंत आयपीएलमध्ये आठपेक्षा जास्त धावा करणार तो तिसरा फलंदाज ठरला आहे. यापूर्वी विराट कोहली आणि डेव्हिड वॉर्नर यांनी एका हंगामात ८०० पेक्षा जास्त धावा केल्या होत्या. या यादीमध्ये आता बटलरचा समावेश झाला आहे. राजस्थानकडून एकाही फलंदाजाला आतापर्यंत अशी कामगिरी करता आलेली नाही. त्याने आत्तापर्यंत ८० सामने खेळले आहेत. त्यात त्याने २६२ चौकार तर १२९ षटकार लगावाले आहेत. विशेष बाब म्हणजे या हंगामाला सुरूवात झाली तेव्हापासून आँरेंज कॅप त्याच्याजवळचं आहे. आयपीएलच्या एका हंगामात सर्वाधिक शतकं झळकावण्याच्या यादीत त्याने विराट कोहलीशी बरोबरी केली आहे. २०१६ साली कोहलीने चार शतके झळकावली होती. बटलरने यावर्षी आतापर्यंत चार शतकं पूर्ण केली असून त्याने कोहलीशी बरोबरी केली आहे. त्यामुळे आता अंतिम फेरीत जर बटलरने शतक साकारले तर आयपीएलमध्ये सर्वाधिक शतकं झळकावण्याचा मान त्याला मिळू शकतो. राजस्थानकडून सर्वाधिक पाच शतकं आता बटलरच्या नावावर आहेत, यापूर्वी अजिंक्य रहाणे आणि संजू सॅमसन यांनी प्रत्येकी दोन शतकं झळकावली होती. बटलरने या हंगामात मुंबई इंडियन्स, दिल्ली कॅपिटल्स, आरसीबी आणि केकेआरबरोबर शतके झळकावली आहेत. त्यामुळे आता आयपीएलच्या अंतिम सामन्यात जेतेपद कोण पटकावतं याबरोबरच बटलर शतक करतो की नाही, याकडे सर्वांचे लक्ष लागलेले असेल. त्यामुळे ऑरेंज कॅपबरोबर बटलर अजून कोणते पुरस्कार पटकावतो, याची उत्सुकता सर्वांना असेल.

The post IPL RR v RCB 2022 : राजस्थान रॉयल्स 14 वर्षांनंतर फायनलमध्ये, जोस बटलरचे धमाकेदार शतक, ऑरेंज कॅपसह नोंदवले बरेच विक्रम appeared first on थोडक्यात घडामोडी.

नवी दिल्ली : आरोग्य आणि कुटुंब कल्याण मंत्रालयाच्या सूत्रांनी दिलेल्या माहितीनुसार, XE चे एक प्रकरण गुजरातमध्ये आढळून आले आहे. 11 मार्च रोजी रुग्णाची कोविड-19 साठी सकारात्मक चाचणी झाली आणि एका आठवड्यात तो बरा झाला होता. जीनोम-सिक्वेंसिंगनंतर, रुग्णाला कोरोनाव्हायरसच्या XE प्रकाराने संसर्ग झाल्याचे आढळून आले आहे. तथापि, हे XE प्रकार असल्याची पुष्टी करण्यासाठी नमुन्याची पुन्हा तपासणी केली जाईल, असे सरकारी सूत्रांनी सांगितले.

वडोदरा शहरातील गोत्री भागातील एका 60 वर्षीय व्यक्तीची 11 मार्च रोजी चाचणी पॉझिटिव्ह आली होती, त्यानंतर त्याचा नमुना जीनोम सिक्वेन्सिंगसाठी पाठवण्यात आला होता. सिक्वेन्सिंगच्या निकालावरून असे दिसून आले की त्याला XE प्रकाराने संसर्ग झाला होता. या माणसाने आंतरराज्य प्रवासाचा उल्लेख केलेला नाही.

बुधवारी, XE या अधिक संक्रमित कोविड-19 प्रकारचे पहिले प्रकरण मुंबईत आढळून आले. बृहन्मुंबई महानगरपालिकेच्या अधिकाऱ्याने सांगितले की, दक्षिण आफ्रिकेतील रहिवासी, जो संसर्गातून बरा झाला आहे, त्याचा डेटा पुढील पुष्टीसाठी नॅशनल इन्स्टिट्यूट ऑफ बायोमेडिकल जीनोमिक्स (NIBGM) कडे पाठवला जाईल.

The post मुंबईनंतर गुजरातमध्ये आढळला कोरोनाच्या XE व्हेरिएंटचा रुग्ण appeared first on थोडक्यात घडामोडी.

दीव : दीवमध्ये पॅरासेलिंग करताना एका दाम्पत्याच्या पॅराशूटची दोरी तुटल्याचा धक्कादायक व्हिडीओ समोर आला होता. अजित काथड आणि त्यांची पत्नी सरला गुजरातच्या उना किनारपट्टीवर पॅरासेलिंग करण्यासाठी गेले असताना रविवारी ही घटना घडली होती. राईड करत असताना काही मिनिटांतच त्यांच्या पॅराशूटची पॉवरबोटला बांधलेली दोरी तुटली. त्यानंतर हे जोडपे थेट समुद्रात पडले.

मात्र, सुदैवाने अजित किंवा त्यांची पत्नी सरला या दोघांनाही दुखापत झाली नाही आणि ते जखमी न होता बचावले. त्यांनी लाइफजॅकेट घातलेले होते आणि समुद्रकिनाऱ्यावर तैनात असलेल्या जीवरक्षकांनी (lifeguards) त्यांना लगेचच वाचवले. अजित काथड यांचा मोठा भाऊ राकेश धारेचा हे तेथे त्यांचा पॅरासेलिंगचा व्हिडिओ कॅमेऱ्यात टिपण्यासाठी उपस्थित होते. राकेश यांनी सांगितले कि, “मी व्हिडिओ रेकॉर्ड करत होतो आणि जेव्हा दोरी तुटली तेव्हा काय करावे हे मला कळत नव्हते. मी माझा भाऊ आणि वहिनींना खूप उंचीवरून पडताना पाहत होतो आणि त्या क्षणी मला इतके असहाय्य कधीच वाटले, जितके याअगोदर कधीही वाटले नाही.”

या घटनेचा व्हिडिओ राहुल धारेचा यांनी ट्विटरवर शेअर केला आहे, ज्यांनी अधिकाऱ्यांना याबाबत कारवाई करण्यास सांगितले आहे.

@VisitDiu @DiuTourismUT @DiuDistrict @VisitDNHandDD
Parasailing Accident,
Safety measures in India,
and they said very rudely that this is not our responsibility. Such things happens. Their response was absolutely pathetic.#safety #diu #fun #diutourism #accident pic.twitter.com/doN4vRNdO8

— Rahul Dharecha (@RahulDharecha) November 14, 2021

या अंगावर काटा आणणाऱ्या घटनेमुळे या जोडप्याला मोठा धक्का बसला. अजित यांनी इंडियन एक्सप्रेसला सांगितले कि, “आम्ही आमच्या लाइफ जॅकेटमुळे तरंगत राहिलो, तेव्हा माझी पत्नी एकदम शॉक्ड होती आणि ती काही मिनिटे बोलू शकली नाही. आमचा पॅराशूट ज्या पॉवरबोटवर बांधला होता त्यांना आम्ही मदतीची विनंती केली, पण त्यांनी आम्हाला सांगितले की जीवरक्षक आम्हाला वाचवतील. सुमारे पाच मिनिटानंतर, जीवरक्षक दुसर्‍या पॉवरबोटीवर आले आणि त्यांनी आमची सुटका केली.”

The post Video : पॅरासेलिंग करताना तुटली पॅराशूटची दोरी, ‘त्या’ दाम्पत्याचं पुढे काय झालं? जाणून घ्या… appeared first on थोडक्यात घडामोडी.

गुजरात : गुजरातचे राज्यपाल आचार्य देवव्रत यांनी लव्ह जिहाद कायद्याला मान्यता दिली आहे. त्यानुसार, जबरदस्तीने धर्मांतर करणार्‍यांवर आणि फसवणूक करुन विवाह करणार्‍यांवर कायदेशीर कारवाई केली जाईल. 15 जूनपासून गुजरात राज्यात हा कायदा लागू होणार आहे. मुख्यमंत्री विजय रुपाणी यांनी हा निर्णय घेतला आहे. लव्ह जिहाद विधेयक गुजरात विधानसभेत जोरदार गदारोळात पारित झाले.

गुजरातचे राज्यपाल आचार्य देवव्रत यांनी नुकतीच लव्ह जिहाद कायद्याला मान्यता दिली होती. त्यानंतर राज्यात लव्ह जिहादसंदर्भात प्रभावी कायदा करण्यात आला. राज्यात हा कायदा अंमलात आणण्यामागील हेतू असा आहे की कोणीही बळजबरीने किंवा कोणत्याही प्रकारच्या हिंसाचाराने कुणाचा धर्म बदलू शकणार नाही.

लव्ह जिहाद कायद्यानुसार,

1. फसवणूक करून लग्न करून धर्मांतर करण्यास भाग पाडल्यास 10 वर्षांच्या तुरूंगवासाची तरतूद आहे.
2. धर्म लपवून लग्न करणार्‍यांना पाच वर्ष कैद आणि दोन लाख रुपये दंड
3. धर्म लपवून अल्पवयीन मुलीशी लग्न केल्यास सात वर्षांची शिक्षा किंवा तीन लाख रुपये दंड अशी तरतूद आहे.
4. कायद्याचे उल्लंघन करणार्‍यांना तीन लाख रुपये दंड आणि सात वर्षांच्या तुरूंगवासाची तरतूद आहे.

The post गुजरातमध्ये लव्ह जिहाद कायदा होणार लागू, जाणून घ्या या कायद्यानुसार शिक्षेची तरतूद appeared first on थोडक्यात घडामोडी.

सुरत : कोरोना रुग्णांची झपाट्याने वाढणारी संख्या धडकी भरवणारी असून सर्वत्र हाहाकार माजला आहे. गुजरातमध्येही भयंकर परिस्थिती ओढवलेली दिसत आहे. सुरतमध्ये कोरोना रुग्णांच्या वाढत्या संख्येबरोबर मृतांचा आकडाही वाढला आहे. यामुळे स्मशानभूमीतील विद्युतदाहिन्यांवर प्रचंड ताण पडत असून उष्णतेमुळे विद्युतदाहिन्यांची धुराडी तसेच गॅस फर्नेसच्या मेटल फ्रेम देखील वितळल्या आहेत.

मृतांची संख्या प्रचंड असल्याने सुरतच्या स्मशानभूमींमध्ये 24 तास अंत्यसंस्कार सुरु आहेत. शेजारच्या बरडोली शहरातदेखील अशीच परिस्थिती आहे. यामुळे विद्युतदाहिन्यांची धुराडी आणि गॅस फर्नेसच्या मेटल फ्रेम देखील वितळल्या आहेत. गेल्या आठ-दहा दिवसांपासून स्मशाभूमींमध्ये अहारोत्र मृतदेह जळत आहेत. जवळपास 16 विद्युतदाहिन्यांमध्ये दररोज 100 हून अधिक मृतदेहांवर अंत्यसंस्कार केले जात असल्याची माहिती येथील प्रशासनाने दिली.

शहरातील प्रमुख स्मशानभूमी मृतदेहांनी ओसंडून वाहू लागली आहेत. रामनाथ घेला, अश्विनी कुमार आणि जहांगीरपुरी या तीन स्मशानभूमी मृतदेहांवर अंत्यसंस्कार करण्यासाठी 24 तास कार्यरत आहेत. अविरत वापरामुळे तीनही स्मशानभूमीत गॅस फर्नेस वितळल्या आहेत. अविरत वापरामुळे भट्टीच्या फ्रेम्स वितळल्या आहेत. कोविड मार्गदर्शक सूचनांनुसार, सूरतमध्ये दररोज १०० हून अधिक मृतदेहांचे अंत्यसंस्कार केले जातात. मात्र, स्मशानभूमीत अजूनही ८ ते १० तास प्रतीक्षा करावी लागत आहे. एकूणच परिस्थिती अतिशय चिंताजनक आहे.

The post कोरोनाचं भयावह रूप.. 24 तास अंत्यसंस्कार सुरु असल्याने वितळली विद्युतदाहिन्यांची धुराडी आणि मेटल फ्रेम appeared first on थोडक्यात घडामोडी.

जागतिक महिला दिनी तरुणीवर सामूहिक बलात्काराची धक्कादायक घटना घडली आहे. राजस्थान येथील अजमेरमध्ये गुजरातच्या एका तरुणीवर सामूहिक बलात्कार करण्यात आला. त्यानंतर तिला बेशुद्धावस्थेत रस्त्यावर फेकून आरोपी तेथून पसार झाले. पोलिसांनी तरुणीला JLN रुग्णालयात दाखल केले असून तिच्यावर उपचार सुरू आहेत.

मिळालेल्या माहितीनुसार, रामगंज पोलीस ठाण्याच्या हद्दीत काही पोलीस कर्मचारी गस्त घालत होते. त्यावेळी त्यांना एक तरुणी बेशुद्धावस्थेत रस्त्यावर पडलेली आढळली. पोलिसांनी तिची अवस्था बघून तिला तात्काळ रुग्णालयात दाखल केले. तिच्यावर उपचार सुरू आहेत. दरम्यान, महिला पोलिसांनी तिचा जबाब नोंदवून घेतला. या तरुणीने जबाबात सांगितले कि, “काही तरुणांनी तिला अज्ञात ठिकाणी नेले आणि तिथे तिच्यावर बलात्कार केला. त्यानंतर तिला तिथेच सोडून ते तेथून पळून गेले.”

पोलिसांनी दिलेल्या माहितीनुसार, पीडित तरुणी गुजरातची आहे. तिच्यावर रुग्णालयात उपचार सुरू आहेत. पीडितेचा जबाब नोंदवण्यात आला असून आरोपींचा शोध सुरू करण्यात आला आहे. या प्रकरणी गुन्हा दाखल केला आहे. तसेच पुढील तपास सुरु आहे. घटनास्थळावरील सीसीटीव्ही फुटेज देखील तपासले जात आहेत.

The post महिला दिनी तरुणीवर सामूहिक बलात्कार, बेशुद्धावस्थेत रस्त्यावर फेकून आरोपी पसार appeared first on थोडक्यात घडामोडी.

अहमदाबाद : मोटेरा स्टेडियमचे नाव नरेंद्र मोदी स्टेडियम असे ठेवण्यात आले आहे. हे जगातील सर्वात मोठे क्रिकेट मैदान आहे. भारत आणि इंग्लंड यांच्यात चार सामन्यांच्या कसोटी सामन्यांच्या मालिकेतील तिसरा कसोटी सामना आज अहमदाबादच्या या स्टेडियमवर खेळला जाईल. तत्पूर्वी आज राष्ट्रपती रामनाथ कोविंद यांनी गुजरातच्या अहमदाबाद येथील नरेंद्र मोदी स्टेडियमचे उद्घाटन केले. उयावेळी केंद्रीय गृहमंत्री अमित शहा देखील उपस्थित होते.

मोटेरा स्टेडियमची वैशिष्ट्ये :

1. मोटेरा हे जगातील सर्वात मोठे क्रिकेट स्टेडियम आहे, ज्यात 1 लाख 10 हजार प्रेक्षक बसण्याची क्षमता आहे.
2. हे स्टेडियम 63 एकरांवर बांधले गेले आहे. स्टेडियममध्ये चार ड्रेसिंग रूम आणि तीन सराव मैदान आहेत.
3. त्यात अंतर्गत आणि मैदानी सराव दोन्ही सुविधा आहेत.
4. इथली ड्रेनेज सिस्टम इतकी आधुनिक आहे की पाऊस थांबल्यानंतर अवघ्या अर्ध्या तासाने सामना सुरू होऊ शकतो.
5. हे देशातील पहिले स्टेडियम आहे जेथे विशेष LED लाईट देखील लावण्यात आले आहेत.

The post ब्रेकिंग : मोटेरा स्टेडियमचे नाव झाले ‘नरेंद्र मोदी स्टेडियम’, जाणून घ्या या स्टेडियमची खास वैशिष्ट्ये appeared first on थोडक्यात घडामोडी.

गुजरातमध्ये एक व्यक्ती व्हॅलेंटाईन डे निमित्त आपल्या आजारी पत्नीला आपली किडनी दान करून एक अनोखी भेट देत आहे. विनोद पटेल 14 फेब्रुवारी रोजी अहमदाबादमध्ये पत्नी रीता पटेल यांना किडनी दान करतील. खास गोष्ट अशी की, हे जोडपे आपला लग्नाचा 23 वा वाढदिवस साजरा करीत आहेत.

रीता पटेल या ऑटोइम्यून मूत्रपिंड डिसफंक्शनने ग्रस्त आहेत आणि गेल्या तीन वर्षांपासून त्यांच्यावर उपचार सुरू आहेत. उपचार करूनही रीताच्या मूत्रपिंडाचा आजार बरा झाला नाही. यानंतर तिच्या पतीने तिला किडनी दान करण्याची तयारी दाखवली. तपासादरम्यान, पती विनोदची किडनी रीतासाठी योग्य असल्याचे आढळले. यानंतर, विनोदने 14 फेब्रुवारीला प्रेमाची भेट  म्हणून किडनी दान करण्याचा निर्णय घेतला. ते अहमदाबादच्या एका खासगी रुग्णालयात किडनी दान करतील.

अहमदाबादचे डॉक्टर सिद्धार्थ मवानी म्हणाले की ऑटोइम्यूनचा आजार झाल्यामुळे व्यक्तीच्या शरीरातील रोगप्रतिकारक शक्ती शरीराच्या निरोगी अवयवांवर आक्रमण करण्यास सुरवात करते. यामुळे रीताची किडनी खराब झाली आहे. तसेच विनोदने सांगितले की पत्नीला होणाऱ्या वेदना बघणं सहन न झाल्याने त्यांनी किडनी दान करण्याचा निर्णय घेतला. त्यांनी सांगितले की रीता 44 वर्षांची आहे आणि गेल्याच महिन्यात त्यांचे डायलिसिसही झाले होते.

विनोद पटेल यावेळी म्हणाले कि, “मला सर्वांना सांगावं वाटत की सर्वांनी त्यांच्या जोडीदाराचा आदर केला पाहिजे आणि गरज पडल्यास एकमेकांना मदत करण्यासाठी पुढे यायला हवे.” रीता स्वत: ला भाग्यवान मानतात की त्यांच्या पतीने किडनी दान केल्यामुळे त्या पुन्हा एकदा आपलं आयुष्य जगू शकतील.

The post ‘व्हॅलेंटाईन डे’ चं अनोखं गिफ्ट, नवरा आपल्या आजारी बायकोला भेट देणार किडनी appeared first on थोडक्यात घडामोडी.