मुंबई : एका व्यक्तीने आपल्या झोपलेल्या 14 वर्षीय मुलीच्या गळ्यावर ब्लेडने वार केला. मुलीने आरडाओरडा केल्यानंतर तिला वाचवण्यासाठी धावून आलेल्या पत्नीवरही त्याने हल्ला केला. या भीषण प्रकारामुळे परिसरात खळबळ उडाली असून पोलिसांनी आरोपी हनुमंत सोनवळला ताब्यात घेऊन त्याच्यावर गुन्हा दाखल केला आहे. ही धक्कादायक घटना दहिसरमधील कोकणी पाडा परिसरात घडली आहे.

मिळालेल्या माहितीनुसार, हनुमंत सोनवळ हा दारूच्या आहारी गेलेला असून तो पत्नी राजश्रीच्या चारित्र्यावर वारंवार संशय घेत असे. किरकोळ कारणांवरून होणारा वाद, मारहाण आणि मानसिक त्रास याला कंटाळून राजश्रीने काही दिवसांपूर्वी वांद्रे येथील न्यायालयात घटस्फोटाची प्रक्रिया सुरू केली होती.

सोमवारी रात्री राजश्री वकिलांकडून घटस्फोटाच्या केससंदर्भात माहिती घेऊन घरी परतली. त्यावेळी हनुमंत याने तिच्यावर प्रश्नांचा भडिमार करत पुन्हा वाद घातला आणि पत्नी व मुलीला ठार मारण्याची धमकी दिली. वाद वाढत गेल्यानंतर तो घराबाहेर पडला.

हनुमंत त्यानंतर रात्री उशिरा घरी परतला. रात्री सव्वादोनच्या सुमारास, मुलगी झोपेत असताना तिच्या गळ्याजवळ अचानक झालेल्या वेदनेने ती दचकून जागी झाली. तिला आपल्या वडिलांनी ब्लेडने वार केल्याचे लक्षात येताच तिने आरडाओरड केली. मुलीचा आवाज ऐकून आई धावून आली असता, आरोपीने तिच्या पोटावरही ब्लेडने वार केला.

त्यानंतर नातेवाइकांनी पोलिसांना तातडीने घटनेची माहिती दिली. जखमी मायलेकींना त्वरित शताब्दी रुग्णालयात दाखल करण्यात आले असून त्यांच्यावर उपचार सुरू आहेत.

दहिसर पोलिस ठाण्यात आरोपीविरोधात खुनाचा प्रयत्न, मारहाण आणि इतर संबंधित कलमांखाली गुन्हा दाखल करण्यात आला आहे. पोलिसांनी पुढील तपास सुरू केला आहे.

ही घटना कुटुंबातील तणाव, व्यसनाधीनता आणि घरगुती हिंसेचे गंभीर परिणाम अधोरेखित करते.

The post 14 वर्षीय मुलीच्या गळ्यावर वडिलांनीच फिरवले ब्लेड; धक्कादायक घटनेने उडाली खळबळ appeared first on थोडक्यात घडामोडी.

पालघर : पालघरमधील घोडीला कॉम्प्लेक्स परिसरातून एक हृदयद्रावक घटना उघडकीस आली आहे. जेवणात चिकन हवे अशी मागणी केल्यामुळे रागाच्या भरात आईने आपल्या सात वर्षांच्या मुलाला लाटण्याने बेदम मारहाण केली. यात मुलाचा जागीच मृत्यू झाल्याचे धक्कादायक वृत्त समोर आले.

पोलिसांनी दिलेल्या माहितीनुसार, आरोपी महिला पतीपासून वेगळी राहत होती. ती आपली दोन मुले आणि दोन बहिणींसोबत घोडीला कॉम्प्लेक्समध्ये राहत होती. दरम्यान, मुलाने जेवणात चिकन मागितल्यामुळे संतापलेल्या आईने त्याच्यावर रागाच्या भरात लाटण्याने वारंवार प्रहार केले. यामध्ये मुलाच्या डोक्यासह शरीरावर गंभीर जखमा झाल्याने त्याची प्रकृती खालावली. मात्र, मुलगा गंभीर जखमी असूनही आईने त्याला दवाखान्यात नेले नाही. त्यामुळे रात्रीच मुलाचा मृत्यू झाला.

स्थानिकांना संशय आल्याने त्यांनी पोलिसांना कळविले. पोलिसांनी घटनास्थळी धाव घेत आरोपी आईला ताब्यात घेतले. गुन्ह्यात वापरलेले लाटणे पोलिसांनी जप्त केले आहे. मृतक मुलाच्या दहा वर्षांच्या बहिणीला या घटनेमुळे मोठा धक्का बसला असून ती खूप घाबरलेली आहे. तिला सुरक्षिततेसाठी आश्रमात हलविण्यात आले आहे.

दरम्यान, पोलिसांनी केलेल्या चौकशीत आरोपी महिलेने गुन्ह्याची कबुली दिली आहे. मात्र, या घटनेमागे काही वेगळी कारणं आहेत का याचा तपाससुरु आहे. याबाबतची खरी माहिती पोस्टमार्टम अहवाल आणि पोलिस तपासानंतरच स्पष्ट होण्याची शक्यता वर्तवण्यात येत आहे.

The post जेवणात चिकन मागितल्याने राग अनावर, आईने बेदम मारहाण केल्याने चिमुकल्याचा मृत्यू appeared first on थोडक्यात घडामोडी.

पुणे : वैष्णवी शशांक हगवणे हिच्या हुंड्यासाठी झालेल्या छळामुळे आत्महत्येप्रकरणी बावधन पोलिसांनी सोमवारी पुणे सत्र न्यायालयात एकूण ११ आरोपींविरुद्ध सविस्तर आरोपपत्र दाखल केले आहे.

बावधन पोलिस ठाण्याचे वरिष्ठ निरीक्षक अनिल विभूते यांनी दिलेल्या माहितीनुसार, तब्बल १,६७० पानी आरोपपत्र प्रथम श्रेणी न्यायदंडाधिकारी अलिशा बागल यांच्या न्यायालयात सादर करण्यात आले असून, त्यामध्ये सर्व आरोपींविरुद्ध ठोस पुरावे सादर करण्यात आले आहेत.

ही घटना मुळशी तालुक्यातील भूकूम येथील मुक्ताई गार्डन परिसरातील आहे. २४ वर्षीय वैष्णवी हगवणे हिने १६ मे रोजी आत्महत्या केली होती. तिच्या सासरच्या मंडळींकडून करण्यात आलेल्या मानसिक व शारीरिक छळामुळे तिने आत्महत्येस प्रवृत्त झाल्याचे तपासात निष्पन्न झाले आहे.

आरोपपत्रातील प्रमुख आरोपी पुढीलप्रमाणे:

शशांक राजेंद्र हगवणे (२७) – पती; आत्महत्येस प्रवृत्त केल्याचा मुख्य आरोप

राजेंद्र तुकाराम हगवणे (६३) – सासरे; राष्ट्रवादी काँग्रेस पक्षातून हकालपट्टी

लता राजेंद्र हगवणे (५४) – सासू

करिश्मा राजेंद्र हगवणे (३१) – नणंद

सुशील राजेंद्र हगवणे – दीर

वरील सर्व आरोपी भूकूम येथील मुक्ताई गार्डनजवळ राहतात.

इतर आरोपी :

नीलेश चव्हाण (३५), कर्वेनगर – वैष्णवीच्या मुलाला बेकायदेशीररित्या ताब्यात ठेवणे आणि तिच्या नातेवाईकांना पिस्तूलने धमकावल्याचा आरोप

प्रीतम वीरकुमार पाटील (४७), कांगोली, बेळगाव (कर्नाटक) – मुख्य आरोपींना पळवून नेऊन आश्रय दिल्याचा आरोप

मोहन उर्फ बंडू उत्तमराव भेगडे (५९), वडगाव मावळ
बंडू लक्ष्मण फाटक (५५), लोणावळा
अमोल विजय जाधव (३५), पुसेगाव, सातारा
राहुल दशरथ जाधव (४५), पुसेगाव, सातारा
वरील चौघांवर मुख्य आरोपींना मदत केल्याचा आरोप असून, त्यांना न्यायालयाकडून जामीन मंजूर झाला आहे.

न्यायिक प्रकिया व जामीन अर्ज:

सध्या आरोपींपैकी सहा जण न्यायालयीन कोठडीत असून, त्यात हगवणे कुटुंबातील सदस्यांचा समावेश आहे.

लता हगवणे, करिश्मा हगवणे आणि नीलेश चव्हाण यांनी सत्र न्यायालयात जामिनासाठी अर्ज केला आहे.

नीलेश चव्हाणच्या जामीन अर्जावर १५ जुलै रोजी सुनावणी होणार आहे.

लता आणि करिश्मा हगवणेच्या अर्जावर २५ जुलै रोजी सुनावणी होणार आहे.

या अर्जांवरील सुनावणीनंतर औपचारिकरित्या आरोप निश्चित केले जातील आणि खटल्याची मुख्य कार्यवाही सुरू होईल.

या हाय-प्रोफाईल प्रकरणात सरकारतर्फे प्रतिनिधित्व करण्यासाठी विशेष सरकारी वकील उज्ज्वला पवार यांची नियुक्ती करण्यात आली आहे.

The post वैष्णवी हगवणे आत्महत्या प्रकरणात ११ जणांवर आरोपपत्र दाखल appeared first on थोडक्यात घडामोडी.

पुणे : सासरच्या मानसिक व शारीरिक छळाला कंटाळून वैष्णवी शशांक हगवणे (वय २३) हिने राहत्या घरात गळफास घेऊन आत्महत्या केली. या प्रकारामुळे परिसरात खळबळ उडाली असून, पोलिसांनी पतीसह तिघांना अटक केली आहे. तर सासरा आणि दीर फरार असून, त्यांच्या शोधासाठी पोलिसांची चार पथके रवाना करण्यात आली आहेत.

अटक झालेले आरोपी
शशांक राजेंद्र हगवणे (पती)
लता राजेंद्र हगवणे (सासू)
करिश्मा राजेंद्र हगवणे (नणंद)

फरार आरोपी
राजेंद्र तुकाराम हगवणे (सासरा)
सुशील राजेंद्र हगवणे (दीर)

पोलिसांकडून मिळालेल्या माहितीनुसार, वैष्णवी हगवणे हिला सासरच्या मंडळींकडून सातत्याने मानसिक आणि शारीरिक त्रास दिला जात होता. या त्रासाला कंटाळून तिने टोकाचा निर्णय घेतला. आत्महत्येपूर्वी वैष्णवीने आपल्या एका जवळच्या मैत्रिणीकडे हा त्रास कथितपणे उघड केला होता, ज्यामुळे पोलिस तपासाला महत्त्वाचा आधार मिळाला आहे.

वैष्णवी हगवणे हिची तिच्या मैत्रिणीसोबत संभाषणाची ऑडिओ क्लिप आता समोर आली आहे. या ऑडिओ क्लिपमध्ये वैष्णवी हगवणे तिच्या मैत्रिणीला सासरच्यांकडून अमानुष छळ सुरु असल्याचं सांगत आहे. ही ऑडिओ क्लिप सध्या सोशल मीडियावर देखील व्हायरल होत आहे. सासरच्या मंडळीकडून आपला अमानुष छळ होतोय. याबद्दल वैष्णवी यांनी आपल्या मैत्रिणीशी चॅट केलं होतं. आपण सगळ्यांना विरोध करून लग्न केलं. पण हीच आपली मोठी चूक झाल्याचं वैष्णवी मैत्रिणीला सांगत होती. वैष्णवीने आपल्या मैत्रिणीसोबत चॅट केलं आहे. या चॅट दरम्यान तिने व्हॉईस मेसेज पाठवलेले आहेत. त्याच व्हॉईस मेसेजची ऑडिओ क्लिप आता मोठ्या प्रमाणावर व्हायरल झाली आहे.

वैष्णवी मेसेजमध्ये काय-काय म्हणाली?
वैष्णवी: तेच कामवालीचं मॅटर… तिची लफडी बाहेर आली… मावशीने मला बरंच सांगितलं होतं फॅमिलीबद्दल… त्यांचं असं म्हणणं होतं की मी त्यांना साथ दिली बोलू लागयाला आणि मी वाटोळं केलंय घराचं… पण माझा काही संबंधच नव्हता… मी आलीये माहेरी, माझे वडील खूप चिडले आहेत सगळे.
मैत्रीण: पण तुझी काय चुकी यामध्ये… तुझा तर काहीच रोल नाही?
वैष्णवी: मी वैतागले खूप.
मैत्रीण: कोणी मारलं आणि तुला?
वैष्णवी: पिंकीने.
मैत्रीण: अगं, पण एवढं कोणी मारतं का गं असं?
वैष्णवी: माझ्यावरती पण आरोप करायला लागली. मला म्हणते, आता तुझी इकडे सगळीकडे बदनामी करते. तू जे केलं आहे किंवा नाही केलंय, म्हणजे इकडे वाकडला तुझ्या सगळ्या मैत्रिणींना सांगते की, तू कसली घाणेरडी आहे. घराचे वाटोळे करते. पती शशांकसोबतही तू कधी लॉयल नव्हतीस. असं तसं. म्हणे, तू फाल्तू आहे, घाणेरडी आहे, घाण घाण शिव्या द्यायला लागली. पप्पांना-मम्मींना काहीही बोलायला लागली नुसतं, अगं काय सांगू तुला. पप्पा बसले होते म्हणून मला तुझ्याशी बोलता आलं नाही.
वैष्णवी: मला मारताना तुझे दाजी (वैष्णवीचा पती) बघत होते. त्यानंतर त्यांनीही माझ्यावर हात उचलला. हे त्यांनाही खरं वाटलेलं आहे. त्यामुळे मी आता ठरवलेलं आहे की, मी त्या माणसाला डिव्होस देणार. मी पप्पांना सांगितलं आहे. पप्पा म्हणाले की, आपण त्यावर विचार करुया.

The post वैष्णवी हगवणेच्या आत्महत्येपूर्वीची ऑडिओ क्लिप आली समोर, पोलिस तपासाला मिळणार मदत… appeared first on थोडक्यात घडामोडी.

बेंगळुरू: कर्नाटकचे माजी पोलीस महासंचालक (डीजीपी) ओम प्रकाश यांची हत्या करण्यात आली आहे. रविवारी (२० एप्रिल) संध्याकाळी बेंगळुरूमधील एचएसआर लेआउटमध्ये ही घटना घडल्याची माहिती आहे. त्यांची पत्नी पल्लवीनेच त्यांची हत्या केल्याचं बोललं जात आहे. कौटुंबिक वादातून पत्नीने त्यांची हत्या केल्याची माहिती आहे. या घटनेनंतर पत्नीने स्वतः पोलिसांना याबाबतची माहिती दिली. राज्य पोलीस विभागाचे प्रमुख असलेल्या अधिकाऱ्याच्या हत्येने सर्वांनाच धक्का बसल्याचं एका अधिकाऱ्याने सांगितले आहे.

६८ वर्षीय ओम प्रकाश निवृत्तीनंतर बेंगळुरूमध्ये त्यांच्या राहत्या घरी राहायचे. त्यांचा पत्नीशी काही कारणावरुन वाद सुरू होता. मानसिक संतुलन बिघडलेल्या पत्नीने रविवारी सायंकाळी ओमप्रकाश यांची हत्या केली आणि त्यानंतर पोलिसांना याबाबत माहिती दिली, अशी माहिती आहे. या प्रकरणी एचएसआर लेआउट पोलिस ठाण्यात गुन्हा दाखल करण्यात आला आहे. मृतदेह शवविच्छेदनासाठी होसूर रोडवरील सेंट जॉन हॉस्पिटलमध्ये नेण्यात आला आहे.

1981 च्या बॅचचे 68 वर्षीय आयपीएस अधिकारी बिहारमधील चंपारणचे मूळ रहिवासी होते आणि त्यांनी भूगर्भशास्त्रात एमएससी पदवी प्राप्त केली होती. त्यांनी अग्निशमन दल आणि होमगार्डचे डीजीपी म्हणून काम केले होते. 1 मार्च 2015 रोजी त्यांची पोलीस महासंचालक म्हणून नियुक्ती करण्यात आली होती.

ओमप्रकाश यांची हत्या केल्यानंतर पत्नीने स्वत: पोलिसांना फोन करून याबाबतची माहिती दिली. त्यानंतर पोलिस तात्काळ त्यांच्या घरी पोहोचले, सेवानिवृत्त अधिकारी रक्ताच्या थारोळ्यात पडलेले पाहून घटनास्थळी पोहोचलेले पोलिस चक्रावून गेले. यानंतर पोलिसांनी पत्नी आणि मुलीला चौकशीसाठी ताब्यात घेतले आहे.

कौटुंबिक वादातून ही हत्या झाल्याची माहिती आहे. ओमप्रकाश आणि त्यांची पत्नी यांच्यातील भांडणाबाबत शेजारी, नातेवाईक आणि अनेक निवृत्त पोलीस अधिकाऱ्यांनाही माहिती होते. गेल्या काही दिवसांपासून त्यांच्यातील वाद इतका वाढला होता की पत्नीने घरात खूप राडा केला. या घटनेने सर्वांनाच मोठा धक्का बसला आहे. या घटनेने संपूर्ण कर्नाटक पोलिस दलात मोठी खळबळ माजली आहे.

The post धक्कादायक! माजी पोलीस महासंचालक ओम प्रकाश यांची राहत्या घरात हत्या; पत्नीवर गंभीर आरोप appeared first on थोडक्यात घडामोडी.

पुणे : दारू पिण्यास पैसे न दिल्याने पतीने पत्नीवर कुऱ्हाडीने वार केल्याची धक्कादायक घटना समोर आली आहे. तळजाई वसाहतीत हा प्रकार घडला असून या प्रकरणी सहकारनगर पोलिसांनी गुन्हा दाखल करीत पतीला अटक केली आहे. पूनम दत्ता अडागळे (वय ३२, रा. खंडाळे चौक, तळजाई वसाहत, पद्मावती) असे गंभीर जखमी झालेल्या महिलेचे नाव आहे. सहकारनगर पोलीस ठाण्यात दिलेल्या फिर्यादीनुसार आरोपी दत्ता राजाराम अडागळे (वय ३८) याला अटक करण्यात आली आहे.

पोलिसांनी दिलेल्या माहितीनुसार, आरोपी दत्ता याचा पूनमशी २०१५ साली विवाह झाला होता. तो काहीही कामधंदा करीत नाही. त्याला दारू पिण्याचे व्यसन आहे. त्यांना सात वर्षांचा मुलगा आहे. कुटुंबाच्या उदरनिर्वाहासाठी पूनम घरकाम करते. सोमवारी (३१ मार्च) रात्री आठच्या सुमारास आरोपी दत्ता हा दारू पिऊन घरी आला. त्यानंतर त्याने दारू पिण्यासाठी पत्नी पूनमकडे अजून पैसे मागितले. मात्र तिने पैसे देण्यास नकार दिला. त्यानंतर आरोपी दत्ता याने रागाच्या भरात पूनमवर कुऱ्हाडीने हल्ला केला. पूनमने आरडाओरडा केला मात्र, त्यांच्या डोक्यात कुऱ्हाडीचा घाव बसला आणि त्यात पूनमच्या डोक्याला गंभीर दुखापत झाली. तिच्यावर रुग्णालयात उपचार सुरू आहेत. दरम्यान, पोलिसांनी आरोपी दत्ता याला अटक केली आहे. पोलीस उपनिरीक्षक रेखा साळुंके तपास करत आहेत.

The post दारू पिण्यास पैसे न दिल्याने पत्नीवर कुऱ्हाडीने वार, आरोपी पतीला अटक appeared first on थोडक्यात घडामोडी.

पुणे : किरकोळ वादातून १५ वर्षीय भाच्याला त्याच्या मामाने चाकूने भोसकून ठार मारले. शुक्रवारी रात्री सिंहगड रस्त्यावरील नऱ्हे भागात शुक्रवारी रात्री ही घटना घडली. त्यानंतर पसार झालेल्या मामाला सिंहगड पोलिसांनी अटक केली.

गजानन गजकोश (वय १५, रा. धारावी, कोळीवाडा, मुंबई) असे खून झालेल्या मुलाचे नाव आहे. याप्रकरणी मेघनाथ अशोक तपासे (वय ४१, रा. मानाजीनगर, नऱ्हे) याला अटक करण्यात आली. याबाबत आरोपी मेघनाथचा मेहुणा मंगेश दत्तात्रय ओव्हाळ (वय ३१, रा. कृष्णाईनगर, मानाजीनगर गणपती मंदिराजवळ, नऱ्हे) यांनी सिंहगड रस्ता पोलीस ठाण्यात फिर्याद दिली आहे.

मिळालेल्या माहितीनुसार, गजानन हा मामा मेघनाथ याच्याकडे राहण्यासाठी आला होता. शुक्रवारी रात्री त्याचा मामाच्या मुलाशी वाद झाला. त्यानंतर रागाच्या भरात मेघनाथने भाचा गजाननला पट्ट्याने बेदम मारहाण केली. त्यानंतर चाकूने त्याच्या छातीवर वार केला. चाकूने भाेसकल्याने त्याचा मोठ्या प्रमाणावर रक्तस्त्राव झाला. गंभीर जखमी झालेल्या गजाननला तातडीने रुग्णालयात दाखल करण्यात आले. मात्र, उपचारांपूर्वीच त्याचा मृत्यू झाला. या घटनेची माहिती मिळताच परिमंडळ तीनचे पोलीस उपायुक्त संभाजी कदम यांनी घटनास्थळी भेट दिली.

रात्री उशिरा आरोपी मेधनाथला अटक करण्यात आली. प्राथमिक तपासात असे दिसून आले की, आरोपीने किरकोळ वादातून त्याच्या भाच्याचा चाकूने वार करून खून केला. वरिष्ठ पोलिस निरीक्षक दिलीप दाईंगडे यांच्या मार्गदर्शनाखाली तपास सुरू आहे.

The post पुणे : मामाने भाच्याला चाकूने भोसकून ठार मारले, किरकोळ वादातून भयंकर कृत्य appeared first on थोडक्यात घडामोडी.

पुणे : पुण्यात घरगुती छळाचा एक धक्कादायक प्रकार समोर आला आहे. २५ वर्षीय विवाहित महिलेने तिचा पती आणि त्याच्या मित्राविरुद्ध छेडछाड आणि मानसिक छळ केल्याचा आरोप केला आहे. याप्रकरणी पोलिस महिलेचा ३० वर्षीय पती आणि त्याचा ५० वर्षीय मित्र यांची चौकशी करत आहेत.

मिळालेल्या माहितीनुसार, महिलेचा पती बराच काळापासून तिचे शारीरिक शोषण करत होता. एकदा त्याने त्याच्या मित्राला घरी आणले आणि त्या मित्राला पत्नीशी लैंगिक संबंध ठेवण्यास सांगितले तेव्हा परिस्थिती आणखी बिकट झाली. या धक्कादायक भेटीदरम्यान, मित्राने तिच्या गोपनीयतेचे उल्लंघन करून अनुचित शेरेबाजी केली. महिलेने या गोष्टीला प्रतिकार केला, मात्र भीती आणि दबावामुळे तिने त्यावेळी घटनेची त्वरित तक्रार करणे टाळले.

तथापि, महिलेचा छळ एवढ्यावरच थांबला नाही. आरोपी मित्र तिला अनुचित संदेश पाठवत राहिला आणि फोन करत राहिला आणि सतत तिच्यावर दबाव आणत राहिला. त्याने तिला सांगितले की, “तुझा नवरा तुझ्याशी लैंगिक संबंध ठेवू शकत नाही; तो मला तुझ्या मुलाचा पिता बनवू इच्छितो.” या सततच्या छळाला कंटाळून अखेर महिलेने पोलिसांकडे धाव घेतली. तिच्या तक्रारीच्या आधारे, खडक पोलिसांनी पती आणि त्याच्या मित्राविरुद्ध कायद्याच्या संबंधित कलमांखाली गुन्हा दाखल केला आहे. सहाय्यक पोलीस निरीक्षक तोंडे तपासाचे नेतृत्व करत आहेत. याप्रकरणी आरोपींवर कठोर कारवाई करण्याची अपेक्षा आहे.

The post पुण्यातील धक्कादायक प्रकार! पतीने त्याच्या मित्राला पत्नीशी लैंगिक संबंध ठेवण्यासाठी घरी आणले, आणि… appeared first on थोडक्यात घडामोडी.

उत्तर प्रदेश : दोन वर्षांपूर्वी विवाह झाल्यानंतर देखील पहिल्या प्रियकराच्या संपर्कात राहत असल्यामुळे पतीने विरोध केला, आणि या वादातून पत्नीने त्याला कॉफीतून विष दिल्याची धक्कादायक घटना घडली आहे. ही घटना 25 मार्च 2025 रोजी रात्री उशिरा घडली. रात्री 10.30 वाजता, कार्यालयातून घरी परतलेल्या अनुजने पत्नीकडे कॉफी मागितली होती. पत्नीने त्याला कॉफीतून विष दिले.

अनुज शर्मा (30) आणि पिंकी (28) यांचा विवाह दोन वर्षांपूर्वी फारुकनगर, गाझियाबादमध्ये झाला होता. अनुज मेरठमधील एका खासगी रुग्णालयात रिसेप्शनिस्ट म्हणून काम करत होता. या जोडप्याच्या वैवाहिक जीवनात सतत तणाव होता आणि अनेक वेळा त्यांच्यात मारामारी होणं देखील सामान्य बाब बनली होती. यामुळे पिंकी आपल्या माहेरी राहत होती, आणि पंधरा दिवसांपूर्वीच ती सासरच्या घरी परतली होती.

25 मार्च रोजी रात्री 10.30 वाजता अनुज आपल्या कार्यालयातून घरी परतला. घरी पोहोचल्यावर त्याने पत्नीकडे कॉफी मागितली होती. पिंकीने दिलेली कॉफी प्यायल्यानंतर अनुजला अचानक उलट्या होऊ लागल्या. कुटुंबीयांनी त्याला तात्काळ खतौली येथील खासगी रुग्णालयात दाखल केले, परंतु, त्याची स्थिती गंभीर असल्याने रुग्णालयाने त्याला मेरठमध्ये रेफर केले.

अनुजच्या मोठ्या बहिणीने मीनाक्षीने सांगितले की, पिंकीचे तिच्या मामाच्या मुलीच्या मुलाशी अफेअर होते, पण घरच्यांच्या दबावाखाली तिने अनुजशी विवाह केला. विवाहानंतर देखील ती आपल्या प्रियकराशी गुपचूप संवाद साधत होती, हे अनुजला समजले आणि यावरून अनुज व पिंकीमध्ये वाद झाले. अनुजने पिंकीचा मोबाईल तपासला आणि त्यात अनेक आक्षेपार्ह संदेश आढळले. यानंतर अनुजने पिंकीला तिच्या प्रियकराशी बोलण्यास मनाई केली होती. या कारणामुळे दोघांमध्ये वाद वाढला आणि पिंकी माहेरी गेली. अनुजने याबाबत पिंकीच्या घरच्यांकडे तक्रार केली, मात्र पिंकीच्या घरच्यांनी तिला काहीच सांगितले नाही. महिला आयोगाच्या हस्तक्षेपानंतर पिंकीने सांगितले की, ती एकत्र राहण्यास तयार आहे. त्यानंतर पिंकी 15 दिवसांपूर्वी सासरच्या घरी परतली, परंतु परत येताच तीने सासूला धमकी दिली की ती काही खास कामासाठी परतली आहे. सासूने विचारले की, काय खास काम आहे? यावर पिंकीने उत्तर दिले की, “ते वेळ आल्यावर कळेल.” यावरून पिंकीच्या वागणुकीविषयी सासू देखील गोंधळात पडली.

अखेर, मंगळवारी रात्री पिंकीने कॉफीमध्ये विष मिसळून अनुजला प्यायला दिले. अनुजवर मेरठमध्ये उपचार सुरू आहेत. आतापर्यंत पिंकीचे कुटुंबीय अनुजला भेटायलाही आले नाहीत. त्याच्या प्रकृतीची विचारणा देखील केली नाही.

पोलिसांनी या प्रकरणाची गंभीर दखल घेत पत्नी पिंकीविरुद्ध गुन्हा दाखल केला आहे. पोलिसांनी सांगितले की, 25 मार्च रोजी पत्नीने पतीला विष दिल्याची माहिती मिळाली आहे. पतीला रुग्णालयात दाखल करण्यात आले आहे आणि त्याची स्थिती सध्या गंभीर आहे. कुटुंबीयांच्या तक्रारीवरून पत्नीविरुद्ध गुन्हा दाखल करण्यात आला आहे. चौकशीनंतर पुढील कारवाई केली जाईल.

The post धक्कादायक! प्रियकराशी बोलण्यास पतीचा नकार, पत्नीने थेट पतीला कॉफीतून दिले विष… appeared first on थोडक्यात घडामोडी.

हरियाणा : हरियाणाच्या रोहतक जिल्ह्यातील मांडोठी गावात एक धक्कादायक घटना घडली आहे, ज्यामध्ये एका योग शिक्षकाला प्रेमसंबंधांच्या कारणातून त्याचा जीव गमवावा लागला. जगदीप झझ्जर नावाच्या योग शिक्षकाचे डिसेंबर महिन्यात अपहरण झाले होते. तीन महिने त्याचा शोध घेतल्यानंतर अखेर, २४ मार्च २०२५ रोजी, पोलिसांनी चरखी दादरी गावाजवळ सात फूट खोल खड्ड्यात त्याचा मृतदेह सापडला.

मिळालेल्या माहितीनुसार, जगदीप झझ्जर रोहतकच्या मांडोठी गावचा रहिवासी होता, तो बाबा मस्तनाथ विद्यापीठात योग शिक्षक म्हणून कार्यरत होता. त्याचे अपहरण २४ डिसेंबर २०२४ रोजी करण्यात आले, त्यानंतर १० दिवसांनी त्याच्या अपहरणाची तक्रार पोलिसांकडे नोंदवण्यात आली होती. पोलिसांनी त्याचा शोध सुरू केला, परंतु तो सापडत नव्हता. तीन महिन्यांनंतर २४ मार्च २०२५ रोजी, पोलिसांना त्याचा मृतदेह चरखी दादरी गावाजवळ सापडला. आरोपींनी त्याचे हात-पाय बांधून आणि तोंडावर पट्टी लावून त्याला जिवंत गाडलं होतं.

हत्येचे कारण
पोलीस तपासानुसार, जगदीपचे अपहरण आणि हत्या प्रेमसंबंधाच्या कारणातून झाली. जगदीप ज्या ठिकाणी भाडे तत्त्वावर राहत होता, तिथे एका महिलेशी त्याचे प्रेमसंबंध जुळले होते. या महिलेच्या पतीला या संबंधांबद्दल समजल्यानंतर त्याने जगदीपला मारहाण केली आणि त्याच्या हत्येची योजना आखली. आरोपींनी बोअरवेलसाठी खड्डा खोदण्याचे कारण सांगत सात फूट खोल खड्डा खणला आणि त्याच खड्ड्यात त्यांनी जगदीपला जिवंत गाडले.

दोन आरोपींना अटक
या प्रकरणात पोलिसांनी हरीदप आणि धर्मपाल नावाच्या दोन आरोपींना अटक केली आहे. या दोघांचा आणि इतर काही साथीदारांचा सहभाग असल्याचा संशय आहे. पोलिसांनी फोन कॉल्सच्या तपासाद्वारे आरोपींना पकडले आणि तपास सुरू केला. पोलिस अधिकारी कुलदीप सिंह यांनी सांगितले की इतर दोन आरोपींना लवकरच अटक करण्यात येईल. शवविच्छेदन प्रक्रियेदरम्यान, मृतदेहाची ओळख निश्चित केली गेली आहे.

जगदीपच्या मृत्यूमुळे रोहतक परिसरात मोठी खळबळ उडाली आहे. या घटनेने नागरिकांमध्ये भीतीचे वातावरण निर्माण झाले आहे. पोलिसांकडून या प्रकरणाचा तपास सुरू असून, आरोपींना कठोर शिक्षा देण्याचा निर्धार व्यक्त केला आहे.

The post प्रेम प्रकरणातून योग शिक्षकाची हत्या, सात फूट खोल खड्ड्यात जिवंत गाडलं… appeared first on थोडक्यात घडामोडी.