नागपूर : सातारा जिल्ह्यातील फलटण येथील महिला डॉक्टर आत्महत्या ही दुर्दैवी घटना आहे .या प्रकरणी चौकशीसाठी निवृत्त न्यायाधिशांच्या अध्यक्षतेखाली समिती स्थापन करण्यात आली आहे. राज्यातील महिलांच्या सुरक्षेसाठी राज्य शासन कटिबद्ध असल्याचे देवेंद्र फडणवीस यांनी विधानसभेत सांगितले.

सदस्य अमित साटम यांनी उपस्थित केलेल्या प्रश्नाला उत्तर देताना मुख्यमंत्री फडणवीस बोलत होते.

मुख्यमंत्री फडणवीस म्हणाले की, फलटण येथील महिला डॉक्टर आत्महत्या प्रकरणी ज्या-ज्या संबंधितांची नावे समोर आली त्यांची चौकशी करण्यात आली आहे. महिलेच्या सुसाईड नोटचे अक्षर हे त्या महिलेचे असल्याचे समोर आले आहे. अटक करण्यात आलेल्या आरोपींनी संबंधित महिला डॉक्टरचे शोषण व फसवणूक केल्याचे तपासात समोर आले आहे. या विषयी गुन्हा दाखल झाला असून गुन्हेगारांना अनफिट प्रमाणपत्र दिल्याचे प्रकरण होते. हे प्रकरण पाच महिन्यापूर्वीचे असून आत्महत्येविषयी आरोपींनी केलेली फसवणूक हे महत्त्वाचे कारण समोर आले आहे. तसेच आत्महत्येपूर्वी महिलेला भेटण्यास कोण कोण आले याचे सीसीटीव्ही फुटेज उपलब्ध असल्याचे मुख्यमंत्री फडणवीस यांनी सांगितले.

कोरेगाव पार्क, पुणे येथील विद्यार्थिनी आत्महत्या प्रकरणीही सखोल चौकशी करण्यात येईल. केंद्र सरकारच्या नवीन तीन कायद्यामध्ये शक्ती कायद्यातील अनेक तरतुदींचा समावेश आहे. काही तरतुदी सर्वोच्च न्यायालयाच्या मार्गदर्शक तत्वांचे उल्लंघन करतात. या सर्व गोष्टीचा अभ्यास करून ज्या तरतुदी करावयाच्या आहेत या विषयी काम सुरू असल्याचेही मुख्यमंत्री फडणवीस यांनी सांगितले.

राज्यात संजय गांधी निराधार योजनेचा निधी रोखला नाही. या योजनेचा निधी डीबीटीद्वारे देण्याचा शासनाचा प्रयत्न असल्याचे मुख्यमंत्री फडणवीस यांनी सांगितले.

या वेळी सदस्य विजय वडेट्टीवार, प्रकाश सोळंके, ज्योती गायकवाड, सुनील प्रभू, नाना पटोले यांनी चर्चेमध्ये सहभाग घेतला.

The post फलटण येथील महिला डॉक्टर आत्महत्या प्रकरणी सखोल चौकशी; महिला सुरक्षिततेसाठी राज्य शासन कटिबद्ध – मुख्यमंत्री देवेंद्र फडणवीस appeared first on थोडक्यात घडामोडी.

पुणे : पुण्यातील एका नामांकित आयटी कंपनीत कार्यरत असलेल्या अभिलाषा भाऊसाहेब कोथिंबिरे (वय २५) या तरुणीने हिंजवडीतील क्राउन ग्रीन हाउसिंग सोसायटीच्या २१ व्या मजल्यावरून उडी मारून आत्महत्या केल्याची दुर्दैवी घटना उघडकीस आली आहे.

अभिलाषा मूळची रांजणगाव येथील असून सध्या हिंजवडी परिसरात वास्तव्यास होती. ती सेनापती बापट रस्त्यावर (एसबी रोड) स्थित एका प्रतिष्ठित आयटी कंपनीत कार्यरत होती.

३१ मे रोजी अभिलाषा दुचाकीवरून मैत्रिणीच्या इमारतीत आली होती. मात्र, ती तिच्या मैत्रिणीकडे न जाता थेट २१ व्या मजल्यावर गेली. तिथून उडी मारून तिने आपले आयुष्य संपवले.

घटनेनंतर काही वेळातच सोसायटीतील रहिवाशांनी आवारात मृतदेह पाहून पोलिसांना याबाबत माहिती दिली. हिंजवडी पोलिस ठाण्याचे पथक तपासासाठी घटनास्थळी पोहोचले, त्यांनी सीसीटीव्ही फुटेज तपासले आणि ती पहाटे ४.३८ वाजता दुचाकीवरून सोसायटीत आल्याचे पुष्टी केली. काही तासांनंतर ती मृतावस्थेत आढळली. पोलिसांनी तिच्या वाहनावरून तिची ओळख पटवली. तपासादरम्यान तिच्याकडे एक सुसाईड नोट देखील सापडली आहे. त्यामध्ये तिने लिहिले होते, “मी माझं आयुष्य संपवते आहे. आता जगायची इच्छा नाही. कृपया मला माफ करा.” मात्र, आत्महत्येचे नेमके कारण तिने स्पष्ट केलेले नाही.

हिंजवडी पोलिसांनी दिलेल्या माहितीनुसार, मृत तरुणी नैराश्यग्रस्त होती, परंतु कुटुंबीयांना याबाबत कोणतीही कल्पना नव्हती. तिचे वडील म्हणाले की, ती नेहमीप्रमाणे आनंदी आणि सामान्य वागत होती.

या घटनेबाबत बोलताना हिंजवडी पोलिस ठाण्याचे प्रभारी वरिष्ठ पोलिस निरीक्षक कन्हैया थोरात म्हणाले, “३१ मे रोजी आम्हाला मृतदेह मिळाला. घटनास्थळी सुसाईड नोट सापडल्यामुळे प्राथमिक तपासात ही आत्महत्येची घटना असल्याचे स्पष्ट झाले आहे. आम्ही अपघाती मृत्यूची नोंद केली असून पुढील तपास सुरू आहे.” अभिलाषाच्या शव विच्छेदन अहवालात तिच्या शरीरावरील महत्वाच्या अवयवांना गंभीर इजा झाल्याचे म्हटले आहे.

The post पुणे : आयटी अभियंता तरुणीची २१व्या मजल्यावरून उडी घेऊन आत्महत्या; सुसाईड नोट सापडली… appeared first on थोडक्यात घडामोडी.

मुंबई : मुलुंड येथे एका पित्याने ‘फादर्स डे’च्या दिवशी आपल्या गतिमंद मुलाची हत्या करून आत्महत्या केल्याची घटना घडली आहे. आपल्या मृत्यूनंतर गतिमंद मुलाचा सांभाळ कोण करेल? या चिंतेने ग्रासल्यामुळे वडिलांनी हे कृत्य केले. त्यांनी आत्महत्या करण्यापूर्वी लिहिलेल्या चिठ्ठीत याबाबत सांगितले आहे. योगेश भट्ट (३५) असे मृत मुलाचे नाव असून दशरथ भट्ट (६७) असे त्याच्या वडिलांचे नाव आहे.

मिळालेल्या माहितीनुसार, मुलुंडच्या योगी हिल्स परिसरातील एका इमारतीमध्ये दशरथ, त्यांची पत्नी आणि मुलगा योगेश राहत होते. दशरथ यांना तीन मुली आणि एक मुलगा असून तिन्ही मुलींची लग्न झाली आहेत. रविवारी सकाळी दशरथ यांची पत्नी बेडरूममधून उठून बाहेर आली असता तिला पती गळफास लावलेल्या अवस्थेत दिसला. त्यानंतर या महिलेने योगेशचा शोध घेतला, त्यावेळी तो पाण्याच्या ड्रममध्ये आढळला. या घटनेमुळे दशरथ यांच्या पत्नीला मोठा धक्का बसला. महिलेने याबाबत शेजाऱ्यांना सांगितले. त्यानंतर तात्काळ पोलिसांना याबाबत माहिती दिली. मुलुंड पोलिस घटनास्थळी दाखल झाले. त्यांनी दोघांनाही जवळच्या रुग्णालयात नेले, मात्र डॉक्टरांनी दोघांनाही मृत घोषित केले. मुलुंड पोलिस ठाण्यात या प्रकरणी गुन्हा दाखल करण्यात आला आहे.

दरम्यान, पोलिसांना घटनास्थळी एक सुसाईड नोट सापडली असून यामध्ये दशरथ यांनी या कृत्यामागील कारण आणि घटनाक्रम लिहून ठेवला होता. त्यांचा मुलगा योगेश जन्मापासून गतिमंद होता, त्यामुळे त्याची सर्वच कामे इतरांना करावी लागत होती. आपलंही वय होत आलं असून आपल्या मृत्यूनंतर त्यांच्या मुलाचा सांभाळ कोण करणार, या काळजीने त्यांना ग्रासले होते. त्यामुळे त्याला मारून आत्महत्या करीत असल्याचे त्यांनी चिठ्ठीत लिहिलेले आहे. त्यांनी शनिवारी रात्री पत्नी आणि मुलाला गुंगीचे औषध दिले. त्यानंतर दोघेही गाढ झोपल्यानंतर त्यांनी योगेशला बेडरूमबाहेर आणून पाण्याच्या ड्रममध्ये बुडवले आणि त्याची हत्या केली. त्यानंतर दशरथ यांनी हॉलमध्ये गळफास लावून आत्महत्या केली.

The post गतिमंद मुलाच्या चिंतेने ग्रासलेल्या वडिलांनी ‘फादर्स डे’च्या दिवशीच केलं भयंकर कृत्य… appeared first on थोडक्यात घडामोडी.

अमरावती : मेळघाट व्याघ्र प्रकल्पाच्या गुगामल राष्ट्रीय उद्यान अंतर्गत येणाऱ्या वन परीश्रेत्रात कार्यरत RFO दिपाली चव्हाण यांनी आत्महत्या केली आहे. या २८ वर्षीय तरूण महिला अधिकाऱ्याने शासकीय निवासस्थानी स्वतःवर गोळी झाडून आत्महत्या केली. आत्महत्येपूर्वी लिहिलेल्या सुसाईड नोटमध्ये त्यांनी अधिकाऱ्याच्या जाचाला कंटाळून आत्महत्या करत असल्याचं म्हटलं आहे.

मूळच्या सातारच्या असणाऱ्या दिपाली चव्हाण यांची महाराष्ट्र लोकसेवा आयोगाची महाराष्ट्र वन सेवा 2014 परीक्षा उत्तीर्ण झाल्यानंतर वन परिक्षेत्र अधिकारी म्हणून नियुक्ती झाली होती. त्यांनी हरिसाल वन परिक्षेत्राची धुरा सांभाळली. हरिसाल येथे रोरा, मांग्या व मालूर या तीन गावांच्या पुनर्वसनासाठी त्यांनी भरीव कामगिरी केली होती. त्यांच्या कामाची सर्वत्र चर्चा होती. डिंक तस्कर रेल्वेत पळून गेल्यावर त्यांनी दुचाकीद्वारे मध्यप्रदेशपर्यंत पाठलाग करत आरोपींना सळो की पळो करुन सोडले होते. त्यातून त्यांची ओळख “लेडी सिंघम” अशी झाली होती.

असे असूनही अतिशय कर्तव्यनिष्ठ असलेल्या दीपाली यांची वरिष्ठ अधिकाऱ्यांकडून वेळोवेळी मुस्कटदाबी केली जात होती. गर्भवती असताना त्या मालूर येथे कच्च्या रस्त्यातून पायी फिरत होत्या. सुट्टी दिली जात नव्हती. पगार रोखून धरला जात होता. या सर्व गोष्टी त्यांनी सुसाईड नोटमध्ये लिहिल्या आहेत.

दरम्यान, सुसाईड नोटमध्ये दीपाली यांनी ज्या अधिकाऱ्यावर आरोप केले आहेत, ते उपवनसंरक्षक शिवकुमार यांना आज नागपूर येथून अटक करण्यात आली. तर मेळघाट व्याघ्र प्रकल्पाचे क्षेत्र संचालक व अप्पर प्रधान मुख्य वनसंरक्षक श्रीनिवास रेड्डी नॉट रीचेबल असल्याची माहिती मिळत आहे.

The post ‘लेडी सिंघम’ अशी ओळख असणाऱ्या RFO दिपाली चव्हाण यांची आत्महत्या, सुसाईड नोटमधून समोर आलं कारण.. appeared first on थोडक्यात घडामोडी.

अहमदनगर : अहमदनगर जिल्ह्यातील कर्जत तालुक्यातील राशीन गावात डॉक्टर महेंद्र थोरात यांनी पत्नी आणि दोन मुलांसह आत्महत्या केली. या घटनेने एकच खळबळ उडाली आहे. डॉक्टर थोरात यांनी आपली पत्नी वर्षाराणी, मुलगा कृष्णा आणि कैवल्य यांना सलाईनद्वारे विषारी इंजेक्शन दिले, त्यानंतर त्यांनी गळफास घेऊन आत्महत्या केली, अशी माहिती मिळत आहे. शनिवारी पहाटेच्या सुमारास ही धक्कादायक घटना घडली.

खोलीच्या दरवाजाला डायरीच्या 22 नोव्हेंबर 2021 या पानावर त्यांनी सुसाईड नोट लिहून ठेवली होती. त्यात त्यांनी लिहिले होते कि, “आम्ही आज आपल्यापासून कायमचा निरोप घेत आहोत. मुलगा कृष्णाला कानाने ऐकायला येत नाही त्याला समाजात अपमानास्पद वागणूक मिळत आहे. आम्हाला समाजात अपराध्यासासारखे वाटत आहे. अनेक दिवसांपासून आम्ही व्यथित झालेलो आहोत. कृष्णाचे पण कशात मन लागत नाही, सतत त्यालाही वाईट वाटते. परंतु तो कधी म्हणून दाखवत नाही. एक आई-वडील म्हणून त्याला असणारे आणि होणारे दुःख आम्ही सहन करु शकत नाही. मी आणि माझी मिसेस सौ वर्षा आम्ही दोघांनी मिळून, चर्चा करुन, विचाराने निर्णय घेत आहोत. असे कृत्य करणे आम्हालापण योग्य वाटत नाही. यासाठी कोणालाही प्रत्यक्ष किंवा अप्रत्यक्षपणे दोषी समजू नये.”

महेंद्र थोरात यांनी आपल्या राहत्या घरीच आत्महत्या केली. या घटनेनंतर कर्जत पोलिस घटनास्थळी दाखल झाले आणि त्यांनी चौघांचेही मृतदेह ताब्यात घेतले. महेंद्र थोरात यांनी गरिबांचे डॉक्टर अशी ओळख मिळवली होती. या घटनेमुळे राशीन गावात बंद पुकारण्यात आला आहे.

The post पत्नीबरोबर दोन मुलांची हत्या करून डॉक्टरची आत्महत्या, सुसाईड नोटमध्ये सांगितलं कारण… appeared first on थोडक्यात घडामोडी.

नवी दिल्ली : नव्या कृषी कायद्यांविरोधात आंदोलनादरम्यान आणखी एका शेतकऱ्यानं सुसाईड नोट लिहून आत्महत्या केली आहे. दिल्लीच्या टिकरी सीमेवर सुरू असलेल्या आंदोलनात सहभागी झालेल्या या शेतकऱ्यानं गळफास घेत आत्महत्या केली. आत्महत्या करणाऱ्या शेतकऱ्याचं नाव कर्मवीर सिंह असल्याचं समजतंय. त्यांचं वय ५० च्या आसपास असून ते जिंदच्या सिंहवाला गावचे रहिवासी होते.

मिळालेल्या माहितीनुसार, कर्मवीर सिंह गेल्या काही दिवसांपूर्वीच शेतकरी आंदोलनात सहभागी झाले होते. टिकरी सीमेवर शहराच्या बायपास रोडवरील एका नव्या बसस्टँडजवळ झाडाला गळफास घेत कर्मवीर यांनी आत्महत्या केली. रविवारी सकाळी कर्मवीर सिंह यांचा मृतदेह काही शेतकऱ्यांच्या नजरेस पडला. मृतदेहाजवळ एक सुसाईड नोट आढळली. सुसाईड नोटमध्ये ‘भारतीय किसान युनियन जिंदाबाद’ असं म्हटलं आहे. हे काळे कायदे कधी रद्द होतील, याचा अंदाज बांधता येऊ शकत नाही. हे काळे कायदे रद्द होणार नाहीत तोपर्यंत आम्ही इथून जाणार नाही, असंही त्यांनी पत्रात म्हटलं. सरकारकडून शेतकऱ्यांना दिल्या जाणाऱ्या वागणुकीमुळे कर्मवीर दरियाव सिंह हे गेल्या काही दिवसांपासून दुःखी होते, असं शेतकऱ्यांचं म्हणणं आहे.

शेतकऱ्यांनी या घटनेची सूचना पोलिसांना देताच पोलीस लगेचच घटनास्थळी उपस्थित झाले आणि त्यांनी मृतदेह ताब्यात घेतला. मृतदेह शवविच्छेदनासाठी रुग्णालयात पाठवण्यात आला आहे. तसंच या घटनेची माहिती मृत शेतकऱ्याच्या कुटुंबीयांनाही देण्यात आली आहे.

The post शेतकरी आंदोलन : आणखी एका शेतकऱ्याची सुसाईड नोट लिहून आत्महत्या appeared first on थोडक्यात घडामोडी.

शिक्षण बंद झालं म्हणून दिल्लीतील लेडी श्रीराम महाविद्यालयात शिक्षण घेणाऱ्या, मूळ तेलंगणाची रहिवासी असलेल्या एका विद्यार्थीनीनं आपलं आयुष्य संपवल्याची धक्कादायक घटना आता समोर आली आहे.

तेलंगणाच्या रंगारेड्डी जिल्ह्याची रहिवासी असलेल्या ऐश्वर्या रेड्डी हिनं दिल्लीच्या लेडी श्रीराम महाविद्यालयापर्यंत आपल्या मेहनतीच्या जोरावर मोठ्या कष्टानं पाऊल टाकलं होतं. अतिशय गरीब कुटुंबातून पुढे आलेल्या हुशार ऐश्वर्यासाठी ही साधी गोष्ट नव्हती. ऐश्वर्याचे वडील श्रीनिवास रेड्डी हे ऑटो मॅकेनिक म्हणून काम करतात. तर आई घरीच कपडे शिवण्याचं काम करत घराला आर्थिक हातभार लावतात. खूप शिकून, मोठं बनून आयएएस बनण्याचा ध्यास ऐश्वर्यानं घेतला होता. ती अभ्यासात हुशार होती. १२ वी मध्ये तिने ९८.५ % मिळवले होते.

परंतु, करोना संकटानं आणि लॉकडाऊननं तिच्या स्वप्नांना धुळीत मिळवलं. हलाखीच्या परिस्थितीमुळे ऐश्वर्याला लॅपटॉप खरेदी करता आला नाही आणि ती ऑनलाइन अभ्यास करू शकली नाही. त्यामुळे २ नोव्हेंबर रोजी ऐश्वर्यानं आपल्या राहत्या घरी आत्महत्या केली. ऐश्वर्या ने सुसाईड नोटमध्ये लिहिले कि, ‘माझ्यामुळे माझ्या कुटुंबाला अनेक आर्थिक अडचणींचा सामना करावा लागत आहे. मी माझ्या कुटुंबासाठी एक ओझे आहे. माझे शिक्षण एक ओझे आहे. मी अभ्यास करू शकत नाही, तर मी जगू शकत नाही. ‘

लॉकडाऊनमुळे ऐश्वर्याच्या घरच्या आर्थिक परिस्थितीवर प्रचंड परिणाम झाला. इतकंच काय तर सातवीत शिकणाऱ्या ऐश्वर्याच्या लहान बहिणीला इंटरनेट किंवा इतर साधनं नसल्यानं आपलं शिक्षण अर्धवट सोडावं लागलं. मदतीसाठी ऐश्वर्याने 14 सप्टेंबर रोजी सोनू सूद यांना पत्र देखील लिहिलं होतं.

The post मी अभ्यास करू शकत नाही, तर मी जगू शकत नाही, असं म्हणत विद्यार्थीनीची आत्महत्या appeared first on थोडक्यात घडामोडी.