मुंबई : सीबीआयने महाराष्ट्राचे माजी गृहमंत्री अनिल देशमुख यांना भ्रष्टाचाराच्या प्रकरणात अटक केली आहे. दरम्यान, CBI कोठडी टाळण्यासाठी अनिल देशमुख रुग्णालयात दाखल झाले, असा दावा तपास यंत्रणेने केला आहे.

मुंबई उच्च न्यायालयाने यापूर्वी अनिल देशमुख यांच्या याचिकेवर सुनावणीस नकार दिला होता. कथित १०० कोटींच्या वसुली प्रकरणासंदर्भात देशमुख यांच्या कोठडीची मागणी करणाऱ्या सीबीआयच्या अर्जाला विशेष सीबीआय न्यायालयाने परवानगी दिली होती, त्या आदेशाला देशमुख यांनी आव्हान दिले. न्यायमूर्ती डेरे यांनी ही याचिका दुसऱ्या खंडपीठासमोर ठेवण्याचे निर्देश दिले. यापूर्वी मुंबई सत्र न्यायालयानेही अटकपूर्व जामीन अर्ज फेटाळला होता. सीबीआय प्रकरणातील अन्य दोन आरोपींचे अटकपूर्व जामीन अर्जही मुंबई उच्च न्यायालयाने फेटाळले आहेत.

अनिल देशमुख जाणूनबुजून एजन्सीचा ताबा चुकवण्याचा प्रयत्न करत असल्याचा सीबीआयचा आरोप आहे. त्यामुळे त्यांनी स्वत:ला सरकारी जेजे रुग्णालयात दाखल केले. सोमवारी, ४ एप्रिल रोजी विशेष न्यायालयात झालेल्या सुनावणीदरम्यान तपास यंत्रणेने हा दावा केला. ऑर्थोपेडिक वॉर्डमध्ये दाखल असलेल्या अनिल देशमुख यांना मंगळवारी डिस्चार्ज देण्यात आला, अशी माहिती रुग्णालयाच्या सूत्रांनी दिली.

एनसीपी नेते अनिल देशमुख यांना अंमलबजावणी संचालनालयाने (ईडी) नोव्हेंबर 2021 मध्ये मनी लाँड्रिंग प्रकरणात अटक केली होती. यापूर्वी एजन्सीने देशमुख यांचे स्वीय सहाय्यक कुंदन शिंदे आणि सचिव संजीव पालांडे यांना ताब्यात घेतले होते, तर सहायक पोलिस निरीक्षक सचिन वाझे यांना बडतर्फ केले होते. गेल्या आठवड्यात मुंबईतील एका न्यायालयाने एका वेगळ्या भ्रष्टाचाराच्या प्रकरणात सीबीआयला त्यांना ताब्यात घेण्याची परवानगी दिली.

१०० कोटी वसुली प्रकरण : मुंबईचे माजी पोलिस आयुक्त परमबीर सिंग यांनी आरोप केला होता की, तत्कालीन गृहमंत्री देशमुख यांनी पोलिस अधिकाऱ्यांना शहरातील रेस्टॉरंट आणि बारमधून महिन्याला १०० कोटी रुपये गोळा करण्याचे टार्गेट दिले होते. देशमुख यांनी आरोप नाकारले, परंतु मुंबई उच्च न्यायालयाने सीबीआयला त्यांच्याविरुद्ध गुन्हा नोंदविण्याचे निर्देश दिल्यानंतर गेल्या वर्षी एप्रिलमध्ये राज्य मंत्रिमंडळाचा राजीनामा दिला.

The post ब्रेकिंग! अनिल देशमुख यांना CBI ने केली अटक appeared first on थोडक्यात घडामोडी.

मुंबई: सीबीआयने राज्याचे माजी गृहमंत्री अनिल देशमुख यांचे जावई गौरव चतुर्वेदी यांना २० मिनिटांच्या चौकशीनंतर जाऊ दिले असून देशमुख यांच्या लीगल टीममधील वकील आनंद डागा यांना ताब्यात घेण्यात आले आहे व त्यांची अजूनही चौकशी सुरू असल्याचे सांगण्यात येत आहे. डागा यांच्यावर अटकेची कारवाई होण्याचीही शक्यता आहे. सीबीआयने अनिल देशमुख यांना क्लीनचिट दिल्याचा प्राथमिक चौकशी अहवाल लीक झाला होता. या प्रकरणात ही कारवाई करण्यात आल्याचे सूत्रांनी सांगितले.

अनिल देशमुख यांचे जावई गौरव चतुर्वेदी यांना आज मुंबईतील वरळी येथून सीबीआयने ताब्यात घेतल्याच्या बातम्या आल्याने खळबळ उडाली. त्यांच्यासोबत देशमुख यांचे वकील आनंद डागा यांनाही ताब्यात घेण्यात आल्याचे सांगण्यात आले. याबाबत देशमुख कुटुंबीयांकडून वरळी पोलीस ठाण्यात तक्रार देण्यात आली असून गौरव चतुर्वेदी आणि आनंद डागा यांचे अपहरण करण्यात आल्याचा आरोप त्यात करण्यात आला आहे. या घडामोडी सुरू असतानाच सीबीआयमधील सूत्रांनी महत्त्वाची माहिती दिली आहे.

सीबीआयमधील सूत्रांकडून जी माहिती समोर येत आहे ती अनिल देशमुख यांच्या अडचणी वाढवणारी आहे. अनिल देशमुख यांच्यावर गृहमंत्री असताना १०० कोटी वसुलीचा आरोप करण्यात आला आहे. याप्रकरणी प्राथमिक चौकशीअंती देशमुख यांना क्लीनचिट देण्यात आली आहे आणि फाइल बंद करण्याची शिफारस करण्यात आल्याचा अहवाल काही दिवसांपूर्वी लीक झाला होता. याप्रकरणी सीबीआयकडून चौकशी सुरू आहे. त्यात सीबीआय मधील कनिष्ठ स्तरावरील अधिकाऱ्यांना हाताशी धरून त्यांना लाच देत हा अहवाल तयार करण्यात आल्याचा व पद्धतशीरपणे लीक करण्यात आल्याचा संशय बळावला आहे. याबाबत अंतर्गत चौकशी सुरू आहे, शिवाय देशमुख तसेच त्यांच्या लीगल टीमने या अधिकाऱ्यांसोबत संगनमत केले का, याचा तपासही सीबीआय करत आहे. त्याचाच भाग म्हणून सीबीआयने आज गौरव चतुर्वेदी आणि वकील आनंद डागा यांना ताब्यात घेतल्याचे सूत्रांचे म्हणणे आहे. चतुर्वेदी यांनी त्यांना याबाबत काहीही माहिती नसल्याचे सांगितले असून त्यांना सीबीआयने घरी जाऊ दिले आहे तर आनंद डागा यांची मात्र अजूनही चौकशी सुरू असल्याचे सांगण्यात येत आहे. त्यांचा जबाब नोंदवून घेतला जात आहे.

The post ‘त्या’ प्रकरणाला वेगळे वळण; CBI ने अनिल देशमुख यांच्या जावयाला तर सोडले, पण… appeared first on थोडक्यात घडामोडी.

मुंबई : माजी गृहमंत्री अनिल देशमुख यांच्यावर आता ईडीने गुन्हा दाखल केला आहे. सीबीआयने दाखल केलेल्या गुन्ह्यानंतर आता ईडीकडून देखील त्यांच्यावर पैशाची अफरातफर केल्याचा आरोप करत गुन्हा दाखल करण्यात आला आहे.

अनिल देशमुख यांच्यावर भ्रष्टाचाराचे आरोप करण्यात आले आहेत. अनिल देशमुख यांनी सचिन वाझे आणि संजय पाटील या पोलीस अधिकाऱ्यांना १०० कोटी रुपयांच्या वसुलीचं टार्गेट दिलं होतं, त्याचबरोबर अनेक अधिकाऱ्यांच्या कर्मचाऱ्यांच्या बदल्या ते भ्रष्ट मार्गाने करत होते, असे आरोप करण्यात आले आहेत. शंभर कोटी वसुली प्रकरण तसेच बदल्यांसाठी पैसे घेण्यात आल्याच्या प्रकरणानंतर या पैशाचं नेमकं काय झालं? याचा तपास ईडी करणार आहे. या पैशांचा वापर कसा करण्यात आला आहे, हवाला मार्फत ते बाहेर पाठवण्यात आले आहेत का किंवा कोलकात्यातील शेल कंपन्यांच्या माध्यमातून त्याची गुंतवणूक केली गेली आहे का या सर्वांचा तपास आता ईडी करणार आहे. कोलकात्यातील काही शेल कंपन्या अनिल देशमुखांच्या नातेवाईकांच्या नावे असल्याची माहिती समोर आली आहे. या नातेवाईकांची चौकशी सीबीआयकडून केली जाऊ शकते.

The post अनिल देशमुख यांच्या अडचणीत वाढ, सीबीआयनंतर आता ईडीनेही दाखल केला गुन्हा appeared first on थोडक्यात घडामोडी.

मुंबई : महाराष्ट्राचे माजी गृहमंत्री अनिल देशमुख यांच्याविरुध्द सीबीआयने गुन्हा दाखल केला आहे. त्यांच्यावर भ्रष्टाचाराचे गंभीर आरोप करण्यात आलेले आहेत. परमबीर सिंह यांच्या आरोपानंतर अनिल देशमुख यांना पदावरून पायउतार व्हाव लागलं होतं. त्यानंतर त्यांच्यावर करण्यात आलेल्या 100 कोटी रुपयांच्या आरोपाची सीबीआयनं चौकशी केली. शनिवारी सकाळी अनिल देशमुख यांच्या मुंबईत बांद्रा, वरळी तसेच नागपूर अशा १० ठिकाणी छापेमारी केली आहे.

केंद्रीय अन्वेषण विभागाने (सीबीआय) काही दिवसांपूर्वी भ्रष्टाचाराच्या आरोपांच्या प्राथमिक चौकशीसाठी अनिल देशमुख यांना बोलावलं होत. त्यावेळी देशमुख यांची सुमारे सात तास चौकशी सुरु होती. आवश्यक असल्यास चौकशी पथक त्यांच्याशी पुन्हा संपर्क साधू शकेल, असे एका अधिकाऱ्याने सांगितले होते. ११ एप्रिल रोजी सीबीआयने देशमुख यांच्या दोन वैयक्तिक सहाय्यकांची चौकशी केली होती. एजन्सीने मुंबईचे माजी पोलिस आयुक्त परम बीर सिंग, सहायक पोलिस आयुक्त संजय पाटील, निलंबित सहाय्यक पोलिस निरीक्षक सचिन वाझे आणि पोलिस उपायुक्त यांचेही जबाब नोंदवले होते.

सीबीआयने आज अनिल देशमुखांच्या घर आणि कार्यालयासह 10 ठिकाणी छापे मारले आहेत. देशमुख राहत असलेल्या मुंबईतील ज्ञानेश्वरी बंगल्यातही सीबीआयने छापे मारले असल्याचं सूत्रांनी सांगितलं. रात्री उशिरा सीबीआयच्या टीमने येऊन छापेमारी केली आणि पहाटे ही टीम निघून गेली. ज्ञानेश्वरी बंगल्यातील सीसीटीव्ही फुटेजही सीबीआयने नेल्याचं सांगण्यात येतं. तसेच इतर ठिकाणीही सीबीआयने छापे मारले असून कागदपत्रांची छाननी करण्यात येत असल्याचं सूत्रांनी सांगितलं.

सीबीआयने एक अहवाल तयार केला आहे. हा अहवाल सीबीआयने अद्याप कोर्टात सादर केला नाही. मात्र, अहवाल सादर करण्यापूर्वीच देशमुखांविरोधात गुन्हा दाखल करण्यात आला आहे. त्यामुळे देशमुख यांच्या अडचणीत वाढ होण्याची शक्यता वर्तवण्यात येत आहे.

काय आहे प्रकरण?

काही दिवसांपूर्वी माजी गृहमंत्री अनिल देशमुख यांनी सचिन वाझेंना दर महिन्याला 100 कोटी रुपयांचे टार्गेट दिल्याचा गंभीर आरोप मुंबईचे माजी पोलीस आयुक्त परमबीर सिंह यांनी केला होता. गेल्या काही महिन्यात गृहमंत्री देशमुखांनी कित्येक वेळेस वाझेंना त्यांच्या निवासस्थानी बोलवलं होतं तसेच त्यांना दर महिन्याला 100 कोटी रुपये जमा करायला सांगितलं होतं. देशमुख म्हणाले होत की, मुंबईत 1750 बार आणि रेस्टॉरंट आहेत आणि त्यातल्या प्रत्येकाकडून 2 ते 3 लाख रुपये कलेक्ट केले तरीसुद्धा महिन्याला 40 ते 50 कोटी रुपये सहज उपलब्ध होतील. राहिलेली इतर रक्कम इतर मार्गांनी जमा करता येईल. मला किंवा वरिष्ठ अधिकाऱ्यांना अंधारात ठेवून देशमुख पोलीस अधिकाऱ्यांना त्यांच्या बंगल्यावर बोलवायचे आणि पैसे गोळा करण्यासाठी टार्गेट द्यायचे. पैसे गोळा करण्यासाठी पोलीस अधिकाऱ्यांचा ते उपयोग करायचे, असे अनेक आरोप परमबीर सिंग यांनी देशमुखांवर केले होते. त्यांनी याबाबत मुख्यमंत्री उद्धव ठाकरे आणि राज्यपाल भगतसिंह कोश्यारी यांना पत्रं लिहिलं होतं.

त्यानंतर हायकोर्टाने आदेशात म्हटलं होतं की, “अनिल देशमुख यांच्यावरील आरोप गंभीर आहे. अनिल देशमुख महाराष्ट्राचे गृहमंत्री असल्याने या प्रकरणाची निष्पक्ष चौकशी होणं गरजेचं आहे. हायकोर्टाच्या आदेशानंतर अनिल देशमुख यांनी आपल्या पदाचा राजीनामा दिला होता.

या प्रकरणाच्या चौकशीची सुरुवात सीबीआयने याचिकाकर्त्या जयश्री पाटील यांच्या जबाबाने केली. त्यानंतर परमबीर सिंह यांनी मुख्यमंत्र्यांना लिहिलेल्या पत्रात उल्लेख असलेल्या गुन्हे शाखेचे पोलीस उपायुक्त डॉ. राजू भुजबळ आणि सहाय्यक पोलीस आयुक्त संजय पाटील यांचीही चौकशी करण्यात आली होती. मग अनिल देशमुख यांची चौकशी झाली होती.

The post ब्रेकिंग : अनिल देशमुखांविरुध्द गुन्हा दाखल, १० ठिकाणी सीबीआयची छापेमारी appeared first on थोडक्यात घडामोडी.

चारा घोटाळ्यात दोषी ठरलेल्या लालू प्रसाद यादव यांच्यावर उपचार करणारे डॉक्टर डॉ. उमेश प्रसाद यांना माध्यमांमधील अनधिकृत वक्तव्याबद्दल कारणे दाखवा नोटीस बजावण्यात आली आहे. त्यांनी काही दिवसांपूर्वी सांगितले होते की लालू यादव यांची तब्येत ठीक नाही आणि त्यांची किडनी फक्त 25 टक्के कार्यरत आहे. या प्रकरणात त्यांना कारणे दाखवा नोटीस बजावण्यात आली आहे.

राजेंद्र इंस्टीट्यूट ऑफ मेडिकल सायन्सेस (रिम्स) चे संचालक डॉ. कामेश्वर प्रसाद म्हणाले की, ही माहिती चुकीची आहे. डॉ. उमेश प्रसाद यांनी कारणे दाखवा नोटीसला उत्तर देताना लेखी स्पष्टीकरण दिले आहे की त्यांनी यासंदर्भात मी माध्यमांशी काही बोललो नाही आणि जे काही त्यांनी प्रसारित केले ते चुकीचे असून लालू प्रसाद यादव ठीक आहेत.

डॉ. कामेश्वर प्रसाद यांनी स्पष्टीकरण दिले की, ‘लालू प्रसाद यादव यांची प्रकृती ठीक आहे. जर त्यांच्यावर उपचार करणार्‍या डॉक्टरांनी काही सांगितले असेल तर ते त्यांचे वैयक्तिक मत आहे. लालू प्रसाद यांच्या आरोग्यामध्ये काही गडबड झाल्यास वैद्यकीय मंडळ याची तपासणी करून अहवाल देईल. लालू प्रसाद यादव यांच्या प्रकृतीची पूर्ण काळजी संस्थेमध्ये घेतली जात आहे.

दरम्यान, तुरूंग प्रशासनाने 10 डिसेंबरपर्यंत लालू प्रसाद यादव यांचा वैद्यकीय अहवाल प्राप्त केल्याचे म्हटले आहे. त्यामध्ये त्यांची प्रकृती स्थिर असल्याचे सांगितले जात आहे. तथापि, लालू यादव यांचा लहान मुलगा तेजस्वी यादव यांचे त्यांच्या तब्येतीबाबत वेगळे मत आहे. वडिलांची भेट घेतल्यानंतर तेजस्वी यादव काळजीत दिसले. लालू यादव यांची तब्येत ठीक नसल्याची चिंता त्यांनी व्यक्त केली. ते दिल्ली उच्च वैद्यकीय केंद्राच्या डॉक्टरांचा सल्लाही घेणार होते.

दुसरीकडे सीबीआयने लालू प्रसाद यादव यांच्या शिक्षेबद्दल म्हटले आहे की, फौजदारी प्रक्रिया संहिता कलम -427 अंतर्गत खालच्या कोर्टाने स्वतंत्रपणे उल्लेख न केल्यास त्यांच्या सर्व खटल्यातील शिक्षा एक-एक करून चालायला हवी आणि दुमका प्रकरणात लालू यादव यांनी न्यायालयीन कोठडीत एक दिवसही घालविला नाही.

एजन्सीने म्हटले आहे की लालूंना भारतीय दंड संहितेच्या विविध तरतुदींनुसार दुमका प्रकरणात सात वर्षांची शिक्षा आणि भ्रष्टाचार प्रतिबंधक कायद्यांतर्गत सात वर्षांच्या तुरूंगवासाची शिक्षा सुनावण्यात आली आहे. या प्रकरणात जामीन मिळाल्यानंतर लालू जवळपास तीन वर्षांनंतर तुरूंगातून बाहेर येऊ शकतील कारण आतापर्यंत चारा घोटाळ्याच्या चार प्रकरणांपैकी तीन प्रकरणात त्यांना जामीन मिळाला आहे. ज्यामध्ये लालू प्रसाद यांना शिक्षा सुनावण्यात आली आहे. लालू प्रसाद यादव यांच्याविरोधात डोरंडा कोषागारातून 139 कोटी रुपयांच्या भरपाईचे आणखी एक प्रकरण रांचीच्या विशेष सीबीआय कोर्टात प्रलंबित असून, त्यावर अंतिम सुनावणी सुरू आहे.

The post लालू प्रसाद यादव यांच्यावर उपचार करणाऱ्या डॉक्टरांना कारणे दाखवा नोटीस appeared first on थोडक्यात घडामोडी.

उत्तर प्रदेश : हाथरस सामूहिक बलात्कार प्रकरणात सीबीआयने चारही आरोपींविरोधात सामूहिक बलात्कार आणि हत्येचा आरोप लावला आहे. सप्टेंबर महिन्यात हाथरसमध्ये ही संतापजनक घटना घडली होती. तीन महिन्यांनंतर सीबीआयच्या पथकाने शुक्रवारी या प्रकरणाचा तपास करत चार आरोपींविरोधात चार्जशीट दाखल केले. 19 वर्षीय दलित मुलीवर सामूहिक बलात्कार आणि नंतर तिचा खून केल्याप्रकरणी आरोपी न्यायालयीन कोठडीत आहेत.

हाथरसमद्ये १४ सप्टेंबरला या दलित तरुणीवर चार जणांकडून सामूहिक बलात्कार करण्यात आला होता. दिल्लीमध्ये रुग्णालयात उपचार सुरु असतानाच पीडितेचा मृत्यू झाला होता. ३० सप्टेंबरला घराजवळ रात्रीच्या अंधारात उत्तर प्रदेश पोलिसांनी पीडितेवर अंत्यसंस्कार केले होते. कुटुंबाची परवानगी नसतानाही अंत्यसंस्कार झाल्याने मोठ्या प्रमाणात रोष व्यक्त झाला होता. यासोबतच पोलिसांच्या भूमिकेवरही प्रश्न उपस्थित करण्यात आले होते. ऑक्टोबर महिन्यात सुप्रीम कोर्टाने अलाहाबाद कोर्टाच्या देखरेखेखाली सीबीआय तपास करेल असा आदेश दिला होता.

सीबीआयने आपल्या आरोपपत्रात चौघांवर सामूहिक बलात्कार आणि त्यानंतर खुनाचे आरोप लावले आहेत. तपासादरम्यान आरोपींच्या अनेक प्रकारच्या फॉरेन्सिक चाचण्या करण्यात आल्या. या व्यतिरिक्त सामूहिक बलात्कार पीडित महिलेवर उपचार घेत असलेल्या जवाहरलाल नेहरू मेडिकल कॉलेज व रुग्णालयातील डॉक्टरांशीही संपर्क साधला होता.

The post हाथरस सामूहिक बलात्कार प्रकरण : सीबीआयने तपास करून आरोपींविरोधात दाखल केलं चार्जशीट appeared first on थोडक्यात घडामोडी.

महाराष्ट्रात भाजप सत्तांतरासाठी ‘ईडी’चा वापर करून काही सत्ताधारी नेत्यांवर दबाव आणू पाहत आहे, असा आरोप महाविकास आघाडीच्या नेत्यांनी केला. त्यानंतर आता संजय राऊत यांनी एक व्यंगचित्र ट्विट केलं आहे. संजय राऊत यांच्या या ट्विटमधून भाजपावर नाव न घेता निशाणा साधण्यात आला आहे. या ट्विट केलेल्या व्यंगचित्राला भरपूर लाईक्स मिळाल्याचे दिसत आहे.

शिवसेना आमदार प्रताप सरनाईक, त्यांचे सुपुत्र विहंग आणि पूर्वेश सरनाईक यांच्या घर आणि कार्यालयावर ईडीने छापे मारले होते. कथित मनी लाँड्रिंग प्रकरणात सरनाईक कुटुंब ईडीच्या रडारवर आहे. या कारवाईनंतर शिवसेनेकडून भाजपवर जोरदार टीका करण्यात येत आहे.

ईडी आणि सीबीआय हे केंद्र सरकारच्या हातातील बाहुलं झालं आहे, अशी टीका महाविकास आघाडीच्या नेत्यांनी केली होती. त्यानंतर आता शिवसेना खासदार संजय राऊत यांनी नुकतंच एक व्यंगचित्र ट्विट केलं आहे. या व्यंगचित्रात दोन कुत्रे उभे आहेत. त्यातील एका कुत्र्यावर सीबीआय आणि दुसऱ्या कुत्र्यावर ईडी असे लिहिले आहे. “थांब, आता नक्की कोणाच्या घरी जायचं आहे ते अजून ठरलं नाहीये”, असं सीबीआय लिहिलेला कुत्रा ईडी लिहिलेल्या कुत्र्याला सांगताना दिसत आहे.

pic.twitter.com/xw8fuLmQge

— Sanjay Raut (@rautsanjay61) November 28, 2020

The post ED आणि CBI ची तुलना कुत्र्यांशी, संजय राऊत यांनी ट्विट केलं व्यंगचित्र appeared first on थोडक्यात घडामोडी.