लखनौ : लखनौच्या इंदिरा नगरमधील एक तरुणी 10 दिवसांपासून तिच्या आईच्या मृतदेहासोबत घरात राहत असल्याचे आढळून आले. 26 वर्षीय अंकिता दीक्षित असे या मुलीचे नाव असून ती एका खोलीत होती, तर तिच्या आईचा मृतदेह दुसऱ्या खोलीत पडलेला होता. शिवाय तिने आपल्या आईच्या मृत्यूबद्दल तिच्या कुटुंबातील कोणालाही माहिती दिली नव्हती.

घरातून विचित्र वास येत असल्याने शेजाऱ्यांनी पोलिसांना माहिती दिल्यानंतर ही घटना उघडकीस आली. घटनास्थळी दाखल झालेल्या लखनौ पोलिसांनी हिंदुस्थान एरोनॉटिक्स लिमिटेड (एचएएल) मधून निवृत्त झालेल्या सुनीता दीक्षित यांचा मृतदेह ताब्यात घेतला. मृतदेह सुमारे 10 दिवस जुना असल्याचे समजते.

सुरुवातीला पोलिसांनी निवासस्थानात प्रवेश केला असता मुख्य दरवाजाला कुलूप असल्याचे दिसून आले. पण त्यांना एका महिलेचा आवाज आला. पोलिसांनी दरवाजा ठोठावला असता, मृत महिलेची २६ वर्षीय मुलगी अंकिता दीक्षित हिने दार न उघडता विरोध सुरू केला. दुसरा पर्याय नसल्याने पोलिसांनी सुताराला बोलावून दरवाजा तोडून घरात प्रवेश केला. घरात प्रवेश केल्यानंतर पोलिसांनी पाहिले की, अंकिता एका खोलीत होती आणि तिची आई दुसऱ्या खोलीत पडली होती. अंकिताची मानसिक स्थिती ठीक नसल्याचे सांगण्यात आले.

मुलीला खोलीत पाहून पोलीस चक्रावून गेले. मुलगी जास्त बोलू शकत नव्हती आणि काही प्रश्नांनंतर ती मृत सुनीता दीक्षित यांची मुलगी असल्याचे आढळून आले. सुनीता यांचा मृतदेह सुमारे 10 दिवस जुना असल्याचे समजते. पोलिसांनी मृतदेह ताब्यात घेऊन पोस्टमार्टमसाठी पाठवला आहे. शवविच्छेदन अहवाल तयार झाल्यानंतर त्याच्या आधारे पुढील कायदेशीर कारवाई केली जाईल.

मात्र, महिलेच्या मृत्यूचे कारण अद्याप समजू शकलेले नाही. मृत एचएएल अभियंता सुनीता यांनी 10 वर्षांपूर्वी पती रजनीश दीक्षित यांच्याशी घटस्फोट घेतला होता. त्यादेखील कर्करोगाशी झुंज देत होत्या आणि त्यांची 26 वर्षांची मुलगी त्यांच्यासह राहत होती.

डोंबिवलीतील धक्कादायक घटना, मोठा भाऊ रागावल्यामुळे १८ वर्षीय तरुणीने केली आत्महत्या

मुंबईत खळबळ! प्रियकराने नंबर ब्लॉक केला, 20 वर्षीय तरुणीने उचलले टोकाचे पाऊल…

The post तब्बल 10 दिवस तरुणी आपल्या आईच्या मृतदेहासोबत राहत होती, नेमकं प्रकरण काय? appeared first on थोडक्यात घडामोडी.

IPL 2022 : आयपीएलमध्ये आज डबल हेडर सामने होणार आहेत. दिवसाचा पहिला सामना कोलकाता नाईट रायडर्स आणि दिल्ली कॅपिटल्स यांच्यात मुंबईच्या ब्रेबॉर्न स्टेडियमवर दुपारी 3.30 वाजता खेळवला जाईल. कोलकाता नाईट रायडर्स हा स्पर्धेतील सर्वोत्कृष्ट कामगिरी करणाऱ्या संघांपैकी एक ठरला असून, त्यांनी पहिल्या चारपैकी तीन सामने जिंकले आहेत. दुसरीकडे, दिल्ली कॅपिटल्सने तीनपैकी दोन सामने गमावले आहेत.

अनुभवी भारतीय वेगवान गोलंदाज उमेश यादवच्या चांगल्या सुरुवातीमुळे कोलकात्याची गोलंदाजी लाइन अप विशेषतः धोकादायक दिसत आहे. उमेशने या मोसमात आतापर्यंत 9.33 च्या सनसनाटी सरासरीने आणि 5.25 च्या इकॉनॉमी रेटने 9 बळी घेतले आहेत. उमेशला पॉवरप्लेमध्ये चेंडू दोन्ही बाजूंनी स्विंग होत असल्याने आणि अचूक लेन्थ गोलंदाजी करताना फलंदाजी करणे खूप कठीण होते. KKR ने शिवम मावीच्या जागी रसिक सलाम डारला घेतले आहे, त्याने संघासाठी अतिशय किफायतशीर गोलंदाजी केली होती.

केकेआरच्या प्लेइंग इलेव्हनमध्ये टीम साऊदीच्या जागी पॅट कमिन्सच्या पुनरागमनामुळे संघाचे आक्रमण जबरदस्त दिसत आहे. मात्र, कोलकाताची ताकद त्याच्या वेगवान गोलंदाजीने संपत नाही. वरुण चक्रवर्ती आणि सुनील नरेन या फिरकी जोडीने मधल्या षटकांमध्ये फलंदाजांवर दबाव आणतात आणि मोठे फटके खेळण्याच्या प्रयत्नात फलंदाज विकेट गमावतात.

मुंबई इंडियन्स आणि चेन्नई सुपर किंग्ज प्रमाणे, दिल्ली कॅपिटल्सचा खेळ चांगला दिसत नाही आणि त्यांना पहिल्या तीनपैकी दोन सामन्यात पराभव पत्करावा लागला आहे. शेवटच्या क्षणी अक्षर पटेल आणि ललित यादव यांच्यातील उत्कृष्ट भागीदारीमुळे मुंबई इंडियन्सविरुद्धच्या पहिल्या सामन्यात त्यांचा विजय झाला. अन्यथा, त्या सामन्यातही आघाडीच्या फळीतील अपयशानंतर संघ संघर्ष करत होता.

डेव्हिड वॉर्नर, एनरिक नॉर्ट्या आणि सरफराज खान यांच्या आगमनाने लखनौविरुद्ध संघ मजबूत होईल, असे वाटले होते, पण तसे काही घडले नाही. पृथ्वी शॉने सलामीला वॉर्नरसोबत स्फोटक खेळी खेळली पण वॉर्नर संघर्ष करताना दिसला.

पृथ्वीने दिल्लीला दिलेल्या वेगवान सुरुवातीनुसार बाकीच्या फलंदाजांनी खेळ दाखवला नाही. संपूर्ण 20 षटके खेळल्यानंतर दिल्लीने 3 गड्यांच्या मोबदल्यात अवघ्या 149 धावा केल्या. गोलंदाजीतही नॉर्ट्या लयीत दिसला नाही. या परिस्थितीत श्रेयस अय्यर आणि आवेश खानसारखे मोठे खेळाडू गमावणारी दिल्ली जितक्या लवकर आपली सर्वोत्तम प्लेइंग इलेव्हन ठरवेल, तितके संघासाठी चांगले होईल.

आजचा दुसरा सामना राजस्थान रॉयल्स आणि लखनौ सुपर जायंट्स यांच्यात संध्याकाळी 7.30 वाजता खेळवला जाईल. हा सामना महाराष्ट्र क्रिकेट असोसिएशन स्टेडियम (MCA), पुणे येथे होणार आहे. राजस्थानने 3 पैकी 2 सामने जिंकले आहेत, तर लखनौने पहिला सामना गमावल्यानंतर विजयाची हॅट्ट्रिक केली आहे.

The post IPL 2022 डबल हेडर : आज कोलकाता आणि दिल्ली यांच्यात 3.30 वाजता मॅच, राजस्थान आणि लखनौ यांच्यात 7.30 वाजता मॅच appeared first on थोडक्यात घडामोडी.

लखनौ : उत्तर प्रदेशची राजधानी लखनौमध्ये मालमत्ता विभागाच्या चालकाचा कर्तव्यावर असताना हृदयविकाराच्या झटक्याने मृत्यू झाला. त्यानंतर, मृत व्यक्तीच्या नातेवाईकांनी विभागावर निष्काळजीपणाचा आरोप लावला आहे. वैद्यकीय रजेवर असूनही त्यांना ड्युटीवर मंत्री नारायण राणे यांच्यासोबत ठेवण्यात आले, असा आरोप आहे. नातेवाईकांनी विभागाच्या अधिकाऱ्याविरोधात तक्रार दिली असून पोलीस पुढील कारवाई करत आहेत.

मिळालेल्या माहितीनुसार, अशोक कुमार वर्मा राज्य मालमत्ता विभागात चालक म्हणून तैनात होते. केंद्रीय मंत्री नारायण राणे लखनौला आले, तेव्हा अशोक कुमार यांची ड्युटी लावण्यात आली होती. ड्युटीवर असताना अशोक यांना हृदयविकाराचा झटका आला, त्यानंतर त्याला रुग्णालयात नेण्यात आले. परंतु, त्यांचा मृत्यू झाला.

मृताच्या नातेवाईकांच्या म्हणण्यानुसार, अशोकची तब्येत खराब होती, त्यामुळे ते वैद्यकीय रजेवर (medical leave) होते, पण जेव्हा नारायण राणे आले, तेव्हा अशोक यांना वैद्यकीय रजा असूनही जबरदस्तीने बोलावण्यात आले. त्यांच्या कुटुंबाने मालमत्ता विभागाचे मोटार प्रभारी अमरीश श्रीवास्तव यांच्यावर आरोप केला आहे की, त्याने अशोकच्या आजाराविषयी माहिती असूनही फोन केला आणि जबरदस्तीने बोलावून घेतले. तसेच न आल्यास अशोक कुमार यांना निलंबित करण्याची धमकी दिली. यामुळे अशोक यांना ड्युटीवर जाणे भाग पडले.

पोलिसांनी सांगितले की अशोक कुमार वर्मा यांचे हृदयविकाराच्या झटक्याने निधन झाले. कुटुंबाने हत्येचा आरोप केला असून तक्रार दिली आहे. या प्रकरणाचा तपास करून पुढील कारवाई केली जात आहे. मृतदेह शवविच्छेदनासाठी पाठवण्यात आला आहे. कारण काहीही असो, त्यानुसार पुढील कारवाई केली जाईल.

The post केंद्रीय मंत्री नारायण राणे यांच्या ड्युटीवरील चालकाचा मृत्यू, मृताच्या कुटुंबीयांचे गंभीर आरोप appeared first on थोडक्यात घडामोडी.

शारजाहहून भारतात लखनौत येणाऱ्या भारतीय विमानाची पाकिस्तानच्या कराची विमानतळावर आपत्कालीन लँडिंग करावी लागली. मिळालेल्या माहितीनुसार, विमानात बसलेल्या एका प्रवाशाची तब्येत अचानक खराब झाल्यामुळे हे पाऊल उचलण्यात आले. या व्यक्तीला वेळेत उपचार मिळण्यासाठी प्रयत्न केले, परंतु या व्यक्तीला वाचवण्यात यश मिळालं नाही.

कराचीच्या जीना आंतरराष्ट्रीय विमानतळावर उतरणारे विमान इंडिगो एअरलाइन्सचे विमान आहे. विमानातील प्रवाशाची तब्येत बिघडल्यामुळे परिस्थिती हाताळण्यासाठी पायलटला इमरजेंसी लँडिंग करावी लागली. वैमानिकाने परिस्थितीची माहिती पाकिस्तानच्या एअर ट्रॅफिक कंट्रोलर (एटीसी) ला देऊन विमानाच्या आपत्कालीन लँडिंगसाठी परवानगी घेण्यात आली. आपत्कालीन परिस्थिती लक्षात घेता एटीसीने वैमानिकाला खाली उतरण्यास परवानगी दिली. परंतु, उतरल्यानंतर प्राथमिक उपचार करण्यापूर्वीच या प्रवाशाचा मृत्यू झाला होता.

The post प्रवाशाला वाचवण्यासाठी भारतीय विमानाची पाकिस्तानात इमरजेंसी लँडिंग, पण.. appeared first on थोडक्यात घडामोडी.