अहमदनगर : नगर अर्बन मल्टिस्टेट बँकेवर रिझर्व्ह बँकेने सहा महिन्यांसाठी काही निर्बंध लावले आहेत. त्यानुसार खातेदारांना १० हजार रुपयांपेक्षा जास्त रक्कम काढता येणार नाही. याशिवाय इतरही बंधने लादण्यात आली आहेत. गेल्याच आठवड्यात बँकेची निवडणूक झाली. प्रदीर्घ प्रशासकीय राजवट संपवून दिवंगत माजी खासदार दिलीप गांधी यांच्या गटाने पुन्हा सत्ता मिळविली आहे. त्यातच आता नव्याने आलेल्या संचालक मंडळाला या आव्हानांशी सामना करावा लागणार आहे. नगर जिल्ह्यासह राज्यातील अन्य जिल्हे आणि गुजरातमध्येही या बँकेच्या शाखा आहेत.

भारतीय रिझर्व्ह बँकेचा हा आदेश सोमवारी संध्याकाळी मिळाला आहे. त्यानुसार कलम ३५ ए आणि कलम ५६ नुसार आजपासून पुढील सहा महिन्यांसाठी बँकेवर विविध निर्बंध लागू करण्यात आले आहेत. बँकेच्या संचालक मंडळाला कोणतेही नवीन कर्ज मंजुरी, जुन्या कर्जाचे नुतनीकरण, अॅडव्हान्स मंजूर करणे, कोणतीही गुंतवणूक करणे, नवीन ठेवी स्वीकारणे, ठेवी मोडणे, मालमत्ता हस्तांतरण अशा व्यवहारांसाठी रिझर्व्ह बँकेची पूर्वपरवानगी घेणे बंधनकारक करण्यात आले आहे. याशिवाय खातेदारांना त्यांच्या बचत खात्यातून, चालू खात्यातून किंवा अन्य कोणत्याही खात्यातून दहा हजार रूपयांपेक्षा जास्त रक्कम काढता येणार नाही. या नियमामुळे सामान्य खातेदार, व्यापारी, ज्यांची बचत तसंच व्यावसायिक खाती या बँकेत आहेत त्यांची तसेच ठेवीदारांचीही मोठी अडचण होणार आहे.

The post नगर अर्बन मल्टिस्टेट बँकेवर रिझर्व्ह बँकेने लावले निर्बंध appeared first on थोडक्यात घडामोडी.

नवी दिल्ली : एटीएममधून पैसे काढल्यानंतर बर्‍याचदा आपल्याला फाटलेल्या नोटा मिळतात. जर ती नोट बाजारात चालवणे अवघड झाले आणि ती कोणीही घेत नसेल तर ती घेऊन बँकेत जावं लागतं. परंतु बर्‍याच वेळा बँकाही ती नोट स्वीकारण्यास नकार देतात. पण असे झाल्यास आता तुम्हाला काळजी करण्याची गरज नाही. कारण आता आरबीआयने याबाबत लोकांच्या समस्या लक्षात घेऊन या समस्येचे निराकरण करण्याचा एक मार्ग शोधला आहे.

नियमांनुसार, एटीएममधून निघालेली फाटलेली नोट घेऊन आपण थेट बँकेत जाऊ शकता, तिथे बँकेच्या कर्मचार्‍यांना सांगा की ही नोट तुमच्या एटीएममधून निघाली आहे आणि तुम्ही ती बदलून घेऊ शकता. असे करून देखील बँक आपली नोट घेत नसेल तर आपण दुसरी पद्धत देखील अवलंबू शकता.

तुम्हाला एक फॉर्म भरावा लागेल आणि संपूर्ण तपशील द्यावा लागेल

तुम्हाला एटीएममधून फाटलेली नोट मिळाली असेल, तर ग्राहकाला बँकेकडून एक फॉर्म घ्यावा लागेल आणि एक्सचेंजसाठी तो माहिती भरून जमा करावा लागेल. यामध्ये तुम्हाला पैसे काढल्याची वेळ, तारीख व कोणत्या एटीएममधून पैसे काढले, त्याचा तपशील द्यावा लागेल. यासह तुम्हाला पैसे काढल्याची स्लिपही द्यावी लागेल. जर एटीएममधून स्लिप बाहेर पडली नसेल तर आपल्याला आपल्या मोबाइलवर आलेला मेसेज जोडून द्यावा लागेल.

रिझर्व्ह बँकेच्या एक्सचेंज करन्सी नियम 2017 नुसार जर तुम्हाला एटीएममधून फाटलेली नोट मिळाली असेल तर ती नोट बदलून देणे ही बँकेची जबाबदारी आहे. आरबीआयच्या नियमांनुसार, ग्राहकाला कोणतीही बँक एटीएममधून मिळालेली फाटलेली नोट स्वीकारण्यास नकार देऊ शकत नाही. यानंतरही बँकांनी नियमांचे उल्लंघन केल्यास बँकेतील कर्मचार्‍यांवर कारवाई होऊ शकते. त्याबरोबरच बँकेला 10,000 रुपयांपर्यंत दंडही होऊ शकतो.

The post एटीएममधून फाटलेली नोट मिळाल्यास काय करावं? जाणून घ्या… appeared first on थोडक्यात घडामोडी.

मुंबई : रिझर्व्ह बँक ऑफ इंडियाने (RBI) बँक ऑफ इंडिया आणि पंजाब नॅशनल बँकेला दंड ठोठावला आहे. आर्थिक फसवणुकीची प्रकरणांची माहिती देण्याच्या नियमांचे उल्लंघन केल्याप्रकरणी रिझर्व्ह बँकेने ही कारवाई केली आहे. बँक ऑफ इंडियाला चार कोटी आणि पंजाब नॅशनल बँकेला दोन कोटी रुपयांचा दंड ठोठावण्यात आला आहे.

रिझर्व्ह बँकेने जारी केलेल्या निवेदनानुसार, बँक ऑफ इंडियाच्या ३१ मार्च २०१९ च्या आर्थिक स्थितीचा आढावा घेतला असता त्यात काही नियमांचे उल्लंघन झाल्याचे आढळून आले आहे. तसेच १ जानेवारी २०१९ रोजी फसवणूक देखरेख अहवाल (फ्रॉड मॉनिटरिंग रिपोर्ट) सादर केला. मात्र त्यात फसवणुकीच्या घटनांची उशिरा नोंद घेणे, फसवणूकीचा अहवाल देण्यास विलंब, अशा प्रकारच्या अनेक त्रुटी आढळून आल्या आहेत. त्यामुळे रिझर्व्ह बँकेने बँक ऑफ इंडियाला चार कोटी रुपयांचा दंड ठोठावला आहे.

पंजाब नॅशनल बँकेच्या आर्थिक स्थितीचा आढावा घेण्यात आला. ‘पीएनबी’च्या ३१ मार्च २०१८ आणि ३१ मार्च २०१९ अखेरच्या ताळेबंदाची तपासणी केली. त्यात जोखीम व्यवस्थापनातील त्रुटी , फ्रॉडची माहिती देण्यास झालेला उशीर, डेटा अचूकता आणि सुरक्षेची खात्री न करणे यासारख्या कारणांसाठी पीएनबीला दोन कोटी रुपयांचा दंड ठोठावण्यात आला.

दोन्ही बँकांना रिझर्व्ह बँकेकडून कारणे दाखवा नोटीस बजावण्यात आली होती. मात्र त्यांच्याकडून समाधानकारक उत्तरे न मिळाल्याने रिझर्व्ह बँकेने या बँकांवर दंडात्मक कारवाई केली आहे.

The post RBI ने बँक ऑफ इंडिया आणि PNB वर ठोठावला ६ कोटी रुपयांचा दंड appeared first on थोडक्यात घडामोडी.

पुणे : आर्थिक अनियमिततेसह अन्य कारणांवरून पुण्यातील शिवाजीराव भोसले सहकारी बँकेचा परवाना रिझर्व्ह बँकेने (आरबीआय) तत्काळ रद्द केला आहे. बँकेच्या ९८ टक्के ठेवीदारांच्या ठेवी पाच लाखापर्यंतच्या असल्याने त्यांना ठेव विमा महामंडळाकडून त्यांच्या ठेवी परत मिळू शकतील. सहकार विभागाने केलेल्या शिफारसीनुसार ही कारवाई केल्याचं रिझर्व्ह बँकेने स्पष्ट केलं आहे.

शिवाजीराव भोसले सहकारी बँकेकडे पुरेसे भांडवल तसंच उत्पन्नाचे स्रोत नाहीत. कायद्यानुसार बँक विविध निकषांची पूर्तता करू शकत नाही. बँक आपल्या ठेवीदारांना त्यांची संपूर्ण रक्कम परत करण्याच्या स्थितीत नाही. त्यामुळे ठेवीदारांच्या हिताच्या दृष्टीने बँकेला व्यवसाय सुरू ठेवण्याची परवानगी देता येणार नाही, असं आरबीआयने म्हटलं आहे. बँक अवसायनात काढण्याची प्रक्रिया तातडीने सुरू झाली आहे. विमा महामंडळाच्या कक्षेत येणाऱ्या बँकेच्या ९८ टक्के ठेवीदारांना पाच लाख रुपयांपर्यंतची रक्कम परत मिळेल, असंही आरबीआयने म्हटलं आहे.

महाराष्ट्र राज्य सहकारी बँक्स फेडरेशनचे अध्यक्ष विद्याधर अनास्कर म्हटले कि, शिवाजीराव भोसले सहकारी बँकेचा परवाना रद्द करण्याची मागणी मी व सहकार आयुक्त अनिल कवडे यांनी ‘टास्क फोर्स फॉर अर्बन बँक्स’ समितीच्या बैठकीत ‘आरबीय’कडे केली होती. ती मान्य करत समितीने तशी शिफारस केंद्रीय समितीला केली. त्यानुसार ही कारवाई करण्यात आली.  शिवाजीराव भोसले सहकारी बँकेतील ९८ टक्के ठेवीदारांना त्यांची व्याजासह जास्तीत जास्त पाच लाख रुपयांपर्यंत रक्कम परत मिळेल. त्यासाठी त्यांनी ओळखपत्रांसह (केवायसी प्रक्रियेनुसार आवश्यक) आपला दावा अवसायांकडे सादर करावा.

The post मोठी बातमी! आर्थिक अनियमिततेमुळे ‘या’ बँकेचा बँकिंग परवाना रिझर्व्ह बँकेकडून रद्द.. appeared first on थोडक्यात घडामोडी.

नवी दिल्ली : बँकिंग कर्ज घेण्याचं प्रमाण कमी झालं असून कोरोनाची दुसरी लाट त्याला आणखी खाली आणू शकते. ही परिस्थिती सुधारण्यासाठी आरबीआयने प्रयत्न सुरु केले आहेत. त्याबाबत शुक्रवारी केंद्रीय बँकेच्या उच्चस्तरीय संघाने देशाच्या लघु वित्त बँकांशी (SFB) बैठक घेतली. यामध्ये सध्याच्या आव्हानात्मक काळात समाजातील विविध घटकांना कर्ज वितरण करण्याचा विचार केला गेला.

रिझर्व्ह बँक लवकरच अन्य बँकांशीही अशाच प्रकारच्या बैठका घेणार आहे. कारण या वर्षाच्या मार्च महिन्यात बँकिंग कर्जात अवघ्या पाच टक्क्यांनी वाढ झाली आहे. हा डेटा शुक्रवारीच आरबीआयने जाहीर केला आहे. आरबीआयच्या आकडेवारीनुसार, यावर्षी मार्च महिन्यात बँकिंग कर्ज वितरणामध्ये ४.9 टक्क्यांनी वाढ झाली आहे. गेल्या वर्षी मार्चमध्ये ही टक्केवारी 6.8 इतकी होती. या महिन्यात अन्नधान्याचे क्रेडिट 24.4 टक्क्यांवरून 18.3 टक्क्यांपर्यंत खाली आले आहेत आणि सेवा क्षेत्रातील क्रेडिट 7.4 टक्क्यांवरून 1.4 टक्क्यांपर्यंत खाली आले आहे.

या महिन्यात वैयक्तिक कर्जाच्या वाढीचा दर 15 टक्क्यांवरून 14.2 टक्क्यांपर्यंत खाली आला आहे. गृहकर्ज 15.4 टक्क्यांवरून घसरून 9.1 टक्क्यांवर आले आहे. तथापि, कृषी आणि संबंधित क्षेत्रांना दिलेली कर्जे 4.2 टक्क्यांवरून 12.3 टक्क्यांपर्यंत वाढली आहेत. हे लक्षात घेण्यासारखे आहे की गेल्या वर्षी मार्चनंतरच्या महिन्यांत कर्ज वितरणाची गती खूप वेगाने खाली आली होती.

The post कर्ज घेण्याचं प्रमाण झालं कमी, कर्जवितरण वाढवण्यासाठी RBI चे प्रयत्न सुरु appeared first on थोडक्यात घडामोडी.

RBI ने HDFC बँकेवर नवीन डिजिटल सेवा सुरू करण्यास आणि नवीन क्रेडिट कार्ड देण्यास बंदी घातली होती. यानंतर आरबीआयने आणखी एक मोठा निर्णय घेतला आहे. एचडीएफसी बँकेच्या संपूर्ण आयटी इन्फ्रास्ट्रक्चरचं ऑडिट करण्याची जबाबदारी ही बाहेरील व्यावसायिक आयटी फर्मकडे देण्यात आली आहे. बँकिंग नियमन कायदा 1949 च्या कलम 30 (1) B अंतर्गत आरबीआयने हा निर्णय घेतला असल्याची माहिती देण्यात आली आहे.

रिझर्व्ह बँकेने एचडीएफसी बँकेला डिजिटल 2.0 अंतर्गत सर्व डिजिटल बिजनेसची निर्मिती करणारे उपक्रम थांबवण्यासाठी सांगितलं होतं. नवीन क्रेडिट कार्ड देण्यावरही बंदी घालण्यात आली होती. जर बँकेने संबंधित सर्व नियमांचं पालन केलं तरच आरबीआय हे सर्व निर्बंध हटवेल अशीही माहिती देण्यात आली आहे.

खरंतर, एचडीएफसी बँकेत अनेक तांत्रिक अडचणीमुळे ग्राहकांना मोठा त्रास सहन करावा लागत होता. काही दिवसांपासून एचडीएफसी बँकेच्या नेट बँकिंग आणि पेमेंट सिस्टममध्ये मोठ्या अडचणी येत होत्या. याबद्दल ग्राहकांनी वारंवार तक्रारही केली होती. यामुळे आरबीआयने हे पाऊल उचललं आहे. 2 डिसेंबर रोजी आरबीआयकडून हा आदेश देण्यात आला होता. तर हे सगळे निर्बंध उठवण्यासाठा बँकेला नियमांचं काटेकोरपणे पालन करणं महत्त्वाचं आहे.

समोर आलेल्या अहवालानुसार, एचडीएफसी बँकेच्या प्राथमिक डेटा सेंटरमध्ये पॉवर फेल्यूअर झाल्याचं सांगण्यात येत आहे. दरम्यान, या निर्णयामुळे एचडीएफसी बँकेच्या तांत्रिक त्रुटी स्पष्ट होतील आणि त्या दूर करता येतील, असं मत तज्ज्ञांनी व्यक्त केलं आहे. यामुळे ग्राहकांना चांगली सेवा देण्यासाठी बँक अधिक सक्षम होईल.

The post RBI ने घेतला मोठा निर्णय, HDFC बँकेच्या ग्राहकांसाठी महत्वाची बातमी appeared first on थोडक्यात घडामोडी.

रिझर्व्ह बँकेने घेतलेल्या निर्णयानुसार, सोमवार (१४ डिसेंबर २०२०) पासून भारतात २४ तास आरटीजीएस सेवा उपलब्ध होणार आहे. आरटीजीएस २४ तास उपलब्ध होणार असल्यामुळे मोठा फायदा होणार आहे.

भारतात ऑनलाइन व्यवहार वाढत आहेत, त्यामुळे आयएमपीएस, एनईएफटी आणि आरटीजीएस २४ तास करण्याची शिफारस नंदन नीलकेणी यांच्या समितीने रिझर्व्ह बँकेला केली होती. ही शिफारस मान्य करत रिझर्व्ह बँकेने टप्प्याटप्प्याने आयएमपीएस, एनईएफटी आणि आरटीजीएस या सेवा २४ तास उपलब्ध करुन देण्याचा निर्णय घेतला. सर्वात आधी आयएमपीएस २४ तासांसाठी उपलब्ध झाले. पाठोपाठ डिसेंबर २०१९ पासून एनईएफटी सेवा २४ तास उपलब्ध झाली. आता उद्यापासून आरटीजीएस सेवाही २४ तास उपलब्ध होणार आहे. रिझर्व्ह बँकेचे गव्हर्नर शक्तिकांत दास यांनी ही माहिती दिली.

RTGS facility becomes operational 24X7 from 12.30 pm tonight. Congratulations to the teams from RBI, IFTAS and the service partners who made this possible.

— Shaktikanta Das (@DasShaktikanta) December 13, 2020

आपण ऑनलाइन बँकिंग करत असाल तर आयएमपीएस, एनईएफटी, आरटीजीएस या तिन्ही सेवांचा गरजेनुसार कोणत्याही दिवशी आणि कोणत्याही वेळी वापर करू शकाल. एका खात्यातून दुसऱ्या खात्यात ऑनलाइन बँकिंगद्वारे झटपट पैशांचे हस्तांतर होईल. ऑनलाइन बँकिंग करत नसाल अथवा ते शक्य नसेल तर बँकेच्या माध्यामातून आपण एनईएफटी अथवा आरटीजीएस करू शकाल.

आयएमपीएस, एनईएफटी आणि आरटीजीएस कोणत्याही दिवशी आणि कोणत्याही वेळी करता येणार आहे. एनईएफटीमध्ये १ रुपया ते कितीही रकमेचे एका बँक खात्यातून दुसऱ्या बँकेच्या खात्यात हस्तांतर केले जाते. आरटीजीएसमध्ये किमान २ लाख रुपये ते कमाल कितीही रकमेचे एका बँकेच्या खात्यातून दुसऱ्या बँकेच्या खात्यात हस्तांतर केले जाते. तर स्वतःच्या खात्यातून त्याच बँकेच्या दुसऱ्या खात्यात आयएमपीएसद्वारे रकमेचे हस्तांतर करता येते.

The post मोठी बातमी : आरटीजीएस सेवा आता उपलब्ध होणार २४ तास appeared first on थोडक्यात घडामोडी.