हिंगोली : हिंगोली जिल्ह्यात घडलेल्या एका गंभीर घटनेने सार्वजनिक आरोग्य व्यवस्थेवरील विश्वास पुन्हा एकदा डळमळीत झाला आहे. सरकारी रुग्णवाहिका वेळेत उपलब्ध न झाल्याने एका गर्भवती महिलेच्या गर्भातील बाळाचा मृत्यू झाल्याचा आरोप कुटुंबीयांनी केला आहे. या घटनेनंतर परिसरात संतापाची लाट उसळली असून प्रशासनावर निष्काळजीपणाचे आरोप होत आहेत.

ही घटना हिंगोलीतील ज्वाला बाजार परिसरात घडली. संबंधित महिलेला अचानक प्रसूती वेदना सुरू झाल्यानंतर कुटुंबीयांनी तातडीने सरकारी रुग्णवाहिका सेवेशी संपर्क साधला. मात्र, जवळपास दोन तास उलटल्यानंतरही अ‍ॅम्ब्युलन्स घटनास्थळी पोहोचली नाही, असा आरोप नातेवाईकांनी केला आहे.

पीडित कुटुंबाच्या म्हणण्यानुसार, रुग्णवाहिका सेवेकडून “डिझेल उपलब्ध नसल्यामुळे वाहन पाठवता येणार नाही” असे सांगण्यात आले. महिलेची प्रकृती सतत खालावत असल्याने कुटुंबीयांनी अखेर खासगी वाहनाची व्यवस्था केली आणि तिला तातडीने हिंगोली येथील शासकीय वैद्यकीय महाविद्यालयात दाखल केले.

रुग्णालयात डॉक्टरांनी महिलेवर सिझेरियन शस्त्रक्रिया केली. मात्र, उपचार सुरू होईपर्यंत उशीर झाल्याने गर्भातील बाळाचा मृत्यू झाल्याचे समोर आले. या घटनेनंतर कुटुंबीयांनी आरोग्य विभागाच्या निष्काळजी कारभारावर तीव्र नाराजी व्यक्त केली आहे.

महिलेच्या आईने प्रशासनावर संताप व्यक्त करत म्हटले की, “आम्ही आर्थिकदृष्ट्या दुर्बल आहोत. आपत्कालीन परिस्थितीत तातडीने खासगी वाहन मिळवणे आमच्यासाठी कठीण होते. डिझेल नसल्याचे सांगून सरकारी रुग्णवाहिका देण्यास नकार देण्यात आला. जर माझ्या मुलीच्या जीवाला काही झाले असते, तर त्याची जबाबदारी कोणी घेतली असती?”

कुटुंबीयांनी आणखी गंभीर आरोप करत सांगितले की, त्यांनी १०८ आणि १०२ या दोन्ही आपत्कालीन सेवांवर वारंवार संपर्क साधला होता. मात्र, वाहनात इंधन नसल्याचे कारण देत कर्मचाऱ्यांनी पुन्हा फोन करू नका, असे सांगितल्याचा दावा त्यांनी केला. परिसरातील प्राथमिक आरोग्य केंद्राबाहेर १०२ क्रमांकाची रुग्णवाहिका उभी असतानाही ती उपलब्ध करून देण्यात आली नाही, असेही त्यांनी नमूद केले.

दरम्यान, जिल्हा आरोग्य अधिकारी डॉ. कैलाश शेळके यांनी हे आरोप फेटाळून लावले आहेत. त्यांच्या म्हणण्यानुसार, रुग्णवाहिकेत इंधनाची कमतरता नव्हती. संबंधित चालक वैयक्तिक कारणास्तव रजेवर असल्याने अडचण निर्माण झाली. पर्यायी चालकाची वेळेत व्यवस्था करण्यात संबंधित अधिकाऱ्यांकडून दुर्लक्ष झाल्याचा प्राथमिक निष्कर्ष समोर आल्याचे त्यांनी सांगितले.

या प्रकरणाची गंभीर दखल घेत जिल्हाधिकारी राहुल गुप्ता यांनी जिल्हा आरोग्य अधिकाऱ्यांना कारणे दाखवा नोटीस बजावली आहे. तसेच संपूर्ण घटनेची सखोल चौकशी करण्यात येणार असल्याचे प्रशासनाने स्पष्ट केले.

घटनेनंतर विरोधकांनीही सरकारवर जोरदार टीका केली आहे. राष्ट्रवादी काँग्रेस (शरद पवार गट) महिला प्रदेशाध्यक्ष रोहिणी खडसे यांनी सरकारच्या दाव्यांवर प्रश्न उपस्थित करत या मृत्यूसाठी नेमके कोण जबाबदार आहे, असा सवाल केला.

सार्वजनिक आरोग्य मंत्री प्रकाश आबिटकर यांनी नांदेड येथे पत्रकारांशी बोलताना या प्रकरणाची निष्पक्ष चौकशी करण्याचे आश्वासन दिले. “रुग्णवाहिकांसाठी डिझेलची पुरेशी तरतूद करण्यात आली आहे. मात्र, जर कोणत्याही स्तरावर निष्काळजीपणा आढळून आला, तर दोषींवर कठोर कारवाई केली जाईल,” असे त्यांनी स्पष्ट केले.

या घटनेमुळे राज्यातील ग्रामीण आरोग्य सेवा, आपत्कालीन प्रतिसाद व्यवस्था आणि सरकारी रुग्णवाहिका सेवांच्या कार्यक्षमतेबाबत पुन्हा एकदा गंभीर चर्चा सुरू झाली आहे.

The post हिंगोलीत धक्कादायक प्रकार! डिझेलअभावी रुग्णवाहिका न मिळाल्याने गर्भातील बाळाचा दुर्दैवी मृत्यू appeared first on थोडक्यात घडामोडी.

मुंबई : जलसंधारण महामंडळ आणि शासन अंतर्गत प्रकल्पांच्या बाधित शेतकऱ्यांना भूसंपादनाचे पैसे तातडीने देण्याच्या सूचना मृद व जलसंधारण मंत्री संजय राठोड यांनी दिल्या.

मंत्रालयात आयोजित राधानगरी विधानसभा मतदारसंघातील जलसंधारण विभागाच्या विविध प्रलंबित आणि प्रगतीपथावरील कामांचा सविस्तर आढावा घेण्यात आला. यावेळी सार्वजनिक आरोग्य व कुटुंब कल्याण मंत्री प्रकाश आबिटकर, मृद व जलसंधारण विभागाचे सचिव जितेंद्र पापळकर तसेच मंत्रालयातील वरिष्ठ अधिकारी उपस्थित होते.

राधानगरी, भुदरगड आणि आजरा तालुक्यातील शेतकऱ्यांना दिलासा देण्यासाठी प्रशासनाने गतीने कार्यवाही करावी, अशा सूचना मंत्री संजय राठोड यांनी अधिकाऱ्यांना दिल्या.

जलसंधारण कामांमुळे भविष्यात शेतीसाठी पाणी उपलब्धता वाढून परिसरातील शेतकऱ्यांना मोठा फायदा होईल, असे मंत्री आबिटकर यांनी सांगितले.

बैठकीत राधानगरी तालुक्यातील लघु पाटबंधारे तलाव पाल, बनाचीवाडी, साठवण तलाव आपटाळ आणि कुक्कडवाडी या योजनांचा आढावा घेण्यात आला. तसेच भुदरगड तालुक्यातील वासनोली, कारिवडे, चिवाळे, आप्पाचीवाडी, पडखंबे येथील लघु पाटबंधारे तलाव, मठगाव पाझर तलाव आणि पंडिवरे साठवण तलाव यांचाही आढावा घेण्यात आला. आजरा तालुक्यातील पेरनोली आणि देवकांडगाव साठवण तलाव योजनांच्या कामांच्या प्रगतीवरही चर्चा करण्यात आली.

The post शेतकऱ्यांना भूसंपादनाचे पैसे तातडीने द्यावे – मंत्री संजय राठोड appeared first on थोडक्यात घडामोडी.

चंद्रपूर : महाराष्ट्रातील चंद्रपूर जिल्ह्यातील ताडोबा-अंधारी व्याघ्र प्रकल्पाच्या (TATR) बफर झोनमध्ये वाघांच्या हल्ल्यात दोन बांबू तोडणाऱ्या मजुरांचा मृत्यू झाल्याची दुर्दैवी घटना शनिवारी सायंकाळी घडली. या घटनेमुळे परिसरात भीतीचे वातावरण पसरले आहे.

मध्य प्रदेशातील मंडला जिल्ह्यातील शैसावी गावाचे रहिवासी बुधसिंग श्यामलाल मडावी (वय ४१) यांचा चंद्रपूर वन परिक्षेत्रातील कंपार्टमेंट क्रमांक ३८१ मध्ये वाघाच्या हल्ल्यात मृत्यू झाला. तर मध्य प्रदेशातील सारी परिसरातील रहिवासी प्रेमसिंग उदे (वय ५५) यांचा कंपार्टमेंट क्रमांक ३५७ मध्ये वाघाने हल्ला करून जीव घेतला.

या दोन्ही घटनांची माहिती मिळताच वन विभाग आणि पोलिस प्रशासनाने तातडीने घटनास्थळी धाव घेतली. मृतांच्या कुटुंबियांना शासनाकडून प्राथमिक आर्थिक मदत देण्यात आली आहे.

एका वरिष्ठ पोलिस अधिकाऱ्यांनी दिलेल्या माहितीनुसार, परिसरात वाघांच्या वाढलेल्या हालचाली लक्षात घेता सुरक्षेच्या कारणास्तव बफर झोनमधील बांबू तोडण्याचे काम तात्पुरते स्थगित करण्यात आले आहे. तसेच, त्या भागातील इतर कामगार आणि जवळच्या गावातील नागरिकांना सतर्क राहण्याच्या सूचना देण्यात आल्या आहेत.

दरम्यान, वाघांच्या हालचालींवर वन विभागाकडून लक्ष ठेवण्यात येत असून, नागरिकांच्या सुरक्षेसाठी आवश्यक ती खबरदारी घेण्यात येत आहे.

The post चंद्रपूरच्या ताडोबा बफर झोनमध्ये वाघाच्या हल्ल्यात दोन कामगारांचा मृत्यू appeared first on थोडक्यात घडामोडी.

पुणे : वानवडी परिसरात पोलीसांनी गांजा विक्री करणाऱ्या तरुणाला अटक करून मोठा मुद्देमाल जप्त केला आहे. वानवडी भागातील गंगा सॅटेलाईट सोसायटी ते नेताजीनगर रस्ता ह्या भागात वानवडी पोलीस ठाण्याचे कर्मचारी विठ्ठल चोरमोले आणि अमोल गायकवाड गस्त घालत होते. या दरम्यान, त्यांना माहिती मिळाली की तौफिक रझाक शेख (वय २६, रा. नवाजीश चौकाजवळ, मीठानगर, कोंढवा खुर्द) दुचाकीवरून गांजा विक्रीसाठी येत आहे.

माहिती मिळताच पोलिसांनी तत्काळ सापळा रचून आरोपीला पकडले. झडती घेतली असता त्याच्याकडे ८१० ग्रॅम गांजा आढळला. त्याच्याकडून गांजा, दुचाकी आणि मोबाइल असा अंदाजे ८० हजार रुपयांचा मुद्देमाल जप्त करण्यात आला. पोलीसांनी सांगितले की, शेखने गांजा कोणाकडून आणला आणि तो कोणाला विक्री करणार होता, ह्या बाबत तपास सुरू आहे.

पोलीस उपायुक्त डॉ. राजकुमार शिंदे व सहायक आयुक्त धन्यकुमार गोडसे यांच्या मार्गदर्शनाखाली ह्या कारवाईत वरिष्ठ पोलीस निरीक्षक विजयकुमार डोके, सहायक निरीक्षक उमाकांत महाडिक, तसेच पोलीस कर्मचारी दया शेगर, महेश गाढवे, अमोल पिलाणे, अतुल गायकवाड, विठ्ठल चोरमोले, विष्णू सुतार आणि अमोल गायकवाड यांनी महत्त्वाची भूमिका बजावली.

पोलीस पुढील तपास करत आहेत. पोलीसांनी सांगितले की, या प्रकरणात आणखी व्यक्तींचा सहभाग असल्याची शक्यता आहे आणि त्यांनी तपास सुरू ठेवला आहे. ह्या प्रकारामुळे वानवडी परिसरात पोलीस सुरक्षा व प्रतिबंधात्मक उपाययोजनांवर लक्ष केंद्रित करण्यात येत आहे. याशिवाय, गांजा आणि इतर प्रतिबंधित पदार्थांच्या विक्रीवर नियंत्रण ठेवण्यासाठी पोलीस विभाग सतत गस्त घालत असून कारवाई करत आहे.

The post पुणे : गांजा विक्री करणाऱ्या तरुणाला अटक, ८० हजाराचा मुद्देमाल जप्त appeared first on थोडक्यात घडामोडी.

मुंबई : महाराष्ट्र भूषण 2024 पुरस्कार जाहीर करण्यात आला असून, या वर्षीचा प्रतिष्ठित पुरस्कार देशभरात प्रसिद्ध असलेल्या ज्येष्ठ शिल्पकार आणि महाराष्ट्र पुत्र राम सुतार यांना देण्यात येणार आहे. राज्याचे मुख्यमंत्री देवेंद्र फडणवीस यांनी विधानसभेत याबाबत घोषणा केली. महाराष्ट्र भूषण पुरस्कार दरवर्षी राज्य सरकारकडून दिला जातो, आणि यंदाचा पुरस्कार राम सुतार यांच्या कलेच्या अप्रतिम योगदानासाठी त्यांना दिला जात आहे.

राम सुतार हे 100 वर्षांचे असून, त्यांच्या कलेच्या क्षेत्रात त्यांनी अतुलनीय योगदान दिले आहे. मुख्यमंत्री फडणवीस यांनी सभागृहात सांगितले की, राम सुतार आजही शिल्प तयार करत आहेत, हे त्यांच्या कलात्मक कार्याची महानता दर्शवते. यावर्षी, राम सुतार यांच्या 100 व्या वाढदिवसाचे मोठ्या प्रमाणात साजरे करण्यात आले होते, आणि त्यांचे हे दीर्घ व समृद्ध कार्य लक्षात घेऊन त्यांना हा प्रतिष्ठित पुरस्कार प्रदान करण्यात आलेला आहे.

राम सुतार: एक आंतरराष्ट्रीय शिल्पकार
राम सुतार हे भारतातील आंतरराष्ट्रीय ख्यातीचे शिल्पकार आहेत. त्यांचा जन्म 1925 मध्ये महाराष्ट्राच्या धुळे जिल्ह्यातील गोंदूर गावात झाला. त्यांनी आपल्या कारकिर्दीतील अनेक शिल्पकला प्रकल्पांमध्ये भाग घेतला आहे. विशेष म्हणजे, त्यांच्या कलेचा उत्कृष्ट उदाहरण “स्टॅच्यू ऑफ युनिटी” आहे, जे भारतातील सर्वात उंच शिल्प आहे. या शिल्पाचे काम त्यांनीच केले आहे, आणि या प्रकल्पामुळे त्यांची आंतरराष्ट्रीय पातळीवर ओळख निर्माण झाली आहे.

त्यांच्या कारकिर्दीच्या गेल्या 40 वर्षांमध्ये, त्यांनी पन्नासांहून अधिक भव्य शिल्पे तयार केली आहेत. या शिल्पांमध्ये विविध ऐतिहासिक, धार्मिक, आणि सांस्कृतिक व्यक्तिमत्त्वांची मूर्तिकला समाविष्ट आहे. त्यांच्या शिल्पांमध्ये भारतीय कलेचा एक अनोखा मिलाफ आणि सुसंवाद दिसून येतो, जो भारतीय संस्कृतीचा गौरव वाढवतो. मला भारतातील रॉकेट प्रक्षेपण स्थळावर एक मूर्ती बनवायची आहे, असे त्यांनी यापूर्वी म्हटले होते.

शासकीय सन्मान आणि पुरस्कार
राम सुतार यांचे शिल्पकला क्षेत्रातील योगदान अत्यंत मोठे आहे. त्यांना त्यांच्या कलेसाठी 1999 मध्ये पद्मश्री पुरस्कार आणि 2016 मध्ये पद्मभूषण पुरस्कार देऊन सन्मानित करण्यात आले. त्यांचे कार्य केवळ भारतातच नाही, तर जगभरात प्रशंसा मिळवले आहे. त्यांच्या कलेला भारत सरकारने योग्य मान्यता दिली आहे आणि ते अनेक राष्ट्रीय आणि आंतरराष्ट्रीय स्तरावर विविध कला प्रदर्शने आणि कार्यक्रमांमध्ये सहभागी झाले आहेत.

शिक्षण आणि कलेला दिलेले योगदान
राम सुतार यांनी आपले शालेय शिक्षण धुळे जिल्ह्यात घेतले. त्यानंतर, त्यांनी जेजे स्कूल ऑफ आर्ट्स (JJ School of Arts) मध्ये शिल्पकलेचे शिक्षण घेतले. भारतीय पुरातत्त्व सर्वेक्षणासोबत त्यांनी वेरूळ गुंफांमध्ये काम केले, ज्यामुळे त्यांना भारतीय पुरातत्त्व आणि वास्तुकलेबद्दल खोल ज्ञान मिळाले. त्यांच्या कार्याची खासियत म्हणजे त्यांनी कलेला एक आत्मनिर्भर आणि अद्वितीय शैली दिली आहे.

परिवार आणि व्यक्तिगत जीवन
राम सुतार यांनी 1952 मध्ये प्रमिला यांच्याशी विवाह केला. त्यांचा एकुलता एक मुलगा अनिल सुतार हे देखील शिल्पकार आहेत, आणि त्यांनी आपल्या वडिलांसोबत शिल्प डिझाइनिंगमध्ये महत्त्वाची भूमिका निभावली आहे. अनिल सुतार यांचा सहभाग राम सुतार यांच्या कार्यात विशेष महत्त्वाचा आहे.

राम सुतार यांना महाराष्ट्र भूषण 2024 पुरस्कार देणे हे एक ऐतिहासिक आणि गौरवशाली क्षण आहे. त्यांची शिल्पकला आणि त्यांचा जीवनप्रवास हा प्रत्येकासाठी प्रेरणा देणारा आहे. महाराष्ट्र भूषण पुरस्कार त्यांच्या कलेला दिलेली योग्य मान्यता आहे, जी भविष्यातही भारतीय शिल्पकलेला एक नवीन दिशा देईल.

The post ज्येष्ठ शिल्पकार राम सुतार यांना ‘महाराष्ट्र भूषण’ जाहीर appeared first on थोडक्यात घडामोडी.

मुंबई : जालना शहरलगतच्या शासकीय जमिनीवर झालेल्या अतिक्रमणासंदर्भात मा. उच्च न्यायालयात उपलब्ध असलेला पाठक समितीचा अहवाल उपलब्ध करून घेतला जाईल. या अहवालातील वस्तुनिष्ठ माहितीच्या आधारे या प्रकरणाची सखोल चौकशी केली जाईल, असे महसूल मंत्री चंद्रशेखर बावनकुळे यांनी विधानसभेत सांगितले. याबाबत सदस्य अर्जुन खोतकर यांनी लक्षवेधी उपस्थित केली होती.

मंत्री बावनकुळे यांनी सांगितले की, या ठिकाणच्या जमिनींच्या व्यवहारात अनेक गुंतागुंती झाल्याने उच्च न्यायालयाच्या निर्देशांनुसार पाठक समिती स्थापन करण्यात आली होती. समितीने अहवाल मा. न्यायालयात सदर केला आहे. हा अहवाल विभागीय आयुक्तांनी मा. न्यायालयातून उपलब्ध करून घ्यावा.

मंत्री बावनकुळे यांनी सांगितले की, या प्रकरणाची चौकशी पूर्ण होईपर्यंत या ठिकाणी शिल्लक असलेल्या जागेच्या खरेदी-विक्री व्यवहारांवर तात्पुरती स्थगिती घालण्यात आली आहे. तसेच, नवीन लेआउट विकसित करणे आणि नोंदणी प्रक्रियेवरही बंदी घालण्यात आली आहे. मंत्री बावनकुळे यांनी सांगितले, या जमिनींवर उभारलेल्या घरांना सरकार संरक्षण देईल. या प्रकरणात जर कोणी फसवणूक केली असेल, तर त्यांच्यावर कठोर कारवाई केली जाईल. ज्या नागरिकांनी येथे घर विकत घेतले आहे त्यांना कोणताही त्रास होणार नाही. फसवणूक करणाऱ्यांवर महसूल कायदा, पोलिस कायदा आणि अन्य संबंधित कायद्यांनुसार कठोर कारवाई केली जाईल, असेही मंत्री बावनकुळे यांनी सांगितले.

The post जालना शहरालगतच्या शासकीय जमिनीवरीलअतिक्रमणाची सखोल चौकशी करणार – महसूल मंत्री चंद्रशेखर बावनकुळे appeared first on थोडक्यात घडामोडी.

मुंबई : बेकायदेशीर होर्डिंग्जच्या समस्येबद्दल उत्तर देताना, राज्याचे उद्योग मंत्री उदय सामंत यांनी आश्वासन दिले की या समस्येवर उपाययोजना केल्या जातील. राज्य विधानसभेत अलिकडेच झालेल्या प्रश्नोत्तर सत्रात, सामंत यांनी खुलासा केला की बेकायदेशीर होर्डिंग्ज ओळखण्यासाठी वार्षिक सर्वेक्षण केले जाईल आणि उल्लंघन करणाऱ्यांवर कारवाई केली जाईल.

सामंत यांनी विधानसभेत माहिती दिली की विविध महानगरपालिकांतर्गत १,०३,००० हून अधिक बेकायदेशीर होर्डिंग्ज हटवण्यात आल्या आहेत, ज्यामध्ये नगर परिषद क्षेत्रात ५,७०० हून अधिक होर्डिंग्ज लक्ष्यित आहेत. याशिवाय, महानगरपालिकांमधील ४८ आणि नगर परिषद हद्दीतील ११ व्यक्तींविरुद्ध कायदेशीर खटले दाखल करण्यात आले आहेत.

होर्डिंग्जशी संबंधित अपघातांचा मुद्दा गंभीर चिंतेचा विषय आहे. २०१८ मध्ये, पुणे रेल्वे स्थानकाजवळ होर्डिंग्ज कोसळून चार जणांचा मृत्यू झाला आणि एप्रिल २०२३ मध्ये, पिंपरी चिंचवडच्या किवळे परिसरात आणखी एक होर्डिंग कोसळून पाच जणांचा मृत्यू झाला. गेल्या मे महिन्यात मुंबईच्या घाटकोपर उपनगरातही अशीच एक दुर्घटना घडली होती, ज्यामध्ये १७ जणांचा मृत्यू झाला होता. या घटनांमुळे राज्य सरकारने कठोर नियमांसह नवीन होर्डिंग धोरण आणण्याचे आश्वासन दिले.

तथापि, सरकारच्या आश्वासनांना न जुमानता, राज्यभर बेकायदेशीर होर्डिंग्ज अजूनही लावले जात आहेत. पुण्यातील राष्ट्रवादी काँग्रेसचे आमदार चेतन तुपे यांनी अधोरेखित केले की बहुतेकदा रस्ते रुंदीकरणासाठी राखीव असलेल्या जागांवर होर्डिंग्ज लावले जातात, नागरी कामांना अडथळा निर्माण करतात आणि कधीकधी फूटपाथवरही कब्जा केला जातो.

उदय सामंत यांनी विधानसभेत आश्वासन दिले की चालू अधिवेशनानंतर लगेचच कारवाई केली जाईल. त्यांनी असेही नमूद केले की एक नवीन होर्डिंग धोरण आणले जाईल, ज्यामध्ये सुरक्षितता सुनिश्चित करण्यासाठी नियमित स्ट्रक्चरल ऑडिटचा समावेश असेल.

The post बेकायदेशीर होर्डिंग्जवर कडक कारवाई करणार, उद्योग मंत्री उदय सामंत यांचे आश्वासन appeared first on थोडक्यात घडामोडी.

मुंबई : राष्ट्रीय स्वयंसेवक संघाचे माजी सरकार्यवाह भय्याजी जोशी यांनी मुंबईत राहणाऱ्या प्रत्येकाला मराठी येणं गरजेचं नाही असं विधान केल्यानंतर महाराष्ट्रात राजकीय वाद निर्माण झाला आहे. जोशींच्या या विधानावर महाराष्ट्र नवनिर्माण सेनेचे अध्यक्ष राज ठाकरे यांनी तीव्र प्रतिक्रिया व्यक्त केली असून, भैय्याजी जोशींनी असंच विधान बेंगळुरू किंवा चेन्नईत करून दाखवावं असं जाहीर आव्हानचं त्यांनी दिलं आहे.

राज ठाकरेंनी काय म्हटलं आहे?
“राष्ट्रीय स्वयंसेवक संघाचे माजी सरकार्यवाह भय्याजी जोशी यांनी मुंबईत राहणाऱ्या प्रत्येकाला मराठी येणं गरजेचं नाही, असं विधान केल्याच ऐकलं. देशाची झालेली भाषावार प्रांत रचना, त्यात मुंबईसह संयुक्त महाराष्ट्र व्हावा म्हणून 106 हुतात्म्यांनी दिलेलं बलिदान या सगळ्याबद्दल भैय्याजी जोशींना माहीत नसेल असं अजिबात नाही. पण कायम महाराष्ट्राबद्दलच किंवा मराठीबद्दलची अशी विधाने करायची याचं कारण काय? ”

राज ठाकरेंनी भारतीय जनता पक्षावरही प्रश्न उपस्थित केले आहेत. ते म्हणाले, “जर संघाच्या किंवा इतर कोणत्याही जबाबदार व्यक्तीने इतर राज्यात असं विधान केलं असतं, तर त्या राज्यातील सर्व पक्षांनी निषेध नोंदवला असता. भारतीय जनता पक्ष महाराष्ट्राच्या अस्मितेला प्राधान्य देऊन निषेध नोंदवणार का?”

सध्या MMR रिजन मधे चाललेला विकास आणि त्यामागील राजकीय हेतू हे जोशींच्या वक्तव्यातून सुरुवात होताना दिसत आहे. हे काय चाललय हे न समजण्याइतकी मराठी जनता दुधखुळी नाही हे जोशींनी लक्षात घ्यावं ! हे राजकारण करताना आपण स्वतः मराठी आहोत याचं भान पण जोशींनी सोडावं?”

आत्ताच कोल्डप्ले नावाचा वाद्यवृंद मुंबईत येऊन गेला , त्याचे मुख्य गायक ख्रिस मार्टिन हे देखील इथे येउन मराठीत बोलून गेले . त्या ब्रिटिश माणसालाही मुंबईत कोणती भाषा चालते आणि ही मुंबई कोणाची आहे हे समजते तर मग जोशी बुवांना हे समजू नये ? या असल्या काड्या घालून (अर्थात राजकीय हेतू असल्या शिवाय हे होणे नाही ) नवा संघर्ष आपण उदयाला आणत आहात हे जरूर ध्यानात ठेवावे ! बाकी सविस्तर 30 तारखेला गुढीपाडव्याला बोलूच.

महाराष्ट्र नवनिर्माण सेना या विधानाचा निषेध नोंदवत आहे आणि मराठी माणूस हे वाक्य विसरणार नाही हे जोशीबुवांनी लक्षात ठेवावं असंही त्यांनी स्पष्ट केलं आहे.

भय्याजी जोशींनी दिलेल्या विधानावर राज ठाकरेंनी तीव्र शब्दांत प्रतिक्रिया व्यक्त केली आहे. जोशींनी मुंबईत राहणाऱ्यांसाठी मराठी भाषा अनिवार्य नसल्याचं म्हटल्याने महाराष्ट्रात राजकीय ताप निर्माण झाला आहे. राज ठाकरेंनी जोशींच्या विधानावर प्रश्नचिन्ह उपस्थित करत, त्यांच्यावर गंभीर आरोप केले आहेत, आणि भविष्यात या मुद्द्यावर अधिक चर्चा होईल, असा इशारा दिला आहे.

The post राज ठाकरे गरजले, भैय्याजी जोशींनी असंच विधान बेंगळुरू किंवा चेन्नईत करून दाखवावं… appeared first on थोडक्यात घडामोडी.

जळगाव: एक धक्कादायक घटना समोर आली आहे. केंद्रीय मंत्री रक्षा खडसे यांच्या मुलीची छेडछाड केली गेली आहे. छेडछाड झाल्यानंतर रक्षा खडसे थेट पोलिस ठाण्यात पोहोचल्या आहेत. काही टवाळखोर मुलांनी तिच्या मनाविरोधात फोटो काढले. छेडछाड करणाऱ्या चार मुलांच्या विरोधात पोलिसांनी गुन्हा दाखल केला आहे. रक्षा खडसे यांच्या मुलीसोबतच इतर मुलींची देखील छेडछाड केली असल्याचे रक्षा खडसे यांनी म्हटले आहे. ज्यांनी छेडछाड केली, त्या मुलावर आधीच चार गुन्हे दाखल आहेत.

या घटनेबद्दल बोलताना एकनाथ खडसे म्हणाले, “मुक्ताईनगर येथील यात्रेतील हा प्रकार अत्यंत निंदनीय आहे. हे टवाळखोर नसून ते गुंड आहेत. त्यांच्या विरोधात आधीही काही गुन्हे दाखल आहेत. त्या मुली ज्यावेळी यात्रेत हजर होत्या, त्यावेळी पोलिस देखील तिथे हजर होते. पोलिसांनी त्या गुंडांना अडवण्याचा प्रयत्न केला, परंतु त्या गुंडांनी पोलिसांनाही मारहाण केली. पोलिसांना शिवीगाळ केली. पोलिसांनी या गुंडांवर 353 चा गुन्हा दाखल केला आहे. हा एक प्रश्न माझ्या घरामध्ये घडलेला नाही, हा एक सामाजिक प्रश्न आहे. महाराष्ट्रात अशा अनेक घटना घडत आहेत. अनेक घटनांची नोंद होत नाही, किंवा महिला त्या ठिकाणी तक्रार करण्यासाठी पुढे येत नाहीत. तक्रार न झाल्यामुळे अशा घटना उघडकीस येत नाहीत. या घटनेत रक्षा खडसे यांची मुलगी स्वतः तक्रार करण्यासाठी पुढे आली, हे फार मोठे आहे. अन्यथा, बहुतेक मुली तक्रार करण्यासाठी पुढे येत नाहीत,” अशी प्रतिक्रिया राष्ट्रवादीचे ज्येष्ठ नेते आमदार एकनाथ खडसे यांनी दिली.

मुक्ताईनगर मतदारसंघात गेल्या चार-पाच वर्षांत जी गुंडगिरी वाढली आहे, त्या बाबत मी अनेक वेळा विधान परिषदेत आवाज उठवला, परंतु याकडे लक्ष दिले गेले नाही, अशी प्रतिक्रिया एकनाथ खडसे यांनी दिली.

The post केंद्रीय मंत्री रक्षा खडसे यांच्या मुलीची छेडछाड, एकनाथ खडसे स्पष्टच बोलले appeared first on थोडक्यात घडामोडी.

बीड : बीड जिल्ह्यातील मस्साजोग येथील सरपंच संतोष देशमुख हत्याप्रकरणी ‘सीआयडी’ने बीडच्या विशेष मकोका न्यायालयात आरोपपत्र दाखल केले. यामध्ये देशमुख यांच्या हत्येचा वाल्मीक कराडच सूत्रधार होता व अवादा कंपनीला खंडणी मागितल्याच्या प्रकरणातून देशमुख यांचा खून झाल्याचे तपासात उघड झाल्याचे म्हटले आहे. संतोष देशमुख यांची नऊ डिसेंबर रोजी हत्या करण्यात आली होती. या प्रकरणाचा ‘सीआयडी’द्वारे तपास करण्यात आला. ‘सीआयडी’ने तपास पूर्ण करून, बीडच्या विशेष मकोका न्यायालयात गुरुवारी आरोपपत्र दाखल केले होते. या आरोपपत्रात अनेक धक्कादायक खुलासे समोर आले आहेत.

बीडचे सरपंच संतोष देशमुख यांच्या हत्येमध्ये मंत्री धनंजय मुंडे यांचे जवळचे सहकारी वाल्मिक कराड यांच्या भूमिकेचे पुरावे चार्जशीटमध्ये दिले आहेत आणि इतर सात आरोपींनी ही हत्या कशी घडवली याचे तपशीलवार वर्णन केले आहे. राज्य गुन्हे अन्वेषण विभागाच्या (सीआयडी) विशेष तपास पथकाने (एसआयटी) बीड येथील विशेष महाराष्ट्र संघटित गुन्हेगारी नियंत्रण कायदा (मकोका) न्यायालयात सादर केलेल्या १४०० पानांच्या आरोपपत्रात तपशीलवार वर्णन करण्यात आले आहे. आरोपपत्रानुसार कराडला आरोपी क्रमांक एक म्हणून दाखवण्यात आले आहे तर दुसरा आरोपी सुदर्शन घुले यांना टोळीचा प्रमुख म्हणून संबोधण्यात आले आहे. आरोपपत्रात प्रत्येक आरोपीने बजावलेल्या भूमिकांचे वर्णन केले आहे आणि कराड आणि आरोपी विष्णू चाटे यांनी केलेल्या खंडणीच्या प्रयत्नावर प्रकाश टाकला आहे, जो थेट हत्येशी संबंधित आहे.

बीड पोलिसांनी अत्याचार, खंडणी आणि खून असे तीन गुन्हे दाखल केले होते, परंतु सीआयडी-एसआयटीने अंतिम आरोपपत्रात हे सर्व प्रकरण एकत्रित केले आहेत. अधिकाऱ्यांनी १८० साक्षीदारांची तपासणी केली. कराडने केलेल्या २ कोटी रुपयांच्या खंडणी मागणीशी संबंधित सीसीटीव्ही फुटेज आणि कराड आणि इतर आरोपींनी अवदा कंपनीच्या अधिकाऱ्यांसमोर पैशाची मागणी केली होती या दाव्याला समर्थन देण्यासाठी तपासकर्त्यांनी गोळा केलेले आवाजाचे नमुने या आरोपपत्रात आहेत. एसआयटी प्रमुख बसवराज तेली यांनी आरोपपत्रासोबत पुरावा म्हणून फॉरेन्सिक प्रयोगशाळेने तपासलेले आणि प्रमाणित केलेले डिजिटल पुरावे सादर केले आहेत.

विष्णू चाटेला आरोपी म्हणून सूचीबद्ध केले आहे, ज्यामध्ये कराडने २९ नोव्हेंबर २०२४ रोजी अवदा पवन ऊर्जा अधिकाऱ्याला त्यांच्या नंबरवरून खंडणीची मागणी करणारा मोबाइल कॉल केला होता. “ते काम थांबवा. ते ताबडतोब करा, अन्यथा गंभीर परिणाम होतील. जर तुम्ही पुन्हा काम सुरू केले तर लक्षात ठेवा,” असे मोबाइल कॉल रेकॉर्डमध्ये म्हटले आहे. नंतर, २ कोटी रुपयांची मागणी करण्यात आली. सीआयडी-एसआयटीने आरोपपत्रात मेमरी कार्डच्या स्वरूपात सर्व आरोपींचे आवाजाचे नमुने सूचीबद्ध केले आहेत. तथापि, तपास यंत्रणेने चाटेचा फोन नष्ट केल्याचे मान्य केले आहे. तथापि, देशमुखवर हल्ला होत असताना सुदर्शन घुले हसताना दिसत आहे आणि त्याचा व्हिडिओ पुरावा म्हणून सादर करण्यात आला आहे.

कराडला अटक केल्यानंतर, तपासकर्त्यांनी हलक्या निळ्या रंगाचा आयफोन आणि दोन सोनेरी रंगाचे मोबाईल हँडसेट जप्त केले आहेत. इतर आरोपींशी त्याचे संभाषण आणि आवाजाचे नमुने सादर केले आहेत. देशमुखच्या हत्येसाठी वापरलेली शस्त्रे, आरोपींनी वापरलेले काळे वाहन, रक्ताने माखलेले पाईप, गाडीत सापडलेले टी-शर्ट, गुगल, एटीएम कार्ड, आरटीओ कार्ड आणि आरोपींकडून जप्त केलेल्या इतर वस्तूंचा आरोपपत्रात उल्लेख आहे.

कराड हा हत्येच्या कटाचा सूत्रधार आहे. सुदर्शन आणि त्याचा साथीदार गेल्या दहा वर्षांपासून धाराशिवमधील केज, अंबाजोगाई आणि कळंब येथे संघटित गुन्ह्यांमध्ये सहभागी आहेत आणि ११ गुन्हेगारी प्रकरणांमध्ये सहभागी होते, असे आरोपपत्रात म्हटले आहे. त्यात असेही म्हटले आहे की ८ ऑक्टोबर २०२४ रोजी भूसंपादन अधिकारी शिवाजी थोपटे यांनी कराडची त्याच्या परळी कार्यालयात भेट घेतली. त्यावेळी चाटे उपस्थित होता. कराडने थोपटे यांना धमकी दिली की, “जर तुम्हाला या क्षेत्रात कंपनी चालवायची असेल तर २ कोटी रुपये द्या अन्यथा अवादा पवन ऊर्जा संपूर्ण जिल्ह्यात काम करू दिली जाणार नाही”. या धमकीत भर घालत, २९ नोव्हेंबर रोजी सुदर्शन घुलेने अवादा कंपनीला धमकी दिली की, त्यांनी “वाल्मिक अण्णा” ची मागणी पूर्ण करावी अन्यथा प्लांट बंद करावा आणि अधिकाऱ्याला कराडला भेटण्यास सांगितले.

२९ नोव्हेंबर रोजी दुपारी कराड, चाटे, सुदर्शन, प्रतीक घुले, सुधीर सांगळे आणि कृष्णा आंधळे यांनी केत येथील चाटेच्या कार्यालयात भेट घेतली आणि अवादा पवन ऊर्जा कंपनीकडून खंडणीची रक्कम वसूल करण्याचा कट रचला. ६ डिसेंबर २०२४ रोजी सुदर्शन, प्रतीक आणि सांगळे यांनी अवादा पवन ऊर्जा कंपनीच्या कारखान्यात घुसून सुरक्षा रक्षकावर शारीरिक हल्ला केला आणि जातीवाचक शिवीगाळ केली, असे त्यात म्हटले आहे. २ कोटी रुपये न दिल्याबद्दल धमकी दिल्यानंतर थोपटे यांना मारहाण करण्यात आली. कंपनीच्या अधिकाऱ्यांनी सरपंच संतोष देशमुख यांना फोनवरून घटनेची माहिती दिली. घुले आणि त्यांच्या सहकाऱ्यांना विनंती केली की, “कृपया कंपनी बंद करू नका. लोकांना रोजगार मिळू द्या.” त्यावेळी चाटेने देशमुख यांना जीवे मारण्याची धमकी दिली आणि म्हटले की, ते त्यांच्या आणि कंपनीच्या मध्ये येत आहेत.

७ डिसेंबर रोजी सुदर्शन घुलेने कराडला फोन केला, ज्यात नंतर म्हणाले, “जर लोक मध्ये आले तर कोणतीही कंपनी आम्हाला पैसे देणार नाही. जो कोणी मध्ये येईल त्याला खाली खेचले पाहिजे”. नंतर, देशमुख यांची निर्घृण हत्या करण्यात आली, असे आरोपपत्रात म्हटले आहे.

गेल्या वर्षी ९ डिसेंबर रोजी बीडमधील मस्साजोग गावचे सरपंच देशमुख यांच्या हत्येमुळे राज्यात राजकीय वादळ निर्माण झाले आहे कारण राष्ट्रवादी काँग्रेस पक्षाचे (एनसीपी) मंत्री धनंजय मुंडे यांचे जवळचे सहकारी कराडला संबंधित खंडणी प्रकरणात अटक करण्यात आली आहे.

The post वाल्मीक कराडनेच सरपंच संतोष देशमुख यांच्या हत्येचे आदेश दिले, ‘सीआयडी’ने आरोपपत्रात केले अनेक धक्कादायक खुलासे appeared first on थोडक्यात घडामोडी.