मुंबई : एन्काउंटर स्पेशालिस्ट माजी पोलीस अधिकारी प्रदीप शर्मा यांना राष्ट्रीय तपास यंत्रणेने (NIA) अटक केली आहे. एनआयएनं आज पहाटे शर्मा यांच्या घरावर धाड टाकली होती. त्यांची एनआयएच्या अधिकाऱ्यांकडून चौकशी सुरु होती. चौकशी पूर्ण झाल्यानंतर प्रदीप शर्मा यांना एनआयएकडून अटक करण्यात आले आहे.

आज प्रदीप शर्मा यांच्या अंधेरीतल्या निवासस्थानी पहाटे एनआयएच्या टीमने धाड टाकली होती. सकाळी सहा वाजल्यापासून अकरा वाजेपर्यंत एनआयएने प्रदीप शर्मा यांच्या घराची झाडाझडती केली. त्यानंतर आज दुपारी शर्मा यांना अटक करण्यात आली आहे. सात तासांच्या चौकशीनंतर अँटिलिया स्फोटके आणि मनसुख हिरेन हत्या प्रकरणात सहभाग आणि पुरावे नष्ट केल्याचा आरोपांखाली प्रदीप शर्मा यांना अटक करण्यात आली. त्यांना कोर्टात हजर करुन एनआयए कोठडीची मागणी करणार आहे. त्याआधी त्यांची वैद्यकीय चाचणी केली जाईल.

दरम्यान, उद्योगपती मुकेश अंबानी यांच्या दक्षिण मुंबईतील अँटिलिया निवास्थानाजवळ सुमारे अडीच किलो जिलेटीन ठेवलेली स्कॉर्पिओ कार सापडली होती. स्कॉर्पिओचे मालक असलेल्या मनसुख हिरेन यांच्या हत्याप्रकरणाचा तपासही एनआयएकडे आहे. प्रदीप शर्मा या दोन्ही प्रकरणात वाझे यांच्या संपर्कात होते.

The post एन्काउंटर स्पेशालिस्ट प्रदीप शर्मा यांना NIA कडून अटक appeared first on थोडक्यात घडामोडी.

अँटिलीया प्रकरणात मनसुख हिरेनच्या हत्येचा तपास आता एटीएस कडून NIA कडे सोपवण्यात आला आहे. NIA ची टीम रात्री उशीरा रेतीबंदर खाडीत त्या ठिकाणी गेली जिथे 5 मार्चला मनसुख हिरेनचा मृतदेह सापडला होता. मनसुख यांची हत्या रात्री झाली होती, त्यामुळे NIA पथक सचिन वाझे यांच्यासमवेत रात्री तेथे पोहोचले आणि त्यांनी गुन्हा घडला त्या दिवशीच्या संपूर्ण घटनेचे नाट्यरूपांतरण केले.

एनआयएच्या सूत्रांनी दिलेल्या माहितीनुसार, अँटिलीया प्रकरण अंडरवर्ल्ड डॉन दाऊद इब्राहिमशी जोडण्याचा सचिन वाझे यांचा प्लॅन होता. त्यांना तपास करणाऱ्या अधिकाऱ्यांची दिशाभूल करायची होती. त्याने दुबईत राहणाऱ्या दाऊद इब्राहिमच्या टोळीशी संबंधित एका व्यक्तीला बनावट टेलीग्राम बनवून धमकी देणारा संदेश पाठविण्यास सांगितले होते. जिलेटिनच्या कांड्या असलेली स्कॉर्पिओ मिळाल्यानंतर 12 दिवसांपर्यंत या प्रकरणाचा तपास वाझेच करत होते.

मात्र, या प्रकरणातील धमकीचे पत्र दिल्लीच्या तिहाड कारागृहातून पाठविले होते. यासाठी जैश-ए-हिंद नावाचे बनावट टेलीग्राम खाते तयार केले गेले. याचा तपास करण्यासाठी मुंबईचे माजी पोलिस आयुक्त परमबीर सिंग यांनी एका खासगी सायबर फर्मची मदत नोंदविली, परंतु हे सर्व कोठेही रेकॉर्डमध्ये समाविष्ट केले नाही. हा संदेश महत्वाचा असूनही मुंबई पोलिस तिहार कारागृहात का गेले नाहीत, याची चौकशी आता एनआयए करत आहे.

एनआयएच्या सूत्रांनी दिलेल्या माहितीनुसार, मोबाइल टॉवर आणि आयपी मूल्यांकनाच्या आधारे असे आढळून आले आहे की, मनसुखच्या हत्येच्या वेळी वाझे तिथेच उपस्थित होता. नंतर, त्याने मुंबई पोलिस मुख्यालयातील सीआययू कार्यालयात जाऊन आपला मोबाइल चार्जिंगवर ठेवला, जेणेकरुन लोकेशन तिथे दाखवेल. तसेच वाझेने सांगितले कि 4 मार्च रोजी तो दिवसभर आयुक्त कार्यालयात होता, परंतु, 4 मार्चला दुपारी 12:48 वाजता त्याचे मोबाईल लोकेशन चेंबूरच्या एमएमआरडीए कॉलनीतले होते.

एटीएसने अटक केलेले नरेश गोरे आणि माजी कॉन्स्टेबल विनायक शिंदे यांना एनआयएकडे सुपूर्द करण्यात आले आहे, त्यानंतर केंद्रीय अन्वेषण एजन्सी सचिन वाझे आणि या दोन्ही आरोपींना समोरासमोर बसवून चौकशी करू शकते. मनसुखची हत्या झालेली कार एनआयएच्या ताब्यात आहे.

The post NIA च्या टीमने केले मनसुख हिरेन यांच्या हत्येच्या घटनेचे नाट्यरूपांतरण appeared first on थोडक्यात घडामोडी.

मुंबई : गृह मंत्रालयाने मनसुख हिरेन मृत्यू प्रकरणाचा तपास एनआयएकडे सोपवला आहे. केंद्रीय गृह मंत्रालयाकडून याबाबत अधिकृत आदेश जारी करण्यात आले आहेत. या प्रकरणाचा तपास यापूर्वी महाराष्ट्र दहशतवादविरोधी पथक (एटीएस) करत होतं. मनसुख हिरेन यांचा मृतदेह 5 मार्चला सापडला होता. मनसुख हिरेन यांची हत्या झाल्याचा दावा त्यांच्या कुटुंबीयांनी केला होता.

मनसुख हिरेन यांच्या मृत्यूचे गूढ अद्यापही कायम आहे. एनआयए आतापर्यंत केवळ उद्योगपती मुकेश अंबानी यांच्या घराबाहेर सापडलेल्या स्फोटकांच्या प्रकरणाचा तपास करत होती. तर ATS मनसुख हिरेन मृत्यू प्रकरण आणि स्कॉर्पिओ गाडी प्रकरणाचा तपास करत होते. मात्र आता केंद्रीय गृह मंत्रालयाच्या आदेशानंतर तिन्ही केसचा तपास एनआयए करणार आहे.

The post मोठी बातमी : मनसुख हिरेन मृत्यू प्रकरणाचा तपास आता NIA करणार appeared first on थोडक्यात घडामोडी.

ठाणे : मनसुख हिरेन यांचा मृतदेह मुंब्रा रेतीबंदर परिसरात ज्या ठिकाणी आढळला होता, त्याच ठिकाणी आणखी एक मृतदेह आढळल्यामुळे खळबळ उडाली आहे. सकाळी ११ वाजण्याच्या सुमारास मुंब्य्रातील खाडी किनारी भागात हा मृतदेह सापडला. मुंब्रा पोलीस घटनास्थळी दाखल झाले आहेत.

मृतदेहाची ओळख पटलेली असून शेख सलीम अब्दुल असं मृत व्यक्तीचं नाव आहे. ४८ वर्षीय शेख अब्दुल सलीम मजूर असून मुंब्रा, रेतींबदर येथे वास्तव्यास होते. घटनेची माहिती मिळताच मुंब्रा पोलीस अधिकारी, प्रादेशिक आपत्ती व्यवस्थापन कक्ष आणि अग्निशमन दल घटनास्थळी दाखल झाले होते. संबंधित व्यक्तीने आत्महत्या केली की ही हत्या आहे, घातपात की अपघात आहे, याचा तपास पोलीस करत आहेत. मात्र, ही व्यक्ती शौचास गेली असावी आणि पाय घसरून खाडीत पडली असावी, असा अंदाज पोलिसांनी वर्तवला आहे.

The post मनसुख हिरेन यांचा मृतदेह ज्या ठिकाणी आढळला तिथेच आढळला आणखी एक मृतदेह appeared first on थोडक्यात घडामोडी.

मनसुख हिरेन यांच्या मृत्यू प्रकरणात झालेल्या आरोपांनंतर पोलीस अधिकारी सचिन वाझे यांची बदली होणार आहे. राज्याचे गृहमंत्री अनिल देशमुख यांनी विधानपरिषदेत ही घोषणा केली आहे. त्यांनी सचिन वाझे यांची क्राइम ब्रांचमधून बदली करुन इतर ठिकाणी नियुक्ती करण्यात येणार असल्याची माहिती दिली.

मात्र, अनिल देशमुख यांनी सचिन वाझेंची बदली होणार असल्याची घोषणा केल्यानंतरही विरोधकांचा गदारोळ कायम होता. यावर आम्ही समाधानी नाही. सचिन वाझे यांची बदली नाही तर त्यांचं निलंबन केलं पाहिजे, जोपर्यंत सचिन वाझेंचं निलंबन होत नाही तोवर अधिवेशन चालू देणार नाही, असं दरेकर यांनी म्हटलं. ठाकरे सरकार गुन्हेगारांना पाठिशी घालणारं सरकार आहे. या सरकारची प्रतीमा मलीन झाली आहे. सचिन वाझेंना तात्काळ अटक झाली आहे. त्यांचं निलंबन करुन त्यांची चौकशी झाली पाहिजे. सचिन वाझेंना वाचवण्याचा प्रयत्न सरकारकडून केला जात आहे, असा आरोप प्रविण दरेकर यांनी यावेळी केला.

“मनसुख हिरेन प्रकरणात ज्या गोष्टी उपलब्ध आहेत त्या नष्ट करण्यासाठी सरकार संधी देत आहे. राज्यातील जनतेचा सरकावर विश्वास राहिलेला नाही. पुरावे नष्ट करण्यासाठी वेळ दिला जात आहे असा आरोप करताना सचिन वाझेंना अटक करण्याची मागणी प्रवीण दरेकर यांनी केली.

The post क्राईम ब्रान्चमधून सचिन वाझे यांची बदली, विरोधकांनी केली अटक करण्याची मागणी appeared first on थोडक्यात घडामोडी.

मुंबई : मनसुख हिरेन यांच्या मृत्यूप्रकरणावरून आज विधानसभेत मोठा गदारोळ झाला. विरोधी पक्ष नेते देवेंद्र फडणवीस यांनी मनसुख हिरेन यांच्या मृत्यूप्रकरणात क्राइम ब्रांचचे पोलीस अधिकारी सचिन वाझे यांच्यावर गंभीर आरोप केले. तसंच सचिन वाझेंना अटक करण्याची मागणीही त्यांनी केली आहे. यावेळी देवेंद्र फडणवीस यांनी सभागृहात मनसुख हिरेन यांच्या पत्नी विमला हिरेन यांचा तक्रारीचा अर्ज देखील वाचून दाखवला.

देवेंद्र फडणवीस यांनी विधानसभेत काही प्रश्न उपस्थित केले आहेत. ते म्हणाले कि, “२०१७ चा एफआयआर आहे. यानुसार दोन लोकांनी ४० लाखांची खंडणी मागितल्याचा आरोप आहे. यामध्ये दोन लोकांनी अटकपूर्व जामीन घेतला. यातील एकाचं नाव आहे धनंजय विठ्ठल गावडे आणि दुसरा सचिन हिंदुराव वझे. मनसुख हिरेन यांचं शेवटचं लोकेशन धनंजय विठ्ठल गावडे याच्याकडे आहे. तिथे जाण्याचे कारण काय? काहीच नाही. गावडेच्या ठिकाणापासून ४० किमीवर हिरेन यांची बॉडी सापडली. त्यामुळे हे स्पष्ट आहे. यापेक्षा अधिक पुरावे काय हवेत? इतके पुरावे असताना अटक का होत नाही. त्यामुळं माझी मागणी आहे की तात्काळ सचिन वाझेंना अटक झाली पाहिजे.”

देवेंद्र फडणवीस यांनी पुढे म्हटलं कि, “आम्हाला संशय आहे की मनसुख हिरेन यांची हत्या गाडीतच करण्यात आली आहे. त्यानंतर त्यांचा मृतदेह मुंब्रा येथील खाडीत फेकून देण्यात आला. खाडीत भरतीची वेळ असल्यानं मनसुख हिरन यांचा मृतदेह किनाऱ्यावर येणार नाही, असं मारेकऱ्यांना वाटलं. आणि तिथेच त्यांची चूक झाली. त्यांच्या दुर्दैवानं आणि कायद्याच्या सुदैवानं खाडीत भरती न आल्यानं मृतदेह किनाऱ्यावर आला आणि हे सगळं प्रकरण उघडकीस आलं.”

विमला हिरेन यांचा जबाब :

विमला हिरेन यांनी जबाबात म्हटलं आहे कि, “२६ फेब्रुवारी २०२१ रोजी सकाळी माझे पती चौकशीसाठी सचिन वाझे यांच्यासोबत गुन्हे शाखेत गेले. त्यानंतर ते १०. ३० वाजता आले. दिवसभर सचिन वाझेंसोबत होतो. असं त्यांनी मला सांगितलं. २७ फेब्रुवारीला सकाळी माझे पती पुन्हा मुंबई गुन्हे शाखेत गेले आणि रात्री १०.३० वाजता आले. त्यानंतर २८ फेब्रुवारीला पुन्हा सचिन वाझेंसोबत गेले आणि जबाब नोंदवला. जबाबाची प्रत घरी आणून ठेवली. त्यावर सचिन वाझे यांचे नाव व स्वाक्षरीदेखील आहे.’ ३ मार्च रोजी माझे पती दुकान बंद करुन घरी आले, घरी आल्यानंतर त्यांनी मला सांगितलं की सचिन वाझेंनी मला सांगितलं की तु या प्रकरणात अटक हो. मी तुला दोन दिवसांत जामिनावर सोडवतो. संपूर्ण परिस्थिती पाहता माझ्या पतीचा खून झाला असावा अशी खात्री आहे. सदरचा खून सचिन वाझे यांनी केला असावा असा माझा संशय आहे, त्यामुळे सखोल चौकशी करुन कायदेशीर कारवाई कऱण्याची विनंती आहे.”

The post विधानसभेत देवेंद्र फडणवीस यांचे सचिन वाझे यांच्यावर गंभीर आरोप, उपस्थित केले ‘हे’ प्रश्न appeared first on थोडक्यात घडामोडी.

मुंबई : मुकेश अंबानी यांच्या घराच्या अँटिलीयाच्या बाहेर संशयास्पद स्कॉर्पिओ कार सापडली होती. ती कार मनसुख हिरेन यांची असल्याचं पोलीस तपासात समोर आलं होतं. मात्र, आता मनसुख हिरेन यांच्या मृत्यूने हे प्रकरण अधिक गुंतागुंतीचे बनले आहे. वास्तविक, हिरेन यांच्या मृतदेहाच्या तपासणी दरम्यान त्यांच्या तोंडातून पाच हातरुमाल बाहेर आले आहेत. तसेच त्यांचा मृतदेह नाल्यातून सापडला आहे. त्यामुळे ही आत्महत्या नसून हत्या असल्याचं आता बोललं जात आहे.

प्राथमिक तपासात ही आत्महत्या असल्याचा संशय व्यक्त केला होता. त्यांनी खाडीत उडी मारून आत्महत्या केल्याचा पोलिसांचा दावा होता. परंतु मनसुख हिरेन यांच्या तोंडात पाच रुमाल कोंबलेले आढळले आहेत. त्यामुळे या प्रकरणाला वेगळे वळण मिळाले आहे. शुक्रवारी मनसुख यांचा मृतदेह संशयास्पद स्थितीत नाल्यातून सापडला. त्यांचा मृतदेह खाडीतून बाहेर काढला, तेव्हा तो चिखलात बरबटलेला होता. त्यांचा शर्ट फाटलेला होता. मृतदेह तपासला असता त्यांच्या तोंडात 5 रुमाल आढळले. त्यामुळे ही आत्महत्या नसून हत्या असल्याचं आता बोललं जात आहे.

मनसुख यांची पत्नी विमला हिरेन यांनी आत्महत्येचा अँगल पूर्णपणे नाकारला आहे. त्यांनी सांगितलं कि, मनसुख एक हसतमुख व्यक्ती होते आणि ते आत्महत्येचा विचारही करू शकत नव्हते. त्यांनी आत्महत्या केली ही अफवा आहे आणि त्याचा तपास झाला पाहिजे. त्या पुढे म्हणाल्या की, गुरुवारी मनसुख यांना पोलिसांनी चौकशीसाठी बोलावले होते, परंतु त्यानंतर ते घरी परतलेच नाही. कांदिवली येथून त्यांना तावडे नावाच्या एका व्यक्तीचा फोन आला आणि त्यानंतर त्यांचा फोन बंद झाला. या अधिकाऱ्याला भेटण्याबाबत मनसुख यांनी सांगितले होते.

महाराष्ट्राचे गृहमंत्री अनिल देशमुख यांनी विधानसभेत सांगितले की अंबानी यांच्या घराच्या अँटिल्याच्या बाहेर सापडलेल्या कारच्या मालकाचे नाव सॅम आहे. त्याने कार देखभाल दुरुस्तीसाठी मनसुख हिरेन यांना दिली. परंतु, सॅमने पैसे दिले नाहीत तेव्हा मनसुख यांनी कार स्वत: कडे ठेवली. मनसुख यांनी पोलिसांना सांगितले होते की, 17 फेब्रुवारी रोजी संध्याकाळी ते ठाण्याहून घरी जात होते, तेव्हा गाडी वाटेतच थांबली. मनसुख घाईत असल्यामुळे त्यांनी कार ऐरोली पुलाजवळ रस्त्याच्या कडेला पार्क केली. दुसर्‍या दिवशी ते गाडी घेण्यासाठी गेले असता गाडी तिथे सापडली नाही. त्यांनी याबाबत पोलिसांत तक्रारही दाखल केली होती.

The post मनसुख हिरेन यांच्या मृत्यूचे गूढ वाढले, मृतदेहाच्या तोंडात पाच रुमाल कोंबलेले आढळले appeared first on थोडक्यात घडामोडी.