पुणे : शहर हादरवून टाकणाऱ्या नकुल भोईर हत्येच्या प्रकरणात नवा धक्कादायक खुलासा झाला आहे. पोलिस तपासात उघड झाले आहे की नकुल भोईरची हत्या ही त्याची पत्नी चैताली भोईर आणि तिचा प्रियकर सिद्धार्थ दीपक पवार (वय २१) यांनी एकत्रितपणे नियोजित करून केली होती.

चिंचवड पोलिसांनी सिद्धार्थ पवारला अटक केली असून, या प्रकरणाचा तपास अधिक गतीने सुरू आहे. यापूर्वी असे समजले जात होते की चैतालीनेच एकट्याने आपल्या पतीचा खून केला होता. मात्र, सखोल चौकशीत दोघांनी मिळून हा कट रचल्याचे पोलिसांच्या तपासात स्पष्ट झाले आहे.

ही घटना गेल्या शुक्रवारी घडली असून, सोशल मीडियावर या प्रकरणाने मोठे लक्ष वेधले होते. अनेकांनी या घटनेबद्दल संताप व धक्का व्यक्त केला होता. हत्येनंतर तात्काळ चैतालीला अटक करण्यात आली होती.

पोलिस चौकशीदरम्यान तिच्या जबाबात विसंगती आढळून आली, ज्यामुळे तपास अधिकाऱ्यांना संशय आला. पुढील चौकशीत तिने अखेर कबुली दिली की तिने आणि सिद्धार्थ पवारने मिळून पती नकुल भोईरच्या हत्येची योजना आखली व ती अंमलात आणली.

चैतालीच्या कबुलीजबाबानंतर सिद्धार्थ पवारला पोलिसांनी अटक केली आहे. सध्या चिंचवड पोलीस हत्येचा हेतू, नियोजनाचा क्रम आणि घटनाक्रमाची पुनर्रचना करण्याचे काम करत आहेत. अधिकाऱ्यांनी सांगितले की, तपास पुढे सरकत असून लवकरच या प्रकरणातील आणखी महत्त्वाचे तपशील उघड केले जातील.

The post नकुल भोईर हत्या प्रकरणात धक्कादायक खुलासा, पत्नी व तिच्या प्रियकराने रचला खूनाचा कट appeared first on थोडक्यात घडामोडी.

पुणे : स्वारगेट बस स्थानकामधील बलात्कार प्रकरणातील आरोपी दत्तात्रय रामदास गाडे (वय 37) याचा शोध घेण्यासाठी पुणे पोलिसांनी व्यापक मोहीम सुरू केली आहे. त्याचा शोध घेण्यासाठी, अधिकाऱ्यांनी पुणे जिल्ह्यातील शिरूर तालुक्यात, विशेषतः गुनाट गावात ड्रोन आणि श्वान पथक तैनात केले होते, जिथे तो लपल्याचा संशय होता. आरोपी दत्तात्रय गाडे शिरुर तालुक्यातील गुनाट गावचा राहिवासी आहे. आरोपी 26 वर्षीय तरुणीवर अत्याचार केल्यानंतर त्याच्या गुनाट गावी गेला. त्याच्या अटकेसाठी पोलीस सतर्क झाल्यानंतर तो फरार झाला आहे. आरोपी दत्तात्रय गाडे हा काल रात्री शेतात असलेल्या एका घरात पाणी पिण्यासाठी गेल्याची माहिती आहे. आरोपी गुनाट गावातील ऊसाच्या शिवारात लपला असल्याचा संशय पोलिसांना होता. त्यामुळे जवळपास 100 पोलिसांचा फौजफाटा गुनाट गावात दाखल झाला. पोलिसांनी आरोपीचा युद्ध पातळीवर शोध घेतला. मात्र, 25 एकर परिसरातील शेतशिवाराची पहाणी करुनही दत्ता गाडेचा शोध लागला नाही. तसेच, या परिसरात बिबट्याचा देखील वावर आहे. अखेर, आरोपी सापडत नसल्याने पोलिसांना माघारी येण्याच्या सूचना देण्यात आल्या.

स्वारगेट बलात्कार प्रकरणातील आतापर्यंतच्या मुख्य घडामोडी :

२५ फेब्रुवारी रोजी स्वारगेट बस स्टँडवर महाराष्ट्र राज्य मार्ग परिवहन महामंडळाच्या (MSRTC) थांबलेल्या शिवशाही एसी बसमध्ये आरोपीने २६ वर्षीय महिलेवर बलात्कार केला. आरोपी महिलेकडे गेला आणि तिला ‘ताई’ असे संबोधले आणि तिला सांगितले की साताराला जाणारी बस दुसऱ्या प्लॅटफॉर्मवर उभी आहे. गाडेने महिलेला पार्क केलेल्या शिवशाही बसमध्ये चढण्यास सांगितले. ती बसमधील अंधार बघून विचार करत असताना, त्याने तिला खात्री दिली की ही योग्य बस आहे आणि नंतर तिच्यामागे आत जाऊन तिच्यावर अत्याचार केला. गुन्हा केल्यानंतर आरोपी घटनास्थळावरून पळून गेला, त्यामुळे तातडीने पोलिस तपास आणि शोध मोहीम सुरू झाली.

पोलिसांनी पोस्टर जारी केले, बक्षीस जाहीर केले : आरोपीचे पोस्टर प्रसारित केले आहे आणि पोलिस आयुक्त अमितेश कुमार यांनी त्याला पकडण्यासाठी कोणतीही माहिती देणाऱ्याला १ लाख रुपयांचे बक्षीस जाहीर केले आहे.

जनतेच्या मदतीसाठी आवाहन: गाडेच्या ठिकाणाबद्दल कोणतीही माहिती असल्यास त्वरित अटक करण्यास मदत करण्याचे आवाहन पुणे पोलिसांनी जनतेला केले आहे.

आरोपीचा युद्ध पातळीवर शोध सुरु : आरोपीचा शोध घेण्यासाठी वरिष्ठ अधिकाऱ्यांसह १०० हून अधिक पोलिस कर्मचारी गुनाट गावात पोहोचले.

ड्रोन आणि श्वान पथक तैनात : आरोपीचा शोध घेण्यासाठी तीन ड्रोनचा वापर केला, तसेच श्वान पथक आणण्यात आले.

तेरा पथके कार्यरत : पुणे शहर पोलिसांची १३ पथके आरोपीला शोधण्यासाठी आणि पकडण्यासाठी काम करत आहेत.

ऊसाच्या शेतात शोध : अधिकाऱ्यांना संशय होता की गाडे गुनाट गावातील ऊसाच्या शेतात लपला आहे, त्यामुळे तिथे शोध मोहीम सुरू केली होती. पोलिसांकडून अत्यानुधिक ड्रोन कॅमेऱ्यांचा वापर करण्यात आला होता. परंतु, 25 एकर परिसरातील शेतशिवाराची पहाणी करुनही दत्ता गाडेचा शोध लागला नाही. आरोपी सापडत नसल्याने अखेर पोलिसांना माघारी येण्याच्या सूचना देण्यात आल्या.

पोलिसांनी आरोपी गाडे याच्याविरुद्ध भारतीय न्याय संहितेच्या कलम 64 (बलात्कार) आणि 351 (2) अंतर्गत गुन्हा दाखल केला आहे. पोलिसांनी गाडे याच्या काही मित्रांची आणि कुटुंबातील सदस्यांची चौकशी केली असून आरोपीचा शोध घेण्यासाठी स्वारगेट बस डेपो आणि इतर ठिकाणी असलेले सीसीटीव्ही फुटेज स्कॅन करत आहेत. फॉरेन्सिक तज्ञांनी गुन्हा घडलेल्या बसची तपासणी केली आहे. पोलिसांनी बस चालकाचा देखील जबाब नोंदवला आहे.

The post स्वारगेट बलात्कार प्रकरणातील अपडेट : आरोपीचा शोध घेण्यासाठी पोलिसांची व्यापक मोहीम appeared first on थोडक्यात घडामोडी.

पुणे : बिबवेवाडीतील वास्तुशास्त्र सल्लागाराचे अपहरण करून त्याचा खून झाल्या नंतर निरा नदीत शोध मोहीम राबवित अली होती. १७ दिवसांनी वास्तुशास्त्र सल्लागाराचा मृतदेह शोधून काढला आहे. या प्रकरणी बिबवेवाडी पोलीसांनी दोघांना अटक केली होती. खूनानंतर आरोपींनी मृतदेह निरा नदीत फेकून दिला होता. निलेश वरघडे (वय ४३, रा. सुपर इंदिरानगर, बिबवेवाडी) असे खून झालेल्या वास्तूशास्त्र सल्लागाराचे नाव आहे. याप्रकरणी बिबवेवाडी पोलिसांनी वरघडे यांचा मित्र दीपक जयकुमार नरळे (रा. नर्‍हे, आंबेगाव), साथीदार रणजीत ज्ञानदेव जगदाळे (वय २९) यांना अटक केली आहे. याबाबत रुपाली रुपेश वरघडे (वय ४०) यांनी फिर्याद दिली आहे. निलेश वरघडे वास्तूशास्त्र सल्लागार होते.

आरोपी निलेश यांच्या परिचयाचे होते. दोघांनी निलेश यांना कॉफीतून गुंगीचे ओैषध दिले. बेशुद्ध पडल्यानंतर निलेश यांचा गळा दाबून खून केला. त्यानंतर पुरावा नष्ट करण्यासाठी निलेश यांचा मृतदेह पोत्यात भरून नीरा नदीत टाकून देऊन आरोपी पसार झाले होते. तांत्रिक तपासावरून पोलिसांनी आरोपींना अटक केली. मात्र, मृतदेह आढळून आला नाही. आरोपींना अटक केल्यापासून पोलिसांकडून निरा नदीत मृतदेहाचा शोध घेतला जात होता.

पोलिसांनी महाबळेश्वर ट्रेकर्स, भोईराज आपत्ती संघ, महाराष्ट्र आपत्ती व्यवस्थापन संघाच्या मदतीने अखेर सतराव्या दिवशी वरघडे यांचा मृतदेह शोधून काढण्यात यश आले. बिबवेवाडी पोलीस ठाण्याच्या वरिष्ठ पोलीस निरीक्षक संगीता जाधव, पोलीस निरीक्षक अनिता हिवरकर यांच्या मार्गदर्शनाखाली सहायक निरीक्षक प्रवीण काळुखे, उपनिरीक्षक संजय आदलिंग, विवेक सिसाळ, हवालदार शाम लोहोमकर, सतीश मोरे, तानाजी सागर यांच्यासह पथकाने ही कामगिरी केली.

The post पुणे हादरलं! वास्तुशास्त्र सल्लागाराला कॉफीतून गुंगीचे ओैषध, अपहरण नंतर खून,  १७व्या दिवशी गूढ उलगडलं appeared first on थोडक्यात घडामोडी.

पुणे : पुण्यातील शेख कुटुंबीय काही दिवसांपूर्वी पिकनिकसाठी घराबाहेर पडले होते. त्यानंतर बेपत्ता असलेल्या आबीद शेख यांचा मृतदेह पुण्याजवळील खानापूर गावातील एका नदीत आढळून आला. आबीद शेख यांच्या मृतदेहासोबत काही कागदपत्रे सापडले असून त्यात आलिया शेख यांच्या आधार कार्ड आणि ओळखपत्राचा समावेश आहे.

पुण्यातील सासवडमध्ये 15 जून रोजी सकाळी आलिया शेख या महिलेचा मृतदेह आढळला होता तर रात्री या महिलेचा मुलगा अयान शेख याचा मृतदेह नवीन कात्रज बोगद्याजवळ सापडला. आलिया यांचे पती आबीद शेख मात्र बेपत्ता होते. पोलीस त्यांचा शोध घेत होते. परंतु आज (18 जून) आबीद शेख यांचा मृतदेह पुण्याजवळील खानापूर गावातील नदीत सापडला.

हे कुटुंब मूळचं मध्य प्रदेशमधील असून सध्या पुण्यातील धानोरी भागात राहात होतं. आबीद शेख एका कंपनीत बॅंक मॅनेजर म्हणून काम करत होते. 11 जून रोजी आबीद शेख यांनी पिकनिकला जाण्यासाठी ब्रीझा कार भाड्याने घेतली होती. हे कुटंब पिकनिकसाठी बाहेर पडलं होतं, पण 15 जून रोजी सकाळी सासवड गावात आलिया यांचा तीक्ष्ण हत्याराने वार केलेला मृतदेह आढळून आला आणि रात्री नवीन कात्रज बोगद्यालगत एका सहा ते आठ वर्षांच्या त्यांचा मुलाचाही मृतदेह आढळून आला. आबीद शेख यांनी भाड्याने घेतलेली ब्रीझा कार पुणे-सातारा रस्त्यावर एका चित्रपटागृहासमोर सोडून दिली होती. तिथे अबिद शेख ही कार पार्क करुन रस्ता ओलांडून जात असताना तेथील सीसीटीव्हीमध्ये दिसले होते. तेथून ते कोठे निघून गेले, याचा शोध सुरु होता. याप्रकरणी सासवड व भारती विद्यापीठ पोलीस ठाण्यात खुनाचा गुन्हा दाखल करण्यात आला आहे.

The post पत्नी आणि मुलानंतर आता आढळला आबीद शेख यांचा मृतदेह, गूढ वाढलं… appeared first on थोडक्यात घडामोडी.

पुणे : सासवडमध्ये काल (15 जून) सकाळी एका अज्ञात महिलेचा मृतदेह आढळून आला होता. त्यानंतर रात्री एका सहा ते आठ वर्षाच्या मुलाचा मृतदेह कात्रज बोगद्याजवळ आढळून आला. हे दोन मृतदेह आई आणि मुलाचे असल्याचे उघड झाले आहे. मृत महिलेचे नाव आलिया शेख असून तिच्या मुलाचे नाव अयान शेख आहे. परंतु, आलिया यांचे पती आबीद शेख मात्र अजूनही बेपत्ता आहेत.

मिळालेल्या माहितीनुसार, शेख कुटुंब पुण्यातील धानोरी भागात राहत होते. चार दिवसांपूर्वी आबीद शेख यांनी पिकनिकला जाण्याचा प्लॅन बनवला आणि त्यासाठी ब्रीझा कार भाड्याने घेतली होती. त्यानंतर ते पिकनिकसाठी निघाले देखील होते. पण त्यानंतर काय झाले याविषयी कोणालाही माहिती नाही. दरम्यान, काल सकाळी सासवड गावात आलिया यांचा मृतदेह आढळून आला. त्यावर तीक्ष्ण हत्याराने वार केल्याच्या खुणा होत्या. पोलीस या खुनाचा तपास करत असतानाच रात्री नवीन कात्रज बोगद्याजवळ एका मुलाचाही मृतदेह आढळून आला. त्यानंतर पोलीस तपासात समोर आले की काल सकाळी सासवडला ज्या महिलेचा मृतदेह आढळला, त्या आलिया यांचा हा मुलगा आहे.

दरम्यान, आबीद शेख यांनी भाड्याने घेतलेली ब्रीझा कार पुणे-सातारा रस्त्यावर एका चित्रपटागृहासमोर आढळून आली आहे. आबीद शेख हे एका कंपनीत ब्रान्च मॅनेजर आहेत. ते बेपत्ता असून पोलीस या प्रकरणाचा तपास करत आहेत.

The post पुण्यात वेगवेगळ्या ठिकाणी सापडलेले ‘ते’ मृतदेह आई आणि मुलाचे, पण… appeared first on थोडक्यात घडामोडी.