मुंबई : आंतरराष्ट्रीय कीर्तीचे ज्येष्ठ शिल्पकार महाराष्ट्र भूषण राम सुतार यांच्या निधनाने शिल्पकलेच्या क्षेत्रातील एक महान पर्व आणि ‘शिल्पकलेचा कोहिनूर’ काळाच्या पडद्याआड गेला आहे, अशा शब्दांत उपमुख्यमंत्री एकनाथ शिंदे यांनी आपल्या शोक भावना व्यक्त करत त्यांना भावपूर्ण श्रद्धांजली अर्पण केली आहे.

शिल्पकलेतील उत्तुंग व्यक्तिमत्व असलेल्या राम सुतार यांनी आपल्या कलेच्या जोरावर भारतीय संस्कृती आणि महापुरुषांचे विचार जगभर पोहोचवले. त्यांच्या प्रदीर्घ योगदानासाठी त्यांना केंद्र सरकारतर्फे ‘पद्मभूषण’ पुरस्काराने सन्मानित करण्यात आले होते.

राम सुतार यांनी महाराष्ट्राच्या मातीतून आपल्या कलेला सुरुवात केली आणि जागतिक स्तरावर स्थान मिळवले. महाराष्ट्र राज्याचा सर्वोच्च नागरी सन्मान ‘महाराष्ट्र भूषण’ पुरस्कार त्यांना प्रदान करण्यासाठी काही महिन्यांपूर्वीच आम्ही त्यांच्या दिल्ली येथील निवासस्थानी गेलो होतो. त्यावेळी झालेली त्यांची भेट शेवटची ठरली, असे उपमुख्यमंत्र्यांनी शोक संदेशात म्हटले आहे.

नर्मदा तीरावरील सरदार वल्लभभाई पटेल यांचा ‘स्टॅच्यू ऑफ युनिटी’, संसदेतील महात्मा गांधींचा पुतळा अशा अनेक अजरामर कलाकृतींच्या माध्यमातून ते सदैव आपल्यात जिवंत राहतील. वयाच्या १०१ व्या वर्षापर्यंत कलेची साधना करणाऱ्या सुतार यांनी नवीन पिढीतील हजारो कलाकारांना मार्गदर्शन केले. त्यांच्या जाण्याने शिल्पकलेचे विद्यापीठच हरपल्याची भावना उपमुख्यमंत्री शिंदे यांनी व्यक्त केली आहे.

The post महाराष्ट्र भूषण राम सुतार यांच्या निधनाने ‘शिल्पकलेचा कोहिनूर’ काळाच्या पडद्याआड appeared first on थोडक्यात घडामोडी.

ठाणे : शास्त्रीय गायक आणि हार्मोनियम वादक पंडित संजय राम मराठे यांचे १६ डिसेंबर २०२४ रोजी निधन झाले. ते ६८ वर्षांचे होते. सोमवारी त्यांच्या कुटुंबीयांनी याबाबत माहिती दिली. त्यांच्या कुटुंबीयांनी सांगितले की, त्यांना हृदयविकाराचा तीव्र झटका आला होता आणि त्यांना ठाण्यातील खासगी रुग्णालयात दाखल करण्यात आले होते. मात्र, रविवारी रात्री त्यांचे निधन झाले. प्रसिद्ध संगीतकार पंडित राम मराठे यांचे ते ज्येष्ठ पुत्र होते.

पंडित संजय मराठे यांनी भारतीय शास्त्रीय संगीत आणि रंगभूमीवर महत्वाचा ठसा उमटवला. त्यांनी हार्मोनियम वादन आणि गायनात प्राविण्य मिळवले होते. यावर्षी त्यांच्या वडिलांच्या शंभराव्या जयंतीनिमित्त आयोजित कार्यक्रमांमध्ये त्यांनी सक्रिय सहभाग घेतला होता. पंडित संजय मराठे यांनी त्यांचे धाकटे बंधू मुकुंद मराठे यांच्या मदतीने त्यांच्या वडिलांच्या शंभरव्या जयंतीनिमित्त प्रसिद्ध मराठी संगीत नाटक ‘संगीत मंदारमाला’ पुन्हा सादर केले. पारंपारिक मराठी संगीत नाटकाचे मर्म जपत नाविन्यपूर्ण प्रयोगांसाठी या निर्मितीला सर्वत्र कौतुक मिळाले. या प्रयोगाला अत्यंत सकारात्मक प्रतिसाद मिळाला होता.

पंडित संजय मराठे यांच्या पश्चात पत्नी, एक मुलगा आणि नात असा परिवार आहे.

The post गायक आणि संगीतकार पंडित संजय राम मराठे यांचे निधन, ६८ व्या वर्षी घेतला अखेरचा श्वास appeared first on थोडक्यात घडामोडी.

चीन : चीनचे माजी राष्ट्राध्यक्ष जियांग झेमिन यांचे निधन झाले आहे. वयाच्या ९६ व्या वर्षी त्यांनी अखेरचा श्वास घेतला. चीनच्या सरकारी प्रसारमाध्यमांनी दिलेल्या माहितीनुसार, ते ल्युकेमिया या आजाराने ग्रस्त होते. त्यामुळे त्यांच्या शरीरातील अनेक अवयवांनी काम करणे बंद केले होते. 1989 च्या तियानमेन स्क्वेअर हत्याकांडानंतर चीनचे नेतृत्व करण्यासाठी जियांग झेमिन यांची निवड झाली. त्यांनी सुमारे एक दशक चीनवर राज्य केले. जियांग यांच्या कारकिर्दीत तियानमेन स्क्वेअरच्या निषेधानंतर चीनमध्ये कोणतीही मोठी निदर्शने झाली नाहीत.

चीनच्या विकासात महत्त्वाचे योगदान
जियांग यांचा प्रवास फॅक्टरी इंजिनियर ते जगातील सर्वाधिक लोकसंख्या असलेल्या देशाचा नेता असा होता. त्यांनी चीनला जागतिक व्यापार, लष्करी आणि राजकीय शक्ती म्हणून उदयास नेले. 1989 मध्ये त्यांनी पदभार स्वीकारला तेव्हा चीन आर्थिक आधुनिकीकरणाच्या सुरुवातीच्या टप्प्यात होता आणि तियानमेन हत्याकांडातून सावरण्याचा प्रयत्न करत होता. परंतु 2003 मध्ये जियांग अध्यक्षपदावरून निवृत्त झाले तोपर्यंत चीन जागतिक व्यापार संघटनेचा सदस्य झाला होता, ब्रिटनने हाँगकाँगचा ताबा दिला होता, बीजिंगने 2008 ऑलिम्पिक जिंकले होते आणि देश महासत्ता होण्याच्या मार्गावर होता.

The post चीनचे माजी राष्ट्राध्यक्ष जियांग झेमिन यांचे निधन appeared first on थोडक्यात घडामोडी.

गोवा : भाजप नेत्या आणि अभिनेत्री सोनाली फोगट यांचे गोव्यात हृदयविकाराच्या झटक्याने निधन झाले. ती तिच्या काही कर्मचाऱ्यांसह गोव्याला गेली होती. ती 42 वर्षांची होती. तिला काल रात्री हृदयविकाराचा झटका आला. तिने तिच्या कर्मचाऱ्यांकडे तिला अस्वस्थ वाटत असल्याची तक्रार केली होती, त्यानंतर तिला रुग्णालयात नेण्यात आले होते.

भारतीय जनता पक्षाने त्यांना हरियाणातील हिस्सार जिल्ह्यातील आदमपूर विधानसभा मतदारसंघातून उमेदवारी दिली होती, ज्यात तिचा पराभव झाला होता. सोनालीसमोर 2019 च्या निवडणुकीत काँग्रेसचे नेते कुलदीप बिश्नोई हे उमेदवार होते. भाजपच्या हरियाणा युनिटनेही त्यांची महिला मोर्चाच्या प्रदेश उपाध्यक्षपदी नियुक्ती केली होती. सोनालीचे पती संजय फोगट यांचेही 2016 मध्ये निधन झाले.

अनेक सोशल मीडिया प्लॅटफॉर्मवर लोकप्रिय
सोनालीने छोट्या पडद्यावरील अनेक मालिकांमध्ये काम केले आहे. सोनाली फोगटने सोमवारी रात्रीच इन्स्टाग्राम आणि फेसबुकवर एक व्हिडिओ पोस्ट केला. टिकटॉकसह अनेक सोशल मीडिया प्लॅटफॉर्मवर प्रसिद्ध असलेल्या सोनालीने बिग बॉस या रिऍलिटी शोच्या 14 व्या सीझनमध्ये भाग घेतला होता. बिग बॉस 14 मध्ये वाइल्ड कार्ड म्हणून एंट्री घेतलेली सोनाली फोगट अनेकदा कोणत्या ना कोणत्या कारणाने चर्चेत राहिली. अँकरिंग, मॉडेलिंग आणि राजकारणाव्यतिरिक्त सोनाली फोगटने पंजाबी आणि हरियाणवी चित्रपट, म्युझिक व्हिडिओ देखील केले आहेत.

2016 मध्ये तिच्या पतीचा संशयास्पद मृत्यू
2016 मध्ये सोनाली फोगट प्रसिद्धीच्या झोतात आली जेव्हा तिचा पती संजयचा फार्म हाऊसमध्ये संशयास्पद परिस्थितीत मृत्यू झाला. सोनाली त्यावेळी मुंबईत होती. सोनालीचे पती राजकारणात होते.

The post ब्रेकिंग! सोनाली फोगट यांचे हृदयविकाराच्या झटक्याने निधन appeared first on थोडक्यात घडामोडी.

मुंबई : प्रसिद्ध ज्येष्ठ अभिनेते मिथिलेश चतुर्वेदी यांचे निधन झाले आहे. मिथिलेश चतुर्वेदी यांनी ३ ऑगस्ट रोजी संध्याकाळी लखनऊमध्ये अखेरचा श्वास घेतला. त्यांना हृदयाशी संबंधित समस्या होत्या. रिपोर्ट्सनुसार, मिथिलेश चतुर्वेदी यांना हृदयविकाराचा झटका आला होता, त्यानंतर ते त्यांच्या मूळ गावी लखनऊला गेले होते, जेणेकरून ते त्यांच्या तब्येतीची काळजी घेऊ शकतील.

मिथिलेश यांचे जावई आशिष चतुर्वेदी यांनी सोशल मीडियावर या वृत्ताला दुजोरा दिला आहे.

मिथिलेश चतुर्वेदी यांनी गेली अनेक दशके मनोरंजन क्षेत्रात काम केले. त्यांनी हृतिक रोशनसोबत कोई मिल गया, सनी देओलसोबत गदर एक प्रेम कथा, सत्या, बंटी और बबली, क्रिश, ताल, रेडी, अशोका आणि फिजा यासह काही मोठ्या बॉलिवूड चित्रपटांमध्ये काम केले आहे. ते अनेक जाहिराती आणि टीव्ही शो देखील दिसले होते. अमिताभ बच्चन आणि आयुष्मान खुराना यांच्यासोबत गुलाबो सिताबो हा त्यांचा शेवटचा चित्रपट होता.

मिथिलेश चतुर्वेदी यांनी 1997 मध्ये ‘भाई भाई’ चित्रपटाद्वारे बॉलिवूडमध्ये पदार्पण केले. यानंतर ते  ‘सत्या’, ‘ताल’, ‘फिजा’, ‘रोड’, ‘कोई मिल गया’, ‘बंटी और बबली’, ‘क्रिश’ आणि ‘गांधी माय फादर’ यांसारख्या अनेक चित्रपटांचा भाग होते. या चित्रपटांमध्ये साकारलेल्या वेगवेगळ्या पात्रांमुळे मिथिलेश चतुर्वेदी यांनी स्वतःची वेगळी ओळख निर्माण केली. 2020 मध्ये ‘स्कॅम 1992’ या वेब सीरिजमध्ये ते दिसले होते. मिथिलेश चतुर्वेदी सध्या Banchhada नावाच्या चित्रपटात काम करत होते.

The post दु:खद! ज्येष्ठ अभिनेते मिथिलेश चतुर्वेदी यांचे हृदयविकाराने निधन appeared first on थोडक्यात घडामोडी.

औरंगाबाद : राज्याचे माजी मुख्य माहिती आयुक्त दिलीप धारूरकर यांचे आज (1 ऑगस्ट) निधन झाले. त्यांच्यावर औरंगाबाद येथील एका खासगी रुग्णालयात उपचार सुरू होते. उपचारादरम्यान त्यांची प्राणज्योत मालवली.

देवगिरी तरुण भारतचे संपादक म्हणून संपूर्ण महाराष्ट्राला परिचित झालेले दिलीप धारूरकर यांनी अनेक महत्त्वाची पदे भूषवली आहेत. धडाडीचे पत्रकार म्हणून त्यांची महाराष्ट्राला ओळख होती. दैनिक तरुण भारत मध्ये काम करताना त्यांनी अनेक पत्रकार घडवले. देशामध्ये माहिती अधिकार लागू झाल्यानंतर महाराष्ट्राचे मुख्य माहिती आयुक्त म्हणून त्यांनी काम पाहिले. त्यांच्या अचानक निधनामुळे अनेक मान्यवरांनी दुःख व्यक्त केले आहे.

उपमुख्यमंत्री देवेंद्र फडणवीस यांनी धारूरकर यांना श्रद्धांजली वाहिली आहे. ते म्हणाले कि, “माजी माहिती आयुक्त, ज्येष्ठ पत्रकार दिलीप धारूरकर यांच्या निधनाचे वृत्त दुःखद आहे. विदर्भात माहिती आयुक्त म्हणून त्यांनी अतिशय उत्कृष्ट काम केले आणि इतरही भागातील प्रलंबित प्रकरणे निकालात काढण्यासाठी मोठा पुढाकार त्यांनी त्यांच्या कार्यकाळात घेतला. राष्ट्रवादी विचारांना बळकटी देणारे मोठे लेखन कार्य त्यांनी केले. एक उत्तम संपादक, वैचारिक स्तंभलेखक म्हणून ते कायम स्मरणात राहतील.”

राष्ट्रवादी विचारांना बळकटी देणारे मोठे लेखन कार्य त्यांनी केले. एक उत्तम संपादक, वैचारिक स्तंभलेखक म्हणून ते कायम स्मरणात राहतील.
त्यांना भावपूर्ण श्रद्धांजली!
त्यांच्या कुटुंबियांच्या दुःखात आम्ही सहभागी आहोत.
ॐ शान्ति ?

— Devendra Fadnavis (@Dev_Fadnavis) August 1, 2022

The post ज्येष्ठ पत्रकार आणि माजी माहिती आयुक्त दिलीप धारूरकर यांचे निधन appeared first on थोडक्यात घडामोडी.

मुंबई : ‘भाभी जी घर पर हैं’ या लोकप्रिय टीव्ही शोचा अभिनेता दीपेश भान यांचे निधन झाले आहे. शुक्रवारी क्रिकेट खेळताना दीपेश खाली कोसळला होता, त्यानंतर त्याला तातडीने रुग्णालयात नेण्यात आले. मात्र, तिथे डॉक्टरांनी त्याला मृत घोषित केले. भाभीजी घर पर हैं या मालिकेत दीपेश मलखान सिंगची भूमिका साकारत होता.

शोचे सहाय्यक दिग्दर्शक अभिनय यांनी अभिनेत्याच्या निधनाच्या वृत्ताला दुजोरा दिला आहे. तसेच शोचा अभिनेता वैभव माथूरनेही या बातमीला दुजोरा दिला आहे. तो म्हणाला, “हो, तो आता नाही. मला यावर काहीही बोलायचे नाही, कारण सांगण्यासारखे काही राहिले नाही.” कविता कौशिक हिनेही दुःख व्यक्त करत ट्विट केलं आहे. ती म्हणाली, “दीपेश भान यांचे काल वयाच्या ४१ व्या वर्षी निधन झाल्याच्या बातमीने धक्का बसला, दुखावली गेले, एफआयआरमधील एक अतिशय महत्त्वाचा कलाकार, कधीही मद्यपान/धूम्रपान न करणारा किंवा आरोग्यास हानी पोहोचेल असे काहीही न करणारा तंदुरुस्त माणूस, आपल्या मागे पत्नी, एक वर्षाचे मूल, पालक आणि आपल्या सर्वांना सोडून गेला.”

In shock, gutted ,pained with the news of Deepesh Bhan passing away at the age of 41 yesterday, a very important cast member in f.i.r , Was a fit guy who never drank/smoked or did anything to harm his health, left behind a wife n one year old child and parents and us all ?? pic.twitter.com/FVkaZFT3bI

— Kavita Kaushik (@Iamkavitak) July 23, 2022

दीपेशचे 2019 मध्ये लग्न झाले होते
दिल्लीतून पदवी घेतल्यानंतर दीपेशने थेट नॅशनल स्कूल ऑफ ड्रामामध्ये प्रवेश घेतला. येथून अभिनयाचा अभ्यासक्रम पूर्ण केल्यानंतर 2005 मध्ये दीपेश मुंबईत आला. शोमध्ये मुलींसोबत फ्लर्ट करणाऱ्या दीपेश भानचे खरे तर लग्न झाले होते. त्याचे लग्न मे 2019 मध्ये दिल्लीत झाले होते. जानेवारी २०२१ मध्ये दिपेशला एक मुलगा झाला होता.

अनेक कॉमेडी टीव्ही शोमध्ये काम केले
या शोपूर्वी, अभिनेत्याने बिंदास टीव्हीच्या ‘कॉमेडी का किंग कौन’, ‘कॉमेडी क्लब’, ‘भूतवाला’, ‘एफआयआर’सह ‘चॅम्प’ आणि ‘सुन यार चिल मार’ सारख्या शोमध्ये काम केले आहे. 2007 मध्ये दीपेशने ‘फालतू उटपटांग चटपटी कहानी’ या चित्रपटातही काम केले होते. यासोबतच तो आमिर खानसोबत टी-20 वर्ल्ड कपच्या जाहिरातीतही दिसला होता.

The post दुःखद! ‘भाभी जी घर पर हैं’ फेम दीपेश भान यांचे निधन appeared first on थोडक्यात घडामोडी.

लखनौ : समाजवादी पक्षाचे प्रमुख मुलायम सिंह यादव यांच्या पत्नी साधना गुप्ता यांचे शनिवारी निधन झाले. त्यांना फुफ्फुसाचा संसर्ग झाला होता आणि त्यांच्यावर गुरुग्राममधील मेदांता रुग्णालयात उपचार सुरू होते. साधना गुप्ता या प्रतीक यादव यांच्या आई आणि भाजप नेत्या अपर्णा यादव यांच्या सासू होत्या.

साधना गुप्ता यांना शुगरसह इतर अनेक आजार होते. त्यांना मेदांता रुग्णालयात दाखल करण्यात आले होते. त्यांना फुफ्फुसात संसर्ग झाल्याच्या तक्रारीही होत्या. उपचारादरम्यान शनिवारी सकाळी साधना यांचे निधन झाले. मृत्यूसमयी मुलायमसिंह यादव पत्नी साधना यांच्यासोबत होते.

The post मुलायम सिंह यादव यांच्या पत्नी साधना गुप्ता यांचे निधन appeared first on थोडक्यात घडामोडी.

मंगळुरू : भारतीय कबड्डी संघाचे माजी सदस्य आणि एकलव्य पुरस्कार प्राप्त करणारे दक्षिण कन्नड जिल्ह्यातील पहिले कबड्डीपटू उदय चौटा यांचे शनिवारी पहाटे (21 मे) निधन झाले. ते ४३ वर्षांचे होते. गेल्या काही दिवसांपासून त्यांची तब्येत बिघडल्याचे सांगण्यात येत आहे. त्यांच्यावर मंगळुरू येथील खासगी रुग्णालयात उपचार सुरू होते.

दोन दशकांच्या क्रीडा कारकिर्दीत, उदय यांनी 100 हून अधिक राष्ट्रीय आणि 300 राज्यस्तरीय कबड्डी स्पर्धा खेळल्या आहेत. बंटवाल तालुक्यातील मणीजवळील बडीगुड्डा येथील रहिवासी असलेल्या उदय यांनी मणी उच्च प्राथमिक शाळेत शालेय शिक्षण पूर्ण केले आणि पुत्तूर येथील सरकारी पीयू कॉलेजमध्ये पीयूसी पूर्ण केले. पुत्तूर येथील फिलोमिना महाविद्यालयातून त्यांनी पदवी प्राप्त केली.

उदय चौटा यांची कारकीर्द :

महाविद्यालयीन जीवनापासून ते कबड्डी आणि व्हॉलीबॉल या खेळांमध्ये सक्रिय होते. आंतर-महाविद्यालयीन कबड्डी स्पर्धांमध्ये फिलोमेना महाविद्यालयाचे प्रतिनिधित्व करू लागलेल्या उदय यांनी आंतरविद्यापीठ कबड्डी स्पर्धांमध्ये मंगलोर विद्यापीठाचे प्रतिनिधित्व केले. त्यांनी 1993 मध्ये ज्युनियर राष्ट्रीय कबड्डी स्पर्धेत कर्नाटकचे प्रतिनिधित्व केले होते. उदय चौटा हे अनेक राज्य आणि जिल्हा पुरस्कारांव्यतिरिक्त कर्नाटक सरकारने स्थापन केलेल्या प्रतिष्ठित एकलव्य पुरस्काराचे प्राप्तकर्ता होते.

ते 2000 ते 2008 पर्यंत भारतीय कबड्डी संघाचे सदस्य होते. 2004 मध्ये उदय यांनी भारत आणि बांग्लादेश यांच्यातील कसोटी कबड्डी सामन्यात पाच सुवर्णपदके जिंकली होती. 2007 च्या कबड्डी विश्वचषकात भारताने इराणचा 29-19 असा पराभव केला होता. कोर्टवर उदय यांच्या दमदार कामगिरीमुळे त्यांना सर्वोत्कृष्ट खेळाडूचा पुरस्कार मिळाला.

तरुणांसाठी प्रेरणास्थान असलेल्या उदय यांनी दक्षिण कन्नड हौशी कबड्डी असोसिएशनचे संघटक सचिव म्हणून काम केले होते. उदय यांनी एअर इंडिया, केपीटीसीएलमध्ये काम केले होते आणि सध्या ते बँक ऑफ बडोदाच्या सुरतकल शाखेत कार्यरत होते. त्यांच्या पश्चात पत्नी, मुलगा व मुलगी असा परिवार आहे.

The post ब्रेकिंग! माजी कबड्डीपटू उदय चौटा यांचे निधन appeared first on थोडक्यात घडामोडी.

बेंगळुरू : अधिक सुंदर दिसण्याच्या नादात अनेक अभिनेत्री प्लास्टिक सर्जरी करतात. अशाच एका सर्जरीत कन्नड अभिनेत्री चेतना राज हिने आपला जीव गमावला आहे. कन्नड टेलिव्हिजनची ती लोकप्रिय अभिनेत्री होती. 21 वर्षीय चेतनाने बेंगळुरूच्या एका खासगी रूग्णालयात अखेरचा श्वास घेतला.

मिळालेल्या माहितीनुसार, चेतना राजने अलीकडेच वजन कमी करण्यासाठी बंगळुरूमधील एका खाजगी हॉस्पिटलमध्ये फॅट फ्री सर्जरी करुन घेतली होती. सर्जरीनंतर काही तासांतच तिला अस्वस्थ वाटू लागलं. तिला श्वास घ्यायला त्रास जाणवू लागला. तिच्या फुफ्फुसांत पाणी भरलं. दरम्यान काल 16 मे रोजी तिचं निधन झालं.

चेतनाने सर्जरीबद्दल आपल्या आईवडिलांना काहीही माहिती दिली नव्हती. ती एकटी आपल्या मित्रांसोबत हॉस्पिटलमध्ये गेल्याचं सांगण्यात येत आहे. चेतनाच्या निधनाचं वृत्त ऐकून तिच्या पालकांना मोठा धक्का बसला आहे. त्यांनी डॉक्टरांवर निष्काळजीपणाचा आरोप केला आहे. सध्या अभिनेत्रीचा मृतदेह शवविच्छेदनासाठी पाठविण्यात आला आहे. पोलीस पुढील तपास करत आहेत. चेतना कन्नड टीव्हीची लोकप्रिय अभिनेत्री होती. तिने अनेक टीव्ही मालिकामध्ये काम केलं होतं.

The post अभिनेत्री चेतना राजचे निधन, वजन कमी करण्यासाठी केलेली सर्जरी बेतली जीवावर appeared first on थोडक्यात घडामोडी.