पुणे : मुंबई नंतर आता पुण्यातही कोरोनाचा पहिला रुग्ण सापडल्याची माहिती मिळाली आहे. पुण्यातील एका रुग्णालयात उपचार घेत असलेल्या ८७ वर्षीय वृद्ध पुरुषाला कोरोनाची लागण झाल्याची पुष्टी आरोग्य विभागाने केली आहे. या वर्षी पुण्यात आढळलेला हा पहिलाच कोरोनाचा रुग्ण असल्याने, याकडे मोठ्या गांभीर्याने पाहिले जात आहे.

रुग्णाची तपासणी केली असता त्याला कोरोनाचा संसर्ग झाला असल्याचे निदान झाले. या व्यक्तीवर सध्या रुग्णालयात उपचार सुरु आहेत आणि त्याला आवश्यक ती वैद्यकीय काळजी दिली जात आहे. त्याच्यासोबत संपर्कात आलेल्या सर्वांना शोधून काढून त्यांचीही तपासणी करण्यात येत आहे.

पुणे आरोग्य विभागाने याबाबत त्वरित उपाययोजना सुरू केली असून, सर्व आरोग्य कर्मचाऱ्यांना आणि संबंधित संस्थांना आवश्यक ती खबरदारी घेण्याचे आदेश दिले आहेत. रुग्णाच्या संपर्कात आलेल्या सर्व लोकांचे वेगवेगळ्या ठिकाणी नमुने घेऊन तपासणी केली जात आहे. तसेच, रुग्णालयातील कर्मचाऱ्यांना तसेच सामान्य नागरिकांना सुरक्षेच्या दृष्टीने सावधगिरी बाळगण्याचे आवाहन करण्यात आले आहे.

खबरदारी घेण्याचे आवाहन

पुणे आरोग्य विभागाने नागरिकांना घाबरून न जाता योग्य ती खबरदारी घेण्याचे आवाहन केले आहे. कोरोनाचा संसर्ग रोखण्यासाठी हात धुणे, मास्क वापरणे आणि सामाजिक अंतर राखणे यांसारख्या नियमांचे काटेकोर पालन करणे आवश्यक असल्याचे सांगितले आहे. रुग्णाची स्थिती स्थिर असून, त्वरित उपचार सुरू करण्यात आले आहेत.

मुंबईतील कोरोना रुग्णांची स्थिती

मुंबईमध्ये आतापर्यंत ५३ कोरोना रुग्ण आढळले असून, १९ मे रोजी कोणत्याही नवीन रुग्णाची नोंद झाली नाही. मुंबईतील कोरोना रुग्णांची संख्या कमी करण्यासाठी कठोर निर्बंध लागू केले आहेत.

सिंगापूरमध्ये अलर्ट जारी
गेल्या आठवड्याच्या तुलनेत कोरोनाच्या रुग्णसंख्येत तब्बल २८ टक्क्यांनी वाढ झाली आहे, ज्यामुळे प्रशासनाने सतर्कता वाढवली आहे.

आरोग्य मंत्रालयाने दिलेल्या माहितीनुसार, सध्या सिंगापूरमध्ये कोरोनाचा सध्याचा प्रकार २०२० च्या पहिल्या लाटेपेक्षा अधिक गंभीर स्वरूपाचा आहे. विषाणू वेगाने पसरत असून यामुळे नागरिकांना अत्यंत काळजी घेण्याचे आवाहन करण्यात आले आहे. सिंगापूरच्या आरोग्य मंत्रालयाने नागरिकांना लसीचा बुस्टर डोस लवकरात लवकर घेण्याचे निर्देश दिले आहेत, कारण यामुळे कोरोना प्रतिबंधक शक्ती वाढते आणि विषाणूचा प्रसार थांबवण्यात मदत होते.

The post काळजी घ्या! पुण्यातही आढळला कोरोनाचा रुग्ण, सावधगिरी बाळगण्याचे आवाहन appeared first on थोडक्यात घडामोडी.

नवी दिल्ली : भारतात पुन्हा एकदा कोरोनाच्या रुग्णांमध्ये विक्रमी वाढ झाली आहे. गेल्या 24 तासांत देशात कोरोनाचे 90,928 नवीन रुग्ण आढळले आहेत. याशिवाय 325 जणांना कोरोनामुळे आपला जीव गमवावा लागला आहे. बुधवारच्या तुलनेत कोरोनाच्या रुग्णांमध्ये ५६.५ टक्क्यांनी वाढ झाली आहे.

ओमिक्रॉन प्रकाराबद्दल बोलायचे तर, देशातील ओमिक्रॉन प्रकरणांची संख्या 2,630 झाली आहे. महाराष्ट्र आणि दिल्लीमध्ये ओमिक्रॉनची सर्वाधिक 797 आणि 465 प्रकरणे आहेत. ओमिक्रॉनच्या 2,630 रुग्णांपैकी 995 रुग्ण बरे झाले आहेत.

कोरोनाच्या सर्वाधिक प्रकरणांमध्ये महाराष्ट्र (26,538 नवीन कोरोना प्रकरणे), पश्चिम बंगाल (14,022 प्रकरणे), दिल्ली (10,665 प्रकरणे), तामिळनाडू (4,862 प्रकरणे) आणि केरळ (4,801 प्रकरणे) यांचा समावेश आहे. नवीन 90,928 प्रकरणांपैकी 66.97 टक्के प्रकरणे फक्त पाच राज्यांमधून आली आहेत. यामध्ये 29.19 टक्के प्रकरणे केवळ महाराष्ट्रातील आहेत.

आरोग्य मंत्रालयाने दिलेल्या माहितीनुसार, गेल्या 24 तासांत भारतात कोरोना विषाणूचे 90,928 नवीन रुग्ण आढळले आहेत, 19,206 बरे झाले आहेत आणि 325 लोकांचा कोरोनामुळे मृत्यू झाला आहे. गेल्या 24 तासांत देशात झालेल्या 325 मृत्यूंपैकी केरळमध्ये (258) सर्वाधिक मृत्यू झाले आहेत.

• एकूण प्रकरणे : 3,51,09,286
• सक्रिय प्रकरणे : 2,85,401
• बरे झालेले एकूण रुग्ण : 3,43,41,009
• एकूण मृत्यू : ४,८२,८७६
• एकूण लसीकरण : 1,48,67,80,227

भारतीय वैद्यकीय संशोधन परिषद (ICMR) नुसार, काल भारतात कोरोना विषाणूसाठी 14,13,030 नमुन्यांच्या चाचण्या करण्यात आल्या, कालपर्यंत एकूण 68,53,05,751 नमुन्यांच्या चाचण्या करण्यात आल्या आहेत.

The post चिंताजनक! भारतात 24 तासांत कोरोनाचे 90,928 नवीन रुग्ण, 325 जणांचा मृत्यू appeared first on थोडक्यात घडामोडी.

नवी दिल्ली : देशात कोरोना रुग्णांची संख्या पुन्हा एकदा वाढू लागली आहेत. आरोग्य मंत्रालयाने जारी केलेल्या आकडेवारीनुसार, दिवसभरात भारतात कोरोना रुग्णांची 47 हजारांहून अधिक प्रकरणे नोंदवण्यात आली आहेत. त्या तुलनेत बरे झालेल्या लोकांची संख्या कमी आहे. तर गेल्या 24 तासांमध्ये कोरोनामुळे मृत्यू झालेल्यांची संख्या 509 आहे.

मंत्रालयाच्या आकडेवारीनुसार, गुरुवारी एकूण 47,092 कोरोना रुग्ण आढळले असून यासह एकूण कोरोना रुग्णांची संख्या 3,28,57,937 वर गेली आहे. याबरोबरच, सक्रिय प्रकरणे 3,89,583 झाली आहेत. आतापर्यंत कोरोनातून बरे झालेल्या लोकांची संख्या 3,20,28,825 झाली आहे. देशात आतापर्यंत 4,39,529 लोकांचा कोरोनामुळे मृत्यू झाला आहे.

The post चिंता वाढली! दिवसभरात 47 हजारांहून अधिक कोरोना रुग्णांची नोंद, 509 जणांचा मृत्यू appeared first on थोडक्यात घडामोडी.

सातारा : सातारा जिल्हा चौथ्या स्तरामध्ये समाविष्ट झाला आहे. सातारा जिल्ह्यामध्ये कोरोना रुग्णवाढीचा दर १० टक्क्यांच्या पुढे गेला आहे. त्यामुळे जिल्हाधिकारी शेखर सिंह यांनी संपूर्ण सातारा जिल्ह्यामध्ये चौथ्या स्तरामधील निर्बंध लागू केले असून अत्यावश्यक सेवा वगळता सर्व प्रकारची दुकाने बंद ठेवण्याचे आदेश जिल्हाधिकाऱ्यांनी शुक्रवारी काढले आहेत.

जिल्हाधिकाऱ्यांच्या आदेशानुसार सोमवार ते शुक्रवार हे निर्बंध लागू असतील. तसेच शनिवार आणि रविवार हे दोन दिवस जिल्ह्यात पूर्णतः संचारबंदी पुढेही सुरू राहणार आहे. अत्यावश्यक सेवेमध्ये किराणा दुकाने, भाजीपाला दुकाने, फळविक्रेते, डेअरी, बेकरी, मटन, चिकन, अंडी, मासे विक्री दुकाने, कोल्ड स्टोरेज, गोदामे, रुग्णालय, निदान केंद्रे, लसीकरण केंद्रे, वैद्यकीय विमा कार्यालय, औषध दुकाने, औषधी कंपन्या, वैद्यकीय उपकरणे विक्रीची दुकाने, सेबीच्या नियंत्रणातील सर्व कार्यालये, भारतीय रिझर्व बँकेने नियुक्त केलेल्या सर्व सेवा, विद्युत आणि गॅस पुरवठा, पेट्रोल पंप, पेट्रोलियम संबंधी उत्पादने, सर्व प्रकारच्या वित्तसंस्था, वृत्तपत्रे यांना परवानगी राहणार आहे.

साताऱ्यात काय सुरु आणि काय बंद राहणार?

1. अत्यावश्यक बाबींची दुकाने आता सकाळी नऊ ते दुपारी दोन वाजेपर्यंत सुरू राहणार
2. अत्यावश्यक सेवेव्यतिरिक्त सर्व दुकाने बंद राहणार
3. कोणत्याही क्रीडा स्पर्धा घेता येणार नाहीत
4. हॉटेल, रेस्टॉरंट बंद राहतील, पार्सल सेवा सकाळी ९ ते रात्री ८ वेळेत सुरू राहील
5. सार्वजनिक जागा, खुली मैदाने या ठिकाणांवर सोमवार ते शुक्रवार पहाटे ५ ते सकाळी ९ या वेळेत व्यायाम व चालण्यास परवानगी आहे.
6. लग्न आणि अंत्यविधी यांच्यासाठी निर्बंध ठेवून परवानगी
7. बांधकामांना परवानगी मात्र कामगारांच्या राहण्याची व्यवस्था करणे आवश्यक
8. कृषी दुकाने आठवडाभर दुपारी दोन वाजेपर्यंत सुरू राहतील
9. सार्वजनिक परिवहन बस सेवा ५० टक्के क्षमतेने सुरू राहील
10. मालवाहतूक सुरु ठेवण्यास परवानगी
11. खासगी वाहने, टॅक्सी, बसेस, लांब पल्ल्याच्या रेल्वेद्वारे आंतरजिल्हा प्रवास करण्यास परवानगी
12. आयसोलेशन बबलमध्ये चित्रीकरणास परवानगी
13. बाजार समित्या सकाळी ७ ते दुपारी २ वाजेपर्यंत सुरू राहतील
14. पाचव्या स्तरातील जिल्ह्यातून जे प्रवासी सातारा जिल्ह्यात येणार आहेत त्यांना ई पास बंधनकारक आहे. पहिल्या, दुसऱ्या, तिसऱ्या आणि चौथ्या स्तरातील जिल्ह्यातून येणाऱ्या प्रवाशांना ई पासचे बंधन राहणार नाही.
15. सर्व शाळा महाविद्यालय यांचे ऑनलाइन शिक्षण सुरू आहे. विद्यार्थ्यांना शैक्षणिक साहित्याची गरज पडल्यास घरपोच साहित्य देता येणार आहे.

The post सातारा जिल्ह्यामध्ये पुन्हा लॉकडाऊन, कोरोना रुग्णवाढीमुळे जिल्हाधिकाऱ्यांचा निर्णय appeared first on थोडक्यात घडामोडी.

पुणे : पुण्यात कोरोनाचा प्रादुर्भाव जास्त असल्यामुळे कडक लॉकडाऊनचा विचार करावा, अशा सूचना मुंबई उच्च्य न्यायालयाने राज्य सरकारला दिल्या होत्या. या पार्श्वभूमीवर उपमुख्यमंत्री आणि पुण्याचे पालकमंत्री अजित पवार यांच्या नेतृत्वात होत असलेल्या बैठकीत शहरात पूर्णपणे लॉकडाऊन करण्याचा निर्णय घेतला जाण्याची शक्यता व्यक्त केली जात आहे. अजित पवार यांनी महत्वाची बैठक बोलावली आहे.

पुण्यातील कोरोना रुग्णांच्या वाढत्या संख्येवरून उच्च्य न्यायालयाने चिंता व्यक्त केली होती. तसंच कोरोना संसर्गाची साखळी तोडण्यासाठी शासनाने कडक लॉकडाऊनचा विचार करावा, असंही न्यायालयाकडून सांगण्यात आलं होतं. पुण्यातील विभागीय आयुक्त कार्यालयात होत असलेल्या या बैठकीला अजित पवार यांच्यासह विभागीय आयुक्त, जिल्हाधिकारी आणि प्रशासनातील सर्व प्रमुख अधिकारी, तसंच पुणे शहराचे महापौर उपस्थित राहणार असल्याची माहिती आहे.

कोरोनाच्या दुसऱ्या लाटेला अनेक दिवस लोटले आहेत, तरीदेखील रुग्णांची संख्या फारशी कमी होत नसल्यामुळे सरकारकडून कडक लॉकडाऊनचा विचार केला जाऊ शकतो. पुण्यात अजूनही अनेक ठिकाणी आरोग्य सुविधांचा तुटवडा जाणवत असल्यामुळे या महत्त्वपूर्ण बैठकीत नेमका काय निर्णय होतो, हे पाहणं महत्त्वाचं ठरणार आहे.

The post पुण्यात कडक लॉकडाऊन होणार? न्यायालयाच्या सूचनेनंतर अजित पवारांनी बोलावली बैठक appeared first on थोडक्यात घडामोडी.

नवी दिल्ली : कोरोना संक्रमणानं देशात अगदी भयावह परिस्थिती निर्माण केली आहे. भारतात कोरोना संक्रमणाचे आकडे दररोज नवा उच्चांक गाठत आहेत. बुधवारी भारतात पहिल्यांदाच दोन लाखांहून अधिक रुग्ण आढळले आहेत. बुधवारी २४ तासांत एकूण २ लाख ७३९ कोरोनाबाधित रुग्णांची भर पडली आहे. तर १०३८ करोनाबाधित रुग्णांचा मृत्यू झाला आहे.

आरोग्य मंत्रालयानं जाहीर केलेल्या आकडेवारीनुसार, देशातील एकूण कोरोनाबाधित रुग्णांची संख्या १ कोटी ४० लाख ७४ हजार ५६४ वर पोहचली असून आतापर्यंत देशात एकूण १ लाख ७३ हजार १२३ नागरिकांचा कोरोनामुळे मृत्यू झाला आहे. सध्या देशात १४ लाख ७१ हजार ८७७ रुग्णांवर उपचार सुरू आहेत. आयसीएमआर (ICMR)नं दिलेल्या माहितीनुसार, १४ एप्रिल रोजी देशात १३ लाख ८४ हजार ५४९ नमुन्यांची कोरोना तपासणी करण्यात आली. तर देशात आतापर्यंत एकूण २६ कोटी २० लाख ०३ हजार ४१५ नमुन्यांची तपासणी करण्यात आलीय.

The post कोरोनाचा उद्रेक! २४ तासांत २ लाखांहून अधिक कोरोना रुग्णांची भर appeared first on थोडक्यात घडामोडी.

महाराष्ट्रात कोरोना रुग्णसंख्येत सातत्याने वाढ होत असल्यामुळे काही जिल्ह्यात लॉकडाऊन घोषित करण्यात आला तर काही ठिकाणी कडक निर्बंध लागू करण्यात आले. तरीदेखील रुग्णसंख्या आटोक्यात येत नसल्याने चिंता वाढली आहे. राज्यात गेल्या दोन दिवसात 20 हजारांच्या आसपास रुग्ण आढळले आहेत. सध्या राज्यात 97 हजार 638 अॅक्टिव्ह रुग्ण आहेत. तर राज्यातील मृत्यूदर हा 2.36 टक्क्यांवर पोहोचला आहे.

पुणे :

पुण्यात फेब्रुवारीच्या दुसऱ्या आठवड्यापासून कोरोना रुग्णांची संख्या झपाट्याने वाढत असल्याने शहरातील कंटेनमेंट झोनमध्ये वाढ होत आहे. आता पुण्यातील कंटेनमेंट झोनची संख्या 62 वर पोहोचली आहे.

मुंबई :

मुंबईत गेल्या काही दिवसांपासून कोरोना रुग्णसंख्येत सातत्याने वाढ होत आहे. अनेक इमारतींमध्ये कोरोनाचे रुग्ण आढळत आहेत. वाढत्या कोरोना रुग्णांच्या पार्श्वभूमीवर मुख्यमंत्र्यांनी स्थानिक प्रशासनाला निर्बंध कडक करण्याचे आदेश दिले आहेत.

ठाणे :

ठाण्यात कोरोनाग्रस्तांचे प्रमाण चांगलेच वाढले आहे. त्यामुळे कोरोनाला अटकाव करण्यासाठी ठाणे महापालिका क्षेत्रात 16 ठिकाणं कोरोना हॉटस्पॉट निश्चित करण्यात आली असून या 16 हॉटस्पॉटमध्ये येत्या 31 मार्चपर्यंत पुन्हा लॉकडाऊन असेल.

औरंगाबाद :

औरंगाबादमध्ये कोरोना रुग्णांची वाढती संख्या लक्षात घेता येत्या 11 मार्चपासून 4 एप्रिलपर्यंत अंशत: लॉकडाऊनची घोषणा करण्यात आली आहे.

नाशिक :

नाशिक जिल्ह्यात कोरोना रुग्णांचा वाढता आलेख कायम आहे. त्यामुळे येथेही कडक निर्बंध लादण्यात आले आहेत. नाशिक आणि मालेगावमध्ये सर्व शाळा, कॉलेज, कोचिंग क्लासेस पूर्णपणे बंद राहणार आहेत, अशी माहिती नाशिक जिल्हााधिकाऱ्यांनी दिली आहे.

The post महाराष्ट्रात कोरोना रुग्णसंख्येत झपाट्याने वाढ, ‘या’ शहरांमध्ये कडक निर्बंध appeared first on थोडक्यात घडामोडी.

पुणे : पुण्यात कोरोना रुग्णांची संख्या झपाट्याने वाढत असून गंभीर परिस्थिती निर्माण होत आहे. पुण्यात आज (23 फेब्रुवारी) दुपारपर्यंतच तब्बल 650 नवे कोरोना रुग्ण आढळले आहेत. यामध्ये संध्याकाळपर्यंत आणखी काही रुग्णांची भर पडण्याची शक्यता आहे. रुग्णवाढीचे हे प्रमाण दुप्पट आहे. काल (सोमवार) 328 नवे कोरोना रुग्ण आढळले होते. तर आज कोरोना रुग्णांची संख्या दुप्पट झाल्याने पुण्यात अतिशय चिंताजनक परिस्थिती निर्माण झाली आहे.

पुण्यात कोरोनाचा संसर्ग झपाट्याने वाढत असल्याचे या आकडेवारीवरुन दिसत आहे. ह्या आकडेवारीमुळे आरोग्य प्रशासन देखील धास्तावले आहे. त्यामुळे पुण्यात आणखी कडक निर्बंध लागू होण्याची शक्यता आहे.

राज्यात कोरोना रुग्णांची संख्या पुन्हा वाढत असल्यामुळे सरकारकडून वेगवेगळे प्रतिबंध घातले जात आहेत. तसेच, नागरिकांना कोरोना प्रतिबंधक नियम पाळण्याचे आवाहनही केले जात आहे. मात्र, पुण्यात कोरोनाग्रस्तांची संख्या दिवसेंदिवस वाढतच चालली आहे. त्यामुळे पुण्यात मोठ्या प्रमाणात कोरोना चाचण्या करण्यात येत आहेत. तसेच, जिल्ह्याचे पालकमंत्री अजित पवार हे पुण्यातील कोरोनावर लक्ष ठेवून आहेत. त्यासाठी ते येथील आरोग्य तसेच जिल्हा प्रशासनाच्या बैठका घेत आहेत. तसेच हॉटेल, बार, रेस्टॉरंट रात्री 11 पर्यंतच खुले ठेवण्याची परवानगी आहे. पुणे, पिंपरी चिंचवडमध्ये कोरोनाला रोखण्यासाठी 28 फेब्रवारी पर्यंत शाळा कॉलेज बंद ठेवण्याचा निर्णय घेण्यात आला आहे.

The post भयंकर : पुण्यात कोरोना रुग्णांच्या संख्येत झपाट्याने वाढ, आरोग्य प्रशासन देखील धास्तावले appeared first on थोडक्यात घडामोडी.