मेहुल चोकसी याचे तुरुंगातील फोटो सोशल मीडियावर व्हायरल

नवी दिल्ली : PNB घोटाळ्यातील मुख्य सूत्रधार मेहुल चोकसी सध्या डॉमिनिका देशाच्या तुरुंगात पोलिसांच्या कस्टडीमध्ये आहे, त्याचे तुरुंगातील फोटो सोशल मीडियावर व्हायरल झाले आहेत. त्यामध्ये चोकसीच्या डोळ्याला इजा असून हातावर जखमा झालेल्या आहेत. या फोटोमध्ये मेहुल चोकसी घाबरलेल्या अवस्थेत दिसत आहे.

डॉमिनिका पोलिसांकडून चोकसी याची चौकशी सुरु आहे. तर कोर्टाकडून चोकसीला कायदेशीर मदत नाकारण्यात आली आहे. देशात बेकायदेशीर प्रवेश केल्याचा ठपका मेहुल चोकसीवर डॉमिनिका सरकारने ठेवला आहे. दरम्यान, त्याच्या वकिलांना दोन मिनिटांसाठी भेट घेण्याची परवानगी देण्यात आली होती. त्यावेळी चोकसीचा फोटो घेण्यात आला. फोटोत तो घाबरलेला दिसत आहे. त्याचा डावा डोळा लाल झाला आहे. तसेच त्याने डाव्या हाताला झालेल्या जखमा दाखवल्या.

मेहुल चोकसीचे जॉली हार्बर येथून अपहरण झाल्याचा दावा त्याचे वकील वेन मार्श यांनी केला. अँटिग्वामधील जॉली हार्बर येथून एका भारतीय वंशाच्या व्यक्तीने चोकसीला बोटीतून डॉमिनिका येथे आणले. यावेळी अँटिगुआ पोलीस देखील या बोटीवर होते. या दरम्यान चोकसीला मारहाण झाली असून त्याच्या अंगावर अनेक जखमा आहेत, असे त्याच्या वकिलाने म्हटले आहे. चोकसी याला न्यायालयात हजर राहून बाजू मांडण्याची संधी मिळावी, अशी विनंती करणारी याचिका चोकसीच्या वकिलाकडून डॉमिनिकाच्या कोर्टात दाखल करण्यात आली आहे.

ब्रेकिंग : PNB घोटाळ्याचा सूत्रधार मेहुल चोकसीला अटक