लाऊड स्पीकर वाद : मुख्यमंत्री योगी यांनी तातडीने दिले ‘हे’ आदेश, उत्तर प्रदेशमध्ये अलर्ट जारी

उत्तर प्रदेश : दिल्लीतील जहांगीरपुरी येथील घटनेनंतर उत्तर प्रदेशमध्ये अलर्ट जारी करण्यात आला आहे. सीएम योगी म्हणाले की, त्यांच्या धार्मिक विचारधारेनुसार प्रत्येकाला त्यांच्या उपासनेची पद्धत पाळण्याचे स्वातंत्र्य आहे. माईकचा वापर करता येईल, मात्र माईकचा आवाज धार्मिक आवारातून बाहेर पडू नये, याची काळजी घेतली पाहिजे. त्यामुळे इतर लोकांची गैरसोय होऊ नये. एवढेच नाही तर नवीन ठिकाणी माईक लावण्यास परवानगी देऊ नये, असे योगींच्या आदेशात म्हटले आहे.

धार्मिक नेत्यांशी संवाद साधा
सीएम योगींनी अधिकाऱ्यांना सूचना केल्या आहेत की, येत्या काही दिवसांत अनेक महत्त्वाचे धार्मिक सण आहेत. रमजानचा महिना सुरू आहे. ईद सण आणि अक्षय्य तृतीया एकाच दिवशी असण्याची शक्यता आहे. अशा स्थितीत सध्याचे वातावरण लक्षात घेता पोलिसांना अधिक संवेदनशील राहावे लागणार आहे. पोलीस ठाण्यापासून ते एडीजीपर्यंत पुढील २४ तासांत आपापल्या भागातील धर्मगुरूंशी, समाजातील इतर प्रतिष्ठित व्यक्तींशी सतत संवाद साधा.

अधिकाऱ्यांनी आपल्या क्षेत्रातच राहावे
सीएम योगी म्हणाले की, तहसीलदार असोत, एसडीएम असोत, एसएचओ असोत किंवा सीओ असोत, सर्वांनी त्यांच्या तैनातीच्या परिसरात रात्री विश्रांती घ्यावी. सरकारी राहण्याची सोय असेल तर तिथेच राहा किंवा भाड्याने राहा, पण रात्री स्वतःच्या परिसरात राहा. या व्यवस्थेचे काटेकोर पालन सुनिश्चित केले पाहिजे. संवेदनशील ठिकाणी अतिरिक्त पोलीस बंदोबस्त तैनात करावा. ड्रोन वापरून परिस्थितीचे निरीक्षण करा. दररोज संध्याकाळी पोलिस दलाने पायी पेट्रोलिंग करणे आवश्यक आहे.

४ मे पर्यंत पोलीस अधिकाऱ्यांच्या रजा रद्द
सण आणि सतर्कता लक्षात घेऊन पोलिस अधिकाऱ्यांच्या सुट्या ४ मे पर्यंत रद्द करण्यात आल्या आहेत. मुख्यमंत्री योगी आदित्यनाथ यांच्या सूचनेनुसार मुख्य सचिवांनी यासंदर्भात आदेश जारी केले आहेत. आधीच रजेवर असलेल्या अधिकाऱ्यांना २४ तासांच्या आत पोस्टिंगच्या ठिकाणी परतण्यास सांगण्यात आले आहे.