दिलासादायक : भारतात बनलेली नेजल व्हॅक्सिन लहान मुलांसाठी ठरू शकते गेम चेंजर, WHO चा दावा

नवी दिल्ली : भारतात कोरोनाच्या तिसऱ्या लाटेचा धोका व्यक्त केला जात असतानाच कोरोनाची तिसरी लाट लहान मुलांसाठी जास्त घातक ठरू शकते असा दावा देखील केला जात आहे. सध्या जगभरात कुठेही 12 वर्षांखालील मुलांना कोरोना लस दिली जात नाही. भारतात अद्याप 18 वर्षांखालील मुलांना देखील लस घेण्यासाठी मंजुरी मिळालेली नाही. मात्र, आता जागतिक आरोग्य संघटनेने एक दिलासादायक माहिती दिली आहे. त्यांच्या मते, कोरोनाची नेजल व्हॅक्सिन (नाकावाटे दिली जाणारी लस) लहान मुलांसाठी गेम चेंजर ठरू शकते.

नेजल लस ही इतर लशींपेक्षा अधिक फायदेशीर ठरणारी असेल, अशी माहिती समोर आली आहे. शिवाय ही लस घेणं देखील सोपं आहे. एका वृत्तवाहिनीशी बोलताना जागतिक आरोग्य संघटनेच्या (WHO) चीफ सायंटिस्ट सौम्या स्वामीनाथन यांनी याबाबत माहिती दिली. त्या म्हणाल्या की, शालेय शिक्षकांनी व्हॅक्सिन घेणे आवश्यक आहे. जेव्हा मुलांमध्ये कोरोना विषाणू प्रसारित होण्याचा धोका कमी होईल तेव्हाच मुलांना शाळेत पाठवावे. भारतात बनलेली नेजल व्हॅक्सिन लहान मुलांसाठी गेम चेंजर ठरू शकते. मुलांना ही लस देणे सोपे आहे. शिवाय ही रेस्पिरेटरी ट्र्रॅकमध्ये प्रतिकारशक्ती वाढवेल.’

दरम्यान, NITI आयोगाचे (आरोग्य) सदस्य व्ही के पॉल म्हणाले की, ‘मुलं कोव्हिड संक्रमित असतील तरी बऱ्याचदा कोणतंही लक्षण नसतं किंवा कमीतकमी लक्षणे दिसून येतात. त्यांना सहसा रुग्णालयात दाखल करण्याची आवश्यकता नसते. परंतु 10-12 वर्षाच्या मुलांवर अधिक लक्ष देणे आवश्यक आहे.

हैदराबादस्थित भारत बायोटेक कंपनीने नेजल व्हॅक्सिनची चाचणी सुरू केली आहे. या लसीद्वारे नाकातून डोस दिले जातील. हे व्हॅक्सिन नाकावाटे दिलं जाणार आहे. नेजल स्प्रेचे केवळ 4 थेंब पुरेसे असतील. दोन्ही नाकपुड्यांमध्ये दोन-दोन थेंब टाकले जातील. क्लिनिकल ट्रायल्स रजिस्ट्रीनुसार, 175 जणांना नेजल लस दिली गेली आहे. त्याचे निष्कर्ष येणं अजून बाकी आहे.