श्रद्धा हत्या प्रकरण : दिल्ली न्यायालयाकडून आफताबच्या नार्को टेस्टला मंजूरी

नवी दिल्ली : आफताब पूनावाला, ज्याने आपली मैत्रिण श्रद्धा वालकर हिची हत्या करून तिच्या शरीराचे तुकडे केले, त्याची नार्को-विश्लेषण चाचणी केली जाणार आहे, कारण तो पोलिसांना चुकीची माहिती देत होता आणि तपासाची दिशाभूल करण्याचा प्रयत्न करत होता. दक्षिण दिल्लीतील साकेत येथील न्यायालयाने आफताब पूनावालाची नार्को चाचणी करण्यास परवानगी दिली आहे.

आफताब याने त्याची मैत्रिण श्रद्धा वालकर हिचा फोन आणि मृतदेह कापण्यासाठी वापरलेल्या हत्यारांचे नेमके काय केले याची चुकीची माहिती देऊन त्याने तपास यंत्रणांची दिशाभूल करण्याचा प्रयत्न केल्याचा पोलिसांना संशय आहे. चौकशीदरम्यान, आफताब पूनावाला आपली उत्तरे बदलत होता, त्याने अगोदर सांगितले की श्रध्दा वालकरचा मोबाईल महाराष्ट्रात फेकून दिला आणि दुसर्‍या वेळी त्याने दिल्लीत फोन टाकून दिल्याचे सांगितले.

दिल्ली पोलीस आता आफताबची नार्को टेस्ट करणार आहेत. यासाठी पोलिसांनी दक्षिण दिल्लीतील साकेत कोर्टाची परवानगी घेतली आहे. आफताब तपास वळविण्याचा प्रयत्न करत असल्याचे पोलीस सूत्रांचे म्हणणे आहे. अशा परिस्थितीत नार्को टेस्टमुळे अनेक गुपिते उघड होण्यास मदत होऊ शकते.

नार्को चाचणी काय आहे?
या चाचणीमध्ये एक औषध इंजेक्शनमधून दिले जाते, ज्यामुळे व्यक्ती ऍनेस्थेसियाच्या विविध टप्प्यात प्रवेश करते, ज्यामुळे संमोहन अवस्था येते आणि व्यक्ती कमी प्रतिबंधित होते, अशावेळी व्यक्तीची अशी माहिती प्रकट करण्याची शक्यता अधिक असते, जी सहसा जाणीव अवस्थेत प्रकट होत नाही. नार्को चाचणीदरम्यान पोलिसांच्या पथकासोबत मानसोपचारतज्ज्ञही असतील.

श्रद्धा आणि आफताब डेटिंग ऍपमुळे आले संपर्कात
बंबल या डेटिंग ऍपच्या माध्यमातून श्रद्धा आणि आफताब एकमेकांच्या संपर्कात आले. नंतर ते एका कॉल सेंटरमध्ये एकत्र काम करू लागले. श्रद्धाच्या कुटुंबीयांनी या नात्यावर आक्षेप घेतल्यानंतर ते दिल्लीला गेले आणि मेहरौलीमध्ये राहू लागले.