कार्यालयात काम सोडून केस विंचरत बसणे हे गंभीर गैरवर्तन – मुंबई उच्च न्यायालय

मुंबई : कार्यालयात काम सोडून केस विंचरत बसणे हे गंभीर गैरवर्तन आहे, असे मत मुंबई उच्च न्यायालयाच्या नागपूर खंडपीठाने व्यक्त केले. बॉसवर हल्ला करणाऱ्या गिरणी कामगाराला कारवाईपासून कोणताही दिलासा देण्यास नकार देत न्यायालयाने ही टिप्पणी केली. रंगराव चौधरी नावाच्या व्यक्तीने कामगार न्यायालयाच्या मे 1995 मधील आदेशाला आव्हान दिले होते. त्याची याचिका न्यायमूर्ती विनय देशपांडे यांच्या खंडपीठाने फेटाळून लावली.

कंपनीने रंगरावविरोधात बॉसवर हल्ला केल्याप्रकरणी पोलिसांत तक्रार दाखल केली होती. तसेच त्याला कामावरून काढून टाकले होते. या प्रकरणात कामगार न्यायालयाने रंगरावची फौजदारी खटल्यातून निर्दोष सुटका केली होती. मात्र तो पुन्हा कार्यालयात रुजू होऊ शकला नाही. याकडे रंगरावने उच्च न्यायालयाचे लक्ष वेधले होते. मात्र न्यायालयाने त्याचे म्हणणे ऐकून घेण्यास नकार दिला.

काय आहे प्रकरण :

अर्जदार रंगराव चौधरी मे 1995 मध्ये नाईट ड्युटीवर होता. त्यावेळी तो मशिनीवरील काम सोडून केस विंचरत बसला होता. वरिष्ठांना हे दिसताच त्यांनी त्याला झापले. त्यामुळे रागाच्या भरात रंगरावने बॉसला लोखंडी रॉड फेकून मारला. त्यात बॉसला गंभीर दुखापत झाली होती. तसेच रंगरावने शिवीगाळही केली होती. यामुळे रंगरावला कामावरून काढून टाकण्यात आले. या कारवाईला रंगरावने कामगार न्यायालयात आव्हान दिले होती. तेथे दिलासा मिळाला नाही म्हणून रंगरावने उच्च न्यायालयात धाव घेतली.

मशिनीवरील काम सोडून केस विंचरत बसणे हे गंभीर स्वरुपाचे गैरवर्तन आहे. याचिकाकर्त्या रंगरावचे कृत्य मनमानी वाटते. वरिष्ठांनी ताकिद दिल्यानंतर रंगराव मशिनवर पुन्हा काम करायला यायचं तर त्याने बॉसलाच शिवीगाळ केली आणि नंतर रॉडने हल्ला केला. हे अत्यंत गंभीर गैरवर्तन आहे, असे न्यायमूर्ती विनय देशपांडे म्हणाले.