सोन्याच्या खाणीजवळ व्हिडिओ शूट करताना 8 मॉडेलवर सामूहिक बलात्कार, 84 जणांना अटक

केपटाऊन : अवैध सोन्याच्या खाणीजवळ म्युझिक व्हिडिओचे शूटिंग करणाऱ्या आठ मॉडेल्सना एका टोळीने पकडले. त्यानंतर या टोळक्याने बंदुकीचा धाक दाखवत या 8 मॉडेलवर सामूहिक बलात्कार केला. या जघन्य गुन्ह्यानंतर याप्रकरणी 84 जणांना अटक करण्यात आली आहे. दक्षिण आफ्रिकेत 28 जुलै रोजी ही घटना घडली आहे.

मिळालेल्या माहितीनुसार, 28 जुलै रोजी जोहान्सबर्गजवळील क्रुगर्सडॉर्प येथील जंगलात एक प्रॉडक्शन टीम म्युझिक व्हिडिओ शूट करण्यासाठी गेली होती. यादरम्यान ही घटना घडली. या टोळीने या महिला आणि कर्मचाऱ्यांचे सर्व सामानही काढून घेतले. या टोळीने कर्मचारी आणि मुलींचे मोबाईल फोन, अंगठ्या, दागिने, हँडबॅग, रोख रक्कम आणि कॅमेरा हे सामानही पद्धतशीरपणे लुटले.

पोलीस म्हणाले की, क्रुगर्सडॉर्पमध्ये जे काही घडले ते संपूर्ण देशासाठी लाजिरवाणे आहे. या घटनेमागे खाणींमध्ये काम करणाऱ्या अवैध स्थलांतरितांचा हात असल्याचे पोलिसांनी म्हटले आहे. याप्रकरणी 84 जणांना अटक करण्यात आली आहे. पोलिसांसोबत झालेल्या चकमकीत दोन आरोपी मारले गेले. एक आरोपी गंभीर जखमी असून त्याला रुग्णालयात दाखल करण्यात आले आहे. अटक केलेल्यांविरुद्ध बेकायदेशीर मुक्काम व चोरीचा खटला न्यायालयात सुरू आहे.

राष्ट्रीय पोलीस प्रमुख फॅनी मासेमोला यांनी सांगितले की, संशयितांचा बलात्काराशी संबंध आहे की नाही याची चौकशी केली जाईल. मात्र, अद्यापपर्यंत सामूहिक बलात्कार प्रकरणात कोणालाही अटक करण्यात आलेली नाही.