पैसे चुकीच्या खात्यात ट्रान्सफर झाले? पैसे परत मिळवण्यासाठी काय कराल? जाणून घ्या…

नवी दिल्ली : डिजिटल बँकिंगमुळे बँकेचे कामकाज खूप सोपे झाले आहे. विशेषत: UPI च्या आगमनाने, कोठूनही पैसे पाठवणे किंवा ऑर्डर करणे खूप सोपे झाले आहे. मात्र, यासोबतच काही धोकेही वाढले आहेत. एका अंकाची जरी चूक झाली तरी तुमचे पैसे चुकीच्या खात्यात ट्रान्सफर होतात. अशा प्रकरणांमध्ये माहितीच्या अभावी लोकांचे मोठे नुकसान होऊ शकते. असं काही झाल्यास, काही सोप्या उपायांनी आपले पैसे परत मिळवता येतात.

मेसेज आणि ईमेल चेक करा
तुम्ही कुठेही पैसे ट्रान्सफर करता तेव्हा तुम्हाला तुमच्या खात्यातून पैसे कापल्याचा एक मेसेज आणि ईमेल मिळतो. पैसे हस्तांतरित केल्यानंतर मेसेज आणि ईमेल तपासून खात्री करा. याद्वारे तुम्हाला लगेच कळू शकते की पैसे चुकीच्या खात्यात गेले आहेत की नाही. जर तुम्ही चुकून पैसे पाठवले असतील तर उशीर न करता तुमच्या बँकेला कळवा. यासाठी बँकेच्या कस्टमर केअरला फोन करता येईल. बँक तुम्हाला यासंबंधीची सर्व माहिती ईमेलवर विचारू शकते. ईमेलमध्ये सर्व पुरावे जोडताना, व्यवहार क्रमांक, रक्कम, कोणत्या खात्यातून पैसे कापले गेले, कोणत्या खात्यात पैसे चुकून ट्रान्सफर झाले, व्यवहाराची तारीख आणि वेळ इत्यादी सर्व माहिती द्या.

बर्‍याच वेळा असे होते की IFSC क्रमांक चुकीचा प्रविष्ट केला किंवा आपण प्रविष्ट केलेले बँक खाते अस्तित्वात नाही. अशा वेळी तुमच्या खात्यातून पैसे कापले जाऊ शकतात. तथापि, अशा परिस्थितीत, जर तुमच्या खात्यातून पैसे कापले गेले, तर रक्कम आपोआप परत जमा होईल. जर पैसे परत आले नाहीत तर तुमच्या बँकेच्या शाखेत जाऊन मॅनेजरकडे तक्रार करा. जर प्रकरण फक्त एकाच शाखेचे असेल तर पैसे लवकर परत मिळतात.

शाखेला भेट देऊन तक्रार करा
ज्या खात्यात पैसे गेले आहेत ते दुसऱ्या बँकेचे किंवा शाखेचे असल्यास पैसे परत मिळण्यास विलंब होऊ शकतो. अशा प्रकरणांमध्ये, पैसे परत मिळण्यासाठी दोन महिन्यांचा कालावधी लागू शकतो. कोणत्या बँकेच्या शाखेने व्यवहारावर प्रक्रिया केली आहे, याची माहिती तुम्हाला तुमच्या बँकेकडून मिळेल. तुम्ही थेट त्याच बँकेच्या शाखेशी संपर्क साधू शकता. संबंधित बँक शाखा त्या व्यक्तीशी संपर्क साधेल आणि पैसे परत करण्यासाठी तिची संमती घेईल, ज्याच्या खात्यातून चुकून पैसे डेबिट झाले आहेत.

कायदेशीर उपाय :
ज्या व्यक्तीच्या खात्यात पैसे गेले आहेत, त्यांनी ते परत करण्यास नकार दिल्यास प्रकरण गुंतागुंतीचे होऊ शकते. अशा परिस्थितीत तुम्हाला न्यायालयाचा आधार घ्यावा लागेल. तुम्हाला न्यायालयाकडून नोटीस पाठवून कायदेशीर कारवाई करावी लागेल. यामध्ये बँकांचा दोष नाही, असे रिझर्व्ह बँकेचे नियम सांगतात. सर्व तपशील तुम्ही स्वत: भरत असल्याने सर्व जबाबदारीही तुमचीच बनते.

आरबीआयचा हा नियम मदत करू शकतो
अशा स्थितीसाठी आरबीआयने आवश्यक उपाययोजना केल्या आहेत. जर तुम्ही पैसे भरले किंवा कुणाला पैसे पाठवले, तर खात्यातून पैसे कापल्याच्या मेसेजमध्ये हे विचारणे आवश्यक आहे की तुम्ही हा व्यवहार चुकून केला आहे का? त्या मेसेजमध्ये नंबर किंवा ईमेल प्रोव्हाइड करणे देखील आवश्यक आहे. जर चुकून पैसे ट्रान्सफर झाले असतील किंवा चुकीच्या खात्यात गेले असतील तर लगेच त्या नंबरवर किंवा ईमेलवर तक्रार करा. चुकून कापलेले पैसे परत मिळवण्याचा हा सर्वात सोपा मार्ग आहे. या प्रक्रियेला वेळही कमी लागतो.