बीटेकच्या विद्यार्थ्याची महाविद्यालयात चाकूने भोसकून हत्या, आरोपींना अटक

लखनौ : एमआयईटी अभियांत्रिकी महाविद्यालयात बुधवारी सकाळी एका बीटेकच्या विद्यार्थ्याची चाकूने भोसकून हत्या करण्यात आली. यानंतर घटनास्थळी एकच खळबळ उडाली. घटनास्थळावरून पळून जाण्याच्या प्रयत्नात असलेल्या दोन आरोपींना सुरक्षारक्षकांनी पकडले. ही घटना उत्तर प्रदेशातील मेरठ जिल्ह्यातील जानी पोलीस स्टेशन परिसरात घडली.

मिळालेल्या माहितीनुसार, बागपतच्या बरौत भागातील शिकोहपूर गावात राहणारा निखिल तोमर मेरठमधील एमआयईटी अभियांत्रिकी महाविद्यालयात बीटेक मेकॅनिकलचा विद्यार्थी होता. काही दिवसांपूर्वी निखिल आणि त्याच्या काही मित्रांचा कॉलेजमधील इतर काही विद्यार्थ्यांसोबत वाद झाला होता. बुधवारी सकाळीही निखिलचा त्याच विद्यार्थ्यांशी वर्गात प्रवेश करण्यावरून वाद झाला. त्यानंतर हा वाद चिघळला आणि आरोपी विद्यार्थ्यांनी मिळून निखिल आणि त्याच्या मित्रांवर हल्ला केला. यावेळी आरोपींनी निखिलवर चाकूने हल्ला करून त्याला गंभीर जखमी केले.

दरम्यान, दोन आरोपी विद्यार्थी घटनास्थळावरून पळून जाण्याच्या प्रयत्नात असताना सुरक्षारक्षकांनी त्यांना पकडले. घटनेनंतर तात्काळ निखिलला सुभारती रुग्णालयात नेण्यात आले. मात्र, तेथे डॉक्टरांनी त्याला मृत घोषित केले. घटनेची माहिती मिळताच पोलीस घटनास्थळी पोहोचले आणि आरोपींना ताब्यात घेतले. सध्या आरोपींची चौकशी सुरू आहे. फॉरेन्सिक टीमला घटनास्थळी पाचारण करण्यात आले आहे. मृत विद्यार्थ्याच्या नातेवाईकांनाही माहिती देण्यात आली आहे.