रायगड/पुणे : पुण्याहून कोकणात फिरायला निघालेल्या तरुणांचा थार एसयूव्हीसह (MH12 YN 8004) ५०० फूट खोल दरीत पडून भीषण अपघात झाला असून, सहा तरुणांचा मृत्यू झाल्याची भीती व्यक्त केली जात आहे. हा हृदय पिळवटून टाकणारा प्रकार रायगड जिल्ह्यातील ताम्हिणी घाटात उघडकीस आला.

उत्तमनगर पोलिसांनी दिलेल्या माहितीनुसार, हा अपघात सोमवार, १७ नोव्हेंबर, मध्यरात्रीनंतर घडला असावा. मात्र, तरुणांच्या पालकांनी मुलं बेपत्ता झाल्याची तक्रार केल्यानंतर याबाबत शोधमोहीम सुरू झाली.

गाडीत प्रवास करणारे तरुण :

1. शहाजी चव्हाण (२२), कोंढवे धावडे, पुणे
2. पुनीत सुधारक शेट्टी (२०), कोपरे गाव, उत्तमनगर, पुणे
3. साहिल साधू बोटे (२४), कोपरे गाव, उत्तमनगर, पुणे
4. श्री महादेव कोळी (१८), कोपरे गाव, भैरवनाथ नगर, पुणे
5. ओंकार सुनील कोळी (१८), कोपरे गाव, भैरवनाथ नगर, पुणे
6. शिवा अरुण माने (१९), कोपरे गाव, भैरवनाथ नगर, पुणे)

पोलिसांनी सीसीटीव्ही फुटेज आणि मोबाईल लोकेशन ट्रॅकिंगच्या आधारे शोध सुरू केला. अखेर गुरुवार, २० नोव्हेंबर रोजी ड्रोनच्या मदतीने शोध घेत असताना ताम्हिणी घाटातील एका तीव्र वळणाजवळ दरीत कोसळलेली थार आणि चार मृतदेह आढळले. उर्वरित दोन मृतदेहांचा शोध सुरू आहे.

या मोहिमेत माणगाव पोलीस, रायगड आपत्ती व्यवस्थापन पथक, मुळशी तालुका आपत्ती व्यवस्थापन समिती, स्थानिक ग्रामस्थ सक्रिय सहभाग घेत आहेत. परंतु, तीव्र उतार, घनदाट जंगल आणि दरीची प्रचंड खोली यामुळे बचावकार्य अत्यंत धोकादायक ठरत आहे.

प्राथमिक तपासानुसार, ही थार गाडी पुण्याहून कोकणात जाताना कोंडेथर गावाजवळील एका तीव्र वळणावरून घसरून दरीत कोसळली. ताम्हिणी घाटात अशा अपघातांची वारंवार पुनरावृत्ती होते. घाटातील लोखंडी संरक्षणरेलिंग अत्यंत कमजोर आणि अपुरे असल्याचे स्थानिकांचे म्हणणे आहे. स्थानिक सामाजिक कार्यकर्ते प्रमोद बलकवडे, शेलार मामा आणि अंकुश ढमाले यांनी तातडीने प्रबलित सुरक्षा रेलिंग, वेग नियंत्रक, चेतावणी फलक बसवावेत, अशी मागणी प्रशासनाकडे केली आहे. दरीत सापडलेल्या मृतांची अधिकृत ओळख अद्याप जाहीर करण्यात आलेली नाही. उर्वरित मृतदेहांचा शोध सुरू असून बचाव पथक अतिशय कठीण परिस्थितीत कार्यरत आहे.

The post भीषण अपघात! ताम्हिणी घाटात ५०० फूट खोल दरीत कोसळली थार; सहा तरुणांच्या मृत्यूची शक्यता, बचावकार्य सुरू appeared first on थोडक्यात घडामोडी.

अहिल्यानगर : अतिवृष्टीमुळे निर्माण झालेल्या पुरस्थितीचा तातडीने सामना करण्यासाठी राष्ट्रीय आपत्ती प्रतिसाद दल (NDRF) पुणे येथील पथकास कर्जत तालुक्यातील मलठण खताळ वस्ती परिसरात तैनात करण्यात आले होते. या पथकाने आज राबविलेल्या मोहिमेत पुरात अडकलेल्या ४४ नागरिकांची सुरक्षित सुटका केली.

कमांडंट संतोष बहादूर सिंह यांच्या मार्गदर्शनाखालील पथकाने परिसरात पाणी व चिखलमय स्थिती तसेच ऊसशेतीमुळे बोटसह बोटीवरील बाह्य इंजिन वापरणे अशक्य असल्याने दोरीच्या सहाय्याने नागरिकांना सुरक्षित स्थळी हलविले. या कारवाईत सर्व नागरिकांची सुरक्षिततेने सुटका करण्यात आली.

स्थानिक प्रशासन, राज्य आपत्ती व्यवस्थापन प्राधिकरण (SDMA), भारतीय हवामान विभाग (IMD) व धरण प्राधिकरणाशी समन्वय साधून NDRF पुणे पथक सातत्याने कार्यरत आहे. नागरिकांचे प्राण वाचविण्यासाठी व आपत्ती व्यवस्थापनासाठी पुणे तुकडी सदैव सज्ज असल्याचे एनडीआरएफ कडून कळविण्यात आले आहे.

The post अहिल्यानगर जिल्ह्यातील ४४ नागरिकांची एनडीआरएफ कडून यशस्वी सुटका appeared first on थोडक्यात घडामोडी.

मुंबई : मुंबईसह राज्यात सुरू असलेल्या मुसळधार पावसाच्या पार्श्वभूमीवर उपमुख्यमंत्री एकनाथ शिंदे यांनी आज दुपारी मंत्रालयातील राज्य आपत्कालीन कार्य केंद्राला भेट देऊन पावसामुळे उद्भवलेल्या परिस्थितीचा आढावा घेतला. बीड जिल्ह्यातील आष्टी पाथर्डी तालुक्यातील काही गावांना पुराच्या पाण्याने वेढल्याने अडकलेल्या ४० ग्रामस्थांना एनडीआरएफच्या मदतीने एअरलिफ्ट करून सुरक्षित ठिकाणी हलवावे असे निर्देश उपमुख्यमंत्री एकनाथ शिंदे यांनी दिले. अतिवृष्टी असलेल्या जिल्ह्यातील जिल्हाधिकाऱ्यांशी यावेळी त्यांनी संवाद साधत मदत आणि बचावकार्याबाबत माहिती घेतली आणि जिल्हा प्रशासनाला सतर्कतेच्या सूचना दिल्या.

दुपारी बाराच्या सुमारास उपमुख्यमंत्र्यांनी या कक्षाला भेट दिली. यावेळी उपमुख्यमंत्र्यांचे प्रधान सचिव नविन सोना, कार्य केंद्राचे संचालक डॉ. भालचंद्र चव्हाण आदी उपस्थित होत. यावेळी डॉ. चव्हाण यांनी राज्यातील परिस्थीतीची माहिती दिली. यावेळी त्यांनी पुणे, छत्रपती संभाजीनगर आणि मुंबई महानगरपालिकेच्या अधिकाऱ्यांशी फोनवर बोलून त्यांच्याकडून पावसाची परिस्थिती जाणून घेतली. तसेच मुंबईत जिथे जिथे पाणी साचल्याच्या तक्रारी येत आहेत तिथे अतिरीक्त मनुष्यबळ तैनात करून लवकरात लवकर पाण्याचा निचरा होण्यासाठी पंप बसविण्याचे निर्देशही त्यांनी दिले.

पुण्यात आणि राज्यात इतर ठिकाणी पडलेल्या पावसाचा आढावा घेतला. आष्टी पाथर्डी तालुक्यातील काही गावांना पुराच्या पाण्याने वेढल्याने त्यात ४० गावकरी अडकून पडले होते. त्यांना एनडीआरएफच्या मदतीने एअरलिफ्ट करून काढावे लागेल असे संभाजीनगरच्या जिल्हाधिकाऱ्यांनी सांगितले. त्यानुसार नाशिक वरून हेलिकॉप्टर बोलवून या अडकलेल्या लोकांना तत्काळ एअरलिफ्ट करून सुरक्षित ठिकाणी हलवावे असे निर्देश उपमुख्यमंत्री शिंदे यांनी दिले. तसेच छत्रपती संभाजीनगर विभागाचे विभागीय आयुक्तांशी देखील त्यांनी या कक्षातून संवाद साधला.

भारतीय हवामान विभागाने पुढील पाच दिवसांसाठी दिलेल्या हवामान अंदाजानुसार पावसाची परिस्थिती कशी राहणार आहे त्यानुसार आपत्ती नियंत्रणासाठी जिल्हा प्रशासनाने दक्षता घेण्याचे शिंदे यांनी यावेळी सांगितले.

गेल्या २४ तासात सचेत ॲपच्या माध्यमातून राज्यभरात पावसाचा अलर्ट देणारे ३५ कोटी मेसेज पाठविण्यात आल्याची माहिती, डॉ. चव्हाण यांनी यावेळी दिली.

The post मुसळधार पावसाच्या पार्श्वभूमीवर मदत आणि बचावकार्यासाठी जिल्हा प्रशासनाने सतर्क रहावे – उपमुख्यमंत्री एकनाथ शिंदे appeared first on थोडक्यात घडामोडी.

पुणे : मावळ तालुक्यातील कुंडमळा येथे रविवारी (दि. १५ जून) जुना लोखंडी पूल तुटून घडलेल्या दुर्घटनेत ४ पर्यटकांचा दुर्दैवी मृत्यू झाला. तथापि, घटनेची माहिती मिळताच जिल्हा प्रशासनाने राष्ट्रीय आपत्ती प्रतिसाद दल, स्थानिक पोलीस, शिवदुर्ग संस्था, आपदा संस्था तसेच स्थानिक नागरिकांच्या सहकार्याने गतीने बचावकार्य केल्यामुळे ५१ पर्यटकांना सुरक्षित बाहेर काढण्यात यश मिळाले.

घटनेची माहिती मिळताच बचावकार्यासाठी या ठिकाणी २५ रुग्णवाहिका तैनात करण्यात आल्या होत्या. स्थानिक लोकप्रतिनिधींनीदेखील जागेवर पोहोचून काही हायड्रा मशीन जागेवर मागवल्या. सर्व पथकांनी ने एकत्रित येऊन काम चालू केले. स्थानिक नागरीकांनीही जखमींना बाहेर काढण्यासाठी मदत केली. या ठिकाणी किमान २५० स्वयंसेवक काम करत होते.

प्रथम जे लोक जिवंत आहेत त्यांना वाचवण्यासाठी प्राधान्य देण्यात आले. तळेगाव येतील ग्रामीण रुग्णालय, अथर्व हॉस्पिटल, पवना हॉस्पिटल, युनिक हॉस्पिटल, बडे हॉस्पिटल येथे जखमींना दाखल करण्यात आले आहे. आज अखेर 35 जखमी रुग्णांवर उपचार करुन त्यांना घरी सोडण्यात आले असून, 11 जखमी रुग्णांवर रुग्णालयात उपचार सुरु असल्याचे प्रशासनातर्फे कळविण्यात आले आहे.

अतिदक्षता उपचारांची गरज असलेल्या जखमींना तत्काळ आयसीयूमध्ये हलविण्यात आले. आयसीयूमधील रुग्णांची काल रात्री आपत्ती व्यवस्थापन मंत्री गिरीश महाजन यांनी रुग्णालयात जाऊन विचारपूस केली व डॉक्टरांना योग्य ते उपचार करण्यासाठी सूचना दिल्या.

कुंडमळा येथील घटनास्थळी मदत व पुनर्वसन मंत्री मकरंद जाधव पाटील, विधानसभा उपाध्यक्ष अण्णा बनसोडे, आमदार सुनिल शेळके यांनी भेट देऊन माहिती घेतली व सर्व यंत्रणंना तात्काळ मदतीच्या सूचना दिल्या.

यावेळी विभागीय आयुक्त डॉ. चंद्रकांत पुलकुंडवार, पिंपरी चिंचवड शहरचे पोलीस आयुक्त विनय कुमार चौबे, जिल्हाधिकारी जितेंद्र डूडी, जिल्हा परिषदेचे मुख्य कार्यकारी अधिकारी गजानन पाटील आदी घटनास्थळी उपस्थित होते.

कालपासून आपत्ती निवारण कक्ष तहसील कार्यालयात कार्यान्वित करण्यात आला आहे. कोणत्याही पर्यटकाची हरवल्याबाबत तक्रार आज सांयकाळपर्यंत प्राप्त झालेली नाही. त्यामुळे शेवटी आज सायंकाळी 6 वाजता बचावकार्य थांबविले असल्याची माहिती मावळचे उपविभागीय अधिकारी सुरेंद्र नवले यांनी दिली आहे. आजच्या शोध मोहिमेत वन्यजीव संस्था, आपदा मित्र, रोहा व महाड येथील आपत्ती व्यवस्थापन संस्था यांनी देखील भाग घेतला. यावेळी पोलीस उपायुक्त विशाल गायकवाड, बापू बांगर, तहसीलदार विक्रम देशमुख, नायब तहसीलदार गणेश तळेकर, अविनाश पिसाळ, पोलीस निरीक्षक रणजित जाधव आदी उपस्थित होते.

The post कुंडमळा येथे वेगवान बचावकार्यामुळे ५१ पर्यटकांना सुरक्षित बाहेर काढण्यात यश appeared first on थोडक्यात घडामोडी.

हिंगोली : शेतमजूर घेऊन जाणारा ट्रॅक्टर थेट विहीरीमध्ये कोसळून भीषण अपघात झाला आहे. नांदेड शहरापासून दहा किलो मीटर दूर असलेल्या आलेगाव शिवारात हा अपघात झाला आहे. टॅक्टर साठ फूट खोल विहिरीत कोसळला असून विहिरीमध्ये ट्रॅक्टर पूर्णपणे बुडाला आहे. ट्रॅक्टरचे केवळ एक टायर दिसत आहे. या घटनेत सात महिला शेतमजूरांचा मृत्यू झाला आहे, तर काहीजण जखमी झाले आहेत.

मिळालेल्या माहितीनुसार, हिंगोलीच्या वसमत तालुक्यातील गुंज गावातील शेतकरी महिला मजूर ट्रॅक्टरमध्ये बसून हळद काढण्यासाठी निघाल्या होत्या. दगडू शिंदे यांच्या शेतात काम करण्यासाठी हे मजूर आले होते. यावेळी चालकाचे नियंत्रण सुटल्याने ट्रॅक्टर विहिरीत कोसळला. या घटनेची माहिती मिळताच ग्रामस्थांनी घटनास्थळी धाव घेत मदतकार्य सुरू केले. यावेळी दोन महिलांसह एका पुरुषाला वाचवण्यात यश आहे. पुरुभाबाई कांबळे, पार्वती बुरड, सटवाजी जाधव यांना वाचवण्यात यश आले आहे. ताराबाई जाधव, धरूपता जाधव, मीना राऊत, ज्योती सरोदे, चौथराबाई पारधे, सरस्पती भूरड, सिमरन कांबळे अशा एकूण सात महिलांचा मूत्यू झाला आहे. हिंगोली सह नांदेड पोलीस देखील घटनास्थळी दाखल झाले आहेत.

The post ट्रॅक्टर मजुरांसह ६० फूट खोल विहिरीत कोसळला, सात महिला शेतमजूरांचा मृत्यू appeared first on थोडक्यात घडामोडी.

पुणे : पुणे शहराच्या सांगवी भागात राहणारी 21 वर्षीय मानसी प्रशांत गोविंदपूरकर हिचा मृतदेह बुधवारी सकाळी लोहगड किल्ल्याच्या पायथ्याशी असलेल्या नवग्रह मंदिराजवळ आढळला. मानसी 18 मार्च 2025 पासून बेपत्ता होती, आणि तिचा शोध घेतला जात होता.

मानसी लोहगड किल्ल्यावर एकटीच गेली होती, तिने तिथे पोहोचण्यासाठी खाजगी टॅक्सी बुक केली होती. सीसीटीव्ही फुटेजमध्ये सकाळी ८:५६ वाजता तिकीट कार्यालयाजवळ ती दिसली होती, परंतु तिच्या परत येण्याची कोणतीही नोंद नव्हती. पिंपरी चिंचवड पोलिसांनी तपास सुरू केला आणि टॅक्सी चालकाचा शोध घेतला, ज्याने पुष्टी केली की त्याने तिला किल्ल्यावर सोडले होते आणि ती एकटीच होती.

दरम्यान, तिच्या कुटुंबीयांनी आणि पोलिसांनी शोध मोहीम सुरू केली होती. सकाळपासून पिंपरी चिंचवड पोलिसांच्या पथकांनी किल्ल्याच्या आसपास शोध घेतला. शिवदुर्ग बचाव पथकाने लोहगड किल्ल्याच्या परिसरात शोध सुरू ठेवला, आणि अखेर नवग्रह मंदिराजवळ झुडुपात मानसीचा मृतदेह आढळला. बचाव पथकाने मृतदेह बाहेर काढून स्ट्रेचरमध्ये पॅक केला आणि तो पोलिसांच्या ताब्यात दिला.

मृत्यूचे कारण अद्याप स्पष्ट झालेले नाही आणि हा अपघात होता की घातपात हे शोधण्यासाठी पोलिस पुढील तपास करत आहेत. किल्ल्यावर काय घडलं हे स्पष्ट करण्यासाठी पोलिस सीसीटीव्ही फुटेज, टॅक्सी चालकाची साक्ष, आणि इतर पुरावे तपासत आहेत.

The post लोहगड किल्ल्याच्या पायथ्याशी आढळला 21 वर्षीय तरुणीचा मृतदेह appeared first on थोडक्यात घडामोडी.

झारखंड : देवघर रोपवे दुर्घटनेच्या बचाव कार्यादरम्यान पुन्हा एकदा मोठी दुर्घटना घडली आहे. यावेळी एक महिला अपघाताची बळी ठरली आहे. तिला देवघर सदर रुग्णालयात पाठवले, मात्र डॉक्टर तिला वाचवू शकले नाही. ट्रॉलीच्या केबिनमधून बाहेर काढल्यानंतर तिला उचलत असताना महिला खाली पडली आणि जखमी होऊन तिचा मृत्यू झाला. या अपघातात आतापर्यंत चार जणांचा मृत्यू झाला असून त्यात तीन महिला आणि एका तरुणाचा समावेश आहे. शोभा देवी असे मृत महिलेचे नाव असून त्या देवघर येथील झांसागढी येथील रहिवासी आहेत.

मिळालेल्या माहितीनुसार, त्रिकूट पर्वत रोपवे ट्रॉली क्रमांक ७ मधून हेलिकॉप्टरच्या मदतीने लोकांना बाहेर काढण्यात येत होते. यादरम्यान एका महिलेला हेलिकॉप्टरमधून सोडलेल्या दोरीच्या सहाय्याने केबिनमधून बाहेर काढण्यात आले. गरुड कमांडोचे जवान तिला बाहेर काढत होते. हेलिकॉप्टरमध्ये वरच्या दिशेने नेण्याऐवजी काही कारणास्तव महिलेला खाली उतरवले जात होते. यादरम्यान दोरीला जोरदार धक्का बसला. महिला ज्या दोरीने लटकत होती ती दोरी केबिनमध्ये कुठेतरी अडकली आणि बाहेर पडल्यानंतर जोरदार धक्का बसला आणि ती खाली जाऊ लागली, मात्र दोरीला दुसरा धक्का बसला आणि महिला खाली आली.

सोमवारची दुर्घटना पाहता हवाई दलाच्या जवानांनी रेस्क्यू हेलिकॉप्टरच्या खाली जाळी टाकली होती, जेणेकरून कोणी खाली पडल्यास त्याचा जीव वाचू शकेल. बचावादरम्यान महिला हेलिकॉप्टरपर्यंत पोहोचण्यापूर्वी घसरली आणि खाली पडली. ती जाळीवर पडली आणि तिला तातडीने रुग्णालयात नेण्यात आले, मात्र डॉक्टर तिला वाचवू शकले नाही.

मीडिया रिपोर्ट्सनुसार, महिला डोंगरावरून खाली पडली आणि दोरी तुटल्यामुळे जखमी झाली. सोमवारी बचाव कार्यादरम्यान दुमका येथील एक पुरुष हेलिकॉप्टरमधून सुमारे 2000 फूट उंचीवरून खाली पडला. त्याचा लगेच मृत्यू झाला होता. यापूर्वी रविवारी दोन महिलांचा मृत्यू झाला होता. दरम्यान, आता हे रेस्क्यू ऑपरेशन संपलं असून इतर सर्वांना जवानांनी सुखरूप बाहेर काढलं आहे.

The post देवघर रोपवे दुर्घटना : बचाव कार्यादरम्यान पुन्हा मोठी दुर्घटना, 1500 फूट उंचीवरून पडून महिलेचा मृत्यू appeared first on थोडक्यात घडामोडी.

तामिळनाडू : तामिळनाडूमध्ये भारतीय लष्कराचे हेलिकॉप्टर कोसळले आहे. सीडीएस जनरल बिपीन रावत हेलिकॉप्टरमध्ये असल्याची प्राथमिक माहिती आहे. पोलीस घटनास्थळी दाखल झाले आहेत. निलगिरी पर्वत रांगामध्ये आज दुपारी १२ वाजून ४० मिनिटांनी ही घटना घडली आहे. ४ जणांचे मृतदेह आढळून आले आहेत. इतरांना रुग्णालयात दाखल करण्यात आलं आहे. दरम्यान, सीडीएस बिपीन रावत यांना हॉस्पिटलमध्ये दाखल करण्यात आल्याची माहिती मिळाली आहे. या दुर्दैवी घटनेत ३ गंभीर जखमी झाले आहेत.

तामिळनाडूच्या कुन्नूरमध्ये हे हेलिकॉप्टर कोसळलं आहे. हवाई दलाचे हे Mi-17V5 हेलिकॉप्टर होते. सीडीएस जनरल बिपीन रावत हे या हेलिकॉप्टरमध्ये प्रवास करत होते. या प्रकरणी चौकशीचे आदेश देण्यात आले आहेत, अशी माहिती हवाई दलाने दिली आहे.

हेलिकॉप्टरमध्ये सीडीएस बिपीन रावत यांच्यासह जवळपास १४ जण होते. रावत यांच्यासह हेलिकॉप्टरमध्ये लष्कराचे वरिष्ठ अधिकारी, आणि रावत यांची पत्नी या हेलिकॉप्टर मध्ये होते. हे हेलिकॉप्टर हवाई दलाच्या तळावरून कुन्नूरकडे जात होते. दोन मृतदेह ८० टक्के जळालेल्या स्थितीत आढळून आले आहेत. इतर मृतदेह बाहेर काढण्याचे प्रयत्न सुरू आहेत.

The post लष्कराचे हेलिकॉप्टर कोसळले, सीडीएस बिपीन रावत रुग्णालयात दाखल appeared first on थोडक्यात घडामोडी.