पुणे : वाकड परिसरात २८ वर्षीय सॉफ्टवेअर इंजिनिअर महिलेची लग्नाच्या आमिषाने तब्बल ४२.६४ लाख रुपयांची फसवणूक करण्यात आल्याचा प्रकार समोर आला आहे. आरोपीने स्वतःची ओळख इस्रोतील शास्त्रज्ञ म्हणून करून दिली होती.

पीडित महिला हिंजवडी येथील एका नामांकित आयटी कंपनीत कार्यरत आहे. आरोपीची ओळख जयेश पाटील उर्फ आदर्श म्हात्रे अशी असून तो अलिबाग येथील रहिवासी असल्याचे पोलिस तपासात निष्पन्न झाले आहे.

मिळालेल्या माहितीनुसार, नोव्हेंबर २०२४ मध्ये या तरुणीने एका वैवाहिक वेबसाइटवर प्रोफाइल तयार केले. त्याच काळात आरोपीने तिच्याशी संपर्क साधला. संवाद वाढवत त्याने प्रत्यक्ष भेट घेतली आणि स्वतः इस्रोमध्ये कार्यरत असल्याचा दावा केला. हळूहळू त्याने विश्वास संपादन करत एकत्र राहण्याचे, मालमत्ता खरेदी करण्याचे आणि भविष्याची स्वप्ने दाखवली. नोव्हेंबर २०२४ ते जानेवारी २०२५ दरम्यान, विविध कारणे सांगत त्याने पैशांची मागणी केली. पीडितेने टप्प्याटप्प्याने एकूण ४२.६४ लाख रुपये त्याच्या खात्यात जमा केले.

दरम्यान, आरोपी इस्रोमध्ये नोकरी करत नसल्याची माहिती मिळाल्यानंतर पीडितेला संशय आला. तिने तत्काळ ऑनलाइन तक्रार नोंदवली. वाकड पोलिसांनी तातडीने तपास सुरू केला. सायबर यंत्रणांच्या मदतीने १६.६५ लाख रुपये गोठवून जप्त करण्यात आले. उर्वरित अंदाजे २७ लाख रुपयांचा शोध सुरू आहे.

प्राथमिक चौकशीत आरोपीने अशाच प्रकारे सुशिक्षित महिलांना लक्ष्य केल्याचे स्पष्ट झाले आहे. यापूर्वीही नवी मुंबई पोलिसांनी आरोपीला फसवणुकीच्या प्रकरणात अटक केली होती. तपासात आरोपीने गोव्यातील कॅसिनोसह विलासी जीवनासाठी ही रक्कम खर्च केल्याचेही समोर आले आहे.

सध्या आरोपी ४ मार्चपर्यंत नवी मुंबई पोलिसांच्या कोठडीत असून, रिमांड संपल्यानंतर वाकड पोलिस त्याला पुढील चौकशीसाठी ताब्यात घेणार आहेत.

मॅट्रिमोनियल साईट आणि सोशल मीडिया प्लॅटफॉर्मवर वाढत्या फसवणुकीच्या घटनांमुळे सायबर सुरक्षेचा प्रश्न ऐरणीवर आला आहे. तज्ज्ञांच्या मते, आर्थिक व्यवहार करण्यापूर्वी ओळख आणि नोकरीची खातरजमा करणे अत्यावश्यक आहे.

The post पुण्यात सॉफ्टवेअर इंजिनिअर महिलेला ४२.६४ लाखांचा गंडा, मॅट्रिमोनियल फ्रॉडचा धक्कादायक प्रकार appeared first on थोडक्यात घडामोडी.

पुणे : पुणे शहरातील वाघोली परिसरात एक अत्यंत हृदयद्रावक आणि संतापजनक घटना उघडकीस आली आहे. वाघोलीतील बीएआयएफ (BAIF) रोड परिसरात राहणाऱ्या एका महिलेने आपल्या 11 वर्षांच्या मुलाचा गळा चिरून निर्घृण खून केल्याची घटना समोर आली आहे. याच वेळी तिने 13 वर्षांच्या मुलीवरही जीवघेणा हल्ला केला आहे.

पोलिसांच्या प्राथमिक माहितीनुसार, आरोपी महिलेचे नाव सोनी संतोष जायभाय असे आहे. रागाच्या भरात किंवा मानसिक तणावातून सोनी हिने आपला मुलगा साईराज संतोष जायभाय (वय 11) याच्यावर धारदार शस्त्राने वार केले. या हल्ल्यात साईराजचा जागीच मृत्यू झाला.

यानंतर आरोपी महिलेने आपली मोठी मुलगी धनश्री (वय 13) हिच्यावरही प्राणघातक हल्ला चढवला. गंभीर जखमी अवस्थेत रक्ताच्या थारोळ्यात पडलेल्या धनश्रीला तातडीने रुग्णालयात दाखल करण्यात आले असून तिची प्रकृती चिंताजनक असल्याची माहिती डॉक्टरांनी दिली आहे.

जायभाय कुटुंब मूळचे नांदेड जिल्ह्यातील कंधार तालुक्यातील असून उदरनिर्वाहासाठी काही वर्षांपूर्वी पुण्याच्या वाघोली परिसरात स्थलांतरित झाले होते. घटनेची माहिती मिळताच वाघोली पोलिसांनी तात्काळ घटनास्थळी धाव घेत आरोपी सोनी जायभाय हिला ताब्यात घेतले आहे.

मात्र, एका आईने आपल्या पोटच्या लेकरांबाबत इतके टोकाचे पाऊल का उचलले, यामागचे नेमके कारण अद्याप अस्पष्ट आहे. कौटुंबिक वाद, आर्थिक अडचणी किंवा मानसिक आजार; या सर्व शक्यतांचा विचार करत पोलिसांकडून सखोल तपास सुरू आहे. या घटनेमुळे संपूर्ण पुणे शहरात खळबळ उडाली आहे.

The post पुणे हादरलं! आईकडूनच 11 वर्षीय मुलाची निर्घृण हत्या, मुलीची प्रकृती चिंताजनक appeared first on थोडक्यात घडामोडी.

पुणे : पुण्यातील कोंढवा परिसरातील इस्कॉन चौक येथे आज सकाळी साडेसातच्या सुमारास भीषण रस्ते अपघात घडला. या अपघातात जेएसपीएम संस्थेत शिक्षिका म्हणून कार्यरत असलेल्या ५३ वर्षीय रमा कापडी यांचा दुर्दैवी मृत्यू झाला आहे.

मिळालेल्या प्राथमिक माहितीनुसार, रमा कापडे या कात्रज–कोंढवा रोडवरून दुचाकीवरून जात असताना त्या चुकून विरुद्ध दिशेने गेल्या. याचवेळी समोरून येणाऱ्या भरधाव ट्रकने त्यांना जोरदार धडक दिली. धडकेनंतर त्या गंभीर जखमी झाल्या.

अपघातानंतर घटनास्थळी मोठी वाहतूक कोंडी झाली. त्यामुळे रुग्णवाहिकेला घटनास्थळी पोहोचण्यास सुमारे ३० मिनिटांचा विलंब झाला. जखमी अवस्थेत रमा कापडे यांना तातडीने जवळील भारतीय विद्यापीठ रुग्णालयात दाखल करण्यात आले. मात्र उपचार सुरू होण्यापूर्वीच डॉक्टरांनी त्यांचा मृत्यू झाल्याचे घोषित केले. त्यामुळे काही काळ परिसरात तणावाचे वातावरण निर्माण झाले होते.

या प्रकरणी कोंढवा पोलीस ठाण्यात अपघाताची नोंद करण्यात आली असून, ट्रक चालकाची भूमिका, वाहतुकीचे नियोजन आणि अपघाताचे नेमके कारण याबाबत पोलीस अधिक तपास करत आहेत.

विशेष म्हणजे, या साडेतीन किलोमीटर लांबीच्या कात्रज–कोंढवा रोडवर गेल्या साडेचार वर्षांत ५५ हून अधिक अपघात झाले आहेत, ज्यामुळे २५ जणांचा मृत्यू झाला आहे. यामुळे या मार्गावर रस्ते सुरक्षा उपायांची तातडीने गरज असल्याचे स्थानिक लोकांचे म्हणणे आहे.

The post कात्रज–कोंढवा रोडवर भीषण अपघात, वाहतूक कोंडीमुळे मदत मिळण्यास विलंब झाल्याने जेएसपीएमच्या शिक्षिकेचा दुर्दैवी मृत्यू appeared first on थोडक्यात घडामोडी.

पुणे : पुणे जिल्ह्यातील मावळ तालुक्यात एक अत्यंत धक्कादायक आणि संतापजनक घटना उघडकीस आली आहे. अवघ्या पाच वर्षांच्या चिमुकलीवर बलात्कार करून तिची निर्घृण हत्या करण्यात आल्याची माहिती समोर आली असून, या घटनेमुळे संपूर्ण परिसरात तीव्र संताप व्यक्त केला जात आहे.

ही घटना शनिवारी (१३ डिसेंबर) सायंकाळी सुमारे सहा वाजण्याच्या सुमारास घडली. संबंधित चिमुकली घरातून अचानक बेपत्ता झाल्याचे निदर्शनास आले. रात्री आई कामावरून घरी परतल्यानंतर मुलगी दिसत नसल्याने तिने तातडीने परिसरात शोध घेतला. मात्र मुलगी सापडली नाही. त्यानंतर आईने पोलिस ठाण्यात धाव घेतली.

पोलिसांनी प्रकरणाचे गांभीर्य लक्षात घेऊन तातडीने तपास सुरू केला. पिंपरी–चिंचवड पोलिसांनी तातडीने शोध मोहीम सुरू केली. पोलिसांच्या प्राथमिक तपासात असे निष्पन्न झाले की, ही चिमुकली घरात अनेकदा एकटी राहायची, याच गोष्टीचा फायदा आरोपीने घेतला. शनिवारी मुलगी घरात एकटी असताना समीर कुमार मंडळ (वय ३० ते ३५, विवाहित) या आरोपीने तिला चॉकलेटचे आमिष दाखवून घराजवळच काही अंतरावर नेले. तेथे तिच्यावर अत्याचार केला आणि नंतर गळा दाबून तिची हत्या केल्याचे पोलिसांनी स्पष्ट केले.

पोलीस चौकशीत संपूर्ण घटना उघडकीस आली असून, आरोपीला पोलिसांनी अटक केली आहे. आरोपीविरोधात गंभीर कलमांखाली गुन्हा दाखल करण्यात आला असून पुढील तपास सुरू आहे. या प्रकरणातील सर्व लोक शिरगाव परंडवाडी परिसरातील एका चाळीत राहतात. आरोपी हा पीडित मुलगी आणि तिच्या कुटुंबाचा शेजारी आहे.

या अमानुष घटनेमुळे मावळ परिसरात संतापाची लाट उसळली असून, नागरिकांकडून आरोपीला कठोरात कठोर शिक्षा देण्याची मागणी केली जात आहे. पोलिस प्रशासनाने परिसरात बंदोबस्त वाढवला असून नागरिकांना शांतता राखण्याचे आवाहन करण्यात आले आहे.

The post पुणे हादरले! पाच वर्षांच्या चिमुकलीवर अत्याचार करून निर्घृण हत्या, परिसरात तीव्र संतापाची लाट appeared first on थोडक्यात घडामोडी.

पुणे : नवले पुल परिसरात झालेल्या कंटेनर ट्रक अपघाताबाबत प्रादेशिक परिवहन कार्यालयाने (आरटीओ) प्राथमिक निष्कर्ष जाहीर केले आहेत. आरटीओच्या मते, हा अपघात वाहन चालकाने कंटेनरवरील नियंत्रण गमावल्यानंतर झाल्याची शक्यता अधिक असून, ब्रेक फेल झाल्याचे कोणतेही ठोस पुरावे आढळलेले नाहीत.

पुणे आरटीओच्या फ्लाइंग स्क्वॉडने गुरुवार आणि शुक्रवारी दोन दिवस तपासणी केली. या तपासात असे आढळले की अपघातानंतर ट्रकच्या पुढील भागाला मोठी आग लागली होती. या आगीत वाहनाचे मोठ्या प्रमाणावर नुकसान झाल्यामुळे, यांत्रिक बिघाड किंवा ब्रेक फेल झाल्याची शक्यता तपासकर्ते निश्चित करू शकले नाहीत.

“अपघातग्रस्त वाहनाची तपासणी केल्यानंतर असे दिसून आले की आगीमुळे वाहनाचे गंभीर नुकसान झाले आहे. त्यामुळे अपघाताचे अचूक कारण समजणे कठीण आहे. मात्र, प्राथमिक अंदाजानुसार चालकाने वाहनावरील नियंत्रण गमावल्यामुळे हा अपघात झाला असावा,” असे प्रादेशिक परिवहन अधिकारी (आरटीओ) अर्चना गायकवाड यांनी सांगितले.

आरटीओकडून सर्व औपचारिक प्रक्रिया पूर्ण झाल्यानंतर या प्रकरणाचा सविस्तर अहवाल सादर करण्यात येणार आहे.

The post नवले ब्रिज अपघात प्रकरण : कंटेनरचे ब्रेक फेल झाल्याचे ठोस पुरावे नाहीत, आरटीओचा प्राथमिक अहवाल appeared first on थोडक्यात घडामोडी.