बुलढाणा : केंद्र सरकारच्या फुड स्ट्रीट योजने अंतर्गत विदर्भातील शेगांव आणि मराठवाडा विभागातील शिर्डी येथे फुड स्ट्रीट हबला केंद्र सरकारच्या वतीने मान्यता देण्यात आली आहे. या योजने अंतर्गत दोन्हीही धार्मिक स्थळी प्रत्येकी १ कोटी या प्रमाणे २ कोटी रुपयांचा निधी केंद्र सरकारच्या वतीने उपलब्ध करुन दिला जाणार आहे. या फुड स्ट्रीट हब सेंटर लोकांच्या सेवेसाठी उपलब्ध करुन देण्यात येणार आहे. केंद्रीय आरोग्य मंत्रालय आणि भारतीय अन्न सुरक्षा आणि मानके प्राधिकरण यांच्या संयुक्त विद्यमाने ही सेवा देशांतर्गत १०० ठिकाणी राबविण्यात येणार आहे.

रस्त्यावरील खाद्यपदार्थामुळे होणारे आजार, अन्नातून होणारी विषबाधा रोखण्यासाठी अन्न हाताळणीची सुरक्षित मानके देशभर लागू करण्यात आली आहे. त्यानुसार केंद्रीय आरोग्य मंत्रालय आणि भारतीय अन्न सुरक्षा आणि मानके प्राधिकरण यांच्या वतीने देशभरात १०० फुड स्ट्रीट योजना राबविण्यात येत आहे. या योजनेअंतर्गत विदर्भाची पंढरी म्हणून ओळख असलेल्या संतनगरी शेगांव येथे १ कोटी रुपये खर्चून आधुनिक स्वच्छ आणि “आरोग्यदायी” स्वच्छ फुड स्ट्रीट विकसित केल्या जाणार आहे. असेच फुड स्ट्रीट हब साई बाबांच्या शिर्डीतही उभारल्या जाणार आहे. पंतप्रधान नरेंद्र मोदी यांच्या नेतृत्वातील सरकारने महाराष्ट्रातील दोन्ही धार्मिक स्थळांवर हे फुड स्ट्रीट हब विकसित करण्याला मान्यता दिली आहे.

त्यामुळे विदर्भाच्या पंढरीत येणाऱ्या संत गजानन महाराजांच्या भक्तांना तसेच साईबाबांच्या भक्तांना शिर्डीत दर्जेदार आणि पौष्टीक अन्न सेवा या हबच्या माध्यमातून मिळणार आहे. शिवाय लघु व्यावसायिक विक्रेत्यांना रोजगाराची चालना मिळणार आहे. लाखो भाविकांचे श्रद्धास्थान असलेल्या महाराष्ट्रातील शेगांव आणि शिर्डी येथे फुड स्ट्रीट हब मंजुर केल्याबद्दल पंतप्रधान नरेंद्र मोदी यांचे केंद्रीय आयुष आरोग्य व कुटुंब कल्याण राज्यमंत्री प्रतापराव जाधव यांनी आभार व्यक्त केले आहेत.

The post भाविकांसाठी आनंदाची बातमी; धार्मिक स्थळांवर मिळणार दर्जेदार आणि पौष्टिक अन्न सेवा सुविधा appeared first on थोडक्यात घडामोडी.

मुंबई : राज्यातील सर्व नगरपरिषदा व नगरपंचायतींमध्ये वैशिष्ट्यपूर्ण व नवीन नगरपंचायत, नगरपालिका योजनेअंतर्गत एक उद्यान विकसित करण्याचा निर्णय घेण्यात आला आहे. त्यासाठी प्रत्येकी एक कोटी रुपयांचा निधी मंजूर करतानाच या उद्यानांना ‘नमो उद्यान’ नाव देण्याची घोषणा उपमुख्यमंत्री एकनाथ शिंदे यांनी केली. या निर्णयामुळे राज्यातील एकूण ३९४ नगरपरिषद आणि नगरपंचायतींमध्ये नमो उद्यान वर्षभरात विकसित करण्यात येतील. देशाचे पंतप्रधान नरेंद्र मोदी यांच्या ७५ व्या वाढदिवसानिमित्त महाराष्ट्राने दिलेली ही भेट असल्याचे उपमुख्यमंत्री शिंदे यांनी यावेळी सांगितले.

नव्याने विकसित झालेल्या या उद्यानांची विभागीय स्तरावर स्पर्धा आयोजित करण्यात येणार आहे. त्या माध्यमातून प्रत्येक विभागातून ३ नगरपरिषद/नगरपंचायतींना बक्षिसे देखील देण्याचा निर्णय उपमुख्यमंत्री शिंदे यांनी जाहीर केला आहे.

नमो उद्यानांच्या स्पर्धेत प्रथम, द्वितीय आणि तृतीय क्रमांकाचे पारितोषिक संबंधित स्थानिक स्वराज्य संस्थांना जाहीर करण्यात येतील. त्यामध्ये प्रथम क्रमांकासाठी पाच कोटी, द्वितीय तीन कोटी तर तृतीय क्रमांकासाठी एक कोटी रुपये अशी बक्षिसाची रक्कम अतिरिक्त विकास निधी म्हणून विजेत्या नगरपरिषदा आणि नगरपंचायतींना देण्यात येणार आहे.

The post राज्यात ३९४ नगरपरिषदा, नगरपंचायतींमध्ये नमो उद्यान विकसित करणार; प्रत्येक उद्यानासाठी १ कोटी रुपयांचा निधी appeared first on थोडक्यात घडामोडी.

मुंबई : गणेशोत्सव हा महाराष्ट्राचा मानबिंदू. या उत्सवासाठी कोकणात तसेच राज्यभरात इतरत्र जाण्यासाठी गणेशभक्तांना प्रवास करावा लागतो. या प्रवासासाठी रेल्वेचा आधार महत्वाचा ठरतो. यासाठी यंदा भारतीय रेल्वेने दरवर्षी पेक्षा यंदा ३६७ जादा फेऱ्यांसाठी रेल्वेगाड्या सोडण्याची नियोजन केल्याची माहिती रेल्वे मंत्री अश्विनी वैष्णव यांनी दिली आहे.

मुख्यमंत्री देवेंद्र फडणवीस यांनी ही माहिती देतानाच, राज्यातील तमाम गणेशभक्तांच्यावतीने पंतप्रधान नरेंद्र मोदी, रेल्वे मंत्री अश्विनी वैष्णव यांचे आभार मानले आहे.

आगामी गणेशोत्सवाच्या नियोजनाच्या अनुषंगाने महाऱाष्ट्र शासनाने रेल्वे मंत्री आणि भारतीय रेल्वेला गणेशभक्तांच्या सुविधेसाठी जादा गाड्या सोडण्याची मागणी केली होती. या मागणीला प्रतिसाद म्हणून केंद्रीय रेल्वे मंत्री कोकणात तसेच अन्यत्र जाणाऱ्या गणेशभक्तांच्या सोयीसाठी दरवर्षी पेक्षा जादाच्या ३६७ फेऱ्यांचे नियोजन केले जाईल, असे पत्रोत्तर दिले आहे, असे, मुख्यमंत्री फडणवीस यांनी सांगितले.

मुंबईत राहणारे कोकणवासी गणेशभक्त गणेशोत्सवासाठी मोठ्या संख्येने मुळगावी कोकणात जातात. तसेच राज्याच्या अन्यभागातील नागरिक देखील या सणासाठी प्रवास करतात. या सगळ्यांची या जादाच्या फेऱ्यांमुळे सोय होणार आहे. राज्यातील गणेशभक्तांसाठी हा मोठा दिलासा आहे. त्यामुळे पंतप्रधान नरेंद्र मोदी आणि केंद्रीय मंत्री अश्विनी वैष्णव यांचे आभार मानत असल्याचेही मुख्यमंत्री फडणवीस यांनी माध्यमांशी संवाद साधताना सांगितले.

The post गणेशभक्तांसाठी यंदा रेल्वेच्या ३६७ जादा फेऱ्या appeared first on थोडक्यात घडामोडी.

अहमदाबाद : अहमदाबाद विमान अपघातात सर्वत्र मृत्यूचे तांडव घडत असताना एकमेव प्रवासी जीवंत बचावले — विश्वास कुमार रमेश! पंतप्रधान नरेंद्र मोदी यांनी आज अहमदाबादमधील रुग्णालयात दाखल असलेल्या विश्वास यांची वैयक्तिकरित्या भेट घेतली आणि त्यांच्या प्रकृतीची विचारपूस केली.

विश्वास कुमार रमेश हे एअर इंडियाच्या अहमदाबादहून लंडनकडे निघालेल्या फ्लाईट AI171 मध्ये प्रवास करत होते. बोईंग 787-8 ड्रीमलाइनरच्या इकॉनॉमी क्लासमधील 11A क्रमांकाची खिडकीजवळची सीट त्यांची होती — जी आपत्कालीन बाहेर पडण्याच्या दरवाज्याजवळ आहे.

अपघाताचा थरारक क्षण
“विमान धावपट्टीवर वेग घेत असताना काहीसं विचित्र वाटलं. पाच-दहा सेकंदांसाठी सर्व काही थांबल्यासारखं वाटलं आणि अचानक हिरव्या-पांढऱ्या दिव्यांची झळक दिसली. असं वाटलं की पायलट टेकऑफसाठी शेवटपर्यंत प्रयत्न करत होता, पण काही क्षणांतच विमान थेट वसतिगृहाच्या इमारतीवर आदळलं,” असं विश्वास यांनी सांगितलं.

त्यांच्या मते, ज्या भागात ते बसले होते तो भाग इमारतीच्या खालच्या भागात आदळला असावा. “कदाचित मी माझ्या सीटसह खाली पडलो आणि मी कसा तरी बाहेर पडण्यात यशस्वी झालो. दरवाजा तुटलेला असल्याने समोर काही जागा दिसताच मी बाहेर पळालो,” असं त्यांनी सांगितलं. “माझ्या डोळ्यांसमोर दोन एअर होस्टेस, एक काका-काकू आणि इतर अनेक प्रवासी जळून गेले. दुसऱ्या बाजूला एक भिंत होती — कदाचित कोणीही तिथून बाहेर पडू शकले नाही,” असे त्यांनी अश्रू दाटलेल्या डोळ्यांनी सांगितले.

अपघातात त्यांचा डावा हात गंभीर भाजला असून सुदैवाने त्यांचे प्राण वाचले. “मी बाहेर आलो आणि काही सेकंदातच संपूर्ण विमान आगीच्या भक्ष्यस्थानी गेले. जर मी काही क्षण उशिरा बाहेर पडलो असतो, तर मीही त्या आगीत अडकून गेलो असतो,” असे त्यांनी सांगितले.

फ्लाइट AI171 अपघाताचा मृत्यूतांडव
या भीषण अपघातात आतापर्यंत २६५ प्रवाशांचा मृत्यू झाल्याची अधिकृत माहिती समोर आली आहे. सरकारी यंत्रणा मदतीसाठी सतर्क असून, अपघाताची चौकशी सुरू आहे.

विशेष म्हणजे, 11A ही सीट इकॉनॉमी क्लासच्या पहिल्या रांगेतील असून ती आपत्कालीन दरवाज्याजवळ आहे. हीच जागा विश्वास कुमार रमेश यांना जीवनदान देणारी ठरली.

The post अहमदाबाद विमान अपघातातून वाचलेले एकमेव प्रवासी – विश्वास कुमार रमेश यांनी सांगितला थरारक अनुभव… appeared first on थोडक्यात घडामोडी.

मुंबई : अमृत भारत स्थानक योजनेतून मुंबई शहराचे वैभव आणि युनेस्को जागतिक वारसास्थळ असलेल्या छत्रपती शिवाजी महाराज टर्मिनस इमारतीचा पुनर्विकास करण्यात येणार असून यासाठी दोन हजार आठशे कोटी रुपयांचा निधी उपलब्ध होणार असल्याचे मुख्यमंत्री देवेंद्र फडणवीस यांनी सांगितले.

अमृत भारत रेल्वे स्टेशन योजनेतून पुनर्विकसित करण्यात आलेल्या देशातील १०३ रेल्वे स्थानकांचे प्रधानमंत्री नरेंद्र मोदी यांच्या हस्ते आज लोकार्पण झाले. बिकानेर येथे आयोजित या कार्यक्रमामध्ये राज्यपाल सी. पी. राधाकृष्णन आणि मुख्यमंत्री फडणवीस परळ रेल्वे स्थानक येथून दूरदृष्य प्रणालीद्वारे सहभागी झाले. यावेळी मुख्यमंत्री फडणवीस यांनी माध्यमांशी कार्यक्रमानंतर संवाद साधला.

मुख्यमंत्री देवेंद्र फडणवीस म्हणाले, वंदे भारत रेल्वे, नमो भारत रेल्वे, अमृत भारत रेल्वे अशा रेल्वेच्या माध्यमातून भारतीय रेल्वेचा कायापालट होत आहे. जर्मनीच्या रेल्वे जाळ्यापेक्षा जास्त लांबीचे रेल्वेचे जाळे प्रधानमंत्री मोदी यांच्या मार्गदर्शनात मागील ११ वर्षात उभारले आहे. विमानतळांच्या धर्तीवर सर्व रेल्वे स्थानकांचा विकास करण्यात येत आहे. विमानतळ परिसरात उपलब्ध असलेल्या अत्याधुनिक सोयी सुविधा या अमृत भारत रेल्वे स्टेशनच्या माध्यमातून आता सर्वसामान्य नागरिकांसाठीही उपलब्ध असणार आहेत. मुंबईतील परळ, चिंचपोकळी, माटुंगा आणि वडाळारोड या उपनगरीय स्थानकांसह राज्यातील १५ स्थानकांचा पुनर्विकास पूर्ण झाला असून त्याचे लोकार्पण करण्यात आले. जगातील आधुनिक रेल्वे प्रणालीमध्ये आता भारतीय रेल्वेचा समावेश होत असल्याचेही मुख्यमंत्री फडणवीस यांनी सांगितले.

The post देशातील १०३, मुंबईतील परळ, चिंचपोकळी, माटुंगा आणि वडाळारोडसह राज्यातील १५ रेल्वे स्थानकांचे प्रधानमंत्री नरेंद्र मोदी यांच्या हस्ते लोकार्पण appeared first on थोडक्यात घडामोडी.

काँग्रेसचे खासदार शशि थरूर यांनी पंतप्रधान नरेंद्र मोदी आणि केरळचे मुख्यमंत्री पिनाराई विजयन यांची खुलेआम प्रशंसा केल्यानंतर पक्षाच्या गोटात गदारोळ उडाला आहे. त्यावर आता काँग्रेसने थरूर यांच्यावर टीका सुरू केली आहे. थरूर यांनी काँग्रेसच्या राष्ट्रीय अध्यक्षपदाच्या निवडणुकीत भाग घेतला होता, आणि आता त्यांच्या वादग्रस्त विधानामुळे काँग्रेसमध्ये मोठा राजकीय भूकंप होण्याची शक्यता वर्तवली जात आहे.

थरूर यांचा इशारा आणि पक्ष सोडण्यावर स्पष्टीकरण
शशि थरूर यांनी पंतप्रधान मोदी आणि पिनाराई विजयन यांच्या नेतृत्वातील सरकारची प्रशंसा केली होती. यामुळे काँग्रेसमध्ये त्यांच्यावर टीका सुरू झाली. त्या संदर्भात थरूर यांनी थेट इशारा दिला आहे की, “मी पक्षासाठी उपलब्ध आहे, पण जर पक्षाला माझ्या सेवेची आवश्यकता नसेल, तर माझ्याकडे दुसरा पर्याय उपलब्ध आहे.” या विधानामुळे काँग्रेसमध्ये त्यांची स्थिती आणखी चर्चेत आली आहे.

थरूर यांनी स्पष्ट केले की, त्यांनी काँग्रेस सोडण्याचा कोणताही विचार केला नाही आहे. “आमच्यात विचारांबाबत मतभेद असले तरी, काँग्रेस सोडण्याचा विचार आम्ही करू शकत नाही,” असे त्यांनी सांगितले. तरीही, त्यांच्या इशाऱ्यातून राजकीय वर्तुळात चर्चांना उधाण आले आहे.

काँग्रेसला केरळमध्ये मजबूत नेतृत्वाची आवश्यकता
शशि थरूर यांनी काँग्रेसला केरळमध्ये एक मजबूत नेतृत्व आवश्यक असल्याचे सांगितले आहे. त्यांनी काँग्रेसला केरळ राज्यात आपला मतदारवर्ग वाढवण्याचे आवाहन केले आहे. “केरळमध्ये काँग्रेसला योग्य नेतृत्वाची गरज आहे, हे मी इतर नेत्यांना सांगितले आहे,” असं त्यांनी सांगितलं. तसेच, त्यांनी पक्षाच्या राज्यातील नेतृत्व बदलण्याची आवश्यकता व्यक्त केली.

थरूर यांचा दुसरा इशारा: केरळमध्ये व्होटर बेस वाढवण्याची गरज
थरूर यांनी आणखी एक महत्त्वाचा इशारा दिला आहे. “जर काँग्रेसने केरळमध्ये आपला व्होटर बेस वाढवला नाही, तर तिसऱ्या वेळेस विरोधी पक्षात बसावे लागेल,” असा इशारा त्यांनी दिला आहे. केरळमध्ये पुढील वर्षी विधानसभेच्या निवडणुका होणार आहेत, त्यामुळे थरूर यांचे हे विधान अत्यंत महत्त्वपूर्ण मानले जात आहे.

काँग्रेसमध्ये मोठा राजकीय भूकंप होईल का?
शशि थरूर यांचे हे विधान काँग्रेसमध्ये मोठ्या राजकीय भूकंपाची शक्यता दर्शवते. त्यांच्या या इशाऱ्यामुळे काँग्रेसच्या अंतर्गत राजकारणात एक नवा वाद सुरु होण्याची शक्यता आहे. आता काँग्रेसने काय पाऊल उचलते याकडे सर्वांचे लक्ष लागले आहे.

The post शशि थरूर यांचा काँग्रेसला थेट इशारा: काँग्रेसमध्ये आजवरच्या सर्वात मोठ्या राजकीय भूकंपाची शक्यता? appeared first on थोडक्यात घडामोडी.

गुजरात : पंतप्रधान नरेंद्र मोदी यांनी गुजरातमधील गांधीनगरमध्ये सहकार से समृद्धी कार्यक्रमाला संबोधित केले. यावेळी पंतप्रधान मोदी म्हणाले की, आज आपण सहकाराच्या समृद्धीवर चर्चा करत आहोत. गावांच्या स्वावलंबनासाठी सहकार हे एक उत्तम माध्यम आहे. त्यात स्वावलंबी भारताची ऊर्जा आहे. स्वावलंबी भारताच्या उभारणीसाठी गावे स्वावलंबी होणे अत्यंत आवश्यक आहे. त्यामुळे पूज्य बापू आणि सरदार पटेल यांनी दाखवलेल्या मार्गानुसार आज आपण आदर्श सहकारी गावाकडे वाटचाल करत आहोत.

पंतप्रधान मोदी म्हणाले की आज स्वावलंबी शेतीसाठी देशातील पहिल्या नॅनो युरिया लिक्विड प्लांटचे उद्घाटन करताना मला विशेष आनंद होत आहे. आता एका बाटलीत युरियाच्या पोत्याइतकी शक्ती असते. नॅनो युरियाची सुमारे अर्धा लिटर बाटली, शेतकऱ्याची एक पोते युरियाची गरज भागवेल. 7-8 वर्षांपूर्वीपर्यंत बहुतेक युरिया शेतात जाण्याऐवजी काळ्याबाजाराला बळी पडत असे आणि शेतकऱ्याला आपल्या गरजेसाठी लाठ्या खाव्या लागत होत्या. आमच्या ठिकाणचे मोठे कारखानेही नवीन तंत्रज्ञानाअभावी बंद पडले.

पंतप्रधान मोदी म्हणाले की, 2014 मध्ये आमचे सरकार आल्यानंतर आम्ही युरियावर 100 टक्के निम कोटिंगचे काम केले. त्यामुळे देशातील शेतकऱ्यांना पुरेशी युरिया उपलब्ध झाली. यासह, आम्ही यूपी, बिहार, झारखंड, ओडिशा आणि तेलंगणामधील 5 बंद खत कारखाने पुन्हा सुरू करण्याचे काम सुरू केले. 50 किलोच्या युरियाच्या पिशवीची किंमत 3,500 रुपये आहे, ज्या युरियाची भारत विदेशातून आयात करतो, परंतु देशात तीच युरियाची पिशवी शेतकऱ्याला केवळ 300 रुपयांना दिली जाते. म्हणजेच आपले सरकार युरियाच्या एका पोत्यावर ३,२०० रुपयांचा भार उचलते.

शेतकऱ्यांना कोणतीही अडचण येऊ नये, यासाठी प्रयत्न

देशातील शेतकऱ्याला कोणतीही अडचण येऊ नये यासाठी केंद्र सरकारने गेल्या वर्षी खतामध्ये 1.60 लाख कोटी रुपयांची सबसिडी दिली आहे, असेही पंतप्रधान मोदी म्हणाले. शेतकऱ्यांना हा दिलासा यंदा 2 लाख कोटी रुपयांहून अधिक असणार आहे. देशातील शेतकऱ्यांच्या हितासाठी जे काही आवश्यक आहे ते आम्ही करू आणि देशातील शेतकऱ्यांची शक्ती वाढवत राहू, असेही ते म्हणाले.

स्वावलंबन हाच समस्यांवर उपाय

पंतप्रधान मोदी म्हणाले की, याआधीच्या सरकारमध्ये समस्यांवर तात्काळ उपाय सापडले. गेल्या 8 वर्षांत आम्ही तातडीने उपाययोजना करून समस्यांवर कायमस्वरूपी उपाय शोधले आहेत. स्वावलंबनात भारताच्या अनेक अडचणींवर उपाय आहे. स्वावलंबनाचे एक मोठे मॉडेल सहकारी आहे. गुजरातमध्ये आम्ही हे मोठ्या यशाने अनुभवले आहे आणि तुम्ही सर्व मित्र या यशाचे लढवय्ये आहात.

The post शेतकऱ्यांना कोणतीही अडचण येऊ नये यासाठी प्रयत्नशील, काय म्हणाले पंतप्रधान मोदी जाणून घ्या… appeared first on थोडक्यात घडामोडी.

नवीन वर्षाचं स्वागत करण्यासाठी जम्मूमधील कटरा इथल्या वैष्णो देवी मंदिरात भाविकांची गर्दी झाली होती. ह्या गर्दीत चेंगराचेंगरी झाली या दुर्घटनेत 2 महिलांसह 12 भाविकांचा आतापर्यंत मृत्यू झाल्याची माहिती आहे. तसेच २० पेक्षा अधिकजण जखमी झाले असल्याची माहिती आहे.

Extremely saddened by the loss of lives due to a stampede at Mata Vaishno Devi Bhawan. Condolences to the bereaved families. May the injured recover soon. Spoke to JK LG Shri @manojsinha_ Ji, Ministers Shri @DrJitendraSingh Ji, @nityanandraibjp Ji and took stock of the situation.

— Narendra Modi (@narendramodi) January 1, 2022

पंतप्रधान मोदी यांनी या चेंगराचेंगरीच्या दुर्घटनेबाबत शोक व्यक्त केला आहे.

स्थानिक अधिकाऱ्यांनी दिलेल्या माहितीनुसार या दुर्घटनेत अनेकजण जखमी झाल्याची माहिती आहे. जखमी भाविकांना उपचारासाठी रुग्णालयात दाखल करण्यात आले असून बचावकार्य सरु आहे. जखमींना नारायण रुग्णालयात नेण्यात येत असून, एकूण जखमींच्या संख्येबाबत अधिक माहिती स्पष्ट झाली नाही. माता वैष्णोदेवी मंदिर परिसरात अचानकपणे झालेल्या या चेंगराचेंगरीचे नेमके कारण समजू शकलेले नाही.

या घटनेची माहिती होताच बचाव पथक तसेच जवान यांच्याकडून बचावकार्य केले जात आहे. जखमी भाविकांना मंदिर परिसरातून हलवून रुग्णालयात दाखल केले जात आहे.

हेल्पलाइन क्रमांक 01991-234804, 01991-234053 हे एलजी जम्मू आणि काश्मीर आणि श्री माता वैष्णो देवी श्राइन बोर्डाच्या कार्यालयाने जारी केले आहेत. याशिवाय, इतर हेल्पलाइन क्रमांकांवरही माहिती मिळवता येईल: पीसीआर कटरा: 01991232010 / 9419145182, पीसीआर रियासी 0199145076 / 9622856295, डीसी ऑफिस रियासी कंट्रोल रूम: 01991232010 / 9196232010 / 9419145182.

The post महत्वाची बातमी : वैष्णोदेवी मंदिरात चेंगराचेंगरीमुळे 12 जणांचा मृत्यू, या हेल्पलाइन नंबरवर कॉल करा, प्रियजनांची माहिती मिळवा… appeared first on थोडक्यात घडामोडी.

नवी दिल्ली : पंतप्रधान नरेंद्र मोदी यांनी ‘ठेवीदार प्रथम – गॅरंटीड टाईमबाऊंड डिपॉझिट इन्शुरन्स पेमेंट रु. 5 लाख’ या कार्यक्रमाला संबोधित केले. यादरम्यान पीएम मोदींनी सांगितले की, ज्यांचे पैसे बँकांमध्ये अडकले आहेत अशा ठेवीदारांना एकूण 1300 कोटी रुपये दिले गेले आहेत. कार्यक्रमात पंतप्रधान नरेंद्र मोदी म्हणाले की, अनेक दशकांपासून चालत आलेल्या एका मोठ्या समस्येवर आज तोडगा निघाला आहे. पंतप्रधान मोदींनी ठेव विमा क्रेडिट गॅरंटी कॉर्पोरेशन (DICGC) कायद्यांतर्गत बँक ठेवींवर उपलब्ध असलेल्या 5 लाख रुपयांच्या हमीबद्दल माहिती दिली.

या कार्यक्रमाला केंद्रीय अर्थमंत्री निर्मला सीतारामन, अर्थ राज्यमंत्री आणि आरबीआयचे गव्हर्नरही उपस्थित होते. विज्ञान भवनात झालेल्या कार्यक्रमात ते म्हणाले की, कोणताही देश त्यांच्या समस्यांचे वेळीच निराकरण करूनच समस्या गंभीर होण्यापासून वाचवू शकतो. पण वर्षानुवर्षे समस्या टाळण्याकडे कल होता. आजचा नवा भारत समस्या सोडवण्यावर भर देतो.

ते पुढे म्हणाले की, आपल्या देशातील बँक ठेवीदारांसाठी विमा प्रणाली 60 च्या दशकात तयार करण्यात आली होती. यापूर्वी बँकेत जमा केलेल्या रकमेपैकी फक्त 50 हजार रुपयांपर्यंतच्या रकमेची हमी होती. नंतर ती वाढवून एक लाख रुपये करण्यात आली. म्हणजेच बँक बुडली तर ठेवीदारांना फक्त एक लाख रुपयांपर्यंतच रक्कम मिळण्याची तरतूद होती. गरिबांची चिंता समजून, मध्यमवर्गीयांची चिंता समजून आम्ही ही रक्कम पाच लाखांपर्यंत वाढवली.

याशिवाय हे पैसे कधी मिळणार, याचीही कालमर्यादा नव्हती. ठेवीदारांना बँकेत अडकलेले स्वत:चेच पैसे मिळवण्यासाठी अनेक वर्षे लागायची. आता बँक बुडल्यानंतर ९० दिवसांच्या आत हे पैसे द्यावे लागतील. आता कोणतीही बँक अडचणीत आली तर ठेवीदारांना 5 लाख रुपये नक्कीच मिळतील. यामध्ये सुमारे 98 टक्के खात्यांचा समावेश करण्यात आला आहे. त्यामुळे सुमारे ठेवीदारांचे 76 लाख कोटी रुपये पूर्णपणे सुरक्षित आहेत. असे सर्वसमावेशक सुरक्षा कवच विकसित देशांमध्येही नाही.

बँक सर्वांसाठी उपलब्ध
पूर्वी गरीब माणसाची समजूत होती की फक्त मोठे लोकच बँकेत खाते उघडतात आणि मोठ्या लोकांनाच कर्ज मिळते. पण जन धन योजना आणि स्ट्रीट व्हेंडर लोन योजनेमुळे ही धारणा बदलली आहे. जन धन योजनेंतर्गत उघडण्यात आलेल्या करोडो बँक खात्यांपैकी निम्म्याहून अधिक खाती महिलांकडे आहेत. या बँक खात्यांचा महिलांच्या आर्थिक सक्षमीकरणावर परिणाम होतो.

लहान बँकांचे मोठ्या बँकांमध्ये विलीनीकरण करून त्यांचे सक्षमीकरण
गेल्या काही वर्षांत सार्वजनिक क्षेत्रातील अनेक छोट्या बँकांचे मोठ्या बँकांमध्ये विलीनीकरण करून त्यांची क्षमता, क्षमता आणि पारदर्शकता प्रत्येक प्रकारे बळकट केली आहे. रिझर्व्ह बँक जेव्हा सहकारी बँकांवर देखरेख ठेवते तेव्हा सर्वसामान्य ठेवीदारांचा त्यांच्यावरील विश्वासही वाढेल. देशाच्या समृद्धीमध्ये बँकांचा मोठा वाटा आहे. आणि बँकांच्या भरभराटीसाठी ठेवीदारांचे पैसे सुरक्षित राहणेही तितकेच महत्त्वाचे आहे. बँक वाचवायची असेल तर ठेवीदारांना संरक्षण द्यावे लागेल.

आता 24 तास व्यवहार
आज भारतातील सामान्य नागरिक दिवसातील 24 तास कधीही, कुठेही, डिजिटल पद्धतीने अगदी लहान व्यवहारही करू शकतो. काही वर्षांपूर्वीपर्यंत याचा विचार करणे तर दूरच, भारताच्या क्षमतेवर अविश्वास असलेले लोक त्याची खिल्ली उडवत असत.

येथे समस्या केवळ बँक खात्याचीच नाही, तर दुर्गम खेड्यांपर्यंत बँकिंग सेवा पोहोचविण्याचीही होती. आज देशातील जवळपास प्रत्येक गावात 5 किमीच्या परिघात बँकेची शाखा किंवा बँकिंग करस्पाँडंटची सुविधा आहे.

The post पंतप्रधान मोदींची मोठी घोषणा, बँक बुडाली तरी सुरक्षित राहतील तुमचे पैसे appeared first on थोडक्यात घडामोडी.

पुणे : पंतप्रधान कार्यालयाकडून फोन आल्यानंतर पुण्यात उभारलेलं मोदी मंदिर हटवण्यात आलं आहे. पंतप्रधान नरेंद्र मोदी यांच्या एका समर्थकाने औंध परिसरात मोदी मंदिराची उभारणी केली होती. पण आता पंतप्रधान कार्यालयाकडून देण्यात आलेल्या आदेशानंतर ही मूर्ती हटवण्यात आली आहे.

भारतीय जनता पक्षाचे कार्यकर्ते आणि नमो प्रतिष्ठानचे अध्यक्ष मयूर मुंडे यांनी औंध भागातील परिहार चौकात पंतप्रधान नरेंद्र मोदींचं हे मंदिर उभारलं होतं. या मंदिरात मोदी यांचा अर्धपुतळा बसविण्यात आला होता. त्यासाठी मुंडे यांनी १ लाख ६० हजार रुपयांचा खर्च केला होता. या मंदिराजवळ पंतप्रधान मोदींसाठी लिहिलेल्या विशेष आरतीचा बॅनरही लावण्यात आला होता. हे मंदिर पाहण्यासाठी नागरिकांनी गर्दी केली होती. मात्र या मंदिराच्या उभारणीशी शहर भाजपाचा कोणत्याही प्रकारचा संबंध नसल्याचे शहराध्यक्ष योगेश मुळीक यांनी स्पष्ट केलं होतं.

The post ‘त्या’ एका फोननंतर हटवण्यात आलं पुण्यातील मोदी मंदिर appeared first on थोडक्यात घडामोडी.