आयुष्य…
कधी हसवणारं, कधी रडवणारं, तर कधी पूर्णपणे थांबलेलं वाटणारं.
काही दिवस असे येतात की, सकाळ उजाडली तरी मनात अंधार दाटलेला असतो. कुणाशी बोलावंसं वाटत नाही, काही करावंसं वाटत नाही… आणि हळूहळू माणूस स्वतःच्याच विचारांच्या गर्तेत अडकत जातो. यालाच आपण नैराश्य म्हणतो.

पण लक्षात ठेवा —
नैराश्य ही अवस्था आहे. नैराश्य म्हणजे आयुष्याचा शेवट नाही, तर स्वतःला नव्याने ओळखण्याची सुरुवात आहे.

स्वतःशी मैत्री करा
सर्वात आधी स्वतःला दोष देणं थांबवा. तुम्ही कमजोर नाही; तुम्ही थकलेले आहात. स्वतःशी मृदू रहा—जसं तुम्ही आपल्या जवळच्या माणसाशी असता.
स्वतःशी प्रामाणिक व्हा. “मला त्रास होतोय”, “मला मदत हवी आहे” हे मान्य करणं ही कमजोरी नाही, तर मोठी ताकद आहे. भावना दडपून ठेवल्या तर त्या ओझं बनतात. कुणावर तरी विश्वास ठेवून मन मोकळं करा — मित्र, जोडीदार, कुटुंबातील व्यक्ती किंवा तज्ज्ञ.

प्रत्येक दिवस एक नवी संधी
काल जे झालं, ते बदलता येत नाही.
पण आज काय करायचं, हे पूर्णपणे आपल्या हातात आहे.

लहान गोष्टींनी सुरुवात करा —
सकाळी सूर्यप्रकाशात थोडा वेळ उभं राहणं, आवडती चहा-कॉफी शांतपणे पिणं, आवडतं गाणं ऐकणं…
हे सगळं क्षुल्लक वाटेल, पण ह्याच गोष्टी मनाला हळूहळू उभं करतात.

शरीर हलवा, मन हलकं होईल
व्यायाम म्हणजे फक्त वजन कमी करणं नाही.
चालणं, योग, प्राणायाम, नृत्य किंवा साधं स्ट्रेचिंगसुद्धा मनातील नकारात्मकतेला बाहेर काढायला मदत करतं. शरीर हललं की मनही हलतं — ही शास्त्रीय सत्यता आहे.

स्वतःची तुलना थांबवा
सोशल मीडियावर सगळ्यांचं आयुष्य परिपूर्ण दिसतं.
पण सत्य असं आहे की, प्रत्येक जण आपापल्या लढाया लढतोय.
तुमचा प्रवास वेगळा आहे, तुमची गती वेगळी आहे — आणि ते पूर्णपणे ठीक आहे.

मदत घेण्यात लाज बाळगू नका
डॉक्टरकडे जाणं, समुपदेशन घेणं, औषधं घेणं —
ही कमजोरी नाही.
जसं शरीर आजारी पडलं की आपण उपचार घेतो, तसंच मनासाठीही उपचार आवश्यक असतात.

स्वतःसाठी जगा
इतरांसाठी सगळं करताना स्वतःला विसरू नका. इतरांच्या अपेक्षांच्या ओझ्याखाली स्वतःला हरवू नका.
तुम्हालाही आनंदाचा, शांततेचा, प्रेमाचा पूर्ण हक्क आहे.

आयुष्य परफेक्ट असण्याची गरज नाही, ते जगण्यासारखं नक्कीच आहे, भरभरून जगा.
आज तुम्ही थकलेले असाल, हरलेले वाटत असाल — तरीही लक्षात ठेवा,
हा शेवट नाही, तुमची कथा अजून संपलेली नाही.

हेच तर आहे जीवन…
कधी अश्रूंनी भरलेलं, तर कधी आशेने उजळलेलं…
अंधार कितीही दाट असला, तरी उजेडाचा एक किरण नक्कीच वाट पाहत असतो.
यालाच जीवन ऐसे नाव!

The post याला जीवन ऐसे नाव! स्वतःला नैराश्याच्या गर्तेतून बाहेर काढा, जीवन भरभरून जगण्यासाठी ‘या’ गोष्टी करा… appeared first on थोडक्यात घडामोडी.

पुणे : आजकालच्या जीवनशैलीत मानसिक तणाव, चिंता आणि असुरक्षिततेमुळे अनेक जण मनःशांती गमावतात. मानसिकदृष्ट्या स्ट्रॉंग व्यक्ती मात्र प्रत्येक परिस्थितीत विचारपूर्वक निर्णय घेतो आणि जीवनात पुढे जात राहतो. मानसिकदृष्ट्या स्ट्रॉंग व्यक्ती म्हणजे केवळ संकटांना सामोरे जाणारा नाही, तर तो स्वतःच्या भावना आणि विचारांवर नियंत्रण ठेवतो, सकारात्मक दृष्टीकोन ठेवतो आणि आयुष्यातील प्रत्येक परिस्थितीत स्थिर राहतो. मानसिक मजबुती ही फक्त जन्मजातच असते असे नाही; ती शिकता येते आणि विकसित केली जाऊ शकते.

मानसिक शक्ती वाढवण्यासाठी काही महत्त्वाच्या सवयी आहेत, ज्यांचा नियमित अवलंब केल्यास तुम्ही जीवनात सकारात्मक बदल अनुभवू शकता.

१. स्वतःशी प्रामाणिक राहा
मनःशांतीसाठी स्वतःशी प्रामाणिक राहणे अत्यंत आवश्यक आहे. स्वतःच्या भावनांना, कमकुवतपणा आणि सामर्थ्याला समजून घेणे हे मानसिक मजबुतीचे पहिले पाऊल आहे. जेव्हा तुम्ही स्वतःच्या क्षमतेवर विश्वास ठेवता, तेव्हा निर्णय घेणे सुलभ होते आणि आंतरिक आत्मविश्वास वाढतो.

२. नकारात्मक विचारांपासून दूर रहा
मनात नकारात्मक विचारांचे वर्चस्व वाढले की तणाव आणि चिंता वाढतात. अशा वेळी आपल्याला भावनिक आणि मानसिकदृष्ट्या स्ट्रॉंग राहणे कठीण होते. तज्ज्ञांचा सल्ला आहे की, नकारात्मक विचार येताच त्यांना ओळखा, त्यांचे सकारात्मक दृष्टिकोनात रूपांतर करा किंवा मन हलके करण्यासाठी ध्यान, संगीत यांचा आधार घ्या.

३. नियमित व्यायाम आणि ध्यान करा
शरीर आणि मन यांचा घनिष्ठ संबंध आहे. दररोज किमान ३० मिनिटे चालणे, योगाभ्यास किंवा ध्यान (मेडिटेशन) केल्यास मानसिक तणाव कमी होतो, सकारात्मक ऊर्जा वाढते आणि मन शांत राहते. ध्यान केल्याने चिंता कमी होते, निर्णयक्षमता सुधारते आणि मानसिक संतुलन राखण्यास मदत होते.

४. स्वतःची काळजी घ्या
मानसिक बळ वाढवण्यासाठी शरीराची काळजी घेणे महत्त्वाचे आहे. संतुलित आहार, पुरेशी झोप आणि नियमित व्यायाम या सवयी आत्मसात केल्यास मन आणि शरीर दोन्ही मजबूत राहतात. स्वतःसाठी वेळ देणे, आवडत्या गोष्टी करणे आणि मनोरंजनावर लक्ष देणे देखील मानसिक स्वास्थ्यासाठी आवश्यक आहे.

५. संकटांना संधी म्हणून पाहा
जीवनात संकटे आणि अडचणी येणे सामान्य आहे. मानसिकदृष्ट्या मजबूत व्यक्ती संकटांना आव्हान म्हणून पाहतो आणि त्यातून शिकण्याचा प्रयत्न करतो. प्रत्येक अडचण आपल्याला नवीन कौशल्य शिकवते, धैर्य वाढवते आणि मानसिक क्षमता अधिक बळकट करते.

६. सकारात्मक लोकांशी संबंध ठेवा
ज्यांच्यासोबत आपण वेळ घालवतो, त्यांच्या विचारांचा आपल्यावर प्रभाव होतो. त्यामुळे नेहमी प्रेरणादायी, सकारात्मक आणि उत्साही लोकांसोबत राहा. अशा लोकांचा संग आपल्याला मानसिकदृष्ट्या मजबूत बनवतो आणि नकारात्मक वातावरणापासून दूर ठेवतो. अनेकदा कमी बोलणाऱ्या, गर्दीमध्ये न जाता एकटं राहणाऱ्या लोकांना मानसिकदृष्ट्या मजबूत मानले जाते. हे लोक आपल्या विचारांवर आणि भावनांवर लक्ष केंद्रित करतात, स्वतःशी प्रामाणिक राहतात आणि तणावपूर्ण परिस्थितीतही स्थिर राहतात.

७. सतत शिकत रहा आणि स्वतःला सुधारत राहा
ज्ञान, कौशल्ये आणि अनुभव मिळवत राहणे मानसिक मजबुती वाढवते. नवीन गोष्टी शिकल्याने आत्मविश्वास वाढतो, मन लवचिक होते आणि आव्हानांना सामोरे जाण्याची तयारी होते.

८. इतरांकडून अपेक्षा ठेवणे कमी करा.
इतरांकडून अपेक्षा ठेवणे कमी करा. समोरची व्यक्ती नेहमी तुम्हाला वाटते तशीच वागेल असे नाही. प्रत्येकाची स्वतःची वैयक्तिक स्पेस असते, तिचा आदर करा. सतत इतरांकडून काहीतरी अपेक्षा ठेवणे मानसिक तणाव वाढवते आणि स्वतःच्या निर्णयांवरील विश्वास कमी करते. अपेक्षा कमी केल्यास तुम्ही अधिक स्वावलंबी बनता, स्वतःच्या क्षमतांवर लक्ष केंद्रित करता आणि मानसिकदृष्ट्या मजबूत राहता.

९. पुस्तक वाचनाची सवय लावा
पुस्तक वाचन ही मानसिक मजबुतीसाठीची उत्तम सवय आहे. प्रेरणादायी साहित्य, चरित्रे, आत्मचरित्रे किंवा स्व-विकासाची पुस्तकं वाचल्याने मनाला नवा दृष्टिकोन मिळतो. वाचनामुळे एकाग्रता वाढते, तणाव कमी होतो आणि आत्मविश्वास दृढ होतो. तुमच्या जीवनात काही दुःख असेल तर हीलिंग बुक्स वाचा, त्यामुळे तुम्हाला दुःखातून बाहेर पडणे सोपे वाटेल आणि एक नवीन ऊर्जा मिळेल.

तज्ज्ञांच्या म्हणण्यानुसार, मानसिकदृष्ट्या स्ट्रॉंग होणे म्हणजे आयुष्य अधिक स्वावलंबी, स्थिर आणि समाधानी बनवणे. हे क्षणिक प्रक्रियेत होत नाही; सातत्याने या सवयी आत्मसात केल्यास तुम्ही मानसिकदृष्ट्या खंबीर होऊ शकता.

तुमच्या मानसिक मजबुतीसाठी आजपासूनच जीवनात काही छोटे-छोटे बदल सुरु करा – स्वतःशी प्रामाणिक रहा, सकारात्मक विचार करा, ध्यान करा, पुस्तकं वाचायला सुरुवात करा, आणि संकटांना संधी म्हणून पहा. परिणाम काही दिवसांतच तुम्हाला दिसायला लागतील आणि तुमचे जीवन अधिक सकारात्मक, स्थिर आणि समाधानी बनेल.

The post मानसिकदृष्ट्या स्ट्रॉंग कसे बनायचे? जीवनात ‘या’ गोष्टी करतील सकारात्मक बदल… appeared first on थोडक्यात घडामोडी.

उत्तर प्रदेश : उत्तर प्रदेशातील प्रयागराज जिल्ह्यातून एक विचित्र घटना समोर आली आहे. येथे यूपीएससी नागरी सेवा परीक्षेची तयारी करणाऱ्या एका तरुणाने सर्जिकल ब्लेडने आपले गुप्तांग कापले. त्यानंतर घरमालकाच्या लक्षात आल्यानंतर घरमालकाने खोलीत वेदनेने तडफडणाऱ्या तरुणाला रुग्णालयात दाखल केले. परंतु त्याची गंभीर प्रकृती पाहून डॉक्टरांनी त्या तरुणाला एसआरएन रुग्णालयात रेफर केले. सध्या एसआरएन रुग्णालयाच्या सर्जिकल वॉर्डमध्ये दाखल असलेल्या तरुणावर उपचार सुरू आहेत.

दरम्यान, या प्रकरणात धक्कादायक माहिती समोर आली आहे. जखमी तरुण म्हणतोय की तो मुलगा नाही तर मुलगी आहे. पण असे सांगूनही कोणीही त्याचे ऐकले नाही. म्हणूनच त्याने असे पाऊल उचलले. तरुणाने सांगितले की तो १४ वर्षांचा झाल्यापासून त्याला मुलगी असल्याचे वाटू लागले.

तरुण मेरठ जिल्ह्यातील रहिवासी आहे. तरुणाने सांगितले की तो त्याच्या आईवडिलांचा एकुलता एक मुलगा होता, ज्यामुळे तो याबाबत कोणालाही सांगू शकत नव्हता. काही काळापूर्वी तो तरुण त्याच्या मावशीकडे राहत होता. पण नंतर तो यूपीएससीची तयारी करण्यासाठी प्रयागराजला आला आणि येथे एक खोली भाड्याने घेऊन राहू लागला. युट्यूबवर एक व्हिडिओ पाहिल्यानंतर त्याने इंजेक्शन घेतले. तरुणाने सांगितले की तो अभ्यासादरम्यान लिंग बदलासाठी युट्यूबवर सर्च करत असे. तरुणाने कटरा येथील एका बनावट डॉक्टर झेनिथशी संपर्क साधला. त्याच्या सल्ल्यानुसार, विद्यार्थ्याने एका मेडिकल स्टोअरमधून भूल देण्याचे इंजेक्शन आणि सर्जिकल ब्लेड विकत घेतले. त्यानंतर त्याने त्याच्या भाड्याच्या खोलीत एकट्याने स्वतःला इंजेक्शन दिले, ज्यामुळे त्याच्या कंबरेखालील भाग सुन्न झाला. त्यानंतर त्याने स्वतःच्या हातांनी त्याचे गुप्तांग कापले. इंजेक्शनचा परिणाम जोपर्यंत होता तोपर्यंत तो सामान्य स्थितीत होता. परंतु भूल देण्याच्या औषधाचा परिणाम संपताच तो वेदनेने तडफडू लागला.

हा तरुण सुमारे एक तास खोलीत वेदनेने तडफडत राहिला. या दरम्यान खोलीच्या जमिनीवर रक्त वाहत होते. वेदनाशामक औषधे घेतल्यानंतरही त्याला आराम न मिळाल्याने तरुणाने दोनदा घरमालकाला फोन केला. घाईघाईत, घरमालकाने रुग्णवाहिका बोलावली आणि त्याला तेज बहादूर सप्रू बेली रुग्णालयात नेले. परंतु तेथे त्याची प्रकृती गंभीर पाहून त्याला स्वरूप राणी नेहरू रुग्णालयात रेफर करण्यात आले. त्याला एसआरएन रुग्णालयात दाखल केल्यानंतर, तज्ञ डॉक्टरांच्या पथकाने त्याच्यावर उपचार सुरू केले आहेत.

तरुणाचे म्हणणे आहे की मला मुलींमध्ये रस नाही. मला वाटते की माझा आवाजही मुलींसारखा आहे. माझी चालण्याची पद्धतही मुलींसारखी आहे. तरुणाचे म्हणणे आहे की असे केल्याने त्याचा जीव जाऊ शकतो हे त्याला माहित नव्हते. त्याला त्याचे लिंग बदलायचे होते. म्हणूनच त्याने हे पाऊल उचलले. एसआरएन रुग्णालयाचे मीडिया प्रभारी आणि वरिष्ठ सर्जन संतोष सिंग यांच्या मते, ‘विद्यार्थी लिंग ओळख विकार किंवा लिंग डिस्फोरियाने ग्रस्त आहे. त्याने स्वतःच्या हातांनी त्याचा गुप्तांग कापला होता. जेव्हा त्याला रुग्णालयात आणण्यात आले तेव्हा गुप्तांगातून खूप रक्तस्त्राव होत होता.’

डॉक्टर सांगतात की या आजारामुळे रुग्णाला असे वाटले की तो एक मुलगी आहे. म्हणूनच त्याने आपला जीव धोक्यात घातला. त्यांच्या मते, जर तो वेळेवर रुग्णालयात पोहोचला नसता तर त्याला आपला जीव गमवावा लागला असता. डॉ. संतोष सिंग यांच्या मते, विद्यार्थ्याचे मानसोपचारतज्ज्ञांकडून समुपदेशन केले जाईल आणि त्याचे मत देखील घेतले जाईल. डॉ. संतोष सिंह यांच्या मते, सध्या या प्रकरणात तरुणावर उपचार सुरू आहेत. त्याचे समुपदेशन केले जात आहे. असे असूनही जर त्याला त्याचे लिंग बदलायचे असेल, तर एक वर्षाच्या उपचार आणि हार्मोन औषधोपचारानंतर त्याचे लिंग बदलण्याची प्रक्रिया करता येते. यासाठी लिंग पुनर्नियुक्तीची शस्त्रक्रिया आवश्यक आहे. यासाठी एक बहु-विद्याशाखीय वैद्यकीय पथक आहे. या पथकात सर्जन, प्लास्टिक सर्जन, मानसोपचारतज्ज्ञ, मूत्ररोगतज्ज्ञ यांचा समावेश आहे.

The post तरुणाने सर्जिकल ब्लेडने कापले स्वतःचे गुप्तांग, धक्कादायक कारण आलं समोर… appeared first on थोडक्यात घडामोडी.

पुणे, दि. ६ : “दारू पिणे आरोग्यास हानिकारक आहे” असा इशारा मद्याच्या प्रत्येक बाटलीवर छापलेला असतो. मात्र, या इशाऱ्यांचा केंद्रबिंदू मुख्यतः शारीरिक आरोग्यावर असतो. मद्यपानामुळे होणारे मानसिक परिणामही तितकेच गंभीर असून, त्याबाबत जनजागृती करणेही तितकेच आवश्यक आहे, अशी मागणी सामाजिक कार्यकर्ते विल्यम साळवी यांनी राज्य उत्पादन शुल्क विभागाकडे निवेदनाद्वारे केली आहे.

साळवी यांनी दिलेल्या निवेदनात म्हटले आहे की, “महाराष्ट्रातील सर्व प्रकारच्या मद्यांच्या बाटल्यांवर ‘अत्यधिक मद्यपानामुळे नैराश्य, चिंता, स्मृतीभ्रंश होऊ शकतो’, ‘मद्यपानामुळे मानसिक संतुलन बिघडू शकते’ अशा स्वरूपाचे स्पष्ट व ठळक इशारे छापणे बंधनकारक करावे.”

या मागणीला डॉ. सोमनाथ गिते (समाजसेवक व व्यसनमुक्ती कार्यकर्ते) यांच्यासह व्यसनमुक्ती क्षेत्रात कार्यरत असलेल्या अनेक सामाजिक संस्थांनीही पाठिंबा दर्शवला आहे. ‘सध्या मद्याच्या बाटल्यांवरील इशारे केवळ शारीरिक आरोग्यापुरते मर्यादित आहेत. मानसिक आरोग्यावर होणारे दुष्परिणाम नागरिकांना ज्ञातच नाहीत. त्यामुळे अनेक तरुण व नागरिक अज्ञानातून मानसिक आजारांनी ग्रासले जात आहेत,’ असे त्यांनी स्पष्ट केले.

तंबाखू व सिगारेटसारख्या उत्पादनांवर ‘कर्करोगाचा धोका’, ‘प्राणघातक आहे’ अशा चेतावणी असतात. त्याच धर्तीवर मद्याच्या बाटल्यांवरही स्पष्ट मानसिक चेतावणी असाव्यात, असे साळवी यांनी नमूद केले आहे.

या मागणीला आधार देणारे जागतिक आरोग्य संघटना (WHO) व राष्ट्रीय मानसिक आरोग्य संस्था (NIMHANS) यांचे अभ्यासही महत्त्वाचे ठरतात. विशेषतः NIMHANS च्या २०२३ च्या अहवालानुसार, भारतात मद्यपानाशी संबंधित मानसिक विकारांमध्ये लक्षणीय वाढ झाली असून, नैराश्य, चिंता विकार, झोपेच्या समस्या, स्मृतीभ्रंश, आत्महत्येची प्रवृत्ती यासारख्या गंभीर परिणामांची नोंद झाली आहे.

सध्या लागू असलेल्या कायद्यांनुसार, राज्य उत्पादन शुल्क अधिनियमांतर्गत मद्याच्या पॅकेजिंगवर आरोग्यविषयक इशारे बंधनकारक असले तरी त्यामध्ये मानसिक आरोग्याचा उल्लेख नसल्याने ते अपुरे ठरतात, असे साळवी यांचे म्हणणे आहे.

कॅनडा, ऑस्ट्रेलिया, फ्रान्ससारख्या देशांमध्ये अल्कोहोलच्या बाटल्यांवर मानसिक चेतावणी देण्याची सक्ती आहे. त्यामुळे ग्राहकांना केवळ शारीरिकच नव्हे, तर मानसिक धोकेही माहीत होतात आणि निर्णय घेताना ते अधिक जबाबदारीने विचार करतात.

“दारूपासून केवळ यकृत, किडनी यांवरच नाही, तर मन, विचार आणि वर्तनावरही खोल परिणाम होतो. त्यामुळे मद्यपान ही केवळ व्यसनाची नव्हे, तर मानसिक आरोग्याचीही समस्या आहे,” असे मत तज्ज्ञांनीही व्यक्त केले आहे.

या पार्श्वभूमीवर साळवी यांनी राज्य सरकार, उत्पादन शुल्क विभाग आणि आरोग्य विभाग यांना आवाहन केले आहे की, दारूपासून होणाऱ्या मानसिक परिणामांची जनजागृती व्हावी यासाठी बाटल्यांवर स्पष्ट चेतावणी देणे अनिवार्य करावे. कारण व्यसनमुक्तीची सुरुवात ही माहिती आणि जागृतीपासूनच होते, असे त्यांनी नमूद केले आहे.

The post दारूमुळे मानसिक आरोग्यावर होणाऱ्या परिणामांचीही जनजागृती आवश्यक – सामाजिक कार्यकर्त्यांची मागणी appeared first on थोडक्यात घडामोडी.

पुणे : राज्य सरकारच्या अधिपत्याखालील बी. जे. गव्हर्नमेंट मेडिकल कॉलेजमध्ये शिकणाऱ्या एमबीबीएसच्या दुसऱ्या वर्षाच्या विद्यार्थिनीचा संशयास्पद मृत्यू झाल्याची घटना उघडकीस आली आहे. ज्योती कृष्णकुमार मीणा (वय २०), ही विद्यार्थिनी मंगळवारी मध्यरात्री कॉलेजच्या मुलींच्या वसतिगृहाच्या आवारात मृतावस्थेत आढळून आली.

ही दुर्दैवी घटना पुण्यातील आगरकर नगर परिसरातील वसतिगृहात घडली. पोलिसांच्या प्राथमिक तपासात आत्महत्येचा अंदाज व्यक्त करण्यात आला आहे, मात्र अधिक तपास सुरू असल्याचे अधिकाऱ्यांनी सांगितले आहे.

या संदर्भात माहिती देताना बंडगार्डन पोलिस ठाण्याचे प्रभारी वरिष्ठ निरीक्षक रवींद्र गायकवाड म्हणाले, “मंगळवारी सायंकाळी साडेसहा वाजण्याच्या सुमारास ती आपल्या खोलीतून बाहेर पडली होती. मात्र, बराच वेळ होऊनही ती परत आली नाही. तिच्याशी संपर्क होऊ न शकल्याने तिच्या रूममेट्स व वसतिगृह प्रशासनाने मध्यरात्री पोलिस ठाण्यात ती बेपत्ता असल्याची तक्रार दाखल केली. दरम्यान, तक्रार नोंदवत असतानाच वसतिगृहातून फोन आला की संबंधित विद्यार्थिनीचा मृतदेह परिसरात आढळून आला आहे. त्यानंतर पोलिसांनी घटनास्थळी धाव घेतली.”

या घटनेच्या अनुषंगाने पोस्टमार्टमसाठी मृतदेह शासकीय रुग्णालयात पाठवण्यात आला आहे. प्राथमिक तपासानुसार आत्महत्या झाल्याचा अंदाज वर्तवला जात असला तरी, मृत्यूचे नेमके कारण पोस्टमार्टम अहवाल आल्यानंतरच स्पष्ट होणार आहे.

मिळालेल्या माहितीनुसार, मृत विद्यार्थिनी राजस्थानमधील सिकर जिल्ह्यातील रहिवासी असून, ती बी. जे. मेडिकल कॉलेजमध्ये एमबीबीएसच्या दुसऱ्या वर्षाला शिक्षण घेत होती. पोलिसांना घटनास्थळी एक चिठ्ठी सापडली असून, त्यात तिने आपल्या शालेय जीवनापासून ती मानसिक तणाव व चिंतेशी झुंज देत असल्याचे नमूद केले आहे. तसेच, तिच्यावर मानसिक उपचार सुरू असल्याचे देखील त्या चिठ्ठीत लिहिले आहे.

या प्रकरणाबाबत माहिती देताना झोन २ चे पोलिस उपायुक्त मिलिंद मोहिते म्हणाले, “चिठ्ठीत तिने मानसिक तणावाविषयी स्पष्ट उल्लेख केला आहे. घटनाक्रम, परिसरातील सीसीटीव्ही फूटेज, रूममेट्सचे जबाब यासह सर्व बाजूंचा सखोल तपास करण्यात येत आहे.”

The post पुणे : बी. जे. मेडिकल कॉलेजच्या विद्यार्थिनीचा वसतिगृहात संशयास्पद मृत्यू; आत्महत्येचा प्राथमिक अंदाज appeared first on थोडक्यात घडामोडी.

पुणे : पुण्यातील एका नामांकित आयटी कंपनीत कार्यरत असलेल्या अभिलाषा भाऊसाहेब कोथिंबिरे (वय २५) या तरुणीने हिंजवडीतील क्राउन ग्रीन हाउसिंग सोसायटीच्या २१ व्या मजल्यावरून उडी मारून आत्महत्या केल्याची दुर्दैवी घटना उघडकीस आली आहे.

अभिलाषा मूळची रांजणगाव येथील असून सध्या हिंजवडी परिसरात वास्तव्यास होती. ती सेनापती बापट रस्त्यावर (एसबी रोड) स्थित एका प्रतिष्ठित आयटी कंपनीत कार्यरत होती.

३१ मे रोजी अभिलाषा दुचाकीवरून मैत्रिणीच्या इमारतीत आली होती. मात्र, ती तिच्या मैत्रिणीकडे न जाता थेट २१ व्या मजल्यावर गेली. तिथून उडी मारून तिने आपले आयुष्य संपवले.

घटनेनंतर काही वेळातच सोसायटीतील रहिवाशांनी आवारात मृतदेह पाहून पोलिसांना याबाबत माहिती दिली. हिंजवडी पोलिस ठाण्याचे पथक तपासासाठी घटनास्थळी पोहोचले, त्यांनी सीसीटीव्ही फुटेज तपासले आणि ती पहाटे ४.३८ वाजता दुचाकीवरून सोसायटीत आल्याचे पुष्टी केली. काही तासांनंतर ती मृतावस्थेत आढळली. पोलिसांनी तिच्या वाहनावरून तिची ओळख पटवली. तपासादरम्यान तिच्याकडे एक सुसाईड नोट देखील सापडली आहे. त्यामध्ये तिने लिहिले होते, “मी माझं आयुष्य संपवते आहे. आता जगायची इच्छा नाही. कृपया मला माफ करा.” मात्र, आत्महत्येचे नेमके कारण तिने स्पष्ट केलेले नाही.

हिंजवडी पोलिसांनी दिलेल्या माहितीनुसार, मृत तरुणी नैराश्यग्रस्त होती, परंतु कुटुंबीयांना याबाबत कोणतीही कल्पना नव्हती. तिचे वडील म्हणाले की, ती नेहमीप्रमाणे आनंदी आणि सामान्य वागत होती.

या घटनेबाबत बोलताना हिंजवडी पोलिस ठाण्याचे प्रभारी वरिष्ठ पोलिस निरीक्षक कन्हैया थोरात म्हणाले, “३१ मे रोजी आम्हाला मृतदेह मिळाला. घटनास्थळी सुसाईड नोट सापडल्यामुळे प्राथमिक तपासात ही आत्महत्येची घटना असल्याचे स्पष्ट झाले आहे. आम्ही अपघाती मृत्यूची नोंद केली असून पुढील तपास सुरू आहे.” अभिलाषाच्या शव विच्छेदन अहवालात तिच्या शरीरावरील महत्वाच्या अवयवांना गंभीर इजा झाल्याचे म्हटले आहे.

The post पुणे : आयटी अभियंता तरुणीची २१व्या मजल्यावरून उडी घेऊन आत्महत्या; सुसाईड नोट सापडली… appeared first on थोडक्यात घडामोडी.

बेंगळुरू: कर्नाटकचे माजी पोलीस महासंचालक (डीजीपी) ओम प्रकाश यांची हत्या करण्यात आली आहे. रविवारी (२० एप्रिल) संध्याकाळी बेंगळुरूमधील एचएसआर लेआउटमध्ये ही घटना घडल्याची माहिती आहे. त्यांची पत्नी पल्लवीनेच त्यांची हत्या केल्याचं बोललं जात आहे. कौटुंबिक वादातून पत्नीने त्यांची हत्या केल्याची माहिती आहे. या घटनेनंतर पत्नीने स्वतः पोलिसांना याबाबतची माहिती दिली. राज्य पोलीस विभागाचे प्रमुख असलेल्या अधिकाऱ्याच्या हत्येने सर्वांनाच धक्का बसल्याचं एका अधिकाऱ्याने सांगितले आहे.

६८ वर्षीय ओम प्रकाश निवृत्तीनंतर बेंगळुरूमध्ये त्यांच्या राहत्या घरी राहायचे. त्यांचा पत्नीशी काही कारणावरुन वाद सुरू होता. मानसिक संतुलन बिघडलेल्या पत्नीने रविवारी सायंकाळी ओमप्रकाश यांची हत्या केली आणि त्यानंतर पोलिसांना याबाबत माहिती दिली, अशी माहिती आहे. या प्रकरणी एचएसआर लेआउट पोलिस ठाण्यात गुन्हा दाखल करण्यात आला आहे. मृतदेह शवविच्छेदनासाठी होसूर रोडवरील सेंट जॉन हॉस्पिटलमध्ये नेण्यात आला आहे.

1981 च्या बॅचचे 68 वर्षीय आयपीएस अधिकारी बिहारमधील चंपारणचे मूळ रहिवासी होते आणि त्यांनी भूगर्भशास्त्रात एमएससी पदवी प्राप्त केली होती. त्यांनी अग्निशमन दल आणि होमगार्डचे डीजीपी म्हणून काम केले होते. 1 मार्च 2015 रोजी त्यांची पोलीस महासंचालक म्हणून नियुक्ती करण्यात आली होती.

ओमप्रकाश यांची हत्या केल्यानंतर पत्नीने स्वत: पोलिसांना फोन करून याबाबतची माहिती दिली. त्यानंतर पोलिस तात्काळ त्यांच्या घरी पोहोचले, सेवानिवृत्त अधिकारी रक्ताच्या थारोळ्यात पडलेले पाहून घटनास्थळी पोहोचलेले पोलिस चक्रावून गेले. यानंतर पोलिसांनी पत्नी आणि मुलीला चौकशीसाठी ताब्यात घेतले आहे.

कौटुंबिक वादातून ही हत्या झाल्याची माहिती आहे. ओमप्रकाश आणि त्यांची पत्नी यांच्यातील भांडणाबाबत शेजारी, नातेवाईक आणि अनेक निवृत्त पोलीस अधिकाऱ्यांनाही माहिती होते. गेल्या काही दिवसांपासून त्यांच्यातील वाद इतका वाढला होता की पत्नीने घरात खूप राडा केला. या घटनेने सर्वांनाच मोठा धक्का बसला आहे. या घटनेने संपूर्ण कर्नाटक पोलिस दलात मोठी खळबळ माजली आहे.

The post धक्कादायक! माजी पोलीस महासंचालक ओम प्रकाश यांची राहत्या घरात हत्या; पत्नीवर गंभीर आरोप appeared first on थोडक्यात घडामोडी.

उत्तर प्रदेश : नोएडा येथील एका हॉटेलच्या खोलीत पत्नी आणि सासरच्यांच्या छळाला कंटाळून एका फील्ड इंजिनिअरने गळफास घेऊन आत्महत्या केली. आत्महत्या करण्यापूर्वी त्याने पत्नी आणि तिच्या कुटुंबाकडून होणाऱ्या मानसिक छळाचे वर्णन करणारा एक व्हिडिओ रेकॉर्ड केला. रेल्वे स्टेशन रोडजवळील जॉली हॉटेलच्या खोली १०५ मधून पोलिसांनी त्याचा मृतदेह ताब्यात घेतला.

व्हिडिओमध्ये मोहित कुमारने दावा केला की त्याच्यावर त्याची सर्व मालमत्ता त्याच्या पत्नी आणि सासरच्यांच्या नावावर हस्तांतरित करण्यासाठी दबाव आणला जात होता. तसेच हुंड्याच्या खोट्या आरोपांमध्ये अडकवण्याची धमकी देण्यात आली होती. मोहित कुमार म्हणाला, “तुम्हाला हा व्हिडिओ मिळेल तेव्हा मी या जगातून निघून गेलेला असेन. जर पुरुषांसाठी कायदा असता तर कदाचित मी हे पाऊल उचलले नसते. मला माझ्या पत्नी आणि तिच्या कुटुंबाकडून होणारा मानसिक छळ सहन करावा लागला नसता.” व्हिडिओमध्ये मोहित पुढे म्हणाला, “माझी पत्नी प्रिया यादवच्या आईने जबरदस्तीने प्रियाचा गर्भपात करून घेतला आणि सर्व दागिने आणि साड्या तिच्याकडे ठेवल्या. माझी पत्नी मला धमकी देत ​​आहे की जर मी घर आणि मालमत्ता तिच्या नावावर केली नाही तर ती माझ्यावर आणि माझ्या कुटुंबावर हुंड्याचा खोटा खटला दाखल करेल.” व्यथित आणि निराश झालेल्या मोहितने म्हटले की, “जर माझ्या मृत्यूनंतरही मला न्याय मिळाला नाही, तर माझी राख नाल्यात विसर्जित करा. आई आणि बाबा, कृपया मला माफ करा. मी तुमच्या अपेक्षा पूर्ण करू शकलो नाही.”

उत्तर प्रदेशातील औरैया जिल्ह्यातील रहिवासी असलेला मोहित कुमार प्रिया यादवसोबत दीर्घकाळापासून संबंधात होता, जिच्याशी नंतर त्याने लग्न केले. मोहितच्या कुटुंबीयांनी सांगितले की, प्रियाला बिहारच्या समस्तीपूरमध्ये प्राथमिक शिक्षिकेची नोकरी मिळेपर्यंत सर्व काही ठीक चालले होते. त्यानंतर, ती वेगळी वागू लागली आणि तिच्या आई आणि भावाच्या प्रभावाखाली मोहितला मानसिक त्रास देऊ लागली.

पोलिसांनी रेल्वे स्टेशन रोडवरील जॉली हॉटेलच्या खोली क्रमांक १०५ मधून मोहितचा मृतदेह ताब्यात घेतला. फॉरेन्सिक तपासणी केली आणि अहवाल तयार केला. शवविच्छेदनानंतर, मोहितचा मृतदेह त्याच्या कुटुंबाकडे सोपवण्यात आला, ते औरैया येथे अंत्यसंस्कारासाठी त्याचा मृतदेह घेऊन गेले.

The post पत्नी आणि सासरच्यांच्या छळाला कंटाळून इंजिनिअरची आत्महत्या, व्हिडिओ रेकॉर्ड केला आणि… appeared first on थोडक्यात घडामोडी.

पुणे : आईच्या घरी आलेल्या एका विवाहित महिलेने तिच्या जुळ्या बाळांना पाण्याच्या टाकीत टाकून नंतर स्वतःदेखील आत्महत्या करण्याचा प्रयत्न केला. या घटनेत दोन्ही बाळांचा मृत्यू झाला असून महिलेला वाचवण्यात आले आहे. ही घटना मंगळवारी (८ एप्रिल) सकाळी साडेसहाच्या सुमारास हवेली तालुक्यातील थेऊर ग्रामपंचायत हद्दीतील दत्तनगर परिसरात घडली.

मिळालेल्या माहितीनुसार, प्रतिभा हेमंतकुमार मोहिते (३५) असे या महिलेचे नाव आहे. ती गर्भवती राहण्यासाठी थेऊर परिसरातील दत्तनगर येथील तिच्या माहेरी आली होती. सुमारे दोन महिन्यांपूर्वी आयव्हीएफ उपचारानंतर तिने जुळ्या मुलांना जन्म दिला होता. ही महिला थेऊरमध्ये तिच्या आईवडिलांसोबत राहायला आली होती. तिला जुळी मुले होती. मात्र, जन्मापासूनच दोघेही वारंवार आजारी पडत असल्यामुळे त्यांची आई असलेली ही महिला तणाव आणि नैराश्यात होती.

दरम्यान, मंगळवारी सकाळी साडेसहाच्या सुमारास महिला तिच्या जुळ्या बाळांना घेऊन घराच्या टेरेसवर गेली. तिथे तिने उंच जागेवर उभी राहून तिच्या जुळ्या बाळांना पाण्याच्या टाकीत टाकले. त्यानंतर तिने स्वतः पाण्याच्या टाकीत उडी मारली. मात्र, टाकीचे तोंड लहान असल्याने आणि पाण्याची पातळी जास्त असल्याने महिला बुडली नाही. दोन-तीन वेळा तिचे डोके टाकीतून बाहेर आल्यावर जवळच राहणाऱ्या एका व्यक्तीने त्याच्या घराच्या टेरेसवरून ही घटना पाहिली. त्याने तात्काळ महिलेच्या घरी याबाबत माहिती दिली. आईचे कुटुंब पाहण्यासाठी टेरेसवर गेले तेव्हा दोन्ही बाळे पाण्यात बुडलेल्या अवस्थेत आढळून आली. नागरिकांच्या मदतीने बाळांना तात्काळ वानौरी येथील कमांड हॉस्पिटलमध्ये दाखल करण्यात आले. मात्र, उपचारापूर्वीच दोघांचाही मृत्यू झाला असल्याचे वैद्यकीय अधिकाऱ्यांनी सांगितले. सांगलीत राहणारा महिलेचा पती बँक कर्मचारी आहे, त्यांना या घटनेची माहिती देण्यात आली.

पोलिसांनी घटनेची माहिती मिळताच घटनास्थळी भेट देऊन तपास सुरु केला. महिलेला ताब्यात घेण्यात आले असून पुढील तपास सुरू आहे. जुळ्या मुलांच्या मृत्यूस कारणीभूत ठरल्याबद्दल महिलेविरुद्ध खुनाचा गुन्हा दाखल करण्यात येईल,असे पोलिसांनी सांगितले.

The post हृदयद्रावक! जुळ्या बाळांना पाण्याच्या टाकीत टाकून आईचा आत्महत्या करण्याचा प्रयत्न appeared first on थोडक्यात घडामोडी.

पिंपरी-चिंचवड: पिंपरी-चिंचवड येथील आकुर्डी मधील एका इंजिनिअरिंग महाविद्यालयात शिक्षण घेत असलेल्या २० वर्षीय सहिती कलुगोटाला रेड्डीने तिच्या मित्रामुळे होणाऱ्या मानसिक त्रासाला कंटाळून इमारतीच्या १५ व्या मजल्यावरून उडी मारून आत्महत्या केली. तथापि, पोलिसांनी तपास सुरू केल्यानंतर अनेक धक्कादायक खुलासे समोर आले आहेत.

आत्महत्येपूर्वी, सहितीने एक 42 मिनिटांची ऑडिओ क्लिप तयार केली, ज्यामध्ये तिने आपल्या मित्र प्रणव डोंगरेकडून होणाऱ्या मानसिक त्रासाबद्दल सांगितले. तसेच, तिने आत्महत्येचा इशारा देत सांगितले की, “आता मी माझ्या आयुष्याचा शेवट करत आहे.” या क्लिपमध्ये तिच्या दुःखाचे व त्रासाचे तपशील स्पष्ट होते. यावरून पोलिसांनी तपास करताना प्रणव डोंगरेला ताब्यात घेतले आहे.

सहिती आणि प्रणव यांची मैत्री दोन वर्षांपासून होती, ज्यामुळे त्यांचा संबंध प्रेमात बदलला. तथापि, याच प्रेमाच्या नात्यात मानसिक आणि भावनिक छळ सुरू झाला होता, ज्यामुळे संबंधित तरुणीला अत्यंत त्रास सहन करावा लागला. तिच्या आयुष्यातील हा टोकाचा वळण घेणारा प्रसंग असा होता की, त्रासामुळे ती आत्महत्येच्या उंबरठ्यावर पोहोचली होती.

सहितीने या ऑडिओ क्लिपला तीन तासांच्या अंतराने तिच्या मैत्रिणींला पाठवण्याची सेटिंग केली होती, ज्यामुळे तिच्या आत्महत्येची ऑडिओ क्लिप तिला मृत्यू झाल्यानंतरच त्यांच्या मोबाईलवर पोहोचली. या क्लिपमुळे तिच्या मैत्रिणींला मोठा धक्का बसला. त्यानंतर त्यांनी पोलिसांना माहिती दिली आणि तपास सुरू केला.

सहितीच्या कुटुंबीयांनी तिच्या अंतिम संस्कारांनंतर वाकड पोलिस स्टेशन गाठले आणि आत्महत्येचे कारण स्पष्ट करणारी ऑडिओ क्लिप पोलिसांना दिली. पोलिसांनी तपास करून मानसिक त्रास देणाऱ्या प्रणव डोंगरेला ताब्यात घेतले असून, त्याला तीन दिवसांची पोलीस कोठडी सुनावण्यात आली आहे.

The post प्रेमातील मानसिक त्रासामुळे तरुणीने १५ व्या मजल्यावरून उडी मारून आत्महत्या; ऑडिओ क्लिपने उघड केली खरी गोष्ट appeared first on थोडक्यात घडामोडी.