पाटणा : बिहारमधील बेगुसराय जिल्ह्यात एका पत्रकाराची काही हल्लेखोरांनी गोळ्या झाडून हत्या केली आहे. सांखो गावात ही घटना घडली. पोलिसांनी घटनेची माहिती मिळताच पत्रकाराचा मृतदेह ताब्यात घेतला आणि पोस्टमॉर्टमसाठी पाठवला आहे. मृत पत्रकार सुभाष कुमार हे त्यांच्या आई-वडिलांचे एकुलते एक अपत्य होते. या घटनेबाबत पत्रकारांनी संताप व्यक्त केला आहे.

मिळालेल्या माहितीनुसार, 20 मे रोजी संध्याकाळी पत्रकार सुभाष कुमार त्यांच्या गावात आयोजित एका कार्यक्रमात सहभागी होण्यासाठी पोहोचले होते. कार्यक्रमाला उपस्थित राहून ते रात्री घरी परतत होते. दरम्यान, वाटेत अगोदरच थांबलेल्या हल्लेखोरांनी सुभाष कुमार यांच्यावर गोळीबार केला. हल्लेखोरांची सुभाष कुमार यांच्या डोक्यात गोळी मारली. डोक्यात गोळी लागल्याने पत्रकार सुभाष कुमार जमिनीवर कोसळले. गोळीबाराचा आवाज ऐकून आजूबाजूच्या लोकांनी घटनास्थळी धाव घेतली.

लोकांनी तात्काळ सुभाष कुमार यांना उपचारासाठी प्राथमिक आरोग्य केंद्रात नेले. मात्र, रुग्णालयातील डॉक्टरांनी त्यांना मृत घोषित केले. घटनेची माहिती मिळताच परिहार पोलीस ठाण्याच्या पोलिसांनी मृतदेह ताब्यात घेऊन पोस्टमॉर्टमसाठी पाठवला आहे. परिहार पोलिस स्टेशनचे सहाय्यक उपनिरीक्षक नवीन कुमार यांनी सांगितले की, सुभाष कुमार यांच्या हत्येबाबत स्वतंत्रपणे तपास सुरू आहे. आरोपींना लवकरच अटक करण्यात येईल, असा दावा त्यांनी केला. हल्लेखोरांची संख्या तीन असल्याचे सांगण्यात येत आहे.

सुभाष कुमार यांनी बखरी परिसरात वाळू आणि दारू माफियांविरोधात सतत बातम्या चालवल्याचं सांगण्यात येत आहे. त्यामुळे सुभाष यांच्या हत्येमागे वाळू आणि दारू माफियांचा हात असण्याची शक्यता व्यक्त केली जात आहे. सध्या पोलीस संशयाच्या आधारे तिन्ही हल्लेखोरांना अटक करण्यासाठी कसोशीने प्रयत्न करत आहेत. या घटनेबाबत पत्रकारांनी संताप व्यक्त करत आरोपींना लवकरात लवकर अटक करण्याची मागणी केली आहे.

The post पत्रकाराची गोळ्या झाडून हत्या, मीडियाने व्यक्त केला संताप appeared first on थोडक्यात घडामोडी.

पुणे : मनमिळावू, अभ्यासू युवा पत्रकार संदीप जगदाळे यांचे गुरूवारी रात्री ७:४५ वाजता निधन झाले. ते ४५ वर्षांचे होते. मागील पंधरा वर्षांपासून सकाळमध्ये हडपसर भागातील बातमीदार म्हणून काम पाहत होते. कोरेगाव पार्क येथील पुणे अंध शाळेमध्ये ते एमएसडब्ल्यू (समाजसेवक) या पदावर कार्यरत होते.

अत्यंत मनमिळावू स्वभावाचे संदीप हे गेल्या अनेक वर्षापासुन हडपसर भागात पत्रकारिता करीत होते. कोरोनाचा काळात देखील ते जबाबदारीने कर्तव्य बजावित होते. बातमीदारीच्या माध्यमातून त्यांनी हडपसर भागातील अनेक विषय मांडत आवाज उठविला होता. विविध विषयावर सातत्याने पाठपुरावा करून त्या भागातील अनेक प्रश्न त्यांनी मार्गी लावले. त्या भागातील सामजिक, राजकीय विषयावर ते उत्कृष्टपणे बातमीदारी करत होते. त्यांच्या कार्याची दखल घेऊन अनेक संस्था आणि संघटनांनी त्यांना सन्मानपत्र देऊन गौरविले होते. त्यांच्या जाण्याने विविध स्तरातून हळहळ व्यक्त केली जात आहे.

आपल्या हडपसरचे दैनिक सकाळचे अभ्यासू पत्रकार संदीप जगदाळे यांच्या निधनाची दुःखद बातमी समजली. एक सहृदयी व्यक्तिमत्त्व आपल्यातून आज निघून गेले.
ईश्वर त्यांच्या आत्म्याला शांती देवो! जगदाळे कुटुंबियांना या दुःखातून सावरण्याची शक्ती मिळो ही प्रार्थना. pic.twitter.com/lCzOdEwwt3

— Chetan Vitthal Tupe (@ChetanVTupe) May 13, 2021

हडपसरमधील युवा पत्रकार संदीप ज्ञानदेव जगदाळे यांच्या पश्चात आई-वडिल, भाऊ, भावजय, पत्नी, मुलगा, दोन बहिणी असा परिवार आहे. रयत शिक्षण संस्थेच्या साधना कन्या विद्यालयामधील शिक्षिका सारिका संदीप जगदाळे यांच्या त्या पत्नी आहेत. संदीप जगदाळे (मुर्टी, ता. बारामती) शेतकरी कुटुंबातील होते. ते शिक्षणासाठी काही वर्षांपूर्वी पुण्यात आले होते. त्यानंतर ते हडपसर येथे स्थायिक झाले. ग्रामीण भागातून येऊन त्यांनी आपल्या कामाच्या माध्यमातून पत्रकारिता क्षेत्रात वेगळी ओळख निर्माण केली होती. सुमारे 20 दिवसांपुर्वी त्यांना कोरोनाची लागण झाली होती तेव्हापासुन त्यांच्यावर उपचार सुरू होते. दरम्यान, आज (गुरूवार) त्यांचे निधन झाले आहे.

The post धक्कादायक! युवा पत्रकार संदीप ज्ञानदेव जगदाळे यांचे निधन, एक सहृदयी व्यक्तिमत्त्व आपल्यातून निघून गेले – चेतन तुपे appeared first on थोडक्यात घडामोडी.

नवी दिल्ली : मुंबई आंतरराष्ट्रीय साहित्य महोत्सवाचे संस्थापक पत्रकार आणि लेखक अनिल धारकर यांचं शुक्रवारी मुंबईत निधन झालं. ते 74 वर्षांचे होते. त्यांच्यावर गुरुवारी मुंबईच्या रुग्णालयात बायपास सर्जरी झाली होती.

ते पाच दशकांपेक्षा अधिक काळ स्तंभलेखक आणि लेखक, एक आर्किटेक्ट आणि चित्रपट सेन्सॉर बोर्डाच्या सल्लागार समितीचे सदस्य होते. ते मिड-डे आणि द इंडिपेंडेंट यासह अनेक प्रकाशनांचे संपादक होते. दक्षिण मुंबईत एक आर्ट मूव्ही थिएटर म्हणून आकाशवाणी सभागृह उघडण्यातही त्यांनी महत्त्वपूर्ण भूमिका बजावली. त्यांचे स्तंभ भारत आणि परदेशात अग्रगण्य प्रकाशनात दिसले. ते महात्मा गांधींच्या दांडी मार्चवरील द रोमान्स ऑफ सॉल्ट या पुस्तकाचे लेखक होते. धारकर यांनी टीव्ही शो निर्माता आणि अँकर आणि एका वृत्तवाहिनी चॅनेलचे प्रमुख म्हणूनही काम केले होते.

The post पत्रकार आणि लेखक अनिल धारकर यांचं निधन appeared first on थोडक्यात घडामोडी.

संगमनेर : TV९ चे पत्रकार पांडुरंग रायकर आरोग्य विभागाच्या अनास्थेचा बळी ठरले. त्यांना न्याय मिळावा व त्यांच्या मृत्यूला कारनीभूत असलेल्या दोषींवर योग्य ती कारवाई व्हावी यासाठी संगमनेर तालुक्यातील आश्वी पोलीस ठाणे येथे पोलीस निरीक्षक मा. सुधाकर मांडवकर यांना निवेदन दिले.

यावेळी दै. लोकसत्ता चे जेष्ठ पत्रकार सितारामजी चांडे, दै. पुण्यनगरी चे पत्रकार संजय गायकवाड, दै. लोकमत चे पत्रकार योगेशजी रातडीया, दै. सार्वमत चे पत्रकार रवीद्रं बालोटे, दै. राष्ट्र सह्याद्री चे पत्रकार अनिल शेळके, पत्रकार संकेत कचेरीया आदि उपस्थित होते.

The post TV९ चे पत्रकार पांडुरंग रायकर यांना न्याय मिळवा म्हणून गावा-गावातून उमटल्या प्रतिक्रिया appeared first on थोडक्यात घडामोडी.

पुण्यातील पत्रकार पांडुरंग रायकर यांचं कोरोनाने निधन झालं. पांडुरंग हे टीव्ही ९ मराठीचे पुण्याचे प्रतिनिधी होते. गेल्या काही दिवसांपासून पांडुरंग हे सतत फिल्डवर जाऊन रिपोर्टिंग करत होते. त्याचकाळात त्यांना कोरोनाची लागण झाली होती. त्यामुळे त्यांना पुण्यातील जम्बो कोव्हिड सेंटरमध्ये दाखल करण्यात आलं होतं. पण काल रात्री त्यांची ऑक्सिजन पातळी अचानक कमी झाल्याने त्यांची प्रकृती प्रचंड ढासळली.

यावेळी त्यांना व्हेंटिलेटरची आवश्यकता होती. मात्र, पुण्यात कुठेही व्हेंटिलेटर उपलब्ध होऊ शकलं नाही. दरम्यान, मध्यरात्रीच्या सुमारास पुण्यातील दिनानाथ मंगेशकर रुग्णालयात व्हेंटिलेटर उपलब्ध असल्याची माहिती मिळताच त्यांना रुग्णालयात नेण्यासाठी प्रयत्न सुरु झाले. पण कोव्हिड सेंटर ते रुग्णालय या प्रवसाकरिता त्यांना तात्काळ रुग्णवाहिका उपलब्ध होऊ शकली नाही. त्यांना रुग्णालयात नेण्यास उशीर झाला. त्यामुळे पांडुरंग यांना आपल्या प्राणांना मुकावे लागले. आज(२ सप्टेंबर) पहाटे साडेपाच वाजता त्यांनी अखेरचा श्वास घेतला.

गेली १५ वर्ष पांडुरंग रायकर हे पत्रकारितेत होते. ई टीव्ही, एबीपी माझा, टीव्ही ९ या वृत्तवाहिन्यांमध्ये त्यांनी काम केलं होतं. साधारण २ वर्षांपासून ते पुण्यात रिपोर्टिंग करत होते. त्यांच्या पश्चात आई-वडील, दोन मुलं आणि पत्नी असा एकूण परिवार आहे.

The post व्हेंटिलेटर उपलब्ध न झाल्यामुळे पुण्यातील पत्रकार पांडुरंग रायकर यांचं निधन appeared first on थोडक्यात घडामोडी.