IPL २०२१ : चेन्नई सुपर किंग्सने कोलकाता विरुद्धच्या सामन्यात १८ धावांनी विजय मिळवला. या विजयासह चेन्नईच्या संघाने गुणतालिकेत आरसीबी आणि दिल्ली कॅपिटल्स या दोन्ही संघांना धक्का देत अव्वल स्थान पटकावले आहे.

या सामन्यापूर्वी चेन्नईला तीन सामन्यांमध्ये दोन विजय मिळवता आले होते आणि एका सामन्यात त्यांचा पराभव झाला होता. परंतु कोलकाता विरुद्धचा सामना जिंकल्यानंतर त्यांचे सहा गुण झाले. गुणतालिकेत आरसीबी आणि दिल्ली कॅपिटल्सच्या संघाचेही समान सहा गुण आहेत. पण चेन्नईचा नेट रनरेट जास्त असल्याने त्यांनी अव्वल स्थान पटकावले आहे.

फॅफ ड्यु प्लेसिसच्या नाबाद ९५ धावा आणि ऋतुराज गायकवाडच्या अर्धशतकाच्या जोरावर चेन्नईने प्रथम फलंदाजी करत २२० धावा केल्या होत्या. ऋतुराजने ४२ चेंडूंत सहा चौकार आणि चार षटकारांच्या जोरावर ६४ धावांची धडेकाबाज खेळी साकारली. ऋतुराज आणि फॅफ यांनी ११५ धावांची सलामी दिली. फॅफने अखेरपर्यंत दमदार फलंदाजी केली, पण त्याचे शतक फक्त पाच धावांनी हुकले.

चेन्नईने या सामन्यात केकेआरपुढे २२१ धावांचे आव्हान ठेवले होते. या आव्हानाचा पाठलाग करताना केकेआरची पहिल्याच पॉवर प्लेमध्ये ५ बाद ३१ अशी दयनीय अवस्था झाली होती. पण त्यानंतर रसेलने २१ चेंडूंत अर्धशतक झळकावले. पण त्यानंतर सॅम करनचा एक चेंडू सोडण्याच्या नादात रसेल बाद झाला. रसेलने २२ चेंडूंत तीन चौकार आणि सहा षटकारांच्या मदतीने ५४ धावांची खेळी साकारली. त्यानंतर पॅट कमिन्सने दमदार फटकेबाजी केली. कमिन्सने ३४ चेंडूंत चार चौकार आणि सहा षटकारांच्या जोरावर नाबाद ६६ धावांची खेळी केली. पण अखेरच्या षटकात दुहेरी धाव घेताना प्रसिध कृष्णा धावचीत झाला आणि चेन्नईने १८ धावांनी सामना जिंकला.

The post IPL 2021 : RCB आणि दिल्ली संघांना धक्का देत चेन्नईची मोठी झेप, पटकावले अव्वल स्थान appeared first on थोडक्यात घडामोडी.

महेंद्रसिंग धोनीच्या नेतृत्वाखालील चेन्नई सुपर किंग्जचा संघ IPL मध्ये पहिल्यांदा बाद फेरी गाठण्यात अपयशी ठरला. धोनीच्या संघाचा आतापर्यंत IPLमधील सर्वात संतुलित संघ असा लौकिक होता. पण या सीझनमध्ये त्यांना लौकिकाला साजेसा खेळ करता आला नाही.

धोनीच्या खराब फॉर्ममुळे तो स्वत:ला संघाबाहेर ठेवून नव्या दमाच्या खेळाडूला संघाची धूरा देणार की काय असा अंदाज बांधला जात होता. पण, कर्णधाराने कधीही पळ काढायचा नसतो असं सांगत धोनीने त्या चर्चांना पूर्णविराम दिला होता. अशातच आता CSK चे CEO कासी विश्वनाथन यांनी धोनीबद्दल महत्त्वाची अपडेट दिली.

“IPLमध्ये धोनीने संघासाठी ३ विजेतेपदं मिळवून दिली आहेत. बाद फेरीसाठी पात्र न ठरण्याची ही आमच्या संघाची पहिलीच वेळ आहे. आमच्या संघाएवढं सातत्य आजपर्यंत इतर कोणत्याही संघाने दाखवलेलं नाही. एका खराब वर्षामुळे आम्ही सरसकट बदल करायला हवा असं अजिबात नाही. पुढच्या वर्षीच्या IPL स्पर्धेत धोनी नक्की खेळेल आणि मला खात्री आहे की तो संघाचं नेतृत्व करत असेल. IPL २०२१ मध्ये CSKचा कर्णधार धोनीच असेल”, असे विश्वनाथन एका वृत्तवाहिनीशी बोलताना म्हणाले.

“यंदाच्या हंगामात आम्हाला आमच्या लौकिकाला साजेसा खेळ करता आला नाही. काही सामने आम्ही जिंकायला हवे होते, पण ते सामने आम्ही गमावले. अशा अटीतटीच्या सामन्यांचा आम्हाला फटका बसला. सुरेश रैना, हरभजन सिंग या दोघांनी घेतलेली माघार आणि स्पर्धेच्या आधी कोरोनाचा CSKच्या गोटात झालेला शिरकाव यामुळे संघाचं संतुलन काहीसं बिघडलं”, असं देखील ते यावेळी बोलताना म्हणाले.

The post पुढच्या वर्षीच्या IPL स्पर्धेत धोनी खेळेल का? CSK संघाचे CEO विश्वनाथन यांनी दिली माहिती appeared first on थोडक्यात घडामोडी.

आयपीएलच्या तेराव्या हंगामात सलग तीन पराभवांनंतर चेन्नई सुपरकिंग्ज संघाने दमदार पुनरागमन केलं आहे. दुबईच्या मैदानावर खेळवण्यात आलेल्या सामन्यात चेन्नईने पंजाबवर १० गडी राखून मात केली. विजयासाठी आवश्यक असलेल्या १७९ धावा चेन्नईने सलामीवीर शेन वॉटसन आणि फाफ डु-प्लेसिस यांच्या जोरावर पूर्ण केल्या.

गेल्या काही सामन्यांपासून अपयशी ठरणाऱ्या शेन वॉटसनला या सामन्यात सूर गवसला. वॉटसनने आपल्या अर्धशतकी खेळीत ११ चौकार आणि ३ षटकार लगावले. वॉटसनने नाबाद ८३ तर डु-प्लेसिसने नाबाद ८७ धावांची खेळी केली. याव्यतिरीक्त चेन्नईच्या गोलंदाजांनीही अखेरच्या षटकांत दमदार पुनरागमन करत पंजाबला १७८ धावांवर रोखण्यात यश मिळवलं. चेन्नईच्या दृष्टीकोनातून पंजाबविरुद्धचा सामना हा खूप आश्वासक ठरला.

“खडतर काळातही खेळाडूंना पाठींबा देत राहणं हे आमच्यासाठी महत्वाचं आहे. मला असं अनेकदा वाटतं की चेन्नईच्या यशात स्टिफन फ्लेमिंगला म्हणावं तितकं श्रेय मिळत नाही. ज्यावेळी प्रशिक्षकाच्या डोक्यात वेगळी रणनिती असते आणि कर्णधार काहीतरी वेगळा विचार करत असतो तेव्हा दोघांचा मेळ घालणं खूप कठीण असतं. अनेकदा यामुळे संभ्रमही निर्माण होतो. पण चांगली गोष्ट म्हणजे आमच्यात जे काही ठरतं ते आम्ही ड्रेसिंग रुमबाहेर जाऊ देत नाही. मैदानावर आलो की आमचा एकमेकांना पाठींबा असतो. आमच्यात कधी मतभेद होत नाहीत अशातला भाग नाही, पण ते आमच्या दोघांपुरते आणि क्षणिक असतात. गेले अनेक हंगाम स्टिफन आमच्यासोबत काम करतोय.” अशा शब्दात सामना संपल्यानंतर धोनीने प्रशिक्षक फ्लेमिंग यांच्या योगदानाबद्दल आभार मानले.

The post धोनीने चेन्नईच्या यशात प्रशिक्षक स्टिफन फ्लेमिंग यांच्या योगदानाबद्दल मानले आभार appeared first on थोडक्यात घडामोडी.

IPL २०२० (MI vs CSK ): क्रिकेट टुर्नामेंट इंडियन प्रीमियर लीग IPL २०२० ची सुरुवात झाली, यंदा ही स्पर्धा संयुक्त अरब अमिरात (UAE) मध्ये आयोजित करण्यात आली. या स्पर्धेचा पहिलाच सामना हा मुंबई इंडियन्स आणि चेन्नई सुपर किंग्स यांच्यात झाला.  चेन्नईने नाणेफेक जिंकून मुंबई इंडियन्सला फलंदाजीसाठी पाचारण केलं. यावेळी मुंबई इंडियन्सने सुरुवात अतिशय धडाकेबाज केली. पण त्यानंतर म्हणावी तशी फटकेबाजी एकाही फलंदाजाला करता आली नाही. त्यामुळे मुंबई इंडियन्सला २० ओव्हरमध्ये ९ गड्यांच्या मोबदल्यात १६२ धावाच करता आल्या. यावेळी सौरभ तिवारीने सर्वाधिक ४२ धावा केल्या. तर डिकॉकने ३३ धावा केल्या. याशिवाय एकाही फलंदाजाला मोठी खेळी करता आली नाही. त्यामुळे हा मुंबईचा संघ १६२ धावांपर्यंतच मजल मारु शकला.

चेन्नईच्या गोलंदाजांनी सुरुवातीला फारच स्वैर मारा केला. मात्र, नंतर त्यांनी टिच्चून गोलंदाजी केली. यावेळी एन्गिडीने सर्वाधिक ३ बळी घेतले. तर चहर आणि जडेजा प्रत्येकी २-२ आणि सॅम करन आणि पियुष चावला यांनी प्रत्येकी १-१ गडी बाद केला. त्यामुळे मुंबई इंडियन्सला फार मोठी धावसंख्या उभारता आली नाही.

मुंबईच्या १६२ धावांचा पाठलाग करताना चेन्नईची सुरुवात फारशी चांगली झाली नाही. कारण मुरली विजय आणि शेन वॉटसन हे त्यांचे दोन्ही सलामीवीर हे झटपट बाद झाले. पण त्यानंतर फॅफ ड्यू प्लेसी आणि अंबाती रायडू यांनी अर्धशतकी खेळी करत टीमला विजय मिळवून दिल्या अंबाती रायडूने अवघ्या ४८ चेंडूत ७१ धावा केल्या तर प्लेसिसने देखील ५८ धावा केल्या.

चेन्नईने तब्बल ५ विकेट राखून पहिल्याच सामन्यात मुंबईवर दणदणीत विजय मिळवला.

The post IPL २०२० : आयपीएल २०२० च्या पहिल्याच सामन्यात चेन्नईचा विजय ५ विकेट राखून विजय appeared first on थोडक्यात घडामोडी.

भारताचा माजी कर्णधार महेंद्रसिंग धोनीने १५ ऑगस्टला आपली निवृत्ती जाहीर केली. त्यानंतर धोनीच्या करोडो चाहत्यांनी धोनीला निवृत्तीचा सामना द्यायला हवा, अशी इच्छा व्यक्त केली होती.

निवृत्तीचा सामना जर द्यायचा असेल, तर एक संपूर्ण संघच तयार असल्याचे भारताचा माजी क्रिकेटपटू इरफान पठाणने सांगितले आहे. इरफानने यावेळी ११ खेळाडूंच्या संघाचे एक ट्विट केले आहे आणि हे ट्विट चांगलेच व्हायरल होत असल्याचे पाहायला मिळत आहे.

गेल्या काही वर्षांमध्ये भारताचे बरेच दिग्गज क्रिकेटचपटू निवृत्त झाले. पण भारताचा माजी महान क्रिकेटपटू सचिन तेंडुलकर वगळता अन्य कोणत्याही क्रिकेटपटूला निवृत्तीचा सामना खेळता आला नाही. राहुल द्रविड, व्हीव्हीएस लक्ष्मण, वीरेंद्र सेहवाग, गौतम गंभीर, झहीर खान या दिग्गजांना आपली निवृत्ती मैदानात घेता आली नव्हती. त्यामुळे ज्या खेळाडूंना निवृत्तीचा सामना खेळता आला नाही, त्यांच्यासाठी एक सामना खेळवावा अशी मागणी इरफानने यावेळी केली आहे.

इरफानने ज्या खेळाडूंना गेल्या काही वर्षात निवृत्तीचा सामना खेळायला मिळाला नाही, त्यांचा एक संघच बनवला आहे. या संघात ११ खेळाडू असून त्यांनी आतापर्यंत क्रिकेटची बरीच वर्षे सेवा केली आहे, त्यामुळे त्यांना निवृत्तीचा सामना खेळायला मिळावा, असे इरफानला वाटत आहे. त्यामुळे त्याने ११ खेळाडूंचा संघ तयार केला आहे.

Many people are talking about a farewell game for retired players who didn’t get a proper send-off from the game. How about a charity cum farewell game from a team consisting of retired players vs the current Indian team? pic.twitter.com/diUiLXr9XQ

— Irfan Pathan (@IrfanPathan) August 22, 2020

The post धोनीला निवृत्तीचा सामना खेळायचा असेल तर… इरफानने केले ट्विट appeared first on थोडक्यात घडामोडी.

पंतप्रधानांनी धोनीला निवृत्तीसंदर्भात एक विशेष पत्र लिहिलं आहे. धोनीनेच ट्विटवरुन हे पत्र शेयर केलं आहे.

कलाकार, सैनिक आणि खेळाडू यांना केवळ कौतुकाची अपेक्षा असते. त्यांनी केलेल्या कामाची आणि बलिदानाची नोंद घेतली जावी आणि त्यांचं सर्वांनी कौतुक करावं असं त्यांना वाटतं. पंतप्रधान नरेंद्र मोदी तुम्ही केलेल्या कौतुकाबद्दल धन्यवाद, असं म्हणत धोनीने पंतप्रधानांनी पाठवलेलं पत्र ट्विट केलं आहे.

An Artist,Soldier and Sportsperson what they crave for is appreciation, that their hard work and sacrifice is getting noticed and appreciated by everyone.thanks PM @narendramodi for your appreciation and good wishes. pic.twitter.com/T0naCT7mO7

— Mahendra Singh Dhoni (@msdhoni) August 20, 2020

पत्राच्या सुरुवातीलाच मोदींनी धोनीने अगदी त्याच्या खास शैलीमध्येच निवृत्ती जाहीर केल्याचा उल्लेख केला आहे. त्यांनी पात्रात लिहिलं कि, “१५ ऑगस्ट रोजी तू तुझ्या ट्रेडमार्क स्टाइलमध्ये म्हणजेच अनपेक्षितपणे एक लहान व्हिडिओ शेअर केला आणि त्यावरुन देशभरामध्ये चर्चा सुरु झाली. १३० कोटी भारतीय निराश झाले मात्र त्याचवेळी ते तुझे आभारीही आहेत. मागील दीड दशकामध्ये तू भारतीय क्रिकेटसाठी दिलेल्या योगदानाबद्दल ते सर्व तुझे आभारी आहेत.”

पुढे मोदींनी विश्वचषकातील शेवटचा सामना आणि तुझी फिनिशिंग स्टाइल कायम आमच्या स्मरणात राहणार असल्याचे म्हटलं आहे. “तुझ्या क्रिकेटमधील कारकिर्दीकडे आकडेवारीच्या नजरेने पाहता येईल. तू सर्वात यशस्वी कर्णधार ठरलास. भारताला तू अग्रेसर बनवण्यामध्ये मोलाचे योगदान दिलं. इतिहासामध्ये तुझं नाव सर्वोत्तम फलंदाज आणि सर्वोत्तम कर्णधार आणि या खेळातील सर्वोत्तम यष्टीरक्षक म्हणून नोंदवलं जाईल. कठीण प्रसंगी तिच्यावर निर्भर राहणे आणि सामना संपवण्याची तुझी शैली खास करुन २०११ च्या विश्वचषक स्पर्धेतील अंतिम सामना सर्व सामान्यांच्या मनावर कायमचा कोरला गेला आहे. तो पुढील अनेक पिढ्यांना लक्षात राहील.”

“महेंद्र सिंह धोनी हे नाव केवळ खेळातील आकडेवारी आणि सामना जिंकण्याच्या शैलीसाठी लक्षात राहणार नाही. तुझ्याकडे केवळ खेळाडू म्हणून पाहणे चुकीचं ठरेल. तुझे योगदान हे आश्चर्यचकित करणारे आहे, असंच म्हणता येईल. एका लहानश्या शहरामधून सुरु करुन तू राष्ट्रीय पातळीवर आला आणि स्वत:ची वेगळी ओळख निर्माण केली आणि महत्वाचं म्हणजे भारताला अभिमान वाटेल अशी कामगिरी केलीस. तुझी प्रगती आणि कामगिरी ही करोडो भारतीय तरुणांना प्रेरणा देणारी आहे. तुझ्याप्रमाणे ते अगदी नावाजलेल्या शाळा, कॉलेजांमध्ये गेले नाहीत. त्यांचे कुटुंबही जास्त प्रभावशाली कुटुंबांपैकी नाही मात्र आपल्यामधील कौशल्याच्या जोरावर त्यांनी तुझ्याप्रमाणे यश मिळवलं आहे अशांसाठी तू प्रेरणास्थान आहेस. तू तरुण भारताचा खरा चेहरा आहेस. ज्या भारतामध्ये तुमचे आडनाव आणि कुटुंबाची पार्श्वभूमी काय आहे यावर त्यांचा प्रवास ठरत नाही तर तरुण स्वत: त्यांची ओळख निर्माण करुन वाटचाल करतात. आपण कुठून आलो आहोत यापेक्षा कुठे चाललो आहोत हे अधिक महत्वाचे असते याच नियमानुसार तू अनेक तरुणांना प्रेरणा दिली आहेस,” असं मोदींनी या पत्रामध्ये म्हटलं आहे.

The post पंतप्रधानांनी धोनीला लिहिलं विशेष पत्र appeared first on थोडक्यात घडामोडी.

भारतीय संघाचा माजी कर्णधार आणि भारतीय संघाच्या सर्वोत्तम क्रिकेटरपैकी एक अशी ओळख असलेल्या महेंद्रसिंह धोनीने आंतरराष्ट्रीय क्रिकेटमधून निवृत्ती घेण्याचा निर्णय घेतला आहे.

१५ ऑगस्ट म्हणजे भारताच्या स्वातंत्र्य दिनी संध्याकाळी धोनीने आपल्या इन्स्टाग्राम अकाऊंटवर एक व्हिडीओ पोस्ट करत आपण निवृत्त होत असल्याचं जाहीर केलं. धोनीच्या निवृत्तीची बातमी समजल्यानंतर सर्व क्षेत्रातील मान्यवर व्यक्तींनी त्याच्या आतापर्यंतच्या योगदानाबद्दल त्याचे आभार मानले आहेत.

धोनीनं एक क्रिकेटर आणि एक कर्णधार या नात्यानं भारतीय क्रिकेटला भरभरून दिलं आहे. धोनीला कॅप्टन कूल आणि मॅचफिनिशर या उपाधी मानानं बहाल करण्यात आल्या.

 

View this post on Instagram

 

Thanks a lot for ur love and support throughout.from 1929 hrs consider me as Retired

A post shared by M S Dhoni (@mahi7781) on Aug 15, 2020 at 7:01am PDT

2007 सालचा ट्वेन्टी ट्वेन्टी विश्वचषक, 2011 सालचा वन डे विश्वचषक, 2012 सालची चॅम्पियन्स ट्रॉफी, ही सारी कामगिरी म्हणजे कर्णधार म्हणून धोनीच्या यशाचा परमोच्च बिंदू होता. त्याच वेळी एक फलंदाज आणि तेही अखेरच्या षटकांत विजय मिळवून देणारा फलंदाज म्हणून धोनीचं कर्तृत्व खूप मोठं आहे. त्यानं 15 वर्षांच्या कारकीर्दीत 350 वन डे सामन्यांत भारताचं प्रतिनिधित्व केलं. त्याच्या खात्यात 10 शतकं आणि 73 अर्धशतकांसह 10 हजार 773 धावा जमा आहेत. धोनीनं 98 ट्वेन्टी ट्वेन्टी सामन्यांमध्ये 37.60 च्या सरासरीनं १६१७ धावा फटकावल्या आहेत. ट्वेन्टी ट्वेन्टीत त्याचा स्ट्राईक रेट तर तब्बल 126.13 आहे.

धोनीने आंतरराष्ट्रीय क्रिकेटमधून निवृत्ती जाहीर केली असली तरी तो आयपीएल खेळत राहणार आहे.
आपल्या इन्स्टाग्राम पोस्टमध्ये धोनीने म्हटले, “तुमच्या सर्वांचे प्रेम आणि समर्थनाबद्दल धन्यवाद, सायंकाळी ७ वाजून २९ मिनिटांपासून मला रिटायर्ड मानलं जावं”

The post धोनीने घेतली आंतरराष्ट्रीय क्रिकेटमधून निवृत्ती appeared first on थोडक्यात घडामोडी.