नांदेड : नांदेडमध्ये बांधकाम व्यावसायिक संजय बियाणी यांच्यावर त्यांच्या घरासमोरच अज्ञात हल्लेखोरांनी गोळीबार केला. या गोळीबारात बियाणी आणि त्यांचा चालक गंभीर जखमी झाला. जखमी झालेल्या दोघांवर नांदेडच्या खासगी रुग्णालयात उपचार सुरू करण्यात येत होते. पण उपचारादरम्यान बियाणी यांचा मृत्यू झाला आहे. हा गोळीबार कुणी केला याचा पोलीस घटनास्थळी येऊन शोध घेतायत. आज सकाळी ११ वाजेची ही घटना घडली आहे.

मिळालेल्या माहितीनुसार, हल्ल्यात जखमी झालेल्या संजय बियाणी आणि यांची प्रकृती चिंताजनक होती. त्यांच्या चालकाची प्रकृतीही चिंताजनक आहे. गोळीबाराच्या या घटनेने शहरात तणावाचे वातावरण आहे. संजय बियाणी हे नांदेडमधील मोठे प्रस्थ होते. खंडणी वसुलीसाठी किंवा व्यावसायिक स्पर्धेतून हा गोळीबार झाल्याचा प्राथमिक अंदाज आहे. दरम्यान, गोळीबाराची घटना cctv मध्ये टिपली गेली आहे का? याचा तपास पोलिस घेत आहेत.

The post बांधकाम व्यावसायिक संजय बियाणी यांची हत्या, त्यांच्या घरासमोरच केला गोळीबार appeared first on थोडक्यात घडामोडी.

इस्लामाबाद : सामाजिक कार्यकर्त्या करीमा बलोच (37) यांचा मृतदेह कॅनडाच्या टोरोंटो शहरात रहस्यमय परिस्थितीत सापडला. २० डिसेंबर रोजी त्या बेपत्ता झाल्या होत्या. कॅनडियन पत्रकार तारेक फतेह यांनी बलोच यांच्यासोबत घातपात झाल्याचा संशय व्यक्त केला आहे.

कॅनडाच्या शरणार्थी असलेल्या बलोच यांचे नाव 2016 मध्ये जगातील सर्वात प्रभावशाली 100 महिलांच्या यादीत समाविष्ट करण्यात आले होते. पाकिस्तानने केलेले अत्याचार संयुक्त राष्ट्रासमोर मांडणाऱ्या महिलांपैकी त्या एक होत्या. पाकिस्तान करीमा बलोच यांना रॉचा एजंट मानत होता. बलुचिस्तान प्रांतात संसाधनांची कमतरता नाही, परंतु पाकिस्तानकडून रहिवाशांची मुस्कटदाबी होत असल्याचा दावा केला जातो. पाकिस्तानी सैन्याकडून क्रौर्याचा वापर करुन विनाकारण नागरिकांना तुरुंगात डांबल्याचा आरोप केला जातो. यापूर्वीही काही बलुची नेत्यांची हत्या झाली होती.

करीमा बलोच बलुचिस्तानातील विद्यार्थी संघटनेच्या अध्यक्षा होत्या. मोदींना भाऊ संबोधून त्यांनी आंतरराष्ट्रीय फोरममध्ये मानवाधिकार उल्लंघनाविरोधात आवाज उठवण्यास सांगितलं होतं. 2016 मध्ये करीमा यांनी रक्षाबंधनाच्या निमित्ताने एक व्हिडिओ संदेश रेकॉर्ड केला, ज्यामध्ये त्यांनी पंतप्रधान नरेंद्र मोदी यांना आपण भाऊ मानत असल्याचं म्हटलं होतं. करीमा म्हणाल्या होत्या कि, “आम्ही आपणास आवाहन करतो की, आमचा भाऊ या नात्याने तुम्ही बलुचिस्तानमधील नरसंहार आणि युद्ध अपराधांविषयी आंतरराष्ट्रीय व्यासपीठावर बोला आणि बलुचच्या बहिणींचा आवाज व्हा… आम्ही स्वतःच लढा देऊ, तुम्ही फक्त आमचा आवाज बनावं,  अशी आमची इच्छा आहे.”

The post करीमा बलोच यांचा मृतदेह रहस्यमय परिस्थितीत आढळला appeared first on थोडक्यात घडामोडी.

धनत्रयोदशीच्या दिवशी पाकिस्तानने शस्त्रसंधीचे उल्लंघन करुन भारताच्या दिशेने मोठ्या प्रमाणावर गोळीबार केला. मॉर्टर आणि तोफगोळ्यांचा मारा करण्यात आला. पाकिस्तानच्या या कृतीला भारताने जोरदार प्रत्युत्तर दिले. भारताच्या कारवाईत पाकिस्तानचे काही बंकर तसेच दहशतवाद्यांचे नियंत्रण रेषेजवळचे लाँचपॅड उद्ध्व्स्त झाले. भारताने जबर दणका दिला. प्राथमिक वृत्तानुसार पाकिस्तानच्या किमान ११ जवानांचा मृत्यू झाला आणि १६ जवान जखमी झाले. काही दहशतवादीही ठार झाले.

जंगलातील दहशतवाद्यांच्या लाँचिंग पॅडवर लगबग वाढल्याची माहिती भारताच्या सिग्नल्स आणि लष्करी गुप्तचर यंत्रणेने मिळवली. यानंतर भारताने पाकिस्तानला प्रत्युत्तर दिले. कारवाई करताना भारताने पाकिस्तानचे बंकर तसेच जंगलातील दहशतवाद्यांचे लाँचिंग पॅड यांना लक्ष्य करुन जोरदार मारा सुरू केला. भारताच्या अचूक माऱ्यामुळे पाकिस्तानचे मोठे नुकसान झाले. भारताने नियंत्रण रेषेजवळचा पाकिस्तानचा शस्त्रसाठा तसेच एक इंधनसाठा नष्ट केला. सातत्याने मोठे स्फोट सुरू झाले. या स्फोटांमुळे पाकिस्तानच्या लष्कराची जबर हानी झाली. भारताच्या कारवाईत पाकिस्तानच्या स्पेशल कमांडो ग्रुपचे किमान तीन कमांडो ठार झाल्याचे वृत्त आहे.

जम्मू काश्मीरमध्ये नियंत्रण रेषेजवळ दोन वेगवेगळ्या ठिकाणी पाकिस्तानच्या कारवाईत भारताच्या तीन जवानांनी बलिदान दिले. किमान चारजण जखमी झाले. उरी सेक्टरमध्ये दोन तर गुरेझ सेक्टरमध्ये एक भारतीय जवान हुतात्मा झाला. तसेच संध्याकाळी आणखी एक जवान हुतात्मा झाल्याचे वृत्त आले. पाकिस्तानच्या गोळीबारात भारताच्या ३ नागरिकांचाही मृत्यू झाला तसेच काही नागरिक जखमी झाले. हुतात्मा झालेल्या जवानांमध्ये महाराष्ट्रातील ऋषिकेश रामचंद्र जोंधळे आहेत. ऋषिकेश रामचंद्र जोंधळे हे कोल्हापूर जिल्ह्यातील आजरा तालुक्यात असलेल्या बहिरेवाडी गावचे निवासी होते. ते २० वर्षांचे होते.

The post पाकिस्तानकडून शस्त्रसंधीचे उल्लंघन, भारताचे चोख प्रत्युत्तर, पाकिस्तानचे ११ जवान ठार appeared first on थोडक्यात घडामोडी.