सांगली : राजधानी दिल्लीतील सेंट कोलंबस शाळेच्या प्राचार्या आणि शिक्षिकांनी दिलेल्या मानसिक छळाला कंटाळून दहावीमध्ये शिकत असलेल्या एका मराठी विद्यार्थ्याने आत्महत्या केल्याची धक्कादायक घटना मंगळवारी घडली. सांगली जिल्ह्यातील खानापूर तालुक्यातील ढवळेश्वर येथील रहिवासी असलेल्या मुलाने राजेंद्रनगर मेट्रो स्टेशनच्या प्लॅटफॉर्म क्रमांक २ वरून खाली रस्त्यावर उडी मारून आपले जीवन संपवले.

सोने–चांदी गलाई व्यवसायानिमित्त या मुलाचे वडील श्रीयुत पाटील हे अनेक वर्षांपासून दिल्लीमध्ये स्थायिक आहेत. त्यामुळे हा मुलगा कुटुंबीयांसह राजीव नगर परिसरात राहत होता. तो सेंट कोलंबस विद्यालयात इयत्ता दहावीमध्ये शिक्षण घेत होता.

मानसिक छळामुळे टोकाचा निर्णय
१८ नोव्हेंबर रोजी ही घटना घडली. शरदने दीड पानांची सुसाइड नोट लिहून शिक्षिकांनी सतत मानसिक छळ केल्यामुळे आत्महत्या करत असल्याचे नमूद केले. “स्कूलवालों ने इतना बोला की मुझे यह करना पड़ा… मम्मी सॉरी… भैय्या सॉरी…” असे भावनिक शब्द त्याने लिहिले होते. तसेच, गरज पडल्यास आपले अवयव दान करावेत, अशीही त्याची अंतिम इच्छा त्यात नमूद होती.

चार शिक्षिकांविरुद्ध गुन्हा दाखल
घटनेची माहिती मिळताच राजा गार्डन मेट्रो पोलिसांनी तत्काळ तपास सुरू केला. जखमी मुलाला तातडीने रुग्णालयात दाखल करण्यात आले, मात्र उपचारादरम्यान त्याचा मृत्यू झाला. पोलिसांनी सुसाइड नोटच्या आधारावर शाळेच्या प्राचार्या अपराजिता पाल तसेच शिक्षिका मनू कालरा, युक्ती महाजन आणि ज्युली व्हर्गिस यांच्याविरुद्ध गुन्हा नोंदवला आहे.

गावात शोककळा; आज अंत्यसंस्कार
घटनेच्या वेळी शरदचे वडील ढवळेश्वर येथे कामानिमित्त आले होते. घटनेची माहिती मिळताच ते तातडीने दिल्लीला रवाना झाले. मृत मुलाचे पार्थिव मूळगावी आणण्यात आले असून आज त्याच्यावर अंत्यसंस्कार होणार आहेत. या सर्व प्रकारामुळे ढवळेश्वर गावासह सर्वत्र शोककळा पसरली आहे.

The post दिल्लीतील शिक्षिकांच्या जाचाला कंटाळून दहावीतील मराठी विद्यार्थ्याची आत्महत्या; चार जणांवर गुन्हा दाखल appeared first on थोडक्यात घडामोडी.

पुणे : पुण्याच्या मध्यवर्ती भागात मंगळवारी संध्याकाळी १७ वर्षीय तरुणाची चाकूने वार करून हत्या करण्यात आली. ही धक्कादायक घटना बाजीराव रोडवरील महाराणा प्रताप गार्डनजवळ घडली असून, या प्रकरणी पोलिसांनी तात्काळ कारवाई करत तीन अल्पवयीन आरोपींना ताब्यात घेतले आहे. जुन्या वादातून ही हत्या झाल्याचं समोर आलं आहे.

खडक पोलिस ठाण्याच्या माहितीनुसार, मृत तरुण हा आपल्या मित्रासोबत मोटारसायकलवरून जात असताना अचानक तीन किशोरवयीन मुलांनी त्याच्यावर हल्ला चढवला. आरोपींनी धारदार चाकूंसह हल्ला करून तरुणाला गंभीर दुखापत केली. त्यातच त्याचा मृत्यू झाला. प्राथमिक चौकशीतून असे समोर आले आहे की, मृत तरुण आणि आरोपी हे सर्वजण पर्वती परिसरातील रहिवासी असून, त्यांच्यात काही दिवसांपूर्वी किरकोळ कारणावरून वाद झाला होता. त्याच वादाचा राग मनात धरून आरोपींनी सूडाच्या भावनेतून ही हत्या केल्याची शक्यता पोलिसांनी व्यक्त केली आहे.

“या घटनेत सहभागी असलेल्या तिन्ही अल्पवयीन मुलांची ओळख पटली असून त्यांना ताब्यात घेतले आहे. हत्येसाठी वापरलेले धारदार शस्त्र देखील जप्त करण्यात आले आहे. पुढील तपास सुरू आहे,” अशी माहिती खडक पोलिस ठाण्याच्या अधिकाऱ्याने दिली.

या घटनेमुळे परिसरात तणावाचे वातावरण निर्माण झाले असून, पोलिसांनी खबरदारीचा उपाय म्हणून परिसरात अतिरिक्त बंदोबस्त तैनात केला आहे. तसेच, अल्पवयीन आरोपींच्या पालकांना चौकशीसाठी पोलिस ठाण्यात बोलावण्यात आले आहे.

The post पुण्यात १७ वर्षीय मुलाची चाकूने वार करून हत्या, तीन अल्पवयीन आरोपी पोलिसांच्या ताब्यात appeared first on थोडक्यात घडामोडी.

पुणे : पुण्यातील लोहगावमध्ये एका ७२ वर्षीय वृद्धाविरुद्ध बाल लैंगिक शोषणाचा धक्कादायक प्रकार समोर आला आहे. पोलिसांनी दिलेल्या माहितीनुसार, आरोपीवर मुलांना अश्लील सामग्री दाखवणे आणि त्यांच्याशी अनुचित वर्तन करण्याचा आरोप आहे.

मिळालेल्या माहितीनुसार, घटनेची माहिती सात वर्षांच्या नातीने आपल्या पालकांना दिल्यानंतर कळली. नातीनं आपल्या पालकांना सांगितलेल्या गोष्टींचा पाठपुरावा करत पालकांनी विमान नगर पोलिस स्टेशनमध्ये तक्रार नोंदवली.

पोलिसांनी तपास करताना आढळून आले की आरोपीने ६ ऑक्टोबर ते १३ ऑक्टोबर २०२५ या कालावधीत मुलांच्या आणि त्यांच्या कुटुंबियांच्या विश्वासाचा गैरफायदा घेतला. पोलिसांनी आरोपीविरुद्ध भारतीय दंड संहिता कलम ७५(१)(i) आणि पॉक्सो कायदा कलम ८ व १२ अंतर्गत गुन्हा नोंदवून तपास सुरु केला आहे.

सध्या आरोपी पोलिसांच्या कोठडीत असून, तपास अधिकाऱ्यांनी घटनास्थळी उपलब्ध पुरावे आणि साक्षीदारांच्या अंदाजावर आधारित पुढील कारवाई सुरू केली आहे. स्थानिक प्रशासन आणि पोलिसांनी मुलांच्या सुरक्षेसाठी आणि अशा प्रकारच्या घटना टाळण्यासाठी जागरूकता वाढवण्यावर भर दिला आहे.

The post पुणे : ७२ वर्षीय वृद्धावर मुलाच्या लैंगिक शोषणाचा गंभीर आरोप; सात वर्षांच्या नातीने तक्रार केल्यानंतर प्रकरण समोर appeared first on थोडक्यात घडामोडी.

पालघर : पालघरमधील घोडीला कॉम्प्लेक्स परिसरातून एक हृदयद्रावक घटना उघडकीस आली आहे. जेवणात चिकन हवे अशी मागणी केल्यामुळे रागाच्या भरात आईने आपल्या सात वर्षांच्या मुलाला लाटण्याने बेदम मारहाण केली. यात मुलाचा जागीच मृत्यू झाल्याचे धक्कादायक वृत्त समोर आले.

पोलिसांनी दिलेल्या माहितीनुसार, आरोपी महिला पतीपासून वेगळी राहत होती. ती आपली दोन मुले आणि दोन बहिणींसोबत घोडीला कॉम्प्लेक्समध्ये राहत होती. दरम्यान, मुलाने जेवणात चिकन मागितल्यामुळे संतापलेल्या आईने त्याच्यावर रागाच्या भरात लाटण्याने वारंवार प्रहार केले. यामध्ये मुलाच्या डोक्यासह शरीरावर गंभीर जखमा झाल्याने त्याची प्रकृती खालावली. मात्र, मुलगा गंभीर जखमी असूनही आईने त्याला दवाखान्यात नेले नाही. त्यामुळे रात्रीच मुलाचा मृत्यू झाला.

स्थानिकांना संशय आल्याने त्यांनी पोलिसांना कळविले. पोलिसांनी घटनास्थळी धाव घेत आरोपी आईला ताब्यात घेतले. गुन्ह्यात वापरलेले लाटणे पोलिसांनी जप्त केले आहे. मृतक मुलाच्या दहा वर्षांच्या बहिणीला या घटनेमुळे मोठा धक्का बसला असून ती खूप घाबरलेली आहे. तिला सुरक्षिततेसाठी आश्रमात हलविण्यात आले आहे.

दरम्यान, पोलिसांनी केलेल्या चौकशीत आरोपी महिलेने गुन्ह्याची कबुली दिली आहे. मात्र, या घटनेमागे काही वेगळी कारणं आहेत का याचा तपाससुरु आहे. याबाबतची खरी माहिती पोस्टमार्टम अहवाल आणि पोलिस तपासानंतरच स्पष्ट होण्याची शक्यता वर्तवण्यात येत आहे.

The post जेवणात चिकन मागितल्याने राग अनावर, आईने बेदम मारहाण केल्याने चिमुकल्याचा मृत्यू appeared first on थोडक्यात घडामोडी.

पुणे : वानवडी परिसरात पोलीसांनी गांजा विक्री करणाऱ्या तरुणाला अटक करून मोठा मुद्देमाल जप्त केला आहे. वानवडी भागातील गंगा सॅटेलाईट सोसायटी ते नेताजीनगर रस्ता ह्या भागात वानवडी पोलीस ठाण्याचे कर्मचारी विठ्ठल चोरमोले आणि अमोल गायकवाड गस्त घालत होते. या दरम्यान, त्यांना माहिती मिळाली की तौफिक रझाक शेख (वय २६, रा. नवाजीश चौकाजवळ, मीठानगर, कोंढवा खुर्द) दुचाकीवरून गांजा विक्रीसाठी येत आहे.

माहिती मिळताच पोलिसांनी तत्काळ सापळा रचून आरोपीला पकडले. झडती घेतली असता त्याच्याकडे ८१० ग्रॅम गांजा आढळला. त्याच्याकडून गांजा, दुचाकी आणि मोबाइल असा अंदाजे ८० हजार रुपयांचा मुद्देमाल जप्त करण्यात आला. पोलीसांनी सांगितले की, शेखने गांजा कोणाकडून आणला आणि तो कोणाला विक्री करणार होता, ह्या बाबत तपास सुरू आहे.

पोलीस उपायुक्त डॉ. राजकुमार शिंदे व सहायक आयुक्त धन्यकुमार गोडसे यांच्या मार्गदर्शनाखाली ह्या कारवाईत वरिष्ठ पोलीस निरीक्षक विजयकुमार डोके, सहायक निरीक्षक उमाकांत महाडिक, तसेच पोलीस कर्मचारी दया शेगर, महेश गाढवे, अमोल पिलाणे, अतुल गायकवाड, विठ्ठल चोरमोले, विष्णू सुतार आणि अमोल गायकवाड यांनी महत्त्वाची भूमिका बजावली.

पोलीस पुढील तपास करत आहेत. पोलीसांनी सांगितले की, या प्रकरणात आणखी व्यक्तींचा सहभाग असल्याची शक्यता आहे आणि त्यांनी तपास सुरू ठेवला आहे. ह्या प्रकारामुळे वानवडी परिसरात पोलीस सुरक्षा व प्रतिबंधात्मक उपाययोजनांवर लक्ष केंद्रित करण्यात येत आहे. याशिवाय, गांजा आणि इतर प्रतिबंधित पदार्थांच्या विक्रीवर नियंत्रण ठेवण्यासाठी पोलीस विभाग सतत गस्त घालत असून कारवाई करत आहे.

The post पुणे : गांजा विक्री करणाऱ्या तरुणाला अटक, ८० हजाराचा मुद्देमाल जप्त appeared first on थोडक्यात घडामोडी.

हैदराबाद : एका आईनेच आपल्या दोन वर्षांच्या मुलीची हत्या केल्याची धक्कादायक घटना समोर आली आहे. ही घटना ४ जून रोजी तेलंगणाच्या मेडक जिल्ह्यात घडली. मुलीच्या रात्रीच्या सततच्या रडण्यामुळे तिच्या आईला प्रियकरासोबत वेळ घालवता येत नसल्याने आणि त्यांच्या नात्यात अडथळा येत असल्याने या आईने हा भयानक निर्णय घेतला. आईनेच आपल्या दोन वर्षांच्या मुलीला गळा दाबून ठार केले.

मिळालेल्या माहितीनुसार, शाबाशपल्ली गावाजवळील नाल्याजवळ ममता (२३) आणि तिचा प्रियकर शेख फयाज (३०) यांनी रात्री मुलीचा गळा दाबून तिची हत्या केली आणि मृतदेह तिथेच पुरला. मेडक पोलिसांनी दोघांनाही अटक केली असून, शुक्रवारी मुलीचे अवशेष बाहेर काढून शवविच्छेदनासाठी पाठवण्यात आले.

२१ मे रोजी ममता सासरच्या घरातून दोन मुलांसह माहेरी आली होती. नंतर ती तिथून देखील निघून गेली. दरम्यान, २७ मे रोजी ममताचे वडील कोटला राजू यांनी मुलगी बेपत्ता झाल्याची तक्रार दाखल केली. त्यानंतर तिच्या कुटुंबाने आणि पोलिसांनी तिचा शोध घेतला, पण ममताचा काहीही ठावठिकाणा लागला नाही. पोलिस तपासात ममता आपल्या बॉयफ्रेंडसोबत आंध्र प्रदेशातील नरसारावपेट येथे असल्याचे समजले आणि ११ सप्टेंबरला तिला चौकशीसाठी परत आणण्यात आले.

पोलिसांनी केलेल्या चौकशीत ममताने कबूल केले की, रात्री मुलीच्या सततच्या रडण्यामुळे तिच्या प्रियकरासोबत वेळ घालवण्यात अडथळा येत होता आणि त्यामुळे त्यांनी मुलीला मारण्याचा निर्णय घेतला. दोघांनी रात्री हे भयानक कृत्य केले आणि पहाट होण्यापूर्वी फरार झाले, असे पोलिसांनी सांगितले.

या घटनेने परिसरात मोठी खळबळ उडाली असून ममताच्या कुटुंबालाही मोठा धक्का बसला आहे.

The post माता न तू वैरिणी! प्रियकरासोबत वेळ घालवण्यासाठी आईनेच चिमुकलीला संपवले… appeared first on थोडक्यात घडामोडी.

नाशिक : नाशिकमध्ये एक अतिशय धक्कादायक घटना घडली आहे. गंगापूर पोलिस ठाण्याच्या हद्दीत १७ वर्षीय मुलीवर तिच्या वडिलांनीच बलात्कार केल्याचे समोर आले. पोलिसांनी आरोपीला अटक केली असून या घटनेमुळे सर्वत्र खळबळ उडाली आहे.

मिळालेल्या माहितीनुसार, आरोपी मूळचा बिहारचा आहे. तो कुटुंबीयांसोबत नाशिकच्या गंगापूर पोलिस ठाण्याच्या हद्दीतील शिवाजीनगर परिसरात राहतो. दरम्यान, पीडित मुलीची आई सतत गावाला जायची. त्यातच या गोष्टीचा गैरफायदा घेत आरोपी स्वतःच्या मुलीवरच बलात्कार करत होता.

दरम्यान, पीडित मुलीच्या पोटात दुखत असल्यामुळे तिची आई तिला घेऊन नाशिकच्या जिल्हा रुग्णालयात गेली होती. डॉक्टरांनी सोनोग्राफी केल्यानंतर ती गर्भवती राहिल्याची बाब समोर आली. पीडित मुलगी आठ आठवड्यांची गर्भवती असल्याचे कळताच मुलीच्या आईने अज्ञात व्यक्तीविरोधात गंगापूर पोलिस ठाण्यात तक्रार दाखल केली.

पोलिसांनी या प्रकरणाचा कसून तपास सुरु केला. त्यांनी १०० पेक्षा जास्त जणांची चौकशी केली. तपासादरम्यान पोलिसांना समजले की पीडित मुलीची आई दीड महिन्यांपासून गावी गेलेली होती. त्यानंतर पोलिसांना शंका आली आणि त्यांनी पीडित मुलीच्या वडिलांचा डीएनए तपासला. डीएनए चाचणीनंतर पीडित मुलीवर वडिलांनीच बलात्कार केल्याचा धक्कादायक खुलासा झाला. पोलिसांनी आरोपीला अटक केली असून या घटनेमुळे नाशिकमध्ये खळबळ उडाली आहे.

The post नाशिकमध्ये खळबळ! वडिलांकडून मुलीवर बलात्कार, डीएनए चाचणीनंतर धक्कादायक खुलासा… appeared first on थोडक्यात घडामोडी.

पुणे : एका २३ वर्षीय मुलीवर झालेल्या अत्याचाराची हृदयद्रावक घटना लोणावळा येथून समोर आली आहे. पुणे जिल्ह्यातील मावळ भागातील तुंगार्ली येथे या मुलीचे अपहरण करण्यात आले आणि चालत्या गाडीत बलात्कार करण्यात आला. त्यानंतर आरोपीने तिला रस्त्याच्या कडेला फेकून दिले आणि पळून गेला. पीडितेच्या तक्रारीवरून पोलिसांनी आरोपीविरुद्ध भारतीय दंड संहितेच्या कलम ६४ (२) (एम) (बलात्कार) आणि १३८ (अपहरण) अंतर्गत गुन्हा दाखल करून त्याला अटक केली आहे.

मिळालेल्या माहितीनुसार, ही घटना शुक्रवार आणि शनिवारच्या मध्यरात्री घडली. ही मुलगी तुंगार्ली परिसरात राहते आणि घटनेच्या रात्री ती पायी तिच्या घरी परतत होती. ती पायी जात असताना तिच्या जवळ एक कार थांबली आणि त्यातील व्यक्तीने तिला जबरदस्तीने आत ओढले. यानंतर, आरोपी तिला निर्जन ठिकाणी घेऊन गेला, जिथे गाडीत तिच्यावर बलात्कार करण्यात आला. तो पीडितेला तुंगार्लीच्या वेगवेगळ्या भागात फिरवत राहिला आणि तिचे वारंवार लैंगिक शोषण करत राहिला. शनिवारी पहाटे आरोपीने पीडितेला रस्त्याच्या कडेला फेकून दिले.

दरम्यान, गंभीर अवस्थेत असलेल्या पीडितेने मोठ्या प्रयत्नाने पोलिसांशी संपर्क साधण्याचे धाडस केले. लोणावळा शहर पोलीस घटनास्थळी पोहोचले आणि तिला प्राथमिक उपचारासाठी रुग्णालयात नेण्यात आले. तिथे तिचा जबाब नोंदवण्यात आला.

पोलिसांनी सांगितले की अटक केलेला आरोपी ३५ वर्षांचा आहे आणि तुंगार्ली येथील रहिवासी आहे. प्राथमिक तपासात असेही समोर आले आहे की आरोपी आणि पीडिता एकमेकांना आधीपासून ओळखत होते. यासोबतच पीडितेच्या जबाबातही विरोधाभास दिसून आला आहे. सुरुवातीला पीडितेने असा दावा केला होता की तीन जणांनी तिचे कारमध्ये अपहरण केले आणि तिच्यावर सामूहिक बलात्कार केला. परंतु तपासात असे दिसून आले की कारमध्ये फक्त एकच व्यक्ती होती. पोलिस पीडितेच्या दाव्यांची पडताळणी करत आहेत आणि फॉरेन्सिक आणि वैद्यकीय अहवालाची वाट पाहत आहेत.

सध्या पोलिस या घटनेमागे काही पूर्वनियोजित कट आहे का याचाही तपास करत आहेत. लोणावळासारख्या शांत आणि लोकप्रिय पर्यटन स्थळी अशा घटनेने लोकांना धक्का बसला आहे.

The post लोणावळ्यात २३ वर्षीय मुलीवर गाडीत बलात्कार, आरोपी ओळखीचा, पीडितेच्या जबाबाने गूढ वाढवलं… appeared first on थोडक्यात घडामोडी.

मुंबई : दक्षिण मुंबईतील ग्रँट रोड पूर्व परिसरात मलबार हिल पोलिसांनी मोठी कारवाई करत देह व्यापार रॅकेटचा पर्दाफाश केला आहे. या कारवाईत आठ आरोपींना अटक करण्यात आली असून, बळजबरीने यात ढकलण्यात आलेल्या दहा महिलांची सुटका करण्यात आली आहे.

मिळालेल्या माहितीनुसार, साईधाम मंदिराजवळ हे रॅकेट बळजबरीने चालवले जात होते. आरोपी या महिलांना वैयक्तिक फायद्यासाठी देह व्यापारात ढकलत होते, अशी माहिती पोलिसांना मिळाली होती. या माहितीवरून पोलिसांनी छापा टाकत ही कारवाई केली. छापेमारीदरम्यान, पोलिसांनी अंदाजे ८२,००० रुपयांची रोख रक्कम आणि २.०४ ग्रॅम ड्रग्ज (किंमत सुमारे १०,००० रुपये) जप्त केली असून ते वाहतूक आणि विक्रीसाठी ठेवण्यात आले होते, असा संशय व्यक्त करण्यात आला आहे.

पोलिसांनी रॅकेटमध्ये सहभागी असलेल्या १४ कथित ग्राहकांनाही कारवाईदरम्यान ताब्यात घेतले आहे.

अटक करण्यात आलेल्या आरोपींची नावे :
सोनी गणेश शर्मा, रिंजी निमा शेर्पा, कृष्णा बिलात भुईयान, विक्रम रजनी भुईयान, अरुण दामोदर यादव, महेशा एच. शिवन्ना, पप्पू कुमार सरजू यादव आणि अमित कुमार कन्हिया यादव.

या प्रकरणी मलबार हिल पोलीस ठाण्यात भारतीय न्याय संहिता (BNS), अनैतिक मानवी वाहतूक प्रतिबंधक कायदा (PITA) आणि अंमली पदार्थ नियंत्रण कायदा (NDPS) अंतर्गत विविध कलमांनुसार गुन्हा नोंदवण्यात आला असून पुढील तपास सुरू आहे.

The post मुंबईत मलबार हिल पोलिसांकडून सेक्स रॅकेटचा पर्दाफाश, ८ जणांना अटक, १० महिलांची सुटका appeared first on थोडक्यात घडामोडी.

पुणे : राज्यभरात आत्महत्येच्या घटनांमध्ये सातत्याने वाढ होत असतानाच, पुणे जिल्ह्यातील उरुळी कांचन परिसरातील कोरेगाव मूळ येथे एका ३२ वर्षीय तरुणाने आत्महत्या केल्याची धक्कादायक घटना समोर आली आहे. पत्नीच्या सततच्या छळाला कंटाळून त्याने आयुष्य संपवल्याचा आरोप कुटुंबीयांनी केला असून, आत्महत्येपूर्वी त्याने मोबाईलमध्ये स्वतःचे दु:ख सांगणारा व्हिडिओही शूट केला आहे. आत्महत्या करणाऱ्या तरुणाचे नाव सुरज दामोदर पवार (वय ३२, रा. कोरेगाव मूळ, ता. हवेली) असे आहे. ही घटना बुधवारी दुपारी २ वाजण्याच्या सुमारास घडली.

पोलिसांनी दिलेल्या माहितीनुसार, सुरज आणि मयुरी यांचा दोन वर्षांपूर्वी विवाह झाला होता. ते कोरेगाव मूळ येथील इनामदार वस्ती परिसरात राहत होते. गेल्या काही काळात दोघांमध्ये सतत वाद होत असल्याची माहिती कुटुंबीयांनी दिली. बुधवारी किरकोळ कारणावरून त्यांच्यात पुन्हा एकदा वाद झाला, आणि त्यानंतर सुरजने राहत्या घरात छताच्या अँगलला साडीच्या सहाय्याने गळफास घेऊन आत्महत्या केली.

मोबाईलमध्ये मृत्यूपूर्वीचा व्हिडिओ
सुरजने आत्महत्या करण्याआधी मोबाईल फोनमध्ये एक व्हिडिओ शूट केला होता. या व्हिडिओमध्ये त्याने पत्नी मयुरीने दिलेला मानसिक त्रास, वारंवार होणारी भांडणे, आणि शारीरिक व भावनिक छळ यांचा उल्लेख केला आहे. या त्रासाला कंटाळूनच त्याने टोकाचे पाऊल उचलल्याचे त्याच्या निवेदनातून स्पष्ट होत असल्याचे पोलिसांनी सांगितले.

पत्नीविरोधात गुन्हा दाखल, अटक
या प्रकरणी सुरज पवार यांचे वडील दामोदर निवृत्ती पवार (वय ६०, व्यवसाय – शेती, रा. वाल्हे, वागदरवाडी, ता. पुरंदर) यांनी हडपसर पोलिस ठाण्यात तक्रार दाखल केली आहे. त्यांच्या तक्रारीवरून सुरज यांची पत्नी मयुरी सुरज पवार ऊर्फ मयुरी अनिल जाधव (वय २६) हिच्यावर भारतीय दंड संहितेच्या बीएनएस कलम १०८, ११८(१), ११५(२) अन्वये गुन्हा दाखल करून अटक करण्यात आली आहे.

दरम्यान, या घटनेनंतर पवार कुटुंबावर दुःखाचा डोंगर कोसळला आहे. परिसरात आणि नातलगांमध्ये मोठ्या प्रमाणात हळहळ व्यक्त होत असून, अशा दुर्दैवी घटनांपासून तरुण पिढीला वाचवण्यासाठी पुढे येण्याची गरज असल्याचे बोलले जात आहे.

The post पत्नीच्या सततच्या छळाला कंटाळून तरुणाची आत्महत्या, मोबाईलमध्ये मृत्यूपूर्वीचा व्हिडिओ, पत्नीला अटक appeared first on थोडक्यात घडामोडी.