मुंबई : महाराष्ट्र सरकारने ‘आनंदाचा शिधा योजना’ बंद केली आहे. मुख्यमंत्री एकनाथ शिंदे यांच्या नेतृत्वाखाली सुरू झालेल्या या योजनेला सणाच्या काळात राज्यातील लाखो लोकांकडून चांगला प्रतिसाद मिळाला होता. तथापि, सध्या सरकारने ही योजना निरस्त करण्याचा निर्णय घेतला आहे.

आनंदाचा शिधा योजना महाराष्ट्र सरकारने एकनाथ शिंदे मुख्यमंत्री झाल्यानंतर 2022 मध्ये सुरू केली होती. ही योजना विशेषतः सणाच्या काळात रेशनकार्डधारकांना दिली जात होती, ज्यामुळे लोकांना कमी किमतीत आवश्यक वस्तू मिळत होत्या. योजनेच्या माध्यमातून, रेशनकार्डधारकांना एक किलो रवा, एक किलो साखर, एक किलो चना डाळ आणि एक लिटर पामतेल फक्त 100 रुपयांमध्ये दिले जात होते. या योजनेचा लाभ दिवाळी, दसरा, गुढीपाडवा, आंबेडकर जयंती इत्यादी विशेष दिवशी 1 कोटी 63 लाख लोकांना मिळत होता.

मागील काही महिन्यांपासून राज्य सरकारच्या तिजोरीवर दबाव निर्माण होत असल्याचे सांगितले जात आहे. राज्याच्या अर्थसंकल्पात देखील आनंदाचा शिधा योजनेला एकप्रकारे वगळले गेले आहे, जे दर्शवते की सरकारच्या प्राथमिकता बदलल्या आहेत. आनंदाचा शिधा योजना बंद होण्याच्या निर्णयावरून विरोधकांनी सरकारवर जोरदार टीका केली आहे. काँग्रेसचे नेते भाई जगताप यांनी म्हटले की, “निवडणुकीच्या काळात, शिवभोजन थाळी आणि आनंदाचा शिधा यांसारख्या योजनांचा प्रचार करण्यात आला आणि आता त्याच योजना बंद करण्याचा निर्णय घेतला जात आहे. हे जनतेला गाजर दाखवण्याचे काम आहे.” विरोधकांचे म्हणणे आहे की, ही योजना केवळ निवडणुकीत विजय मिळवण्यासाठी एक ‘लोकप्रिय योजना’ म्हणून चालवली जात होती, आणि आता ती बंद करण्याच्या निर्णयामुळे सरकारची खोटी वचनबद्धता सिद्ध झाली आहे.

आता आनंदाचा शिधा योजना बंद केल्यानंतर राज्य सरकारला भविष्यात आणखी काही योजनांसाठी निधी कमी पडण्याची शक्यता आहे का, यावर राज्य सरकारचा दृष्टिकोन काय असेल, हे पाहणे महत्त्वाचे ठरेल. आनंदाचा शिधा योजना बंद केल्यामुळे राज्य सरकारला विरोधकांकडून मात्र कडक टीका सहन करावी लागणार आहे. आगामी दिवसात या निर्णयाच्या प्रभावांवर अधिक चर्चा होऊ शकते, कारण तिजोरीतील ताणामुळे भविष्यातील इतर लोककल्याणकारी योजनांवरही परिणाम होण्याची शक्यता आता व्यक्त केली जात आहे.

महायुती सरकार पुन्हा सत्तेत आल्यास महिलांना मिळणारा हप्ता १५०० रुपयांवरुन २१०० रुपये करण्यात येईल, असं आश्वासन देण्यात आलं होतं. पण काल सादर झालेल्या अर्थसंकल्पात हा हप्ता देखील वाढवण्यात आलेला नाही.

The post राज्य सरकारची ‘आनंदाचा शिधा योजना’ बंद, विरोधकांकडून टीका appeared first on थोडक्यात घडामोडी.

पुणे : पुण्यातील कसबा मतदारसंघातून निवडून येत जायंट किलर ठरलेले, काँग्रेसचे पुणे लोकसभा मतदारसंघाचे उमेदवार रविंद्र धंगेकर यांनी काँग्रेस पक्षाचा राजीनामा दिला आहे. आज पुण्यात पत्रकार परिषदेत आपला निर्णय जाहीर करताना धंगेकर यांनी शिवसेनेत (शिंदे गट) सामील होण्याचे संकेत देत ते उपमुख्यमंत्री एकनाथ शिंदे यांची भेट घेणार असल्याचे म्हणाले.

पत्रकारांशी बोलताना धंगेकर यांनी स्पष्ट केले की त्यांचा राजीनामा काँग्रेसबद्दलच्या वैयक्तिक असंतोषामुळे नाही तर सत्तेबाहेर काम करण्याच्या आव्हानांमुळे आहे. त्यांनी सांगितले कि, “माझी नाराजी काँग्रेस पक्षावर नाही. काँग्रेस सोडल्याचे मला दुःख आहे. परंतु, सत्तेत असल्याशिवाय काम होत नाही ही कार्यकर्त्यांची आणि मतदारांची भावना होती. त्यामुळे हा निर्णय घेतला आहे. काँग्रेसने मला भरभरून दिले. पक्ष सोडणे हा एक कठीण निर्णय होता, परंतु मी माझ्या कार्यकर्त्यांशी आणि मतदारांशी चर्चा करून तो घेतला. माझी कोणावरही नाराजी नाही असे सांगतानाच ते हेदेखील म्हणाले की, सत्ता अनेक वर्ष पाहिली पण सत्तेचा लाभ मिळाला नाही.”

धंगेकर म्हणाले की, आज संध्याकाळी उपमुख्यमंत्री आणि शिवसेना शिंदे गटाचे प्रमुख एकनाथ शिंदे यांच्याशी बैठक होणार असून त्यानंतर अपेक्षित निर्णय घेतला जाणार आहे. एकनाथ शिंदे आणि उदय सामंत यांनी त्यांच्याशी अनेक वेळा संपर्क साधला आणि त्यांना त्यांच्या गटात सामील होण्याचे आवाहन केले, असेही त्यांनी सांगितले. शिंदे माझ्याबद्दल आधीही बोलले होते आणि उदय सामंत यांनी मला फोनही केला होता. त्यांनी मला त्यांच्यासोबत काम करण्यास सांगितले. मी त्यांच्याकडे कोणतेही पद मागितले नाही. मी महानगर पालिका निवडणूक लढवणार नाही असेही त्यांनी स्पष्ट केले.

धंगेकर यांचे काँग्रेसमधून बाहेर पडणे महाराष्ट्रातील काँग्रेस पक्षासाठी आणखी एक धक्का मानला जात आहे. शिवसेनेशी (शिंदे गट) जुळवून घेण्याचा त्यांचा निर्णय आगामी महानगरपालिका निवडणुकीपूर्वी महाविकास आघाडी पक्षावर आणखी परिणाम करू शकतो.

रविंद्र धंगेकर यांची राजकीय कारकीर्द
रविंद्र धंगेकर यांची राजकीय कारकीर्द शिवसेनेतून सुरु झाली, ते १९९७ – २००६ या काळात शिवसेनेत होते. २००६ ते २०१७ या ११ वर्षाच्या काळात ते मनसे मध्ये होते. २०१७ ला ते पुणे महानगरपालिकेच्या निवडणुकीमध्ये नगरसेवक म्हणून निवडून आले. त्यांना या निवडणुकीत काँग्रेसने मदत केली होती. त्यानंतर त्यांनी काँग्रेसमध्ये प्रवेश केला. २०२३ मध्ये कसबा या भाजपच्या बालेकिल्ल्यात पोटनिवडणुकीत विजय मिळवला. २०२४ ला काँग्रेस पक्षाने त्यांना पुणे लोकसभा मतदारसंघांची उमेदवारी दिली होती मात्र त्यांचा मंत्री मुरलीधर मोहोळ यांनी पराभव केला होता.

The post रविंद्र धंगेकर यांचा काँग्रेस पक्षाचा राजीनामा, आज घेणार उपमुख्यमंत्री एकनाथ शिंदे यांची भेट appeared first on थोडक्यात घडामोडी.

हरियाणा : हरियाणातील रोहतक शहरात एक धक्कादायक घटना घडली आहे, ज्यामुळे राज्यात आणि देशभरात खळबळ उडाली आहे. काँग्रेस पक्षाच्या महिला कार्यकर्त्या, हिमानी नरवाल यांचा मृतदेह शनिवारी सकाळी एका निळ्या रंगाच्या सूटकेसमध्ये बस स्थानकाजवळ आढळला. ही घटना तात्काळ पोलिसांच्या निदर्शनास आली आणि तपास सुरू करण्यात आला आहे.

शनिवारी, १ मार्च २०२५ रोजी सकाळी ११ वाजेच्या सुमारास रोहतकच्या बस स्थानकावर लोकांची गर्दी होती. अचानक, एका व्यक्तीचे रस्त्याच्या कडेला ठेवलेल्या निळ्या रंगाच्या सूटकेसकडे लक्ष गेले. त्याला पाहून अजून काही लोक तिथे गेले आणि त्यांना सूटकेसमध्ये काहीतरी संशयास्पद असल्याचं वाटलं. त्यामुळे त्यांनी पोलिसांना तात्काळ माहिती दिली. पोलिसांनी घटनास्थळी पोहोचून सूटकेस उघडली असता त्यात एक तरुणीचा मृतदेह आढळला, तो पाहून सर्वांना धक्का बसला. हातावर मेहंदी, गळ्यात काळ्या रंगाची ओढणी, पांढरा टॉप आणि लाल रंगाची पँट, नाकातून रक्त आलेले होते आणि चेहरा निळा होता. या युवतीचा मृतदेह पाहून असं वाटत होतं की गळा दाबून तिला ठार करण्यात आलं आहे त्यानंतर मृतदेह सूटकेसमध्ये ठेवून फेकला आहे.

दरम्यान, पोलिसांनी फॉरेन्सिक पथकाला बोलावलं. तथापि, शनिवारी दुपारपर्यंत मृतकाची ओळख पटली नव्हती. काही स्थानिक नागरिकांनी मृतदेहाचा फोटो सोशल मीडियावर पोस्ट केला, जो लगेच व्हायरल झाला. यावरून रोहतकच्या काँग्रेस आमदार बीबी बात्रा यांनी या तरुणीची ओळख पटवली. त्यानंतर, हा मृतदेह हिमानी नरवाल यांचा असल्याची माहिती समोर आली. हिमानी नरवाल काँग्रेस पक्षाच्या महिला शाखेतील एक सक्रीय कार्यकर्त्या होत्या. त्यांनी पक्षाच्या विविध आंदोलनांमध्ये सहभाग घेतला होता आणि राहुल गांधींच्या भारत जोडो यात्रेतही हिरीरीने सहभागी झाल्या होत्या. हिमानी यांचे राहुल गांधींसोबतचे फोटो सोशल मीडियावर व्हायरल झाले होते, ज्यामुळे तिची ओळख अधिक स्पष्ट झाली. हिमानी नरवाल सोशल मीडियावर डिजिटल क्रिएटर म्हणूनही सक्रिय होत्या आणि काँग्रेसच्या अनेक उपक्रमांमध्ये सक्रियपणे सहभागी होत असत.

काँग्रेस पक्षाकडून चौकशीची मागणी
काँग्रेस पक्षाने या घटनेबाबत तीव्र निषेध व्यक्त केला आहे आणि उच्चस्तरीय चौकशीची मागणी केली आहे. पक्षाच्या नेत्यांनी या प्रकरणाची सखोल तपासणी होण्याची आवश्यकता व्यक्त केली आहे, जेणेकरून या भयाण घटनेचे नेमके कारण समोर येईल. काँग्रेसने या प्रकरणात न्याय मिळवण्यासाठी राज्य सरकारकडे ठोस पावले उचलण्याची मागणी केली आहे.

हरियाणाचे माजी मुख्यमंत्री भुपेंद्र सिंह हुड्डा यांनीही या घटनेबाबत दुःख व्यक्त केलं आहे. तसंच त्यांनी हिमानी नरवाल यांच्या कुटुंबाला न्याय मिळवून देण्यासाठी सरकारकडून आवश्यक त्या सर्व उपाययोजना लवकरात लवकर करण्याची मागणी केली आहे.

The post धक्कादायक! काँग्रेस कार्यकर्त्या हिमानी नरवाल यांचा मृतदेह सूटकेसमध्ये आढळला, पक्षाकडून उच्चस्तरीय चौकशीची मागणी appeared first on थोडक्यात घडामोडी.

काँग्रेसचे खासदार शशि थरूर यांनी पंतप्रधान नरेंद्र मोदी आणि केरळचे मुख्यमंत्री पिनाराई विजयन यांची खुलेआम प्रशंसा केल्यानंतर पक्षाच्या गोटात गदारोळ उडाला आहे. त्यावर आता काँग्रेसने थरूर यांच्यावर टीका सुरू केली आहे. थरूर यांनी काँग्रेसच्या राष्ट्रीय अध्यक्षपदाच्या निवडणुकीत भाग घेतला होता, आणि आता त्यांच्या वादग्रस्त विधानामुळे काँग्रेसमध्ये मोठा राजकीय भूकंप होण्याची शक्यता वर्तवली जात आहे.

थरूर यांचा इशारा आणि पक्ष सोडण्यावर स्पष्टीकरण
शशि थरूर यांनी पंतप्रधान मोदी आणि पिनाराई विजयन यांच्या नेतृत्वातील सरकारची प्रशंसा केली होती. यामुळे काँग्रेसमध्ये त्यांच्यावर टीका सुरू झाली. त्या संदर्भात थरूर यांनी थेट इशारा दिला आहे की, “मी पक्षासाठी उपलब्ध आहे, पण जर पक्षाला माझ्या सेवेची आवश्यकता नसेल, तर माझ्याकडे दुसरा पर्याय उपलब्ध आहे.” या विधानामुळे काँग्रेसमध्ये त्यांची स्थिती आणखी चर्चेत आली आहे.

थरूर यांनी स्पष्ट केले की, त्यांनी काँग्रेस सोडण्याचा कोणताही विचार केला नाही आहे. “आमच्यात विचारांबाबत मतभेद असले तरी, काँग्रेस सोडण्याचा विचार आम्ही करू शकत नाही,” असे त्यांनी सांगितले. तरीही, त्यांच्या इशाऱ्यातून राजकीय वर्तुळात चर्चांना उधाण आले आहे.

काँग्रेसला केरळमध्ये मजबूत नेतृत्वाची आवश्यकता
शशि थरूर यांनी काँग्रेसला केरळमध्ये एक मजबूत नेतृत्व आवश्यक असल्याचे सांगितले आहे. त्यांनी काँग्रेसला केरळ राज्यात आपला मतदारवर्ग वाढवण्याचे आवाहन केले आहे. “केरळमध्ये काँग्रेसला योग्य नेतृत्वाची गरज आहे, हे मी इतर नेत्यांना सांगितले आहे,” असं त्यांनी सांगितलं. तसेच, त्यांनी पक्षाच्या राज्यातील नेतृत्व बदलण्याची आवश्यकता व्यक्त केली.

थरूर यांचा दुसरा इशारा: केरळमध्ये व्होटर बेस वाढवण्याची गरज
थरूर यांनी आणखी एक महत्त्वाचा इशारा दिला आहे. “जर काँग्रेसने केरळमध्ये आपला व्होटर बेस वाढवला नाही, तर तिसऱ्या वेळेस विरोधी पक्षात बसावे लागेल,” असा इशारा त्यांनी दिला आहे. केरळमध्ये पुढील वर्षी विधानसभेच्या निवडणुका होणार आहेत, त्यामुळे थरूर यांचे हे विधान अत्यंत महत्त्वपूर्ण मानले जात आहे.

काँग्रेसमध्ये मोठा राजकीय भूकंप होईल का?
शशि थरूर यांचे हे विधान काँग्रेसमध्ये मोठ्या राजकीय भूकंपाची शक्यता दर्शवते. त्यांच्या या इशाऱ्यामुळे काँग्रेसच्या अंतर्गत राजकारणात एक नवा वाद सुरु होण्याची शक्यता आहे. आता काँग्रेसने काय पाऊल उचलते याकडे सर्वांचे लक्ष लागले आहे.

The post शशि थरूर यांचा काँग्रेसला थेट इशारा: काँग्रेसमध्ये आजवरच्या सर्वात मोठ्या राजकीय भूकंपाची शक्यता? appeared first on थोडक्यात घडामोडी.

नवी दिल्ली : संसदेच्या सध्या सुरू असलेल्या हिवाळी अधिवेशनात दोन्ही सभागृहातील वातावरण थोडे तापलेले आहे. त्यातच आता राज्यसभेचे अध्यक्ष जगदीप धनखर यांना हटवण्यासाठी विरोधी पक्ष इंडिया ब्लॉक अविश्वास प्रस्ताव आणण्याच्या तयारीत आहे. अध्यक्ष जगदीप धनखर यांच्या विरोधात विरोधी आघाडी एकत्र आली असून समाजवादी पक्ष (एसपी) आणि तृणमूल काँग्रेस (टीएमसी) देखील अविश्वास प्रस्तावाच्या बाजूने असल्याचे सांगितले जात आहे.

गेल्या काही दिवसांपासून इंडिया ब्लॉकच्या निदर्शनांपासून दूर राहिलेल्या टीएमसी आणि सपा खासदारांनीही अविश्वास ठरावावर स्वाक्षरी केली आहे. मिळालेल्या माहितीनुसार, विरोधी पक्ष मंगळवारी राज्यसभेत सभापतींविरोधात अविश्वास प्रस्ताव आणू शकतात. अविश्वास प्रस्ताव तयार असून त्यावर 70 सदस्यांनी स्वाक्षरी केल्याचे सांगण्यात येत आहे. सोमवारी राज्यसभेत जॉर्ज सोरोस यांच्या मुद्द्यावरून झालेल्या गदारोळात अध्यक्ष जगदीप धनखड यांची भूमिका पाहता काँग्रेस त्यांच्याविरोधात अविश्वास प्रस्ताव आणण्याची तयारी करत असल्याचे सांगण्यात येत आहे.

The post ब्रेकिंग! जगदीप धनखर यांच्याविरोधात राज्यसभेत काँग्रेस आणणार अविश्वास प्रस्ताव, सपा-टीएमसीचा देखील पाठिंबा appeared first on थोडक्यात घडामोडी.

मुंबई : महाराष्ट्राच्या निवडणुकीत झालेल्या दारूण पराभवानंतर महाविकासआघाडीमध्ये खटके उडताना दिसत आहेत. काँग्रेस प्रदेशाध्यक्ष नाना पटोले यांनी आपल्या पदाचा राजीनामा दिला असताना आता शिवसेनेच्या उबाठा गटाने पराभवाचे खापर काँग्रेसवर फोडले आहे.

शिवसेना उबाठा गटाचे नेते अंबादास दानवे यांनी काँग्रेसवर टीका करताना म्हटले की, त्यांच्या ‘अतिआत्मविश्वासामुळे’ महाराष्ट्र विधानसभा निवडणुकीत महाविकास आघाडीच्या कामगिरीला धक्का बसला आहे. मुंबईत पत्रकार परिषदेला संबोधित करताना दानवे म्हणाले की, लोकसभा निवडणुकीनंतर काँग्रेसने ज्या ठिकाणी उमेदवारी केली होती, त्या सर्व ठिकाणी अतिआत्मविश्वास होता.

ते म्हणाले की, काँग्रेस अतिआत्मविश्वासात होती हे खरे आहे. लोकसभा निवडणुकीनंतर, हरियाणा, जम्मू-काश्मीर किंवा महाराष्ट्र, कुठेही निवडणुका झाल्या, त्यांचा अतिआत्मविश्वास स्पष्टपणे दिसून आला. लोकसभा निवडणुकीत राहुल गांधी आणि काँग्रेसने कठोर परिश्रम केले आणि इंडिया ब्लॉकनेही निकाल पाहिला, पण यावेळी त्यांचा आत्मविश्वास जास्त होता.

निवडणुकीत पराभवाची कारणे दिली

• अंबादास दानवे म्हणाले की, आम्ही शेवटच्या दिवसापर्यंत जागावाटपाच्या चर्चेत गुंतलो होतो, ते दिवस जनतेशी बोलण्यात घालवायला हवे होते.
• काही जागा शिवसेनेला द्यायला हव्या होत्या, पण काँग्रेस मान्य करायला तयार नव्हती.
• मुख्यमंत्र्यांचा शपथविधी सोहळाच त्यांच्यासाठी महत्त्वाचा असल्यासारखे काँग्रेसन वागले.
• मुख्यमंत्री म्हणून उद्धव ठाकरे यांचे नाव पुढे केले असते तर निकाल वेगळे दिसले असते, असेही दानवे म्हणाले. मुख्यमंत्रीपदासाठी उद्धव ठाकरे यांचे नाव पुढे करायला हवे होते, असे ते म्हणाले. सुरुवातीपासूनच त्यांना मुख्यमंत्रिपदाचे उमेदवार म्हणून प्रक्षेपित केले असते तर निकालात लक्षणीय बदल होऊ शकला असता.

The post मुख्यमंत्रीपदासाठी उद्धव ठाकरे यांचे नाव पुढे करायला हवे होते, शिवसेनेच्या उबाठा गटाची काँग्रेसवर टीका appeared first on थोडक्यात घडामोडी.

दिल्ली : लोकसभा अध्यक्ष म्हणून ओम बिर्ला यांची निवड करण्यात आली आहे. काँग्रेसचे के. सुरेश हेसुद्धा या पदाच्या शर्यतीत होते. परंतु, आवाजी मतदानात ओम बिर्ला यांची निवड झाली. दरम्यान, या निवडणुकीवर तृणमूल काँग्रेसने आक्षेप घेतला आहे. सभागृहाबाहेर येऊन तृणमूल काँग्रेसचे खासदार अभिषेक बॅनर्जी यांनी माध्यमांशी संवाद साधून भाजपावर टीका केली आहे.

अभिषेक बॅनर्जी म्हणाले, नियमानुसार सभागृहाच्या कोणत्याही सदस्याने मत विभाजनाची मागणी केल्यास, हंगामी अध्यक्षांनी परवानगी दिली पाहिजे. संसदेतील लाईव्ह टीव्ही फुटेजमध्ये तुम्ही पाहू शकता की विरोधी पक्षातील सदस्यांनी मतविभाजनाची मागणी केली होती. मतदानासाठी प्रस्ताव ठेवण्याची मागणी केली होती. परंतु, मतदानासाठी प्रस्ताव न ठेवता आवाजी मतदान घेण्यात आले. सत्ताधारी पक्षाकडे, भाजपाकडे संख्याबळ नाही याचा हा स्पष्ट पुरावा आहे. हे सरकार आकड्यांशिवाय चालत आहे. हे बेकायदा, अनैतिक आणि असंवैधानिक सरकार आहे.

राष्ट्रीय लोकशाही आघाडीचे उमेदवार ओम बिर्ला यांची लोकसभेच्या अध्यक्षपदी निवड करण्यात आली आणि पंतप्रधान नरेंद्र मोदी यांनी मांडलेला प्रस्ताव आवाजी मतदानाद्वारे मंजूर करण्यात आला. काँग्रेसनेही के. सुरेश यांना या शर्यतीत ठेवलं होतं. परंतु, मतविभाजन झाले नसल्याने विरोधकांनी यावर प्रचंड टीका केली आहे. परंतु, मत विभाजनासाठी विरोधकांनी दबाव आणला नाही, असा आरोप सत्ताधाऱ्यांकडून केला जातोय. त्यावर अभिषेक बॅनर्जी म्हणाले की, ५०० पैकी एकाने जरी मतविभाजनाची मागणी केली तरी मतविभाजन करावं लागतं. हाच नियम आहे. त्यामुळे मतविभाजनास का नकार देण्यात आला याचा खुलास हंगामी अध्यक्षांनी केलाच पाहिजे.

लोकसभा अध्यक्षपदाच्या उमेदवारी संदर्भात बोलताना तृणमूल काँग्रेसचे खासदार अभिषेक बॅनर्जी म्हणाले, लोकसभा अध्यक्षपदासाठी विरोधी पक्षाचे उमेदवार म्हणून के सुरेश यांना नामनिर्देशित करण्यात आले. मात्र, के सुरेश यांना नामनिर्देशित करण्यापूर्वी काँग्रेसने तृणमूल काँग्रेस पक्षाची सल्लामसलत करायला हवी होती. मात्र, कोणतीही चर्चा केली नाही. याबाबत आमच्याशी संपर्क साधला गेला नाही. कोणतीही चर्चा झाली नाही. त्यामुळे दुर्दैवाने हा एकतर्फी निर्णय आहे, असं अभिषेक बॅनर्जी यांनी म्हटलं होतं.

The post लोकसभा अध्यक्षांच्या निवडीवर तृणमूल काँग्रेसचा आक्षेप, एकाने जरी मतविभाजनाची मागणी केली तरी मतविभाजन करावं लागतं, हाच नियम आहे – तृणमूल काँग्रेसचे खासदार अभिषेक बॅनर्जी appeared first on थोडक्यात घडामोडी.

मुंबई : राष्ट्रवादी काँग्रेसचे अध्यक्ष शरद पवार यांनी काँग्रेसच्या सध्याच्या परिस्थितीवर भाष्य केलं आहे. ते म्हणाले की ‘आजच्या काँग्रेसची अवस्था उत्तर प्रदेशातील जमीनदारासारखी झाली आहे. रया गेलेल्या हवेलीचा जमीनदार हे सगळे हिरवेगार शिवार माझे होते, असे सांगतो. तशीच काहीशी काँग्रेसची स्थिती आहे. एका मुलाखतीत ते बोलत होते. शरद पवार यांनी महाराष्ट्रातील महाविकास आघाडी (MVA) सरकारचे भविष्य, विरोधकांची एकजूट आणि राष्ट्रीय राजकारण यासह विविध विषयांवर भाष्य केले.

काँग्रेस नेते राहुल गांधी यांना पंतप्रधानपदाचे उमेदवार बनवण्याबाबत विरोधी पक्षात एकमत नसल्याबद्दल विचारले असता शरद पवार म्हणाले की, काँग्रेसमधील काही नेते त्यांच्या नेतृत्वाबाबत संवेदनशील आहेत. काँग्रेसची नेतेमंडळी आपल्या नेतृत्वाबद्दल वेगळी भूमिका घेण्याच्या मनस्थितीत नसतात.

काँग्रेसबाबत विचारले असता त्यांनी एक गोष्ट सांगितली. ते म्हणाले, ‘उत्तर प्रदेशमध्ये जमीनदार आहेत. त्यांच्याकडे खूप शेती आहे. गावामध्ये त्यांच्याकडे हवेली असते. लँड सिलिंगचा कायदा आला आणि त्यांच्याकडच्या जमिनी गेल्या; पण हवेली आहे, तशीच आहे. मात्र आता त्या हवेलीची दुरुस्ती करण्याची देखील कुवत त्या जमीनदारांमध्ये उरली नाही. हजार एकर जमिनी आता १५-२० एकरावर आल्या आहेत. सकाळी जमीनदार उठतो आणि हवेलीच्या बाहेर जाऊन बघतो. त्याला आजूबाजूला हिरवे पीक दिसते. तेव्हा तो हे सर्व हिरवे पीक माझे होते, असे सांगतो. माझे होते. आता मात्र नाही. मानसिकता (काँग्रेसची) सारखीच आहे. वास्तविकता स्वीकारावी लागेल. एकेकाळी काँग्रेस काश्मीरपासून कन्याकुमारीपर्यंत होती; पण ती होती. होती हे मान्य केले पाहिजे.

तथापि, शरद पवार हे देखील म्हणाले की संपूर्ण भारतातील उपस्थितीसह काँग्रेस हा देशातील एकमेव असा पक्ष आहे जो भाजपला पर्याय देऊ शकतो. कॉंग्रेस मजबूत होती (पूर्वी), तुलनेत आज त्यांच्याकडे 40-45 खासदार आहेत. त्यावेळी त्यांची संख्या 140 च्या आसपास होती. कॉंग्रेसची संख्या हेच सांगते. परंतु हा एकमेव पक्ष आहे जो देशातील संबंधित आहे. 5-7 राज्यांमध्ये त्याची सरकारे आहेत. भाजपविरोधात राष्ट्रीय उपस्थिती असलेला एकमेव पक्ष काँग्रेस आहे.”

शरद पवार यांनी त्यांच्या आणि राजकीय रणनीतिकार प्रशांत किशोर यांच्यात नुकत्याच झालेल्या बैठकांबद्दल आपली भूमिका स्पष्ट केली. ते म्हणाले की “मला प्रशांत किशोर यांच्या मदतीची गरज नाही. शिवाय, आज कोणत्याही पदाची माझी महत्वाकांक्षा नाही. पण हो, मला विरोधकांना एकत्र आणण्यासाठी प्रयत्न करायचे आहेत.”

The post शरद पवार म्हणाले, काँग्रेसची अवस्था रया गेलेल्या हवेलीच्या जमीनदारासारखी, पण… appeared first on थोडक्यात घडामोडी.

पुणे : ओबीसी आरक्षणावरून राज्यात वातावरण तापले आहे. भाजप नेत्या पंकजा मुंडे यांनी राज्य सरकारवर घणाघाती टीका केली आहे. त्या म्हणाल्या की या सरकारला मला सांगायचंय, चुकून तुम्ही राज्यात सत्तेवर आलात, भविष्यात जनता तुम्हाला दारात देखील उभं करणार नाही. सरकारच्या नाकर्तेपणामुळे आरक्षण गेलं. सरकारने 15 महिने फक्त गोल गोल फिरवलं, कुठलाही डेटा कोर्टात जमा केला नाही. यावेळी आरक्षण मिळेपर्यंत आम्ही निवडणुका होऊ देणार नाही, असा पुनरुच्चार देखील त्यांनी केला.

आज ओबीसींच्या राजकीय आरक्षणासाठी भाजपने राज्यभर आंदोलन पुकारलं आहे. राज्याच्या विविध भागांत आज भाजप नेते, कार्यकर्ते आणि पदाधिकारी रास्ता रोको, चक्काजाम आणि विविध आंदोलनाद्वारे आपला रोष व्यक्त करत आहेत. पुण्यात देखील भाजप नेत्यांनी आंदोलन करुन सरकारला जाब विचारला. यावेळी पंकजा मुंडे म्हणाल्या, “मी ओबीसींना सांगू इच्छिते तुम्ही आपलं मन तुटू देऊ नका. संघर्षाची भावना तुटू देऊ नका. ओबीसींच्या पाठीमागे भारतीय जनता पार्टी खंबीरपणे उभी आहे. भविष्यातल्या संघर्षासाठी आम्ही तयार आहोत.”

पंकजा मुंडे पुढे बोलताना म्हणाल्या, “मी मंत्री होते आणि देवेंद्र फडणवीस मुख्यमंत्री होते, तेव्हा ओबीसीचे आरक्षण पन्नास टक्क्यांच्या वरती गेले. याच्याविषयी कोर्टाच्या तारखा चालू होत्या, ते आरक्षण कसे योग्य आहे हे सांगण्यासाठी आम्ही कोर्टामध्ये काही डेटा सबमिट करत होतो. आम्ही काही सर्व्हे करत होतो. आम्हाला कोर्टाने वेळ दिला होता, तेवढ्यात आचार संहिता लागली त्यानंतर राज्यात महाविकास आघाडीचे सरकार आलं. जवळपास पंधरा महिने झाले हे सरकार फक्त कोर्टाकडून तारखाच घेत आहे. इंपिरिकलच्या आधारे कृष्णमूर्ती यांच्या मतांच्या आधारावर सरकारने हा सगळा डेटा सबमिट करावा असं त्यांनी सांगितलं, पण या सरकारने पंधरा महिन्यांमध्ये कुठलाही डाटा तयार केला नाही. सरकार फक्त गोल गोल फिरवतंय.

पंकजा मुंडे यांनी यावेळी काँग्रेसचा खरपूस समाचार घेत म्हटलं कि, “महाराष्ट्रभर आज चक्काजाम होतोय. भाजपाच्या आंदोलनानंतर सरकारी पक्षांमधील एका पक्षाने आंदोलनाची घोषणा दिली. मंत्री आज आंदोलनाची भाषा करतायत. शोभतं का तुम्हाला? आम्ही मंत्री असताना आंदोलन केलं का हो? आम्ही आरक्षण दिलं, आरक्षणाला संरक्षण दिलं. मंत्र्यांनी आंदोलन नाही तर निर्णय करायचे असतात. आंदोलन करायला विरोधी पक्ष आहे.”

The post सरकारच्या नाकर्तेपणामुळे आरक्षण गेलं, पंकजा मुंडे यांचा राज्य सरकारवर घणाघात appeared first on थोडक्यात घडामोडी.

लखनौ : कॉंग्रेसला मोठा झटका बसला आहे. कॉंग्रेसचे दिग्गज आणि राहुल गांधी यांचे निकटवर्तीय जितिन प्रसाद यांनी भाजपमध्ये प्रवेश केला आहे. केंद्रीय मंत्री पीयूष गोयल यांनी त्यांना दिल्लीतील भाजपा मुख्यालयात पक्षाचे सदस्यत्व मिळवून दिले. भाजपचे सदस्यत्व घेतल्यानंतर जितिन यांनी कॉंग्रेसवर टीका केली. ते म्हणाले की, आता फक्त भाजप पक्ष देशाच्या हितासाठी काम करीत आहे. उर्वरित पक्ष वैयक्तिक आणि प्रदेश-विशिष्ट झाले आहेत. राष्ट्रीय पक्षाच्या नावावर देशात कोणता पक्ष असेल तर तो फक्त भाजपाच आहे.

प्रसाद म्हणाले, ‘मी भाजप अध्यक्ष जेपी नड्डा, पंतप्रधान नरेंद्र मोदी, गृहमंत्री अमित शहा आणि सर्व भाजप नेत्यांचे आभार मानतो. राजकीय जीवनातल्या एका नव्या अध्यायची ही सुरुवात आहे. गेल्या तीन पीढ्यांपासून माझी काँग्रेसशी जवळीक आहे. परंतु, मी खूप विचारमंथनानंतर हा महत्त्वपूर्ण निर्णय घेतला आहे. मी कोणता पक्ष सोडला हा प्रश्न नाही. तर मी कोणत्या पक्षाकडे जात आहे आणि का? हा प्रश्न महत्त्वाचा आहे. अशी प्रतिक्रिया भाजप प्रवेशानंतर जितीन प्रसाद यांनी पत्रकारांशी बोलताना व्यक्त केली.

ते पुढे म्हणाले की, देशात खऱ्या अर्थानं संस्थात्मक राजकीय पत्र कोणता असेल तर तो भाजप आहे, हे मला गेल्या ८-१० वर्षांपासून जाणवत होतं. इतर पक्ष एखाद्या व्यक्तीचे किंवा क्षेत्राचे झाले आहेत. मात्र राष्ट्रीय पक्षाच्या नावावर भारतात जर कुठला पक्ष असेल तर तो भाजप आहे. आपला देश आज अनेक आव्हानांचा सामना करत आहे. या आव्हानांसमोर देशहितासाठी जर कोणता पक्ष आणि कोणता नेता मजबुतीनं उभा ठाकला असेल तर तो पक्ष भाजप आणि ती व्यक्ती पंतप्रधान नरेंद्र मोदी आहेत. आपल्या लोकांच्या हिताचं रक्षण करु शकत नाही किंवा त्यांच्यासाठी काम करू शकत नाही, अशा पक्षात राहण्यात काय अर्थ आहे, असा प्रश्न मला पडला होता. काँग्रेसमध्ये मला काहीही करता येत नव्हतं. गेली अनेक वर्ष काँग्रेस पक्षात मला मदत करणाऱ्या सर्व लोकांचे मी आभार मानतो. परंतु, यापुढे मात्र मी भाजपचा सच्चा कार्यकर्ता म्हणून काम करेन.

The post कॉंग्रेसला मोठा झटका! जितिन प्रसाद यांचा भाजपमध्ये प्रवेश appeared first on थोडक्यात घडामोडी.