गुजरात : गुजरातच्या राजकारणात आज मोठ्या घडामोडी पाहायला मिळाल्या. मुख्यमंत्री भूपेंद्र पटेल यांच्या नेतृत्त्वाखालील सध्याच्या मंत्रिमंडळाने अचानक सर्व सदस्यांचे राजीनामे सादर केले. हे राजीनामे केंद्रीय नेतृत्वाच्या आदेशानंतर घेण्यात आले असल्याची माहिती आहे.

मुख्यमंत्र्यांच्या निवासस्थानी झालेल्या बैठकदरम्यान वरिष्ठ नेत्यांनी मंत्र्यांना हा निर्णय समजावून सांगितला. यानंतर सर्व मंत्र्यांनी आपापले राजीनामे मुख्यमंत्री भूपेंद्र पटेल यांच्याकडे सुपूर्द केले. सुरुवातीला अंदाज व्यक्त केला जात होता की, १२ मंत्री राजीनामा देतील, मात्र मुख्यमंत्री वगळता सर्व मंत्र्यांचे राजीनामे घेण्यात आले आहेत.

राज्यातील राजकीय विश्लेषकांच्या मते, या सर्व राजीनाम्यांचा उद्देश कॅबिनेट विस्तार करण्याशी संबंधित आहे. सूत्रांच्या माहितीनुसार, मुख्यमंत्री भूपेंद्र पटेल आज रात्री राज्यपालांची भेट घेऊन मंत्र्यांचे राजीनामे त्यांच्या हाती सुपूर्द करतील.

अद्याप भाजप किंवा मुख्यमंत्री कार्यालयाकडून अधिकृत घोषणा झालेली नाही. मात्र, राजकीय वर्तुळात सांगण्यात येत आहे की, नव्या मंत्रिमंडळाचा शपथविधी उद्या, शुक्रवारी सकाळी साडे ११ वाजता, गांधीनगर येथील महात्मा मंदिर येथे पार पडेल. या कार्यक्रमाला केंद्रीय मंत्री अमित शहा आणि भाजपचे राष्ट्रीय अध्यक्ष जे. पी. नड्डा उपस्थित राहणार आहेत.

विशेष म्हणजे, या शपथविधीनंतर मुख्यमंत्री भूपेंद्र पटेल नवीन मंत्रिमंडळाचा आकार निश्चित करतील आणि आगामी काळात गुजरातमध्ये राजकारणाची दिशा ठरवली जाईल. राजकीय वर्तुळात यासंदर्भात वेगवेगळ्या चर्चा रंगल्या आहेत, मात्र केंद्रीय नेतृत्वाच्या आदेशानुसार हा निर्णय घेण्यात आलेला आहे, असा अंदाज व्यक्त केला जात आहे.

गुजरातमध्ये सध्याच्या मंत्रिमंडळातील सर्व मंत्र्यांचे राजीनामे घेणे ही खूप मोठी आणि ऐतिहासिक घडामोड मानली जात आहे. आता पुढील काही दिवसात नव्या मंत्रिमंडळाच्या सदस्यांची नावे जाहीर होण्याची शक्यता आहे आणि आगामी कॅबिनेट विस्तारावर सर्वांचे लक्ष लागले आहे.

The post गुजरातच्या राजकारणात मोठी घडामोड, मुख्यमंत्री वगळता सर्व मंत्र्यांचे राजीनामे appeared first on थोडक्यात घडामोडी.

मुंबई : राष्ट्रवादी काँग्रेसचे ज्येष्ठ नेते आणि आमदार छगन भुजबळ यांनी आज राजभवन येथे राज्याच्या कॅबिनेट मंत्रिपदाची आणि गोपनीयतेची शपथ घेतली. महायुती सरकार स्थापन झाल्यानंतर सुरुवातीच्या मंत्रिमंडळात त्यांना डावलण्यात आले होते. मात्र, सुमारे सहा महिन्यांच्या प्रतीक्षेनंतर भुजबळ यांचे मंत्रिमंडळात पुनरागमन झाले आहे.

धनंजय मुंडे यांच्या राजीनाम्यानंतर रिक्त झालेल्या मंत्रिपदासाठी भुजबळ यांची निवड करण्यात आली आहे. बीड जिल्ह्यातील मस्साजोग गावातील सरपंच संतोष देशमुख प्रकरणात आरोपींना अटक झाल्यानंतर, तत्कालीन मंत्री धनंजय मुंडे यांच्यावर संबंधित आरोपींशी जवळीक असल्याचे आरोप झाले होते. या पार्श्वभूमीवर त्यांनी मार्चमध्ये मंत्रिपदाचा राजीनामा दिला होता.

त्यानंतर राष्ट्रवादीच्या वाट्याच्या मंत्रिपदाची जागा रिक्त होती. दुसरीकडे, मंत्रिमंडळात सहभागी न झाल्याने छगन भुजबळ यांची नाराजी शिगेला पोहोचली होती. इतकी की, ते पक्ष सोडणार असल्याच्या चर्चा देखील सुरू झाल्या होत्या. अखेर, पक्षांतर्गत समेटानंतर भुजबळ यांना मंत्रिमंडळात पुन्हा स्थान देण्यात आले आहे.

भुजबळ यांच्याकडे अन्न व नागरी पुरवठा आणि ग्राहक संरक्षण खात्याची जबाबदारी सोपवण्यात येणार असल्याची शक्यता आहे. याआधीही त्यांनी हे खाते सांभाळले असून, त्यांच्या अनुभवाचा सरकारला फायदा होईल, अशी राजकीय वर्तुळात चर्चा आहे.

The post छगन भुजबळ यांचे मंत्रिमंडळात पुनरागमन, घेतली कॅबिनेट मंत्रिपदाची शपथ appeared first on थोडक्यात घडामोडी.

नागपूर : छगन भुजबळ यांनी मुख्यमंत्री देवेंद्र फडणवीस सरकारच्या मंत्रिमंडळ विस्तारावर नाराजी व्यक्त केली आहे. ”जरांगेंना अंगावर घेण्याचं बक्षीस मला मिळालं आहे. नव्यांना संधीसाठी ज्येष्ठांना डावललं जातंय. मी एक सामान्य कार्यकर्ता आहे. मला डावललं काय आणि फेकलं काय, मला काही फरक पडत नाही. असं मंत्रिपद कितीवेळा आलं आणि कितीवेळा गेलं, पण मी कधी संपलेलो नाहीय. पण मी नाराज आहे. ज्यांनी मला डावललं त्यांना कारण विचारा. ओबीसींच्या लढ्यामुळेच महायुतीला यश मिळालं”, असं म्हणत छगन भुजबळांनी आपली नाराजी स्पष्ट जाहीर केली आहे.

मुख्यमंत्री फडणवीस यांच्या सरकारचा मंत्रिमंडळ विस्तार रविवारी झाला. या मंत्रिमंडळ विस्तारात राष्ट्रवादी काँग्रेसकडून नऊ जणांनी मंत्रिपदाची शपथ घेतली. त्यात अनेक नवीन चेहऱ्यांना संधी देण्यात आली. मात्र त्यासाठी दिलीप वळसे पाटील, छगन भुजबळ यांच्यासारख्या दिग्गज नेत्यांना डावलण्यात आले. मंत्रिमंडळात स्थान न मिळाल्यामुळे छगन भुजबळ नाराज झाल्याची चर्चा आहे. या पार्श्वभूमीवर राष्ट्रवादी काँग्रेसने भुजबळ यांची नाराजी दूर करण्याचे प्रयत्न सुरु केले आहेत. त्यासाठी राष्ट्रवादी पक्षाचे उपाध्यक्ष आणि उपमुख्यमंत्री अजित पवार यांचे निकटवर्तीय प्रमोद हिंदूराव यांनी हॉटेल रेडिसन ब्ल्यू येथे जाऊन भुजबळ यांची भेट घेतली.

The post ज्यांनी मला डावललं त्यांना कारण विचारा…, छगन भुजबळांनी जाहीर केली नाराजी appeared first on थोडक्यात घडामोडी.

नागपूर : विधानसभा निवडणुकीत महायुतीला स्पष्ट बहुमत मिळाल्यानंतर ५ डिसेंबरला नव्या मंत्रिमंडळाचा शपथविधी सोहळा पार पडला होता. मात्र मंत्रिमंडळ विस्तार रखडला होता. अखेर आज मंत्रिमंडळ विस्तार पार पडला आणि नागपूरमध्ये नव्या मंत्र्यांचा शपथविधी सोहळा संपन्न झाला. यावेळी भाजपच्या १९ मंत्र्यांनी, शिवसेना शिंदे गटाच्या ११ आणि राष्ट्रवादी अजित पवार गटाच्या ९ मंत्र्यांनी शपथ घेतली.

विधानसभा निवडणुकीत भाजपने १३२ जागा जिंकून पहिलं स्थान मिळवलं. राष्ट्रवादी अजित पवार गटाला ४१ आणि शिवसेना शिंदे गटाला ५७ जागांवर विजय मिळाला. मंत्रिमंडळ विस्ताराची प्रचंड उत्सुकता होती, कारण कोणाला संधी मिळणार आणि कोणाचा पत्ता कट होणार याकडे सर्वांचं लक्ष लागलं होतं. अखेर, नव्या मंत्र्यांची यादी जाहीर झाली.

यावेळी मंत्रिमंडळात काही नव्या चेहऱ्यांना संधी मिळाली, तर काही अनुभवी नेत्यांचा पत्ता कट झाला. राष्ट्रवादीचे छगन भुजबळ आणि दिलीप वळसे पाटील यांचा समावेश नव्या मंत्रिमंडळात नाही. तसेच शिवसेना शिंदे गटाचे दीपक केसरकर यांचं नावही यादीत नाही. भाजपकडून रवींद्र चव्हाण यांना मंत्रिमंडळात स्थान नाही.

नव्या मंत्र्यांची यादी:
भाजप:
– चंद्रशेखर बावनकुळे
– राधाकृष्ण विखे पाटील
– चंद्रकांत पाटील
– गिरीश महाजन
– गणेश नाईक
– मंगलप्रभात लोढा
– जयकुमार रावल
– पंकजा मुंडे
– अतुल सावे
– अशोक उईके
– आशिष शेलार
– संजय सावकारे
– नितेश राणे
– आकाश फुंडकर
– माधुरी मिसाळ – राज्यमंत्री
– पंकज भोयर – राज्यमंत्री
– मेघना बोर्डीकर – राज्यमंत्री
– शिवेंद्रसिंहराजे भोसले

शिवसेना:
– गुलाबराव पाटील
– दादा भुसे
– संजय राठोड
– उदय सामंत
– शंभूराज देसाई
– संजय शिरसाट
– प्रताप सरनाईक
– भरत गोगावले
– प्रकाश आबिटकर
– आशीष जैस्वाल – राज्यमंत्री
– योगेश कदम – राज्यमंत्री

राष्ट्रवादी:
– हसन मुश्रीफ
– धनंजय मुंडे
– दत्तात्रय भरणे
– आदिती तटकरे
– माणिकराव कोकाटे
– नरहरी झिरवळ
– मकरंद जाधव
– बाबासाहेब पाटील
– इद्रनील नाईक

The post मंत्रिमंडळ विस्तार: नव्या मंत्र्यांचा शपथविधी, ‘या’ दिग्गज नेत्यांचा पत्ता कट appeared first on थोडक्यात घडामोडी.

महाराष्ट्र विधानसभा निवडणुकीत भाजपाच्या नेतृत्वाखालील महायुतीला ऐतिहासिक विजय मिळाला आहे. या विजयानंतर राज्यात स्थापन झालेल्या सरकारमध्ये देवेंद्र फडणवीस यांनी मुख्यमंत्री म्हणून, तर एकनाथ शिंदे आणि अजित पवार यांनी उपमुख्यमंत्री पदाची शपथ घेतली आहे. आज (रविवारी) नागपूरमध्ये मुख्यमंत्री देवेंद्र फडणवीस यांच्या नेतृत्वाखालील सरकारचा विस्तार होणार आहे. परंतु, किती मंत्र्यांचा शपथविधी होणार आणि घटक पक्षांना किती मंत्रीपदे मिळणार याबद्दल अद्याप स्पष्टता आलेली नाही.

दरम्यान, केंद्रीय गृहमंत्री आणि भाजपाचे दिग्गज नेते अमित शाह यांनी इंडिया टुडेला दिलेल्या मुलाखतीत विधानसभा निवडणुकीतील विजय आणि शिवसेनेचे नेते, उपमुख्यमंत्री एकनाथ शिंदे यांच्या नाराजीवर भाष्य केले आहे.

अमित शाह म्हणाले, “महाविकास आघाडीने लोकसभा निवडणुकीत १०५ जागा जिंकल्या होत्या, मात्र महाराष्ट्र विधानसभा निवडणुकीत महायुतीला विजय मिळाला आहे. तुमच्या विश्लेषणाचा आधार चुकीचा आहे. गेल्या निवडणुकीतदेखील नरेंद्र मोदी आणि देवेंद्र फडणवीस यांना बहुमत मिळालं होतं. शिवसेना ज्या जागांवर लढली त्या जागा आम्ही लढल्या नव्हत्या, त्यामुळे आम्ही जिंकू शकत नव्हतो. शिवसेना आमच्याबरोबर होती, त्यामुळे त्यांना बहुमत मिळालं होतं. आम्हाला संपूर्ण बहुमत मिळालं. मुख्यमंत्री बनण्याच्या लालसेपोटी उद्धव ठाकरे यांनी आमच्याशी विश्वासघात केला आणि महाराष्ट्राच्या जनतेशीही विश्वासघात केला.”

पुढे बोलताना अमित शाह म्हणाले, “उद्धव ठाकरे यांच्या नेतृत्वाखालील शिवसेनेने आमच्याबरोबर विश्वासघात केला, जनतेने ते लक्षात ठेवले. त्यानंतर अडीच वर्षांत सरकारने केलेल्या विकासकामांमुळे आणि मोदी सरकारच्या गेल्या १० वर्षांच्या सकारात्मक कामकाजाच्या जोरावर महायुतीला हा प्रचंड विजय मिळाला.”

राज्यात स्थापन झालेल्या महायुतीच्या सरकारमध्ये माजी मुख्यमंत्री एकनाथ शिंदे काहीसे नाराज असल्याची चर्चा सुरू आहे. याबाबत विचारले असता अमित शाह म्हणाले, “एकनाथ शिंदे नाराज असण्याचं काही कारण नाही. आमच्या जागा खूप जास्त आहेत. मागील वेळीही आमच्या जागा जास्त होत्या, पण आम्ही एकनाथ शिंदे यांना मुख्यमंत्री बनवले आणि अडीच वर्ष त्यांच्याबरोबर खंबीरपणे उभे राहिलो. यावेळी आम्ही सुरुवातीपासूनच सांगितले होते की, मुख्यमंत्री कोण असतील हे निवडणुकीनंतर निश्चित केले जाईल. त्यामुळे कोणीही नाराज होण्याची आवश्यकता नाही. कोणी नाराज नाही.”

मंत्रिमंडळ विस्तारास होणाऱ्या उशीराबद्दल अमित शाह म्हणाले, “आम्हाला काही अडचण येत नाही. सर्वकाही नियोजित कार्यक्रमानुसार चालू आहे. महाविकास आघाडीचे सरकार असताना जे घडत होते, त्यापेक्षा आम्ही तीन-तीन दिवस पुढे आहोत.”

The post उद्धव ठाकरे यांनी मुख्यमंत्री पदाच्या लालसेपोटी आमच्यासोबतच नाही, तर महाराष्ट्राच्या जनतेशीही विश्वासघात केला – अमित शाह appeared first on थोडक्यात घडामोडी.

नवी दिल्ली : केंद्रीय मंत्रिमंडळाचा विस्तार झाला असून १५ कॅबिनेट आणि २८ राज्यमंत्र्यांनी शपथ घेतली आहे. यानंतर केंद्रीय मंत्रिमंडळाचे खातेवाटप जाहीर करण्यात आले आहे. खातेवाटपात मोठे बदल दिसून येत आहेत.

पंतप्रधान नरेंद्र मोदींकडे कार्मिक, पेन्शन आणि नागरी तक्रारी खात्यासह ते विज्ञान आणि तंत्रज्ञान मंत्रालयावर लक्ष ठेवतील. तर अमित शहांकडे गृहमंत्रालयासह सहकार मंत्रालयाचा अतिरिक्त भार देण्यात आला आहे.

कॅबिनेट मंत्री नारायण राणे : लघु, मध्यम उद्योग खाते
राज्यमंत्री भारती पवार : आरोग्य आणि कुटुंब कल्याण खातं
राज्यमंत्री भागवत कराड : अर्थ खातं
राज्यमंत्री कपिल पाटील : पंचायत राज खातं
राज्यमंत्री रावसाहेब दानवे : रेल्वे, कोळसा आणि खाण मंत्रालयाची जबाबदारी
राज्यमंत्री रामदास आठवले : सामाजिक न्याय खाते
पियुष गोयल : वाणिज्य मंत्रालय तसेच वस्त्रोद्योग आणि ग्राहक कल्याण मंत्रालयाची अतिरिक्त जबाबदारी
अश्विनी वैष्णव : रेल्वे मंत्री तसेच माहिती तंत्रज्ञान आणि संपर्क या खात्याचीही जबाबदारी
धर्मेंद्र प्रधान : शिक्षण आणि कौशल्य विकास मंत्री
स्मृती इराणी : महिला आणि बाल विकास खातं, यासोबत त्या स्वच्छ भारत मोहीमेचे कामही पाहतील.
किरेन रिजीजू : कायदा आणि न्यायमंत्री
मनसुख मांडवीय : आरोग्यमंत्री तसेच खते आणि रसायन मंत्रीपद
हरदीप सिंग पुरी : नगरविकास, गृहनिर्माण आणि पेट्रोलियम मंत्रालय
अनुराग ठाकूर : माहिती आणि प्रसारण मंत्रालयासह क्रीडा मंत्रालयाची जबाबदारी
ज्योतिरादित्य शिंदे : नागरी हवाई वाहतूक मंत्रालय
पुरुषोत्तम रुपाला : दुग्ध, पशुपालन आणि मत्स्य विकास मंत्रालय
भूपेंद्र यादव : कामगार खातं
गिरीराज सिंह : ग्रामविकास मंत्री
सरबानंद सोनोवाल : जहाज वाहतूक, बंदरे आणि जलवाहतूक खात्यासह आयुष मंत्रालयाची अतिरिक्त जबाबदारी
पशुपती पारस : अन्न प्रक्रिया मंत्री
धर्मेंद्र प्रधान : शिक्षण आणि कौशल्य विकास मंत्री
गजेंद्रसिंह शेखावत : जलशक्ती मंत्री
भगवंत खुबा : अपारंपरिक उर्जा विभाग आणि खते-रसायन विभाग राज्यमंत्री
कपिल पाटील : पंचायती राज राज्यमंत्री
प्रतिमा भौमिक : सामाजिक न्याय राज्यमंत्री
सुभास सरकार : शिक्षण राज्यमंत्री
राजकुमार रंजन सिंह : परराष्ट्र विभाग आणि शिक्षण राज्यमंत्री
विश्वेश्वर टुडू : आदिवासी विकास आणि जलशक्ती विभाग राज्यमंत्री
शांतनु ठाकूर : बंदर, जलवाहतूक राज्यमंत्री
मुंजपरा महेंद्र : महिला व बालकल्याण आणि आयुष विभाग राज्यमंत्री
जॉन बारला : अल्पसंख्याक राज्यमंत्री
एल. मुरुगन : मासेमारी, पशुपाल आणि दुग्धव्यवसाय राज्यमंत्री, माहिती व प्रसारण राज्यमंत्री
निसिथ प्रामाणिक : गृह राज्यमंत्री, युवा आणि क्रीडा राज्यमंत्री
अनुप्रिया पटेल : उद्योग राज्यमंत्री
एस. पी. बघेल : कायदा व न्याय राज्यमंत्री
राजीव चंद्रशेखर : कौशल्य विकास, माहिती व तंत्रज्ञान राज्यमंत्री
शोभा करंदलजे : कृषी आणि शेतकरी कल्याण राज्यमंत्री
दर्शन जरदोश : टेक्स्टाईल, रेल्वे राज्यमंत्री
व्ही. मुरलीधरन : परराष्ट्र, संसदीय कार्य राज्यमंत्री
मीनाक्षी लेखी : परराष्ट्र, सांस्कृतिक राज्यमंत्री
अन्नपूर्णा देवी : शिक्षण राज्यमंत्री
अजय भट : संरक्षण, पर्यटन राज्यमंत्री
अजय कुमार : गृह राज्यमंत्री

The post केंद्रीय मंत्रिमंडळाचा विस्तार, खातेवाटपात कोणत्या मंत्र्याला कोणते खाते? जाणून घ्या… appeared first on थोडक्यात घडामोडी.