मुंबईत ५० एकरपेक्षा मोठ्या भूखंडांवर‘क्लस्टर रिडेव्हलपमेंट’ राबवणार; पहिल्या टप्प्यात १७ प्रकल्पांची निवड

मुंबई झोपडपट्टीमुक्तीसाठी राज्य शासनाचे मोठे पाऊल; उपमुख्यमंत्री एकनाथ शिंदे यांची विधान परिषदेत घोषणा

• एसआरए अभय योजनेला ३१ डिसेंबर २०२६ पर्यंत मुदतवाढ
• एसआरए प्रकल्प तक्रार जलद निपटाऱ्यासाठी एजीआरसीची संख्या वाढविणार
• म्हाडाच्या ओसीसाठीच्या अभय योजनेला देखील एक वर्षाची मुदतवाढ

नागपूर : मुंबईतील झोपडपट्टी पुनर्विकास प्रकल्पामधील लाभार्थ्यांना दिलासा देणाऱ्या अनेक महत्वपूर्ण घोषणा उपमुख्यमंत्री एकनाथ शिंदे यांनी विधानपरिषदेत केल्या. त्यामध्ये प्रामुख्याने मुंबईला झोपडपट्टीमुक्त करण्यासाठी १७ ठिकाणी एसआरए समुह पुनर्विकास प्रकल्पाच्या घोषणेसोबतच ‘एसआरए अभय योजने’ला डिसेंबर २०२६ पर्यंत मुदतवाढ, तक्रारींच्या जलद निपटाऱ्यासाठी ‘एपेक्स ग्रीव्हन्स रिड्रेसल कमिटींची संख्या वाढविण्याच्या घोषणांचा समावेश आहे. त्याचबरोबर म्हाडाच्या ओसीसाठीच्या अभय योजनेला एक वर्षाची मुदतवाढ आणि मुंबई महापालिकेच्या लिज प्लॉटवरील महापालिका कर्मचाऱ्यांनी बांधलेल्या घरांकरीता नवीन योजना करण्याची घोषणा देखील त्यांनी केली.

उपमुख्यमंत्री एकनाथ शिंदे यांनी सांगितले की, ५० एकर किंवा त्यापेक्षा मोठ्या खासगी, शासकीय किंवा निमशासकीय जमिनींवर आता एकत्रितपणे झोपडपट्टी पुनर्विकास योजना करण्यात आली आहे. योजनेच्या पहिल्या टप्प्यात मुंबईतील अँटॉप हिल, कृष्ण नगर आणि केतकीपाडा (बोरिवली), गोपीकृष्ण नगर (दहिसर),ओशिवरा, गोवंडी, चित्ता कॅम्प (ट्रॉम्बे), चेंबूर, टागोर नगर (विक्रोळी), विक्रोळी पार्कसाईट, भांडुप या १७ प्रमुख ठिकाणांची निवड करण्यात आली आहे. यामुळे मुंबईतील लाखो झोपडपट्टीवासीयांना मोठा दिलासा मिळणार आहे.

यासंदर्भात निवेदन करताना उपमुख्यमंत्री शिंदे म्हणाले, मुंबईतील ५० एकर किंवा त्यापेक्षा मोठ्या खासगी, शासकीय किंवा निमशासकीय जमिनींवर आता एकत्रितपणे पुनर्विकास केला जाणार आहे. छोट्या-छोट्या एसआरए प्रकल्पांऐवजी आता संपूर्ण परिसराचा कायापालट करण्यासाठी ही योजना राबवली जाईल. या महत्त्वाकांक्षी योजनेला राज्य मंत्रिमंडळाने ७ ऑक्टोबर २०२५ रोजी मान्यता दिली असून, १३ नोव्हेंबर २०२५ रोजी याबाबतचा शासन निर्णयही जारी करण्यात आला असल्याचे उपमुख्यमंत्र्यांनी सांगितले.

हे प्रकल्प रखडू नयेत आणि जलदगतीने पूर्ण व्हावेत, यासाठी राज्य शासनाने पुढाकार घेतला असून एमएमआरडीए, सिडको, एमआयडीसी, एमएसआरडीसी, म्हाडा आणि मुंबई महानगरपालिका या शासकीय संस्थांच्या मदतीने ‘जॉइंट व्हेंचर’ तत्त्वावर हे प्रकल्प उभारले जाणार असल्याचे उपमुख्यमंत्री शिंदे यांनी सांगितले.

प्रकल्पाच्या दुसऱ्या टप्प्यात आणखी काही प्रकल्प हाती घेतले जाणार असून त्यामुळे मुंबईचा चेहरामोहरा बदलण्यास आणि सुनियोजित शहरे वसण्यास मदत होईल, असेही त्यांनी सांगितले.

एसआरए अभय योजने‘ला ३१ डिसेंबर २०२६ पर्यंत मुदतवाढ

मुंबईतील हजारो झोपडीधारकांसाठी दिलासा देताना उपमुख्यमंत्री शिंदे यांनी झोपडी खरेदी-विक्रीच्या तांत्रिक अडचणीत अडकलेल्या नागरिकांसाठी ‘एसआरए अभय योजने’ची मुदत आता डिसेंबर २०२६ पर्यंत वाढविण्याची घोषणा केली.

अनेक झोपडीधारकांनी आपल्या झोपड्यांची खरेदी-विक्री किंवा हस्तांतरण केले होते. मात्र, नियमानुसार या नवीन झोपडीधारकांचे नाव ‘अंतिम परिशिष्ट-२’ मध्ये (पात्र झोपडीधारकांच्या यादीत) समाविष्ट करण्याची कोणतीही तरतूद नव्हती. यामुळे हजारो गरीब कुटुंब हक्काच्या घरापासून वंचित राहण्याची भीती निर्माण झाली होती. त्यामुळे राज्य शासनाने १ ऑक्टोबर २०२४ रोजी ‘अभय योजना’ लागू केली होती. सुरुवातीला ही योजना ३ महिन्यांसाठी होती नंतर तिला मार्च २०२५ पर्यंत मुदतवाढ दिली होती.

यासोबतच म्हाडाच्या ओसी साठीच्या अभय योजनेला देखील सध्या सुरू आहे. एक वर्षाची मुदतवाढ देण्याची घोषणा उपमुख्यमंत्र्यांनी केली.

एसआरए प्रकल्पाच्या तक्रार निपटाऱ्यासाठी एजीआरसीची संख्या वाढविणार

झोपडपट्टी पुनर्विकासाशी संबंधित तक्रारींचे निवारण करण्यासाठी असलेल्या ‘एपेक्स ग्रीव्हन्स रिड्रेसल कमिटी’ची (एजीआरसी) संख्या वाढविण्याचा महत्त्वपूर्ण निर्णयाची घोषणा उपमुख्यमंत्री शिंदे यांनी केली. सद्यस्थितीत २१०३ प्रकरणे प्रलंबित असून त्यांचा जलद गतीने निपटारा करण्यासाठी एजीआरसीची संख्या वाढविण्याचा निर्णय शासनाने घेतला असल्याचे उपमुख्यमंत्र्यांनी सांगितले.

मुंबई महापालिकेच्या लिज प्लॉटवर महापालिकेच्या कर्मचाऱ्यांची जी घरं बांधलेली आहेत त्याकरिता नवीन योजना आणण्याचे निर्देश महापालिकेला दिले असल्याची घोषणा देखील उपमुख्यमंत्री शिंदे यांनी यावेळी केली.

The post मुंबईत ५० एकरपेक्षा मोठ्या भूखंडांवर‘क्लस्टर रिडेव्हलपमेंट’ राबवणार; पहिल्या टप्प्यात १७ प्रकल्पांची निवड appeared first on थोडक्यात घडामोडी.

मुंबई : मुंबईच्या शिवाजी पार्कवरील प्रतिष्ठित दसरा मेळाव्यासाठी मुंबई नागरी संस्था बृहन्मुंबई महानगरपालिकेने (BMC) माजी मुख्यमंत्री उद्धव ठाकरे आणि मुख्यमंत्री एकनाथ शिंदे यांच्या गटांना परवानगी नाकारली आहे. शिवसेनेचा वार्षिक दसरा मेळावा हा महाराष्ट्रातील एक मोठा राजकीय मुद्दा बनला आहे. त्यादरम्यान ही बातमी मिळाली आहे.

शिवसेनेचे संस्थापक बाळासाहेब ठाकरे यांनी 19 जून 1966 रोजी पक्षाची स्थापना झाल्यानंतर काही महिन्यांनी शिवाजी पार्कवर वार्षिक दसरा मेळाव्याला संबोधित करण्याची परंपरा सुरू केली होती. पक्ष आणि मुख्यमंत्री एकनाथ शिंदे यांच्या बाहेर पडल्याने ‘खरी’ सेना कोणती, असा प्रश्न उपस्थित होत असताना हा मुद्दा मोठा झाला आहे. दरम्यान, शिवाजी पार्कसारख्या संवेदनशील परिसरात दोन्ही गटापैंकी एकाला परवानगी दिल्यास परिसरात कायदा आणि सुव्यवस्थेचा प्रश्न निर्माण होऊ शकतो, असे महापालिकेने म्हटले असल्याची माहिती मिळत आहे.

The post शिवाजी पार्कवर दसरा मेळाव्यासाठी कुणालाही परवानगी नाही, बीएमसीचा मोठा निर्णय appeared first on थोडक्यात घडामोडी.

मुंबई : जगभरात मंकीपॉक्सची प्रकरणे वाढत असताना, बेल्जियम हा मंकीपॉक्स आयसोलेशन सुरू करणारा पहिला देश बनला आहे. बृहन्मुंबई महानगरपालिकेने (BMC) माहिती दिली की त्यांनी संशयित रुग्णांसाठी कस्तुरबा रुग्णालयात 28 खाटांचा वॉर्ड तयार ठेवला आहे. आत्तापर्यंत महाराष्ट्राच्या राजधानीत मंकीपॉक्सची कोणतीही प्रकरणे आढळलेली नाहीत, असे सार्वजनिक आरोग्य विभागाने म्हटले आहे.

व्हायरल झुनोटिक रोगाबद्दल जारी केलेल्या सल्ल्यामध्ये, बीएमसीने म्हटले आहे की विमानतळ अधिकारी प्रादुर्भाव दर्शविणाऱ्या स्थानिक आणि स्थानिक नसलेल्या देशांमधून येणाऱ्या प्रवाशांची तपासणी करत आहेत. 20 मे रोजी केंद्रीय आरोग्य मंत्री मनसुख मांडविया यांनी नॅशनल सेंटर फॉर डिसीज कंट्रोल आणि ICMR ला परिस्थितीवर बारीक लक्ष ठेवण्याचे निर्देश दिले आहेत.

“संशयित प्रकरणांच्या विलगीकरणासाठी, कस्तुरबा रुग्णालयात स्वतंत्र वॉर्ड (28 खाटा) तयार करण्यात आला आहे आणि त्यांचे नमुने पुणेस्थित राष्ट्रीय विषाणूशास्त्र संस्थेकडे (NIV) चाचणीसाठी पाठवले जातील,” असे नागरी संस्थेच्या सल्लागारात म्हटले आहे. मुंबईतील सर्व आरोग्य सुविधांना सूचित करण्यात आले आहे की मंकीपॉक्सचा संशयित रुग्ण आढळल्यास कस्तुरबा रुग्णालयात पाठवावे.

BMC च्या सल्ल्यानुसार :

• मंकीपॉक्स हा एक विषाणूजन्य झुनोटिक रोग आहे, जो प्रामुख्याने मध्य आणि पश्चिम आफ्रिकेतील उष्णकटिबंधीय पर्जन्यवन भागात आढळतो आणि कधीकधी इतर प्रदेशांमध्ये निर्यात केला जातो.
• मंकीपॉक्स सामान्यत: ताप, पुरळ आणि सुजलेल्या लिम्फ नोड्ससह वैद्यकीयदृष्ट्या प्रकट होतो आणि त्यामुळे अनेक वैद्यकीय गुंतागुंत होऊ शकतात.
• हा सामान्यतः दोन ते चार आठवड्यांपर्यंत लक्षणांसह एक स्वयं-मर्यादित रोग आहे. गंभीर प्रकरणे उद्भवू शकतात आणि मृत्यूचे प्रमाण 1 ते 10 टक्क्यांपर्यंत वाढू शकते, असे बीएमसीने म्हटले आहे.
• हा रोग प्राण्यांपासून माणसांमध्ये तसेच माणसापासून माणसातही पसरतो.
• विषाणू तुटलेली त्वचा (जरी दिसत नसली तरीही), श्वसनमार्गातून किंवा श्लेष्मल पडद्याद्वारे (डोळे, नाक किंवा तोंड) शरीरात प्रवेश करतो.
• मंकीपॉक्सचा उष्मायन काळ सामान्यतः 7 ते 14 दिवसांचा असतो, परंतु तो 5 ते 21 दिवसांपर्यंत असू शकतो आणि या कालावधीत व्यक्ती सहसा संसर्गजन्य नसते.
• संक्रमित व्यक्तीला पुरळ दिसण्याच्या 1-2 दिवस आधीपासून हा रोग प्रसारित होऊ शकतो आणि सर्व खरुज गळून पडेपर्यंत तो संसर्गजन्य राहू शकतो,” असे सल्लागारात म्हटले आहे.

अमेरिकेत आढळला मंकीपॉक्सचा रुग्ण, जाणून घ्या मंकीपॉक्स कसा पसरतो? लक्षणे, उपचार…

The post मंकीपॉक्सची भीती! मुंबईत मंकीपॉक्सच्या संशयित रुग्णांसाठी आयसोलेशन वॉर्ड तयार appeared first on थोडक्यात घडामोडी.

मुंबई : पावसाळा सुरु झाला आहे, अशा परिस्थितीत मुसळधार पावसात पाण्यातून योग्य खबरदारी न घेता चालणाऱ्या व्यक्तींना लेप्टोस्पायरोसिसचा संसर्ग होण्याची शक्यता आहे. या पार्श्वभूमीवर BMC कडून आवाहन करण्यात आले आहे, की अशा व्यक्तींनी २४ ते ७२ तासांच्या आत वैद्यकीय सल्ला घेऊन प्रतिबंधात्मक औषधोपचार करणे आवश्यक आहे.

बृहन्मुंबई महानगरपालिकेने (BMC) लेप्टोस्पायरोसिसबाबत सल्लागार जारी केला आहे. असा इशारा देण्यात आला आहे की, येत्या दिवसांत शहरात अतिवृष्टीची शक्यता वर्तविली जात आहे. बीएमसीने नमूद केले आहे की अतिवृष्टी दरम्यान पावसाच्या साचलेल्या किंवा वाहत्या पाण्यातून नागरिकांना चालावे लागते. अशा पाण्यात ‘लेप्टोस्पायरोसिस’ या रोगाचे ‘लेप्टोस्पायरा’ हे सुक्ष्मजंतू असण्याची शक्यता असते. उंदीर, कुत्रे, घोडे, म्हशी इत्यादी प्राण्यांच्या मलमूत्रातून लेप्टोचे सुक्ष्मजंतु पावसाच्या पाण्यात संसर्गित होतात. अशा बाधित झालेल्या पाण्याशी माणसाचा संपर्क आल्यास त्यांना लेप्टोची बाधा होण्याची शक्यता असते. तसेच त्या व्यक्तीच्या पायाला किंवा शरीराच्या कोणत्याही भागाला जखम असेल, अथवा साधे खरचटलेले जरी असले, तरी त्या जखमेतून लेप्टोचे जंतू माणसाच्या शरीरात प्रवेश करतात. त्यामुळे ज्या व्यक्तींचा पावसाच्या पाण्याशी संपर्क आला असेल, त्यांनी तातडीने वैद्यकीय सल्ल्यानुसार प्रतिबंधात्मक औषधोपचार करावेत.

लेप्टोस्पायरोसिस म्हणजे काय?

लेप्टोस्पायरोसिस हा एक जीवाणूजन्य रोग आहे, ज्याचा मानव आणि प्राण्यांवर परिणाम होतो. लेप्टोस्पायरोसिस ‘लेप्टोस्पायरा’ या जीवाणूमुळे होतो. हा जीवाणू संक्रमित प्राण्यांच्या मूत्रातून पसरतो, जो पाण्यात किंवा मातीमध्ये येतो आणि कित्येक आठवडे किंवा महिने तिथे जगू शकतो. अनेक प्रकारचे वन्य आणि पाळीव प्राणी या सूक्ष्मजंतूचे वाहक ठरतात. यामध्ये गुरेढोरे, डुकरे, घोडे, कुत्रे, उंदीर असे बरेच प्राणी असू शकतात. संक्रमित प्राण्यांमध्ये या आजाराची कोणतीही लक्षणे नसतात, परंतु ते प्राणी हे जीवाणू वातावरणात सोडू शकतात.

जोखीम :

1. पावसाच्या साचलेल्या किंवा वाहत्या पाण्यात संक्रमित प्राण्यांचे मूत्र मिसळले आणि अशा पाण्याशी संपर्क आला तर मनुष्य संक्रमित होऊ शकतो.
2. हे जीवाणू त्वचेतून किंवा डोळे, नाक, किंवा तोंड अशा अवयवांद्वारे शरीरात प्रवेश करू शकतात, विशेषत: जर त्वचेला जखम किंवा खरचटलेले असेल.
3. दूषित पाणी पिण्यामुळेही संसर्ग होऊ शकतो.
4. लेप्टोस्पायरोसिसचा प्रादुर्भाव सहसा दूषित पाण्याच्या संपर्कात आल्यामुळे होतो, जसे पुराचे पाणी.

संक्रमित व्यक्तीपासून दुसऱ्या व्यक्तीला या विषाणूचा संसर्ग होत नाही.

लक्षणे :

• मानवांमध्ये, लेप्टोस्पायरोसिसच्या लक्षणांमध्ये तीव्र ताप, डोकेदुखी, थंडी वाजून येणे, स्नायू दुखणे, उलट्या होणे, कावीळ (पिवळी त्वचा आणि डोळे), लाल डोळे, ओटीपोटात वेदना, अतिसार आणि पुरळ यांचा समावेश असू शकतो.
• काही संक्रमित व्यक्तींना कोणतीही लक्षणे जाणवत नाहीत.
• एखाद्या व्यक्तीला जीवाणूंच्या संपर्कात आल्यानंतर त्याची लक्षणे 2 दिवस ते 4 आठवड्यांनी जाणवू शकतात.
• संसर्ग झाल्यास ताप आणि इतर लक्षणे अचानक जाणवू लागतात.
  हे दोन टप्प्यात होऊ शकते:

1. पहिल्या टप्प्यात ताप, थंडी वाजून येणे, डोकेदुखी, स्नायू दुखणे, उलट्या होणे किंवा अतिसार अशी लक्षणे दिसतात. त्यानंतर रुग्ण काही काळ बरे होतात आणि पुन्हा आजारी पडतात.
2. दुसऱ्या टप्प्यात लक्षणे अधिक तीव्र असतात, त्या व्यक्तीस मूत्रपिंड किंवा यकृत निकामी होण्याचा धोका उद्भवू शकतो.

• हा आजार काही दिवसांपासून ते 3 आठवड्यांपर्यंत किंवा त्याहून अधिक काळ टिकू शकतो. उपचार न करता बरे होण्यास कित्येक महिने लागू शकतात.

प्रतिबंध आणि उपचार :

1. दूषित पाण्यात पोहणे किंवा जनावरांच्या लघवीमुळे दूषित झालेल्या पाण्यात चालणे टाळा.
2. दूषित पाणी किंवा मातीच्या संपर्कात येत असाल तर संरक्षक कपडे किंवा पादत्राणे (पावसाळी बूट) यांचा वापर करा.
3. जर आपल्याला काही लक्षणे जाणवत असतील तर निदान करण्यासाठी डॉक्टरांचा सल्ला घ्या आणि योग्य उपचार घ्या.

मासिक पाळी येण्यास उशीर होतोय? मग करा ‘हे’ सोपे घरगुती उपाय…

कोरोनाशी लढताना आणि कोरोनाबरोबर जगताना काय काळजी घ्याल? – डॉ. उमेश फालक

The post पावसाच्या पाण्यातून चालता? लेप्टोस्पायरोसिसचा संसर्ग होण्याची शक्यता, जाणून घ्या लक्षणे, प्रतिबंध आणि उपचार… appeared first on थोडक्यात घडामोडी.

मुंबई : मुंबई उच्च न्यायालयाने आज घरोघरी लसीकरणाची मागणी करणाऱ्या जनहित याचिकेवर सुनावणी करताना राज्य सरकार व मुंबई महापालिकेला फटकारले आहे. घरोघरी लसीकरण मोहीम राबवण्यात काय अडचण आहे? असा प्रश्न न्यायालयाने विचारला. त्याचबरोबर ‘महाराष्ट्रातील त्या ज्येष्ठ नेत्याला घरी जाऊन लस कोणी दिली होती? राज्य सरकारनं की मुंबई महापालिकेनं?’ याबाबत न्यायालयाने स्पष्टीकरण मागितले.

अॅड. धृती कपाडिया व अॅड. कृणाल तिवारी या वकिलांनी घरोघरी लसीकरणाची मागणी करणारी जनहित याचिका दाखल केली आहे. त्यावर मुख्य न्यायमूर्ती दीपांकर दत्त व न्यायमूर्ती गिरीश कुलकर्णी यांच्या खंडपीठापुढे सुनावणी सुरू आहे. काल झालेल्या सुनावणीत सध्याच्या परिस्थितीत घरोघरी लसीकरण व्यवहार्य नाही, अशी भूमिका केंद्र सरकारने मांडली होती. केरळसह देशात विविध ठिकाणी सुरू असलेल्या घरोघरी लसीकरण मोहिमेची माहिती जनहित याचिकाकर्त्यांनी न्यायालयापुढं ठेवली. त्यामुळं न्यायालयानं केंद्र व राज्य सरकारसह महापालिकेलाही सुनावले.

‘घरोघरी लसीकरणाच्या प्रश्नावरील सुरुवातीच्या सुनावणीच्या वेळी महाराष्ट्रातील ज्येष्ठ राजकारण्याला घरात जाऊन लस दिली होती, ती कोणी दिली होती? राज्य सरकारनं की मुंबई महापालिकेनं? याचं उत्तर आम्हाला द्या. आम्हाला पहायचंच आहे की, हे सर्व काय सुरू आहे? एका व्यक्तीला घरात लस मिळते, मग इतरांना का नाही?, असा सवाल खंडपीठाने राज्य सरकारला केला. मुंबई महापालिकेतर्फे ज्येष्ठ वकील अनिल साखरे यांनी यासंदर्भात माहिती घेऊन उद्या देतो, असं सांगितलं.

न्यायमूर्तींनी सुनावणी दरम्यान संताप व्यक्त करत म्हटलं कि, “कोरोनाच्या प्रश्नावर मुंबई महापालिका ही देशभरात ‘रोल मॉडेल’ असल्याचं आम्ही म्हणालो होतो. मात्र, घरोघरी लसीकरणाच्या बाबतीत मुंबई महापालिकेनं घेतलेली भूमिका बोटचेपी आहे. आम्ही मुंबई महापालिकेला केंद्र सरकारच्या धोरणाविना लसीकरण सुरू करण्याची संधी दिली होती, मात्र महापालिकेनं केंद्र सरकारच्या धोरणाकडे बोट दाखवलं.” यावेळी धोरण नसताना एका राजकीय व्यक्तीला घरी जाऊन लस कशी व कोणी दिली? याचं उत्तर मुंबई महापालिकेनं शुक्रवारी द्यावं,’ असं खंडपीठानं सांगितलं.

The post महाराष्ट्रातील त्या ज्येष्ठ नेत्याला घरी जाऊन लस कोणी दिली? मुंबई उच्च न्यायालयाने व्यक्त केला संताप appeared first on थोडक्यात घडामोडी.

मुंबई : मुंबईच्या महापौर किशोरी पेडणेकर एका ट्विटमुळे वादात अडकल्या आहेत. ट्विटरवर लसींच्या ग्लोबल टेंडरसंबंधी प्रश्न विचारणाऱ्या नेटकऱ्याचा बाप काढल्याने किशोरी पेडणेकर सोशल मीडियावर ट्रोल होत आहेत. मात्र आता या संपूर्ण वादावर किशोरी पेडणेकर यांनी स्पष्टीकरण दिलं आहे. त्या म्हणाल्या की, ते ट्विट मी नाही तर एका शिवसैनिकाने केलं होतं. या शिवसैनिकाची हकालपट्टी करण्यात आल्याचंही त्यांनी सांगितलं आहे.

मुंबईत आयोजित पत्रकार परिषदेत बोलताना किशोरी पेडणेकर यांनी सांगितलं की, “बीकेसीत मी एका कार्यक्रमासाठी गेले होते. यावेळी माझ्यासोबत शाखाप्रमुख आणि दोन कार्यकर्ते होते. कार्यक्रम सुरु असताना मी मोबाइल माझ्याकडे ठेवत नाही. तसंच माझ्या मोबाइलला लॉक नसतो. मोबाइल पाहत असताना शिवसैनिकाने हे ट्विट केलं होतं. ते ट्विट पाहिल्यानंतर ही मोठी चूक झाल्याचं माझ्या लक्षात आलं. आपल्याशी कोणी कितीही वाईट वागलं तरी आपण तसं वागू नये, या मताची मी आहे. मी कधीही गैरवर्तन करत नाही. मी तात्काळ ते ट्विट डिलीट केलं. तसंच त्या मुलाला परत माझ्याकडे यायचं नाही असं सांगितलं.” असं स्पष्टीकरण किशोरी पेडणेकर यांनी दिलं आहे.

किशोरी पेडणेकर पुढे म्हणाल्या कि, “आता तर मला चांगला धडा मिळाला. कोणी कितीही जवळचा असला तरी त्याच्याकडे मोबाइल देऊ नये हा धडाच यानिमित्ताने मिळाला आहे. आज ट्विट केलं आहे, उद्या काहीही होऊ शकतं.”

काय आहे प्रकरण?

किशोरी पेडणेकर यांनी एका वृत्तवाहिनीला मुलाखत दिली होती. ही मुलाखत त्यांनी ट्विटरवर शेअर केली होती. या मुलाखतीत त्यांनी एक कोटी लोकांना लस देण्यासंदर्भात पालिकेकडून काढण्यात आलेल्या ग्लोबल टेंडर तसंच त्याला कंपन्यांनी दिलेल्या प्रतिसादाचा उल्लेख केला होता. या ट्विटवर एका व्यक्तीने कंत्राट कोणाला दिले? असा प्रश्न विचारला होता. यावर किशोरी पेडणेकर यांनी उत्तर देताना ‘तुझ्या बापाला’ असं म्हटलं होतं. हे ट्विट व्हायरल होऊ लागल्यानंतर महापौर पेडणेकर सोशल मीडियावर ट्रोल होऊ लागल्या, त्यानंतर महापौरांनी हे ट्विट डिलीट केलं होतं.

The post ते ट्विट मी केलं नाही, पण मला चांगला धडा मिळाला, ‘त्या’ आक्षेपार्ह ट्विटवर किशोरी पेडणेकर यांचं स्पष्टीकरण appeared first on थोडक्यात घडामोडी.

मुंबई : मुंबईत कोरोना व्हायरसच्या वाढत्या संसर्गाच्या पार्श्वभूमीवर पालिकेने अतिशय कठोर नियम तयार केले आहेत. नव्या नियमांनुसार, होम क्वारंटाईन असलेली व्यक्ती जर बाहेर गेली तर आता थेट पोलिसांत गुन्हा दाखल करण्यात येणार आहे.

तसेच ५ पेक्षा जास्त जणांना संसर्ग झाल्यास कोरोना रूग्ण असलेल्या फ्लॅटला याची माहिती नोटीस बोर्डावर द्यावी लागेल. जे होम क्वारंटाईन आहेत त्यांनी जर नियमांकडे दुर्लक्ष केलं किंवा ते घरात न आढळल्यास त्यांना संस्थागत स्वरूपात विलगीकरणात ठेवण्यात येतील. कोरोना विषाणूच्या संसर्गाची 90 टक्के प्रकरणे उंच इमारती आणि बिल्डिंगमधून येत आहेत, असं देखील बीएमसीने सांगितलं आहे.

The post ब्रेकिंग : BMC ने कोरोना नियम केले कठोर, आता नियम न पाळल्यास होणार थेट पोलीस केस appeared first on थोडक्यात घडामोडी.

मुंबई : कोरोनाचे रुग्ण वाढत असल्याने मुंबई महानगरपालिकेने कोरोनासंदर्भात मार्गदर्शक सूचना जाहीर केल्या आहेत. पाचपेक्षा अधिक रुग्ण आढळणारी इमारत सील केली जाणार असून गृह विलगीकरण केल्या जाणाऱ्या राहिवाशांच्या हातावर शिक्के मारले जाणार आहेत. विना मास्क फिरणाऱ्यांवर कारवाई करण्यात येणार असून मंगल कार्यालये, क्लब, उपहारगृहे या ठिकाणी धाडी टाकण्याचे स्पष्ट आदेश पालिका आयुक्त इक्बालसिंह चहल यांनी दिले आहेत.

कोरोनासंदर्भात नव्याने जारी करण्यात आलेल्या गाईडलाईन्स :

1. लक्षण विरहित रुग्णांना घरी विलगीकरण (होम क्वारंटाइन) करण्यात येते. अशा रुग्णांवर पूर्वीप्रमाणे हातावर शिक्के मारण्यात यावेत. तसेच त्यांची माहिती संबंधित सोसायटींना कळवावी. वॉर्ड वॉर रुम्सच्या माध्यमातून त्यांच्यारवर बारकाईने नजर ठेवावी. अशा व्यक्तिंना दिवसातून ५ ते ६ वेळा दूरध्वनीवर संपर्क साधून ते घरी असल्याची खातरजमा करावी. बाधित व्यक्तिंची योग्य माहिती ठेवून त्यांच्या नजीकच्या संपर्कातील व्यक्तिंचे विलगीकरण करावे. या रुग्णांचा विलगीकरण कालावधी पूर्ण होण्या‍आधी रुग्ण घराबाहेर पडला, सार्वजनिक ठिकाणी फिरला तर त्याची माहिती सोसायट्यांनी महानगरपालिकेच्या वॉर्ड वॉर रुमला कळवावी. वॉर्ड वॉर रुमने अशा रुग्णांवर गुन्हे दाखल करण्याची कार्यवाही करावी. तसेच अशा रुग्णांना सक्तीने संस्थात्मक विलगीकरण करावे.
2. ज्या रहिवासी इमारतींमध्ये पाचपेक्षा अधिक रुग्ण आढळतील, अशा निवासी इमारती प्रतिबंधित (सील) करण्यात याव्यात.
3. मंगल कार्यालये, जिमखाना/क्लब्ज, नाइट क्लब, उपहारगृह, चित्रपटगृह, सर्वधर्मिय स्थळ, खेळाची मैदाने व उद्याने, सार्वजनिक ठिकाणे, शॉपिंग मॉल तसेच सर्व खासगी कार्यालये अशा सर्व ठिकाणी मास्कचा वापर बंधनकारक आहे. मास्कचा वापर होत नसल्याचे आढळल्यास आणि ५० पेक्षा अधिक व्यक्ती एकावेळी आढळल्यास संबंधित व्यक्तिंना दंड करण्यासोबत त्या-त्या ठिकाणच्या आस्थापनांवर, व्यवस्थापनांवर गुन्हे दाखल करण्यात यावेत.
4. लग्न सोहळ्यांचे आयोजन होणारे सभागृह, मंगल कार्यालये येथे नियमितपणे तपासणी करावी. दररोज अशाप्रकारच्या किमान ५ जागांवर धाड टाकून तपासणी करावी. तिथे कोणत्यांही नियमांचे उल्लंघन झालेले असेल तर दंडात्मक कारवाई करून लग्नातचे आयोजक/पालक तसेच संबंधित व्यवस्थापनांवर देखील गुन्हे दाखल करावेत.
5. मास्कचा योग्यरित्या उपयोग न करणाऱ्या तसेच सार्वजनिक जागी थुंकणाऱ्या नागरिकांवर कारवाई करण्यासाठी मुंबईत सध्या कार्यरत असलेल्या २ हजार ४०० मार्शल्सची संख्या दुपटीने वाढवून ती ४ हजार ८०० इतकी करावी. विना मास्क फिरणाऱ्यांवर जरब बसवणे आवश्यक आहे. त्यादृष्टीने सध्या होत असलेली सरासरी १२ हजार ५०० नागरिकांवरील कारवाईची संख्या वाढवून दररोज संपूर्ण मुंबईत मिळून किमान २५ हजार नागरिकांवर दंडात्मक कारवाई करण्यात यावी.
6. मुंबईतील पश्चिम, मध्य आणि हार्बर उपनगरीय रेल्वे सेवांच्या गाड्यांमध्ये विना मास्क प्रवास करणाऱ्यांवर कारवाई करण्यासाठी प्रत्येक मार्गावर १०० याप्रमाणे एकूण ३०० मार्शल्स नेमून विनामास्क प्रवास करणाऱ्यांवर कारवाई करावी.
7. विनामास्क फिरणाऱ्यांवर कारवाई करण्यासाठी आता पोलिसांनाही अधिकार देण्या‍त येत असून पोलीस देखील मार्शल म्हणून नागरिकांकडून दंड आकारून कारवाई करु शकतील.
8. मुंबई महानगरपालिकेच्या मालकीच्या सर्व इमारती, कार्यालये, रुग्णालये आदी ठिकाणी आवश्यकतेनुसार महानगरपालिकेच्यात शिक्षकांची नियुक्ती करून त्यांना विना मास्क फिरणाऱ्यांवर दंडात्मक कारवाई करण्याचे अधिकार देण्यात येतील.
9. सर्वधर्मिय प्रार्थनास्थाळांच्या जागी पुरुषांप्रमाणेच महिला मार्शल नेमून तेथे नियमांचे पालन होत असल्याबाबत लक्ष ठेवण्यात येईल. विना मास्क फिरणे, ५० पेक्षा अधिक व्यक्तिंनी एकाचवेळी एकत्र येणे, अशा नियमांचे उल्लंघन केल्यास तेथेही कारवाई करण्यात येईल.
10. खेळाच्या मैदानांवर व उद्यानांमध्ये देखील विना मास्क आढळणाऱ्यांवर कारवाई करण्यात येईल.
11. कोविड बाधित रुग्णांची संख्या अधिक असलेल्या विभागांमध्‍ये मिशन झिरोच्या धर्तीवर कार्यवाही सुरू करावी. ज्या विभागांमध्ये नवीन रुग्ण मोठ्या संख्येने आढळून येत आहेत, तेथे एरिया मॅपिंग करून, त्या क्षेत्रांमध्ये जास्तीत जास्त संख्ये‍ने चाचण्या करण्यात याव्यात. तसेच अशा परिसरांमध्ये प्रति रुग्णामागे किमान १५ नजीकच्या संपर्कातील व्यक्ती (हायरिस्क कॉन्टॅक्ट) शोधून त्यांना विलगीकरणात ठेवावे.
12. झोपडपट्टी, अरुंद वस्ती, दाट वस्तींमध्ये बिगरशासकीय संस्थांच्या मदतीने आरोग्य तपासणी शिबिरांचे आयोजन करून संशयितांची तपासणी करावी. फिरत्या दवाखान्यांच्या (मोबाइल व्हॅन) माध्यमातून रुग्ण शोध मोहीम सुरु ठेवावी. चाचण्या कराव्यात.
13. प्रत्येक विभाग कार्यालयाच्या हद्दीमध्ये हाय रिस्क कॉन्टॅक्टमधील व्याक्तिंसाठी करोना केअर सेंटर १ आणि लक्षणे नसलेल्या बाधितांसाठी करोना केअर सेंटर २ असे दोन्‍ही संवर्गातील प्रत्येकी किमान एक केंद्र कार्यान्वित ठेवावे.
14. जम्बो कोविड सेंटरमधील क्षमतांचा आढावा घेऊन नियमित रुग्णशय्या, ऑक्सिजन रुग्णशय्या यांची पुरेशी उपलब्धता ठेवावी.
15. मुंबई महानगरपालिका क्षेत्रातील सर्व शासकीय तसेच खासगी रुग्णालयांतून कोविड रुग्ण, रुग्णशय्या व इतर आवश्यक माहिती दर तासाने संकलित करून ती माहिती डॅशबोर्डच्या माध्यमातून आपत्कालीन व्यवस्थापन खात्याने अद्ययावत करावी.
16. केंद्र सरकारच्या नियमावलीप्रमाणे आता ब्राझिलमधून भारतात येणाऱ्या प्रवाशांनाही संस्थात्मक विलगीकरणात रहावे लागणार आहे. यामुळे मुंबई विमानतळावर ब्राझिलमधून येणाऱ्या प्रवाशांना सक्तीने सात दिवसांच्या संस्थात्मक विलगीकरणात ठेवण्याचा निर्णय मुंबई महानगरपालिका प्रशासनाने घेतला असून त्याची अंमलबजावणी सुरू करण्यात आली आहे.

The post कोरोनासंदर्भात BMC ने नव्याने जारी केल्या गाईडलाईन्स, जाणून घ्या… appeared first on थोडक्यात घडामोडी.

मुंबई : लोकल प्रवासावरील वेळमर्यादेमुळे अनेक मुंबईकर त्रस्त आहेत. या वेळमर्यादेमुळे राज्य सरकारच्या निर्णयाबाबत नाराजी व्यक्त केली जात आहे. याची दखल घेत लोकलच्या वेळेत बदल करण्याचे संकेत काही दिवसांपूर्वीच आरोग्यमंत्री राजेश टोपे यांनी दिले होते. त्यानंतर आज मुंबई महापालिकेचे अतिरिक्त आयुक्त सुरेश काकाणी यांनी महत्त्वाची माहिती दिली आहे.

काकाणी यांनी सांगितलं कि, ‘लोकल ट्रेनसह मुंबईतील सर्व व्यवहार पूर्वीप्रमाणे सुरळीत होणे हे कोरोना रुग्णांच्या संख्येवर अवलंबून आहे. सर्वांसाठी लोकल खुली होऊन आठवडा उलटल्यानंतरही कोरोना रुग्णांच्या संख्येत वाढ झालेली नाही. पुढील १५ दिवस अशीच परिस्थिती राहिल्यास लोकल ट्रेनच्या सध्याच्या वेळापत्रकात बदल केले जातील आणि मुंबईकरांना दिलासा मिळेल.’

सध्या मुंबईतील लोकल ट्रेन सकाळी पहिल्या गाडीपासून सात वाजेपर्यंत, दुपारी १२ ते ४ या वेळेत आणि रात्री ९ नंतर सर्वांसाठी खुली आहे. त्यामुळं काही प्रमाणात दिलासा मिळाला असला तरी अनेक मुंबईकर या वेळमर्यादेमुळे त्रस्त आहेत. कुठल्याही कामासाठी बाहेर पडताना सर्वसामान्यांना ट्रेनचे वेळापत्रक पाहावे लागत आहे. या पार्श्वभूमीवर सुरेश काकाणी यांनी दिलेली माहिती काहीशी दिलासादायक मानली जात आहे.

The post मुंबई लोकल प्रवाशांसाठी खुशखबर, मुंबई महापालिकेने दिली महत्त्वाची माहिती appeared first on थोडक्यात घडामोडी.

मुंबई : मुंबई महापालिकेचे सहआयुक्त रमेश पवार पाणी समजून चुकून सॅनिटायझर प्यायले. मुंबई महापालिकेचे बजेट मांडले जात असतानाच ही घटना घडली आहे. त्यांची प्रकृती ठीक असून वेळीच प्रकार लक्षात आला.

मुंबई महापालिकेत आज बजेट सादर होत आहे. यावेळी अतिरिक्त आयुक्त आशुतोष सलील हे बजेट सादर करण्यासाठी उपस्थित राहणार होते, पण त्यांची तब्येत बरी नसल्याने सहआयुक्त रमेश पवार हे सभागृहात उपस्थित राहिले. शिक्षण समिती अध्यक्ष संध्या दोशी सभागृहात आल्यानंतर मुंबई महापालिकेच्या शिक्षण विभागाचे 2021-22 चे वार्षिक अंदाजपत्रक शिक्षण समिती अध्यक्षांकडे सुपूर्त करण्यात आले. हे बजेट वाचण्यासाठी रमेश पवार आपल्या खुर्चीवर बसले. त्यांच्यासमोर एक सैनिटायझरची बॉटल आणि एक पाण्याची बॉटल होती. परंतु त्यांनी चुकून यातील सॅनिटायझरची बॉटल घेतली आणि ते सॅनिटायझर प्यायले. ही चूक तात्काळ त्यांच्या लक्षात आली. त्यानंतर त्यांना तातडीने पाणी देण्यात आलं.

The post मुंबई महापालिकेचे सहआयुक्त रमेश पवार पाणी समजून प्यायले सॅनिटायझर appeared first on थोडक्यात घडामोडी.