पुणे : धायरी (नऱ्हे) येथील पारी चौक परिसरात दररोज होणाऱ्या भीषण वाहतूक कोंडीने नागरिकांचे जनजीवन विस्कळीत झाले असून, यावर तातडीने उपाययोजना करण्याची मागणी जोर धरू लागली आहे. या पार्श्वभूमीवर शिवसेना (उद्धव बाळासाहेब ठाकरे) पक्षाचे खडकवासला विधानसभा मतदारसंघाचे विभागप्रमुख महेश राजाराम पोकळे यांनी वाहतूक विभागाकडे अधिकृत निवेदन सादर केले आहे.

या निवेदनात त्यांनी स्पष्टपणे नमूद केले की, पारी चौकाजवळील MNGL कंपनीचा CNG पंप हे वाहतूक कोंडीचे मुख्य केंद्र बनले आहे. अरुंद रस्ता आणि पंपावर CNG भरण्यासाठी रांगेत लागणारी वाहने रस्त्यावर उभी राहत असल्याने, परिसरातील वाहतुकीवर मोठा ताण निर्माण होतो आहे. परिणामी, शालेय वाहने, ऑफिसकर्मी, व्यापारी व सर्वसामान्य नागरिकांना प्रचंड अडचणींना सामोरे जावे लागत आहे. या गोंधळामुळे अपघाताची शक्यता सुद्धा वाढली आहे.

महेश पोकळे यांनी याबाबत पुढाकार घेऊन वाहतूक विभागाला खालील उपाययोजनांची विनंती केली आहे:

• पंपाजवळील वाहतूक प्रवाहाची तपासणी आणि व्यवस्थापनासाठी स्वतंत्र यंत्रणा नेमणे
• वाहने रस्त्यावर उभी राहू नयेत यासाठी कठोर नियमावली आणि अंमलबजावणी
• पर्यायी मार्ग अथवा वाहनांच्या पार्किंगसाठी जागेची उपलब्धता शोधणे
• स्थानिक नागरिक व वाहतूक विभाग यांच्यात समन्वय बैठक आयोजित करणे

विशेष म्हणजे, या निवेदनासोबत नागरिकांच्या सह्यांचे समर्थनपत्र देखील जोडण्यात आले असून, यावर सिंहगड रोड वाहतूक विभागाचे ठाणे अंमलदार यांनी अधिकृत स्वाक्षरी करत निवेदन स्वीकारले आहे.

धायरी पारी कंपनी चौक येथील ट्राफिक प्रश्नाच्या संदर्भात सिंहगड रोड ट्राफिक विभागाचे पोलीस निरीक्षक श्री बर्डे साहेब यांना निवेदन देण्यात आले #प्रभाग_क्रमांक_33 #आमचे_लक्ष_असते #सदैव_तत्पर_सेवेसाठी #आपला_महेश #dhayari @PuneCityTraffic @PMCPune @sagarg14 @Vinodhanchate https://t.co/sjYMPiGXOq pic.twitter.com/Vwk9tjYMdY

— Mahesh Rajaram Pokale (@pokalemahesh) May 28, 2025

स्थानिक जनतेचा या मागणीला मोठा पाठिंबा असून, आता प्रशासनाने याकडे गांभीर्याने लक्ष देत ठोस पावले उचलावीत, अशी अपेक्षा आहे. येत्या काही दिवसांत वाहतूक सुधारण्यासाठी प्रशासन यादृष्टीने काय निर्णय घेते, याकडे संपूर्ण परिसराचे लक्ष लागले आहे.

The post पुणे : नऱ्हे येथील पारी चौकातील वाहतूक कोंडीच्या वाढत्या समस्येचा शिवसेना (उद्धव बाळासाहेब ठाकरे) पक्षाकडून पाठपुरावा, उपाययोजनांची अपेक्षा… appeared first on थोडक्यात घडामोडी.

पुणे : पुण्यातील कसबा मतदारसंघातून निवडून येत जायंट किलर ठरलेले, काँग्रेसचे पुणे लोकसभा मतदारसंघाचे उमेदवार रविंद्र धंगेकर यांनी काँग्रेस पक्षाचा राजीनामा दिला आहे. आज पुण्यात पत्रकार परिषदेत आपला निर्णय जाहीर करताना धंगेकर यांनी शिवसेनेत (शिंदे गट) सामील होण्याचे संकेत देत ते उपमुख्यमंत्री एकनाथ शिंदे यांची भेट घेणार असल्याचे म्हणाले.

पत्रकारांशी बोलताना धंगेकर यांनी स्पष्ट केले की त्यांचा राजीनामा काँग्रेसबद्दलच्या वैयक्तिक असंतोषामुळे नाही तर सत्तेबाहेर काम करण्याच्या आव्हानांमुळे आहे. त्यांनी सांगितले कि, “माझी नाराजी काँग्रेस पक्षावर नाही. काँग्रेस सोडल्याचे मला दुःख आहे. परंतु, सत्तेत असल्याशिवाय काम होत नाही ही कार्यकर्त्यांची आणि मतदारांची भावना होती. त्यामुळे हा निर्णय घेतला आहे. काँग्रेसने मला भरभरून दिले. पक्ष सोडणे हा एक कठीण निर्णय होता, परंतु मी माझ्या कार्यकर्त्यांशी आणि मतदारांशी चर्चा करून तो घेतला. माझी कोणावरही नाराजी नाही असे सांगतानाच ते हेदेखील म्हणाले की, सत्ता अनेक वर्ष पाहिली पण सत्तेचा लाभ मिळाला नाही.”

धंगेकर म्हणाले की, आज संध्याकाळी उपमुख्यमंत्री आणि शिवसेना शिंदे गटाचे प्रमुख एकनाथ शिंदे यांच्याशी बैठक होणार असून त्यानंतर अपेक्षित निर्णय घेतला जाणार आहे. एकनाथ शिंदे आणि उदय सामंत यांनी त्यांच्याशी अनेक वेळा संपर्क साधला आणि त्यांना त्यांच्या गटात सामील होण्याचे आवाहन केले, असेही त्यांनी सांगितले. शिंदे माझ्याबद्दल आधीही बोलले होते आणि उदय सामंत यांनी मला फोनही केला होता. त्यांनी मला त्यांच्यासोबत काम करण्यास सांगितले. मी त्यांच्याकडे कोणतेही पद मागितले नाही. मी महानगर पालिका निवडणूक लढवणार नाही असेही त्यांनी स्पष्ट केले.

धंगेकर यांचे काँग्रेसमधून बाहेर पडणे महाराष्ट्रातील काँग्रेस पक्षासाठी आणखी एक धक्का मानला जात आहे. शिवसेनेशी (शिंदे गट) जुळवून घेण्याचा त्यांचा निर्णय आगामी महानगरपालिका निवडणुकीपूर्वी महाविकास आघाडी पक्षावर आणखी परिणाम करू शकतो.

रविंद्र धंगेकर यांची राजकीय कारकीर्द
रविंद्र धंगेकर यांची राजकीय कारकीर्द शिवसेनेतून सुरु झाली, ते १९९७ – २००६ या काळात शिवसेनेत होते. २००६ ते २०१७ या ११ वर्षाच्या काळात ते मनसे मध्ये होते. २०१७ ला ते पुणे महानगरपालिकेच्या निवडणुकीमध्ये नगरसेवक म्हणून निवडून आले. त्यांना या निवडणुकीत काँग्रेसने मदत केली होती. त्यानंतर त्यांनी काँग्रेसमध्ये प्रवेश केला. २०२३ मध्ये कसबा या भाजपच्या बालेकिल्ल्यात पोटनिवडणुकीत विजय मिळवला. २०२४ ला काँग्रेस पक्षाने त्यांना पुणे लोकसभा मतदारसंघांची उमेदवारी दिली होती मात्र त्यांचा मंत्री मुरलीधर मोहोळ यांनी पराभव केला होता.

The post रविंद्र धंगेकर यांचा काँग्रेस पक्षाचा राजीनामा, आज घेणार उपमुख्यमंत्री एकनाथ शिंदे यांची भेट appeared first on थोडक्यात घडामोडी.

मुंबई : राष्ट्रीय स्वयंसेवक संघाचे (आरएसएस) नेते भैय्याजी जोशी यांनी मुंबईच्या विविध भाषिक संस्कृतीसंबंधी एक विधान केले आहे. त्यांच्या या विधानामुळे शिवसेना आणि राष्ट्रवादी काँग्रेससारख्या प्रमुख राजकीय पक्षांमध्ये संताप व्यक्त करण्यात आले आहे. मुंबईमध्ये मराठी भाषेची महत्त्वपूर्ण ओळख आहे, आणि या विधानामुळे स्थानिक राजकारणात चांगलीच खळबळ माजली आहे.

भैय्या जोशी यांनी मुंबईतील भाषिक विविधता आणि शहराच्या सांस्कृतिक वैशिष्ट्यांबद्दल बोलताना म्हटले, “मुंबईला कोणतीही एक भाषा नाही. मुंबईच्या प्रत्येक भागाची स्वतःची एक भाषा आहे. इथे अनेक भाषा बोलल्या जातात, आणि प्रत्येक भागाची एक वेगळी ओळख आहे. उदाहरणार्थ, घाटकोपर परिसरात मुख्यतः गुजराती भाषेचा वापर होतो.” ते पुढे म्हणाले, “माझ्या मते, जर कोणाला मुंबईत राहायचं असेल किंवा इथे येण्याची इच्छा असेल, तर त्यांना मराठी शिकण्याची गरज नाही. इथे गुजराती भाषाही चालेल.”

सुरेश भैय्या जी जोशी यांच्या या विधानामुळे शिवसेना आणि राष्ट्रवादी काँग्रेसमधून तीव्र प्रतिक्रिया उमटल्या आहेत. शिवसेनेचे प्रवक्ते आणि मुंबईतील नेत्यांनी या विधानावर नाराजी व्यक्त केली आहे, तर राष्ट्रवादी काँग्रेसच्या नेत्यांनी देखील या वक्तव्याच्या पार्श्वभूमीवर टीका केली आहे.

शिवसेनेचा आरोप :
शिवसेनेच्या प्रवक्त्यांनी या विधानावर टिप्पणी करत म्हटले की, “मुंबई ही मराठी माणसाची आहे. इथे मराठी भाषेचा विशेष दर्जा आहे, आणि त्या भाषेच्या संस्कृतीसाठी कायम संघर्ष झाला आहे. आरएसएसने मुंबईतील भाषिक विविधतेकडे संपूर्णपणे दुर्लक्ष करत असे वक्तव्य केल्याने त्यांचे हे विधान खेदजनक आहे.”

राष्ट्रवादी काँग्रेसची प्रतिक्रिया:
राष्ट्रवादी काँग्रेसचे मुंबईचे नेते देखील या विधानामुळे संतापले असून त्यांनी सांगितले, “मुंबईतील लोकांना त्यांच्या मातृभाषेतून बोलण्याचा हक्क आहे. एक भाषा बोलल्यामुळे इतरांना वेगळं ठरवणं हे अत्यंत चुकीचं आहे. आरएसएस नेत्यांनी अशी मानसिकता ठेवणे अत्यंत धक्कादायक आहे.”

भैय्या जी जोशी यांचे स्पष्टीकरण:
या विधानावर भैय्या जी जोशी यांनी स्पष्टीकरण दिले आहे की, “माझ्या वक्तव्याचा हेतू मराठी भाषेला कमी लेखणे किंवा अपमान करणे हा नव्हता. मुंबईतील अनेक भाषिक समुदायांनी एकत्र येऊन या शहराला समृद्ध केले आहे. मुंबईतील विविधतेचे स्वागत करणे आवश्यक आहे, पण याचा अर्थ असा नाही की एक भाषा दुसऱ्या भाषेला कमी लेखावी.”

The post भैय्याजी जोशींच्या ‘मुंबईत मराठी नाही, गुजरातीही चालेल’ वक्तव्यावर शिवसेना आणि राष्ट्रवादीकडून संतप्त प्रतिक्रिया, जोशी यांचे स्पष्टीकरण… appeared first on थोडक्यात घडामोडी.

मुंबई, २ मार्च २०२५: मुंबईच्या चेंबूरमधून एक धक्कादायक घटना समोर आली आहे, जिथे शिवसेना शिंदे गटाच्या कार्यालयात कार्यकर्त्यांनी दारू पार्टी आयोजित केली होती. या घटनेचा व्हिडिओ सोशल मीडियावर तुफान व्हायरल झाला असून, त्यावर राजकीय वर्तुळातून मोठ्या प्रमाणावर टीका केली जात आहे.

व्हिडिओमध्ये आमदार मंगेश कुडाळकर यांचे कार्यकर्ते दारू पिताना दिसत आहेत. व्हिडिओमध्ये कार्यालयातील दोन टेबलांवर दारूच्या बाटल्या आणि भरलेले ग्लास दिसत आहेत. या व्हिडिओमध्ये छत्रपती शिवाजी महाराज, बाळासाहेब ठाकरे, उपमुख्यमंत्री एकनाथ शिंदे आणि आमदार मंगेश कुडाळकर यांचे पोस्टर दिसत आहेत.

हा व्हिडिओ सोशल मीडियावर तुफान व्हायरल झाला असून, विरोधकांनी शिंदे गटावर टीकेची झोड उठवली आहे. या घटनेवर राजकीय वर्तुळातून प्रतिक्रियांची लाट आलेली आहे. विरोधकांनी शिंदे गटावर आक्षेप घेतला आहे की, अशा प्रकारे कार्यकर्त्यांची पार्टी ठेवणे शिवसेनेच्या आदर्शांशी सुसंगत नाही.

शिवसेना शिंदे गटाच्या कार्यालयात कार्यकर्त्यांच्या दारू पार्टीमध्ये शाखाप्रमुख दीपक चव्हाण, उपविभागप्रमुख संजय कदम आणि इतर पदाधिकारी सहभागी असल्याचं या व्हिडिओमध्ये दिसत आहे. या व्हिडिओनंतर शिंदे गटावर राजकीय दबाव वाढला आहे आणि या प्रकरणावर स्पष्टीकरण देण्याची मागणी विरोधकांकडून केली जात आहे.

The post मुंबईत शिवसेना शिंदे गटाच्या कार्यालयात दारू पार्टी रंगली, व्हिडिओ व्हायरल appeared first on थोडक्यात घडामोडी.

मुंबई : शिवसेना नेत्या नीलम गोऱ्हे यांनी दिल्लीतील साहित्य संमेलनात उद्धव ठाकरे यांच्या शिवसेनेविषयी वादग्रस्त विधान केले. गोऱ्हे यांनी म्हटले की, ठाकरे यांच्या शिवसेनेत पद मिळवण्यासाठी दोन मर्सिडीज गाड्या द्याव्या लागतात. त्यांच्या या विधानामुळे राज्यातील राजकारणात मोठा गदारोळ उडाला आहे.

यावर शिवसेना ठाकरे गटाच्या उपनेत्या किशोरी पेडणेकर यांनी गोऱ्हे यांच्यावर तीव्र प्रतिक्रिया दिली. पेडणेकर म्हणाल्या, “नीलम गोऱ्हे या आरपीआय आठवले गटाच्या होत्या आणि नंतर शिवसेनेत आल्या. त्यांनी पदासाठी दोन मर्सिडीझ द्याव्या लागतात, असे आरोप केले आहेत. हे आरोप त्यांनी पुराव्यानिशी सिद्ध करून दाखवावे. अन्यथा, आम्ही ठाकरेंच्या महिला संघटनेच्या वतीने त्यांना सोडणार नाही आणि कोर्टात जाऊ,” असे त्यांनी स्पष्ट केले.

पेडणेकर यांनी नीलम गोऱ्हे यांना प्रश्न केला, “उद्धव ठाकरे यांनी तुम्हाला ४ वेळा विधानपरिषदेचे पद दिले, त्यानंतर तुम्हाला काय कमी पडले? तुम्ही तिथे गेला आहात, तर त्या ठिकाणी सुखात राहा.”

नीलम गोऱ्हे यांचे कडवट शब्द
नीलम गोऱ्हे यांनी आपल्या वादग्रस्त विधानावर प्रतिक्रियेदाखल, पेडणेकर यांना “चुगलीखोर” आणि “उधळलेली” अशी उपमा दिली. त्यांनी त्यांच्या वक्तव्याद्वारे पेडणेकरवर टीका केली, आणि त्यांना आरोप केला की, त्या उद्धव ठाकरे यांची चुगली करत होत्या आणि पक्षात काड्या घालण्याचे काम करत होत्या. गोऱ्हे यांनी याबाबत आशा मामेडी यांना जाऊन विचारण्याचा सल्ला दिला.

माणिकराव कोकाटे यांच्यावर टीका
माणिकराव कोकाटे यांना शिक्षा झाल्यानंतर राजीनामा न देण्यावर बोलताना किशोरी पेडणेकर यांनी म्हटले, “आता नैतिकतेचे काही उरलेले नाही. मविआ सरकारच्या काळात आम्ही संजय राठोड यांचा राजीनामा घेतला होता. गीता आणि संविधानावर हात ठेवून शपथ घेतो, त्याचे काही महत्व उरणार नाही. अजित पवार यांनी नैतिकतेच्या मुद्द्यावरून राजीनामा दिला होता, तर आता त्यांच्या पक्षाचे धनंजय मुंडे यांचा राजीनामा का घेतला जात नाही?” असा सवाल पेडणेकर यांनी उपस्थित केला.

The post नीलम गोऱ्हे यांच्या वादग्रस्त विधानावर उद्धव ठाकरे गटाचे तीव्र प्रत्युत्तर; ठाकरे गटाने कोर्टात जाण्याची तयारी दर्शवली appeared first on थोडक्यात घडामोडी.

शिवसेना (ठाकरे) पक्षाचे प्रवक्ते संजय राऊत यांनी २१ फेब्रुवारी रोजी दिल्लीतील विज्ञान भवनात आयोजित ९८ व्या अखिल भारतीय मराठी साहित्य संमेलनाच्या उद्घाटनाच्या वेळी पंतप्रधान नरेंद्र मोदी आणि शरद पवार यांच्यात घडलेल्या घटनेवर प्रतिक्रिया दिली आहे. पंतप्रधान मोदी आणि शरद पवार यांना एकमेकांच्या शेजारी बसलेले पाहून संजय राऊत यांनी तीव्र शब्दात टीका केली.

राऊत यांनी पंतप्रधान मोदी आणि शरद पवार यांच्या वर्तमनाच्या घटनेवर प्रश्नचिन्ह उपस्थित केले. “शरद पवार हे पंतप्रधान मोदीपेक्षा वरिष्ठ आहेत. साहित्य संमेलनाचे स्वागताध्यक्ष म्हणून शरद पवार होते. त्यामुळे पंतप्रधान मोदी पवारांच्या बाजूला बसणार नाहीत, अशी माझी अपेक्षा होती. भटकती आत्म्या म्हणजे काय? पंतप्रधान मोदी कसे त्याच्याशी बसले?” असा सवाल राऊत यांनी उपस्थित केला.

त्यांनी पुढे म्हटले, “पंतप्रधान मोदी यांनी शरद पवारांना खुर्ची मागे घेत बसवले आणि त्यांना पाणी दिलं, हे काय? हे सर्व एक व्यापार आणि ढोंग होते. मोदींना बाळासाहेब ठाकरे यांच्याविषयी आदर असल्याचे ते नेहमीच सांगतात, पण बाळासाहेब ठाकरेंनी स्थापन केलेली शिवसेना त्यांनी फोडली आहे. शरद पवार यांच्या कष्टाने उभा केलेला पक्ष मोदींनी फोडला. मग हा आदर कसा?” अशी टीका राऊत यांनी केली.

राऊत यांनी तितक्यावरच थांबले नाहीत. त्यांनी पंतप्रधान मोदी आणि त्यांच्या ‘उजव्या हात’ केंद्रीय गृहमंत्री अमित शाह यांच्या वक्तव्यांचीही निंदा केली. “अमित शाह यांनी महाराष्ट्रात येऊन शरद पवार यांचे योगदान कमी केले. मोदींनीच काकांसाठी खुर्ची ओढली, त्यांना पाणी दिलं, पण त्याच काकांवर त्या मोदींचा पक्ष तासन् तास टीका करतो. हे सगळं ढोंग आहे,” अशी त्यांची प्रतिक्रिया होती.

संजय राऊत यांनी या संमेलनाच्या मंचावर जे घडले, त्याला ‘व्यापार’ आणि ‘ढोंग’ म्हणून वर्णन केले. “मराठीत एक म्हण आहे, ‘देखल्या देवा दंडवत’. या घटनेला त्या म्हणीप्रमाणेच मानलं पाहिजे,” असंही राऊत म्हणाले.

तुम्ही जर पंतप्रधान मोदींच्या शिष्टाचाराचे कौतुक करत असाल, तर हे लक्षात ठेवा की जे लोक तुमच्या प्रतिमा, आदर आणि सन्मानाबद्दल बोलत आहेत, त्यांच्याविरोधातच त्यांची राजकारणी चाल चालली आहे.

The post संजय राऊत यांचा पंतप्रधान मोदींवर आरोप: ‘भटकती आत्म्या’च्या शेजारी बसले, काय अर्थ? appeared first on थोडक्यात घडामोडी.

सोलापूर : विधानसभा निवडणुकीत महायुतीला मोठा विजय मिळाल्यानंतर विरोधकांना मोठा धक्का बसला होता. मात्र, आता सत्ताधारी पक्षांतील अंतर्गत वाद समोर येत आहेत. मुख्यमंत्री देवेंद्र फडणवीस यांनी आयोजित केलेल्या बैठकींमध्ये उपमुख्यमंत्री बहुतेक वेळा गैरहजर राहत असल्याचं दिसत आहे. तर दुसरीकडे एकनाथ शिंदेंनी मुख्यमंत्री असताना घेतलेले अनेक निर्णय बदलले जात आहेत. शिंदे यांनी मुख्यमंत्री असताना काढलेल्या काही महत्त्वाच्या निविदा रद्द झालेल्या आहेत.

एकनाथ शिंदेंनी मुख्यमंत्री असताना काढलेल्या १४०० कोटी रुपयांच्या निविदेला रद्द करण्याचा निर्णय मुंबई महापालिकेने घेतला. ही निविदा ४ वर्षांसाठी काढण्यात आलेली होती. झोपडपट्टीतील सफाई, मलनिस्सारण, शौचालय देखभाल आणि दारोदारी जाऊन घनकचरा गोळा करण्याच्या कामासाठी निविदा काढण्यात आली होती. गेल्या फेब्रुवारीत निविदा काढण्यात आली होती. या निविदेला अनेकदा मुदतवाढ दिली गेली. पण कायदेशीर त्रुटींमुळे ही योजना अडचणीत आली. त्यानंतर आता शिंदेंनी मुख्यमंत्री असताना काढलेली आणखी एक निविदा रद्द करण्यात आलेली आहे. पंढरपूरमधील दर्शन मंडप आणि स्काय वॉकच्या बांधकामासाठी काढलेली १२९ कोटी रुपयांची निविदाही रद्द करण्यात आली आहे.

गेल्या आषाढी यात्रेवेळी शिंदे यांनी पंढरपुरातील दर्शन मंडप आणि स्काय वॉकच्या कामाला मंजुरी दिली होती. त्यासाठी १२९ कोटी रुपयांची निविदा काढण्यात आली होती. विठुरायाच्या भक्तांना सुलभ आणि सुरक्षित दर्शन व्हावं यासाठी दर्शन मंडप उभारण्यात येणार होता. या कामाचा समावेश फडणवीस सरकारच्या पहिल्या १०० दिवसांच्या कामांमध्ये होता. पण आता अचानक निविदा रद्द करण्यात आल्यानं उलटसुलट चर्चांना उधाण आलं आहे. बांधकाम खात्याकडून हा निर्णय घेण्यात आला आहे.  वरिष्ठ पातळीवरुन आलेल्या आदेशांमुळे आणि तांत्रिक कारणामुळे निर्णय घेण्यात आल्याची माहिती सार्वजनिक बांधकाम विभागाकडून देण्यात आली आहे. त्यामुळे सध्या दर्शन रांग आणि स्काय वॉकच्या कामाची प्रक्रिया थांबवण्यात आली आहे. शिंदे यांच्यासाठी हा धक्का मानला जात आहे.

सत्तास्थापना, खातेवाटप, आणि पालकमंत्रिपदावरून भाजप आणि शिवसेनेमधील तणाव अधिक वाढला आहे. तसेच, आमदारांची सुरक्षा कमी करण्यावरून देखील भाजप-शिवसेना संबंध ताणले गेले आहेत. सध्या शिंदे सरकारने घेतलेल्या निर्णयांवर आता तांत्रिक कारणांनी आणि वरिष्ठ पातळीवरून आलेल्या आदेशांमुळे पुनर्विचार केला जात आहे.

The post एकनाथ शिंदेंना आणखी एक धक्का, ‘ती’ १२९ कोटी रुपयांची निविदाही रद्द, चर्चांना उधाण appeared first on थोडक्यात घडामोडी.

मुंबई: एकनाथ शिंदे यांचा कोणताही बालेकिल्ला नाही, त्यांनी पैशांच्या जोरावर काही बालेकिल्ले उभे केले आहेत. शिंदे यांनी ५० वर्षांत कोणतं महान कार्य केले आहे की बालेकिल्ले उभारले? ते काय लोकमान्य टिळक आहेत? त्यांची विचारधारा काय आहे? ते काय वल्लभभाई पटेल आहेत? दीनदयाळ उपाध्याय आहेत? अटलबिहारी वाजपेयी आहेत? ज्या दिवशी अमित शाह राहणार नाहीत, त्यादिवशी यांची टेकडीसुद्धा राहणार नाही, असं संजय राऊत यांनी म्हटलं आहे.

शरद पवारांसोबत कसला रूसवा-फुगवा, एका विशिष्ट मुद्द्याबद्दल आम्ही शिवसेनेच्या भावना व्यक्त केल्या. ज्या महादजी शिंदे यांच्या नावाने पुरस्कार दिला जातो, त्यांनी कोणतं महान कार्य केलं? इतका शूर योद्धा महादजी शिंदे यांच्या नावाने पुरस्कार मिळावा? महाराष्ट्र सदनमध्ये अखिल भारतीय मराठी साहित्य संमेलनाच्या बॅनरखाली हा कार्यक्रम घेतला गेला. लोकांचा गैरसमज झाला की अखिल भारतीय मराठी साहित्य संमेलनाने हा पुरस्कार दिला, पण तो साहित्य संमेलनाचा कार्यक्रम नव्हता, तो एक खासगी कार्यक्रम होता. शरद पवारांची फसवणूक झाली, हा कार्यक्रम साहित्य संमेलनाचा नव्हता, त्यामुळे आमचं आक्षेप त्यावर आहे, असं संजय राऊत यांनी स्पष्ट केलं.

ही लोकशाही आहे, दोन स्वतंत्र विचारधारांमध्ये मतभेद आहेत. आमचं एखाद्या व्यक्तीविषयीचं मत हे टोकाचं आहे. शरद पवारांचा पक्ष फोडण्याच्या मुद्द्यावरही आमचं मत तेच आहे. शिवसेना आणि शरद पवारांचा पक्ष अमित शाह आणि नरेंद्र मोदी यांनी फोडला, ते त्यांना हाताशी धरून हे करीत आहेत. आमच्या भावना टोकाच्या आहेत, भांडण असण्याचा प्रश्न नाही, आम्ही फक्त आमचं मत मांडलं, असं राऊतांनी सांगितलं.

दरम्यान, आज दिल्लीमध्ये संध्याकाळी संजय राऊत आणि शरद पवार हे एकाच मंचावर असणार आहेत. एक पुस्तक प्रकाशन कार्यक्रमात दोघं उपस्थित राहणार आहेत. एकनाथ शिंदे यांना पवारांच्या हस्ते पुरस्कार मिळाल्यानंतर राऊत यांनी पवारांवर निशाणा साधला आहे.

The post संजय राऊतांचा एकनाथ शिंदे आणि शरद पवारांवर तिव्र हल्ला; पैशांच्या जोरावर उभे केलेले बालेकिल्ले आणि अमित शाहांच्या मदतीने पक्ष फोडले असा गंभीर आरोप! appeared first on थोडक्यात घडामोडी.

मुंबई: महाराष्ट्रातील सत्तासंघर्ष आणि शिवसेनेतील फूट, यावर नवीन वाद उभा राहिला आहे. मुख्यमंत्री एकनाथ शिंदे यांनी नुकतंच एक वक्तव्य केलं, ज्यात त्यांनी स्पष्ट केलं की, “जर उद्धव ठाकरे मुख्यमंत्री झाले नसते, तर शिवसेना फुटली नसती. आम्ही काँग्रेसच्या दावणीला बांधलेला धनुष्यबाण वाचवण्यासाठी उठाव केला.” त्यांच्या या आरोपावर प्रतिक्रिया देताना, शिवसेनेचे नेते संजय राऊत यांनी एक खळबळजनक दावा केला आहे. राऊत यांनी म्हटलं की, उद्धव ठाकरे शिंदे यांना मुख्यमंत्रिपद देणार होते, परंतु त्यावेळी शरद पवार यांनी त्यांना ते करण्यापासून रोखलं. पवारांच्या भूमिकेमुळे एकनाथ शिंदे मुख्यमंत्री होण्यापासून वंचित राहिले, असं राऊत म्हणाले.

राऊत यांनी खुलासा करताना सांगितले की, भाजपने ५०-५० टक्के वचन दिलं होतं, परंतु त्यांनी ते पाळलं नाही. शरद पवार यांनी एकनाथ शिंदे यांना ‘ज्युनिअर’ म्हणून नाकारलं आणि त्यांच्या हाताखाली आम्ही काम करणार नाही, असं सांगितलं, यामुळे शिंदे यांचा मुख्यमंत्री होण्याचा मार्ग बंद झाला होता, असा राऊतांचा दावा आहे.

संजय राऊत पुढे म्हणाले की, एकनाथ शिंदेंना आत्मचिंतनाची आवश्यकता आहे. त्यांना विचार करण्याची गरज आहे की, ते जे करतात, त्यात किती सत्य आहे. शिंदे यांना मुख्यमंत्री व्हायचं होतं, परंतु मविआमधील अनेक नेत्यांनी त्यांना ‘ज्युनिअर’ म्हणून नाकारलं. यामुळे त्यांना मुख्यमंत्री होण्याची संधी मिळाली नाही. त्यांनी कधीही विरोध केला नाही, त्यांच्या निर्णयांची अंमलबजावणी केल्यावरच त्यांचा विचार केला गेला. पवारांनी शिंदे यांना ज्युनिअर म्हणून नाकारलं आणि ते मुख्यमंत्रिपदाच्या लढाईत उभे राहू शकले नाहीत. राऊत यांनी हेदेखील स्पष्ट केलं की, जर भाजपने दिलेल्या ५०-५० टक्के वचनाचा आदर केला असता, तर शिंदे निश्चितपणे मुख्यमंत्री झाले असते.

The post उद्धव ठाकरे शिंदेंना मुख्यमंत्री करणार होते, पण शरद पवारांनी अडथळा घातला; संजय राऊतांचा धक्कादायक खुलासा appeared first on थोडक्यात घडामोडी.

राज्यात गेल्या तीन-चार दिवसांपासून मंत्री धनंजय मुंडे आणि भाजप आमदार सुरेश धस यांच्या भेटीवर चर्चा रंगली आहे. संतोष देशमुख हत्या प्रकरणात आवाज उठवणारे आमदार सुरेश धस हे मंत्री धनंजय मुंडे यांच्या भेटीमुळे विरोधकांच्या लक्ष्यावर आले आहेत. या प्रकरणावर मुख्यमंत्री देवेंद्र फडणवीस यांनी जळगावातून प्रतिक्रिया देत विरोधकांना टोला लगावला.

मुख्यमंत्र्यांनी स्पष्ट केले की, “संतोष देशमुख यांच्या मारेकऱ्यांना शिक्षा व्हावी, यासाठीच आमदार सुरेश धस काम करत आहेत. या प्रकरणात ते पुढाकार घेत आहेत आणि यामुळे काही लोकांच्या पोटात दुखत आहे,” असे मुख्यमंत्र्यांनी विरोधकांना टोला लगावला.

राजकारणावर मुख्यमंत्री फडणवीस यांचे भाष्य
मुख्यमंत्री देवेंद्र फडणवीस म्हणाले, कोण कुणाला भेटले यावर राजकारण होत असेल, तर ते लोकशाहीत योग्य नाही. लोकशाहीत संवाद कायम राहावा लागतो. सुरेश धस यांनी या प्रकरणात गंभीर भूमिका घेतली आहे. त्याच्याद्वारे संवाद तोडण्याचा प्रयत्न करणे योग्य नाही. धनंजय मुंडे हे राज्याचे मंत्री आहेत, त्यामुळे एक आमदार आणि एक मंत्री यांची भेट होणे सामान्य आहे.

खासदार संजय राऊत यांच्यावर फडणवीस यांची टीका
खासदार संजय राऊत यांच्याबद्दल विचारलेल्या प्रश्नावर फडणवीस यांनी एक वाक्यात उत्तर दिले. ते म्हणाले, मुर्खांना मी उत्तर देत नाही. हे माहीत असूनही तुम्ही हा प्रश्न विचारत आहात?

अमृता फडणवीस यांचे गाणे आणि समाजातील प्रतिसाद
अमृता फडणवीस यांच्या गाण्याबद्दल बोलताना, फडणवीस म्हणाले, संत सेवालाल महाराज यांच्या जयंतीच्या पार्श्वभूमीवर हे गाणे रिलीज झाले आहे. हे गाणे फक्त बंजारांच नाही, तर सर्व समाजाला आवडले आहे. हे गाणे आपल्या गुरूंच्या प्रती, संतांच्या प्रती एक आराधना आहे.

शाळांमध्ये मराठी शिकवण्याबाबत फडणवीस यांचे मत
मुंबईत मराठी शाळांची टक्केवारी घसरल्याबद्दल देवेंद्र फडणवीस यांनी भूमिका मांडली. ते म्हणाले, कुठल्याही मराठी शाळा बंद होणार नाहीत, हे आम्ही स्पष्टपणे सांगितले आहे. शाळा इंग्रजी असो किंवा हिंदी, त्यांना मराठी शिकवावे लागेल. आम्ही त्याची सक्ती केली आहे आणि त्याचे पालन होईल, याकडे आमचे लक्ष आहे.

नाशिक आणि रायगड पालकमंत्री वादावर फडणवीस यांचे म्हणणे
नाशिक आणि रायगड पालकमंत्र्यांमधील वाद लवकरच मिटतील, असे फडणवीस यांनी म्हटले.

जळगाव येथील पोलीस कर्मचाऱ्याच्या अपहरण आणि हल्ल्याबाबत फडणवीस यांची प्रतिक्रिया
जळगाव येथील चोपडा येथील पोलीस कर्मचाऱ्याच्या अपहरण आणि हल्ल्याच्या घटनेवर फडणवीस म्हणाले, मध्यप्रदेश पोलिसांना आम्ही सांगितले आहे की, त्यांच्या राज्यात होणाऱ्या बेकायदेशीर कारवायांना रोखण्यासाठी पावले उचलावीत. दोन्ही राज्यांमधील पोलीस दलात समन्वय साधण्याचे प्रयत्न सुरू आहेत.

The post धनंजय मुंडे-धस भेटीबाबत मुख्यमंत्री देवेंद्र फडणवीस यांनी आमदार सुरेश धस यांच्या पाठिशी ठाम समर्थन, संजय राऊत यांच्यावर टीका: मुर्खांना मी उत्तर देत नाही appeared first on थोडक्यात घडामोडी.