मुंबई : गणेशोत्सव हा महाराष्ट्राचा मानबिंदू. या उत्सवासाठी कोकणात तसेच राज्यभरात इतरत्र जाण्यासाठी गणेशभक्तांना प्रवास करावा लागतो. या प्रवासासाठी रेल्वेचा आधार महत्वाचा ठरतो. यासाठी यंदा भारतीय रेल्वेने दरवर्षी पेक्षा यंदा ३६७ जादा फेऱ्यांसाठी रेल्वेगाड्या सोडण्याची नियोजन केल्याची माहिती रेल्वे मंत्री अश्विनी वैष्णव यांनी दिली आहे.

मुख्यमंत्री देवेंद्र फडणवीस यांनी ही माहिती देतानाच, राज्यातील तमाम गणेशभक्तांच्यावतीने पंतप्रधान नरेंद्र मोदी, रेल्वे मंत्री अश्विनी वैष्णव यांचे आभार मानले आहे.

आगामी गणेशोत्सवाच्या नियोजनाच्या अनुषंगाने महाऱाष्ट्र शासनाने रेल्वे मंत्री आणि भारतीय रेल्वेला गणेशभक्तांच्या सुविधेसाठी जादा गाड्या सोडण्याची मागणी केली होती. या मागणीला प्रतिसाद म्हणून केंद्रीय रेल्वे मंत्री कोकणात तसेच अन्यत्र जाणाऱ्या गणेशभक्तांच्या सोयीसाठी दरवर्षी पेक्षा जादाच्या ३६७ फेऱ्यांचे नियोजन केले जाईल, असे पत्रोत्तर दिले आहे, असे, मुख्यमंत्री फडणवीस यांनी सांगितले.

मुंबईत राहणारे कोकणवासी गणेशभक्त गणेशोत्सवासाठी मोठ्या संख्येने मुळगावी कोकणात जातात. तसेच राज्याच्या अन्यभागातील नागरिक देखील या सणासाठी प्रवास करतात. या सगळ्यांची या जादाच्या फेऱ्यांमुळे सोय होणार आहे. राज्यातील गणेशभक्तांसाठी हा मोठा दिलासा आहे. त्यामुळे पंतप्रधान नरेंद्र मोदी आणि केंद्रीय मंत्री अश्विनी वैष्णव यांचे आभार मानत असल्याचेही मुख्यमंत्री फडणवीस यांनी माध्यमांशी संवाद साधताना सांगितले.

The post गणेशभक्तांसाठी यंदा रेल्वेच्या ३६७ जादा फेऱ्या appeared first on थोडक्यात घडामोडी.

झारखंड : झारखंडमधील सरायकेला-खरसवान जिल्ह्यातील चांडिलजवळ शनिवारी पहाटे झालेल्या अपघातात एका मालगाडीचे तब्बल २० डबे रुळावरून घसरले. या घटनेमुळे आग्नेय रेल्वेच्या चांडिल-टाटानगर विभागातील रेल्वे वाहतूक पूर्णपणे ठप्प झाली आहे. सुदैवाने, या अपघातात कोणतीही जीवितहानी झालेली नाही, अशी माहिती अधिकाऱ्यांनी दिली.

वरिष्ठ विभागीय व्यावसायिक व्यवस्थापक (आद्रा विभाग) विकास कुमार यांनी सांगितले की अपघातानंतर चांडिलपासून अप आणि डाउन दोन्ही मार्गांवरील रेल्वे सेवा तातडीने बंद करण्यात आली. या अपघातात दोन मालगाड्यांचा समावेश असल्याचेही त्यांनी स्पष्ट केले.

घटनास्थळी रेल्वे कर्मचारी आणि यंत्रणा तैनात असून, रुळावरून घसरलेले डबे हटवणे व खराब झालेले ट्रॅक दुरुस्त करण्याचे काम युद्धपातळीवर सुरू आहे.

या व्यत्ययामुळे अनेक एक्सप्रेस आणि मेल गाड्या रद्द, वळवण्यात किंवा शॉर्ट टर्मिनेट करण्यात आल्या आहेत. रद्द सेवांमध्ये 20894 पटना–टाटानगर वंदे भारत एक्सप्रेस, 28181 टाटानगर–कटिहार एक्सप्रेस आणि 28182 कटिहार–टाटानगर एक्सप्रेसचा समावेश आहे.

रेल्वे प्रशासनाने प्रवाशांना अद्ययावत वेळापत्रक व मार्गाबाबत अधिकृत स्रोतांकडून माहिती घेण्याचे आवाहन केले आहे.

The post झारखंडमध्ये मालगाडीचे २० डबे रुळावरून घसरले; रेल्वे सेवांवर मोठा परिणाम appeared first on थोडक्यात घडामोडी.

मुंबई : अमृत भारत स्थानक योजनेतून मुंबई शहराचे वैभव आणि युनेस्को जागतिक वारसास्थळ असलेल्या छत्रपती शिवाजी महाराज टर्मिनस इमारतीचा पुनर्विकास करण्यात येणार असून यासाठी दोन हजार आठशे कोटी रुपयांचा निधी उपलब्ध होणार असल्याचे मुख्यमंत्री देवेंद्र फडणवीस यांनी सांगितले.

अमृत भारत रेल्वे स्टेशन योजनेतून पुनर्विकसित करण्यात आलेल्या देशातील १०३ रेल्वे स्थानकांचे प्रधानमंत्री नरेंद्र मोदी यांच्या हस्ते आज लोकार्पण झाले. बिकानेर येथे आयोजित या कार्यक्रमामध्ये राज्यपाल सी. पी. राधाकृष्णन आणि मुख्यमंत्री फडणवीस परळ रेल्वे स्थानक येथून दूरदृष्य प्रणालीद्वारे सहभागी झाले. यावेळी मुख्यमंत्री फडणवीस यांनी माध्यमांशी कार्यक्रमानंतर संवाद साधला.

मुख्यमंत्री देवेंद्र फडणवीस म्हणाले, वंदे भारत रेल्वे, नमो भारत रेल्वे, अमृत भारत रेल्वे अशा रेल्वेच्या माध्यमातून भारतीय रेल्वेचा कायापालट होत आहे. जर्मनीच्या रेल्वे जाळ्यापेक्षा जास्त लांबीचे रेल्वेचे जाळे प्रधानमंत्री मोदी यांच्या मार्गदर्शनात मागील ११ वर्षात उभारले आहे. विमानतळांच्या धर्तीवर सर्व रेल्वे स्थानकांचा विकास करण्यात येत आहे. विमानतळ परिसरात उपलब्ध असलेल्या अत्याधुनिक सोयी सुविधा या अमृत भारत रेल्वे स्टेशनच्या माध्यमातून आता सर्वसामान्य नागरिकांसाठीही उपलब्ध असणार आहेत. मुंबईतील परळ, चिंचपोकळी, माटुंगा आणि वडाळारोड या उपनगरीय स्थानकांसह राज्यातील १५ स्थानकांचा पुनर्विकास पूर्ण झाला असून त्याचे लोकार्पण करण्यात आले. जगातील आधुनिक रेल्वे प्रणालीमध्ये आता भारतीय रेल्वेचा समावेश होत असल्याचेही मुख्यमंत्री फडणवीस यांनी सांगितले.

The post देशातील १०३, मुंबईतील परळ, चिंचपोकळी, माटुंगा आणि वडाळारोडसह राज्यातील १५ रेल्वे स्थानकांचे प्रधानमंत्री नरेंद्र मोदी यांच्या हस्ते लोकार्पण appeared first on थोडक्यात घडामोडी.

Indian Railways Rules Changed : आपण ट्रेनमध्ये प्रवास करतो, तेव्हा अनेक गोष्टींची काळजी घ्यावी लागते. अन्यथा एक छोटीशी चूकही तुम्हाला मोठ्या संकटात टाकू शकते. भारतीय रेल्वेने प्रवाशांच्या सोयी लक्षात घेऊन नियमांमध्ये मोठा बदल केला आहे. रेल्वेने नुकताच केलेला बदल रात्री प्रवास करणाऱ्या प्रवाशांबाबत आहे. हे सर्वसाधारणपणे ट्रेनमध्ये प्रवास करणाऱ्या सर्व प्रवाशांना माहीत असायलाच हवे.

रेल्वेच्या नव्या नियमांनुसार आता तुमच्या सीट, कंपार्टमेंट किंवा कोचमधील कोणताही प्रवासी मोबाईलवर मोठ्या आवाजात बोलू शकणार नाही किंवा मोठ्या आवाजात गाणी ऐकू शकणार नाही. रेल्वेने नवीन मार्गदर्शक तत्त्वे जारी केली आहेत. जेणेकरून प्रवाशांच्या झोपेचा त्रास होणार नाही आणि त्यांना प्रवासादरम्यान शांत झोप घेता येईल.

अनेक प्रवासी अनेकदा तक्रार करतात की त्यांच्या कोचमध्ये एकत्र प्रवास करणारे लोक फोनवर मोठ्याने बोलतात किंवा रात्री उशिरापर्यंत गाणी ऐकतात. रेल्वे एस्कॉर्ट किंवा मेंटेनन्स कर्मचारीही मोठ्याने बोलतात, अशीही काही प्रवाशांची तक्रार होती. याशिवाय अनेक प्रवासी रात्री १० नंतरही दिवे लावतात, त्यामुळे त्यांची झोप उडते. या पार्श्वभूमीवर रेल्वेने नवा नियम केला आहे. अशा परिस्थितीत कोणत्याही प्रवाशाने नियमांचे पालन केले नाही, तर त्याच्यावर कारवाई केली जाईल.

जाणून घ्या काय आहेत नवीन नियम
ट्रेनमध्ये प्रवास करताना रात्री 10 वाजल्यानंतर जर तुम्ही मोबाईलवर मोठ्याने बोलत असाल तर कठोर कारवाई करण्यात येईल, असा निर्णय रेल्वे बोर्डाने घेतला आहे. नवीन नियमांनुसार, रात्रीच्या प्रवासात प्रवासी मोठ्याने बोलू शकत नाहीत आणि गाणी ऐकू शकत नाहीत. कोणत्याही प्रवाशाने तक्रार केल्यास त्याचे निराकरण करण्याची जबाबदारी रेल्वेतील उपस्थित कर्मचाऱ्यांची असेल.

The post रात्री ट्रेनमध्ये झोपण्याच्या नियमात बदल, भारतीय रेल्वेने जारी केल्या नवीन गाईडलाईन्स… appeared first on थोडक्यात घडामोडी.

नवी दिल्ली : भारतीय रेल्वे आज एक नवा इतिहास रचणार आहे. स्वदेशी बनावटीच्या ट्रेन कोलिजन प्रोटेक्शन सिस्टीम कवच (कवच) ची चाचणी आज म्हणजेच ४ मार्च रोजी सिकंदराबाद येथे होणार आहे. यामध्ये दोन गाड्या विरुद्ध दिशेने पूर्ण वेगाने एकमेकांकडे जातील. यापैकी एका ट्रेनमध्ये रेल्वे मंत्री अश्विनी वैष्णव स्वतः बसणार आहेत, तर दुसऱ्या ट्रेनमध्ये रेल्वे बोर्डाचे अध्यक्ष उपस्थित राहणार आहेत. मात्र ‘कवच’मुळे या दोन गाड्यांची टक्कर होणार नाही. रेल्वे अधिकाऱ्यांनी ही माहिती दिली.

अनेक वर्षांच्या संशोधनानंतर रेल्वे मंत्रालयाने हे तंत्रज्ञान विकसित केले आहे. जगातील सर्वात स्वस्त स्वयंचलित ट्रेन टक्कर संरक्षण प्रणाली म्हणून ‘कवच’ ची जाहिरात रेल्वेकडून केली जात आहे. ‘शून्य अपघात’ हे उद्दिष्ट साध्य करण्यासाठी रेल्वेला मदत करण्यासाठी स्वदेशी विकसित ऑटोमेटेड ट्रेन प्रोटेक्शन (ATP) प्रणाली विकसित करण्यात आली आहे. कवचची रचना अशा प्रकारे करण्यात आली आहे की निर्धारित अंतरावर त्याच मार्गावर दुसरी ट्रेन आल्याची माहिती मिळाल्यानंतर रेल्वे आपोआप थांबेल.

या डिजिटल सिस्टीममुळे रेड सिग्नलकडे दुर्लक्ष करणे किंवा अन्य काही बिघाड अशा मानवी चुका झाल्या असल्यास ट्रेन आपोआप थांबेल, असे वरिष्ठ अधिकाऱ्यांनी सांगितले. अधिका-यांनी सांगितले की, कवच बसवण्याची ऑपरेशनल किंमत प्रति किलोमीटर 50 लाख रुपये येईल, तर जागतिक स्तरावर अशा सुरक्षा यंत्रणेची किंमत प्रति किलोमीटर सुमारे 2 कोटी रुपये आहे. सनतनगर-शंकरपल्ली मार्गावरील या प्रणालीच्या ट्रायल रनचा भाग म्हणून रेल्वेमंत्री अश्विनी वैष्णव सिकंदराबादला पोहोचतील.

यंत्रणा प्रथम कुठे असेल
‘कवच’ प्रणालीमध्ये उच्च वारंवारता रेडिओ कम्युनिकेशनचा वापर केला जातो. अधिकार्‍यांच्या मते, कवच SIL-4 (सिक्युरिटी स्टँडर्ड लेव्हल फोर) शी सुसंगत आहे, जी कोणत्याही सुरक्षा प्रणालीची सर्वोच्च पातळी आहे. ही प्रणाली सुरू झाल्यानंतर, पाच किलोमीटरच्या परिघात असलेल्या सर्व गाड्या लगतच्या रुळांवर उभ्या असलेल्या ट्रेनच्या सुरक्षेसाठी थांबतील. कवच प्रति तास 160 किलोमीटर वेगासाठी मंजूर आहे.

2022 च्या केंद्रीय अर्थसंकल्पात आत्मनिर्भर भारत उपक्रमांतर्गत ‘कवच’ अंतर्गत 2,000 किमीपर्यंत रेल्वेचे जाळे आणण्याची योजना आहे. दक्षिण मध्य रेल्वेच्या सुरू असलेल्या प्रकल्पांमध्ये आतापर्यंत १०९८ किमी मार्गावर कवच बसवण्यात आले आहे. दिल्ली-मुंबई आणि दिल्ली-हावडा रेल्वे मार्गावरही कवच ​​बसवण्याची योजना आहे, ज्यांची एकूण लांबी सुमारे 3000 किमी आहे.

The post 160 किमी वेगाने दोन रेल्वे येणार समोरासमोर, ‘कवच’ प्रणालीच्या चाचणीसाठी एका ट्रेनमध्ये बसणार स्वतः रेल्वेमंत्री appeared first on थोडक्यात घडामोडी.