पुणे : पुण्यात किरकोळ कारणावरून एका व्यक्तीने आपल्या पत्नीची हत्या केल्याची खळबळजनक घटना घडली आहे. रात्रभर टीव्ही चालूच राहिल्यामुळे पतीने रागाच्या भरात पत्नीची गळा दाबून हत्या केली. या महिलेच्या वडिलांनी तक्रार केल्यानंतर आरोपी पतीला पोलिसांनी अटक केली असून त्याची चौकशी सुरू आहे.

पोलिसांनी दिलेल्या माहितीनुसार, मावळमधील चांदीवाडीमध्ये ही घटना घडली असून योगेश जाधव नावाच्या 26 वर्षीय व्यक्तीने आपल्या 20 वर्षीय पत्नीची हत्या केली. या जोडप्याला 7 महिन्यांपूर्वीच एक मुलगी झालेली आहे. मुलगी झाल्याचा राग या व्यक्तीच्या मनात होता. मुलगी झाल्यापासून तो पत्नीचा सातत्याने शारीरिक आणि मानसिक छळ करत होता. त्यातच रात्रभर टीव्ही चालू राहिल्यामुळे संतापाच्या भरात त्याने पत्नीची गळा दाबून हत्या केली. काही ग्रामस्थांनी तिच्या मृत्यूची माहिती पोलिसांना दिल्यानंतर शनिवारी सकाळी ही घटना उघडकीस आली.

पोलिसांनी मृत महिलेची ओळख चांगुणा जाधव अशी केली असून तिचा पती योगेश जाधव जो व्यवसायाने ट्रक चालक आहे, त्याला अटक करण्यात आली आहे. चांगुनाच्या वडिलांच्या तक्रारीच्या आधारे तळेगाव दाभाडे पोलीस स्टेशनमध्ये गुन्हा नोंदवण्यात आला आहे. पोलिसांनी सांगितले की, पत्नीची हत्या केल्यानंतर आरोपी पती घटनास्थळावरून पळून गेला होता. मात्र, पोलिसांनी त्याचा फोन ट्रॅक केला आणि त्याचा शोध घेतला. पोलिसांनी आरोपी पतीला अटक केली असून सध्या पोलीस त्याची चौकशी करत आहेत.

The post पुण्यात खळबळ! रात्रभर टीव्ही चालू राहिल्याने केली पत्नीची हत्या… appeared first on थोडक्यात घडामोडी.

दौंड : प्रेयसी आणि अन्य एका महिलेच्या मदतीने पत्नी व मुलाचा खून करून आत्महत्येचा बनाव रचणाऱ्या पतीसह तिघा जणांवर गुन्हा दाखल करण्यात आला आहे. या प्रकरणी भाऊसाहेब मारुती शेलार (वय ३४, रा. केडगाव, ता. दौंड) यांनी यवत पोलिस ठाण्यात फिर्याद दिली होती. आरोपींना अटक करण्यात आली आहे.

पोलिसांनी दिलेल्या माहितीनुसार, पाटस येथील महिला लीना सचिन सोनवणे (वय ३५) आणि तिचा सात वर्षांचा मुलगा ओम सोनवणे यांचा मृतदेह पंख्याला लटकलेल्या स्थितीत आढळला होता. ही घटना मंगळवारी पहाटे समोर आली. मात्र, ही आत्महत्या नसल्याचा संशय आल्याने यवत पोलिसांनी तपासाला वेग देऊन अवघ्या पाच तासांत खुनाचा छडा लावला. मृत लीना यांचा पती सचिन दिलीप सोनवणे (वय ३७, रा. सध्या रा. मांजरी, ता. हवेली, मूळ पाटस) याने प्रेयसी रेणुका उर्फ प्रणाली भारत तळेकर आणि अन्य एका महिलेच्या मदतीने हे हत्याकांड केल्याचे पोलिस तपासात समोर आले आहे. पाटस येथील स्वराज व्हॅली अपार्टमेंट येथे लीना सोनवणे या चार वर्षांपासून पतीपासून विभक्त राहत होत्या. त्यांच्याबरोबर मुलगी वैष्णवी आणि मुलगा ओम देखील राहत होते.

दरम्यान, सचिन सोनवणे याला त्याच्या पत्नीचे अनैतिक संबंध असल्याचा संशय होता. सचिन त्याची प्रेयसी आणि एका महिलेसह मंगळवारी पहाटेच्या सुमारास पाटस येथे आला. तिघांनी लीना आणि मुलगा ओम याला मारहाण केली. यावेळी मुलगी वैष्णवी घरातच होती. वैष्णवी झोपी गेल्यानंतर आरोपींनी लीना आणि ओम यांचा गळा दाबून खून केला. त्यानंतर दोघांचे मृतदेह पंख्याला लटकावले. वैष्णवीला सकाळी जाग आल्यानंतर आईचा मृतदेह स्वयंपाक घरातील पंख्याला आणि ओमचा मृतदेह बेडरूममधील पंख्याला लटकलेला पाहिला. घाबरलेल्या वैष्णवीने फोन करून नातेवाइकांना माहिती दिली. नातेवाइक आल्यानंतर त्यांनी तात्काळ पोलिसांना कळवले.

पोलिसांनी हत्येच्या कोनातून तपास केला आणि आरोपींचा छडा लावला. पोलिसांनी वैष्णवीला विश्‍वासात घेऊन माहिती विचारली असता मारहाणीची सर्व घटना तिने सांगितली. खून केल्यानंतर आरोपी सचिन सोनवणे पुण्याला निघून गेला होता. सचिन सोनवणे पुण्यावरून पाटस येथे दाखल झाल्यानंतर त्याच्यावरच लक्ष केंद्रित केले. चौकशीदरम्यान त्याने दोघांच्या खुनाची कबुली दिली. आरोपींना न्यायालयासमोर हजर केले असता त्यांना पाच दिवसांची पोलिस कोठडी सुनावण्यात आली.

The post अनैतिक संबंधाच्या संशयावरून पत्नी व मुलाची हत्या; पतीने प्रेयसीच्या मदतीने केले भयंकर कृत्य appeared first on थोडक्यात घडामोडी.

पतीने रागाच्या भरात पत्नीची चाकूने भोसकून हत्या केली आणि नंतर स्वतः धावत्या ट्रेनखाली उडी मारून आत्महत्या केली. पालघर जिल्ह्यातील बोईसर येथे बुधवारी मध्यरात्री ही धक्कादायक घटना घडली. पती-पत्नीच्या भांडणामुळे संपूर्ण कुटुंब उध्वस्त झालं. या दाम्पत्याला दोन मुलंदेखील आहेत.

मिळालेल्या माहितीनुसार, मंगळवारी रात्री नऊ वाजताच्या सुमारास या महिलेचा पती कामावरून घरी आला. त्यानंतर काही वेळाने पती आणि पत्नीचे भांडण सुरु झाले. त्यांची अकरा वर्षांची मुलगी दुसऱ्या खोलीत होती, तर नऊ वर्षांचा मुलगा घाबरून घराबाहेर गेला आणि या दोघांमधील भांडण सोडवण्यासाठी त्याने शेजाऱ्यांना बोलावले. शेजाऱ्यांनी मध्यस्थी करून त्यांचे भांडण मिटवले. त्यानंतर सर्व कुटुंब झोपी गेले.

मध्यरात्री दोनच्या सुमारास पुन्हा या दाम्पत्यामध्ये भांडण सुरू झाले. भांडण वाढत गेले आणि अडीचच्या सुमारास रागाच्या भरात पतीने चाकूने पत्नीला भोसकले. यात तिचा मृत्यू झाला. आवाज ऐकून शेजारी धावून आले. त्यांनी दरवाजा ठोठावला. आरोपी पतीने दरवाजा उघडला. मात्र, आतमधील दृश्य बघून सर्वांना धक्का बसला. आरोपीची पत्नी रक्ताच्या थारोळ्यात पडलेली होती. आरोपी तेथून पळून गेला.

शेजाऱ्यांनी तात्काळ या घटनेची माहिती पोलिसांना दिली. साडेतीनच्या सुमारास पालघर रेल्वे पोलिसांना माहिती मिळाली की बोइसर रेल्वे स्थानकाजवळ धावत्या ट्रेनखाली उडी मारून एका व्यक्तीने आत्महत्या केली आहे. या व्यक्तीची ओळख पटली आणि पत्नीची हत्या केल्यानंतर त्यानेही आत्महत्या केल्याचे स्पष्ट झाले. पोलिसांनी या घटनेची नोंद करून घेतली असून ते पुढील तपास करत आहेत.

The post पत्नीची हत्या करून पतीची धावत्या ट्रेनखाली उडी मारून आत्महत्या appeared first on थोडक्यात घडामोडी.