पिंपरी चिंचवड : पोलीस आयुक्त कृष्ण प्रकाश यांना पत्रकारांनी प्रश्न विचारला की पिंपरी चिंचवडमधील आमदार अण्णा बनसोडे यांनी गोळीबाराचा बनाव केला असेल तर आमदारांवर गुन्हा दाखल करणार का? मात्र, या प्रश्नाला पोलीस आयुक्त कृष्ण प्रकाश यांनी समाधानकारक उत्तर न दिल्यामुळे आता नवीन विषयाला तोंड फुटलं आहे. कृष्ण प्रकाश यांची नेहमीची गुन्हेगारांच्या मुसक्या आवळण्याची भाषा दिसली नाही, त्यामुळे त्यांच्यावर राज्य सरकारमधील कोणाचा दबाव आहे का? अशी चर्चा रंगू लागली आहे.

राष्ट्रवादी काँग्रेसचे आमदार अण्णा बनसोडे यांच्यावर झालेल्या कथित गोळीबार प्रकरणाला आज सात दिवस पूर्ण होतील, तरी देखील हत्येचा प्रयत्न केल्याचा गुन्हा दाखल असलेला बनसोडे यांचा मुलगा सिद्धार्थ बनसोडेपर्यंत पोलीस पोहचू शकलेले नाहीत. यामागे काय कारण आहे? हा त्याच दबावाचा परिणाम तर नसेल ना? अशी चर्चा आता सुरु झाली आहे. अण्णा बनसोडे यांनी 12 मे रोजी त्यांच्यावर गोळीबार झाल्याचा दावा केला होता. हा गोळीबार तानाजी पवारने केला असं त्यांनी सांगितलं होतं. पण गोळी कोणाला लागलीच नाही. गोळीची खून घटनास्थळी कुठेच आढळलेली नाही. दुसरीकडे तानाजी पवारने स्वतःचा जीव वाचवण्यासाठी हवेत गोळीबार केल्याचं जबाबात म्हटलं आहे. त्यातून अण्णा बनसोडे यांनी गोळीबाराचा बनाव केला असं निष्पन्न झालं तर पोलीस त्यांच्यावर गुन्हा दाखल करणार का? असा प्रश्न पत्रकारांनी पोलीस आयुक्त कृष्ण प्रकाश यांना विचारला. पण यावर पोलीस आयुक्त म्हणाले की, ही पत्रकार परिषद वेगळ्या विषयासाठी आहे. अद्याप मुख्य आरोपी जेरबंद केलेले नाहीत. मी तपास पूर्ण झाल्याशिवाय कधीच कुठल्या घटनेबाबत भाष्य करत नाही.

दोन मोटारसायकल समोरासमोर धडकून भीषण अपघात, दोघांचा मृत्यू

पोलीस आयुक्त कृष्ण प्रकाश नेहमीच गुन्हेगारांविरुद्ध आक्रमक भूमिका घेतात, गुन्हेगारांच्या मुसक्या आवळण्याची भाषा करतात, त्यामुळे त्यांनी वापरलेली ही भाषा मात्र वेगळीच होती. त्यामुळे या प्रकरणात अनेक शंका उपस्थित केल्या जात आहेत. दरम्यान, या घटनेनंतर हे प्रकरण पोलीस आयुक्त कृष्ण प्रकाश यांच्याकडे असल्यामुळे काहीतरी सकारात्मक होईल, अशी अशा अनेकजण व्यक्त करत होते. त्यामुळे आता पोलीस आयुक्त या प्रकरणाचा कसा उलगडा करतील, हे पाहणं महत्वाचं ठरणार आहे.

दरम्यान, आत्तापर्यंत या प्रकरणात केवळ गोळीबाराचा आरोप असलेला तानाजी पवार आणि आमदारांच्या चार समर्थकांना अटक करण्यात आलेली आहे. पोलीस अद्याप अण्णा बनसोडे यांचा मुलगा आणि त्यांच्या पीएपर्यंत पोहोचू शकलेले नाहीत.

आमदार बनसोडे यांच्यावरील गोळीबार प्रकरणाला वेगळे वळण, पोलिसांनी दिली खळबळजनक माहिती

भयंकर : दारूच्या नशेत केली अनोळखी व्यक्तीची हत्या, अगोदर गळा आवळला नंतर चिरला, मग जिवंत जाळलं

The post पोलीस आयुक्त कृष्ण प्रकाश यांच्यावर कोणाचा दबाव? ‘त्या’ कथित गोळीबार प्रकरणाचं पुढे काय? appeared first on थोडक्यात घडामोडी.

पिंपरी चिंचवड : पिंपरी चिंचवडमधील राष्ट्रवादी काँग्रेसचे आमदार अण्णा बनसोडे गोळीबार प्रकरणी परस्परविरोधी गुन्हे दाखल झाले आहेत. कंत्राटदार अँथोनी यांचा मॅनेजर तानाजी पवारसह तिघांवर जीवे मारण्याच्या उद्देशाने आमदार आणि त्यांच्या मुलाच्या दिशेने गोळीबार केल्याचा आरोप आहे. तर आमदार अण्णा बनसोडे यांचा मुलगा सिद्धार्थ बनसोडे आणि त्यांच्या पीएसह 21 जणांवर अपहरण आणि जीवघेणा हल्ला केल्याचा आरोप तानाजी पवारने केला आहे.

राष्ट्रवादी काँग्रेसचे आमदार अण्णा बनसोडे यांच्यावर गोळीबार झाला. मात्र ते गोळीबारातून सुखरुप बचावले. तेथे त्यांचे २०-२२ कार्यकर्ते उपस्थित होते, त्यापैकी कोणीही जखमी नाही. पालिकेचे कंत्राटदार सिजू अँथोनी यांचा मॅनेजर तानाजी पवारने गोळीबार केल्याची माहिती आमदार बनसोडे यांनी दिली. आमदार बनसोडे यांनी पोलिसांना सांगितलं कि, “मी स्वतः तानाजीला बोलाऊन घेतलं होतं, त्यानंतर त्याने एकेरी उल्लेख केला, त्यामुळे कार्यकर्त्यांनी त्याला चोप दिला. तर त्याने माझ्या दिशेने गोळीबार केला, सुदैवाने मी यातून बचावलो.” तानाजी हे सीआरपीएफचे निवृत्त जवान असल्याचं समोर आलं आहे. राज्यातील सत्ताधारी आमदारांवर गोळीबार झाल्याचं कळताच पोलिसांनी तातडीने तानाजी पवार यांना अटक केली. आमदार बनसोडे यांनी तानाजी पवारसह तिघांनी हा कट रचल्याचा आरोप करत गुन्हा दाखल केला.

आमदार बनसोडे आणि तानाजी पवार यांच्यामध्ये 11 मे रोजी फोनवरुन झालेल्या संभाषणाची ऑडिओ क्लिप समोर आली. यात आमदार शिवीगाळ करुन तानाजीला धमकावत आहेत. तानाजी मात्र आपण योग्य भाषा वापरावी, असं अनेकदा सांगत होता. परंतु आमदार बनसोडे तू उद्या ये मग बघू, असं म्हणाले.

दरम्यान, अँथोनी यांच्या आकुर्डी येथील कार्यालयासमोर 11 मे रोजी घडलेल्या घटनेचे सीसीटीव्ही फूटेज समोर आले. यात आमदार बनसोडे यांचा मुलगा सिद्धार्थ आणि आमदारांचा पीए यांच्यासह दहा जणांनी अँथोनी यांच्या कार्यालयात प्रवेश केला. तानाजी पवार कुठे आहे ते सांगा, असं धमकावलं. त्यांनी माहित नाही असं म्हटल्यावर दोन कर्मचाऱ्यांना कार्यालयाबाहेर खेचलं. तिथे दोघांवर सशस्त्र हल्ला केला. हे फूटेज समोर आल्यानंतर या आधारावर आमदार बनसोडे यांचा मुलगा सिद्धार्थ आणि आमदारांचा पीए यांच्यासह दहा जणांवर जीवघेणा हल्ला केल्याप्रकरणी निगडी पोलीस स्टेशनमध्ये गुन्हा दाखल झाला.

तानाजी पवार यांनी देखील पिंपरी पोलिसांकडे घडलेल्या प्रकाराबाबत तक्रार दिली. त्यांनी आमदार बनसोडे यांचा मुलगा सिद्धार्थ आणि पीएसह 21 जणांवर अपहरण आणि हत्येचा प्रयत्न केल्याचा गुन्हा दाखल केला आहे. यात ऑडिओ क्लिपचा देखील उल्लेख आहे. तानाजी पवार यांनी तक्रारीत सांगितलं कि, “घटनेच्या दिवशी आमदारांच्या पीएसह दोघांनी माझं अपहरण केलं. तिथून घटना घडलेल्या ठिकाणी मला आणलं. तिथं आमदार स्वतः उपस्थित होते. ऑडिओ क्लिपमधील संवादात मी चुकीचं बोललो असेल तर मला माफ करा अशी मी माफी मागितली. तेव्हाच आमदारांचा मुलगा सिद्धार्थने मला कार्यालयातून बाहेर आणलं. त्याच्या हातात घातक शस्त्र होतं, त्याने माझ्या डोक्यावर वार केला. इतरांनी बेल्ट, लोखंडी रॉड, लाकडी दांडके, लाथाबुक्क्यांनी मारहाण केली. या मारहाणीत माझा जीव जाण्याची शक्यता होती. त्यामुळे स्वतःच्या बचावासाठी मी माझ्याकडे असणाऱ्या बंदुकीतून हवेत गोळीबार केला. नंतर तीच बंदूक एकाने माझ्याकडून हिसकावली. नंतर मला एक गोळी झाडल्याचा आवाज आला. त्यानंतर पोलीस आले आणि मला ताब्यात घेतलं.”

या संपूर्ण प्रकरणात दाखल झालेले गुन्हे पाहता आमदारांच्या दाव्यांवर प्रश्नचिन्ह उपस्थित होत आहे. तसेच आमदारांनी तानाजीला बोलावलं होतं की त्याचं अपहरण केलं होतं? तानाजीने हवेत गोळी झाडल्याचं तक्रारीत सांगितलं पण आमदारांनी आपल्यावर गोळी झाडल्याचा दावा केला. तानाजी पवारला अटक करण्यात आली मग आता बनसोडे यांचा मुलगा सिद्धार्थ, त्यांच्या पीएसह इतरांना अटक होणार का? हे पाहून महत्वाचं ठरणार आहे.

The post आमदार अण्णा बनसोडे गोळीबार प्रकरण : बनसोडे यांच्या मुलासह 21 जणांवर गुन्हा दाखल appeared first on थोडक्यात घडामोडी.

पिंपरी : पिंपरी चिंचवडमध्ये राष्ट्रवादी काँग्रेसचे आमदार अण्णा बनसोडे यांच्यावर झालेल्या कथित गोळीबार प्रकरणात एक वेगळीच माहिती समोर आली आहे. अटकेत असलेल्या कंत्राटदार अँथोनी यांचे मॅनेजर तानाजी पवारने जीव वाचवण्याच्या उद्देशाने हवेत गोळीबार केल्याचा जबाब दिला आहे. आमदार अण्णा बनसोडेंनी दावा केला होता की तानाजी पवारने त्यांच्या दिशेने गोळीबार केला. मात्र, पिंपरी चिंचवड पोलिसांना गोळी लागल्याच्या खुणा अद्याप सापडलेल्या नाहीत. त्यामुळे, आमदार अण्णा बनसोडे यांच्या दाव्यावर प्रश्नचिन्ह निर्माण झालं आहे. त्यातच आता आमदार बनसोडे यांची एक ऑडिओ क्लिप समोर आली आहे. ज्यामध्ये आमदार अण्णा बनसोडे तानाजी पवारला धमकावत आहेत.

तानाजी पवार आज आमदारांना भेटायला त्यांच्या कार्यालयात आले. त्यानंतर वाद झाला. आमदारांच्या कार्यकर्त्यांनी तानाजी पवारला मारहाण करत कार्यालयाबाहेर आणलं. तेव्हा तानाजी पवारने त्याच्याकडे असणाऱ्या बंदुकीतून तीन गोळ्या झाडल्या. ह्या गोळ्या माझ्या दिशेने झाडल्याचा दावा आमदारांनी केला होता. मात्र पोलिसांना गोळीबाराच्या खुणा आढळल्या नाहीत, अशी माहिती पोलीस आयुक्त कृष्ण प्रकाश यांनी दिली.

अटक करण्यात आलेल्या तानाजी पवारांनी सांगितले की आमदारांचे कार्यकर्ते मला बेदम मारहाण करत होते. माझा जीव जाण्याची शक्यता होती, म्हणून बचावासाठी मी हवेत गोळीबार केला. अशातच काल झालेल्या घटनेचा सीसीटीव्ही समोर आला. यात अँथोनी यांच्या कार्यालयात आमदारांचे समर्थक आले होते. त्यांनी अँथोनी यांच्या कर्मचाऱ्यांवर शस्त्राने हल्ला केला होता. हा प्रकार गोळीबारानंतर आमदारांनी सांगितला नव्हता. त्यामुळे आता परस्परविरोधी गुन्हे दाखल करण्याची प्रक्रिया सुरू असल्याची माहिती पोलीस कृष्ण प्रकाश यांनी दिली.

The post आमदार बनसोडे यांच्यावरील गोळीबार प्रकरणाला वेगळे वळण, पोलिसांनी दिली खळबळजनक माहिती appeared first on थोडक्यात घडामोडी.