प्रियकराने प्रेयसीला चालत्या ट्रेनमधून बाहेर फेकले, 2 दिवसांनी ती शुद्धीवर आली आणि…

बिहार : बिहारमधील नालंदा येथे एका प्रियकराने आपल्या प्रेयसीला धावत्या ट्रेनमधून बाहेर फेकल्याची धक्कादायक घटना समोर आली आहे. यामध्ये ती गंभीर जखमी झाली. स्थानिक लोकांनी तिला बेशुद्धावस्थेत आणि गंभीर जखमी झालेली पाहिल्यानंतर उपचारासाठी बिहारशरीफ सदर रुग्णालयात दाखल केले, तेथे तिच्यावर उपचार सुरू आहेत. ही घटना नालंदाच्या भगन बिघा रेल्वे ट्रॅकच्या बाजूला घडली आहे.

दरम्यान, दोन दिवसांच्या उपचारानंतर जखमी मुलगी शुद्धीवर आली आणि त्यानंतर तिची ओळख पटली. त्यानंतर तिच्या कुटुंबीयांना माहिती देण्यात आली. माहिती मिळताच नातेवाइकांनी तेथे पोहोचून संपूर्ण प्रकार पोलिसांना सांगितला. त्यानंतर पोलीस तपास सुरु झाला.

मिळालेल्या माहितीनुसार, मुलगी पाटणा शहरातील रहिवासी आहे. 4 महिन्यांपूर्वी ही मुलगी तिच्या शेजारी राहणाऱ्या मणिकुमारच्या प्रेमात पडली होती. काही दिवस दोघेही एकमेकांना गुपचूप भेटत राहिले. त्यानंतर एके दिवशी लग्न करण्याच्या इराद्याने दोघेही हरियाणाला पळून गेले होते. दरम्यान, मुलीच्या घरच्यांना हा प्रकार कळताच त्यांनी मुलाच्या घरच्यांशी लग्नासाठी बोलणे केले, त्यानंतर त्यांनी होकार दिला. याबाबत गावात पंचायतही बसली. तेथेही मुलाच्या कुटुंबीयांनी मणिकुमार तिला स्वीकारणार असल्याचे सांगितले आणि दोघांनाही घरी बोलावले. त्यानंतर 10 तारखेला मणिकुमारने तिला राजगीरला घेऊन जातो, असे सांगून घर सोडले. मात्र, ट्रेनमध्ये दोघांमध्ये भांडण झाले, त्यानंतर प्रियकराने तरुणीला चालत्या ट्रेनमधून ढकलून दिले आणि पळ काढला.

स्थानिक लोकांनी रेल्वे रुळावर तरुणी पडल्याचे आणि ती गंभीर जखमी झालेली पाहिल्यानंतर 112 आपत्कालीन सेवेला माहिती दिली. माहिती मिळताच पोलिसांनी सदर हॉस्पिटल बिहार शरीफ येथे मुलीला उपचारासाठी दाखल केले. त्यावेळी मुलीची प्रकृती बिघडली होती. 2 दिवसांनी शुद्धीवर आल्यावर नातेवाईकांना घटनेची माहिती देण्यात आली.

सदर घटनेबाबत पोलीस म्हणाले की, १० जून रोजी भगन बिघा रेल्वे रुळावर एक मुलगी बेशुद्ध अवस्थेत आढळली होती, तिला पोलिसांनी स्थानिक लोकांच्या मदतीने सदर रुग्णालयात दाखल केले. प्रेमप्रकरणातून मुलीला ट्रेनमधून ढकलल्याचा आरोप मुलीच्या कुटुंबीयांनी केला आहे. या संपूर्ण प्रकरणाचा तपास सुरू असून, आरोपी प्रियकराचा शोध घेतल्यानंतर या प्रकरणाचा उलगडा होईल.