नवऱ्याला घाबरवण्यासाठी करत होती गळफास घेण्याचे नाटक, पण पाय घसरला आणि…

नवऱ्याला घाबरवण्यासाठी गळफास घेण्याचे नाटक करताना एका महिलेचा मृत्यू झाला. झारखंडमधील धनबादमध्ये रामकनाली फिल्टर प्लान्टच्या जवळच ही धक्कादायक घटना घडली. महिलेच्या आठ वर्षीय मुलीने सांगितले की तिची आई गळफास घेण्याचे नाटक करत होती. गळफास घेतानाचा फोटो काढत असताना स्टुलावरून तिचा पाय घसरला. त्यामुळे, फास आवळून तिचा यात दुर्दैवी मृत्यू झाला.

मनोज महतोचे हे दुसरे लग्न होते आणि ताराचेही दुसरे लग्न होते. तिने कुटुंबीयांचा विरोध असूनही हे लग्न केले होते. मनोजची एक आठ वर्षांची मुलगी आहे. ती मनोज आणि तारा यांच्यासोबतच राहत होती. या मुलीने सांगितले कि, “आईने सांगितले होते की वडिलांना भीती घालण्यासाठी गळफास घेण्याचे नाटक करणार आहे. गळफास घेतानाचा फोटो काढून वडिलांना पाठवू आणि घाबरवू. पण नाटक करताना आईचा खरंच स्टुलावरून पाय घसरला.”

या अनपेक्षित प्रकारानंतर या महिलेची मुलगी प्रचंड घाबरली. तिने बाहेर जाऊन आरडाओरड करत मदतीसाठी काही जणांना बोलावले. पण तोपर्यंत तिच्या आईचा मृत्यू झाला होता. दरम्यान, काही जणांनी तात्काळ पोलिसांना घटनेची माहिती दिली. पोलिसांनी घटनास्थळी येऊन मृतदेह ताब्यात घेतला. पोलीस अधिक तपास करत आहेत.