बनावट डॉक्टर दाम्पत्याने महिलेवर केले IVF उपचार, महिलेच्या मृत्यूनंतर धक्कादायक खुलासा…

कर्नाटक : कर्नाटकातील तुमकूर जिल्ह्यात एका महिलेच्या मृत्यूनंतर कर्नाटक पोलिसांनी एका बनावट डॉक्टर दाम्पत्याला अटक केली आहे. या दाम्पत्याने अपत्यहीन महिलेवर इन विट्रो फर्टिलायझेशन (IVF) द्वारे उपचार केले. उपचारानंतर महिलेचा मृत्यू झाला. मृत महिलेच्या पतीच्या तक्रारीवरून बनावट डॉक्टर दाम्पत्याला अटक करण्यात आली आहे.

वाणी आणि मंजुनाथ अशी आरोपींची नावे आहेत. या दोघांनी जवळपास 100 जोडप्यांवर आयव्हीएफद्वारे उपचार केल्याचे सांगण्यात येत आहे. उपचाराच्या नावाखाली या दाम्पत्याने लोकांकडून लाखो रुपयेही वसूल केले. दरम्यान, या दाम्पत्याकडे वैद्यकीय पदवी नसल्याचा धक्कादायक खुलासा तपासात झाला आहे. ते फक्त १० वी पास आहेत.

मृत महिला ममता यांचा पती मल्लिकार्जुन यांनी पोलिसात तक्रार केली होती. मल्लिकार्जुन आणि ममता यांना लग्नाला १५ वर्षे उलटूनही मूल झाले नाही. त्यांनी अनेक हॉस्पिटलमध्ये उपचार घेतले, पण काही उपयोग झाला नाही. अखेर मल्लिकार्जुन यांनी तुमकूरमधील आयव्हीएफ केंद्राशी संपर्क साधला. बनावट डॉक्टर जोडप्याने मल्लिकार्जुन आणि ममता यांच्यावर यशस्वी उपचार करण्याचे आश्वासन दिले. उपचाराच्या नावाखाली त्यांच्याकडून चार लाख रुपये घेतले आणि आयव्हीएफ उपचारही केले.

IVF उपचारानंतर ममता यांना अनेक आजारांनी ग्रासले. त्यांनी डॉक्टरांना याचे कारण विचारले असता बनावट डॉक्टरांनी सांगितले की, गर्भात भ्रूण विकसित झाल्यानंतर हे बदल होत आहेत. त्यानंतर बनावट डॉक्टर या दाम्पत्याकडून अधिक पैसे उकळू लागले. वेदना वाढल्याने ममता तपासणीसाठी दुसऱ्या रुग्णालयात गेल्या. त्यावेळी तपासात ममता गर्भवती नसल्याचे समोर आले. ममताला किडनी, हृदय, मेंदू आणि गर्भाशयात समस्या येऊ लागल्या. ममता यांना उपचारासाठी रुग्णालयात दाखल करण्यात आले, मात्र 23 एप्रिल रोजी त्यांचा मृत्यू झाला.