हवाई प्रवासादरम्यान कोरोना नियमांचं पालन न करणं महागात पडणार, डीजीसीए ने दिला ‘हा’ इशारा

नवी दिल्ली : कोरोना संसर्ग पुन्हा वाढत आहे. त्यामुळे हवाई प्रवास करणाऱ्या प्रवाशांनी नियम योग्य पद्धतीने ना पाळल्यास डायरेक्टर जनरल ऑफ सिव्हिल एव्हिएशन (DGCA) कडून कठोर कारवाईचा इशारा देण्यात आला आहे. डीजीसीएकडून  यासंदर्भात एक परिपत्रक काढण्यात आलं आहे.

विमानतळावर दाखल झाल्यापासून ते बाहेर पडेपर्यंत प्रत्येक ठिकाणी प्रवाशांना योग्य पद्धतीने मास्कचा वापर करावा लागेल. तसेच प्रवासादरम्यान सोशल डिस्टन्सिंगच्या नियमांचं पालन न करणाऱ्या प्रवाशांना विमानातून खाली उतरवण्यात येईल, असं या परिपत्रकात म्हटलं आहे. विमानात बसलेले असतानाही काही प्रवासी कोविड नियमांचं पालन करण्यास टाळाटाळ करतात, असं डीजीसीए ने म्हटलं आहे. कोविड १९ प्रोटोकॉलनुसार, प्रवाशांनी योग्य पद्धतीनं मास्क परिधान करणं तसंच सोशल डिस्टन्सिंग नियमांचं पालन करणं आवश्यक आहे.

DGCA च्या परिपत्रकातील मुद्दे : 

1. विमानतळावर कोणताही प्रवासी विनामास्क प्रवेश करणार नाही, प्रवेश द्वारावर तैनात सीआयएसएफ किंवा इतर पोलीस कर्मचारी हे सुनिश्चित करतील. सीएएसओ किंवा इतर सुपरवायजिंग अधिकारी यांची ही जबाबदारी असेल.
2. विमान प्रवासादरम्यान प्रत्येक ठिकाणी मास्कचा वापर करणं प्रवाशांना बंधनकारक राहील. तसंच सोशल डिस्टन्सिंगचं पालन करावं लागेल. कोणत्याही अपवादात्मक परिस्थितीशिवाय मास्क नाकाच्या खाली घेतलं जाऊ नये.
3. प्रवासी विमानतळ परिसरात प्रत्येक ठिकाणी मास्कचा वापर करत आहे तसंच सोशल डिस्टन्सिंगचं पालन करत आहेत, हे एअरपोर्ट डायरेक्टर / टर्मिनल मॅनेजर सुनिश्चित करतील.
4. नियमांचं उल्लंघन करताना एखादा प्रवासी आढळल्यास त्याला इशारा दिल्यानंतर सुरक्षा यंत्रणेच्या स्वाधीन केलं जाईल. त्याच्यावर कायदेशीररित्या कारवाई केली जाईल.
5. विमान उड्डाणापूर्वी विमानात बसलेला कोणताही प्रवासी इशाऱ्यानंतरही मास्क योग्य पद्धतीनं परिधान करत नसेल तर त्याला विमानातून खाली उतरवण्यात येईल. एखादा प्रवासी विमान प्रवासादरम्यान वारंवार मास्क परिधान करण्यास नकार देत असेल किंवा कोविड प्रोटोकॉल्सचं पालन करत नसेल तर त्याला ‘उपद्रवी प्रवासी’ करार देण्यात येऊन त्या प्रवाशाला प्रवासास बंदी घालण्यात येईल.