राजस्थानमधील प्रसिद्ध खाटूश्यामजी येथील जत्रेत चेंगराचेंगरी, 3 महिला भाविकांचा मृत्यू

राजस्थान : राजस्थानमधील प्रसिद्ध खाटूश्यामजी येथील जत्रेत सोमवारी सकाळी चेंगराचेंगरी झाली. या घटनेत ३ महिला भाविकांचा मृत्यू झाला. पहाटे ५ वाजता मंदिराचे प्रवेशद्वार उघडताच गर्दी अनियंत्रित झाली आणि लोकांनी धक्काबुक्की सुरू केली. या घटनेत तीन महिला भक्तांचा मृत्यू झाला तर अनेक भाविक जखमी झाले.

घटनेची माहिती मिळताच पोलीस-प्रशासनाने घटनास्थळी धाव घेत मदतकार्य सुरू केले. सध्या या चेंगराचेंगरीत जखमी झालेल्या सर्वांना जवळच्या रुग्णालयात दाखल करण्यात आले आहे. या घटनेवर शोक व्यक्त करताना राजस्थानचे मुख्यमंत्री अशोक गेहलोत म्हणाले की, ‘सीकर येथील खाटूश्यामजींच्या मंदिरात झालेल्या चेंगराचेंगरीमुळे दर्शनासाठी आलेल्या ३ महिलांचा मृत्यू होणे अत्यंत दुःखद आणि दुर्दैवी आहे. शोकाकुल परिवारासोबत माझ्या संवेदना आहेत, देव त्यांना हे नुकसान सहन करण्याची शक्ती देवो आणि मृतांच्या आत्म्याला शांती देवो. चेंगराचेंगरीत जखमी झालेल्या भाविकांना लवकरात लवकर बरे होवो ही कामना.