घराला गॅस चेंबर बनवून महिलेची दोन मुलींसह आत्महत्या, सुसाईड नोटमध्ये धक्कादायक खुलासा

दिल्ली : दिल्लीतील वसंत विहार परिसरात एका घरातून 3 जणांचे मृतदेह संशयास्पद अवस्थेत सापडले आहेत. पोलिसांच्या प्राथमिक तपासात ही आत्महत्या असल्याचे समजले आहे.

मिळालेल्या माहितीनुसार, रात्री 8:22 वाजता वसंत विहार पोलिस स्टेशनच्या पोलिसांना पीसीआर कॉलवरून माहिती मिळाली की वसंत अपार्टमेंट सोसायटीमधील फ्लॅट क्रमांक-207 मधील खोली आतून बंद आहे आणि घरातील लोक दार उघडत नाहीत. दिल्ली पोलीस घटनास्थळी पोहोचले आणि फ्लॅटचा दरवाजा तोडला असता घरात तीन मृतदेह आढळले. खोलीचा दरवाजा आणि खिडकीही आतून बंद होती.

पोलीस अधिकाऱ्याने सांगितले की, घराची झडती घेतली असता एक सुसाईड नोट सापडली. मंजू आणि तिच्या दोन मुली अंशिका आणि अंकू यांचे मृतदेह आतल्या खोलीत बेडवर पडलेले होते, तपासात तिघींचाही गुदमरून मृत्यू झाल्याचे समोर आले. एप्रिल 2021 मध्ये कुटुंबप्रमुखाचा कोरोनामुळे मृत्यू झाला आणि त्यानंतर मंजूसह संपूर्ण कुटुंब नैराश्यात गेले होते. पोलिसांनी मृतदेह ताब्यात घेऊन पोस्टमार्टमसाठी पाठवले.

आत्महत्येपूर्वी घराला बनवले गॅस चेंबर
पोलिसांना सापडलेल्या सुसाईड नोटनुसार, आई आणि मुलींनी पूर्ण योजना बनवली आणि घराला गॅस चेंबर बनवले. त्यांनी घर पूर्णपणे विषारी वायूने भरले. खिडकी पॉलिथिनने झाकली. त्यानंतर घर पूर्णपणे पॅक करून घरात आग पेटवली. त्यानंतर घरातील गॅस सिलेंडर उघडले. यामुळे विषारी गॅस पसरून आई आणि दोन मुलींचा तडफडून मृत्यू झाला.

मिळालेल्या माहितीनुसार, जेव्हा पोलिस घरात गेले तेव्हा त्यांना एक सुसाईड नोट सापडली, ज्यामध्ये लिहिले होते की दरवाजा उघडल्यानंतर काडीपेटी किंवा लाइटर लावू नका. घरामध्ये अतिशय प्राणघातक असा विषारी वायू भरलेला आहे. मृत्यूनंतर पोलीस जेव्हा आत जातील तेव्हा अपघात होऊ नये यासाठी हे लिहून ठेवले होते. या घटनेनंतर सर्वत्र खळबळ उडाली आहे.