श्रीनगरमध्ये पोलिस कॉन्स्टेबलची दहशतवाद्यांकडून गोळ्या झाडून हत्या, त्यांची 7 वर्षांची मुलगी जखमी

श्रीनगर : श्रीनगरमध्ये एका पोलिस कॉन्स्टेबलची दहशतवाद्यांनी गोळ्या झाडून हत्या केली. यावेळी त्यांची मुलगीही जखमी झाली. जम्मू-काश्मीरमध्ये दहशतवाद्यांनी पुन्हा एकदा सुरक्षा दलांना लक्ष्य केले आहे. काश्मीर झोन पोलिसांनी दिलेल्या माहितीनुसार, दहशतवाद्यांनी हवालदार सैफुल्लाह कादरी यांच्यावर सौरा भागातील त्यांच्या घरात गोळीबार केला.

मिळालेल्या माहितीनुसार, कादरी यांना सौरा येथील शेर-ए-काश्मीर इन्स्टिट्यूट ऑफ मेडिकल सायन्सेस (SKIMS) रुग्णालयात नेण्यात आले, तेथे त्यांचा मृत्यू झाला. तर हल्ला झाला त्यावेळी त्यांची ७ वर्षांची मुलगी त्यांच्याजवळच होती. तीदेखील या हल्ल्यात जखमी झाली होती, पण आता तिची प्रकृती स्थिर असल्याचे समजते. दरम्यान, गुन्हेगारांना पकडण्यासाठी पोलीस पथके लगतच्या भागात पाठवण्यात आली आहेत.

यापूर्वी, 13 मे रोजी दहशतवाद्यांनी पुलवामा जिल्ह्यातील पोलीस कॉन्स्टेबल रियाझ अहमद ठोकर यांची त्यांच्या राहत्या घरी गोळ्या झाडून हत्या केली होती. त्याचवेळी, याच्या एक दिवस आधी 12 मे रोजी बडगाम जिल्ह्यात दहशतवाद्यांनी सरकारी कर्मचारी राहुल भट यांच्या कार्यालयात घुसून त्यांची हत्या केली होती.