दिलासादायक! LPG सिलिंडरच्या दरात मोठी कपात, जाणून घ्या आजची किंमत…

नवी दिल्ली : महागाईने त्रस्त असलेल्या लोकांना काहीसा दिलासा मिळाला आहे. सरकारी पेट्रोलियम कंपन्यांनी आज एलपीजी सिलिंडरचे नवीन दर जारी केले आहेत. 19 किलोचा व्यावसायिक एलपीजी सिलिंडर 135 रुपयांनी स्वस्त झाला आहे. नवीन दर आजपासून लागू झाले आहेत. मात्र, घरगुती एलपीजी सिलिंडरच्या दरात कोणताही बदल केलेला नाही.

दर कपातीनंतर आता दिल्लीत 19 किलोचा सिलेंडर 2354 रुपयांऐवजी 2219 रुपयांना मिळणार आहे. कोलकात्यात त्याची किंमत आता 2454 रुपयांवरून 2322 रुपयांवर आली आहे. मुंबईत आता 2306 रुपयांऐवजी 2171.50 रुपयांना मिळणार आहे, तर चेन्नईमध्ये ग्राहकांना 2507 रुपयांऐवजी 2373 रुपये मोजावे लागणार आहेत.

यापूर्वी, गेल्या दोन महिन्यांत व्यावसायिक एलपीजी सिलिंडरच्या किंमतीत अनेक वेळा वाढ झाली होती. मार्चमध्ये दिल्लीत 19 किलोच्या एलपीजी सिलिंडरची किंमत 2,012 रुपये होती. 1 एप्रिल रोजी त्याची किंमत 2,253 रुपये करण्यात आली. त्यानंतर 1 मे रोजी त्याची किंमत 102 रुपयांनी वाढवण्यात आली. यानंतर व्यावसायिक सिलिंडरची किंमत 2,354 रुपये झाली.

घरगुती एलपीजी सिलेंडरच्या दरात कोणताही बदल नाही
पेट्रोलियम कंपन्यांनी घरगुती एलपीजी सिलिंडरच्या दरात कोणताही बदल केलेला नाही. मात्र मे महिन्यातच त्याची किंमत दोनदा वाढवण्यात आली. 7 मे रोजी कंपन्यांनी 14.2 किलोच्या सिलेंडरची किंमत 50 रुपयांनी वाढवली होती. त्यानंतर 19 मे रोजी 3.50 रुपयांच्या वाढीसह अनेक शहरांमध्ये त्याची किंमत 1000 रुपयांच्या पुढे गेली. यानंतर दिल्लीत 14.2 किलोच्या घरगुती एलपीजी सिलेंडरची किंमत 1003 रुपयांवर पोहोचली होती.